တည်ကြည်သောကျွန် စမ်းသပ်မှုအောင်!
တည်ကြည်သောကျွန် စမ်းသပ်မှုအောင်!
“ဘုရားသခင်၏ အိမ်တော်သားတို့ကို ရှေ့ဦးစွာ စစ်ကြောစီရင်ရသောအချိန်ရှိပြီ။”—၁ ပေတရု ၄:၁၇။
၁။ ယေရှုသည် “ကျွန်” ကိုစစ်ဆေးသည့်အခါ မည်သည့်အရာနှင့် တွေ့ကြုံခဲ့ရသနည်း။
စီ.အီး. ၃၃၊ ပင်တေကုတ္တေပွဲနေ့တွင် ယေရှုသည် မိမိ၏ “အိမ်သူအိမ်သားတို့” ကို အချိန်တန်အစာပြင်ဆင်ပေးရန် “ကျွန်” ကိုတာဝန်ခန့်အပ်ခဲ့သည်။ ၁၉၁၄ ခုနှစ်တွင် ဘုရင်အဖြစ် ယေရှုနန်းတင်ခံရပြီး မကြာမီအချိန်သည် ထို “ကျွန်” ကိုစစ်ဆေးရန် အချိန်ရောက်လာခဲ့သည်။ အများစုသည် ‘တည်ကြည်ပြီး သတိပညာရှိသောကျွန်’ ဖြစ်ကြောင်း သက်သေထူခဲ့သည်ကို ကိုယ်တော်တွေ့မြင်ခဲ့သည်။ ထို့ကြောင့် ကိုယ်တော်သည် “မိမိဥစ္စာရှိသမျှတို့ကို” အပ်နှင်းခဲ့သည်။ (မဿဲ ၂၄:၄၅-၄၇) သို့သော် တည်ကြည်မှုမရှိ၊ သတိပညာမရှိသော ကျွန်ဆိုးလည်း ရှိသည်။
“ကျွန်ဆိုး”
၂၊ ၃။ “ကျွန်ဆိုး” သည်အဘယ်နေရာမှ ပေါ်ထွက်လာခဲ့သနည်း၊ မည်သို့ဖြစ်ပေါ်လာခဲ့သနည်း။
၂ ‘တည်ကြည်ပြီး သတိပညာရှိသောကျွန်’ အကြောင်းဖော်ပြပြီးသည်နှင့် ကျွန်ဆိုးအကြောင်း ယေရှုဖော်ပြခဲ့၏။ ကိုယ်တော် ဤသို့မိန့်တော်မူ၏– “အကြင်ကျွန်ဆိုးက ‘ငါ့အရှင်လာခဲလိမ့်မည်’ ဟုစိတ်ထဲ၌ အောက်မေ့သည်နှင့် ကျွန်ချင်းတို့ကိုရိုက်ပုတ်လျက်၊ သေသောက်ကြူးသောသူတို့နှင့်တကွ စားသောက်လျက်နေ၏။ ထိုကျွန် မကြည့်မမျှော်သောနေ့ရက်၊ မကြားမသိသောအချိန်နာရီ၌ သခင်သည်ရောက်လာလျှင် ထိုကျွန်ကို ပြင်းပြစွာကွပ်မျက်ဆုံးမ၍ ငိုကြွေးခြင်း၊ အံသွားခဲကြိတ်ခြင်းရှိရာအရပ်၌ လျှို့ဝှက်သောသူတို့နှင့်တကွ နေရာချလတ္တံ့။” (မဿဲ ၂၄:၄၈-၅၁) “အကြင်ကျွန်ဆိုး” ဟူသောအသုံးအနှုန်းက အရှေ့ပိုင်း၌ ယေရှုမိန့်တော်မူခဲ့သော တည်ကြည်ပြီး သတိပညာရှိသောကျွန်အကြောင်း ကျွန်ုပ်တို့စိတ်ထဲ ရောက်ရှိလာစေသည်။ မှန်ပါသည်၊ “ကျွန်ဆိုး” သည် တည်ကြည်သော ကျွန်အတန်းအစားထဲမှ ပေါ်ထွက်လာခြင်းဖြစ်သည်။ * မည်သို့အားဖြင့်နည်း။
၃ ၁၉၁၄ မတိုင်မီက တည်ကြည်သောကျွန်အတန်းအစားထဲမှ များစွာက ထိုနှစ်တွင် မင်္ဂလာဆောင်သတို့သားနှင့် ကောင်းကင်၌ဆုံတွေ့ကြရမည်ဟု ပြင်းပြစွာမျှော်လင့်ခဲ့ကြသော်လည်း သူတို့၏မျှော်လင့်ချက်များ ဖြစ်မလာခဲ့ပါ။ ယင်းအတွက်ကြောင့်နှင့် အခြားအဖြစ်အပျက်များကြောင့် များစွာသောသူတို့သည် စိတ်ဓာတ်ကျခဲ့ကြပြီး အနည်းငယ်သောသူတို့သည် စိတ်နာကြည်းလာခဲ့ကြသည်။ ထိုသူတို့ထဲမှအချို့သည် မိမိတို့၏ယခင်ညီအစ်ကိုများကို စကားအားဖြင့် “ရိုက်ပုတ်” ရန် ခရစ်ယာန်ဘောင် ဘာသာရေးအုပ်စုများဖြစ်သော “သေသောက်ကြူးသောသူတို့” နှင့်ပူးပေါင်းခဲ့ကြသည်။—ဟေရှာယ ၂၈:၁-၃; ၃၂:၆။
၄။ ယေရှုသည် “ကျွန်ဆိုး” နှင့် ထိုစိတ်ဓာတ်တင်ပြသူအားလုံးကို မည်သို့အရေးယူခဲ့သနည်း။
၄ ယခင်က ယင်းခရစ်ယာန်ဖြစ်ခဲ့သူများသည် “ကျွန်ဆိုး” များဖြစ်သွားကြရာ ယေရှုက သူတို့ကို “ပြင်းပြစွာ” ပြစ်ဒဏ်ပေးခဲ့သည်။ မည်သို့အားဖြင့်နည်း။ သူတို့ကို ကိုယ်တော် ပယ်လိုက်သဖြင့် ကောင်းကင်မျှော်လင့်ချက် ဆုံးရှုံးသွားသည်။ သို့သော် သူတို့ကို ချက်ချင်းမဖျက်ဆီးခဲ့ပါ။ သူတို့သည် ခရစ်ယာန်အသင်းတော် “ပြင်အရပ်မှောင်မိုက်” ထဲတွင် အချိန်အတန်ကြာ ငိုကြွေးခြင်း၊ အံသွားခဲကြိတ်ခြင်းကို ဦးဆုံးခံခဲ့ကြရသည်။ (မဿဲ ၈:၁၂) ထိုအစောပိုင်းလူတို့မှအစပြုကာ အခြားဝိညာဉ်တော်ဖွားအနည်းငယ်သည် ထိုဆိုးညစ်သည့်စိတ်ဓာတ်မျိုး တင်ပြခဲ့ကြရာ သူတို့သည်လည်း “ကျွန်ဆိုး” များဖြစ်ကြောင်း ပြခဲ့ကြသည်။ “အခြားသိုး” ထဲမှအချို့သည်လည်း သူတို့၏ မတည်ကြည်မှုကို အတုယူခဲ့ကြသည်။ (ယောဟန် ၁၀:၁၆) ခရစ်တော်၏ရန်သူများဖြစ်သော ထိုသူအားလုံးသည် ဝိညာဉ်ရေး “ပြင်အရပ်မှောင်မိုက်” ထဲတွင် ဇာတ်သိမ်းရလေသည်။
