“ကမ္ဘာ့အလယ်ဗဟို” တွင် စုဝေးခြင်း
“ကမ္ဘာ့အလယ်ဗဟို” တွင် စုဝေးခြင်း
“တဲ ပီတို အို တဲ ဟီနူးအာ” ဟူသောစကားများကို သင်ကြားဖူးပါသလော။ အီစတာကျွန်း၌ပြောဆိုသည့် မူရင်းဘာသာစကား ရာပါ နူးအီဖြင့် “ကမ္ဘာ့အလယ်ဗဟို” ဟုဆိုလိုသည်။ အဘယ်အရာက ထိုတွင်ရှိ စည်းဝေးပွဲကို အလွန်ထူးခြားစေခဲ့သနည်း။
ထီးတည်း၊လျှို့ဝှက်ဆန်းကြယ်၊ထူးခြားဆန်းပြား။ ဤဝေါဟာရတို့သည် အီစတာကျွန်း သို့မဟုတ် ၎င်းတွင်နေထိုင်သူများကခေါ်ဆိုကြသည့် ရာပါ နူးအီကျွန်းအတွက် သုံးလေ့ရှိသည့် စကားလုံးအချို့ဖြစ်၏။ အဆိုပါကျွန်းသည် ချီလီနိုင်ငံ၊ စန်တီယာဂိုမြို့မှ ၂,၃၅၀ မိုင်အကွာ တောင်ပစိဖိတ်သမုဒ္ဒရာထဲ အလွန်ဝေးလံသည့် ထီးတည်းဒေသတစ်ခု အမှန်ပင်ဖြစ်လေသည်။ ၎င်းသည် ၁၈၈၈၊ စက်တင်ဘာလ ၉ ရက်နေ့တွင် ချီလီနိုင်ငံ၏ ပြည်နယ်တစ်ခု ဖြစ်လာခဲ့သည်။
၆၄စတုရန်းမိုင်ကျယ်ဝန်းသည့် ဤတြိဂံပုံကျွန်းကို အခြေခံအားဖြင့်မီးတောင်သေသုံးခုဖြင့်ဖြစ်တည်ထားသည်။ အမှန်မှာ၊ များစွာသော ပစိဖိတ်ကျွန်းများကဲ့သို့ပင် ဤကျွန်းသည် အလွန်ကြီးမားလှသည့် ရေအောက်တောင်တန်းများ၏ တောင်ထိပ်များသာတည်း။ ကျွန်းတစ်ကျွန်းလုံးကိုသဘာဝမှတ်တိုင်ကြီးအဖြစ် ကြေညာထားကြပြီ။ မိုအိုင်ဟူသော လျှို့ဝှက်ဆန်းကြယ်သည့် ကျောက်ရုပ်တုများကြောင့် လူသိအများဆုံးဖြစ်သည်။ *
အီစတာကျွန်းသည် ဆွဲဆောင်မှုရှိသော ပကတိတောတောင်ရှုခင်းများနှင့် သမိုင်းဝင်နေရာများရှိသည့်အပြင် ထူးခြားဆန်းပြားသော စားကောင်းသောက်ဖွယ်ရာများလည်း ရရှိသည်။ ဤကျွန်းတွင် နာနတ်သီး၊ ထောပတ်သီး၊ သင်္ဘောသီးကဲ့သို့သော ထူးကဲရသာရှိသည့် သစ်သီးများနှင့် ငှက်ပျောသီးကိုးမျိုး ထွက်ရှိသည်။ ပင်လယ်မှလည်း ငါးအမျိုးမျိုးနှင့် တခြားပင်လယ်စာများရရှိ၏။
အီစတာကျွန်းတွင် ရာသီဥတုသာယာသည်၊ မိုးပုံမှန်ရွာပြီး သက်တံ့များလည်းထွက်သဖြင့် အလည်အပတ်ရောက်ရှိလာသူများကို လေကောင်းလေသန့်ရစေပြီး စွဲမက်ဖွယ်ကောင်းသောမြင်ကွင်းများကို ရှုစားရစေသည်။ ယခုလောလောဆယ်တွင် လူ ၃,၈၀၀ ခန့်နေထိုင်လျက်ရှိ၏။ လက်ရှိနေထိုင်သူတို့သည် ရှေးဦးအခြေချနေထိုင်သူများမှ ဆင်းသက်လာသူများဖြစ်ကြကာ ဥရောပလူမျိုးများ၊ ချီလီလူမျိုးများနှင့် တခြားလူမျိုးများလည်း အတူတကွရောနှောနေထိုင်ကြသည်။ ဥရောပနှင့်အာရှမှ ရာနှင့်ချီသော ကမ္ဘာလှည့်ခရီးသည်များသည် အဆိုပါကျွန်းသို့ လာရောက်လည်ပတ်ကြသဖြင့် ကမ္ဘာလှည့်ခရီးသွားလုပ်ငန်းမှာ စီးပွားရေးလုပ်ငန်း၏အရေးပါသောကဏ္ဍတစ်ခုဖြစ်နေသည်။
