ဘာသာတရားသည် လူ့ပြဿနာများ၏ အရင်းအမြစ်လော
ဘာသာတရားသည် လူ့ပြဿနာများ၏ အရင်းအမြစ်လော
“ဘာသာတရားသည် ခိုက်ရန်ဖြစ်ပွားခြင်းကို တွန်းအားပေးခြင်းမပြုသည့်အခါ မူးယစ်ဆေးဝါးကဲ့သို့ လူ့သိစိတ်ကို ထုံထိုင်းစေပြီး လူ့ဦးနှောက်ကို စိတ်ကူးယဉ်အတွေးများနှင့် နစ်မျောနေစေသည်။ ... လူတို့ကို အမြင်ကျဉ်းသူ၊ အယူသီးသူ၊ မုန်းတီးမှု၊ ကြောက်ရွံ့မှုတို့နှင့်ပြည့်နေသူများဖြစ်စေသည်။” အထက်ပါအတိုင်းရေးသားခဲ့သော ယခင်မက်သဒစ်ခရစ်ယာန်သာသာနာပြုက ဤသို့ဖြည့်စွက်ခဲ့သည်– “၎င်းစွပ်စွဲချက်များ မှန်ပါသည်။ မကောင်းသောဘာသာနှင့် ကောင်းသောဘာသာရှိ၏။”—သင့်ကိုယ်ပိုင်ဘာသာတရားကို အစပြု။
‘တကယ့်ကို မမျှတတဲ့ ဝေဖန်ချက်ပဲ’ ဟုအချို့ပြောကြပေမည်။ သို့သော် ထိုသို့ကောက်ချက်ချစေသည့် သမိုင်းဖြစ်ရပ်မှန်များကို မည်သူငြင်းဆိုနိုင်မည်နည်း။ များသောအားဖြင့် “ဘုရားသခင်ကို သို့မဟုတ် သဘာဝလွန်စွမ်းအားကို ဝတ်ပြုကိုးကွယ်ခြင်း” ဟုအဓိပ္ပာယ်ဖွင့်ထားသော ဘာသာတရားတွင် ရာဇဝင်ဆိုး တွင်ရစ်နေသည်။ ယင်းသည် ကျွန်ုပ်တို့ကို ဉာဏ်အလင်းဖြာပေးပြီး စိတ်အားတက်ကြွစေသင့်သည်။ သို့ရာတွင် များသောအားဖြင့် ယင်းသည် ပဋိပက္ခ၊ တစ်ယူသန်မှုနှင့် မုန်းတီးမှုတို့ကိုသာ ဖြစ်ပေါ်စေသည်။ အဘယ်ကြောင့် ထိုသို့ဖြစ်ရသနည်း။
ယေရှုသွန်သင်ခဲ့ရာသည် ဘုရားသခင်ထံမှဖြစ်
သမ္မာကျမ်းစာအရ အလွန်ရိုးရှင်းသောအဖြေတစ်ခုရှိပါသည်။ စာတန်သည် “လင်းသောကောင်းကင်တမန်” ဖြစ်ယောင်ဆောင်ကာ ဘုရားသခင်၏သွန်သင်ချက်များအစား မိမိ၏သွန်သင်ချက်များနောက်လိုက်ရန် သန်းပေါင်းများစွာသောသူတို့ကို လမ်းလွဲစေခဲ့ပြီ။ (၂ ကောရိန္သု ၁၁:၁၄) စာတန်၏သြဇာလွှမ်းမှု ကျယ်ပြန့်လွန်းသဖြင့် တမန်တော်ယောဟန်က “တစ်လောကလုံးသည် [စာတန်] ၏လက်၌ရှိသည်” ဟုဖော်ပြခဲ့သည်။ (၁ ယောဟန် ၅:၁၉၊ သမ္မာ) စာတန်သည် “တစ်လောကလုံးကိုလှည့်ဖြား” နေကြောင်း ယောဟန်သိရှိခဲ့သည်။—ဗျာ. ၁၂:၉၊ သမ္မာ။
