သင့်နှလုံးကို စောင့်ရှောက်ခြင်းဖြင့် ကိုယ်ကျင့်တရားစင်ကြယ်နေလော့
သင့်နှလုံးကို စောင့်ရှောက်ခြင်းဖြင့် ကိုယ်ကျင့်တရားစင်ကြယ်နေလော့
“နှလုံးသည် အသက်၏အခြေအမြစ်ဖြစ်သောကြောင့် သင်၏နှလုံးကို အထူးသဖြင့်စောင့်ရှောက်လော့။”—သု. ၄:၂၃။
၁-၃။ (က) မိမိတို့၏ကိုယ်ကျင့်တရားစင်ကြယ်ခြင်းကို တန်ဖိုးမထားကြောင်း လူတို့မည်သို့တင်ပြလေ့ရှိသနည်း။ ဥပမာပေးပါ။ (ခ) ကိုယ်ကျင့်တရားစင်ကြယ်ခြင်း၏တန်ဖိုးကို ဆန်းစစ်ကြည့်ဖို့ အဘယ်ကြောင့်အရေးကြီးသနည်း။
ပန်းချီကားမှာ ခေတ်နောက်ကျနေပုံပေါ်ပေမည်။ အိမ်အပြင်အဆင်နှင့် မလိုက်ဖက်၍ဖြစ်နိုင်သည်။ မည်သို့ဆိုစေ ပိုင်ရှင်ဖြစ်သူသည် ထိုပန်းချီကားကို သိပ်အသုံးမပြုချင်ပုံရသည်။ ထိုပန်းချီကားသည် အဟောင်းဆိုင်သို့ရောက်သွားပြီး ဈေးနှုန်းမှာ ၂၉ ဒေါ်လာ (ယူ.အက်စ်.) ဖြစ်သည်။ သို့သော် နှစ်အနည်းငယ်အကြာတွင် ယင်းသည် ဒေါ်လာတစ်သန်းခန့်တန်ကြောင်း သိလိုက်ရ၏! အမှန်ပင်ရှားပါး၍ လက်ရာမြောက်သော ပန်းချီကားဖြစ်နေ၏။ ထိုရတနာကို တန်ဖိုးမထားမိခဲ့သော ပိုင်ရှင်ဟောင်း၏ခံစားချက်ကို တွေးကြည့်လိုက်ပါ!
၂ အကျင့်အကြံသန့်ရှင်းစင်ကြယ်ခြင်းဖြစ်သော ကိုယ်ကျင့်တရားစင်ကြယ်ခြင်းနှင့်ပတ်သက်၍လည်း အလားတူဖြစ်ပျက်တတ်ပါသည်။ ယနေ့ လူအများသည် ကိုယ်ကျင့်တရားစင်ကြယ်ခြင်းကို တန်ဖိုးမထားတတ်ကြချေ။ အချို့က ယင်းကို ခေတ်နောက်ကျသောအယူအဆ၊ မျက်မှောက်ခေတ်ဘဝပုံစံနှင့် အံမဝင်သောအရာဟု ယူမှတ်ကြ၏။ ထို့ကြောင့် မဖြစ်စလောက်တုံ့ပြန်ရရှိမှုအတွက် ယင်းကို စွန့်လွှတ်ခဲ့ကြသည်။ အချို့သည် တဒင်္ဂလိင်ဆိုင်ရာကျေနပ်မှုရဖို့ မိမိတို့၏ ကိုယ်ကျင့်တရားစင်ကြယ်ခြင်းနှင့် လဲလှယ်ယူကြ၏။ အခြားသူတို့မူ မိမိတို့ရွယ်တူချင်းများ၊ သို့မဟုတ် လိင်ခြားသူတစ်ဦးဦး၏ အထင်ကြီးခြင်းကိုခံလို၍ ယင်းကို စွန့်လွှတ်ကြသည်။—သု. ၁၃:၂၀။
၃ ကိုယ်ကျင့်တရားစင်ကြယ်နေခြင်းသည် အမှန်အားဖြင့် မည်မျှအဖိုးထိုက်ကြောင်း အချိန်နှောင်းမှ သိလာကြသူ များစွာရှိ၏။ သူတို့၏ဆုံးရှုံးမှုမှာ ဝမ်းနည်းစရာဖြစ်လေ့ရှိသည်။ သမ္မာကျမ်းစာဖော်ပြသည့်အတိုင်း အကျင့်ယိုယွင်းခြင်း၏ အကျိုးဆက်များသည် အဆိပ်ကဲ့သို့၊ “ဒေါနကဲ့သို့ခါး” နိုင်သည်။ (သု. ၅:၃၊ ၄၊ သမ္မာ) ယနေ့ ကိုယ်ကျင့်တရားအခြေအနေ ယိုယွင်းနေသည်ဖြစ်၍ သင်၏ကိုယ်ကျင့်တရားစင်ကြယ်ခြင်းကို မည်သို့တန်ဖိုးထား၊ ထိန်းသိမ်းနိုင်သနည်း။ ကျွန်ုပ်တို့လှမ်းနိုင်သော သက်ဆိုင်ရာခြေလှမ်းသုံးခုကို အာရုံစိုက်ကြမည်။
သင်၏နှလုံးကို စောင့်ရှောက်လော့
၄။ ပုံဆောင်နှလုံးကား အဘယ်နည်း၊ ယင်းကို အဘယ်ကြောင့် စောင့်ရှောက်သင့်သနည်း။
၄ ကိုယ်ကျင့်တရားစင်ကြယ်နေဖို့ သော့ချက်မှာ နှလုံးကိုစောင့်ရှောက်ခြင်းဖြစ်သည်။ သမ္မာကျမ်းစာက “နှလုံးသည် အသက်၏အခြေအမြစ်ဖြစ်သောကြောင့် သင်၏နှလုံးကို အထူးသဖြင့်စောင့်ရှောက်လော့” ဟု ဆို၏။ (သု. ၄:၂၃) ဤတွင်ဖော်ပြထားသော “သင်၏နှလုံး” သည် အဘယ်အရာကို ရည်ညွှန်းသနည်း။ ပကတိနှလုံးကို ရည်ညွှန်းနေခြင်းမဟုတ်ပါ။ ပုံဆောင်နှလုံးကိုဆိုလို၏။ သင်၏အတွေးအခေါ်များ၊ ခံစားချက်များနှင့် လှုံ့ဆော်မှုများအပါအဝင် သင်၏အတွင်းလူကို ရည်ညွှန်းသည်။ သမ္မာကျမ်းစာက “သင်၏ဘုရားသခင်ထာဝရဘုရား[သခင်]ကို စိတ်နှလုံးအကြွင်းမဲ့၊ ဉာဏ်ရှိသမျှ၊ အစွမ်းသတ္တိရှိသမျှနှင့်ချစ်လော့” ဟုဆို၏။ (တရားဟောရာ ၆:၅၊ သမ္မာ) ယင်းသည် ပညတ်တကာတို့တွင် အကြီးမြတ်ဆုံးပညတ်ဖြစ်ကြောင်း ယေရှုထုတ်ဖော်ပြောခဲ့သည်။ (မာကု ၁၂:၂၉၊ ၃၀) ကျွန်ုပ်တို့၏နှလုံးသည် အလွန်အဖိုးထိုက်ကြောင်း ထင်ရှားပါသည်။ ယင်းကို စောင့်ရှောက်ထိုက်ပေသည်။
၅။ နှလုံးသည် အဖိုးထိုက်တန်ပြီး တစ်ချိန်တည်းတွင် မည်သို့အန္တရာယ်ရှိနိုင်သနည်း။
၅ သို့သော် သမ္မာကျမ်းစာက “စိတ်နှလုံးသည် ခပ်သိမ်းသောအရာထက် စဉ်းလဲတတ်၏။ အလွန်ယိုယွင်းသောသဘောရှိ၏” ဟူ၍လည်းဆိုသည်။ (ယေရမိ ၁၇:၉) နှလုံးသည် မည်သို့စဉ်းလဲနိုင်သနည်း၊ ကျွန်ုပ်တို့အတွက် မည်သို့အန္တရာယ်ရှိနိုင်သနည်း။ ဥပမာအနေနှင့် မော်တော်ကားတစ်စီးသည် အဖိုးတန်စက်ကိရိယာတစ်ခုဖြစ်၏၊ အရေးပေါ်လာသည့်အခါ အသက်ပင် ကယ်နိုင်သည်။ သို့သော် ယာဉ်မောင်းသည် ကားကိုမထိန်း၊ စတီယာရင်ဘီးကို အဆက်မပြတ်ထိန်းမထားပါက အဆိုပါကားသည် သေစေတတ်သောကိရိယာ ဖြစ်လာနိုင်သည်။ ထိုနည်းတူ သင်၏နှလုံးကို မစောင့်ရှောက်လျှင် သင်သည် အတွင်းစိတ်ဆန္ဒနှင့် စိတ်ဇောတိုက်တွန်းရာတို့၏ စေလိုရာကို ခံနေရပြီး သင့်ဘဝခရီးတွင် ဘေးဆိုးများဆိုက်ပေမည်။ ဘုရားသခင့်နှုတ်မြွက်စကားတော်က ဤသို့ဆို၏– “မိမိစိတ်နှလုံးကို ကိုးစားသောသူသည် လူမိုက်ဖြစ်၏။ ပညာသတိနှင့်ကျင့်သောသူမူကား ဘေးလွတ်တတ်၏။” (သု. ၂၈:၂၆) မှန်ပါသည်၊ ခရီးစဉ်တစ်ခု မစတင်မီ လမ်းညွှန်မြေပုံတစ်ခုကို သင်ရှာဖွေကြည့်ရှုမည်ဖြစ်သကဲ့သို့ သမ္မာကျမ်းစာ၏ လမ်းညွှန်မှုကို သင်ခံယူမည်ဆိုလျှင် ပညာသတိနှင့်ကျင့်ပြီး ဘေးအန္တရာယ်ကိုရှောင်နိုင်မည်။—ဆာလံ ၁၁၉:၁၀၅။
၆၊ ၇။ (က) သန့်ရှင်းခြင်းဟူသည် အဘယ်နည်း၊ ယင်းသည် ယေဟောဝါ၏ကျေးကျွန်များအတွက် အဘယ်ကြောင့်အရေးပါသနည်း။ (ခ) မစုံလင်သူတို့သည် ယေဟောဝါ၏သန့်ရှင်းခြင်းကို ရောင်ပြန်နိုင်ကြောင်း မည်သို့သိရသနည်း။
၆ ကျွန်ုပ်တို့၏နှလုံးသည် ကိုယ်ကျင့်တရားစင်ကြယ်ခြင်းဘက်သို့ အလိုလိုတိမ်းညွတ်သွားမည်မဟုတ်ပါ။ ကျွန်ုပ်တို့က ဦးတည်လမ်းကြောင်းပေးရမည်။ ထိုသို့ပြုရန် နည်းတစ်နည်းမှာ ကိုယ်ကျင့်တရားစင်ကြယ်ခြင်း၏ တန်ဖိုးအမှန်ကို စေ့စေ့စဉ်းစားဆင်ခြင်ခြင်းဖြင့်ဖြစ်သည်။ ဤအရည်အချင်းသည် စင်ကြယ်ခြင်း၊ ဖြူစင်ခြင်း၊ အပြစ်နှင့် သီးခြားဖြစ်ခြင်းတို့ကိုဆိုလိုသော သန့်ရှင်းခြင်းနှင့် အနီးကပ်ဆက်စပ်နေသည်။ သန့်ရှင်းခြင်းသည် ယေဟောဝါဘုရားသခင်၏ ပင်ကိုဂုဏ်ရည်တော်တစ်ခုဖြစ်သည့် အဖိုးတန်အရည်အသွေးတစ်ခုဖြစ်၏။ ကျမ်းချက်ရာပေါင်းများစွာက ထိုအရည်အသွေးကို ယေဟောဝါနှင့်ဆက်စပ်၍ဖော်ပြသည်။ အမှန်မှာ သမ္မာကျမ်းစာက ‘သန့်ရှင်းခြင်းကို ယေဟောဝါပိုင်ဆိုင်’ သည်ဟုဆို၏။ (ထွက်မြောက်ရာ ၂၈:၃၆၊ ကဘ) သို့သော် မြင့်မြတ်လှသော ထိုအရည်အသွေးသည် မစုံလင်သူ ကျွန်ုပ်တို့လူသားများနှင့် မည်သို့ပတ်သက်ဆက်နွှယ်သနည်း။
