‘သခင်၊ ဆုတောင်းခြင်းငှာ အကျွန်ုပ်တို့အား နည်းပေးတော်မူပါ’
‘သခင်၊ ဆုတောင်းခြင်းငှာ အကျွန်ုပ်တို့အား နည်းပေးတော်မူပါ’
‘တပည့်တစ်ယောက်က “သခင်၊ ဆုတောင်းခြင်းငှာ အကျွန်ုပ်တို့အား နည်းပေးတော်မူပါ” ဟုလျှောက်၏။’—လုကာ ၁၁:၁။
၁။ ယေရှု၏တပည့်တစ်ယောက်သည် သူ့အား ဆုတောင်းနည်းသင်ပေးရန် အဘယ်ကြောင့် ပန်ကြားခဲ့သနည်း။
စီ.အီး. ၃၂ ခုနှစ်၌ တစ်ချိန်တွင် ယေရှု၏တပည့်တစ်ယောက်သည် ကိုယ်တော်ဆုတောင်းနေသည်ကိုသတိပြုမိသည်။ ခမည်းတော်ထံ ယေရှု ဘာပြောနေသည်ကို သူမကြားရပေ၊ ကိုယ်တော် အသံတိတ်ဆုတောင်းနေ၍ဖြစ်မည်။ သို့ဖြစ်လင့်ကစား ယေရှု ဆုတောင်းပြီးချိန်တွင် အဆိုပါတပည့်က ‘သခင်၊ ဆုတောင်းခြင်းငှာ အကျွန်ုပ်တို့အား နည်းပေးတော်မူပါ’ ဟု ပန်ကြားလေသည်။ (လုကာ ၁၁:၁) ဤသို့တောင်းဆိုသည့်အကြောင်းကားအဘယ်နည်း။ ဆုတောင်းခြင်းသည် ဂျူးတို့၏ဘဝ၊ ဂျူးတို့၏ဝတ်ပြုရေးတွင် အမြဲပါဝင်သည်။ ဟေဗြဲကျမ်းအပိုင်းမှ ဆာလံကျမ်းနှင့် အခြားကျမ်းစောင်တို့တွင် ဆုတောင်းချက်များစွာ ပါရှိသည်။ ထို့ကြောင့် ဤတပည့်သည် သူလုံးဝမသိသောအရာ သို့မဟုတ် တစ်ခါမျှ မပြုဖူးသောအရာကို သင်ကြားပေးပါရန် ပန်ကြားနေခြင်း မဟုတ်ပေ။ ဤသူသည် ယုဒဘာသာရေးခေါင်းဆောင်များ၏ တခမ်းတနား ဆုတောင်းမှုများနှင့် ရင်းနှီးနေပြီးသားဖြစ်မည်မှာ သေချာသည်။ သို့သော် ယခု သူသည် ယေရှုဆုတောင်းနေပုံကို သတိထားမိကာ ရဗ္ဗိတို့၏ သူတော်ကောင်းဟိတ်ဟန်ထုတ် ဆုတောင်းချက်များနှင့် ယေရှု၏ဆုတောင်းပုံ အင်မတန်ကွာခြားလှသည်ဟု ခံစားမိသွားပုံရသည်။—မဿဲ ၆:၅-၈။
၂။ (က) ကျွန်ုပ်တို့သည် စံပြဆုတောင်းနည်းကို လုံးစေ့ပတ်စေ့ပြန်ရွတ်စေဖို့ ယေရှုမရည်ရွယ်ကြောင်း အဘယ်အချက်က ပြသနည်း။ (ခ) ဆုတောင်းနည်းကို ကျွန်ုပ်တို့အဘယ်ကြောင့် သိချင်နေကြသနည်း။
၂ လွန်ခဲ့သည့် ၁၈ လခန့်က တောင်ပေါ်တရားတော်ပေးချိန်တွင် ယေရှုသည် မိမိ၏တပည့်များ ဆုတောင်းကြသည့်အခါ နမူနာယူနိုင်ရန် စံပြဆုတောင်းနည်းကို မိန့်ကြားပေးထားပြီးဖြစ်သည်။ (မဿဲ ၆:၉-၁၃) ဖြစ်နိုင်သည်မှာ ထိုစဉ်က အဆိုပါတပည့် ရှိမနေ၍ ဤစံပြဆုတောင်းနည်းမှ အရေးကြီးအချက်များကို ယေရှုသည် ကြင်နာစွာ ပြန်၍မိန့်ကြားခဲ့၏။ မှတ်သားဖွယ်မှာ လုံးစေ့ပတ်စေ့ပြန်ရွတ်မပြခြင်းဖြစ်သည်၊ ယင်းက ကိုယ်တော်သည် နှုတ်တိုက်ရွတ်ပြရလေ့ရှိသည့် ခရစ်ယာန်ဝတ်တက်နည်းဖြင့် ဆုတောင်းနေခြင်းမဟုတ်ကြောင်း တင်ပြသည်။ (လုကာ ၁၁:၁-၄) အမည်ဖော်ပြမထားသည့် အဆိုပါတပည့်နည်းတူ ကျွန်ုပ်တို့လည်း မိမိတို့၏ဆုတောင်းချက်များဖြင့် ယေဟောဝါအထံပါး ချဉ်းကပ်နိုင်မည့် ဆုတောင်းနည်းကို သင်ကြားလိုကြမည်။ သို့ဖြစ်၍ တမန်တော်မဿဲ မှတ်တမ်းတင်ခဲ့သည့် စံပြဆုတောင်းနည်းအပြည့်အစုံကို ဆန်းစစ်ကြည့်ကြပါစို့။ ယင်းတွင် တောင်းဆိုချက် ခုနစ်ချက်ဖြစ်သည့် ဘုရားသခင့်ရည်ရွယ်ချက်အကြောင်း သုံးချက်နှင့် ရုပ်ပိုင်းနှင့် ဝိညာဉ်ရေးပိုင်း လိုအပ်ချက် လေးချက် ပါဝင်သည်။ ဤဆောင်းပါးတွင် ဦးဆုံးအသနားခံချက်သုံးချက်ကို သုံးသပ်မည်။