ဘုရားသခင့်နိုင်ငံတော်မျိုးစေ့များ ဦးစွာအပင်ပေါက်ခဲ့
ယေဟောဝါသက်သေများ၏ ၁၉၈၂ နှစ်ချုပ်စာအုပ်က ဤသို့ပြောပြခဲ့သည်– “အီစတာကျွန်းပေါ်တွင် အတန်ကြာအထိ ကြေညာသူတစ်ဦးတည်းသာရှိခဲ့၏။ သူသည် [ချီလီနိုင်ငံရှိ] ဌာနခွဲရုံးမှ ခရစ်ယာန်သာသနာပြုညီအစ်မတစ်ဦးနှင့် စာအပြန်အလှန်ပေးပို့ခြင်းဖြင့် ဝိညာဉ်ရေးဘက်တွင် ကူညီပေးခံခဲ့ရသည်။ ယခု သူသည် ပြည်မသို့ ပြန်သွားခဲ့သော်လည်း ကျွန်းပေါ်မှ ကင်းမျှော်စင် နှစ်စဉ်ကြေးယူသူများရှိကြောင်း မှတ်တမ်းရနေဆဲဖြစ်သည်။ ကျွန်ုပ်တို့အား များစွာ အံ့အားသင့်စေသည်မှာ ၁၉၈၀၊ ဧပြီလတွင် သတိရအောက်မေ့ပွဲကျင်းပမည့်အချိန်ကိုသိလိုသည့် စိတ်ဝင်စားသူတစ်ဦးထံမှ ရပ်ဝေးတယ်လီဖုန်းခေါ်သံကို လက်ခံရရှိခဲ့ခြင်းဖြစ်သည်။ ထိုနှစ်တွင်ပင် ဗဲလ်ပါရေဇိုမြို့မှ အိမ်ထောင်သည်စုံတွဲတစ်တွဲသည် ထိုကျွန်းသို့ ပြောင်းရွှေ့သွားခဲ့ကြပြီး စိတ်ဝင်စားသူများနှင့် ကျမ်းစာသင်အံမှုများ ကျင်းပခဲ့ကြလေသည်။ ၁၉၈၁၊ ဧပြီလတွင် သတိရအောက်မေ့ပွဲကို ပထမဦးဆုံးအကြိမ်အနေနှင့် ဤကျွန်းပေါ်တွင် ကျင်းပခဲ့ကြရာ တက်ရောက်သူ ၁၃ ဦးရှိခဲ့သည်။ ‘သတင်းကောင်း’ သည် ဤထီးတည်းဒေသကို ထိုးဖောက်ဝင်ရောက်နေသည့်အတွက် ကျွန်ုပ်တို့အလွန်ဝမ်းမြောက်ကြသည်!”
အထူးရှေ့ဆောင်စုံတွဲတစ်တွဲဖြစ်သည့် ဒါရိုနှင့် ဝင်နီ ဖာနန်ဒက်ဇ်တို့ကို ၁၉၉၁၊ ဇန်နဝါရီလ ၃၀ ရက်တွင် ဌာနခွဲက အဆိုပါကျွန်းသို့ စေလွှတ်လိုက်၏။ “ငါးနာရီကြာစီးရတဲ့ လေယာဉ်ဟာ ကျွန်တော်တို့ကို ကမ္ဘာဂြိုဟ်ရဲ့ အစွန်အဖျား၊ လျှို့ဝှက်ဆန်းကြယ်မှုနဲ့ ပြည့်နေတဲ့ ယဉ်ကျေးမှုဆီကို ခေါ်ဆောင်သွားခဲ့တယ်” ဟု ညီအစ်ကို ဖာနန်ဒက်ဇ်က ပြန်ပြောင်းပြောပြသည်။ အစည်းအဝေးများနှင့် ဟောပြောခြင်းလုပ်ငန်းကို ဒေသခံညီအစ်ကိုတစ်ဦးနှင့် မကြာသေးမီက သားသမီးနှစ်ဦးနှင့်ရောက်လာခဲ့ကြသည့် ညီအစ်မတစ်ဦးတို့၏အကူအညီဖြင့် ချက်ချင်း စီစဉ်လိုက်ကြသည်။ မိသားစုဖိအားများ၊ ဘာသာရေးထက်သန်မှုနှင့် ပေါ်လီနီးရှန်းယဉ်ကျေးမှုတွင် တွေ့ရလေ့ရှိသည့် ဘဝပုံစံတစ်မျိုးတစ်ဘာသာရှိလင့်ကစား မိမိတို့၏ကြိုးပမ်းအားထုတ်မှုအပေါ် ယေဟောဝါကောင်းချီးပေးသည်ကို