လှည့်စားခြင်းကို သတိပြုရှောင်ရှားလော့
လှည့်စားခြင်းကို သတိပြုရှောင်ရှားလော့
“အချည်းနှီးသောပရိယာယ်အားဖြင့် သင်တို့ကို အဘယ်သူမျှ မလုယူမဖျက်ဆီးစေခြင်းငှာ သတိပြုကြလော့။”—ကောလောသဲ ၂:၈။
၁-၃။ (က) လှည့်စားခြင်းသည် နေ့စဉ်ဘဝအသက်တာ၏ ကဏ္ဍအားလုံးနီးပါးတွင်ရှိကြောင်း အဘယ်သာဓကများက ဖော်ပြသနည်း။ (ခ) ဤလောကရှိလှည့်စားမှုများကို အဘယ်ကြောင့် မအံ့သြသင့်သနည်း။
“ခင်ဗျားတို့ထဲမှာ အမှုသည်တစ်ဦး လိမ်ညာပြောဆိုတာကို တစ်ခါမှမကြုံဖူးသူ ဘယ်နှစ်ယောက်ရှိသလဲ။” လွန်ခဲ့သောနှစ်အနည်းငယ်က ဥပဒေပါမောက္ခတစ်ဦးသည် အဆိုပါမေးခွန်းမေး၍ ဆန်းစစ်လေ့လာခဲ့သည်။ အဖြေကား မည်သို့နည်း။ သူဤသို့ရှင်းပြသည်– “ထောင်နှင့်ချီသောရှေ့နေများထဲတွင် အမှုသည်၏ လိမ်ညာပြောဆိုခြင်းမခံရဖူးသူ တစ်ဦးသာရှိ၏။” အကြောင်းရင်းကား အဘယ်နည်း။ “ထိုရှေ့နေသည် ကုမ္ပဏီကြီးတစ်ခု၌ အလုပ်ဝင်ခါစဖြစ်ပြီး အမှုသည်တစ်ဦးနှင့်မျှ စကားမပြောဖူးသေးချေ။” ဤအဖြစ်အပျက်က ယနေ့ လောကတွင် လိမ်လည်ခြင်းနှင့် လှည့်စားခြင်းသည် အဆန်းမဟုတ်တော့ဟူသော ဝမ်းနည်းဖွယ်အဖြစ်ကို ဖော်ပြပါသည်။
၂ လှည့်စားခြင်းသည် ပုံစံအမျိုးမျိုးရှိပြီး မျက်မှောက်ခေတ်ဘဝကဏ္ဍ အားလုံးနီးပါးတွင် ရှိသည်။ လူထုဆက်သွယ်ရေးသတင်းများတွင် လှည့်စားခြင်းပုံစံအမျိုးမျိုးဖြစ်သည့် နိုင်ငံရေးဆိုင်ရာများက မိမိတို့၏လုပ်ရပ်များကို လိမ်လည်ပြောဆိုခြင်း၊ စာရင်းကိုင်များနှင့် ရှေ့နေများက ကော်ပိုရေးရှင်းနှင့်ဆိုင်သော အမြတ်ငွေများကို ချဲ့ကားပြောဆိုခြင်း၊ ကြော်ငြာရှင်များက သုံးစွဲသူများကို ယုံမှားစေခြင်း၊ အမှုသည်များက အာမခံကုမ္ပဏီများကို လိမ်လည်လှည့်ဖြားခြင်း အစရှိသည်တို့မှာ အနည်းငယ်မျှဖြစ်သည်။ ထို့ပြင် ဝတ်ပြုရေးလှည့်စားမှုလည်း ရှိသေးသည်။ ဓမ္မဆရာများသည် မသေနိုင်သောစိုးလ်၊ မီးငရဲနှင့်သုံးပါးပေါင်းတစ်ဆူစသည့် မှားယွင်းသောအယူအဆများကို သွန်သင်ပေးခြင်းဖြင့် လူထုကို လမ်းလွဲစေကြသည်။—၂ တိမောသေ ၄:၃၊ ၄။
၃ ဤသို့သောလှည့်စားမှုများကို ကျွန်ုပ်တို့ အံ့သြသင့်သလော။ လုံးဝမအံ့သြသင့်ပါ။ ‘နောက်ဆုံးကာလ’ နှင့်ပတ်သက်၍ သမ္မာကျမ်းစာက ဤသို့သတိပေးထားသည်– “ဆိုးညစ်သောသူ၊ လှည့်ဖြားသောသူတို့မူကား၊ သူတစ်ပါးကိုလည်းကောင်း၊ ကိုယ်ကိုလည်းကောင်းလှည့်ဖြား၍ ဆိုးညစ်ခြင်း၌ တရွေ့ရွေ့တိုးပွားကြလိမ့်မည်။” (၂ တိမောသေ ၃:၁၊ ၁၃) ခရစ်ယာန်များအနေနှင့် ကျွန်ုပ်တို့သည် အမှန်တရားမှ သွေဖည်သွားစေနိုင်သော အထင်အမြင်မှားစေသည့် အယူအဆများကို သတိထားကြရမည်။ သို့ဖြင့် ဤမေးခွန်းနှစ်ခု အလိုအလျောက်ပေါ်လာပါသည်– လှည့်စားခြင်းသည် ယနေ့ အဘယ်ကြောင့် ဤမျှပျံ့နှံ့နေရသနည်း၊ လှည့်စားမခံရရန် မည်သို့သတိပြုရှောင်ရှားနိုင်သနည်း။
လှည့်စားခြင်း ယနေ့ အဘယ်ကြောင့် ဤမျှများရသနည်း
၄။ ဤလောက၌ လှည့်စားမှုပျံ့နှံ့ရသည့်အကြောင်းရင်းကို သမ္မာကျမ်းစာက မည်သို့ရှင်းပြသနည်း။