မေတ္တာရှင် အဘ
၃၊ ၄။ ယေဟောဝါအား ကျွန်ုပ်တို့၏ “အဘ” ဟုခေါ်လိုက်ခြင်းသည် အဘယ်အဓိပ္ပာယ်ရှိသနည်း။
၃ ယေဟောဝါနှင့် ရင်းနှီးပြီး လေးမြတ်မှုရှိသော ဆက်ဆံရေးရှိထားကြောင်း ကျွန်ုပ်တို့၏ဆုတောင်းချက်များ ထင်ဟပ်နေရမည်ကို အစကတည်းက ယေရှု ပြသတော်မူခဲ့သည်။ ထိုတောင်စောင်းတွင် ကိုယ်တော်ထံစုဝေးချဉ်းကပ်လာကြကုန်သော တပည့်များ၏အကျိုးကို အဓိကရည်မျှော်လျက် ယေဟောဝါအား “ကောင်းကင်ဘုံ၌ ရှိတော်မူသော ကျွန်ုပ်တို့၏အဘ” ဟုခေါ်ရန် သူတို့ကို ယေရှု မိန့်ကြားခဲ့သည်။ (မဿဲ ၆:၉) ကျမ်းတတ်တစ်ဦး၏အဆိုအရ ယေရှုသည် အများသုံး ဟေဗြဲစကားဖြင့်ဖြစ်စေ၊ အာရမိတ်စကားဖြင့်ဖြစ်စေ မိန့်ကြားသည့်အခါ ကိုယ်တော်အသုံးပြုခဲ့သော “အဘ” ဟူသည့်အသုံးအနှုန်းသည် ‘ကလေးငယ်၏ ခေါ်သံမျိုး’ တွယ်တာမှုသံယောဇဉ်အသုံးအနှုန်းဖြစ်သည်။ ယေဟောဝါအား ကျွန်ုပ်တို့၏အဘဟု ခေါ်လိုက်ခြင်းက နွေးထွေး၊ ယုံကြည်စိတ်ချသော ဆက်ဆံရေးရှိကြောင်း ပြနေသည်။
၄ “ကျွန်ုပ်တို့၏အဘ” ဟုဆိုလိုက်ခြင်းဖြင့် မိမိတို့သည် ယေဟောဝါအား အသက်ပေးရှင်အဖြစ်အသိအမှတ်ပြုထားကြသော အမျိုးသား၊ အမျိုးသမီးများပါဝင်သည့် မိသားစုကြီးအဝင်ဖြစ်ကြောင်း ကိုယ့်ကိုယ်ကို ဝန်ခံနေရာလည်းကျသည်။ (ဟေရှာယ ၆၄:၈; တမန်တော် ၁၇:၂၄၊ ၂၈) ဝိညာဉ်တော်ဖွား ခရစ်ယာန်များသည် “ဘုရားသခင်၏သား” အဖြစ်မွေးစားခြင်းခံကြရပြီး ကိုယ်တော်အား “အဗ္ဗ၊ အဘဟုခေါ်ရသောအခွင့်” ရရှိကြ၏။ (ရောမ ၈:၁၄၊ ၁၅) သူတို့တွင် သစ္စာရှိအဆွေမွန် သန်းနှင့်ချီ ရှိလာပြီ။ ဤသူတို့သည် မိမိတို့၏ဘဝကို ယေဟောဝါထံ အပ်နှံကာ ထိုဆက်ကပ်အပ်နှံမှုကို ရေတွင်နှစ်ခြင်းခံခြင်းအားဖြင့် အမှတ်ပြုခဲ့ကြပြီ။ ဤ “အခြားသိုး” အားလုံးလည်း ယေရှု၏နာမကိုအမှီပြု၍ ယေဟောဝါထံ ချဉ်းကပ်ကာ ကိုယ်တော်အား “ကျွန်ုပ်တို့၏အဘ” ဟု ခေါ်နိုင်ကြသည်။ (ယောဟန် ၁၀:၁၆; ၁၄:၆) ကျွန်ုပ်တို့အပေါ် ကောင်းကင်ဘုံအဘ သွန်းလောင်းသော ကောင်းမြတ်မှုအားလုံးအတွက် ကိုယ်တော်အား ကျေးဇူးတင်ချီးမွမ်းရန်၊ ဂရုစိုက်စောင့်ရှောက်ပေးတော်မူကြောင်း ယုံကြည်စိတ်ချစွာဖြင့် ဖိစီးမှုဝန်ထုပ်များကို ကြားလျှောက်ရန် ကိုယ်တော်ထံ ဆုတောင်းခြင်းအားဖြင့် မှန်မှန်ချဉ်းကပ်နိုင်ပါသည်။—ဖိလိပ္ပိ ၄:၆၊ ၇; ၁ ပေတရု ၅:၆၊ ၇။
ယေဟောဝါ၏နာမတော်ကို မြတ်နိုးခြင်း
၅။ စံပြဆုတောင်းနည်း၏ စစချင်းအသနားခံချက်ကား အဘယ်နည်း၊ ယင်းသည် အဘယ်ကြောင့် လျောက်ပတ်သနည်း။
၅ စတင်အသနားခံသည်နှင့် ဦးစားပေးရမည့်အရာကို ထိပ်ဆုံးထားရ၏။ “ကိုယ်တော်၏နာမတော်အား ရိုသေလေးမြတ်ခြင်းရှိပါစေသော” ဟုဆိုရမည်။ (မဿဲ ၆:၉) မှန်ပေသည်၊ ယေဟောဝါ၏နာမတော်အား ရိုသေလေးမြတ်ခြင်းသည် ကျွန်ုပ်တို့ အဓိကအလေးထားသင့်ရာဖြစ်သည်၊ အကြောင်းမှာ ကိုယ်တော်ကို ကျွန်ုပ်တို့ချစ်မြတ်နိုးကြပြီး အဘက်ဘက်မှ ကိုယ်တော်၏နာမတော် ရှုတ်ချခံနေရခြင်းကို မမြင်လိုကြ၍ဖြစ်သည်။ စာတန်၏ပုန်ကန်မှုနှင့် ကနဦးလူသားမောင်နှံကို