၅။ တည်ကြည်ပြီး သတိပညာရှိသောကျွန်သည် “ကျွန်ဆိုး” နှင့်မတူဘဲ မည်သို့တုံ့ပြန်ပြုမူခဲ့သနည်း။
၅ တည်ကြည်ပြီး သတိပညာရှိသောကျွန်သည်လည်း ‘ထိုကျွန်ဆိုး’ ကဲ့သို့ပင် ထပ်တူစမ်းသပ်ခံခဲ့ရသည်။ သို့သော် သူတို့သည် စိတ်နာကြည်းကြမည့်အစား ပြုပြင်ပြောင်းလဲခဲ့ကြသည်။ (၂ ကောရိန္သု ၁၃:၁၁) ယေဟောဝါနှင့် ညီအစ်ကိုများအပေါ်ထားသည့် သူတို့၏ချစ်ခြင်းမေတ္တာသည် သန်မာလာခဲ့သည်။ ရလဒ်အနေနှင့် ငြိမ်သက်မှုမရှိသော ဤ “နောက်ဆုံးသောနေ့ရက်များ” အတွင်း သူတို့သည် ‘အမှန်တရား၏အမှီတကဲ၊ အမှန်တရား၏တည်ရာ’ ဖြစ်ခဲ့သည်။—၁တိမောသေ ၃:၁၅; ၂ တိမောသေ ၃:၁၊ သမ္မာ။
သတိပညာရှိသော သတို့သမီးများနှင့် မိုက်သောသတို့သမီးများ
၆။ (က) တည်ကြည်သောကျွန်အတန်းအစား၏ ပညာသတိရှိမှုကို ယေရှု မည်သို့ဥပမာပေးဖော်ပြခဲ့သနည်း။ (ခ) ၁၉၁၄ ခုနှစ်မတိုင်မီက ဝိညာဉ်တော်ဖွားခရစ်ယာန်များသည် အဘယ်သတင်းကို ကြေညာခဲ့ကြသနည်း။
၆ “ကျွန်ဆိုး” အကြောင်းပြောပြီးနောက် ယေရှုက ပုံဥပမာနှစ်ခုကိုပေးကာ ဝိညာဉ်တော်ဖွားခရစ်ယာန်အချို့သည် တည်ကြည်ပြီး သတိပညာရှိကြောင်းပြသခဲ့သော်လည်း ကျန်အချို့မှာမူ ထိုသို့ အဘယ်ကြောင့်မတင်ပြသည်ကို ပြသတော်မူခဲ့သည်။ * ပညာသတိရှိဖို့လိုကြောင်း ဖော်ပြရာတွင် ကိုယ်တော်ဤသို့မိန့်တော်မူခဲ့၏– “ကောင်းကင်နိုင်ငံတော်သည်ကား မင်္ဂလာဆောင်လုလင်ကို ခရီးဦးကြိုပြုအံ့သောငှာ မီးခွက်ကိုကိုင်ယူ၍ထွက်သွားသော သတို့သမီးတစ်ကျိပ်နှင့် တူ၏။ ထိုသတို့သမီးတို့တွင် ငါးယောက်သည် ပညာသတိရှိကြ၏။ ငါးယောက်မူကား အမိုက်ဖြစ်ကြ၏။ မိုက်သောသူတို့သည် မီးခွက်တို့ကိုသာယူ၍ ဆီကိုမယူကြ။ ပညာသတိရှိသောသူတို့မူကား မီးခွက်နှင့်တကွ ဘူး၌ပါသောဆီကိုလည်း ယူကြ၏။” (မဿဲ ၂၅:၁-၄) သတို့သမီးတစ်ကျိပ်မှာ ၁၉၁၄ ခုနှစ်မတိုင်မီက ဝိညာဉ်တော်ဖွားခရစ်ယာန်များဖြစ်ကြောင်း ကျွန်ုပ်တို့အား သတိရစေသည်။ သူတို့သည် မင်္ဂလာဆောင်သတို့သား၊ ယေရှုခရစ် ပေါ်လာတော့မည်ဟု တွက်ချက်ထားကြသည်။ ထို့ကြောင့် သူတို့သည် ၁၉၁၄ ခုနှစ်တွင် ‘တစ်ပါးအမျိုးသားတို့၏ အချိန်ကာလ’ ကုန်ဆုံးမည်ဖြစ်ကြောင်း ရဲရင့်စွာဟောပြောခြင်းအားဖြင့် ကိုယ်တော်နှင့်တွေ့ဆုံရန် “ထွက်သွား” ခဲ့ကြသည်။—လုကာ ၂၁:၂၄။
၇။ ဝိညာဉ်တော်ဖွားခရစ်ယာန်များသည် ပုံဆောင်သဘောအရ အဘယ်အချိန်တွင်နှင့် အဘယ်ကြောင့် “အိပ်ပျော်” သကဲ့သို့ဖြစ်သွားခဲ့ကြသနည်း။
၇ သူတို့ မှန်ခဲ့သည်။ တစ်ပါးအမျိုးသားတို့၏ အချိန်ကာလသည် ၁၉၁၄ ခုနှစ်တွင် ကုန်ဆုံးခဲ့ပြီး ခရစ်တော်ယေရှုလက်အောက်ရှိ ဘုရားသခင့်နိုင်ငံတော် စတင်အုပ်ချုပ်ခဲ့သည်။ သို့သော် ယင်းသည် မျက်မြင်မရသော ကောင်းကင်တွင် ဖြစ်သည်။ မြေကြီးပေါ်ရှိ လူသားများသည် ကြိုဟောထားသည့်အတိုင်း “အမင်္ဂလာ” ကို စတင်ခံစားခဲ့ရသည်။ (ဗျာ. ၁၂:၁၀၊ ၁၂) စမ်းသပ်ရာကာလတစ်ခု လိုက်ပါလာခဲ့သည်။ အခြေအနေအဖြစ်အပျက်များကို ရှင်းလင်းစွာ နားမလည်ကြသောကြောင့် ဝိညာဉ်တော်ဖွားခရစ်ယာန်များက “မင်္ဂလာဆောင်သတို့သားသည် လာခဲသည်” ဟုထင်မှတ်ခဲ့ကြသည်။ စိတ်ရှုပ်ထွေးခဲ့ကြသည့်အပြင် လောကမှရန်မူမှုများ ကြုံတွေ့ရသောကြောင့် စီစဉ်ဖွဲ့စည်းထားသော လူထုရှေ့ဟောပြောခြင်းလုပ်ငန်းတွင် အရှိန်လျော့လာခဲ့ပြီး လုံးဝနီးပါးရပ်တန့်ခဲ့သည်။ ပုံဥပမာထဲမှ သတို့သမီးများကဲ့သို့ ဝိညာဉ်ရေးအရ သူတို့သည် “ငိုက်၍အိပ်ပျော်ကြ၏၊” ယေရှု၏တမန်တော်များ သေဆုံးပြီးနောက် တည်ကြည်မှုမရှိသော အမည်ခံခရစ်ယာန်များကဲ့သို့ပင် ဖြစ်ခဲ့ကြသည်။—မဿဲ ၂၅:၅; ဗျာ. ၁၁:၇၊ ၈; ၁၂:၁၇။