ယင်း၏အကျိုးဆက်များကား အဘယ်နည်း။ အပြင်ပန်းအားဖြင့် သန့်ရှင်းမြင့်မြတ်သယောင်ရှိသော ဘာသာရေးစနစ်များကို စာတန်ဖြစ်ပေါ်စေခဲ့ပြီ။ ၎င်းတို့သည် “‘ဘာသာတရား’ ဗန်းပြ” ထားသော်လည်း သူတို့၏အကျင့်ဆိုးများက သူတို့၏အခြေအနေမှန်ကို အထုပ်ဖြေပြနေသည်။ (၂ တိမောသေ ၃:၅၊ ဂျေ. ဘီ. ဖိလစ်; မဿဲ ၇:၁၅-၂၀) လူ့ပြဿနာများကို ကူညီဖြေရှင်းပေးမည့်အစား ဘာသာတရားသည် ပြဿနာတစ်ခုဖြစ်လာလေသည်။
ထိုယူဆချက်သည် မဖြစ်နိုင် သို့မဟုတ် ယုတ္တိမရှိဟု အလျင်အမြန်မငြင်းလိုက်ပါနှင့်။ လှည့်စားခြင်း၏ သဘောသဘာဝကိုယ်နှိုက်က လှည့်စားခံရသူသည် လှည့်စားခံနေရသည်ကို သတိမထားမိခြင်းဖြစ်ကြောင်း သတိရပါ။ ထိုအချက်ကို တမန်တော်ပေါလုက ဤသို့ဥပမာပေး ရေးသားခဲ့သည်– “[ပြင်]လူတို့သည် ပူဇော်သောယဇ်ကို ဘုရားသခင်အားပူဇော်ကြသည်မဟုတ်။ နတ်ဆိုးတို့အားပူဇော်ကြ၏။” (၁ ကောရိန္သု ၁၀:၂၀) မိမိတို့သည် နတ်ဆိုးတို့အား ဝတ်ပြုနေကြောင်း သိနားလည်ပါမူ ထိုသူတို့ ထိတ်လန့်သွားကြပေမည်။ ကောင်းမြတ်သောဘုရားသခင်တစ်ပါးသို့မဟုတ် ဘုရားတရားများကို တစ်နည်းနည်းဖြင့် မိမိတို့ဝတ်ပြုကိုးကွယ်နေသည်ဟု သူတို့ယူမှတ်ထားကြသည်။ အမှန်သော်ကား သူတို့သည် လူတို့အား ကြိုးပမ်းလှည့်ဖြားနေသည့် စာတန်၏အပေါင်းပါ “မိုးကောင်းကင်၌နေသော နတ်ဆိုးတို့” ၏လှည့်စားခြင်းကို ခံနေရခြင်းဖြစ်သည်။—ဧဖက် ၆:၁၂။
ဥပမာအနေနှင့်၊နတ်ဆိုးသြဇာနှင့်ပတ်သက်သော တမန်တော်ယောဟန်၏အဆိုပါသတိပေးချက်ကိုတမင်လျစ်လျူရှုကြသည့် ခရစ်ယာန်အခေါ်ခံသူများစွာကို စာတန်မည်သို့လှည့်စား၍ လမ်းလွဲစေနိုင်ကြောင်း သုံးသပ်ကြည့်ပါစို့။—၁ ကောရိန္သု ၁၀:၁၂။
“ငါဟောသော[တရား]သည် ငါ၏[တရား]မဟုတ်။ ငါ့ကိုစေလွှတ်တော်မူသောသူ၏ [တရား]ဖြစ်၏” ဟုယေရှုမိန့်ဆိုခဲ့သည်။ (ယောဟန် ၇:၁၆) မှန်ပါသည်၊ ကိုယ်တော်သွန်သင်ပေးရာများသည် အတိုင်းအဆမဲ့တန်ခိုးရှင် ဘုရားသခင်ထံမှဖြစ်သည်။ ထို့ကြောင့် ယေရှု၏သွန်သင်ချက်များသည် တန်ခိုးပါပြီး နားဆင်သူများအား စိတ်ဓာတ်မြှင့်တင်ပေးသည်။ ထိုသွန်သင်ချက်များသည် ‘လူ့စိတ်ကိုထုံထိုင်းစေခြင်း သို့မဟုတ် လူ့ဦးနှောက်ကို စိတ်ကူးယဉ်အတွေးများနှင့် နစ်မျောနေစေခြင်း’ မရှိပါ။ ထိုသို့ဖြစ်မည့်အစား ယေရှု၏သွန်သင်ချက်များသည် စာတန်၏လှည့်စားမှုကြောင့် “ဉာဏ်အလင်းကွယ်” နေသောလောကမှ ထွက်ပေါ်လာသည့် မှားယွင်းသောဘာသာရေးအယူဝါဒများနှင့် လူ့အတွေးအခေါ်များမှ လူတို့ကို လွတ်မြောက်စေသည်။—ဧဖက် ၄:၁၈; မဿဲ ၁၅:၁၄; ယောဟန် ၈:၃၁၊ ၃၂။
စစ်မှန်သောခရစ်ယာန်များကို ဘာသာတရားကိုင်းရှိုင်းသည်ဆိုရုံမျှဖြင့်မဟုတ်ဘဲ ဘုရားသခင့်သန့်ရှင်းသောဝိညာဉ်တော်၏ လှပတင့်တယ်သောအရည်အသွေးများကို ရောင်ပြန်ဟပ်သည့် ယုံကြည်ခြင်းအားဖြင့် ခွဲခြားသတ်မှတ်ခံရကြသည်။ (ဂလာတိ ၅:၂၂၊ ၂၃; ယာကုပ် ၁:၂၂; ၂:၂၆) ဤအရည်အသွေးများအနက် ထူးခြားထင်ရှားပြီး စစ်မှန်သောခရစ်ယာန်ဘာသာ၏ ထင်ရှားသောအမှတ်အသားမှာ ချစ်ခြင်းမေတ္တာဟူသော အမွန်မြတ်ဆုံးအရည်အသွေးဖြစ်သည်။—ယောဟန် ၁၃:၃၄၊ ၃၅။
သို့သော်အရေးပါသောဤအချက်ကိုသတိပြုပါ– ခရစ်ယာန်အသင်းတော်သည်မူလတည်ထောင်စဉ်က ပုံစံအတိုင်း ဆက်သွားရန် ယေရှုသော်လည်းကောင်း၊ ကိုယ်တော်၏တမန်တော်များသော်လည်းကောင်းမမျှော်လင့်ခဲ့ကြပါ။ အယူဖောက်ပြန်မှု ဖြစ်ပေါ်လာပြီးစစ်မှန်သောဘာသာသည် အတန်ကြာ လောင်းရိပ်မိနေမည်ဖြစ်ကြောင်း သူတို့သိခဲ့ကြသည်။
စစ်မှန်သောဘာသာတရား အတန်ကြာတိမ်မြုပ်ခဲ့
ဂျုံစပါးနှင့်တောမျိုးစေ့ ပုံဥပမာတွင် ယေရှုက စစ်မှန်သောဘာသာတရားသည် အတန်ကြာမှေးမှိန်နေလိမ့်မည်ဟု ကြိုဟောခဲ့သည်။ မဿဲ ၁၃:၂၄-၃၀၊ ၃၆-၄၃ ပါမှတ်တမ်းကို သင်ကိုယ်တိုင်ဖတ်ရှုကြည့်ပါ။ လယ်၌ ယေရှုကြဲသည့် ဂျုံစပါး “ကောင်းသောမျိုးစေ့” သည် ကနဦးခရစ်ယာန်အသင်းတော်တွင် ပါဝင်ကြမည့် ကိုယ်တော်၏ တည်ကြည်သောတပည့်များကို ပုံတင်ပြသည်။ အချိန်တန်သော် “ရန်သူ” တည်းဟူသော စာတန်သည် ဂျုံစပါးအထဲ၌ “တောမျိုးစေ့”—ယေရှုခရစ်နောက်လိုက်သည်ဆိုသော်လည်း အမှန်အားဖြင့် ကိုယ်တော့်သွန်သင်ချက်များကို ငြင်းပယ်ကြသူများ—ကို ကြဲလိမ့်မည်ဖြစ်ကြောင်း ကိုယ်တော်သတိပေးခဲ့သည်။
