‘ကိုယ်တော်သည် တောင်တို့ထက် ဘုန်းသာ၍ကြီးမြတ်ပေ၏’
ယေဟောဝါ၏ ဖန်ဆင်းခြင်းလက်ရာ ခံ့ညားထည်ဝါမှု
‘ကိုယ်တော်သည် တောင်တို့ထက် ဘုန်းသာ၍ကြီးမြတ်ပေ၏’
ဖူဂျီတောင်ထိပ်မှ နေဝန်းပြူလာပုံကို ရှုစားရခြင်းသည် မမေ့နိုင်ဖွယ်အတွေ့အကြုံတစ်ခုပင်။ ရဲရဲတောက်နေဝန်းသည် မိုးကုပ်စက်ဝိုင်းအစပ်တွင် ဘွားကနဲပေါ်ထွက်လာကာ ငွေနှင်းဖြူနှင့် ခဲရောင်ချော်ကျောက်တို့ကို အလင်းရောင်ထိုးပေးလိုက်လေသည်။ နေ့သစ်တစ်ခုစလိုက်သည်နှင့်အမျှ မိုင်နှင့်ချီ၍ဝေးသော တောင်ကုန်းနှင့် တောင်ကြားချိုင့်ဝှမ်းတို့အထိ ထင်းနေသော ဤတောင်၏အရိပ် မိုးသွားလေသည်။
“အတုမရှိ” ဟုအဓိပ္ပာယ်ရှိသော ဖူဂျီတောင်ကဲ့သို့ပင် ခံ့ညားလှသောတောင်များတို့သည် ကျွန်ုပ်တို့ကို အစဉ်အံ့သြမိန်းမောစေပါသည်။ အမှန်မှာ ၎င်းတို့၏ဧရာမအရွယ်အစားကြောင့် ကျွန်ုပ်တို့မာန်စွယ်ကျိုးနိုင်သည်! တောင်များ၏ ခံ့ညားထည်ဝါမှုကြောင့် မြူနှင့် မိုးသားတိမ်တိုက်တို့ ဖုံးလွှမ်းနေလေ့ရှိသော တောင်ထိပ်များသည် နတ်ဘုရားတို့ စံပျော်ရာအရပ်များဖြစ်သည်ဟု လူအများယုံကြည်ကြလေသည်။
တောင်ထိပ်များ၏ ချီးမွမ်းဂုဏ်တင်ခြင်းခံရပြီး စစ်မှန်၍ တစ်ဆူတည်းဖြစ်သော ဘုရားသခင်မှာ ၎င်းတို့ကို ဖန်ဆင်းတော်မူရှင် ယေဟောဝါဖြစ်သည်။ ကိုယ်တော်တစ်ပါးတည်းသာလျှင် “တောင်များကိုပြုပြင်” သူဖြစ်၏။ (အာမုတ် ၄:၁၃၊ သမ္မာ) ကမ္ဘာ့မြေမျက်နှာပြင် လေးပုံတစ်ပုံနီးပါးမှာ တောင်ထူထပ်သောအရပ်များဖြစ်သည်၊ ဘုရားသခင်သည် ကျွန်ုပ်တို့၏ကမ္ဘာဂြိုဟ်ကို ဖန်ဆင်းစဉ်အခါ အံ့မခန်းဖွယ်တောင်ထိပ်များနှင့် တောင်တန်းများဖြစ်ပေါ်စေနိုင်သော စွမ်းအားများကို ကိုယ်တော်နေရာချထားပြီးဖြစ်သည်။ (ဆာလံ ၉၅:၄) ဥပမာ၊ ကမ္ဘာ့မြေအောက် အတွင်းနက်နက်တစ်နေရာမှ ဧရာမပင့်ကြွလှုပ်ရှားမှုကြောင့်လည်းကောင်း၊ ကမ္ဘာ့အပေါ်ယံကျောက်လွှာထုကြီး၏ ပြတ်ရွေ့ကြောင်းများတစ်လျှောက် ရွေ့လျားမှုကြောင့်လည်းကောင်း ဟိမဝန္တာနှင့် အင်ဒီးစ်တောင်တန်းကြီးများ ဖြစ်ပေါ်လာခြင်းဖြစ်သည်ဟု ယုံကြည်ထားကြသည်။
တောင်များ မည်သို့ဖြစ်တည်လာကြောင်း၊ အဘယ်ကြောင့်ဖြစ်တည်လာကြောင်းကို ကျွန်ုပ်တို့ အပြည့်အဝနားမလည်ကြပါ။ အမှန်မှာ ဖြောင့်မတ်သူယောဘအား မေးခဲ့သော ဤမေးခွန်းများကို ကျွန်ုပ်တို့မဖြေနိုင်ကြပါ– “မြေကြီးအမြစ်ကို ငါ [ယေဟောဝါ] တည်သောအခါ သင်သည် အဘယ်မှာရှိသနည်း။ ... မြေကြီးတိုက်မြစ်ကို အဘယ်အရပ်၌စွဲစေသနည်း။”—ယောဘ ၃၈:၄-၆။