၄ ဤလောကတွင် လှည့်စားခြင်းပျံ့နှံ့နေရသည့်အကြောင်းရင်းကို သမ္မာကျမ်းစာက ရှင်းလင်းစွာဖော်ပြပါသည်။ တမန်တော်ယောဟန်က ‘ဤလောကတစ်ခုလုံးသည် ဆိုးညစ်သူ၏တန်ခိုးဩဇာအောက်တွင် ရောက်နေသည်’ ဟုရေးသားခဲ့သည်။ (၁ ယောဟန် ၅:၁၉၊ ကဘ) ထို ‘ဆိုးညစ်သူ’ မှာ စာတန်ဖြစ်၏။ သူနှင့်စပ်လျဉ်း၍ ယေရှုဤသို့မိန့်တော်မူခဲ့သည်– “သူ၌ [အမှန်] တရားမရှိသောကြောင့် [အမှန်] တရား၌မတည်မနေ။ သူသည် မုသာစကားကိုပြောသောအခါ မိမိပကတိအတိုင်းပြော၏။ မုသာစကား၌ ကျင်လည်သောသူဖြစ်၏။ မုသာ၏အဘလည်းဖြစ်၏။” သို့ဖြစ်၍ ၎င်းအုပ်စိုးရှင်၏စိတ်ဓာတ်၊ စံများနှင့် လှည့်စားတတ်သည့်ဉာဉ်များကို ဤလောကရောင်ပြန်ဟပ်ခြင်းသည် အံ့အားသင့်စရာလော။—ယောဟန် ၈:၄၄; ၁၄:၃၀; ဧဖက် ၂:၁-၃။
၅။ ဤဆုံးခန်းကာလတွင် စာတန်သည် မည်သို့ အားသွန်ခွန်စိုက် လှည့်စားလျက်ရှိသနည်း၊ အဓိကအနေနှင့် မည်သူတို့ကို သူပစ်မှတ်ထားသနည်း။
၅ ဤဆုံးခန်းကာလတွင် စာတန်သည် အရှိန်အဟုန်ပြင်းစွာ ကြိုးပမ်းလျက်ရှိ၏။ သူသည် မြေကြီးပေါ်သို့ ပစ်ချခံခဲ့ရပြီ။ သူ၏အချိန် တစ်ခဏသာကျန်ရှိကြောင်း သူသိထားရာ “ပြင်းစွာသောဒေါသအမျက်” ထွက်နေသည်။ လူများနိုင်သမျှများစွာ ပျက်စီးစေဖို့ သူစိတ်ပိုင်းဖြတ်ထားရာ “ဤလောကတစ်နိုင်ငံလုံးကိုလှည့်ဖြား” နေသည်။ (ဗျာ. ၁၂:၈၊ ၉၊ ၁၂) စာတန်သည် အခါအားလျော်စွာ လှည့်စားတတ်သူမဟုတ်ပါ။ ယင်းအစား လူတို့ကိုလမ်းလွဲစေဖို့ မရပ်မနားကြိုးပမ်းနေ၏။ * သူသည် မယုံကြည်သူများ၏ဉာဏ်မျက်စိကို ကွယ်စေပြီး ဘုရားသခင်ထံမှ ဝေးကွာသွားစေဖို့ ပရိယာယ်နှင့် သစ္စာဖောက်မှုအပါအဝင် သူ၏လက်နက်တိုက်ထဲမှ ရှိသမျှလှည့်စားနည်းများကို သူထုတ်သုံးပါသည်။ (၂ ကောရိန္သု ၄:၄) ဤလှည့်စားသူကြီးသည် ဘုရားသခင်အား ‘စိတ်ဖြင့်လည်းကောင်း၊ အမှန်တရားဖြင့်လည်းကောင်း’ ဝတ်ပြုနေကြသူများကိုမျိုရန် အထူးအာရုံစိုက်နေ၏။ (ယောဟန် ၄:၂၄; ၁ ပေတရု ၅:၈) စာတန်က ‘ကျွန်ုပ်သည် မည်သူကိုမဆို ဘုရားသခင်နှင့်ဝေးကွာသွားစေနိုင်သည်’ ဟု တစ်နည်းအားဖြင့် ပြောဆိုခဲ့ကြောင်း ဘယ်သောအခါမျှ မမေ့ပါနှင့်။ (ယောဘ ၁:၉-၁၂) စာတန်၏ “လှည့်စားတတ်သောနည်းဗျူဟာ” အချို့နှင့် ၎င်းတို့ကို မည်သို့ သတိပြုနိုင်ကြောင်း သုံးသပ်ကြည့်ကြစို့။—ဧဖက် ၆:၁၁၊ ဂျူးဓမ္မသစ်ကျမ်း။
အယူဖောက်ပြန်သူများ၏ လှည့်စားခြင်းကို သတိပြုရှောင်ရှားလော့
၆၊ ၇။ (က) အယူဖောက်ပြန်သူများသည် မည်သို့ဆိုတတ်ကြသနည်း။ (ခ) အယူဖောက်ပြန်သူများသည် အဘယ်အရာကိုအလိုရှိကြောင်း သမ္မာကျမ်းစာက မည်သို့အတိအလင်းဖော်ပြသနည်း။
၆ စာတန်သည် အယူဖောက်ပြန်သူများကိုအသုံးပြု၍ ဘုရားသခင့်ကျေးကျွန်များကို လှည့်ဖြားခဲ့သည်မှာ ကြာမြင့်ပေပြီ။ (မဿဲ ၁၃:၃၆-၃၉) အယူဖောက်ပြန်သူများသည် ယေဟောဝါအား ဝတ်ပြုပြီး သမ္မာကျမ်းစာကို ယုံကြည်သည်ဟု ဆိုကြသော်လည်း ကိုယ်တော်၏မျက်မြင်ရအဖွဲ့အစည်းကိုကား ငြင်းပယ်ကြသည်။ အချို့တို့သည် မှားယွင်းသောကမ္ဘာ့အင်ပါယာ၊ ‘မဟာဗာဗုလုန်’ ၏အယူများဖြစ်သော ဘုရားသခင်ကိုရှုတ်ချသည့် အယူဝါဒများကိုပင် ပြန်လက်ခံကြသည်။ (ဗျာ. ၁၇:၅; ၂ ပေတရု ၂:၁၉-၂၂) ကျမ်းရေးသူများသည် ဘုရားသခင့်မှုတ်သွင်းမှုအောက် ပြင်းထန်သောစကားလုံးများကိုအသုံးပြုပြီး အယူဖောက်ပြန်သူများ၏ ရည်ရွယ်ချက်များနှင့် နည်းလမ်းများကို ဖော်ထုတ်ခဲ့ကြသည်။