ယေရှု၏တမန်တော်များ သေဆုံးပြီး မကြာမီ ‘ထာဝရဘုရားသခင်၏နှုတ်မြွက်တရားတော်’ နေရာတွင် ဖောက်ပြန်သောလူ့သွန်သင်ချက်များကို ထောက်ခံအားပေးကြသော “တောမျိုးစေ့” ဖြစ်သူတို့ ပေါ်ပေါက်ခဲ့သည်။ (ယေရမိ ၈:၈၊ ၉; တမန်တော် ၂၀:၂၉၊ ၃၀) ယင်းကြောင့် ကမ္ဘာ့ဇာတ်ခုံပေါ်တွင် အယူဝါဒဖောက်ပြန်သော၊ အရေခြုံခရစ်ယာန်ဘာသာ ပေါ်ပေါက်ခဲ့သည်။ ယင်းကို “အဓမ္မလူ” ဟုသမ္မာကျမ်းစာခေါ်ဆိုသော “မတရားသောလှည့်ဖြားခြင်းအမျိုးမျိုး” ပြည့်လျှံနေသည့် ဖောက်ပြန်သောဓမ္မဆရာအတန်းအစားက ချုပ်ကိုင်ထားသည်။ (၂ သက်သာလောနိတ် ၂:၆-၁၀) “ဤကမ္ဘာကုန်သောကာလ” ၌ အခြေအနေပြောင်းလဲသွားမည်ဟု ယေရှုကြိုဟောခဲ့သည်။ ဂျုံပင်နှင့်တူသောခရစ်ယာန်များသည် စုသိမ်းခံရပြီး “တောမျိုးစေ့” တို့မူကား အဆုံးတွင် ဖျက်ဆီးခံရပါလိမ့်မည်။
ဤအရေခြုံခရစ်ယာန်ဘာသာသည် “ကမ်းကုန်အောင်ရက်စက်ကြမ်းကြုတ်သည့် ရာစုနှစ်များ” နှင့် နောက်ပိုင်းရာစုနှစ်များအတွင်း ခရစ်ယာန်ဘောင်ကို လွှမ်းခြုံလာသည့် ဝိညာဉ်ရေးအမှောင်ထုအတွက် တာဝန်ရှိသူဖြစ်သည်။ ထိုအချိန်မှစ၍ ဘာသာရေးအာဏာဖြင့် ပြုလုပ်ခဲ့သော အကျင့်ပျက်၊ အကြမ်းဖက်လုပ်ရပ်အားလုံးကို တင်ကူးမြင်ယောင်သဖြင့် တမန်တော်ပေတရုက ဤသို့အတိအလင်းကြိုဟောခဲ့သည်– “[ခရစ်ယာန်အမည်ခံသူတို့] အားဖြင့် သမ္မာတရားလမ်းသည် ကဲ့ရဲ့ခြင်းခံရလိမ့်မည်။”—၂ ပေတရု ၂:၁၊ ၂။
“အမျက်ဒေါသနှင့် မုန်းတီးမှုတို့ကို သွေးထိုးပေးသည့် ဘာသာတရား”
ခရစ်ယာန်ဘောင်တစ်ခုတည်းကသာ ဘာသာတရား၏ ဂုဏ်ရောင်ကို ညှိုးမှိန်စေသည် မဟုတ်ချေ။ ဥပမာ၊ ယခင်က ခရစ်ယာန်သီလရှင်တစ်ဦးဖြစ်ခဲ့ဖူးသူ ခေရဲန် အမ်းစထရောင်းပြောသည့် “အဓိကကျသော ဘာသာရေးထုံးတမ်းစဉ်လာ” မှပေါက်ဖွားလာသော“ဘာသာရေးရန်လိုမှု” ဆိုင်ရာ တင်းကျပ်သည့်ဘာသာရေးအခြေခံမူများကိုစဉ်းစားကြည့်ပါ။ အမ်းစထရောင်း၏အဆိုအရ မည်သည့်ဘာသာတရားမဆိုကို အဆုံးအဖြတ်ပေးသောစမ်းသပ်မှုတစ်ခုမှာ “လက်တွေ့ကျကျအကြင်နာပြခြင်း” ဖြစ်သင့်သည်။ ဤကိစ္စတွင် တင်းကျပ်သောဘာသာရေးမူကိုလိုက်နာသည့် ဘာသာတရားများ၏မှတ်တမ်း မည်သို့ရှိသနည်း။ သူဤသို့ရေးသည်– “တင်းကျပ်သောဘာသာရေးဝါဒီ၏ယုံကြည်ချက်သည် ဂျူးဘာသာ၊ ခရစ်ယာန်ဘာသာ သို့မဟုတ် ... မှဖြစ်စေ အမျက်ဒေါသနှင့် မုန်းတီးမှုတို့ကို သွေးထိုးပေးသည့် ဘာသာတရားဖြစ်ခဲ့လျှင် အဆုံးအဖြတ်ပေးသော အဆိုပါ စမ်းသပ်မှုကို မအောင်မြင်ပေ။” (ဘုရားသခင်အတွက်တိုက်ပွဲ—ဂျူးဘာသာ၊ ခရစ်ယာန်ဘာသာနှင့် အစ္စလာမ်ဘာသာရှိ တင်းကျပ်သောဘာသာရေးဝါဒ) သို့သော် “တင်းကျပ်သောဘာသာရေးဝါဒီ” ဘာသာတရားအုပ်စုမျိုးသာလျှင် အဆိုပါစမ်းသပ်မှုကို ရှုံးနိမ့်ပြီး “အမျက်ဒေါသနှင့် မုန်းတီးမှုတို့ကို သွေးထိုးပေးသည့် ဘာသာတရား” ဖြစ်သွားသလော။ အခြားအုပ်စုများလည်း ထိုသို့ဖြစ်သွားကြောင်း သမိုင်းကဖော်ပြပါသည်။
အမှန်မှာ စာတန်သည် အမျက်ဒေါသ၊ မုန်းတီးမှုနှင့် မဆုံးနိုင်သည့်သွေးသွန်းမှုတို့ဖြင့် ခွဲခြားသိမြင်နိုင်သော မှားယွင်းသောဘာသာရေးကမ္ဘာ့အင်ပါယာတစ်ခုကို တည်ထောင်ထားပေပြီ။ သမ္မာကျမ်းစာက ၎င်းအင်ပါယာကို “ဗာဗုလုန်မြို့ကြီး ... မြေ၌စက်ဆုပ်ရွံရှာဖွယ်သောအရာများ၏အမိ” ဟု ခေါ်ဆိုထားပြီး သားရဲနှင့်တူသော နိုင်ငံရေးစနစ်အပေါ်ထိုင်နေသည့် ပြည့်တန်ဆာတစ်ဦးအဖြစ် ပုံဖော်ထားသည်။ သူသည် “မြေကြီးပေါ်မှာကွပ်မျက်ခြင်းခံရသောသူ အပေါင်းတို့၏အသွေး” အတွက် တာဝန်ရှိသူဖြစ်နေခြင်းသည် မှတ်သားစရာပင်။—ဗျာ. ၁၇:၄-၆; ၁၈:၂၄၊ သမ္မာ။
လူတိုင်းလှည့်စားခံရသည်မဟုတ်
သို့ရာတွင် လူတိုင်းလှည့်စားခံရခြင်းမဟုတ်ကြောင်း သမိုင်းက သက်သေထူပါသည်။ အမှောင်မိုက်ဆုံးခေတ်တွင်ပင် “မိမိတို့ဝန်းကျင်ရှိ လူအများစု ဆိုးသွမ်းနေချိန်၌ ကောင်းမှုပြုခဲ့ကြသူများစွာရှိ” သည်ဟု မယ်လ်ဗင် ဗရက်ဂ်မှတ်ချက်ချသည်။ စစ်မှန်သောခရစ်ယာန်များသည် ‘[ဘုရားသခင်] ကို စိတ်ဖြင့်လည်းကောင်း၊ အမှန်တရားဖြင့်လည်းကောင်း ဝတ်ပြု’ နေမြဲဖြစ်သည်။ (ယောဟန် ၄:၂၁-၂၄) ... သူတို့သီးခြားခွဲနေကြသည်။ သူတို့သည် “နာဇရက်မြို့သားယေရှုကမဟုတ်ဘဲ စာတန်က ဖန်တီးသည့် ပဋိညာဉ်ပြုမှု” ဟု သမိုင်းကဖော်ပြသော ... လုပ်ငန်းသဘော ဆက်ဆံမှုတွင် ပတ်သက်စပ်ယှက်ရန် ငြင်းဆိုကြသည်။—နှစ်ထောင်ပြည့်နှစ်—ဒုတိယထောင်စုနှစ်– အလယ်ခေတ်ခရစ်ယာန်ဘောင်မှ ကမ္ဘာချီခရစ်ယာန်ဘာသာတရားအထိ။
များမကြာသေးမီကယေဟောဝါသက်သေများ၏ ဩဇာသည် လူတို့ကိုကောင်းကျိုးပြုခဲ့ကြောင်းလူသိများလာကြသည်။ မှားယွင်းသောဘာသာရေး စွန်းထင်းမှုမှန်သမျှနှင့် ကင်းရှင်းနေရန် သူတို့၏ယုံကြည်ချက်များနှင့် လုပ်ဆောင်မှုများကို ဘုရားသခင့်နှုတ်မြွက်စကားတော် သမ္မာကျမ်းစာအပေါ်၌သာအခြေပြုကြသည်။ (၂ တိမောသေ ၃:၁၆၊ ၁၇) “လောကနှင့်မဆက်ဆံ” နှင့်ဟူသော ယေရှု၏မိန့်မှာချက်ကို ပထမရာစုခရစ်ယာန်များနည်းတူ သူတို့လိုက်နာကြသည်။ (ယောဟန် ၁၅:၁၇-၁၉; ၁၇:၁၄-၁၆) သာဓကအနေနှင့် နာဇီဂျာမနီတွင် ခရစ်ယာန်မူများကို အလျှော့ပေးဖို့ငြင်းဆိုသောကြောင့် နာဇီဝါဒအရ သူတို့ကို လက်သင့်မခံစရာဖြစ်ခဲ့သည်။ ယင်းကြောင့် ဟစ်တလာ၏မုန်းတီးခြင်းခံခဲ့ရသည်။ ကျောင်းသုံးစာအုပ်တစ်အုပ်က ဤသို့ဆို၏– “မည်သည့်အကြောင်းဖြင့်မျှ လက်နက်များမကိုင်ဆောင်နှင့်ဟူသော သမ္မာကျမ်းစာသွန်သင်ချက်ကို ယေဟောဝါသက်သေများ လိုက်နာကြသည်။ ထို့ကြောင့် စစ်မှုထမ်းရန် သို့မဟုတ် နာဇီနှင့်ပတ်သက်ရန် သူတို့ငြင်းဆိုခဲ့ကြသည်။ လက်တုံ့ပြန်သည့်အနေနှင့် အက်စ်အက်စ်တို့သည် ယေဟောဝါသက်သေမိသားစုအားလုံးကို အကျဉ်းချခဲ့ကြသည်။” (ဂျာမနီ—၁၉၁၈–၄၅) အမှန်မှာ နာဇီတို့၏ နှိပ်စက်ညှဉ်းဆဲမှုကြောင့် ဂျာမနီနိုင်ငံရှိ ယေဟောဝါသက်သေ ရာနှင့်ချီ၍ သေကျေခဲ့ရသည်။
ဘာသာတရားအသီးသီးရှိ ရဲရင့်သူများလည်း သူတို့၏ယုံကြည်ချက်အတွက် ဝေဒနာခံခဲ့ကြရသည်မှာ မှန်ပါသည်။ သို့သော် ယေဟောဝါသက်သေများမူ စည်းလုံးသောဘာသာရေးအဖွဲ့အစည်းလိုက် ယင်းကို လုပ်ဆောင်ခဲ့ကြသည်။ သူတို့အများစုသည် “လူ၏စကားထက် ဘုရားသခင်၏စကားတော်ကိုနားထောင်” ပါဟူသော အခြေခံကျမ်းစာမူကို စွဲကိုင်ထားကြသည်။—တမန်တော် ၅:၂၉; မာကု ၁၂:၁၇။