ယေဟောဝါဘုရားသခင်အားမနာခံစေရန် သူ ဖြားယောင်းသွေးထိုးခြင်းဖြင့် ကိုယ်တော်၏ စကြဝဠာအကြွင်းမဲ့ပိုင်သအုပ်စိုးမှုအာဏာကို ကိုယ်တော်အသုံးပြုပုံအပေါ် စောဒကတက်စေ၍ နာမတော်ကို အသရေဖျက်ခဲ့လေသည်။ (ကမ္ဘာဦး ၃:၁-၆) ထို့အပြင် ယေဟောဝါ၏နာမတော်သည် ကိုယ်တော်အား ကိုယ်စားပြုပါသည်ဟုဆိုကြသူများ၏ အရှက်မဲ့အပြုအမူနှင့် သွန်သင်ချက်များကြောင့် ရာစုနှစ်များတစ်လျှောက် ရှုတ်ချခံလာရလေပြီ။
၆။ ယေဟောဝါ၏နာမတော် ရိုသေလေးမြတ်ခြင်းရှိပါစေဟု ကျွန်ုပ်တို့ဆုတောင်းလျှင် အဘယ်အရာကို ကျွန်ုပ်တို့ ပြုလုပ်မည်မဟုတ်သနည်း။
၆ ယေဟောဝါ၏နာမတော် ရိုသေလေးမြတ်ခြင်းရှိပါစေဟု ကျွန်ုပ်တို့ဆုတောင်းခြင်းက စကြဝဠာအကြွင်းမဲ့ပိုင်သအုပ်စိုးမှုအာဏာ အရေးကိစ္စတွင် စကြဝဠာကို ယေဟောဝါ အုပ်စိုးပိုင်ထိုက်တော်မူ၏ဟုဆိုသည့်အုပ်စုဘက် ကျွန်ုပ်တို့ ရာနှုန်းပြည့်ရပ်တည်၍ ထောက်ခံကြောင်း ပြသလိုက်ခြင်းဖြစ်သည်။ ယေဟောဝါ၏အလိုတော်မှာ ဤစကြဝဠာကြီးတွင် မိမိအား ချစ်မြတ်နိုးပြီး မိမိ၏နာမတော်ကို ကိုယ်စားပြုမှုအစုစုကိုပါ မြတ်နိုးသောကြောင့် မိမိ၏ဖြောင့်မှန်သော အကြွင်းမဲ့အုပ်စိုးပိုင်ထိုက်မှုကို လိုလိုလားလား၊ ပျော်ပျော်ရွှင်ရွှင် လက်အောက်ခံသည့် အသိဉာဏ်ရှိသတ္တဝါများအား မှီတင်းနေထိုင်စေလိုတော်မူခြင်းဖြစ်သည်။ (၁ ရာဇဝင်ချုပ် ၂၉:၁၀-၁၃; ဆာလံ ၈:၁; ၁၄၈:၁၃) ယေဟောဝါ၏နာမတော်ကို ကျွန်ုပ်တို့၏မြတ်နိုးမှုသည် ဤမြင့်မြတ်သောနာမတော်အား ရှုတ်ချစရာဖြစ်စေနိုင်သည့်အမှုများကို မလုပ်မိစေရန် အကူအညီပေးမည်။ (ယေဇကျေလ ၃၆:၂၀၊ ၂၁; ရောမ ၂:၂၁-၂၄) စကြဝဠာနှင့် ယင်းတွင် မှီတင်းနေထိုင်ကြမည့်သူများ၏ ငြိမ်သက်မှုသည် ယေဟောဝါ၏နာမတော်ကို ရိုသေလေးမြတ်ခြင်းနှင့် ကိုယ်တော်၏အကြွင်းမဲ့ပိုင်သအုပ်စိုးမှုကို မြတ်မြတ်နိုးနိုး လက်အောက်ခံခြင်းတို့ပေါ်တွင် တည်မှီနေသောကြောင့် “ကိုယ်တော်၏နာမတော် ရိုသေလေးမြတ်ခြင်းရှိပါစေသော” ဟု ကျွန်ုပ်တို့ဆုတောင်းခြင်းက ယေဟောဝါ၏ရည်ရွယ်ချက် ပြည့်စုံမည်ကို ယုံကြည်စိတ်ချကြောင်း ကိုယ်တော်အား ချီးမွမ်းထောမနာပြုလိုက်ခြင်းပင်ဖြစ်သည်။—ယေဇကျေလ ၃၈:၂၃။
ကျွန်ုပ်တို့ဆုတောင်းကြသည့် ဘုရားသခင့်နိုင်ငံတော်
၇၊ ၈။ (က) အဘယ်နိုင်ငံတော်အတွက် ကျွန်ုပ်တို့ ဆုတောင်းကြရန် ယေရှု သင်ကြားပေးတော်မူခဲ့သနည်း။ (ခ) ဒံယေလနှင့် ဗျာ. ကျမ်းတို့တွင် ဤနိုင်ငံတော်အကြောင်း ကျွန်ုပ်တို့ အဘယ်အရာသိရသနည်း။
၇ စံပြဆုတောင်းနည်းတွင် ဒုတိယအသနားခံချက်မှာ “[ဘုရားသခင့်] နိုင်ငံတော်တည်ထောင်ပါစေသော”ဖြစ်သည်။ (မဿဲ၆:၁၀က) ဤတောင်းခံမှုသည် ပထမအချက်နှင့် အတော်ပင် ဆက်နွှယ်နေသည်။ ယေဟောဝါ၏မြင့်မြတ်သောနာမတော်ကို ရိုသေလေးမြတ်စေဖို့ ကိုယ်တော်အသုံးပြုသည့်အရာမှာ ထိုက်တန်သော ခန့်အပ်ခံဘုရင် သားတော် ယေရှုခရစ်အမှူးပြုသော ကိုယ်တော်၏ ကောင်းကင်အစိုးရ မေရှိယနိုင်ငံတော်ပင်ဖြစ်သည်။ (ဆာလံ ၂:၁-၉) ဤမေရှိယနိုင်ငံတော်ကို