၇ သမ္မာကျမ်းစာတွင် ယေဟောဝါက “ငါသည်သန့်ရှင်းတော်မူသောကြောင့်၊ သင်တို့သည်လည်း သန့်ရှင်းခြင်းရှိကြလော့” ဟု ကျွန်ုပ်တို့ကို မိန့်တော်မူသည်။ (၁ ပေတရု ၁:၁၆) မှန်ပါသည်၊ ယေဟောဝါ၏သန့်ရှင်းခြင်းကို ကျွန်ုပ်တို့တုပနိုင်၏; ကိုယ်တော့်မျက်မှောက်တော်တွင် အညစ်အကြေးကင်းစင်ပြီး ကျွန်ုပ်တို့၏ကိုယ်ကျင့်တရားစင်ကြယ်ခြင်းကို ထိန်းသိမ်းထားနိုင်ကြပါသည်။ ထို့ကြောင့် မစင်ကြယ်သောအပြုအမူများကို ကျွန်ုပ်တို့ရှောင်သည့်အခါ မြင့်မြတ်၍ ပီတိဖြစ်ဖွယ်အခွင့်ထူး—အမြင့်မြတ်ဆုံးဘုရားသခင်၏ လှပတင့်တယ်သောဂုဏ်ရည်တော်တစ်ခုကို ရောင်ပြန်ဟပ်ခွင့်ရရန် လက်လှမ်းနေခြင်းပင်တည်း! (ဧဖက် ၅:၁) ယင်းကို ကျွန်ုပ်တို့ လက်လှမ်းမမီနိုင်ဟု မယူဆသင့်ပါ၊ အကြောင်းမှာ ယေဟောဝါသည် ပညာရှိ၍ အကျိုးသင့်အကြောင်းသင့်ရှိသည့်အရှင်ဖြစ်သောကြောင့် ဘယ်သောအခါမျှ ကျွန်ုပ်တို့တတ်နိုင်သည်ထက် ပို၍ တောင်းဆိုတော်မမူ။ (ဆာလံ ၁၀၃:၁၃၊ ၁၄; ယာကုပ် ၃:၁၇) မှန်ပါသည်၊ ဝိညာဉ်ရေးနှင့် ကိုယ်ကျင့်တရား စင်ကြယ်နေဖို့ ကြိုးစားအားထုတ်မှုလိုသည်။ သို့ရာတွင် တမန်တော်ပေါလုက ‘ခရစ်တော်ဘက်၌ လုံးလုံးဖြူစင်သောစိတ်ရှိထိုက်၏’ ဟုရေးသားဖော်ပြခဲ့သည်။ (၂ ကောရိန္သု ၁၁:၃၊ သမ္မာ) ခရစ်တော်နှင့် ကိုယ်တော့်ခမည်းတော်ကို ကျေးဇူးတုံ့ပြန်ရန် ကျွန်ုပ်တို့ဘက်မှ ကိုယ်ကျင့်တရားစင်ကြယ်နေဖို့ အစွမ်းကုန်ကြိုးစားသင့်သည်မဟုတ်ပေလော။ အမှန်မှာ ကိုယ်တော်တို့ပြခဲ့သောမေတ္တာကို ကျွန်ုပ်တို့ ကျေးဇူးဆပ်၍ မကုန်နိုင်ပါ။ (ယောဟန် ၃:၁၆; ၁၅:၁၃) ကျွန်ုပ်တို့သည် စင်ကြယ်၍ အကျင့်သိက္ခာရှိစွာ အသက်ရှင်ခြင်းဖြင့် ကျေးဇူးတုံ့ပြန်ကြောင်းဖော်ပြခွင့် ရရှိထားကြ၏။ ကိုယ်ကျင့်တရားစင်ကြယ်နေခြင်းကို ထိုသို့မှတ်ယူခြင်းဖြင့် ၎င်းကိုတန်ဖိုးထားကာ ကျွန်ုပ်တို့၏နှလုံးကိုစောင့်ရှောက်ကြပါမည်။
၈။ (က) ပုံဆောင်နှလုံးကို ကျွန်ုပ်တို့မည်သို့ အာဟာရဖြည့်တင်းပေးနိုင်သနည်း။ (ခ) ကျွန်ုပ်တို့၏ အာလာပသလ္လာပစကားက ကျွန်ုပ်တို့အကြောင်း အဘယ်အရာဖော်ပြနိုင်သနည်း။
၈ ကျွန်ုပ်တို့ကိုယ်ကို အားဖြည့်ကျွေးမွေးပုံအားဖြင့်လည်း နှလုံးကိုစောင့်ရှောက်ကြသည်။ ကျွန်ုပ်တို့၏စိတ်နှလုံးကို အာဟာရပြည့်သော ဝိညာဉ်အစာ မှန်မှန်ကျွေးမွေးပေးပြီး ဘုရားသခင့်နိုင်ငံတော်သတင်းကောင်းအပေါ် အာရုံစူးစိုက်ဖို့လို၏။ (ကောလောသဲ ၃:၂) ကျွန်ုပ်တို့ စကားလက်ဆုံပြောချိန်တွင်ပင် ယင်းကို အာရုံစူးစိုက်ကြောင်း ပေါ်လွင်စေသင့်သည်။ ကျွန်ုပ်တို့သည် သွေးသားဆိုင်ရာ၊ ကိုယ်ကျင့်တရားကင်းမဲ့သောအကြောင်းအရာများကို ပြောတတ်သူဟု နာမည်ရနေလျှင် ကျွန်ုပ်တို့၏နှလုံးအခြေအနေကို ဖော်ပြသည်။ (လုကာ ၆:၄၅) ထိုသို့နာမည်ထွက်မည့်အစား ဝိညာဉ်ရေးရာ တည်ဆောက်မှုဖြစ်စေသော အကြောင်းများကိုပြောဆိုတတ်သူဟု နာမည်ရသူများဖြစ်ကြပါစို့။ (ဧဖက် ၅:၃) ကျွန်ုပ်တို့၏နှလုံးကို စောင့်ရှောက်ရန် ကျွန်ုပ်တို့ရှောင်ရမည့် စိုးရိမ်ဖွယ်အန္တရာယ်များရှိသည်။ အဆိုပါအန္တရာယ်နှစ်ခုကို ဆွေးနွေးကြည့်ကြစို့။
မတရားမေထုန်ပြုခြင်းမှ ထွက်ပြေးကြလော့