သူတို့တွေ့ရှိခဲ့ကြ၏။ ညီအစ်ကိုနှင့်ညီအစ်မ ဖာနန်ဒက်ဇ်တို့သည် အထူးရှေ့ဆောင်များမဟုတ်ကြတော့သော်လည်း ကျွန်းပေါ်တွင်ဆက်၍နေထိုင်ကြကာ ထိုတွင်မွေးဖွားခဲ့သည့် ၎င်းတို့၏သားကို ကျွေးမွေးပြုစုနေကြသည်။ ယနေ့ ထိုကျွန်းတွင် ဝမ်းမြောက်ပျော်ရွှင်နေကြသည့် ဘုရားသခင့်နိုင်ငံတော်ကြေညာသူ ၃၂ ဦးရှိသည်။ ထိုသူတို့တွင် ရာပါ နူးအီ တိုင်းရင်းသားများအပြင် ထိုကျွန်းပေါ်တွင် အခြေချနေထိုင်ခဲ့သူများ သို့မဟုတ် ဘုရားသခင့်နိုင်ငံတော်ကြေညာသူ ပို၍လိုအပ်သည့်နေရာတွင် အမှုဆောင်ရန် ပြောင်းရွှေ့ခဲ့ကြသူများလည်း ပါဝင်ကြသည်။
တိုက်နယ်စည်းဝေးပွဲအတွက် ပြင်ဆင်မှုများ
အဆိုပါကျွန်းနှင့် တောင်အမေရိကတိုက်စပ်ကြား အလွန်ကွာဝေးသောကြောင့် အသင်းတော်သည် အထူးစည်းဝေးပွဲနေ့၊ တိုက်နယ်စည်းဝေးပွဲနှင့် ခရိုင်စည်းဝေးကြီးအစီအစဉ်များ၏ ဗီဒီယိုခွေများကို တစ်နှစ်လျှင် သုံးကြိမ် လက်ခံရရှိလေ့ရှိ၏။ သို့သော် ၂၀၀၀ ပြည့်နှစ်အဆုံးပိုင်းတွင် ချီလီဌာနခွဲကော်မတီက အဆိုပါကျွန်း၏ ပထမဦးဆုံးသော စည်းဝေးပွဲကို ကိုယ်တိုင်ကျင်းပဖို့ စဉ်းစားသုံးသပ်ခဲ့ကြသည်။ အဆုံး၌ ၂၀၀၁၊ နိုဝင်ဘာလတွင် တိုက်နယ်စည်းဝေးပွဲကျင်းပရန် ဆုံးဖြတ်လိုက်ကြပြီး ချီလီနိုင်ငံဒေသအသီးသီးမှ ညီအစ်ကိုညီအစ်မများကို အရေအတွက်အကန့်အသတ်ဖြင့် ဤအထူးအခါသမယကို တက်ရောက်ရန် ဖိတ်ခေါ်လိုက်သည်။ လေကြောင်းလိုင်း အချိန်ဇယားကြောင့် စည်းဝေးပွဲကို တနင်္ဂနွေနေ့နှင့် တနင်္လာနေ့တွင် ကျင်းပမည်ဖြစ်၏။
ဖိတ်ခေါ်ခံရသည့် ကိုယ်စားလှယ် ၃၃ ဦးသည် အလွန်ဝေးလံသီခေါင်သည့် ထိုဒေသတွင်ကျင်းပမည့် ပထမဦးဆုံးသော တိုက်နယ်စည်းဝေးပွဲတွင် ပါဝင်ရန် အဆိုပါကျွန်းသို့ ခရီးသွားရမည့်အတွေးဖြင့် စိတ်လှုပ်ရှားခဲ့ကြသည်။ ပစိဖိတ်သမုဒ္ဒရာအပေါ် ကြာမြင့်စွာ ပျံသန်းဖြတ်ကျော်လာပြီးသည့်နောက် သူတို့အား လေဆိပ်၌ စောင့်နေကြသည့် ဒေသခံညီအစ်ကိုများက ကြိုဆိုခဲ့ကြသဖြင့် ကိုယ်စားလှယ်များစိတ်အေးရတော့သည်။ ကိုယ်စားလှယ်များအား ကျွန်း၏လက်ဆောင်မွန် လှပသောပန်းကုံးများစွပ်၍ ကြိုဆိုခဲ့ကြ၏။ ထို့နောက် သူတို့အား တည်းခိုရမည့်နေရာများသို့ ခေါ်ဆောင်သွားကြသည်၊ ထို့နောက် ကျွန်းကို တစ်ခဏမျှ လှည့်လည်ကြည့်ရှုကြပြီး စည်းဝေးပွဲအစီအစဉ်တွင် ပါဝင်ကြမည့်သူအားလုံးသည် ဘုရားသခင့်နိုင်ငံတော်ခန်းမတွင် တွေ့ဆုံကြလေသည်။