၈။ အဘယ်အရာက “မင်္ဂလာဆောင်လုလင်သည်လာပြီ” ဟုကြွေးကြော်စေခဲ့သနည်း၊ ဝိညာဉ်တော်ဖွားခရစ်ယာန်များ အဘယ်အရာပြုလုပ်ရမည့် အချိန်နည်း။
၈ ထို့နောက် ၁၉၁၉ ခုနှစ်တွင် မျှော်လင့်မထားသောအရာတစ်ခု ဖြစ်ပျက်လာခဲ့သည်။ ကျွန်ုပ်တို့ ဤသို့ဖတ်ရ၏– “သန်းခေါင်ယံ၌ ‘ကြည့်ပါ။ မင်္ဂလာဆောင်လုလင်သည်လာပြီ။ ခရီးဦးကြိုပြုခြင်းငှာ ထွက်သွားကြကုန်’ ဟုကြွေးကြော်လျှင် ထိုသတို့သမီးအပေါင်းတို့သည်ထ၍ မီးခွက်များကို ပြင်ဆင်ကြ၏။” (မဿဲ ၂၅:၆၊ ၇) အမှောင်မိုက်ဆုံးဟု ထင်ရသောအချိန်တွင် ထ၍လှုပ်ရှားဆောင်ရွက်ရန် ဖိတ်ခေါ်ခဲ့သည်! ၁၉၁၈ ခုနှစ်တွင် “ပဋိညာဉ်တမန်တော်” ဖြစ်သော ယေရှုသည် ဘုရားသခင်၏ အသင်းတော်ကို စစ်ဆေးပြီး သန့်စင်ပေးရန် ယေဟောဝါ၏ ဝိညာဉ်ရေးဝတ်ပြုရာအိမ်တော်သို့ ကြွလာခဲ့သည်။ (မာလခိ ၃:၁) ယခု ဝိညာဉ်တော်ဖွားခရစ်ယာန်များသည် မြေကြီးပေါ်ရှိ ထိုဝတ်ပြုရာအိမ်တော်၏ ရင်ပြင်သို့သွားကာ ကိုယ်တော်နှင့်တွေ့ဆုံကြဖို့ ဖြစ်သည်။ ထိုအချိန်တွင် သူတို့ ‘အလင်းထွန်းလင်း’ ရမည့်အချိန်ဖြစ်သည်။—ဟေရှာယ ၆၀:၁; ဖိလိပ္ပိ ၂:၁၄၊ ၁၅။
၉၊ ၁၀။ ၁၉၁၉ ခုနှစ်တွင် အဘယ်ကြောင့် ခရစ်ယာန်တချို့သည် “သတိပညာရှိ” ပြီး တချို့မှာမူ ‘မိုက်မဲ’ ခဲ့ကြသနည်း။
၉ ကြည့်ပါ! ပုံဥပမာထဲမှ မိန်းမပျိုတချို့တွင် ပြဿနာရှိခဲ့သည်။ ယေရှုဤသို့ဆက်၍မိန့်တော်မူခဲ့၏– “မိုက်သောသူတို့က ‘ငါတို့ဆီမီးသေပါပြီ။ သင်တို့ဆီကို အနည်းငယ်ပေးပါ’ ဟုပညာရှိသောသူတို့အား တောင်းကြ၏။” (မဿဲ ၂၅:၈) ဆီမရှိသောကြောင့် မီးခွက်သည် အလင်းမပေးနိုင်ခဲ့ပါ။ ထို့ကြောင့် ဆီသည် စစ်မှန်သောဝတ်ပြုသူများကို အလင်းဆောင်သူများဖြစ်စေရန် စွမ်းအင်ပေးသည့် ဘုရားသခင့်နှုတ်မြွက်စကားတော်နှင့် ကိုယ်တော်၏ သန့်ရှင်းသောဝိညာဉ်တော်တို့ကို ကျွန်ုပ်တို့အား အမှတ်ရစေသည်။ (ဆာလံ ၁၁၉:၁၃၀; ဒံယေလ ၅:၁၄၊ ကဘ) ၁၉၁၉ ခုနှစ်မတိုင်မီက သတိပညာရှိသော ဝိညာဉ်တော်ဖွားခရစ်ယာန်များသည် ခေတ္တခဏအားလျော့ခဲ့ကြလင့်ကစား မိမိတို့နှင့်ပတ်သက်သောဘုရားသခင့်အလိုတော်ကို ခွဲခြားသိမြင်ရန် ကြိုးစားရှာဖွေခဲ့ကြသည်။ ထို့ကြောင့် အလင်းထွန်းလင်းရန် ဖိတ်ခေါ်သောအခါ သူတို့အဆင်သင့်ရှိခဲ့ကြသည်။—၂ တိမောသေ ၄:၂; ဟေဗြဲ ၁၀:၂၄၊ ၂၅။
၁၀ သို့သော် ဝိညာဉ်တော်ဖွားတချို့သည် မင်္ဂလာဆောင်လုလင်နှင့် တွေ့ဆုံလိုစိတ် ပြင်းပြကြသော်လည်း အနစ်နာခံ ကြိုးစားအားထုတ်ကာ ပြင်ဆင်ခြင်းမျိုးမရှိခဲ့ကြပါ။ ထို့ကြောင့် သတင်းကောင်းဟောပြောခြင်းတွင် လှုပ်ရှားတက်ကြွရမည့် အချိန်ရောက်လာသောအခါ သူတို့သည် အသင့်မရှိခဲ့ကြပါ။ (မဿဲ ၂၄:၁၄) အမှန်မှာ၊ သူတို့သည် ထက်သန်သော သူတို့၏အပေါင်းပါများထံမှ ဆီအနည်းငယ်ပေးရန် တောင်းခံကာ လက်အားလျော့သွားစေရန်ပင် ကြိုးစားခဲ့ကြသည်။ ယေရှု၏ပုံဥပမာတွင် သတိပညာရှိသော သတို့သမီးများ မည်သို့တုံ့ပြန်ခဲ့ကြသနည်း။ သူတို့ဤသို့ဆိုခဲ့၏– “သင်တို့အဖို့နှင့် ငါတို့အဖို့ ဆီမလောက်။ ထို့ကြောင့် ဆီရောင်းသောသူရှိရာသို့သွား၍ ကိုယ်သုံးဖို့ဝယ်လျှင် သာ၍ကောင်းသည်။” (မဿဲ ၂၅:၉) အလားတူပင်၊ ၁၉၁၉ ခုနှစ်တွင် တည်ကြည်သော ဝိညာဉ်တော်ဖွားခရစ်ယာန်များသည် အလင်းထွန်းလင်းရန် မိမိတို့၏စွမ်းရည်ကို လျော့ပါးသွားစေမည့် မည်သည့်အရာကိုမဆို ငြင်းပယ်ခဲ့ကြသည်။ ထို့ကြောင့် သူတို့သည် စစ်ဆေးမှုကို အောင်မြင်ခဲ့ကြသည်။