ပြဿနာ၏ရင်းမြစ်
ထို့ကြောင့် ဘာသာတရားသည် လူ့ပြဿနာအားလုံး၏ ရင်းမြစ်ဖြစ်သည်ဟူသောအဆိုသည် တစ်စိတ်တစ်ပိုင်းသာမှန်သည်။ အယူမှားဘာသာတရားသာလျှင် တရားခံဖြစ်သည်။ သို့သော် များမကြာမီ မှားယွင်းသောဘာသာတရားအားလုံးကို ဖယ်ရှားပစ်ဖို့ ဘုရားသခင်ရည်ရွယ်ထားပါသည်။ (ဗျာ. ၁၇:၁၆၊ ၁၇; ၁၈:၂၁) တရားမျှတခြင်းနှင့် ဖြောင့်မတ်ခြင်းကို ချစ်မြတ်နိုးသူမည်သူမဆိုကို ကိုယ်တော်ဤသို့မိန့်မှာပါသည်– “ငါ၏လူမျိုးတို့၊ သူ၏အပြစ်တို့ကိုဆက်ဆံခြင်းနှင့်လည်းကောင်း၊ သူ၏ဘေးဒဏ်များကိုခံခြင်းနှင့်လည်းကောင်း ကင်းလွတ်အံ့သောငှာ၊ သူ [တစ်နည်းအားဖြင့်၊ မဟာဗာဗုလုန်၊ အယူမှားဘာသာရေးကမ္ဘာ့အင်ပါယာ] ၏အထဲကထွက်ကြလော့။ သူ၏အပြစ်တို့သည် ကောင်းကင်ဘုံတိုင်အောင်မီကြသည်ဖြစ်၍ သူ၏မတရားသောအမှုတို့ကို ဘုရားသခင်သတိရတော်မူပြီ။” (ဗျာ. ၁၈:၄၊ ၅) ‘ခိုက်ရန်ဖြစ်ပွားခြင်းကို တွန်းအားပေးသော၊ လူ့သိစိတ်ကိုထုံထိုင်းစေသော၊ လူ့ဦးနှောက်ကို စိတ်ကူးယဉ်အတွေးများနှင့် နစ်မျောစေ၍ လူတို့ကို အမြင်ကျဉ်းသူ၊ အယူသီးသူ၊ မုန်းတီးမှုနှင့် ကြောက်ရွံ့မှုပြည့်နေသူများဖြစ်စေသော’ ဘာသာတရားကို ဘုရားသခင် အလွန်စိတ်နာတော်မူ၏!
ထိုအချိန်အတောအတွင်း ဘုရားသခင်သည် အမှန်တရားကိုချစ်မြတ်နိုးသူများအား မှန်သောဘာသာသို့ စုသိမ်းနေပါသည်။ ယင်းသည် မေတ္တာရှိသော၊ တရားမျှတ၍ သနားကြင်နာတတ်သောဖန်ဆင်းရှင်၏ မူများနှင့် သွန်သင်ချက်များကို လိုက်နာစောင့်ထိန်းသော ဘာသာတရားဖြစ်၏။ (မိက္ခာ ၄:၁၊ ၂; ဇေဖနိ ၃:၈၊ ၉; မဿဲ ၁၃:၃၀) အသင်သည် ထိုဘာသာဝင်တစ်ဦး ဖြစ်နိုင်ပါသည်။ မှန်သောဘာသာကို မည်သို့ခွဲခြားသိမြင်နိုင်ကြောင်း ပိုမိုသိရှိလိုပါက ဤမဂ္ဂဇင်းထုတ်ဝေသူများထံ လွတ်လပ်စွာ စာရေးဆက်သွယ်ပါ သို့မဟုတ် အကူအညီအတွက် ယေဟောဝါသက်သေတစ်ဦးဦးကို မေးမြန်းကြည့်ပါ။
[စာမျက်နှာ ၇ ပါ ရုပ်ပုံ]
နောက်ခံအသီးသီးမှလူတို့သည် စစ်မှန်သောဘာသာတရားတွင် ပျော်ရွှင်ကြ