ကျွန်ုပ်တို့၏အသက်သည် တောင်များပေါ် မှီတည်နေကြောင်းကိုမူ ကျွန်ုပ်တို့သိကြသည်။ ၎င်းတို့ကို သဘာဝရေစင်များဟူ၍လည်း ခေါ်သည်၊ အကြောင်းမှာ အဓိကမြစ်ကြီးအားလုံးသည် တောင်များတွင် မြစ်ဖျားခံပြီး ကမ္ဘာသားထက်ဝက်မှာ ရေရရှိဖို့ တောင်များကိုမှီခိုနေရသည်။ (ဆာလံ ၁၀၄:၁၃) နယူးဆိုင်းယင်းတစ် မဂ္ဂဇင်းအရ “ကမ္ဘာ့အဓိကစားနပ်ရိက္ခာပင် ၂၀ မျိုးထဲမှ ခြောက်မျိုးမှာ တောင်တန်းများ၌ ပေါက်ရောက်သောအပင်များဖြစ်သည်။” ဘုရားသခင်ကတိထားရာ ကမ္ဘာသစ်တွင် ဂေဟစနစ် မျှတသော ပတ်ဝန်းကျင်အခြေအနေများအောက် “ပြည်တော်၌ များစွာသောစပါးရှိ၍ အသီးအနှံသည် လေဗနုန်တောကဲ့သို့ တောင်ထိပ်ပေါ်မှာလှုပ်ရှားလိမ့်မည်။”—ဆာလံ ၇၂:၁၆; ၂ ပေတရု ၃:၁၃။
တောင်များအကြောင်းပြောလိုက်သည်နှင့် လူအများသည် ဥရောပတိုက်ရှိ အဲ့လ်ပ်တောင်တန်းများကို ပြေးမြင်မိသည်။ ဤတွင်ဖော်ပြထားသော စီဗက်တာတောင်အပါအဝင် ၎င်းတောင်ထိပ်များသည် ဖန်ဆင်းရှင်ရှိကြောင်း သက်သေထူသည်။ (ဆာလံ ၉၈:၈) ၎င်းတို့သည် “တန်ခိုးတော်အားဖြင့် တောင်များကိုတည်တော်မူ” သောအရှင်၊ ယေဟောဝါကို ချီးမွမ်းဂုဏ်တင်ကြ၏။—ဆာလံ ၆၅:၆၊ သမ္မာ။ *
ရေခဲနေသောတောင်ထွတ်များနှင့် တောင်ရိုးများ၊ နှင်းဖုံးလွှမ်းနေသောတောင်စောင်းများ၊ ၎င်းတို့၏ ချိုင့်ဝှမ်းများ၊ အိုင်များနှင့် မြက်ခင်းပြင်များရှိသော အဲ့လ်ပ်တောင်တန်းများ၏ ခံ့ညားထည်ဝါမှုသည် အမှန်အံ့မခန်းဖွယ်ဖြစ်သည်။ ယေဟောဝါကို “တောင်များပေါ်မှာ မြက်ပင်ကိုပေါက်စေ” သောအရှင်ဟု ဒါဝိဒ်မင်းဖော်ပြခဲ့သည်။—ဆာလံ ၁၄၇:၈။
တရုတ်ပြည်၊ ကွေ့လင်မြို့ရှိ ဤတောင်ကုန်းများကဲ့သို့သော တောင်စဉ်တောင်တန်းများသည် အဲ့လ်ပ်တောင်တန်းများလောက် ခံ့ညားထည်ဝါမှုမရှိပုံရသော်လည်း အလှထူးကြသည်။ လီမြစ်ကြောတစ်လျှောက် အနှံ့အပြားတွင် ထိုးထွက်နေသော ထုံးကျောက်တောင်ထွတ်များ၏ အလှအပက ဧည့်သည်များကို စွဲမှတ်စေသည်။ ဆီးနှင်းဖုံးလွှမ်းနေသော ဤတောင်ကုန်းများမှ စီးဆင်းလာသည့် ကြည်လင်သောရေကို တွေ့မြင်ရခြင်းက “[ယေဟောဝါ] သည် ချိုင့်များထဲသို့ စမ်းရေကိုလွှတ်တော်မူ၍ ရေသည်တောင်တို့တွင်စီး ... ၏” ဟူသော ဆာလံဆရာ၏စကားများကို သတိရစေပေမည်။—ဆာလံ ၁၀၄:၁၀။