၁၁။ မိုက်သောသတို့သမီးများ အဘယ်သို့ဖြစ်ခဲ့သနည်း။
၁၁ ယေရှု ဤသို့နိဂုံးချုပ်၏– “ထိုသူတို့ [မိုက်သောသတို့သမီးတို့] သည် ဆီဝယ်သွားသည့်အခိုက်တွင် မင်္ဂလာဆောင်လုလင်သည်လာ၍၊ အသင့်ရှိသောသတို့သမီးတို့သည် လုလင်နှင့်အတူ ပွဲသို့ဝင်ကြပြီးလျှင် တံခါးကိုပိတ်ထား၏။ ထို့နောက် ကြွင်းသောသတို့သမီးတို့သည်လာ၍ ‘အရှင်၊ အရှင်၊ ကျွန်မတို့အား တံခါးကိုဖွင့်ပါ’ ဟုတောင်းလျှောက်ကြသော် အရှင်ကလည်း ‘ငါအမှန်ဆိုသည်ကား သင်တို့ကို ငါမသိ’ ဟုပြန်ပြောလေ၏။” (မဿဲ ၂၅:၁၀-၁၂) မှန်ပါသည်၊ အချို့သူများသည် သတို့သားရောက်ရှိလာချိန်အတွက် အသင့်မပြင်ထားကြပါ။ ထို့ကြောင့် သူတို့သည် စစ်ဆေးမှုမအောင်သောကြောင့် ကောင်းကင်မင်္ဂလာပွဲသို့ တက်ရောက်ရန် အခွင့်အရေး ဆုံးရှုံးခဲ့ရသည်။ အလွန်ဝမ်းနည်းစရာပင်!
ငွေခွက်များပုံဥပမာ
၁၂။ (က) တည်ကြည်မှုရှိခြင်းကို ပုံဖော်ပြရာတွင် အဘယ်ဥပမာကို ယေရှုအသုံးပြုခဲ့သနည်း။ (ခ) “အခြားသောပြည်သို့သွား” သူကား မည်သူနည်း။
၁၂ ပညာသတိရှိရမည်အကြောင်း ဥပမာဖြင့် ဖော်ပြပြီးနောက် ယေရှုသည် တည်ကြည်မှုရှိရမည့်အကြောင်း ဆက်ဥပမာပေးခဲ့၏။ ကိုယ်တော် ဤသို့မိန့်တော်မူခဲ့၏– “လူတစ်ဦးသည် အခြားသောပြည်သို့သွားမည်ဟု အကြံရှိလျက်၊ မိမိငယ်သားတို့ကိုခေါ်၍ မိမိဥစ္စာများကို အပ်ပေး၏။ သူတို့သည် အသီးသီးအစွမ်းသတ္တိရှိသည်အတိုင်း တစ်ဦး၌ ငွေအခွက်ငါးဆယ်၊ တစ်ဦး၌ အခွက်နှစ်ဆယ်၊ တစ်ဦး၌ အခွက်တစ်ဆယ်ကို အပ်ပေးပြီးမှ ချက်ချင်းသွားလေ၏။” (မဿဲ ၂၅:၁၄၊ ၁၅) ထိုပုံဥပမာတွင်ပါသော “အခြားသောပြည်သို့သွား” သူမှာ ယေရှုကိုယ်တော်တိုင်ဖြစ်ပြီး စီ.အီး. ၃၃ ခုနှစ်တွင် ကိုယ်တော် ကောင်းကင်သို့ တက်ကြွသွားခဲ့ခြင်းဖြစ်သည်။ သို့သော် ယေရှုကောင်းကင်သို့မတက်မီ တည်ကြည်သော တပည့်များအား “မိမိဥစ္စာများကို” အပ်ခဲ့၏။ မည်သို့အားဖြင့်နည်း။
၁၃။ ယေရှုသည် ကျယ်ပြောသော အမှုဆောင်လယ်ကွင်းကို မည်သို့ပြင်ဆင်ပေးခဲ့ပြီး မိမိ၏ ‘ကျွန်များ’ ကုန်သွယ်ခြင်းပြုရန် မည်သို့ လွှဲအပ်ခဲ့သနည်း။
၁၃ ယေရှုမြေကြီးဓမ္မအမှုဆောင်ချိန်အတွင်း ဣသရေလနိုင်ငံတစ်ဝန်း ဘုရားသခင့်နိုင်ငံတော်သတင်းကောင်း လိုက်လံဟောပြောခြင်းအားဖြင့် ကျယ်ပြောသော အမှုဆောင်လယ်ကွင်းကို စတင်ပြင်ဆင်ပေးခဲ့သည်။ (မဿဲ ၉:၃၅-၃၈) ကိုယ်တော်သည် “အခြားသောပြည်သို့” မထွက်ခွာမီ ထိုလယ်ကွင်းကို မိမိ၏ တည်ကြည်သော တပည့်များထံအပ်ကာ ဤသို့မိန့်မှာခဲ့၏– “သင်တို့သွား၍ လူမျိုးတကာတို့ကိုငါ့တပည့်ဖြစ်စေလျက် ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ ဗတ္တိဇံကိုပေးကြလော့။ ငါသည် သင်တို့အားပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမ [သွန်သင်] ပေးကြလော့။” (မဿဲ ၂၈:၁၈-၂၀) ထိုအမှာစကားများဖြင့် ယေရှုသည် မိမိ၏ ‘ကျွန်များ’ အား ကိုယ်တော်ပြန်မရောက်မချင်း “အသီးသီးအစွမ်းသတ္တိရှိသည်အတိုင်း” ကုန်သွယ်ခြင်းပြုကြဟု လွှဲအပ်ခဲ့လေသည်။
၁၄။ ယောက်တိုင်းသည် တစ်မျိုးတစ်ပုံစံတည်းလုပ်ဆောင်ရန် အဘယ်ကြောင့် မမျှော်လင့်ခဲ့ကြသနည်း။