၉-၁၁။ (က) ၁ ကောရိန္သု ၆:၁၈ ပါသွန်သင်ချက်ကို လျစ်လျူရှုသူများသည် ကြီးလေးသောအပြစ်ယိုယွင်းမိဖို့အကြောင်း အဘယ်ကြောင့်ပိုများသနည်း။ ဥပမာပေးပါ။ (ခ) မတရားမေထုန်ပြုခြင်းမှ ကျွန်ုပ်တို့ ထွက်ပြေးနေကြမည်ဆိုလျှင် အဘယ်အရာကို ရှောင်ကြဉ်မည်နည်း။ (ဂ) တည်ကြည်သူယောဘသည် အဘယ်ထူးခြားသောပုံသက်သေ တင်ပြခဲ့သနည်း။
၉ မိမိတို့၏နှလုံးကို စောင့်ရှောက်၍ ကိုယ်ကျင့်တရားစင်ကြယ်နေစေရန် လူများစွာအတွက် အထောက်အကူပြုသွန်သင်ချက်ကို တမန်တော်ပေါလု ရေးသားရန် ယေဟောဝါမှုတ်သွင်းပေးခဲ့သည်။ ပေါလုက “မတရားသောမေထုန်ကို ကြဉ်ရှောင် [“မတရားမေထုန်ပြုခြင်းမှ ထွက်ပြေး၊” ကဘ] ကြလော့” ဟုဆို၏။ (၁ ကောရိန္သု ၆:၁၈) သူက “မတရားမေထုန်ကို ကြဉ်ရှောင်ကြလော့” ဟူ၍သာ မပြောခဲ့ချေ။ ခရစ်ယာန်များသည် ယင်းထက်ပို၍လုပ်ဆောင်သင့်သည်။ သူတို့သည် အသက်အန္တရာယ်ရှိသော ဘေးတစ်ခုခုမှ ထွက်ပြေးတတ်ကြသကဲ့သို့ ယင်းသို့သော အကျင့်ပျက်မှုများမှ ထွက်ပြေးသင့်သည်။ အဆိုပါသွန်သင်ချက်ကို ကျွန်ုပ်တို့လျစ်လျူရှုကြမည်ဆိုလျှင် အကြီးအကျယ်ကိုယ်ကျင့်တရား ယိုယွင်းမိပြီး ဘုရားသခင့်မျက်နှာသာတော်ကို ဆုံးရှုံးရဖို့အကြောင်း တိုးများစေသည်။
၁၀ ဥပမာပေးရလျှင်၊ မိခင်တစ်ဦးသည် အရေးပါသော အခမ်းအနားတစ်ခုတက်ရောက်ဖို့ သူ၏သားငယ်ကို ကိုယ်လက်မျက်နှာသန့်စင်ပေး၍ အဝတ်အစား ပြင်ဆင်ပေးပြီးဖြစ်သည်။ သားငယ်ဖြစ်သူက မိသားစုလိုက် အပြင်မထွက်မီ အိမ်ပြင်တွင်ကစားနေလို့ရမည်လောဟု မိခင်အားမေးရာ မိခင်က သတ်မှတ်ချက်တစ်ခုဖြင့် သဘောတူလိုက်သည်။ “အဲဒီရွှံ့အိုင်အနားကို မသွားနဲ့။ ရွှံ့ပေသွားရင် ဒဏ်ပေးခံရမယ်” ဟုဆို၍ ခွင့်ပြုလိုက်၏။ သို့သော် မိနစ်အနည်းငယ်အကြာတွင် ကလေးငယ်သည် ရွှံ့အိုင်စပ်တွင် ခြေဖျားထောက်၍သွားနေသည်ကို တွေ့လိုက်ရ၏။ သူ ရွှံ့မပေသေးပါ။ သို့တိုင် ရွှံ့အိုင်အနီးသို့မသွားဖို့ မိခင်၏သတိပေးချက်ကို သူအရေးမစိုက်သဖြင့် ဒဏ်ပေးခံရဖို့ သေချာသလောက်ဖြစ်နေပြီ။ (သု. ၂၂:၁၅) ထိုထက်ပို၍သတိရှိသင့်သော လူငယ်နှင့်လူကြီးများစွာသည် အလားတူ အမှားမျိုးပြုကြ၏။ မည်သို့နည်း။
၁၁ “ရှက်ကြောက်ဖွယ်သောကိလေသာလက်သို့” မိမိတို့ကိုယ်ကိုအပ်သူများစွာရှိသည့် ဤအချိန်တွင် တရားမဝင်လိင်ဆက်ဆံမှုများကို အားပေးအားမြှောက်ပြုသည့် စီးပွားရေးလုပ်ငန်းကြီးတစ်ခု ဖြစ်ထွန်းနေသည်။ (ရောမ ၁:၂၆၊ ၂၇) မဂ္ဂဇင်းများ၊ စာအုပ်များ၊ ဗီဒီယိုများနှင့် အင်တာနက်ပေါ်တွင် အပြာစာပေ၊ ရုပ်ပုံများ ကပ်ဆိုက်လျက်ရှိ၏။ ဤသို့သောရုပ်ပုံများကို စိတ်ထဲထည့်သွင်းနေသူတို့သည် မတရားမေထုန်ပြုခြင်းမှ ထွက်ပြေးသူများမဟုတ်နိုင်ချေ။ ယင်းကို သူတို့ပေါ့ပေါ့ဆဆ သဘောထားပြီး အစွန်အဖျားတွင် ခြေဖျားထောက်လျှောက်နေဟန်တူပြီး သမ္မာကျမ်းစာသတိပေးချက်ကို လျစ်လျူရှုရာကျသည်။ ဤသူတို့သည် နှလုံးကိုစောင့်ရှောက်မည့်အစား နှစ်ချီ၍မှတ်မိနေနိုင်သည့် ထင်ရှားသောပုံရိပ်များဖြင့် နှလုံးကို အဆိပ်သင့်နေစေကြ၏။ (သု. ၆:၂၇) မှားယွင်းရန် သွေးဆောင်ခံရမည့် အခြေအနေတွင် မိမိကိုယ်ကိုမရောက်စေရန် သူ၏မျက်စိနှင့်ပဋိညာဉ်ပြုခဲ့သူ၊ တည်ကြည်သောယောဘထံမှ နည်းခံကြပါစို့။ (ယောဘ ၃၁:၁) သူသည် ကျွန်ုပ်တို့အတုယူစရာပုံသက်သေ အမှန်ဖြစ်၏!