၇ အဆိုပါအယူဖောက်ပြန်သူများ၏ ရည်ရွယ်ချက်ကား အဘယ်နည်း။ အယူဖောက်ပြန်သူအများစုသည် တစ်ချိန်က အမှန်တရားဟု သူတို့လက်ခံခဲ့ကြသော ယုံကြည်ခြင်းတရားကို စွန့်ခွာသွားရုံနှင့် မကျေနပ်ကြချေ။ အများအားဖြင့် အခြားသူများကိုလည်း သူတို့နည်းတူ ယုံကြည်လက်ခံစေလိုကြသည်။ ဤအယူဖောက်ပြန်သူများသည် ကိုယ်တိုင်တပည့်များ ထွက်ရှာမည့်အစား ‘တပည့်တို့ [တစ်နည်းအားဖြင့်၊ ခရစ်တော်၏တပည့်များ] ကို မိမိတို့နောက် ... လိုက်စေရန် လိမ်လည်ဟောပြော’ သွေးဆောင်ဖို့ ရှာကြံကြသည်။ (တမန်တော် ၂၀:၂၉၊ ၃၀၊ သမ) ဆရာအတုအယောင်များနှင့်ပတ်သက်၍ တမန်တော်ပေါလုက ဤသို့ အရေးတကြီး သတိပေးခဲ့သည်– “ပရိယာယ်အားဖြင့် သင်တို့ကို အဘယ်သူမျှ မလုယူမဖျက်ဆီးစေခြင်းငှာ သတိပြုကြလော့။” (ကောလောသဲ ၂:၈) ယင်းက အယူဖောက်ပြန်သူအများ ကြိုးပမ်းနေကြရာကို မဖော်ပြပေလော။ ပြန်ပေးဆွဲသူတစ်ဦးသည် သတိမရှိသူတစ်ဦးကို သူ၏မိသားစုအသိုင်းအဝိုင်းမှ ဆွဲခေါ်သွားတတ်သကဲ့သို့ အယူဖောက်ပြန်သူများသည် ယုံလွယ်လွန်းသော အသင်းသားများကို သိုးစုကြားမှ လုယူဆွဲထုတ်တတ်ကြသည်။
၈။ အယူဖောက်ပြန်သူများသည် မိမိတို့ရည်ရွယ်ချက်အောင်မြင်စေဖို့ အဘယ်နည်းများကို အသုံးပြုကြသနည်း။
၈ အယူဖောက်ပြန်သူများသည်သူတို့၏ရည်ရွယ်ချက် အောင်မြင်စေဖို့ အဘယ်နည်းများကို အသုံးပြုတတ်ကြသနည်း။ လိုရာဆွဲ၍ မမှန်မကန်ပြောဆိုခြင်း၊ မမှန်တစ်ဝက်မှန်တစ်ဝက်စကားများနှင့် မုသာစကားများကို သူတို့အသုံးပြုလေ့ရှိသည်။ ယေရှု၏နောက်လိုက်များသည် “မုသာပြစ်တင်ခြင်းအမျိုးမျိုး” ပြောသူတို့၏ လှည့်စားခြင်းကို ခံရမည်ဖြစ်ကြောင်း ကိုယ်တော်သိနှင့်သည်။ (မဿဲ ၅:၁၁၊ သမ) အဆိုပါ မလိုတမာဆန့်ကျင်သူများသည် အခြားသူများကိုလှည့်စားရန်အကြံဖြင့် မဟုတ်မမှန်ပြောဆိုကြပေမည်။ မိမိတို့ရည်ရွယ်ချက်အောင်မြင်စေရန် ‘ပရိယာယ်ဆင်သောစကားများ’ အသုံးပြု၍ ‘လှည့်စားတတ်သောသွန်သင်ချက်များ’ ပျံ့နှံ့စေကာ ‘ကျမ်းစာကို မှောက်လှန်’ ကြမည့်အယူဖောက်ပြန်သူများအကြောင်း တမန်တော်ပေတရု သတိပေးခဲ့သည်။ (၂ ပေတရု ၂:၃၊ ၁၃; ၃:၁၆) ဝမ်းနည်းစရာမှာ ဤအယူဖောက်ပြန်သူများသည် “အချို့သောသူတို့၏ယုံကြည်ခြင်းကို မှောက်လှန်” နိုင်ခဲ့ခြင်းဖြစ်သည်။—၂ တိမောသေ ၂:၁၈။
၉၊ ၁၀။ (က) အယူဖောက်ပြန်သူများ၏ လှည့်စားခြင်းကို ကျွန်ုပ်တို့ မည်သို့ သတိပြုရှောင်ရှားနိုင်သနည်း။ (ခ) ဘုရားသခင့်ရည်ရွယ်ချက်နှင့်ပတ်သက်၍ ကျွန်ုပ်တို့၏သိနားလည်မှုကို ပြုပြင်ပြောင်းလဲစရာလိုလျှင် အဘယ်ကြောင့် စိတ်အနှောင့်အယှက်မဖြစ်ကြသနည်း။