ဒံယေလပရောဖက်ပြုချက်တွင် “တောင်” ပေါ်မှ ပဲ့ကွာလာသည့် “ကျောက်” တစ်လုံးအဖြစ် တင်စားဖော်ပြထားသည်။ (ဒံယေလ ၂:၃၄၊ ၃၅၊ ၄၄၊ ၄၅) အဆိုပါတောင်သည် ယေဟောဝါ၏ စကြဝဠာအကြွင်းမဲ့ပိုင်သအုပ်စိုးမှုအာဏာကို ကိုယ်စားပြုရာ၊ နိုင်ငံတော်ကိုယ်စားပြု ကျောက်သည် ယေဟောဝါ၏ စကြဝဠာအုပ်ချုပ်မှု အသွင်သစ်တစ်ရပ်ဖြစ်သည်။ ပရောဖက်ပြုချက်ပါ ဤကျောက်သည် “တောင်ကြီးဖြစ်၍ မြေကြီးတစ်ပြင်လုံးကို ဖုံးလွှမ်း” သွားခြင်းက မေရှိယနိုင်ငံတော်သည် ကမ္ဘာကြီးကို စိုးမိုးသည့် ဘုရားသခင့်အကြွင်းမဲ့ပိုင်သအုပ်စိုးမှုကို ကိုယ်စားပြုကြောင်းပြသည်။
၈ ဤမေရှိယနိုင်ငံတော်အစိုးရတွင် ခရစ်တော်နှင့်အတူ ဘုရင်နှင့်ယဇ်ပုရောဟိတ်များအဖြစ် အုပ်စိုးကြမည့် “လူအမျိုးအနွယ်ခပ်သိမ်းတို့အထဲမှ” ၁၄၄,၀၀၀ တို့ ပါဝင်ဖွဲ့စည်းကြမည်။ (ဗျာ. ၅:၉၊ ၁၀; ၁၄:၁-၄; ၂၀:၆) ဒံယေလက ဤသူများကို ‘အမြင့်ဆုံးသောဘုရားသခင်၏သန့်ရှင်းသူတို့’ ဟုခေါ်ဆိုထားပြီး ခေါင်းဆောင် ခရစ်တော်နှင့်အတူ “ကောင်းကင်အောက်၌ နိုင်ငံနှင့်တကွ အာဏာစက်ဘုန်းတန်ခိုးကို ... ရကြလိမ့်မည်။ ထိုဘုရားသခင်၏နိုင်ငံတော်သည် ထာဝရနိုင်ငံဖြစ်၏။ မင်းကြီးအပေါင်းတို့သည် တိုးဝင်၍ ကျွန်ခံရကြလိမ့်မည်။” (ဒံယေလ ၇:၁၃၊ ၁၄၊ ၁၈၊ ၂၇) ဤကဲ့သို့သော ကောင်းကင်အစိုးရမျိုးအတွက် နောက်တော်လိုက်များ ဆုတောင်းကြရန် ခရစ်တော် သင်ကြားပေးတော်မူခဲ့သည်။
ဘုရားသခင့်နိုင်ငံတည်ထောင်ပါစေဟု အဘယ်ကြောင့် ဆက်ဆုတောင်းရန်လို
၉။ ဘုရားသခင်၏နိုင်ငံတော် တည်ထောင်ပါစေဟု ဆုတောင်းခြင်းသည် အဘယ်ကြောင့်သင့်လျော်နေဆဲဖြစ်ပါသနည်း။
၉ ကိုယ်တော်၏ စံပြဆုတောင်းနည်းတွင် ခရစ်တော်က ဘုရားသခင့်နိုင်ငံတော် တည်ထောင်ပါစေဟု ဆုတောင်းရန် သင်ကြားပေးခဲ့သည်။ ကျမ်းစာပရောဖက်ပြုချက်ပြည့်စုံမှုအရ ဤမေရှိယနိုင်ငံတော်သည် ၁၉၁၄ ခုနှစ်တွင် ကောင်းကင်၌ တည်ထောင်ပြီဖြစ်၏။ * သို့ဆိုလျှင် နိုင်ငံတော် “တည်ထောင်” ပါစေဟု ဆက်ဆုတောင်းသင့်ပါသလော။ ဆုတောင်းသင့်ပါသည်။ ဒံယေလပရောဖက်ပြုချက်တွင် ကျောက်ဖြင့် တင်စားဖော်ပြထားသော မေရှိယနိုင်ငံတော်နှင့် ရုပ်တုကြီးဖြင့်တင်စားဖော်ပြသော လူ့အုပ်ချုပ်ရေးတို့သည် အတိုက်အခံလမ်းကြောင်းပေါ်တွင် ရှိနေကြ၍ဖြစ်သည်။ ထိုကျောက်သည် ရုပ်တုကို အမှုန့်ဖြစ်သွားသည်အထိ ထိခိုက်ချိုးဖဲ့ရသည်။ ဒံယေလပရောဖက်ပြုချက်က “ထိုနိုင်ငံသည် အခြားသောလူမျိုးလက်သို့မရောက်ရဘဲ အထက်ဆိုခဲ့ပြီးသောနိုင်ငံတို့ကို ချိုးဖဲ့ဖျက်ဆီး၍ အစဉ်အမြဲတည်လိမ့်မည်” ဟုဆိုထားသည်။—ဒံယေလ ၂:၄၄၊ ၄၅။
၁၀။ ဘုရားသခင့်နိုင်ငံတော် တည်ထောင်မည်ကို ကျွန်ုပ်တို့ အဘယ်ကြောင့် မြင်လိုလှသနည်း။