မျှော်လင့်မထားသည့်သတင်းရပ်ကွက်ကြောင့် လူသိရှင်ကြားဖြစ်သွားခြင်း
စည်းဝေးပွဲသို့ ကားမောင်းသွားနေစဉ် ဒေသခံခရစ်ယာန်ဘုန်းကြီးတစ်ပါးက မိမိတို့၏လည်ပတ်ခြင်းအကြောင်းကို ရေဒီယိုမှ ဝေဖန်ပြောဆိုနေသည်ကို ကိုယ်စားလှယ်တချို့ကြားကာ အလွန်အံ့သြသွားခဲ့ကြ၏။ ကမ္ဘာဆုံးခန်းတိုင်တော့မည့်အကြောင်းပြောပြရန် အိမ်များသို့လာလည်ပတ်ကြမည့် တောင်အမေရိကတိုက်မှ ကမ္ဘာလှည့်ခရီးသည်များကို သူရည်ညွှန်းနေခြင်းဖြစ်သည်။ အဆိုပါဧည့်သည်များ၏စကားကို နားမထောင်ကြဖို့ မိမိ၏အသင်းသားများအား သူတိုက်တွန်းသော်လည်း သူ၏ကြေညာချက်က ကျွန်းပေါ် ယေဟောဝါသက်သေအုပ်စုကြီး ရောက်ရှိနေမှုကို အသိပေးကြော်ငြာလိုက်သလိုဖြစ်သွားခဲ့သည်။ ယင်းက ကျွန်းသူကျွန်းသားများအား မျှော်လင့်စောင့်စားနေစေရန် လှုံ့ဆော်ပေးလိုက်သည်။ နောက်ရက်များအတွင်း ကိုယ်စားလှယ်များသည် အားပေးမှုဖြစ်စေသော သတင်းကောင်းအကြောင်းကို သူတို့အား လိမ္မာပါးနပ်စွာ ပြောပြခဲ့ကြသည်။
စည်းဝေးပွဲစတင်
တနင်္ဂနွေနေ့ နံနက်ရောက်သော် ဒေသခံညီအစ်ကိုများသည် စည်းဝေးပွဲပထမနေ့အတွက် ရောက်လာခဲ့ကြသည့် ကိုယ်စားလှယ်များကိုကြိုဆိုရန် ဘုရားသခင့်နိုင်ငံတော်ခန်းမသို့ ဝင်ရာလမ်းတွင် စောင့်နေကြသည်။ “အီးအော်ရာနာ ကော်အဲ့! အီးအော်ရာနာ ကော်အဲ့!” “ကြိုဆိုပါတယ်!” ညီအစ်မတချို့သည် ရိုးရာဝတ်စုံကို ဝတ်ဆင်ထားကြပြီး ပေါ်လီနီးရှန်းပုံစံ အစစ်ဖြင့် မိမိတို့၏ဆံပင်ကို လှပသောပန်းများဖြင့် အလှဆင်ထားကြသည်။
သာယာနာပျော်ဖွယ်တေးသံကို သီဆိုတီးမှုတ်ပြီးနောက် ဤကျွန်းပေါ်တွင် တစ်ခါမျှ မကြားဖူးခဲ့ရသည့်အတိုင်း ရာနှင့်ချီသောအသံများက “ကြံ့ခိုင်လျက် မရွေ့လျော့နှင့်” ဟူသောသီချင်းကို သံပြိုင်သီဆိုခဲ့ကြ၏။ သဘာပတိက ရာပါ နူးအီ တိုင်းရင်းသားဘာသာစကားဖြင့် လှိုက်လှဲစွာ ကြိုဆိုလိုက်ရာ ဒေသခံညီအစ်ကိုများ မျက်ရည်ကျခဲ့ကြသည်။ နေ့လယ်အားလပ်ချိန်တွင် သက်သေခံအသစ်သုံးဦးက ဘုရားသခင်ထံ မိမိတို့ဆက်ကပ်အပ်နှံကြောင်း ရေတွင်နှစ်ခြင်းခံခြင်းဖြင့် တင်ပြခဲ့ကြသည်။ ပထမနေ့အစီအစဉ် ပြီးဆုံးသွားသောအခါ လူတိုင်းသည် ယေဟောဝါနှင့်လည်းကောင်း၊ ညီအစ်ကိုအသင်းအပင်းတစ်ခုလုံးနှင့်လည်းကောင်း ပို၍ရင်းနှီးလာသည်ဟု ခံစားမိကြ၏။—၁ ပေတရု ၅:၉။
နံနက်ပိုင်းသက်သေခံခြင်း