၁၄ အထက်ပါအသုံးအနှုန်းက ပထမရာစုရှိ ခရစ်ယာန်အားလုံးသည် အခြေအနေ သို့မဟုတ် လုပ်ဆောင်နိုင်စွမ်း မတူခဲ့ကြကြောင်း ဖော်ပြသည်။ ပေါလုနှင့် တိမောသေကဲ့သို့သော အချို့သူများသည် ဟောပြောခြင်းနှင့် သွန်သင်ခြင်းလုပ်ငန်းတွင် အပြည့်အဝပါဝင်နိုင်ခဲ့ကြသည်။ အခြားသူများ၏ အခြေအနေများမှာမူ လွတ်လွတ်လပ်လပ်မလုပ်ဆောင်နိုင်ဘဲ ကြီးမားသည့်ကန့်သတ်မှု ရှိခဲ့ပေမည်။ ဥပမာ၊ ခရစ်ယာန်အချို့သည် ကျွန်များဖြစ်ကြသည်၊ အချို့မူ ဖျားနာ၊ အိုမင်းမစွမ်းဖြစ် သို့မဟုတ် မိသားစုတာဝန်များ ရှိခဲ့သည်။ မှန်ပါသည်၊ အချို့သောအသင်းတော်အခွင့်အရေးများသည် တပည့်ဖြစ်သူတိုင်း ရရှိနိုင်သည့်အရာမဟုတ်ပါ။ ဝိညာဉ်တော်ဖွားအမျိုးသမီးများနှင့် အမျိုးသားအချို့သည် အသင်းတော်တွင် သွန်သင်ခွင့်မရခဲ့ကြပါ။ (၁ ကောရိန္သု ၁၄:၃၄; ၁ တိမောသေ ၃:၁; ယာကုပ် ၃:၁) သို့တိုင် သူတို့၏ကိုယ်ပိုင်အခြေအနေ မည်သို့ပင်ရှိပါစေ ခရစ်တော်၏ ဝိညာဉ်တော်ဖွားတပည့်များ—အမျိုးသား၊ အမျိုးသမီးများ—အားလုံးသည် ခရစ်ယာန်ဓမ္မအမှုတွင် မိမိတို့၏အခွင့်အရေးများနှင့် အခြေအနေများကို ကောင်းစွာအသုံးပြုခြင်းဖြင့် ကုန်သွယ်ခြင်းပြုရန် တာဝန်ရရှိခဲ့ကြသည်။ သူတို့၏မျက်မှောက်ခေတ် အပေါင်းအဖော်များသည်လည်း ထိုတာဝန်ရထားကြသည်။
စစ်ဆေးချိန် စတင်!
၁၅၊ ၁၆။ (က) အဘယ်အချိန်တွင် စာရင်းရှင်းချိန် ရောက်လာသနည်း။ (ခ) တည်ကြည်သောသူများ “ကုန်သွယ်ခြင်းကိုပြုရန်” အဘယ်အခွင့်အရေးအသစ်ကို အပ်နှင်းခံခဲ့ရသနည်း။
၁၅ ပုံဥပမာကို ဤသို့ဆက်ဖော်ပြ၏– “ကာလကြာမြင့်ပြီးမှ ထိုငယ်သားတို့၏အရှင်သည်လာ၍ သူတို့ကို စာရင်းယူလေ၏။” (မဿဲ ၂၅:၁၉) စီ.အီး. ၃၃ ခုနှစ်နောက်ပိုင်း ကြာရှည်သောအချိန်ကုန်လွန်ခဲ့ပြီးနောက် ၁၉၁၄ ခုနှစ်တွင် ခရစ်တော်ယေရှုသည် ဘုရင်အဖြစ် စတင်ရောက်ရှိခဲ့သည်။ သုံးနှစ်ခွဲကြာပြီးနောက်၊ ၁၉၁၈ ခုနှစ်တွင် ဘုရားသခင်၏ ဝိညာဉ်ရေးဝတ်ပြုရာအိမ်တော်သို့ ကိုယ်တော်ကြွလာခဲ့ပြီး ပေတရု၏ဤစကားများ ပြည့်စုံခဲ့သည်– “ဘုရားသခင်၏ အိမ်တော်သားတို့ကို ရှေ့ဦးစွာ စစ်ကြောစီရင်ရသောအချိန်ရှိပြီ။” (၁ ပေတရု ၄:၁၇; မာလခိ ၃:၁) စာရင်းရှင်းရန်အချိန်ဖြစ်ခဲ့သည်။
၁၆ ယေရှု၏ဝိညာဉ်တော်ဖွားညီတော်များဖြစ်သော ကျေးကျွန်များသည် ဘုရင်အပ်နှံခဲ့သော ‘ငွေများ’ ဖြင့် မည်သို့ပြုခဲ့ကြသနည်း။ စီ.အီး. ၃၃ မှစ၍ ၁၉၁၄ ခုနှစ်သို့ဦးတည်ခဲ့သော နှစ်များတစ်လျှောက် များစွာသောသူတို့သည် ယေရှုအတွက် ကြိုးစားပမ်းစား “ကုန်သွယ်ခြင်းကိုပြု” ခဲ့ကြသည်။ (မဿဲ ၂၅:၁၆) ပထမကမ္ဘာစစ်ကြီးအတွင်း၌ပင် သခင်၏အမှုတော်ဆောင်လိုစိတ်ပြင်းပြကြောင်း တင်ပြခဲ့ကြသည်။ ယခု တည်ကြည်သောသူများ “ကုန်သွယ်ခြင်းကိုပြုရန်” အခွင့်အရေးအသစ်များ ပေးသင့်လေပြီ။ ဤအစီအစဉ်စနစ်၏ ဆုံးခန်းကာလ ရောက်ရှိနေပြီဖြစ်သည်။ သတင်းကောင်းကို ကမ္ဘာတစ်ဝန်းတွင် ကြေညာရန် ရှိခဲ့သည်။ “မြေကြီး၌ရိတ်စရာစပါး” ကို ရိတ်သိမ်းရန် ရှိခဲ့သည်။ (ဗျာ. ၁၄:၆၊ ၇၊ ၁၄-၁၆) ဂျုံအတန်းအစားဝင် နောက်ဆုံးအဖွဲ့ဝင်များကို ရှာဖွေရန်နှင့် အခြားသိုးအဝင် “လူအုပ်ကြီး” ကိုလည်း စုသိမ်းရန်ရှိခဲ့သည်။—ဗျာ. ၇:၉၊ ကဘ; မဿဲ ၁၃:၂၄-၃၀။
၁၇။ တည်ကြည်သော ဝိညာဉ်တော်ဖွားခရစ်ယာန်များသည် မည်သို့အားဖြင့် “အရှင်၏ ဝမ်းမြောက်ခြင်းထဲသို့ ဝင်စား” ခဲ့ကြသနည်း။