၁၀ စာတန်၏ ဆိုးယုတ်သောအစီအစဉ်စနစ်ကို တိုက်ဖျက်မည့် ဘုရားသခင့်နိုင်ငံတော် တည်ထောင်မည်ကို ကျွန်ုပ်တို့ တွေ့မြင်လိုလှသည်၊ အကြောင်းမှာ ဤနိုင်ငံတော်သည် ယေဟောဝါ၏နာမတော်ကို ရိုသေလေးမြတ်စေပြီး ဘုရားသခင့် အကြွင်းမဲ့ပိုင်သအုပ်စိုးမှုအာဏာကို ဆန့်ကျင်သူမှန်သမျှအား သုတ်သင်ပစ်မည့်အတွက်ဖြစ်သည်။ ကျွန်ုပ်တို့သည် ‘ဘုရားသခင့်နိုင်ငံတော် တည်ထောင်ပါစေ’ ဟု လှိုက်လှိုက်လှဲလှဲ ဆုတောင်းကြပြီး တမန်တော်ယောဟန်နှင့်အတူ “အာမင်။ သခင်ယေရှုကြွလာတော်မူပါ” ဟု လျှောက်ဆိုကြသည်။ (ဗျာ. ၂၂:၂၁) မှန်ပေသည်၊ ယေရှုသည် ယေဟောဝါ၏နာမတော်အား ရိုသေလေးမြတ်ခြင်းရှိစေရန်နှင့် ကိုယ်တော်၏အကြွင်းမဲ့ပိုင်သအုပ်စိုးမှု သံသယကင်းရှင်းသွားစေရန် ယေရှုကြွလာပါစေ၊ သို့မှသာ ဆာလံဆရာ၏ ဤစကားများပြည့်စုံလာပေမည်– “ထာဝရဘုရား [“ယေဟောဝါ၊” ကဘ] ဟူ၍နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရား[သခင်] ဖြစ်တော်မူကြောင်းကို သိကြပါစေသော။”—ဆာလံ ၈၃:၁၈။
‘အလိုတော်ပြည့်စုံပါစေ’
၁၁၊ ၁၂။ (က) ဘုရားသခင့်အလိုတော် “ကောင်းကင်ဘုံ၌ ပြည့်စုံသကဲ့သို့ မြေကြီးပေါ်တွင် ပြည့်စုံပါစေ” ဟု ကျွန်ုပ်တို့ ဆုတောင်းကြသောအခါ အဘယ်အရာကို ကျွန်ုပ်တို့ တောင်းလျှောက်နေခြင်းဖြစ်သနည်း။ (ခ) ယေဟောဝါ၏အလိုတော် ပြည့်စုံပါစေဟု ကျွန်ုပ်တို့ဆုတောင်းခြင်းဖြင့် အဘယ်အရာကိုလည်း ဆိုလိုသေးသနည်း။
၁၁ တပည့်များ ဆုတောင်းရန် ယေရှု နောက်ထပ်သင်ကြားပေးသည့်အချက်မှာ “အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်မှာ ပြည့်စုံပါစေသော” ဟူ၍ဖြစ်သည်။ (မဿဲ ၆:၁၀) ဤစကြဝဠာကြီးသည် ယေဟောဝါ၏အလိုတော်ကြောင့် တည်ရှိလာခြင်းဖြစ်သည်။ ခွန်အားကြီးမားသော ကောင်းကင်သတ္တဝါများက ဤသို့ကြွေးကြော်ကြသည်– “အိုထာဝရဘုရား[သခင်]၊ ကိုယ်တော်သည် ခပ်သိမ်းသောအရာတို့ကို ဖန်ဆင်းတော်မူပြီ။ ထိုအရာတို့သည် အလိုတော်ကြောင့်ဖြစ်၍ ဖန်ဆင်းလျက်ရှိကြပါ၏။ ထိုကြောင့်၊ ကိုယ်တော်သည် ဘုန်းအသရေတန်ခိုးတော်ကို ခံစားထိုက်တော်မူ၏။” (ဗျာ. ၄:၁၁) ယေဟောဝါတွင် “ကောင်းကင်ပေါ်၊ မြေကြီးပေါ်မှာရှိရှိသမျှတို့” အတွက် ရည်ရွယ်ချက်ရှိထားတော်မူသည်။ (ဧဖက် ၁:၈-၁၀) ဘုရားသခင့်အလိုတော် ပြည့်စုံရန် ကျွန်ုပ်တို့ဆုတောင်းကြခြင်းမှာ အမှန်အားဖြင့် ယေဟောဝါအား ကိုယ်တော်၏ရည်ရွယ်ချက် အကောင်အထည်ဖော်ရန် တောင်းခံနေခြင်းသာဖြစ်သည်။ ထို့အပြင် ဤနည်းဖြင့် ဘုရားသခင့် အလိုတော် စကြဝဠာတစ်ခွင် ပြည့်စုံမည်ကို တွေ့မြင်လိုလှကြောင်း ကျွန်ုပ်တို့ပြသနေခြင်းဖြစ်သည်။
၁၂ ဤဆုတောင်းချက်အားဖြင့် ကျွန်ုပ်တို့၏အသက်တာကို ယေဟောဝါ၏အလိုတော်အတိုင်းဖြစ်စေလိုသည့် မိမိတို့၏စိတ်ဆန္ဒကို ဖော်ပြလိုက်ခြင်းလည်းဖြစ်သည်။ ယေရှုက “ငါ့ကိုစေလွှတ်တော်မူသောသူ၏ အလိုတော်ကိုဆောင်ခြင်း၊ သူ၏အမှုတော်ကိုပြီးစီးခြင်းအမှုသည် ငါ့စားစရာဖြစ်၏” ဟု မိန့်ကြားခဲ့၏။ (ယောဟန် ၄:၂၃) ယေရှုကဲ့သို့ပင် ဆက်ကပ်အပ်နှံ ခရစ်ယာန်များဖြစ်သော ကျွန်ုပ်တို့သည် ဘုရားသခင့်အလိုတော်ဆောင်ရခြင်းကို နှစ်ထောင်းအားရဖြစ်ကြရသည်။ ယေဟောဝါနှင့် သားတော်တို့အပေါ် ကျွန်ုပ်တို့ ချစ်သည့်မေတ္တာက မိမိတို့၏အသက်တာကို ‘လူတို့၏တပ်မက်ခြင်းတရားအတိုင်းမဟုတ် ဘုရားသခင်၏အလိုတော်အတိုင်းကျင့်’ ကြံပြုမူရန် လှုံ့ဆော်ပေးပါသည်။ (၁ ပေတရု ၄:၁၊ ၂; ၂ ကောရိန္သု ၅:၁၄၊ ၁၅) ယေဟောဝါအလိုတော်နှင့် ဆန့်ကျင်ကြောင်း သိရှိထားသည့်အဘယ်အရာကိုမဆို မလုပ်မိရန် ကျွန်ုပ်တို့ကြိုးစားကြသည်။ (၁ သက်သာလောနိတ် ၄:၃-၅) သမ္မာကျမ်းစာ လေ့လာဖတ်ရှုရန် အချိန်ကို ရွေးနုတ်ခြင်းအားဖြင့် ‘ဘုရားသခင့်နိုင်ငံတော်နှင့်ယှဉ်သော ဧဝံဂေလိတရားကို’ တက်တက်ကြွကြွ ဟောပြောခြင်းပါဝင်သည့် ‘ဘုရားသခင်၏အလိုတော်ရှိရာကို ပိုင်းခြား၍သိ’ လာနေကြပြီ။—ဧဖက် ၅:၁၅-၁၇; မဿဲ ၂၄:၁၄။
ကောင်းကင်ဘုံတွင် ယေဟောဝါ၏အလိုတော်
၁၃။ ဘုရားသခင့်အလိုတော်သည် စာတန်မပုန်ကန်မီ ကြာမြင့်စွာကတည်းက မည်သို့ပြည့်စုံလျက်ရှိသနည်း။
၁၃ ယေဟောဝါ၏အလိုတော်သည် ကိုယ်တော်၏ဝိညာဉ်သားတစ်ပါး ပုန်ကန်ပြီး စာတန်မဖြစ်လာမီ ကြာမြင့်စွာအချိန်ကပင် ကောင်းကင်တွင် ပြည့်စုံလျက်ရှိ၏။ နယပုံပြင်ကျမ်းတွင် ဘုရားသခင်၏သားဦးအား လူ့အသွင်ဆောင်သော ဉာဏ်ပညာအဖြစ် တင်စားသရုပ်ဖော်ထားသည်။ ရှေးကဘေကမ္ဘာကတည်းက ဘုရားသခင့် တစ်ပါးတည်းသော သားတော်သည် ခမည်းတော်၏အလိုတော် ဆောင်ရခြင်း၌ “အစဉ်မပြတ်မွေ့လျော်” ကြောင်းဖော်ပြ၏။ နောက်ဆုံးတွင် ကိုယ်တော်သည် “ကောင်းကင်ပေါ်၊ မြေကြီးပေါ်မှာရှိသမျှ ရူပအရာ၊ အရူပအရာ ခပ်သိမ်းသောအရာတို့ကို ဖန်ဆင်းတော်မူ” ရာတွင် ယေဟောဝါ၏ “လုပ်သားချုပ်” ဖြစ်လာလေ၏။ (သု. ၈:၂၂-၃၁၊ ကဘ; ကောလောသဲ ၁:၁၅-၁၇) ယေဟောဝါသည် သူ့အား မိမိ၏ပြောရေးဆိုခွင့်ရှိသူအဖြစ် အသုံးပြုတော်မူသည်။—ယောဟန် ၁:၁-၃။
၁၄။ ကောင်းကင်တွင် ကောင်းကင်တမန်များ ယေဟောဝါ၏အလိုတော် ပြည့်စေကြပုံအကြောင်း ဆာလံ ၁၀၃ မှ အဘယ်အရာသိရှိနိုင်သနည်း။
၁၄ ယေဟောဝါ၏ အကြွင်းမဲ့ပိုင်သအုပ်စိုးမှုအာဏာသည် အားလုံးတို့အထက်တွင်ရှိပြီး ကောင်းကင်တမန်တပ်မဟာကြီးသည် ကိုယ်တော်၏အမှာစကားနှင့် အမိန့်တော်တို့ကို နာခံကြကြောင်း ဆာလံဆရာ ဖော်ပြထားသည်။ ‘ထာဝရဘုရားသခင်သည် ပလ္လင်တော်ကို ကောင်းကင်ဘုံ၌တည်တော်မူ၍ အာဏာတော်သည် ခပ်သိမ်းသောအရပ်တို့ကိုနှံ့ပြား၏။ တန်ခိုးကြီး၍ နှုတ်မြွက်စကားတော်အသံကိုနားထောင်လျက် အမိန့်တော်အတိုင်းဆောင်ရွက်သော ကောင်းကင်တမန်တော်တို့ ထာဝရဘုရားသခင်ကိုကောင်းချီးပေးကြလော့။ အလိုတော်သို့လိုက်သောအမှုတော်ထမ်း ကောင်းကင်ဗိုလ်ခြေအပေါင်းတို့ ထာဝရဘုရားသခင်ကိုကောင်းချီးပေးကြလော့။ နိုင်ငံတော်အရပ်ရပ်၌ စီရင်ဖန်ဆင်းတော်မူသမျှတို့ ထာဝရဘုရားသခင်ကို ကောင်းချီးပေးကြလော့’ ဟု ကျွန်ုပ်တို့ဖတ်ရကြ၏။—ဆာလံ ၁၀၃:၁၉-၂၂။
၁၅။ ယေရှု နိုင်ငံတော်အာဏာရရှိခြင်းသည် ကောင်းကင်တွင် ဘုရားသခင့်အလိုတော် ပြည့်စုံစေခြင်းအပေါ် အဘယ်အကျိုးသက်ရောက်ခဲ့သနည်း။
