ဖိနှိပ်ချုပ်ချယ်မှုထမ်းပိုးကို ဧဟုဒ ချိုးဖျက်
ဖိနှိပ်ချုပ်ချယ်မှုထမ်းပိုးကို ဧဟုဒ ချိုးဖျက်
ဤကား ရဲစွမ်းသတ္တိနှင့် ဉာဏ်ဆင်မှုဆိုင်ရာ ဖြစ်ရပ်မှန်ဇာတ်လမ်းတစ်ပုဒ်ဖြစ်သည်။ လွန်ခဲ့သောအနှစ် ၃,၀၀၀ ခန့်က ဖြစ်ပျက်ခဲ့ပါသည်။ ကျမ်းစာမှတ်တမ်းက ဤသို့အစပြုသည်– “တစ်ဖန် ဣသရေလအမျိုးသည် ထာဝရဘုရားရှေ့တော်၌ [မကောင်းမှု] ကိုပြုသောကြောင့် မောဘရှင်ဘုရင်ဧဂလုန်ကို ဣသရေလအမျိုးတစ်ဖက်၌ ခွန်အားနှင့်ပြည့်စုံစေတော်မူ၏။ ထိုမင်းသည် အမ္မုန်အမျိုးသား၊ အာမလက်အမျိုးသားတို့ကို စုဝေးစေလျက်ချီသွား၍ ဣသရေလလူတို့ကိုလုပ်ကြံပြီးမှ စွန်ပလွံမြို့ကိုသိမ်းယူသဖြင့်၊ ဣသရေလအမျိုးသားတို့သည် တစ်ဆယ့်ရှစ်နှစ်ပတ်လုံး မောဘရှင်ဘုရင်ဧဂလုန်မင်းထံ၌ ကျွန်ခံရကြ၏။”—တရားသူကြီး ၃:၁၂-၁၄။
မောဘလူမျိုးတို့၏နယ်မြေသည် ယော်ဒန်မြစ်နှင့် ပင်လယ်သေတို့၏ အရှေ့ဘက်တွင် တည်ရှိသည်။ သို့တိုင် မောဘလူမျိုးတို့သည် မြစ်ကိုဖြတ်ပြီး “စွန်ပလွံမြို့” တည်းဟူသော ယေရိခေါမြို့အနီးတစ်ဝိုက်နယ်မြေကို သိမ်းပိုက်ခြင်းဖြင့် ဣသရေလလူမျိုးကို ကျွန်ပြုခဲ့သည်။ (တရားဟောရာ ၃၄:၃) “အလွန်ဝသော” မောဘရှင်ဘုရင် ဧဂလုန်သည် ဣသရေလလူမျိုးများထံမှ ဆက်ကြေးများကို အနှစ်နှစ်ဆယ်နီးပါး ခြိမ်းခြောက်တောင်းယူသဖြင့် လူမျိုးတော်မှာ ဝန်ပိပြီး ချိုးနှိမ်ခံခဲ့ရသည်။ (တရားသူကြီး ၃:၁၇) သို့သော် ဆက်ကြေးကို သူမရမကတောင်းဆိုခြင်းကြောင့်ပင် ဤမင်းဆိုးမင်းညစ်ကို သုတ်သင်ပစ်ရန် အကြောင်းပေါ်စေခဲ့သည်။
မှတ်တမ်းက ဤသို့ဆို၏– “နောက်တစ်ဖန် ထာဝရဘုရားကို အော်ဟစ်သောအခါ၊ ကယ်တင်သောသခင်၊ လက်ယာလက်ကို မသုံးတတ်သော ဗင်ယာမိန်အမျိုး၊ ဂေရသားဧဟုဒကိုပေါ်ထွန်းစေတော်မူ၏။ သူ့လက်တွင် ဣသရေလလူတို့သည် လက်ဆောင်ကို မောဘရှင်ဘုရင်ဧဂလုန်ထံသို့ပေးလိုက်ကြ၏။” (တရားသူကြီး ၃:၁၅) ဆက်ကြေးကို ပေးဆက်ရန် ဧဟုဒကိုရွေးချယ်ကြောင်း သေချာစေဖို့ ယေဟောဝါစီစဉ်ခဲ့ရပေမည်။ ထိုတာဝန်ကို သူယခင်က ထမ်းဆောင်ခဲ့ဖူးခြင်းရှိမရှိကို မဖော်ပြထားပါ။ သို့ရာတွင် ဘုရင်နှင့်တွေ့ဆုံရန် အသေအချာပြင်ဆင်ထားပုံနှင့် သူအသုံးပြုခဲ့သောနည်းဗျူဟာများက သူသည် ဧဂလုန်၏နန်းတော်သာမက နန်းတော်၌သူကြုံတွေ့နိုင်ရာများကိုပါ အတော်အတန်အကျွမ်းတဝင်ရှိကြောင်း သိရှိစေပါသည်။ ဤအရာများအပြင် သူဘယ်သန်ဖြစ်နေခြင်းကလည်း အရေးပါသည့်အချက်ဖြစ်၏။