၁၇ ရိတ်သိမ်းချိန်သည် ရွှင်လန်းဖွယ်အခါသမယဖြစ်သည်။ (ဆာလံ ၁၂၆:၆) သို့ဖြစ်၍ ၁၉၁၉ ခုနှစ်တွင် ယေရှုသည် မိမိ၏တည်ကြည်သော ဝိညာဉ်တော်ဖွားညီအစ်ကိုများအား တိုးများလာသောတာဝန်များကို အပ်နှင်းခဲ့ချိန်၌ ဤသို့မိန့်တော်မူခဲ့ခြင်းသည် သင့်လျော်ပါသည်– “သင်သည် အနည်းငယ်သောအမှုများ၌ သစ္စာစောင့်လေပြီ။ များစွာသောအမှုတို့အပေါ်၌ သင့်ကိုငါခန့်ထားမည်။ သင့်အရှင်၏ ဝမ်းမြောက်ခြင်းထဲသို့ ဝင်စားလော့။” (မဿဲ ၂၅:၂၁၊ ၂၃) ထို့ပြင် ဘုရားသခင့်နိုင်ငံတော်၏ နန်းတင်ခံဘုရင်အသစ်ဖြစ်သော အရှင်၏ဝမ်းမြောက်မှုမှာ အတိုင်းထက်အလွန်ပင်။ (ဆာလံ ၄၅:၁၊ ၂၊ ၆၊ ၇) တည်ကြည်သော ကျွန်အတန်းအစားသည် ဘုရင်ကိုကိုယ်စားပြုကာ မြေကြီးပေါ်ရှိ ကိုယ်တော်၏အကျိုးစီးပွားကို တိုးများစေခြင်းအားဖြင့် ထိုရွှင်လန်းဝမ်းမြောက်မှုတွင် ပါဝင်ခံစားကြရသည်။ (၂ ကောရိန္သု ၅:၂၀) သူတို့၏ပီတိအဟုန်ကို ဟေရှာယ ၆၁:၁၀ ပါပရောဖက်ပြုချက်စကားတွင် တွေ့ရသည်– ‘ထာဝရဘုရားသခင်ကြောင့် ငါသည် အလွန်ဝမ်းမြောက်၍ ငါ၏ဘုရားသခင်ကြောင့် ငါ့ဝိညာဉ်သည် ရွှင်လန်းမည်။ အကြောင်းမူကား ... ကယ်တင်ခြင်းအဝတ်တန်ဆာနှင့် ငါ့ကိုဝတ်ဆင်စေ ... တော်မူပြီ။’
၁၈။ အချို့သူတို့သည် စစ်ဆေးမှု အဘယ်ကြောင့် မအောင်ခဲ့သနည်း၊ အဘယ်အကျိုးဆက် ခံစားခဲ့ရသနည်း။
၁၈ ဝမ်းနည်းစရာမှာ အချို့သူတို့သည် စစ်ဆေးမှု မအောင်ခဲ့ပါ။ ကျွန်ုပ်တို့ ဤသို့ဖတ်ရ၏– “အခွက်တစ်ဆယ်ကိုခံသောသူသည်လည်း ချဉ်းကပ်၍ ‘သခင်၊ ကိုယ်တော်သည် ခဲယဉ်းသောသူဖြစ်သည်နှင့် ကိုယ်မစိုက်မပျိုးသောအရပ်၌ရိတ်၍ ကိုယ်မဖြန့်မကြဲသောအရပ်၌ စုသိမ်းတတ်သည်ကို အကျွန်ုပ်သိ၍ ကြောက်သောကြောင့် အခြားသို့သွား၍ ကိုယ်တော်၏ ငွေအခွက်တစ်ဆယ်ကို မြေ၌ဝှက်ထားပါပြီ။ ယခု ကိုယ်တော်၏ငွေရှိပါသည်’ ဟုလျှောက်၏။” (မဿဲ ၂၅:၂၄၊ ၂၅) အလားတူပင် ဝိညာဉ်တော်ဖွားခရစ်ယာန်အချို့သည် “ကုန်သွယ်” ခြင်း မပြုခဲ့ကြပါ။ ၁၉၁၄ မတိုင်မီက သူတို့သည် မိမိတို့၏မျှော်လင့်ချက်များကို အခြားသူများအား စိတ်အားထက်ထန်စွာ မဟောပြောခဲ့ကြပါ၊ ၁၉၁၉ ခုနှစ်၌လည်း စ၍ဟောပြောချင်စိတ် မရှိကြပါ။ သူတို့၏ပမာမခန့်မှုကို ယေရှု မည်သို့တုံ့ပြန်ခဲ့သနည်း။ သူတို့၏အခွင့်အရေးအားလုံးကို ကိုယ်တော် ရုပ်သိမ်းပစ်လိုက်သည်။ သူတို့ကို “ငိုကြွေးခြင်း၊ အံသွားခဲကြိတ်ခြင်းရှိရာ ပြင်အရပ်မှောင်မိုက်ထဲသို့ နှင်ထုတ်” လိုက်သည်။—မဿဲ ၂၅:၂၈၊ ၃၀။
ဆက်၍စစ်ဆေး
၁၉။ အဘယ်နည်းဖြင့် စစ်ဆေးမှုလုပ်ငန်းစဉ် ဆက်သွားနေသနည်း၊ ဝိညာဉ်တော်ဖွားခရစ်ယာန်အားလုံးသည် အဘယ်အရာပြုလုပ်ရန် စိတ်ဆုံးဖြတ်ထားကြသနည်း။
၁၉ အမှန်မှာ ဤဆုံးခန်းကာလအတွင်း ခရစ်တော်၏ဝိညာဉ်တော်ဖွားကျေးကျွန်များ ဖြစ်လာခဲ့ကြသူအများစုသည် ၁၉၁၈ ခုနှစ်၊ ယေရှု စတင်စစ်ဆေးချိန်တွင် ယေဟောဝါ၏အမှုတော်ကို မထမ်းဆောင်ကြသေးပါ။ ထိုသူတို့သည် ဤစစ်ဆေးမှုနှင့် လွတ်သွားသလော။ လုံးဝ မလွတ်ခဲ့ကြပါ။ တည်ကြည်ပြီး သတိပညာရှိသောကျွန်သည် အတန်းအစားတစ်ခုအနေဖြင့် စမ်းသပ်မှုကို အောင်မြင်ခဲ့သည့် ၁၉၁၈/၁၉ ခုနှစ်သည် စစ်ဆေးမှုလုပ်ငန်းစဉ်၏ အစနှစ်သာလျှင်ဖြစ်သည်။ ဝိညာဉ်တော်ဖွားခရစ်ယာန်တစ်ဦးချင်းစီသည် သူတို့အား အပြီးသတ်တံဆိပ်ခတ်မှု မပြီးမချင်း စစ်ဆေးမှုအောက်တွင် ဆက်ရှိနေသည်။ (ဗျာ. ၇:၁-၃) ယင်းကိုသိရှိထားသောကြောင့် ခရစ်တော်၏ ဝိညာဉ်တော်ဖွားညီအစ်ကိုများသည် တည်ကြည်မှုရှိစွာဆက်၍ ‘ကုန်သွယ်မှုပြု’ ရန်ဆုံးဖြတ်ထားကြသည်။ အလင်းတောက်ပစွာထွန်းလင်းစေဖို့ ဆီအလျှံပယ် ဖြည့်တင်းထားခြင်းအားဖြင့် သတိပညာရှိသူများဖြစ်ရန် ဆုံးဖြတ်ထားကြသည်။ သူတို့တစ်ဦးစီ၏ အသက်တာလမ်းစဉ်တွင် အဆုံးတိုင်အောင်တည်ကြည်မည်ဆိုလျှင် ယေရှုသည် သူတို့ကို ကောင်းကင်ဘုံ၌ လက်ခံမည်ဖြစ်ကြောင်း သူတို့သိထားကြသည်။—မဿဲ ၂၄:၁၃; ယောဟန် ၁၄:၂-၄; ၁ ကောရိန္သု ၁၅:၅၀၊ ၅၁။