၁၂။ ခရစ်ယာန်မောင်နှံစုံများသည် ပိုးပန်းချိန်အတွင်း မည်သို့ ‘မတရားမေထုန်ပြုခြင်းမှ ထွက်ပြေး’ နိုင်ကြသနည်း။
၁၂ ပိုးပန်းချိန်အတွင်း ‘မတရားမေထုန်ပြုခြင်းမှ ထွက်ပြေး’ ရန် အထူးအရေးကြီး၏။ ပိုးပန်းချိန်ကာလသည် မျှော်လင့်ချက်အပြည့်ရှိသော ပျော်ရွှင်ဖွယ်အချိန်ဖြစ်သင့်သော်လည်း လူငယ်စုံတွဲအချို့သည် အကျင့်ယိုယွင်းမှုနှင့် ဆော့ကစားခြင်းဖြင့် ယင်းကို ဖျက်ဆီးပစ်ကြသည်။ ဤသို့ပြုခြင်းဖြင့် ကိုယ်ကျိုးစွန့်မေတ္တာ၊ ချုပ်တည်းခြင်းနှင့် ယေဟောဝါဘုရားသခင်ကို နာခံခြင်းအပေါ်အခြေပြုသော ဆက်ဆံရေးဖြစ်သည့် သာယာချမ်းမြေ့သောအိမ်ထောင်ရေး၏ အကောင်းဆုံးအုတ်မြစ် မရှိစေပါ။ ခရစ်ယာန်စုံတွဲတစ်တွဲသည် ပိုးပန်းချိန်အတွင်း ကိုယ်ကျင့်တရားမစောင့်စည်းမိခဲ့ကြချေ။ သူတို့အိမ်ထောင်ပြုပြီးနောက် ဇနီးဖြစ်သူက မင်္ဂလာဆောင်သည့်နေ့တွင်ပင် မပျော်နိုင်သည့်အထိ သူ၏သိစိတ်က သူ့ကိုစိတ်သောကရောက်စေကြောင်း ဝန်ခံခဲ့သည်။ သူဤသို့ဝန်ခံသည်– “ယေဟောဝါရဲ့ခွင့်လွှတ်မှုကို ကျွန်မ အကြိမ်ကြိမ်တောင်းခံခဲ့ပါတယ်၊ အဲလိုဖြစ်ခဲ့တာ ခုနစ်နှစ်လွန်ခဲ့တာတောင် ကျွန်မရဲ့သိစိတ်က ကျွန်မကို အနှောင့်အယှက်ပေးနေတုန်းပဲ။” ဤအပြစ်မျိုး ကျူးလွန်ခဲ့သူများသည် ခရစ်ယာန်အကြီးအကဲများ၏ အကူအညီကိုတောင်းခံဖို့ အရေးကြီးသည်။ (ယာကုပ် ၅:၁၄၊ ၁၅) သို့ရာတွင် ခရစ်ယာန်မောင်နှံစုံများစွာတို့သည် ပညာရှိစွာပြုမူကျင့်ကြံပြီး ပိုးပန်းချိန်အတွင်း အဆိုပါအန္တရာယ်များကို ရှောင်ခဲ့ကြသည်။ (သု. ၂၂:၃) တစ်ဦးကိုတစ်ဦး ချစ်မြတ်နိုးကြောင်း အကန့်အသတ်နှင့်တင်ပြကြသည်။ အဖော်လိုက်ပေးသူရှိမှ အတူသွားလာကြပြီး သီးခြားနေရာများတွင် နှစ်ယောက်တည်းမရှိဖို့ သတိပြုကြသည်။
၁၃။ ယေဟောဝါအား ဝတ်မပြုသူကို ခရစ်ယာန်တို့ အဘယ်ကြောင့် မပိုးပန်းသင့်သနည်း။
၁၃ ယေဟောဝါကိုဝတ်မပြုသူများနှင့်ချစ်ကြိုက်သော ခရစ်ယာန်များသည် အခက်အခဲများစွာ ကြုံတွေ့ရဖို့ အကြောင်းများသည်။ ဥပမာ၊ ယေဟောဝါဘုရားသခင်ကို မချစ်သူတစ်ဦးနှင့် သင်မည်သို့ပေါင်းဖက်နိုင်မည်နည်း။ ခရစ်ယာန်များသည် ယေဟောဝါကိုချစ်ပြီး ကိုယ်ကျင့်တရားစင်ကြယ်ခြင်းဆိုင်ရာ ကိုယ်တော်၏စံနှုန်းများကို လေးစားသူတို့နှင့်သာ စုံဖက်ဖို့အရေးကြီး၏။ သမ္မာကျမ်းစာက ဤသို့ဆို၏– “မယုံကြည်သောသူတို့နှင့်တွဲဖက်၍ ဆန့်ကျင်ဘက်ဖြစ်သောထမ်းပိုးကို မထမ်းကြနှင့်။ တရားသောအမှုသည် မတရားသောအမှုကို အဘယ်သို့လက်ခံနိုင်မည်နည်း။ အလင်းသည် မှောင်မိုက်နှင့် အဘယ်သို့ဆက်ဆံနိုင်မည်နည်း။”—၂ ကောရိန္သု ၆:၁၄။
၁၄၊ ၁၅။ (က) ‘မတရားမေထုန်ပြုခြင်း’ ၏အဓိပ္ပာယ်ကို အချို့ မည်သို့ တလွဲယူမှတ်ကြသနည်း။ (ခ) ‘မတရားမေထုန်ပြုခြင်း’ တွင် အဘယ်အပြုအမူများ ပါဝင်သနည်း၊ ခရစ်ယာန်များသည် မည်သို့ ‘မတရားမေထုန်ပြုခြင်းမှ ထွက်ပြေး’ နိုင်ကြသနည်း။