၉ အယူဖောက်ပြန်သူများ၏ လှည့်စားခြင်းကို ကျွန်ုပ်တို့ မည်သို့သတိပြုရှောင်ရှားနိုင်သနည်း။ “သင်တို့ခံရပြီးသောဆုံးမ[စကား]နှင့် ဆန့်ကျင်ဘက်ဖြစ်သော သင်းခွဲခြင်း၊ မှားယွင်းခြင်းအကြောင်းကိုပြုတတ်သောသူတို့ကိုမှတ်၍ ရှောင်ကြလော့”ဟူသော သမ္မာကျမ်းစာအကြံပေးချက်ကိုလိုက်နာခြင်းအားဖြင့်ဖြစ်သည်။ (ရောမ ၁၆:၁၇) သူတို့ကိုယ်တိုင် တင်ပြပြောဆိုသည်ဖြစ်စေ၊ ပုံနှိပ်စာပေ သို့မဟုတ် အင်တာနက်မှတစ်ဆင့်ဖြစ်စေ သူတို့ဖြန့်သော ကျိုးကြောင်းဆင်ခြင်မှုများကို ရှောင်ရှားခြင်းဖြင့် “သူတို့ကို ... ရှောင်ကြ” သည်။ ထိုသို့ အဘယ်ကြောင့်ရပ်တည်ကြရသနည်း။ ပထမအကြောင်းရင်းမှာ ထိုသို့ပြုရန် သမ္မာကျမ်းစာက ညွှန်ကြားထားပြီး ယေဟောဝါသည် ကျွန်ုပ်တို့၏အကောင်းဆုံးအကျိုးကို အစဉ်လိုလားကြောင်း ယုံကြည်စိတ်ချသောကြောင့်ဖြစ်သည်။—ဟေရှာယ ၄၈:၁၇၊ ၁၈။
၁၀ ဒုတိယမှာ ကျွန်ုပ်တို့ကို မဟာဗာဗုလုန်နှင့် တသီးတခြားဖြစ်စေသော အဖိုးတန်အမှန်တရားများ သွန်သင်ပေးသည့်အဖွဲ့အစည်းကို ချစ်သောကြောင့်ဖြစ်သည်။ တစ်ကြိမ်တည်းတွင် ဘုရားသခင့်ရည်ရွယ်ချက်နှင့်ပတ်သက်၍ ကျွန်ုပ်တို့သိရှိထားသောပညာသည် မပြည့်စုံသေးကြောင်း အသိအမှတ်ပြုကြသည်; နှစ်များတစ်လျှောက် ကျွန်ုပ်တို့၏သိနားလည်မှုသည် ပြုပြင်သန့်စင်ခံခဲ့ရပြီ။ ယင်းသို့သော သန့်စင်မှုခပ်သိမ်းအတွက် တည်ကြည်သောခရစ်ယာန်များသည်ယေဟောဝါအား ကျေနပ်စွာ စောင့်မျှော်ကြ၏။ (သု. ၄:၁၈) ဤအတောအတွင်း ဘုရားသခင်အသုံးပြုသောအဖွဲ့အစည်းအပေါ် ကိုယ်တော်ကောင်းချီးပေးနေကြောင်းထင်ရှားရာ ၎င်းအဖွဲ့အစည်းကို ကျွန်ုပ်တို့စွန့်ပယ်မည်မဟုတ်ပါ။—တမန်တော် ၆:၇; ၁ ကောရိန္သု ၃:၆။
မိမိကိုယ်ကိုလှည့်စားခြင်း သတိပြု ရှောင်ရှားလော့
၁၁။ မစုံလင်သူလူသားများသည် မိမိကိုယ်ကို အဘယ်ကြောင့် လှည့်စားတတ်သနည်း။
၁၁ မစုံလင်သူလူသားများတွင် စာတန်အခွင့်ကောင်းယူ အသုံးပြုလေ့ရှိသော စိတ်သဘောထားတစ်ခုမှာ မိမိကိုယ်ကိုလှည့်စားခြင်းဖြစ်သည်။ “စိတ်နှလုံးသည် ခပ်သိမ်းသောအရာထက် စဉ်းလဲတတ်၏။ အလွန်ယိုယွင်းသောသဘောရှိ၏” ဟုယေရမိ ၁၇:၉ ကဆို၏။ ယာကုပ်ကလည်း “မိမိတပ်မက်သောစိတ် ဆွဲငင်ဖြားယောင်းခြင်းကို ခံသောသူမည်သည်ကား၊ အပြစ်သွေးဆောင်ခြင်းသို့ရောက်တတ်၏” ဟုရေးသားခဲ့သည်။ (ယာကုပ် ၁:၁၄) ကျွန်ုပ်တို့၏နှလုံးသားက ပါသွားပြီဆိုလျှင် အပြစ်ပြုလိုစိတ်မှာ တလိပ်လိပ်တက်လာပြီး အန္တရာယ်လည်းရှိပုံမရ၊ ပြုချင်စရာလည်း ကောင်း၏ဟု မြင်လာတတ်သည်။ ထိုသို့ရှုမြင်ခြင်းသည် ထင်ယောင်ထင်မှားဖြစ်စေ၏၊ အကြောင်းမှာ အလျှော့ပေးလိုက်လျောခြင်းသည် အဆုံးတွင် ပျက်စီးစေသည်။—ရောမ ၈:၆။
၁၂။ ကျွန်ုပ်တို့သည် အဘယ်နည်းများဖြင့် မိမိကိုယ်ကိုလှည့်စားနိုင်သနည်း။
၁၂ မိမိကိုယ်ကိုလှည့်စားခြင်းသည် ကျွန်ုပ်တို့ကို အလွယ်တကူ ကျော့မိစေနိုင်သည်။ စဉ်းလဲသောနှလုံးသည် ပင်ကိုအားနည်းချက်ကြီးတစ်ခုကို လျှောချလိုက်နိုင်၏၊ သို့မဟုတ် ကြီးလေးသောအပြစ်တစ်ခုအတွက် ဆင်ခြေပေးတတ်သည်။ (၁ ဓမ္မရာဇဝင် ၁၅:၁၃-၁၅၊ ၂၀၊ ၂၁) ထို့ပြင် ကျွန်ုပ်တို့၏ ယိုယွင်းသောနှလုံးသည် ဒွိဟဖြစ်ဖွယ်အမူအကျင့်ကို ရှာကြံဆင်ခြေပေးတတ်သည်။ ဥပမာအနေနှင့် ဖျော်ဖြေမှုကိစ္စကို သုံးသပ်ကြည့်ပါ။ ဖျော်ဖြေမှုအချို့သည် သင့်မြတ်လျော်ကန်ပြီး ပျော်ရွှင်စရာကောင်း၏။ သို့သော် ရုပ်ရှင်များ၊ ရုပ်မြင်သံကြားအစီအစဉ်များနှင့် အင်တာနက်မှ ဤလောကတင်ဆက်သော ဖျော်ဖြေမှုအများအပြားသည် ညစ်ညမ်း၍ အကျင့်ပျက်၏။ အဘယ်အန္တရာယ်မျှမရှိဘဲ ယုတ်ညံ့သောဖျော်ဖြေမှုကို ရှုစားနိုင်ပါသည်ဟု မိမိကိုယ်ကိုလှည့်ဖြားဖို့ လွယ်ကူသည်။ အချို့က “ကျွန်တော့်သိစိတ်ကမှ အနှောင့်အယှက်မပေးတာ၊ ဘာမှားလို့လဲ” ဟုပင် ဆင်ခြေပေးကြသည်။ သို့သော် ထိုသူတို့သည် ‘မှားယွင်းသောကျိုးကြောင်းဆင်ခြင်မှုဖြင့် မိမိတို့ကိုယ်ကိုလှည့်စား’ နေကြခြင်းဖြစ်၏။—ယာကုပ် ၁:၂၂။
၁၃၊ ၁၄။ (က) ကျွန်ုပ်တို့၏သိစိတ်သည် အစဉ်စိတ်ချရသောလမ်းညွှန်မဟုတ်ကြောင်း အဘယ်ကျမ်းစာနမူနာက ဖော်ပြသနည်း။ (ခ) မိမိကိုယ်ကိုလှည့်စားခြင်းကို မည်သို့ သတိပြုရှောင်ရှားနိုင်သနည်း။
၁၃ မိမိကိုယ်ကိုလှည့်စားခြင်းကို မည်သို့ သတိပြုရှောင်ရှားနိုင်သနည်း။ ဦးဆုံးသတိရရမည်မှာ လူ့သိစိတ်သည် အစဉ်ယုံကြည်စိတ်ချ၍မရကြောင်းဖြစ်သည်။ တမန်တော်ပေါလု၏အဖြစ်ကို သုံးသပ်ကြည့်ပါ။ ခရစ်ယာန်တစ်ဦးဖြစ်မလာမီက သူသည် ခရစ်တော်၏နောက်လိုက်များကို နှိပ်စက်ညှဉ်းပန်းခဲ့သည်။ (တမန်တော် ၉:၁၊ ၂) ထိုစဉ်က သူ၏သိစိတ်သည် သူ့ကိုအနှောင့်အယှက်ပေးခဲ့မည်မဟုတ်။ သို့သော် သူ၏သိစိတ်သည် တလွဲညွှန်ကြားခံခဲ့ရကြောင်း ထင်ရှားသည်။ “ထိုသို့ငါပြုသောအခါ ယုံခြင်းမရှိ၊ အမှန်မသိဘဲပြု” မိသည်ဟု ပေါလုဝန်ခံသည်။ (၁ တိမောသေ ၁:၁၃) ထို့ကြောင့် တစ်စုံတစ်ခုသောဖျော်ဖြေမှုနှင့်ပတ်သက်၍ ကျွန်ုပ်တို့၏သိစိတ်က အနှောင့်အယှက်မပေးရုံဖြင့် ကျွန်ုပ်တို့၏လမ်းစဉ် မှန်သည်ဟု တထစ်ချ မပြောနိုင်ချေ။ ဘုရားသခင့်နှုတ်မြွက်စကားတော်ဖြင့် အသေအချာ လေ့ကျင့်ထားသည့် ကျန်းခံ့သောသိစိတ်ကသာလျှင် စိတ်ချရသော လမ်းညွှန်ဖြစ်နိုင်သည်။
၁၄ မိမိကိုယ်ကိုလှည့်စားခြင်းကို ရှောင်နိုင်ဖို့ စိတ်စွဲမှတ်ထားရမည့် အထောက်အကူပြု အကြံပေးချက်အချို့ရှိပါသည်။ ဆုတောင်း၍ မိမိကိုယ်ကိုဆန်းစစ်ကြည့်ပါ။ (ဆာလံ ၂၆:၂; ၂ ကောရိန္သု ၁၃:၅) မိမိကိုယ်ကို ရိုးရိုးသားသားဆန်းစစ်ကြည့်ခြင်းက သင်၏ရှုမြင်ပုံ သို့မဟုတ် လမ်းစဉ်များကို အနည်းငယ်ပြုပြင်ပြောင်းလဲဖို့လိုကြောင်း သိမြင်စေနိုင်သည်။ အခြားသူများပြောသောစကားကို နားထောင်ပါ။ (ယာကုပ် ၁:၁၉) မိမိကိုယ်ကိုဆန်းစစ်ခြင်းသည် မျက်နှာလိုက်တတ်သဖြင့် ရင့်ကျက်သောခရစ်ယာန်ချင်းတို့၏ ဘက်မလိုက်ဘဲပြောသောစကားများကို နားထောင်ခြင်းသည် ပညာရှိရာရောက်၏။ မျှတသောအမြင်ရှိပြီး အတွေ့အကြုံရင့်ကျက်သူ ယုံကြည်သူချင်းတို့၏အမြင်တွင် သင်၏ဆုံးဖြတ်ချက်များနှင့် အပြုအမူတို့သည် ယုံမှားသံသယဖြစ်ဖွယ်ရှိမည်ဆိုလျှင် မိမိကိုယ်ကို ဤသို့မေးမြန်းသင့်သည်– ‘ကျွန်ုပ်ရဲ့သိစိတ်ကို ကောင်းစွာလေ့ကျင့်မထားလို့လား၊ ဒါမှမဟုတ် ကျွန်ုပ်ရဲ့နှလုံးက ကျွန်ုပ်ကိုလှည့်စားနေတာများလား။’ သမ္မာကျမ်းစာနှင့် ကျမ်းစာအခြေပြုစာပေစာတမ်းများကို မှန်မှန်ဖတ်ရှုလေ့လာပါ။ (ဆာလံ ၁:၂) ထိုသို့ပြုခြင်းက သင်၏အတွေးအခေါ်များ၊ သဘောထားများနှင့် စိတ်အာရုံများကို ဘုရားသခင့်မူများနှင့် ကိုက်ညီစေပါလိမ့်မည်။