ကျွန်းပေါ်တွင် အထူးအခြေအနေများကြောင့် တိုက်နယ်စည်းဝေးပွဲ ဒုတိယနေ့အစီအစဉ်ကို နေ့လယ်စာစားပြီးနောက်မှ စတင်ခဲ့၏။ ထို့ကြောင့်၊ ကိုယ်စားလှယ်များသည် အဆိုပါအခြေအနေကို အခွင့်ကောင်းယူကာ လယ်ကွင်းဓမ္မအမှုတွင်ပါဝင်ရန် နံနက်ပိုင်းကို အသုံးပြုခဲ့ကြသည်။ သူတို့ကို အဘယ်တွေ့ကြုံမှုများက စောင့်ကြိုခဲ့သနည်း။
သားသမီးရှစ်ယောက်ရှိ အမျိုးသမီးကြီးတစ်ဦးက သူသည် ကက်သလစ်ဘာသာဝင်ဖြစ်သောကြောင့် သက်သေခံများနှင့် စကားမပြောနိုင်ကြောင်းဆိုသည်။ မူးယစ်ဆေးဝါးတလွဲသုံးခြင်းနှင့် မိသားစုပြဿနာများအစရှိသည့် လူတိုင်းရင်ဆိုင်နေရသော ပြဿနာများအကြောင်းကို ပြောပြလိုကြောင်း သက်သေခံများကပြောရာ နားထောင်ရန် သူသဘောတူလိုက်သည်။
သက်ကြီးပိုင်း ဒေသခံအမျိုးသမီးတစ်ဦးကလည်း သက်သေခံ ဇနီးမောင်နှံကို အေးတိအေးစက် ဆက်ဆံခဲ့သည်။ သူက သူတစ်ပါးအပေါ် အလွန်ရက်စက်ကြမ်းကြုတ်သည့် တောင်အမေရိကတိုက်သားများထံ သွားဟောပြောရန် ပြောလိုက်၏။ အဆိုပါဇနီးမောင်နှံက ‘ဘုရားသခင့်နိုင်ငံတော်သတင်းကောင်း’ ကို လူတိုင်းထံ ကမ်းလှမ်းပေးကြောင်း၊ ကျွန်းကိုလာရသည့် မိမိတို့၏ရည်ရွယ်ချက်မှာ ဘုရားသခင်အပေါ် မေတ္တာတိုးပွားရန် လူအားလုံးကိုကူညီပေးမည့် စည်းဝေးပွဲကိုတက်ရောက်ဖို့ဖြစ်ကြောင်း ပြောပြကြသည်။ (မဿဲ ၂၄:၁၄) ဤကျွန်းအတိုင်းဖြစ်သော်လည်း ဖျားနာမှုနှင့် သေခြင်းမရှိသည့် ပရဒိသုအခြေအနေမျိုးဖြင့် အသက်ရှည်ရှည်နေချင်သလောဟု သူ့ကိုမေးလိုက်သည်။ ဤကျွန်းပေါ် မီးတောင်ထိပ်ဝများ တည်ရှိခဲ့သည်မှာ နှစ်ပေါင်းမည်မျှရှိပြီကို သူနှင့်အတူ စဉ်းစားကြည့်ကြပြီးနောက် သူက လူ့ဘဝ၏တိုတောင်းမှုကို တွေးမိပြီး ဤသို့မေးလိုက်၏– “ကျွန်မတို့ ဘာကြောင့် တစ်ခဏပဲ အသက်ရှင်ရတာလဲ။” ဆာလံ ၉၀:၁၀ ကို သူဖတ်လိုက်သောအခါ အလွန်အံ့သြသွားလေသည်။
ထိုအချိန်တွင် သက်သေခံများသည် ဘေးအိမ်မှ အော်ဟစ်သံကို ရုတ်တရက် ကြားလိုက်ရ၏။ အဆိုပါစူးစူးရှရှအော်သံကို သူတို့နားမလည်သော်လည်း အိမ်နီးချင်းများသည် စော်ကားသည့်စကားများဖြင့် အော်ဟစ်ပြောဆိုနေကြကြောင်း၊ သက်သေခံများအား လာမလည်စေလိုကြောင်း အဆိုပါအမျိုးသမီးက သူတို့အားပြောပြသည်။ သို့သော် ဤအမျိုးသမီးသည် နူးအာ၊ သို့မဟုတ် မိသားစုတွင် အကြီးဆုံးသမီးဖြစ်၏။ ဖခင်ကွယ်လွန်ပြီးကတည်းက