၁၄ အသိပညာလည်း မရှိမဖြစ်ပါ။ မတရားမေထုန်ပြုခြင်းသည် အမှန်အားဖြင့် အဘယ်အရာဖြစ်ကြောင်း ကျွန်ုပ်တို့မသိပါက ၎င်းမှ ထွက်ပြေးနိုင်မည်မဟုတ်။ မျက်မှောက်လောကတွင် ‘မတရားမေထုန်ပြုခြင်း’ ကို မှားယွင်းစွာ အဓိပ္ပာယ်ကောက်သူ အချို့ရှိ၏။ တကယ် ကိုယ်လက်နှီးနှောမှုကို ရှောင်နေသမျှကာလပတ်လုံး အိမ်ထောင်မပြုဘဲ ရာဂစိတ်ဖြေနိုင်သည်ဟု သူတို့ယူဆကြသည်။ ကိုယ်ဝန်မရလိုသော ဆယ်ကျော်သက်ကိုယ်ဝန်သည်များ အရေအတွက်လျော့နည်းသွားစေဖို့ လေးစားခံရသည့် ဆေးဘက်ဆိုင်ရာ အဖွဲ့အစည်းအချို့ပင်လျှင် ကိုယ်ဝန်မရစေသော မူမမှန်သည့် လိင်အမူအကျင့်များပြုမူရန် အားပေးနေသည်။ ဤသို့အကြံပေးခြင်းသည် အကြီးအကျယ်လွဲမှားနေပါသည်။ လက်မထပ်ဘဲ ကိုယ်ဝန်ရခြင်းကို ရှောင်ခြင်းသည် ကိုယ်ကျင့်တရားစင်ကြယ်ခြင်းနှင့် တခြားစီပင်၊ ‘မတရားမေထုန်ပြုခြင်း’ ၏ အဓိပ္ပာယ်အမှန်သည် ဤမျှနယ်မကျဉ်းချေ။
၁၅ ‘မတရားမေထုန်ပြုခြင်း’ ဟုဘာသာပြန်ဆိုကြသော ဂရိစကားလုံး ပေါ်နီယာသည် အဓိပ္ပာယ်အတော်ပင်ကျယ်ဝန်းသည်။ ယင်းသည် မထိမ်းမြားထားသူအချင်းချင်းပြုသည့် လိင်ဆက်ဆံမှုများနှင့် ဆက်နွှယ်ပြီး လိင်အင်္ဂါများ တလွဲအသုံးပြုခြင်းအပေါ် အဓိကအာရုံစိုက်စေသည်။ ပေါ်နီယာတွင် ပါးစပ်ဖြင့်၊ စအိုဝဖြင့် လိင်ဆက်ဆံခြင်း၊ မိမိလက်ဖြင့် အခြားသူကို အာသာဖြေပေးခြင်းစသည့် ပြည့်တန်ဆာအိမ်များနှင့် ဆက်နွှယ်လေ့ရှိသော အပြုအမူများပါဝင်သည်။ ထိုသို့သောအမူအကျင့်များသည် ‘မတရားမေထုန်ပြုခြင်း’ မဟုတ်ဟု ယူမှတ်ကြသူတို့သည် မိမိတို့ကိုယ်ကိုလှည့်စားနေကြပြီး စာတန့်ထောင်ချောက်တစ်ခုထဲ ကျနေကြပြီ။ (၂ တိမောသေ ၂:၂၆) ထို့ပြင် ကိုယ်ကျင့်တရားစင်ကြယ်နေခြင်းဟူသည် မတရားမေထုန်ပြုခြင်းနှင့်ပတ်သက်သော အကျင့်တစ်ခုခုကို ရှောင်ကြဉ်ရုံမျှမကပေ။ ‘မတရားမေထုန်ပြုခြင်းမှ ထွက်ပြေး’ ရန် ကျွန်ုပ်တို့သည် ပေါ်နီယာဟူသည့် ကြီးလေးသောအပြစ်ဖြစ်စေနိုင်သော လိင်ဆိုင်ရာ မသန့်ရှင်းမှုနှင့် အကျင့်လျော့ရဲမှု ပုံစံအားလုံးကို ရှောင်ရကြမည်။ (ဧဖက် ၄:၁၉) ဤနည်းဖြင့် ကိုယ်ကျင့်တရားစင်ကြယ်သူများ ဖြစ်နိုင်ကြသည်။
ပရောပရည်ပြုလုပ်ခြင်းအန္တရာယ်များကို ရှောင်လော့
၁၆။ အဘယ်အခြေအနေ၌ ချစ်ကြိုက်သည့်အမူအရာပြခြင်းသည် သင့်လျော်သနည်း၊ အဘယ်ကျမ်းစာပုံနမူနာက ဖော်ပြသနည်း။