မသန်မစွမ်းသူတစ်ဦးလော၊ စစ်သူကြီးတစ်ဦးလော
“ဘယ်သန်” ဟူသောစကားလုံးသည် စာသားအရ ‘ညာလက် ကပ်နေသည်၊ ဆွံ့နေသည် သို့မဟုတ် တုပ်စည်းနေသည်’ ဟုအဓိပ္ပာယ်ရှိသည်။ ယင်းက ဧဟုဒသည် ညာလက်ချို့ယွင်းနေသော မသန်မစွမ်းသူဖြစ်သည်ဟု ဆိုလိုပါသလော။ ဗင်ယာမိန်အမျိုးအနွယ်မှ ဘယ်သန် “ယောက်ျားကောင်းခုနစ်ရာ” အကြောင်း သမ္မာကျမ်းစာ အဘယ်သို့ဆိုသည်ကို သုံးသပ်ကြည့်ပါ။ “ထိုလူအပေါင်းတို့ [သည်] ... ဆံခြည်တစ်ပင်ကို လောက်လွှဲနှင့်မှန်အောင်ပစ်နိုင်” ကြ၏ဟု တရားသူကြီး ၂၀:၁၆ ကဖော်ပြသည်။ တိုက်ပွဲတွင် သူတို့၏ ပြောင်မြောက်သောစွမ်းရည်ကြောင့် ရွေးချယ်ခံရခြင်းဖြစ်နိုင်သည်။ ကျမ်းပညာရှင်အချို့အရ ‘ဘယ်သန်’ သည် “လက်ဝဲလက်ကော လက်ယာလက်ပါအသုံးပြုသူ” ကို ဆိုလိုသည်၊ တစ်နည်းအားဖြင့် ဘယ်သန်ညာသန် ဖြစ်၏။—တရားသူကြီး ၃:၁၅၊ ဒူးဝေးဘာသာပြန်ကျမ်း။
အမှန်မှာ ဗင်ယာမိန်အမျိုးသည် ဘယ်သန်အမျိုးသားများဖြင့် ထင်ပေါ်ကျော်ကြားခဲ့၏။ ရာဇဝင်ချုပ်ပထမစာစောင် ၁၂:၁၊ ၂ (သမ္မာ) က “စစ်ကူဝင်လာသောသူ၊ လေးလက်နက်ကိုဆောင်၍ လက်ယာလက်၊ လက်ဝဲလက်မရွေး၊ ခဲနှင့်မြားကိုပစ်တတ်သော သူရဲကောင်း” ဗင်ယာမိန်အမျိုးအကြောင်း ပြောပြသည်။ “ကလေးငယ်များ၏ ညာဘက်လက်မောင်းများကို ချည်နှောင်—‘သူ၏ညာလက်ကိုချည်နှောင်ထား’—ပြီး ဘယ်ဘက်လက်ကျွမ်းကျင်ရန် လေ့ကျင့်ပေးခြင်းဖြင့် ဤစွမ်းရည်ရရှိလာနိုင်သည်” ဟု စာအုပ်တစ်အုပ်ကဆို၏။ ဣသရေလလူမျိုး၏ရန်သူများသည် ပုံမှန်အားဖြင့် ညာသန်စစ်သည်များဖြစ်ဖို့ လေ့ကျင့်ခံရပေမည်။ ထို့ကြောင့် ရန်သူတစ်ဦးသည် မမျှော်လင့်ဘဲ ဘယ်သန်စစ်သည်တစ်ဦးနှင့် ဆုံတွေ့မည်ဆိုလျှင် သူလေ့ကျင့်ထားသမျှ အချည်းနှီးဖြစ်သွားနိုင်သည်။
ရှင်ဘုရင်အတွက် “တိတ်ဆိတ်စွာလျှောက်စရာအကြောင်း”