မိသားစုအကျိုးနှင့်ပတ်သက်၍ အဘယ်အရာအကောင်းဆုံးဖြစ်သည်ကို ဆုံးဖြတ်ရန်မှာ သူ့တာဝန်ဖြစ်သည်။ သူသည် ဆွေမျိုးများရှေ့တွင် သူ၏မိခင်ဘာသာစကားဖြင့် ညီအစ်ကိုများကို ကာကွယ်ပြောဆိုပေးခဲ့ပြီး စာပေများကိုလည်း အလွယ်တကူပင် လက်ခံလိုက်၏။ ထိုအပတ်ပြီးသည့်နောက် သက်သေခံများကို ကျော်ဖြတ်မောင်းသွားသောအခါ သူ၏မောင်အား ကားရပ်ပေးရန်ပြောသည်။ သူ၏မောင်က မနှစ်သက်သော်လည်း သူသည် ညီအစ်ကိုများကို နှုတ်ဆက်ကာ ဓမ္မအမှုတွင် အောင်မြင်ပါစေကြောင်း ဆုမွန်ကောင်းတောင်းပေးလိုက်သည်။
ကျွန်းသူကျွန်းသားတချို့သည် အစပိုင်းတွင် တောင်အမေရိကတိုက်မှ သက်သေခံများဟောပြောသည့် သတင်းတရားကို လက်ခံချင်ပုံမပေါ်သော်လည်း ရာပါ နူးအီ တိုင်းရင်းသားများကမူ ပင်ကိုအားဖြင့် ကြင်နာပြီး ဖော်ရွေကြကြောင်းကို ဧည့်သည်များ တွေ့ရှိလာခဲ့ရသည်။ တိုင်းရင်းသားအများစုသည် သတင်းကောင်းကို ဝမ်းပန်းတသာ နားထောင်ပေးကြ၏။ အမှန်ဆိုရလျှင်၊ ကျွန်းပေါ်တွင် နှစ်ခြင်းခံခဲ့ကြသည့် သက်သေခံအယောက် ၂၀ တွင် ၆ ဦးမှာ ဒေသခံတိုင်းရင်းသားများဖြစ်ကြလေသည်။ တစ်ဦးမှာ ဘေးအိမ်ခန်းတွင် မိမိ၏ဇနီးကျမ်းစာသင်နေသည်ကို နားထောင်ရာမှ ကျမ်းစာအမှန်တရားကို ဦးစွာသင်ယူလေ့လာခဲ့သူဖြစ်၏။ သူနှင့် သူ၏ဇနီးတို့သည် ယခု နှစ်ခြင်းခံပြီးသော သက်သေခံများဖြစ်နေကြပြီး သူသည် အသင်းတော်တွင် ဓမ္မအမှုထမ်းတစ်ဦးလည်း ဖြစ်နေလေပြီ။
ဝိညာဉ်ရေးအစီအစဉ် ဆက်လက်ကျင်းပ
နေ့လယ်စာစားပြီးနောက် ဒုတိယနေ့အစီအစဉ်ကို အစပြုခဲ့ကြသည်။ ဤတွင်တစ်ဖန်၊ ဒေသခံ ညီအစ်ကိုညီအစ်မ ၃၂ ဦးနှင့် ကိုယ်စားလှယ် ၃၃ ဦးတို့သည် စိတ်ဝင်စားသူအတော်များများနှင့် ပူးပေါင်းပါဝင်ခဲ့ကြသည်။ “မေတ္တာနှင့်ယုံကြည်ခြင်းက လောကကိုအောင်နိုင်ပုံ” လူထုဟောပြောချက်အပါအဝင် အစီအစဉ်ကို လူတစ်ရာနီးပါး နားထောင်ခဲ့ကြ၏။ အမှန်ဆိုရသော်၊ တက်ရောက်လာကြသူတို့သည် ယေဟောဝါ၏လူမျိုးတော်အလယ်၊ ယဉ်ကျေးမှုအသီးသီးမှဖြစ်လျက်ပင် သူတို့၌တည်ရှိသည့် မေတ္တာတရား သက်ဝင်လှုပ်ရှားတင်ပြနေသည်ကို တွေ့မြင်နေရသည်။—ယောဟန် ၁၃:၃၅။
တိုက်နယ်စည်းဝေးပွဲကျင်းပချိန်တွင် တိုက်နယ်နှင့်ခရိုင်ကြီးကြပ်မှူးများသည် ရှေ့ဆောင်ဓမ္မအမှုဆောင်များနှင့်အတူ အထူးတွေ့ဆုံစည်းဝေးခဲ့ကြ၏။ ဤကျွန်းပေါ်မှ မှန်မှန်ရှေ့ဆောင်သုံးဦးတို့သည် မှန်မှန် သို့မဟုတ် အထူးရှေ့ဆောင်များဖြစ်ကြသည့် ကိုယ်စားလှယ်များနှင့်အတူ ပါဝင်တက်ရောက်ကြသည်။ သူတို့အားလုံး အကြီးအကျယ် အားပေးခံခဲ့ကြရ၏။