၁၆ ကိုယ်ကျင့်တရားစင်ကြယ်နေဖို့ ကျွန်ုပ်တို့သတိပြုရမည့် အန္တရာယ်နောက်တစ်ခုမှာ ပရောပရည်ပြုလုပ်ခြင်းဖြစ်သည်။ လိင်ခြားသူအချင်းချင်း ပရောပရည်ပြုခြင်းသည် အပျော်အပြက်သာဖြစ်၍ အန္တရာယ်မရှိဟု အချို့က အခိုင်အမာပြောဆိုပေမည်။ ချစ်ကြိုက်သည့်အမူအရာများပြဖို့ အချိန်နှင့် လျော်ကန်သောနေရာ အမှန်ရှိ၏။ ဣဇာက်နှင့် ရေဗက္ကတို့ “ပျော်ရွှင်နေသည်ကို” တွေ့မြင်သူတို့သည် သူတို့ မောင်နှမမဟုတ်ကြောင်း သိခဲ့ကြ၏။ (ကမ္ဘာဦး ၂၆:၇-၉၊ သမ္မာ) သူတို့သည် ဇနီးမောင်နှံဖြစ်ကြရာ တစ်ဦးကိုတစ်ဦး ချစ်မြတ်နိုးကြောင်း ဖော်ပြခြင်းသည် သင့်လျော်ပေ၏။ သို့သော် ပရောပရည်ပြုခြင်းမှာမူ ထိုသို့မဟုတ်ချေ။
၁၇။ ပရောပရည်ပြုလုပ်ခြင်းကား အဘယ်နည်း၊ ထိုပြဿနာကို မည်သို့ထိန်းချုပ်နိုင်သနည်း။
၁၇ ပရောပရည်ပြုလုပ်ခြင်းကို ဤသို့အဓိပ္ပာယ်ဖွင့်ဆိုနိုင်သည်– လက်ထပ်ဖို့ ရည်ရွယ်ချက်မရှိဘဲ ချစ်ကြိုက်သည့်အမူအရာများပြခြင်းဖြစ်သည်။ လူဟူသည် နားလည်ရခက်သောသတ္တဝါများဖြစ်ကြရာ ပရောပရည်ပြုလုပ်နည်း အမျိုးမျိုးရှိသည်မှန်၏၊ ထိုနည်းအချို့မှာ မသိသာမထင်ရှားချေ။ (သု. ၃၀:၁၈၊ ၁၉) သို့ဖြစ်၍ ယင်းကိစ္စကို ပုံသေကားကျစည်းမျဉ်းမထုတ်နိုင်ပါ။ ယင်းအစား စည်းမျဉ်းထက် သာလွန်သည့်အရာဖြစ်သော မိမိကိုယ်ကို ရိုးသားစွာဆန်းစစ်ကြည့်ခြင်းနှင့် ကျမ်းစာမူများကို အသိစိတ်ရှိရှိ လက်တွေ့ကျင့်သုံးခြင်းပြုဖို့လိုသည်။
၁၈။ လူအချို့ အဘယ်ကြောင့် ပရောပရည်ပြုလုပ်ကြသနည်း၊ ပရောပရည်ပြုလုပ်ခြင်းသည် အဘယ်ကြောင့်အန္တရာယ်ရှိသနည်း။
၁၈ ကျွန်ုပ်တို့ ကိုယ့်ကိုယ်ကို ရိုးရိုးသားသားဆန်းစစ်ကြည့်လျှင် လိင်ခြားသူတစ်ဦးက ချစ်ကြိုက်သည့်သဘောမျိုးဖြင့် မိမိကို စိတ်ဝင်စားသည်ဟုသိသည့်အခါ လူအများသည် သဘောကျတတ်ကြောင်း ဝန်ခံရပေမည်။ ထိုသို့ဖြစ်ခြင်းသည် သဘာဝပင်ဖြစ်၏။ သို့သော် ထိုသို့စိတ်ဝင်စားလာစေဖို့၊ မိမိစိတ်ဓာတ်ကို အနည်းအကျဉ်းမြှင့်တင်ပေးဖို့၊ အခြားသူတစ်ဦးက ထိုသို့တုံ့ပြန်လာစေဖို့ ကျွန်ုပ်တို့ ပရောပရည်ပြုလုပ်တတ်သလော။ ထိုသို့ပြုလုပ်နေလျှင် ဖြစ်ပေါ်လာနိုင်သော စိတ်နာစရာတို့ကို ထည့်စဉ်းစားကြည့်ပါသလော။ ဥပမာ၊ နယပုံပြင် ၁၃:၁၂ က “မျှော်လင့်သောအရာသည် ဖင့်နွှဲလျှင် စိတ်နှလုံးကိုပူပန်စေတတ်၏” ဟုဆို၏။ တစ်စုံတစ်ဦးနှင့် ကျွန်ုပ်တို့ တမင်ပရောပရည်ပြုလုပ်နေမည်ဆိုလျှင် ထိုသူ မည်သို့ခံစားနေရကြောင်း သိချင်မှသိမည်။ သူ့ကိုချစ်ကြိုက်စကားပြောတော့မည်၊ နောက်ဆုံးလက်ထပ်ယူမည်ဟူ၍ပင် မျှော်လင့်နေနိုင်သည်။ ဖြစ်ပေါ်လာနိုင်သော အကြီးအကျယ်စိတ်ဓာတ်ကျမှုသည် ဝမ်းနည်းပက်လက်ဖြစ်စေနိုင်၏။ (သု. ၁၈:၁၄) သူတစ်ပါး၏ခံစားချက်များနှင့် တမင်ကစားခြင်းသည် ရက်စက်ရာရောက်ပါသည်။
၁၉။ ပရောပရည်ပြုလုပ်ခြင်းသည် ခရစ်ယာန်အိမ်ထောင်များကို မည်သို့အန္တရာယ်ပြုနိုင်သနည်း။