ဧဟုဒ၏ပထမခြေလှမ်းမှာ ‘သူ့အတွက် သံလျက်တစ်ချောင်း’ ကိုအသင့်ပြင်ခဲ့သည်၊ သူ၏ဝတ်လုံလောက်တွင် ဝှက်ထားနိုင်မည့် အသွားနှစ်ဖက်ရှိ ဓားတိုတစ်လက်ဖြစ်သည်။ သူ့မှာ လက်နက်ပါမပါ ရှာဖွေခံရနိုင်သည်။ ညာသန်များသည် လက်နက်များကို ချက်ချင်းဆွဲယူအသုံးပြုနိုင်သည့် ဘယ်ဘက်တွင် တပ်ဆင်လေ့ရှိသည်။ ဧဟုဒသည် ဘယ်သန်ဖြစ်ခြင်းကြောင့် သူ၏လက်နက်ကို ဘုရင်၏အစောင့်အကြပ်များ ရှာဖွေဖို့အကြောင်းနည်းသည့် “လက်ယာပေါင်အဝတ်တွင်း၌” ဝှက်ထားခဲ့သည်။ ထို့ကြောင့် အတားအဆီးမရှိဘဲ “မောဘရှင်ဘုရင်ဧဂလုန်ထံသို့ လက်ဆောင်ကိုဆောင်ခဲ့လေ၏။”—တရားသူကြီး ၃:၁၆၊ ၁၇။
ဧဂလုန်၏နန်းတော်တွင်း ဝင်ရောက်ခါစတွင် ဖြစ်ပျက်ခဲ့ရာများကို ဖော်ပြမထားပါ။ သမ္မာကျမ်းစာက “ဧဟုဒသည် လက်ဆောင်ကိုဆက်ပြီးလျှင် လက်ဆောင်ကိုထမ်းသောသူတို့ကိုလွှတ်လိုက်” သည်ဟုသာ ရိုးရိုးရှင်းရှင်းဖော်ပြထားသည်။ (တရားသူကြီး ၃:၁၈) ဆက်ကြေးကို ပေးဆက်ပြီးနောက် ဧဟုဒသည် ဧဂလုန်၏နန်းတော်မှ လုံခြုံသောအကွာအဝေးနေရာသို့ ဆက်ကြေးထမ်းသူများနှင့်အတူပြန်လာကာ သူတို့ကိုလွှတ်လိုက်ပြီးနောက် နန်းတော်သို့ ပြန်သွားလေသည်။ အဘယ်ကြောင့် ဤသူများပါလာသနည်း။ သူ့အား အကာအကွယ်ပေးရန် သူတို့အား အတူရှိနေစေခြင်းလော၊ သို့မဟုတ် သံခင်းတမန်ခင်းတွင် လိုက်နာအပ်သော လုပ်ထုံးလုပ်နည်းဖြစ်သောကြောင့်လော သို့မဟုတ် သူတို့သည် ဆက်ကြေးအထမ်းသမားသက်သက်ဖြစ်ကြသလော။ ထို့အပြင် သူ၏အကြံအစည်ကို အကောင်အထည်မဖော်မီ သူတို့ကို ဘေးကင်းလုံခြုံရာသို့ ရောက်စေလို၍လော။ သူမည်သို့စဉ်းစားတွေးတောခဲ့သည်ဖြစ်စေ ဧဟုဒသည် ရဲစွမ်းသတ္တိဖြင့် တစ်ကိုယ်တည်း ပြန်လှည့်လာသည်။
“[ဧဟုဒသည်] ဂိလဂါလမြို့နား၌ရှိသော ကျောက်တိုင်တို့မှ ကိုယ်တိုင်ပြန်လာ၍ ဘုရားကျွန်တော်သည် တိတ်ဆိတ်စွာလျှောက်စရာအကြောင်းရှိပါသည် အရှင်မင်းမြတ်ဟုဆို ... ၏။” ဧဂလုန်ရှေ့မှောက် သူမည်သို့ပြန်ဝင်ရောက်နိုင်ခဲ့ကြောင်း သမ္မာကျမ်းစာက မရှင်းပြပါ။ အစောင့်အကြပ်များ သံသယမဖြစ်ခဲ့ကြပေလော။ ဣသရေလလူတစ်ဦးတည်း ရှေ့တော်ဝင်ရောက်ခြင်းက မိမိတို့အရှင်သခင်အတွက် အန္တရာယ်မရှိဟု သူတို့ယူဆခဲ့ကြသလော။ ဧဟုဒတစ်ယောက်တည်းပြန်လာခြင်းက ကိုယ့်လူမျိုးကို ပြန်၍သစ္စာဖောက်မည်ဟုထင်မှတ်စေရန် ဖန်တီးလိုက်ခြင်းလော။ မည်သို့ပင်ဖြစ်စေ ဧဟုဒသည် ဘုရင်နှင့် နှစ်ဦးချင်းတွေ့ဖို့ ရှာကြံခဲ့ရာ သူအောင်မြင်ခဲ့သည်။—တရားသူကြီး ၃:၁၉။