နောက်တစ်နေ့ရောက်သော် ဧည့်လမ်းညွှန်များအဖြစ် အလုပ်လုပ်ကြသည့် ဒေသခံညီအစ်ကိုတချို့က ကိုယ်စားလှယ်များကို ကျွန်းတစ်ပတ် လှည့်လည်ပြသခဲ့ကြသည်။ မိုအိုင်များကို ထွင်းထုထားသည့်နေရာဖြစ်သော ကျောက်ကျင်းများအပြင် ရှေးက ပြိုင်ပွဲများကျင်းပခဲ့ကြသည့်နေရာဖြစ်သော မီးတောင်များနှင့် ဤကျွန်း၏ရှေးဦးအခြေချသူများ တက်ရောက်နေထိုင်ခဲ့ကြသည့်နေရာဖြစ်သော လှပသည့် ရွှေရောင်သဲသောင်ပြင် အာနာကန်နာကမ်းခြေတို့ကို သူတို့လည်ပတ်ကြည့်ရှုခဲ့ကြသည်။ *
ဒေသခံညီအစ်ကိုများနှင့်အတူနေရသည့် နောက်ဆုံးအခွင့်အရေးမှာ အသင်းတော်စာအုပ်ကြီးသင်တန်းတွင်ဖြစ်သည်။ အစည်းအဝေးပြီးနောက် ဒေသခံသက်သေခံများက ရိုးရာအစားအစာစစ်စစ်ဖြင့် ဧည့်ခံကြရာ ဧည့်သည်များ အလွန်အံ့သြခဲ့ရ၏။ ၎င်းနောက် ထူးခြားသောအဝတ်အစားများ ဝတ်ဆင်ထားကြသောသူတို့သည် ရိုးရာအကဖြင့် တင်ဆက်ဖျော်ဖြေခဲ့ကြသည်။ စည်းဝေးပွဲပြင်ဆင်ရန် အားထုတ်လုပ်ဆောင်မှုများသည် အကျိုးနပ်ခဲ့ပြီဖြစ်ကြောင်း ကိုယ်စားလှယ်များအပြင် ရာပါ နူးအီ ညီအစ်ကိုညီအစ်မများကပါ စိတ်ချသွားကြသည်။
ကိုယ်စားလှယ်များအဖြစ် ရောက်လာခဲ့ကြသူအားလုံးတို့သည် ပီတိဖြစ်စရာကောင်းသော ရက်သတ္တပတ်ကို ထီးတည်း ညီအစ်ကိုညီအစ်မများနှင့်အတူ အသုံးပြုခဲ့ရသည့်အတွက် သံယောဇဉ်ဖြစ်သွားကြသည်။ အဆိုပါကျွန်းကို မခွဲနိုင်မခွာရက်ဖြစ်ခဲ့ကြရ၏။ သူတို့ရရှိလိုက်သည့် မိတ်ဆွေသစ်များကိုသာမက ဝိညာဉ်ရေးအားပေးမှုကိုပါ အစဉ်တန်ဖိုးထားကြပါလိမ့်မည်။ လေယာဉ်ကွင်း၌ ဒေသခံညီအစ်ကိုများသည် သူတို့ကိုယ်တိုင်ပြုလုပ်ထားသည့် ကနုကမာလည်ဆွဲများကို ကိုယ်စားလှယ်များ၏လည်ပင်းတွင် ဆင်မြန်းပေးခဲ့ကြသည်။
ကိုယ်စားလှယ်များ ထွက်ခွာသွားသောအခါ သူတို့က “ဂွဒ်ဘိုင်! ခင်ဗျားတို့ ရာပါ နူးအီဆီကို ကျွန်တော်တို့ပြန်လာပါဦးမယ်” ဟုအဓိပ္ပာယ်ရသည့် “အီးအော်ရာနာ! အားယူ ဟော်ကီး မာအီ အဲ့ ရာပါ နူးအီ အီး” ဟု ကတိပေးခဲ့ကြသည်။ မှန်ပါသည်၊ သူတို့သည် ထူးခြားဆန်းပြား၍ ထီးတည်းဖြစ်နေကာ လျှို့ဝှက်ဆန်းကြယ်ပြီး ဖော်ရွေကြသည့် အီစတာကျွန်းပေါ်မှ ဝိညာဉ်ရေးမိသားစုဝင်များနှင့် မိတ်ဆွေအသစ်များထံ ပြန်လာလိုကြ၏!