၂၀။ (က) ယနေ့ အခြားသိုးများသည် အဘယ်အရာပြုလုပ်ရန် စိတ်ဆုံးဖြတ်ထားကြသနည်း။ (ခ) အဘယ်အရာကို ဝိညာဉ်တော်ဖွားခရစ်ယာန်များ သိရှိကြသနည်း။
၂၀ အခြားသိုးအဝင် လူအုပ်ကြီးသည် သူတို့၏ဝိညာဉ်တော်ဖွားညီအစ်ကိုများကို အတုယူခဲ့ကြသည်။ ဘုရားသခင့် ရည်ရွယ်တော်မူချက်များကို သိကျွမ်းလာသည်နှင့်အမျှ ကြီးလေးသောတာဝန်လည်း လိုက်ပါလာကြောင်း သူတို့သိရှိခဲ့ကြသည်။ (ယေဇကျေလ ၃:၁၇-၂၁) ထို့ကြောင့် သူတို့သည်လည်း ယေဟောဝါ၏ နှုတ်မြွက်စကားတော်၊ သန့်ရှင်းသောဝိညာဉ်တော်တို့၏ အကူအညီနှင့်အတူ လေ့လာမှုများ၊ ခရစ်ယာန်ပေါင်းသင်းမှုများအားဖြင့် ဆီအလျှံပယ် ဖြည့်တင်းထားကြသည်။ ထို့ပြင် သူတို့သည် ဟောပြောခြင်းနှင့် သွန်သင်ခြင်းလုပ်ငန်းများတွင် ပါဝင်ခြင်းအားဖြင့် သူတို့၏အလင်းကို ထွန်းလင်းကြပြီး ယင်းသို့အားဖြင့် သူတို့၏ဝိညာဉ်တော်ဖွားညီအစ်ကိုများနှင့်အတူ ‘ကုန်သွယ်ခြင်းကိုပြု’ လျက်ရှိကြသည်။ သို့သော် ဝိညာဉ်တော်ဖွားခရစ်ယာန်များက ငွေအခွက်များကို မိမိတို့၏လက်ထဲတွင်ထားရှိကြောင်း ကောင်းစွာသိရှိထားကြသည်။ သူတို့သည် မြေကြီးပေါ်ရှိ သခင်၏ပိုင်ဆိုင်ရာများကို စီမံသုံးစွဲပုံနှင့်စပ်လျဉ်း၍ စာရင်းရှင်းကြရမည်။ သူတို့သည် အရေအတွက်နည်းသော်လည်း မိမိတို့၏တာဝန်များကို လူအုပ်ကြီးထံ ပခုံးပြောင်းပေး၍မရပါ။ ယင်းကိုစိတ်စွဲမှတ်ကာ တည်ကြည်ပြီး သတိပညာရှိသောကျွန်သည် မြှုပ်နှံလုပ်ဆောင်လျက်ရှိသော လူအုပ်ကြီးအဝင်တို့၏ ထောက်မမှုကို ကျေးဇူးတင်လျက် ဘုရင်၏ဥစ္စာကို ကြည့်ရှုစောင့်ရှောက်ခြင်းတွင် ဆက်၍ဦးဆောင်နေကြသည်။ ထိုအဖွဲ့ဝင်တို့သည် ဝိညာဉ်တော်ဖွားညီအစ်ကိုများ၏ တာဝန်ဝတ္တရားကို အသိအမှတ်ပြုကာ သူတို့၏ ကြီးကြပ်အုပ်ထိန်းမှုအောက် အမှုဆောင်ခွင့်ရခြင်းကို အခွင့်ထူးအဖြစ်ယူမှတ်ကြသည်။
၂၁။ ၁၉၁၉ ခုနှစ်မတိုင်မီအချိန်မှစ၍ ယနေ့ကျွန်ုပ်တို့ခေတ်အထိ ခရစ်ယာန်အားလုံးနှင့် သက်ဆိုင်သော တိုက်တွန်းနှိုးဆော်ချက်စကားမှာ အဘယ်နည်း။
၂၁ ထို့ကြောင့် ထိုပုံဥပမာနှစ်ခုသည် ၁၉၁၉ ခုနှစ် သို့မဟုတ် ယင်းအချိန်လောက်တွင် အဖြစ်အပျက်များအပေါ် အလင်းထွန်းလင်းပေးခဲ့သော်လည်း နောက်ဆုံးကာလတစ်လျှောက်ရှိ စစ်မှန်သောခရစ်ယာန်အားလုံးနှင့် မူအရသက်ဆိုင်သည်။ ထိုနည်းအတိုင်းပင် သတို့သမီးဆယ်ယောက်ပုံဥပမာ နိဂုံးပိုင်းတွင် ယေရှုမိန့်တော်မူခဲ့သော တိုက်တွန်းနှိုးဆော်ချက်က ၁၉၁၉ ခုနှစ်မတိုင်မီက ဝိညာဉ်တော်ဖွားခရစ်ယာန်များနှင့် သက်ဆိုင်ခဲ့သော်လည်း ယင်းသည် ခရစ်ယာန်ယောက်တိုင်းနှင့် မူအရ သက်ဆိုင်နေဆဲဖြစ်သည်။ သို့ဖြစ်၍ ကျွန်ုပ်တို့အားလုံးသည် ယေရှု၏ ဤစကားများကို နှလုံးသွင်းနိုင်ပါစေ– “ကြွလာအံ့သော နေ့ရက်အချိန်နာရီကို သင်တို့သည် မသိသောကြောင့် စောင့်နေကြလော့။”—မဿဲ ၂၅:၁၃။
[အောက်ခြေမှတ်ချက်]
^ အပိုဒ်၊ 2 ဆင်တူချက်အနေနှင့် တမန်တော်များသေဆုံးပြီးနောက် “ကြမ်းတမ်းသောတောခွေးတို့” သည် ဝိညာဉ်တော်ဖွား ခရစ်ယာန်အကြီးအကဲများထဲမှ ပေါ်ထွက်လာခဲ့သည်။—တမန်တော် ၂၀:၂၉၊ ၃၀။