မှုတ်သွင်းခံမှတ်တမ်းက ဤသို့ဆက်ပြောသည်– “ရှင်ဘုရင်သည် ကိုယ်တိုင်တစ်ယောက်တည်းနေတတ်သော နွေနန်းဆောင်၌ထိုင်နေစဉ် ဧဟုဒသည်ချဉ်းကပ်၍ ကိုယ်တော်နှင့်ဆိုင်သော ဘုရားသခင်၏အမိန့်တော်ပါပါ၏ဟုလျှောက် ... လေ၏။” ဘုရားသခင်ထံမှ သတင်းစကားကို ဧဟုဒရည်ညွှန်းနေခြင်းမဟုတ်ပါ။ ဧဟုဒစိတ်ထဲရှိသည်မှာ သူ၏ဓားကိုအသုံးပြုဖို့ဖြစ်သည်။ ရှင်ဘုရင်သည် ခေမုရှနတ်ဘုရားထံမှ သတင်းစကားကြားရဖို့ မျှော်လင့်လျက် “ထလေ၏။” ဧဟုဒသည် သူ၏ဓားကို လျှပ်တစ်ပြက်ဆွဲထုတ်လိုက်ပြီး ဧဂလုန်၏ဝမ်းကို ထိုးစိုက်လိုက်သည်။ ဓားလက်ကိုင်တွင် အထစ်ပါဟန်မတူပေ။ ထို့ကြောင့် “လက်ကိုင်အရိုးနှင့်တကွသန်လျက်မြုပ်ဝင်၍ ... ဆီဥသည်သန်လျက်ကိုလွှမ်းလျက် ချေးနုလည်းထွက်လျက်ရှိလေ၏၊” ဒဏ်ရာရသည့်နေရာမှသော်လည်းကောင်း၊ ဧဂလုန်၏ဝမ်းမှ အလိုအလျောက် ထွက်လာခြင်းသော်လည်းကောင်း ဖြစ်နိုင်သည်။—တရားသူကြီး ၃:၂၀-၂၂။
ချောချောမောမောလွတ်မြောက်ခြင်း
သူ၏ဓားကို ပြန်ဆွဲထုတ်မနေတော့ဘဲ “ဧဟုဒသည် အဆောင်ဦးသို့ထွက်ပြီးလျှင် အခန်းတံခါးများကိုပိတ်လျက် သော့ခတ်၍၊ ထွက်သွားပြီးနောက် [ဧဂလုန်၏] ကျွန်တော်မျိုးတို့သည်လာ၍ အခန်းတံခါး၌ သော့ခတ်လျက်ရှိသည်ကိုမြင်လျှင် လေသာခန်းတွင် အခင်းသွားသည်ဟုဆို” ကြ၏။—တရားသူကြီး ၃:၂၃၊ ၂၄၊ သမ္မာ။
ဧဟုဒထွက်လာသော “အဆောင်ဦး” ကား အဘယ်နည်း။ “[ဟေဗြဲစကားလုံး၏] အဓိပ္ပာယ်ကို အတိအကျမသိရပါ” သို့သော် “‘စင်္ကြံတစ်ဖက်တစ်ချက်တွင် တိုင်လုံးအစဉ်ရှိသော’ ‘ဆင်ဝင်ဆောင်’ ဖြစ်နိုင်သည်” ဟုအကိုးအကားစာအုပ်တစ်အုပ်ကဆို၏။ ဧဟုဒသည် အထဲမှတံခါးများကိုသော့ခတ်ပြီး အခြားလမ်းမှ ထွက်ပြေးခဲ့ခြင်းလော။ သို့မဟုတ် သေဆုံးနေသောရှင်ဘုရင်ထံမှ သော့ကိုယူပြီး အပြင်ဘက်မှတံခါးများကို သော့ခတ်ခဲ့ခြင်းလော။ ထို့နောက် အဘယ်အရာမျှမဖြစ်ခဲ့သည့်အလား အစောင့်အကြပ်များကို မသိလိုက်ဘာသာ ဖြတ်ကျော်ခဲ့ခြင်းလော။ သမ္မာကျမ်းစာက မပြောပြပါ။ သို့သော် အဘယ်နည်းကို ဧဟုဒအသုံးပြုခဲ့သည်ဖြစ်စေ ဧဂလုန်၏ကျေးကျွန်များသည် တံခါးများပိတ်နေခြင်းကို ချက်ချင်းသံသယ မဖြစ်ခဲ့ကြချေ။ ရှင်ဘုရင် “အခင်းသွား” နေသည်ဟုသာ သူတို့ယူဆခဲ့ကြသည်။