၁၅ စာတန်ပုန်ကန်ပြီးနောက်ပိုင်းတွင် ကောင်းကင်ညီလာခံများသို့ သူတက်ရောက်ခွင့်ရသေးကြောင်း ယောဘကျမ်းမှ သိရှိရသည်။ (ယောဘ ၁:၆-၁၂; ၂:၁-၇) သို့သော် စာတန်နှင့် သူ၏နတ်ဆိုးများ ကောင်းကင်မှ ဖယ်ရှားခံရကြမည့်အချိန် ရောက်လာမည်အကြောင်း ဗျာ.ကျမ်းတွင် ပရောဖက်ပြုထားသည်။ ထိုအချိန်မှာ ၁၉၁၄ ခုနှစ်၌ ယေရှုခရစ် နိုင်ငံတော်အာဏာရရှိပြီးနောက် မကြာမီတွင်ဖြစ်ပျက်ခဲ့ကြောင်း ထင်ရှားသည်။ ထိုအချိန်မှစ၍ ကောင်းကင်တွင် ဤသူပုန်များအတွက် နေရာမရှိတော့ပေ။ ထိုအခါ သူတို့သည် မြေကြီးဝန်းကျင်ထက်တွင် အကျယ်ချုပ်ဖြင့် နေရကြလေသည်။ (ဗျာ. ၁၂:၇-၁၂) ၎င်းနောက် ကောင်းကင်တွင် စောဒကတက်သံမကြားရတော့ဘဲ “သိုးသငယ်” ယေရှုခရစ်အား ဩဘာပေးသံများနှင့် ယေဟောဝါအား ကျိုးကျိုးနွံနွံ ချီးမွမ်းထောမနာပြုသံများသာ ကြားနေရလေသည်။ (ဗျာ. ၄:၉-၁၁) ယေဟောဝါ၏အလိုတော်သည် ကောင်းကင်တွင် အမှန်ပင် ပြည့်စုံလျက်ရှိနေသည်။
ကမ္ဘာမြေအတွက် ယေဟောဝါ၏အလိုတော်
၁၆။ လူသားတို့မျှော်လင့်ချက်နှင့်စပ်လျဉ်းသော ခရစ်ယာန်ဘောင်၏ သွန်သင်ချက်သည် စံပြဆုတောင်းနည်းနှင့် မည်သို့တစ်လမ်းစီဖြစ်နေသနည်း။
၁၆ ခရစ်ယာန်ဘောင်အသင်းတို့ကလူကောင်းအားလုံး ကောင်းကင်သွားမည်ဟုဆိုကြသည့်အတွက် ဘုရားသခင့်ရည်ရွယ်ချက်များတွင် ကမ္ဘာမြေကြီးအရေး မပါတော့ပေ။ သို့သော် ယေရှုက “[ဘုရားသခင့်]နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်မှာ ပြည့်စုံပါစေသော” ဟုဆုတောင်းရန် သင်ကြားပေးခဲ့သည်။ (မဿဲ ၆:၁၀) မည်သို့ပင် စိတ်ကူးယဉ်ကြည့်ပါစေ အကြမ်းဖက်မှု၊ မမျှတမှု၊ ဖျားနာမှုနှင့် သေခြင်းတရားတို့၏ ထုထောင်းမှုခံနေရသော ယနေ့ ဤကမ္ဘာကြီးတွင် ယေဟောဝါ၏အလိုတော်သည် ယေဘုယျပြည့်စုံနေသည်ဟု သင်ဆိုနိုင်ပါမည်လော။ လုံးဝမဆိုနိုင်ပါ! ထို့ကြောင့် တမန်တော်ပေတရု မှတ်တမ်းတင်ခဲ့သည့် အောက်ပါကတိတော်နှင့်အညီ ဘုရားသခင့်အလိုတော် မြေကြီးပေါ်တွင်ပြည့်စုံပါစေဟု ကျွန်ုပ်တို့ စိတ်အားထက်သန်စွာ ဆုတောင်း သင့်ပေသည်– “ယခုရှိသမျှသောအရာတို့သည် ပျက်ရသော်လည်း၊ ဖြောင့်မတ်ခြင်းတရားတည်နေရာ မိုးကောင်းကင်သစ်နှင့်မြေကြီးသစ်ကို ငါတို့သည် ကတိတော်နှင့်အညီ မျှော်လင့်ကြ၏။”—၂ ပေတရု ၃:၁၃။
၁၇။ ဤကမ္ဘာနှင့်ပတ်သက်၍ ယေဟောဝါ၏ရည်ရွယ်ချက်ကား အဘယ်နည်း။
၁၇ ယေဟောဝါသည် ရည်ရွယ်ချက်တစ်ခုဖြင့် ကမ္ဘာကြီးကို ဖန်ဆင်းထားတော်မူသည်။ ကိုယ်တော်သည် ပရောဖက်ဟေရှာယအား ဝိညာဉ်တော်ဖြင့် ဤသို့ ရေးသားစေသည်– ‘မိုးကောင်းကင်ကိုဖန်ဆင်းတော်မူသော ထာဝရဘုရားသခင်၊ မြေကြီးကိုပြုပြင်ဖန်ဆင်း၍ အမြဲတည်စေတော်မူသောအရှင်၊ အချည်းနှီးဖန်ဆင်းသည်မဟုတ်၊ သတ္တဝါနေစရာဖို့ဖန်ဆင်းတော်မူသော ဘုရားသခင်မိန့်တော်မူသည်ကား ငါသည် ထာဝရဘုရားဖြစ်၏။ ငါမှတစ်ပါး အခြားသောဘုရားသခင်မရှိ။’ (ဟေရှာယ ၄၅:၁၈) ဘုရားသခင်သည် ကနဦးလူသားမောင်နှံကို ပရဒိသုဥယျာဉ်ထဲတွင် နေရာချပေးပြီး သူတို့အား “အချင်းတို့ များပြားစွာမွေးဖွားကြလော့။ မြေကြီးကိုပြည့်စေ၍နိုင်ကြလော့” ဟု မိန့်မှာတော်မူသည်။ (ကမ္ဘာဦး ၁:၂၇၊ ၂၈; ၂:၁၅) ဖန်ဆင်းရှင်၏ ရည်ရွယ်ချက်မှာ ဤကမ္ဘာကြီးတွင် ယေဟောဝါ၏ အကြွင်းမဲ့ပိုင်သအုပ်စိုးမှုကို ပျော်ရွှင်စွာလက်အောက်ခံသည့် စုံလင်ဖြောင့်မတ်သော လူသားတို့အား မှီတင်းနေထိုင်စေကြပြီး ခရစ်တော်ကတိပြုတော်မူသည့် ပရဒိသုတွင် ထာဝစဉ် နေထိုင်သွားစေရန်ဖြစ်သည်မှာ ရှင်းနေပါသည်။—ဆာလံ ၃၇:၁၁၊ ၂၉; လုကာ ၂၃:၄၃။