စာတန်၏လိမ်လည်မှုများကို သတိပြုရှောင်ရှားလော့
၁၅၊ ၁၆။ (က) ကျွန်ုပ်တို့ကိုလှည့်စားဖို့ကြိုးပမ်းရာ၌ အဘယ်မုသာစကားများကို စာတန်အသုံးပြုသနည်း။ (ခ) ထိုသို့လိမ်လည်လှည့်စားမခံရဖို့ ကျွန်ုပ်တို့ မည်သို့ရှောင်နိုင်မည်နည်း။
၁၅ စာတန်သည် လိမ်လည်မှုအမျိုးမျိုးသုံးပြီး ကျွန်ုပ်တို့ကို လှည့်စားဖို့ကြိုးစားသည်။ စည်းစိမ်ဥစ္စာသည် ပျော်ရွှင်မှုနှင့် ကျေနပ်မှုပေးသည်ဟု ကျွန်ုပ်တို့ကိုယုံကြည်စေ၏၊ သို့သော် ထိုသို့ဖြစ်လေ့မရှိချေ။ (ဒေ. ၅:၁၀-၁၂) ကျွန်ုပ်တို့သည် ‘နောက်ဆုံးကာလ’ ၌ အသက်ရှင်နေကြောင်း သိသာထင်ရှားလျက်ပင် ဆိုးသွမ်းသောဤလောက ထာဝစဉ်တည်ရှိမည်ဟု ကျွန်ုပ်တို့ကို ယုံကြည်စေလိုသည်။ (၂ တိမောသေ ၃:၁-၅) အပျော်အပါးလိုက်စားသူများသည် ဝမ်းနည်းဖွယ်ဆိုးကျိုးများ ရိတ်သိမ်းရလေ့ရှိလျက်နှင့် အကျင့်ယိုယွင်းသောဘဝပုံစံသည် အန္တရာယ်မရှိဟု စာတန်က ယူဆစေလိုသည်။ (ဂလာတိ ၆:၇) ဤသို့သောမုသာစကားများဖြင့် လှည့်စားမခံရဖို့ မည်သို့ရှောင်နိုင်မည်နည်း။
၁၆ ကျမ်းစာပုံနမူနာများမှ အကျိုးကျေးဇူးရယူပါ။ စာတန်၏လိမ်လည် လှည့်စားခြင်းခံခဲ့ရသူတို့၏ သတိပေးပုံနမူနာများစွာ သမ္မာကျမ်းစာတွင် ပါရှိသည်။ သူတို့သည် စည်းစိမ်ဥစ္စာကို တပ်မက်ခဲ့ကြ၏၊ မိမိတို့အသက်ရှင်နေရချိန်ကို မျက်ခြည်ပြတ်သွားကြ၏၊ အကျင့်ယိုယွင်းသွားကြ၏၊ သူတို့အားလုံး ဆိုးကျိုးများခံစားခဲ့ကြရသည်။ (မဿဲ ၁၉:၁၆-၂၂; ၂၄:၃၆-၄၂; လုကာ ၁၆:၁၄; ၁ ကောရိန္သု ၁၀:၈-၁၁) မျက်မှောက်ခေတ်ပုံနမူနာများမှ သင်ခန်းစာယူပါ။ ဝမ်းနည်းစရာကား ခရစ်ယာန်အချို့သည် သူတို့၏အရေးတကြီးသဘောထား ရံဖန်ရံခါ ပျောက်ဆုံးသွားပြီး ဘုရားသခင့်အမှုတော်ဆောင်ကြခြင်းကြောင့် မိမိတို့ ဆုံးရှုံးနစ်နာသည်ဟု ယူမှတ်လာကြခြင်းဖြစ်သည်။ ထိုအခါ ပျော်စရာဟုယူမှတ်သောဘဝကို လိုက်စားဖို့ အမှန်တရားကို သူတို့စွန့်ခွာသွားနိုင်သည်။ သို့သော် ဤသူတို့သည် “ချောသောအရပ်၌” ရှိနေကြ၏၊ အကြောင်းမှာ ဘုရားသခင်ရေးရာမဆန်သော အမူအကျင့်များ၏ ဆိုးကျိုးများကို နောက်ဆုံးခံစားကြရသောကြောင့်ဖြစ်၏။ (ဆာလံ ၇၃:၁၈၊ ၁၉) သူတစ်ပါး၏အမှားမှ သင်ခန်းစာယူခြင်းသည် ပညာရှိလမ်းစဉ်ဖြစ်သည်။—သု. ၂၂:၃။
၁၇။ ယေဟောဝါသည် ကျွန်ုပ်တို့ကို ချစ်လည်းမချစ်၊ တန်ဖိုးလည်းမထား ဟူသော မုသာစကားကို စာတန် အဘယ်ကြောင့်မြေတောင်မြှောက်ပေးသနည်း။
၁၇ စာတန် ထိရောက်စွာအသုံးပြုလျက်ရှိသော မုသာစကားနောက်တစ်ခုမှာ ယေဟောဝါသည် ကျွန်ုပ်တို့ကိုချစ်လည်းမချစ်၊ တန်ဖိုးလည်းမထားဟူ၍ဖြစ်၏။ စာတန်သည် မစုံလင်သူလူသားများကို နှစ်ပေါင်းထောင်ချီ လေ့လာသုံးသပ်ခဲ့ပြီ။ စိတ်ဓာတ်ကျဆင်းမှုသည် ကျွန်ုပ်တို့ကို ပျော့ညံ့စေနိုင်ကြောင်း သူကောင်းကောင်းသိထားသည်။ (သု. ၂၄:၁၀) ထို့ကြောင့် ကျွန်ုပ်တို့ကို ဘုရားသခင်တန်ဖိုးမထားဟူသောမုသာကို သူမြေတောင်မြှောက်ပေး၏။ ကျွန်ုပ်တို့သည် “အောက်သို့လှဲခြင်းကိုခံရ” သဖြင့် ကျွန်ုပ်တို့ကို ယေဟောဝါဂရုမစိုက်ဟု ယူမှတ်လာပါက လက်လျှော့အရှုံးပေးလိုပေမည်။ (၂ ကောရိန္သု ၄:၉) ထိုသို့ပင် မဟာလှည့်စားသူကြီး ဖြစ်စေလို၏! သို့ဖြစ်၍ စာတန်၏ ဤမုသာစကားဖြင့် လှည့်စားခံရခြင်းကို ကျွန်ုပ်တို့ မည်သို့ရှောင်နိုင်မည်နည်း။