ရှင်ဘုရင်၏ကျေးကျွန်များ ရစ်ဝဲငံ့လင့်နေကြစဉ် ဧဟုဒလွတ်မြောက်ခဲ့သည်။ ထို့နောက် သူ၏အမျိုးသားချင်းများကိုဆင့်ခေါ်၍ “ငါ့နောက်သို့လိုက်ကြလော့။ ထာဝရဘုရားသည် သင်တို့၏ရန်သူ မောဘလူတို့ကို သင်တို့လက်၌အပ်တော်မူမည်” ဟုဆို၏။ ဧဟုဒ၏လူတို့သည် စစ်နည်းဗျူဟာအရ ယော်ဒန်မြစ် ရေတိမ်ပိုင်းအရပ်များကို သိမ်းယူခြင်းဖြင့် ခေါင်းဆောင်မဲ့နေသော မောဘလူမျိုးများ သူတို့၏အမိမြေသို့ပြန်ရာလမ်းကို ပိတ်ဆို့လိုက်ကြသည်။ သို့ဖြင့် “[ဣသရေလလူတို့သည်] ခွန်အားကြီးသော မောဘစစ်သူရဲတစ်ယောက်မျှမလွတ်ဘဲ လူတစ်သောင်းကိုသတ်၍၊ မောဘအမျိုးသည် ဣသရေလအမျိုးလက်၌ရှုံးသဖြင့် အနှစ်ရှစ်ဆယ်တိုင်တိုင် တစ်ပြည်လုံးငြိမ်းလေ၏။”—တရားသူကြီး ၃:၂၅-၃၀။
ကျွန်ုပ်တို့အတွက် သင်ခန်းစာများ
ယေဟောဝါရှေ့မှောက်ဆိုးသွမ်းမှုပြုလုပ်သည့်အခါ ကျွန်ုပ်တို့အတွက် ဘေးဆိုးများရှိကြောင်း ဧဟုဒခေတ်တွင် ဖြစ်ပျက်ခဲ့ရာများက သင်ခန်းစာပေးပါသည်။ တစ်ဖက်တွင်မူ နောင်တဖြင့် ပြန်လှည့်လာသူများကို ယေဟောဝါကူညီပေးပါသည်။
ဧဟုဒ၏အကြံအစည်များ အောင်မြင်ခဲ့ခြင်းမှာ သူ၏ ကျွမ်းကျင်လိမ္မာမှုကြောင့်သော်လည်းကောင်း၊ ရန်သူ၏ ညံ့ဖျင်းမှုကြောင့်သော်လည်းကောင်း မဟုတ်ပါ။ ဘုရားသခင့်ရည်ရွယ်ချက်များ အကောင်အထည်ပေါ်ခြင်းသည် လူ့ပယောဂအပေါ် မူမတည်ပါ။ ဧဟုဒ အောင်မြင်ခဲ့ရသော အဓိကအကြောင်းရင်းမှာ ကိုယ်တော်၏လူမျိုးတော်လွတ်မြောက်စေရန် ဘုရားသခင်၏ မတားဆီးနိုင်သော အလိုတော်နှင့်အညီ လုပ်ဆောင်သောအခါ ဘုရားသခင်၏ကျောထောက်နောက်ခံမှုကို သူရရှိထားသောကြောင့်ဖြစ်သည်။ ဧဟုဒကို ဘုရားသခင်ပေါ်ထွန်းစေခဲ့ပြီးနောက် “ထာဝရဘုရားသည် တရားသူကြီးကို [မိမိ၏လူမျိုးတော်အတွက်] ပေါ်ထွန်းစေသောအခါ သူနှင့်အတူရှိ ... တော်မူ၏။”—တရားသူကြီး ၂:၁၈; ၃:၁၅။