၁၈၊ ၁၉။ (က) ဘုရားသခင်၏အလိုတော် မြေကြီးပေါ်တွင် အပြည့်အဝ မပြည့်စုံမီ အဘယ်အရာကို လုပ်ဆောင်ရမည်နည်း။ (ခ) နောက်ဆောင်းပါးတွင် ယေရှု၏စံပြဆုတောင်းနည်းမှ အဘယ်အပိုင်းများကို ဆန်းစစ်ကြမည်နည်း။
၁၈ ဤကမ္ဘာပေါ်တွင် ယေဟောဝါ၏ အကြွင်းမဲ့ပိုင်သအုပ်စိုးမှုကို အာခံသည့် လူသားများရှိနေသ၍ ကမ္ဘာနှင့်ပတ်သက်သော ကိုယ်တော်၏အလိုတော် မည်သို့မျှ အပြည့်အဝ ပြည့်စုံနိုင်မည်မဟုတ်ပေ။ ဘုရားသခင်သည် ခရစ်တော်ဦးဆောင်သည့် ကောင်းကင်တပ်မဟာများကို အသုံးပြုကာ “မြေကြီးကို ဖျက်ဆီးသောသူတို့ကို ဖျက်ဆီး” တော်မူမည်။ စာတန်၏အစီအစဉ်စနစ်တစ်ခုလုံးဖြစ်သည့် အယူမှားဘာသာတရား၊ ဖောက်ပြန်သောသားရဲအုပ်စု၊ လိုဘမပြည့် ကောက်ကျစ်သော စီးပွားရေးစနစ်၊ ပျက်စီးစေသော စစ်မှုတို့သည် လက်စတုံး ရှင်းလင်းသုတ်သင်ခံရလိမ့်မည်။ (ဗျာ. ၁၁:၁၈; ၁၈:၂၁; ၁၉:၁၊ ၂၊ ၁၁-၁၈) ယေဟောဝါ၏ အကြွင်းမဲ့ပိုင်သအုပ်စိုးမှုသည် သံသယကင်းရှင်းသွားကာ နာမတော်ကို ရိုသေလေးမြတ်လာကြလိမ့်မည်။ “ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။ [ဘုရားသခင့်]နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံပါစေသော” ဟု ကျွန်ုပ်တို့တောင်းလျှောက်ကြသောအခါ အထက်ပါအရာအားလုံးတို့အတွက် ကျွန်ုပ်တို့ဆုတောင်းနေကြခြင်းဖြစ်သည်။—မဿဲ ၆:၉၊ ၁၀။
၁၉ သို့ရာတွင် ယေရှု၏စံပြဆုတောင်းနည်းတွင် ကိုယ်ရေးကိုယ်တာကိစ္စများအကြောင်းလည်း ကျွန်ုပ်တို့ဆုတောင်းနိုင်ကြောင်း ဖော်ပြခဲ့သည်။ ဆုတောင်းနည်းညွှန်ကြားချက်နှင့်ပတ်သက်သော ဤအပိုင်းများကို နောက်ဆောင်းပါးတွင် ဆန်းစစ်ကြမည်။
[အောက်ခြေမှတ်ချက်]
^ အပိုဒ်၊ 9 ယေဟောဝါသက်သေတို့ ပုံနှိပ်ထုတ်ဝေသော ဒံယေလ၏ပရောဖက်ပြုချက်ကို ဂရုပြုလော့စာအုပ် အခန်း ၆ ကိုရှု။
ပြန်လည်သုံးသပ်ချက်
• ယေဟောဝါအား “ကျွန်ုပ်တို့၏အဘ” ဟုခေါ်ခြင်းသည် အဘယ်ကြောင့် သင့်လျော်သနည်း။
• ယေဟောဝါ၏နာမတော် ရိုသေလေးမြတ်ခြင်းရှိပါစေဟု ဆုတောင်းခြင်းသည် ကျွန်ုပ်တို့အတွက် အဘယ်ကြောင့် အဓိကအလေးထား ဆုတောင်းရမည့်အရာဖြစ်သနည်း။
• ဘုရားသခင့်နိုင်ငံတော်တည်ထောင်ပါစေဟု အဘယ်ကြောင့် ကျွန်ုပ်တို့ ဆုတောင်းကြသနည်း။
• ဘုရားသခင်၏အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်တွင် ပြည့်စုံပါစေဟု ကျွန်ုပ်တို့ဆုတောင်းကြသည့်အခါ အဘယ်အရာကို ဆိုလိုသနည်း။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
ဖာရိရှဲတို့၏ သူတော်ကောင်းဟိတ်ဟန်ထုတ် ဆုတောင်းချက်များနှင့် ယေရှု၏ဆုတောင်းပုံ အင်မတန်ကွာခြားလှ
[စာမျက်နှာ ၁၀ ပါ ရုပ်ပုံ]
ဘုရားသခင့်နိုင်ငံတော်တည်ထောင်ပါစေ၊ ကိုယ်တော်၏နာမတော် ရိုသေလေးမြတ်ခြင်းရှိပါစေ၊ ကိုယ်တော်၏အလိုတော် ပြည့်စုံပါစေကြောင်း ခရစ်ယာန်တို့ ဆုတောင်းကြ