၁၈။ ယေဟောဝါ၏မေတ္တာတော်ကို သမ္မာကျမ်းစာက မည်သို့စိတ်ချစေသနည်း။
၁၈ ကျွန်ုပ်တို့အပေါ်ထားရှိသည့် ဘုရားသခင့်မေတ္တာအကြောင်း သမ္မာကျမ်းစာအဆိုကို တွေးတောဆင်ခြင်ပါ။ ယေဟောဝါသည် ကျွန်ုပ်တို့ကို ဂရုစိုက်တော်မူပြီး တစ်ဦးချင်းစီကို ချစ်မြတ်နိုးကြောင်း စိတ်ချစေရန် သမ္မာကျမ်းစာက ထိမိစွာ စာဖြင့်ပုံဖော်ထားသည်။ ကိုယ်တော်သည် သင်၏မျက်ရည်တို့ကို “ဘူး” ထဲထည့်ထားခြင်းက ကိုယ်တော်အားတည်ကြည်ဖို့ သင်ကြိုးစားရာ၌ ကျသမျှမျက်ရည်တို့ကို ကိုယ်တော်မြင်၍ သတိရတော်မူ၏ဟုဆိုလိုသည်။ (ဆာလံ ၅၆:၈) သင် “နှလုံးကြေကွဲ” သည့်အခါ ကိုယ်တော်သိတော်မူပြီး ထိုအချိန်အခါမျိုးတွင် သင့်အနီးအပါး၌ရှိတော်မူ၏။ (ဆာလံ ၃၄:၁၈၊ သမ္မာ) ‘သင့်ဆံပင်’ ၏အရေအတွက်ကိုသိသည့်အထိ သင့်ကို ကိုယ်တော်အတွင်းကျကျသိတော်မူ၏။ (မဿဲ ၁၀:၂၉-၃၁) ထိုထက်မက ဘုရားသခင်သည် သင့်အတွက် “မိမိ၌ တစ်ပါးတည်းသော သားတော်ကို စွန့်တော်မူ” ခဲ့ပြီ။ (ယောဟန် ၃:၁၆; ဂလာတိ ၂:၂၀) အဆိုပါကျမ်းချက်များသည် အသင်ကိုယ်တိုင်နှင့်သက်ဆိုင်ကြောင်း ယုံကြည်ဖို့ တစ်ခါတစ်ရံ ခဲယဉ်းပေမည်။ သို့သော် ယေဟောဝါမိန့်မြွက်သောစကားကို ကျွန်ုပ်တို့ယုံကြည်ရကြမည်။ ကိုယ်တော်သည် ကျွန်ုပ်တို့ကို အုပ်စုလိုက်အနေနှင့် သာမက တစ်ဦးချင်းစီကိုပါ ချစ်တော်မူကြောင်း ယုံကြည်စိတ်ချစေလိုသည်။
၁၉၊ ၂၀။ (က) သင့်ကို ယေဟောဝါချစ်တော်မမူဟူသော စာတန့်လိမ်ညာမှုကို သိရှိပြီး ငြင်းပယ်ဖို့ အဘယ်ကြောင့်အရေးကြီးသနည်း။ (ခ) နယ်လှည့်ကြီးကြပ်မှူးတစ်ဦးသည် စိတ်ညှိုးငယ်နေသူများကို မည်သို့ ကူညီပေးခဲ့သနည်း။
၁၉ မုသာစကားကိုသိရှိပြီး ငြင်းပယ်ပါ။ သင့်ကို တစ်ဦးတစ်ယောက် လိမ်ပြောနေသည်ကို သင်သိမည်ဆိုလျှင် လှည့်စားမခံရဖို့ မိမိကိုယ်ကို ကာကွယ်နိုင်သည်။ ထိုနည်းတူ သင့်ကို ယေဟောဝါမချစ်ပါဟူသော မုသာစကားကို စာတန်ယုံကြည်စေလိုကြောင်း သိထားခြင်းကပင် များစွာအထောက်အကူပြုနိုင်သည်။ စာတန်၏နည်းဗျူဟာများအကြောင်း သတိပေးသော ကင်းမျှော်စင်ဆောင်းပါးတစ်ခုကို ခရစ်ယာန်တစ်ဦး ဤသို့တုံ့ပြန်ခဲ့သည်– “ကျွန်မရဲ့ခံစားချက်တွေကိုအသုံးပြုပြီး စိတ်ပျက်သွားရအောင် စာတန်ကြိုးစားတယ်ဆိုတာကို ကျွန်မ မသိခဲ့ဘူး။ ခုလိုသိထားတော့ အဲဒီခံစားချက်တွေကို တိုက်ထုတ်ချင်စိတ်ရှိလာတယ်။”
၂၀ တောင်အမေရိကနိုင်ငံတစ်ခုမှ နယ်လှည့်ကြီးကြပ်မှူးတစ်ဦး၏တွေ့ကြုံမှုကို သုံးသပ်ကြည့်ပါ။ စိတ်ညှိုးငယ်နေသော ယုံကြည်သူချင်းများထံ သိုးထိန်းလည်ပတ်မှုပြုလုပ်သောအခါ ‘သုံးပါးပေါင်းတစ်ဆူကို ခင်ဗျားယုံသလား’ ဟုသူမေးလေ့ရှိသည်။ စိတ်ပျက်အားလျော့နေသူက ယင်းသည် စာတန်၏မုသာစကားတစ်ခုဖြစ်ကြောင်း သိထားရာ များသောအားဖြင့် ‘ဘယ်ယုံပါ့မလဲ’ ဟု ဖြေတတ်သည်။ ထို့နောက် နယ်လှည့်အကြီးအကဲက ‘မီးငရဲကိုကော ယုံသလား’ ဟုမေး၏။ ‘ဘယ်ယုံပါ့မလဲ!’ ဟုဖြေပြန်သည်။ ထိုအခါ နယ်လှည့်အကြီးအကဲက မုသာစကားအဖြစ် လူအများအသိအမှတ်မပြုကြသော စာတန့်မုသာတစ်မျိုးရှိသေးသည်ဟု သူတို့ကိုပြောပြသည်။ ၎င်းနောက် ယေဟောဝါထံချဉ်းကပ်လော့ * စာအုပ်၊ အခန်း ၂၄၊ စာပိုဒ် ၂၁ ကိုသူညွှန်ပြပြီး ကျွန်ုပ်တို့တစ်ဦးချင်းစီကို ယေဟောဝါချစ်တော်မမူဟူသော စာတန်၏လိမ်ညာမှုကို ဂရုပြုစေသည်။ ဤနည်းဖြင့် စိတ်ဓာတ်ကျနေသူများအား စာတန်၏အဆိုပါ မုသာစကားကို သိရှိစေပြီး ငြင်းပယ်ကြရန် ကူညီပေးခဲ့ရာ၌ နယ်လှည့်ကြီးကြပ်မှူးသည် အောင်မြင်ခဲ့ကြောင်း ပြောပြသည်။
လှည့်စားမှုများမှ သင့်ကိုယ်သင် သတိနှင့်ကာကွယ်လော့
၂၁၊ ၂၂။ စာတန်၏လှည့်စားတတ်သော နည်းဗျူဟာများကို ကျွန်ုပ်တို့ အဘယ်ကြောင့် မသိဘဲ မနေသနည်း၊ ကျွန်ုပ်တို့ မည်သို့စိတ်ပိုင်းဖြတ်ထားသင့်သနည်း။
၂၁ နောက်ဆုံးကာလ၏ နိဂုံးပိုင်းအတွင်း စာတန်သည် လိမ်လည်လှည့်ဖြားမှု တစ်ပြုံတစ်ခေါင်းဖြန့်လိမ့်မည်ဟု မျှော်လင့်စရာရှိ၏။ ယေဟောဝါသည် စာတန်၏လှည့်စားတတ်သော နည်းဗျူဟာများကို ကျွန်ုပ်တို့အားသိရှိစေသည့်အတွက် ကျေးဇူးတင်စရာပင်။ သမ္မာကျမ်းစာနှင့် ‘သစ္စာနှင့်သတိပညာရှိသောကျွန်’ ၏ ကျမ်းစာအခြေပြု စာပေစာတမ်းများက စာတန်၏ပရိယာယ်များကို ရှင်းရှင်းလင်းလင်းဖော်ပြသည်။ (မဿဲ ၂၄:၄၅) ဘေးအန္တရာယ်ကို ကြိုတင်သိရှိရခြင်းဖြင့် ကျွန်ုပ်တို့ ကြိုတင်ပြင်ဆင်နိုင်ကြသည်။—၂ ကောရိန္သု ၂:၁၁။
၂၂ သို့ဖြစ်၍ အယူဖောက်ပြန်သူများ၏ ကျိုးကြောင်းဆင်ခြင်မှုများကို ဆက်၍သတိပြုကြစို့။ မသိမသာကျော့မိသွားစေနိုင်သည့် မိမိကိုယ်ကိုလှည့်စားခြင်းကိုရှောင်ရန် စိတ်ပိုင်းဖြတ်ထားကြပါစို့။ ထို့ပြင် စာတန်၏မုသာရှိရှိသမျှကို သိရှိပြီး ငြင်းပယ်ကြစို့လေ။ သို့ပြုခြင်းဖြင့် လှည့်စားခြင်းကို စက်ဆုပ်ရွံရှာတော်မူသော ‘အမှန်တရား၏ ဘုရားသခင်’ နှင့် ကျွန်ုပ်တို့၏ဆက်ဆံရေးကို ထိန်းသိမ်းကာကွယ်ထားကြပါမည်။—ဆာလံ ၃၁:၅; သု. ၃:၃၂။
[အောက်ခြေမှတ်ချက်]
^ အပိုဒ်၊ 5 ဗျာ. ၁၂:၉ တွင် ‘လှည့်ဖြားနေ’ ဟုဘာသာပြန်ဆိုထားသော ကြိယာပုံစံနှင့်စပ်လျဉ်း၍ အကိုးအကားစာအုပ်တစ်အုပ်က ယင်းသည် “ပင်ကိုစရိုက်တစ်ခုဖြစ်လာသော ဆက်တိုက်လုပ်ရပ်တစ်ခုကို ဖော်ပြသည်” ဟုဆို၏။
^ အပိုဒ်၊ 20 ယေဟောဝါသက်သေများထုတ်ဝေခဲ့။
သင်မှတ်မိသလော
• ယနေ့ လောကတွင် လှည့်စားခြင်း အဘယ်ကြောင့် ဤမျှ များရသနည်း။
• အယူဖောက်ပြန်သူများ၏ လှည့်စားခြင်းကို ကျွန်ုပ်တို့ မည်သို့ သတိပြုရှောင်ရှားနိုင်သနည်း။
• မိမိကိုယ်ကိုလှည့်စားတတ်သည့် စိတ်သဘောထားမှန်သမျှကို မည်သို့ သတိပြုရှောင်ရှားနိုင်သနည်း။
• စာတန့်မုသာစကား၏ လှည့်စားမှုကို ကျွန်ုပ်တို့ မည်သို့ ရှောင်နိုင် မည်နည်း။
[လေ့လာရန်မေးခွန်းများ]
[စာမျက်နှာ ၁၇ ပါ ရုပ်ပုံ]
ဖျော်ဖြေမှုနှင့်ပတ်သက်၍ သင့်ကိုယ်သင် မလှည့်စားပါနှင့်
[စာမျက်နှာ ၁၈ ပါ ရုပ်ပုံ]
မိမိကိုယ်ကိုမလှည့်စားမိရန် ဆုတောင်းပြီး မိမိကိုယ်ကိုဆန်းစစ်ပါ၊ အခြားသူများပြောသောစကားကို နားထောင်ပြီး သမ္မာကျမ်းစာကို မှန်မှန်ဖတ်ရှုလေ့လာပါ