လူတို့ကို ကောင်းကျိုးပြုပြီး ပျော်ရွှင်စေရန် ဖန်ဆင်းရှင်၏မေတ္တာပါသော ပြင်ဆင်ပေးချက်တစ်ခုဖြစ်ကြောင်း ကျွန်ုပ်တို့သိထားသောကြောင့် တောင်များကို ကျွန်ုပ်တို့ အမှန်ပင်အထင်ကြီးစွဲမှတ်ကြပါသည်။ တောင်များသည် မည်မျှပင် အံ့ဖွယ်ကောင်းသော်လည်း ယေဟောဝါ၏ဘုန်းတန်ခိုးကြီးမြတ်မှုနှင့် မယှဉ်နိုင်ပါ။ ကိုယ်တော်သည် အမှန်ပင် “တောင်တို့ထက် ဘုန်းသာ၍ကြီးမြတ်ပေ၏။”—ဆာလံ ၇၆:၄။
[အောက်ခြေမှတ်ချက်]
^ အပိုဒ်၊ 8 ယေဟောဝါသက်သေများ၏ ၂၀၀၄ ပြက္ခဒိန် မတ်/ဧပြီလကိုရှု။
[စာမျက်နှာ ၉ ပါ လေးထောင့်ကွက်/ ရုပ်ပုံ]
ကမ္ဘာ့လူဦးရေ ဆယ်ရာခိုင်နှုန်းသည် တောင်တန်းဒေသများ၌ နေထိုင်ကြသည်။ သို့သော် ယင်းသည် ဘုရားသခင့်နိုင်ငံတော်သတင်းကောင်း ကြေညာနေသူများအတွက် မကျော်လွှားနိုင်သော အတားအဆီးတစ်ခုမဟုတ်ပါ။ ဤခရစ်ယာန်ဓမ္မအမှုဆောင်များသည် မြင့်မားသောအရပ်ဒေသများ၌ အလွန်အလုပ်များနေကြသည်။ “ငြိမ်သက်ခြင်း၏ဝမ်းမြောက်စရာသတင်းကို ကြားပြောသောသူ၊ ကယ်တင်ခြင်းကောင်းကျိုးချမ်းသာ၏ ဝမ်းမြောက်စရာသတင်းကိုကြားပြောသောသူ၊ သင်၏ဘုရားသခင်စိုးစံတော်မူ၏ဟု ဇိအုန်မြို့အားပြောသောသူ၏ခြေတို့သည် တောင်ပေါ်မှာ အလွန်တင့်တယ်လှစွတကား။”—ဟေရှာယ ၅၂:၇။
‘မြင့်သောတောင်တို့သည် တောင်ဆိတ်များမှီခိုရာ ဖြစ်ကြ၏’ ဟုဆာလံဆရာသီဆိုခဲ့သည်။ (ဆာလံ ၁၀၄:၁၈) တောင်ပေါ်နေထိုင်သော သတ္တဝါများအနက် ခြေအမြဲဆုံးသတ္တဝါတစ်မျိုးမှာ ခံ့ညားသော ဦးချိုရှိ နူဗီယန်တောင်ဆိတ်ကဲ့သို့သော တောင်ဆိတ်များဖြစ်သည်။ ၎င်းတို့သည် ဖြတ်သန်းသွားလာရန် မဖြစ်နိုင်ပုံရှိသော အလွန်ကျဉ်းမြောင်းသည့် တောင်စွန်းများတစ်လျှောက် ဖြတ်လျှောက်ရဲကြသည်။ ဤတောင်ဆိတ်သည် လူသူအရောက်အပေါက်နည်းသောအရပ်များတွင် ကျက်စားနိုင်ကြသည်။ သို့ဖြစ်ရသည့် အကြောင်းရင်းတစ်ခုမှာ ၎င်းတို့၏ ခွာများတည်ဆောက်ပုံကြောင့်ဖြစ်သည်။ ခွာကြားသည် ဆိတ်၏ကိုယ်အလေးချိန်ပေါ်မူတည်ပြီး ကျယ်လာနိုင်သဖြင့် ကျဉ်းမြောင်းသည့် ကျောက်ဆောင်စွန်းများပေါ်တွင် ရပ်နေသည့်အခါ သို့မဟုတ် သွားလာလှုပ်ရှားသည့်အခါ ခြေကုပ်ခိုင်မြဲစေပါသည်။ ဤတောင်ဆိတ်သည် အလွန်လက်ရာမြောက်သော ဒီဇိုင်းတစ်ခုဖြစ်သည်မှာ ဧကန်အမှန်ပင်!
[စာမျက်နှာ ၉ ပါ ရုပ်ပုံ]
ဂျပန်နိုင်ငံ၊ ဟွန်ရှူးကျွန်းရှိ ဖူဂျီတောင်