၁၉ အိမ်ထောင်သည်များအနေနှင့် ပရောပရည်ပြုလုပ်ခြင်းကို သတိထားဖို့ အထူးအရေးကြီးပါသည်။ အိမ်ထောင်သည်တစ်ဦးကို ချစ်ကြိုက်သည့်အမူအရာပြခြင်း၊ သို့မဟုတ် အိမ်ထောင်သည်တစ်ဦးက မိမိ၏အိမ်ထောင်ဖက်မဟုတ်သူအား ထိုအမူအရာများပြခြင်းသည် မှား၏။ ဝမ်းနည်းစရာမှာ ခရစ်ယာန်အချို့သည် မိမိတို့အိမ်ထောင်ဖက်မဟုတ်သော လိင်ခြားသူများနှင့် အချစ်ဇာတ်လမ်းဖွင့်ခြင်းသည် မမှားပါဟု တလွဲယူဆခဲ့ကြ၏။ အချို့တို့သည် မိမိတို့၏အိမ်ထောင်ဖက်ကိုပင် မပြောပြသော မိမိတို့၏အတွင်းရေးများကို ထို“သူငယ်ချင်း” အား ရင်ဖွင့်ပြောပြတတ်ကြသည်။ ယင်းကြောင့် ချစ်စိတ်များမှတစ်ဆင့် စိတ်ပိုင်းဆိုင်ရာ စွဲလမ်းငြိတွယ်မှုရှိလာရာ အိမ်ထောင်ရေး၏အခြေအမြစ်ကို ပြိုကွဲပျက်ပြားသွားစေနိုင်သည်။ သူ့သားအိမ်ရာပြစ်မှားခြင်းသည် နှလုံးထဲမှအစပြုသည်ဟူသော ယေရှုမိန့်မှာခဲ့သည့် ပညာရှိသတိပေးချက်ကို အိမ်ထောင်သည်ခရစ်ယာန်များ သတိရဖို့ကောင်းသည်။ (မဿဲ ၅:၂၈) သို့ဖြစ်၍ ကျွန်ုပ်တို့၏နှလုံးကို စောင့်ရှောက်ပြီး ဆိုးကျိုးများရစေနိုင်သော အခြေအနေများကို ရှောင်ကြပါစို့။
၂၀။ မိမိတို့၏ကိုယ်ကျင့်တရားစင်ကြယ်ခြင်းကို မည်သို့ရှုမြင်ရန် ကျွန်ုပ်တို့စိတ်ပိုင်းဖြတ်သင့်သနည်း။
၂၀ မှန်ပါသည်၊ မျက်မှောက်ခေတ် အကျင့်ယိုယွင်းသောလောကတွင် ကိုယ်ကျင့်တရားစင်ကြယ်နေဖို့ မလွယ်ကူပါ။ သို့ရာတွင် ယင်းကိုဆုံးရှုံးပြီးမှ တစ်ခါပြန်ရဖို့ထက် ဆက်လက်ထိန်းသိမ်းထားခြင်းက ပိုလွယ်ကူကြောင်း သတိရပါ။ ယေဟောဝါသည် ‘ကြွယ်ဝစွာခွင့်လွှတ်’ နိုင်တော်မူပြီး အမှန်တကယ်နောင်တရသူတို့ကို လုံးလုံးစင်ကြယ်စေနိုင်သည်မှာ မှန်ပါ၏။ (ဟေရှာယ ၅၅:၇) သို့သော် မိမိတို့လုပ်ရပ်များ၏အကျိုးဆက်များ မခံစားရစေရန် အကျင့်ယိုယွင်းသူများကို ယေဟောဝါ ကာကွယ်မပေးပါ။ ထိုအကျိုးဆက်များသည် နှစ်ချီမက တစ်သက်လုံးဆိုးကျိုးပေးနိုင်သည်။ (၂ ဓမ္မရာဇဝင် ၁၂:၉-၁၂) သို့ဖြစ်၍ သင်၏နှလုံးကို စောင့်ရှောက်ခြင်းအားဖြင့် ကိုယ်ကျင့်တရားစင်ကြယ်ဖို့ ကြိုးစားပါ။ ယေဟောဝါဘုရားသခင်ရှေ့ သင်၏သန့်ရှင်းစင်ကြယ်သောအနေအထားကို အဖိုးတန်ရတနာတစ်ခုအဖြစ် ရှုမြင်ကာ ဘယ်သောအခါမျှ လက်မလွတ်သွားစေပါနှင့်!
သင်မည်သို့ဖြေဆိုမည်နည်း
• ကိုယ်ကျင့်တရားစင်ကြယ်ခြင်းကား အဘယ်နည်း၊ အဘယ်ကြောင့် အလွန်အရေးကြီးသနည်း။
• ကျွန်ုပ်တို့၏နှလုံးကို မည်သို့စောင့်ရှောက်နိုင်သနည်း။
• မတရားမေထုန်ပြုခြင်းမှ ထွက်ပြေးခြင်းတွင် အဘယ်အရာ ပါဝင်သနည်း။
• ပရောပရည်ပြုလုပ်ခြင်းကို အဘယ်ကြောင့် ရှောင်သင့်သနည်း။
[လေ့လာရန်မေးခွန်းများ]
[စာမျက်နှာ ၁၁ ပါ ရုပ်ပုံ]
ကားတစ်စီးကို ကောင်းစွာထိန်း၍ မမောင်းနှင်လျှင် အန္တရာယ်ရှိနိုင်
[စာမျက်နှာ ၁၂ ပါ ရုပ်ပုံ]
သတိပေးချက်များကို ဂရုမစိုက်လျှင် မည်သို့ ဖြစ်နိုင်သနည်း
[စာမျက်နှာ ၁၃ ပါ ရုပ်ပုံ]
ကိုယ်ကျင့်တရားစင်ကြယ်သော ပိုးပန်းချိန်ကာလသည် ပျော်ရွှင်စရာဖြစ်ပြီး ဘုရားသခင်ကို ဂုဏ်တင်