[အောက်ခြေမှတ်ချက်]
^ အပိုဒ်၊ 4 ယေဟောဝါသက်သေများထုတ်ဝေသည့် ၂၀၀၀၊ ဇွန်လ ၂၂ ရက်နေ့ထုတ် နိုးလော့! [လိပ်] ကိုရှု။
^ အပိုဒ်၊ 27 ရာနို ရာရာကူ မီးတောင်ထိပ်ဝပေါ်တွင် ကျောက်ဆစ်လက်ရာများရှိသည်။ ရာနိုကောင်းတွင်ရှိသော ဤကျွန်းသည် အုပ်ချုပ်လိုသူတို့အကြား ပြိုင်ပွဲစတင်သည့်နေရာ ဖြစ်သည်။ ပြိုင်ပွဲတွင် ချောက်ကမ်းပါးအတိုင်း ပြေးဆင်းသွားပြီး ကျွန်းငယ်လေးတစ်ကျွန်းသို့ ရေကူးသွားကာ ထိုကျွန်းပေါ်ရှိ ငှက်ဥတစ်လုံးကိုယူ၍ ကျွန်းမကြီးသို့ ပြန်ကူးလာပြီး ငှက်ဥကိုမကွဲစေဘဲ ချောက်ကမ်းပါးပေါ်သို့ ပြန်တက်လာခြင်းပါဝင်သည်။
[စာမျက်နှာ ၂၄ ပါ လေးထောင့်ကွက်]
အီစတာကျွန်းပေါ် သက်သေခံခြင်း
ဤမမေ့နိုင်သောစည်းဝေးပွဲမတိုင်မီ နှစ်နှစ်လောက်က တိုက်နယ်ကြီးကြပ်မှူးနှင့် သူ၏ဇနီးတို့သည် ဤကျွန်းပေါ်လည်ပတ်ခဲ့ကြပြီး နှစ်သက်ဖွယ်ကောင်းသော တွေ့ကြုံမှု များစွာရရှိခဲ့ကြသည်။ ဥပမာ၊ ညီအစ်မတစ်ဦးက သူတို့နေထိုင်ရမည့်နေရာသို့ ခေါ်ဆောင်သွားစဉ် လွန်ခဲ့သော ၁၆ နှစ်ခန့်အချိန် ညီအစ်မဖြစ်သူ ဆယ်ကျော်သက်အရွယ်ကချီလီနိုင်ငံတောင်ပိုင်းတွင်သူ့အား သူတို့ကျမ်းစာသင်ပေးခဲ့ကြကြောင်း အစပြန်ဖော်ပေးလိုက်ရာ သူတို့အံ့အားသင့်သွားသည်ကို မြင်ယောင်ကြည့်ပါ။ နောက်ပိုင်းတွင် ထိုမျိုးစေ့သည် ရာပါ နူးအီပေါ်တွင် အသီးသီးခဲ့လေသည်။
ထို့ပြင်သူတို့သည် ဤရွှင်မြူးဖွယ်ကောင်းသော အတွေ့အကြုံကိုလည်း ရရှိခဲ့ကြ၏– အမှတ်တရပစ္စည်းဆိုင်ပိုင်ရှင်တစ်ဦးသည် ယေဟောဝါသက်သေများထုတ်ဝေသည့် ကမ္ဘာသစ်ဘာသာပြန်သမ္မာကျမ်းစာနှင့် ထာဝရအသက်ရစေသည့် အသိပညာဟူသော ကျမ်းစာလေ့လာရန် အထောက်အကူပြု စာအုပ်တစ်အုပ်ကိုလက်ခံယူလိုက်သည်။ သူ့ထံ သူတို့ပြန်သွားသောအခါ ထိုကျမ်းစာကို သူမဖတ်တတ်ကြောင်းပြော၏။ သူတို့သည် စပိန်ကျမ်းစာမဟုတ်ဘဲ ပြင်သစ်ကျမ်းစာအုပ်ကို သူ့အား ပေးထားခဲ့မိ၍တည်း! သို့နှင့် ပြဿနာမှာ လျင်မြန်စွာပင် ပြေရှင်းသွားခဲ့သည်၊ ဒေသခံညီအစ်ကိုများ၏ အကူအညီဖြင့် သူ၏ကိုယ်ပိုင်ဘာသာစကားဖြစ်သော သမ္မာကျမ်းစာမှာ နားလည်ဖို့မခဲယဉ်းကြောင်း သူသိရှိသွားလေသည်။
[စာမျက်နှာ ၂၂ ပါ မြေပုံ]
(ကားချက်အပြည့်အစုံကို စာစောင်တွင်ကြည့်ပါ)
အီစတာကျွန်း
ချီလီ
[စာမျက်နှာ ၂၃ ပါ ရုပ်ပုံ]
တိုက်နယ်စည်းဝေးပွဲတွင် လူနှစ်ဦးနှစ်ခြင်းခံခဲ့
[စာမျက်နှာ ၂၅ ပါ ရုပ်ပုံ]
ရာနို ရာရာကူမီးတောင်ဆင်ခြေလျှော၊ ပုံငယ်– ကျွန်းပေါ်တွင် ရှင်သန်ပေါက်ရောက်နေသည့် ဂူအာယာဘာသီးအရိုင်း