^ အပိုဒ်၊ 6 ယေရှု၏ပုံဥပမာနှင့်ပတ်သက်၍ အခြားရှင်းပြချက်အတွက် ယေဟောဝါသက်သေများထုတ်ဝေသော “ငြိမ်းချမ်းရေးမင်းသား” လက်အောက် ကမ္ဘာချီလုံခြုံမှု စာအုပ် [လိပ်]၊ အခန်း ၅ နှင့် ၆ ကိုရှု။
သင်ရှင်းပြနိုင်သလော
• ယေရှုသည် မိမိ၏နောက်လိုက်များကို အဘယ်အချိန်တွင် စစ်ဆေးခဲ့သနည်း၊ အဘယ်အရာကို ကိုယ်တော်တွေ့မြင်ခဲ့သနည်း။
• ဝိညာဉ်တော်ဖွားခရစ်ယာန်အချို့သည် “ကျွန်ဆိုး” ၏စိတ်ဓာတ်ကို အဘယ်ကြောင့် မွေးမြူခဲ့ကြသနည်း။
• ကျွန်ုပ်တို့သည် ဝိညာဉ်ရေးတွင် သတိပညာရှိကြောင်း မည်သို့ တင်ပြနိုင်သနည်း။
• ယေရှု၏ တည်ကြည်သော ဝိညာဉ်တော်ဖွားညီအစ်ကိုများကို အတုယူကာ ကျွန်ုပ်တို့သည် “ကုန်သွယ်ခြင်းကို” အဘယ်နည်းဖြင့် ဆက်လုပ်ဆောင်နိုင်သနည်း။
[လေ့လာရန်မေးခွန်းများ]
[စာမျက်နှာ ၁၇ ပါ လေးထောင့်ကွက်]
ယေရှု အဘယ်အချိန်တွင် ကြွလာသနည်း
မဿဲအခန်းကြီး ၂၄ နှင့် ၂၅ တို့၌ မတူညီသော သဘောများဖြင့် ယေရှု “ကြွလာ” ခြင်းအကြောင်း ဖော်ပြထားသည်။ ကိုယ်တော် “ကြွလာ” ရန်အလို့ငှာ ပကတိ ရွေ့ရှားရန် မလိုအပ်ပါ။ ယင်းအစား ကိုယ်တော်သည် အများအားဖြင့် တရားစီရင်ရန်အတွက် လူသားများ သို့မဟုတ် မိမိ၏တပည့်များအပေါ် အာရုံလှည့်လိုက်ခြင်းသဘောဖြင့် “ကြွလာ” တော်မူသည်။ သို့ဖြစ်၍ ၁၉၁၄ ခုနှစ်တွင် နန်းထိုင်ဘုရင်အဖြစ် ကိုယ်တော်၏ရောက်ရှိခြင်းကို အစပြုရန် “ကြွလာ” ခဲ့သည်။ (မဿဲ ၁၆:၂၈; ၁၇:၁; တမန်တော် ၁:၁၁) ၁၉၁၈ ခုနှစ်တွင် ပဋိညာဉ်တမန်တော်အဖြစ် ကိုယ်တော် “ကြွလာ” ခဲ့ပြီး ယေဟောဝါ၏အမှုတော်ဆောင်သည်ဟု ဆိုကြသူများကို စတင် စစ်ကြောခဲ့သည်။ (မာလခိ ၃:၁-၃; ၁ ပေတရု ၄:၁၇) အာမဂေဒုန်တွင် ယေဟောဝါ၏ရန်သူများကို တရားစီရင်ရန် ကိုယ်တော် “ကြွလာ” တော်မူလိမ့်မည်။—ဗျာ. ၁၉:၁၁-၁၆။
မဿဲ ၂၄:၂၉-၄၄ နှင့် ၂၅:၃၁-၄၆ တို့တွင် အကြိမ်များစွာဖော်ပြထားသည့် ကြွလာခြင်း (သို့မဟုတ်၊ ရောက်ရှိနေခြင်း) သည် ‘ကြီးစွာသော ဆင်းရဲခြင်း’ တွင်ဖြစ်သည်။ (ဗျာ. ၇:၁၄) သို့သော် မဿဲ ၂၄:၄၅ မှ ၂၅:၃၀ တွင် အကြိမ်ကြိမ်ဖော်ပြထားသော ကြွလာခြင်းမူ တပည့်ဟု အခေါ်ခံသူများအား ၁၉၁၈ ခုနှစ်မှစတင်၍ တရားစီရင်ခြင်းနှင့် သက်ဆိုင်သည်။ ဥပမာ၊ တည်ကြည်သောကျွန်ကို ဆုချခြင်း၊ မိုက်မဲသောသတို့သမီးတို့အတွက် တရားစီရင်မှုနှင့် သခင်၏ငွေများကိုဝှက်ထားသော ပျင်းရိသောကျွန်အား တရားစီရင်မှု စသည်တို့သည် ကြီးစွာသောဆင်းရဲခြင်းဖြစ်သော ယေရှု “ကြွလာ” ချိန်၌ ဖြစ်ပျက်မည်ဟုဆိုခြင်းသည် ကျိုးကြောင်းညီညွတ်မည်မဟုတ်ချေ။ ထိုသို့သာဖြစ်ခဲ့မည်ဆိုလျှင် ကြီးစွာသောဆင်းရဲခြင်းရောက်ချိန်တွင် ဝိညာဉ်တော်ဖွားအများစု တည်ကြည်မှုမရှိသည်ကို တွေ့ရှိကြရပြီး အစားထိုးခံရမည်ဟူသည့် အဓိပ္ပာယ်ဖြစ်နေသည်။ သို့သော် ဗျာ. ၇:၃ က ထိုအချိန်တွင် ခရစ်တော်၏ ဝိညာဉ်တော်ဖွားကျေးကျွန်အားလုံးကို အပြီးသတ် ‘တံဆိပ်ခတ်ပြီး’ ပြီဖြစ်ကြောင်း ဖော်ပြထားသည်။
[စာမျက်နှာ ၁၄ ပါ ရုပ်ပုံ]
“ကျွန်ဆိုး” သည် ၁၉၁၉ ခုနှစ်တွင် ကောင်းချီးမရခဲ့ပါ
[စာမျက်နှာ ၁၅ ပါ ရုပ်ပုံ]
ပညာရှိသောသတို့သမီးများသည် သတို့သားရောက်ရှိချိန်တွင် အသင့်ရှိခဲ့ကြ
[စာမျက်နှာ ၁၇ ပါ ရုပ်ပုံ]
တည်ကြည်သောကျွန်များသည် “ကုန်သွယ်ခြင်းအမှုပြု”
ပျင်းရိသောကျွန်မူ ထိုသို့မပြု
[စာမျက်နှာ ၁၈ ပါ ရုပ်ပုံ]
ဝိညာဉ်တော်ဖွားနှင့် “လူအုပ်ကြီး” တို့သည် မိမိတို့အလင်းကို ဆက်၍ထွန်းလင်းကြ