သခင့်ညစာစားပွဲ မည်သို့ကျင်းပရမည်နည်း
သခင့်ညစာစားပွဲ မည်သို့ကျင်းပရမည်နည်း
သခင့်ညစာစားပွဲ ကျင်းပရခြင်းအကြောင်းကို ခရစ်ယာန်တမန်တော်ပေါလုက ဤသို့ရှင်းလင်းဖော်ပြခဲ့သည်– ‘သင်တို့၌ငါအပ်ပေးသောအရာကို အရှင်ဘုရားထံမှ ငါခံခဲ့ရပြီ။ ခံရသောအရာဟူမူကား အရှင်ယေရှုသည် ရန်သူ့လက်သို့အပ်နှံခြင်းကို ခံရသောညဉ့်မှာ မုန့်ကိုယူ၍၊ ကျေးဇူးတော်ကိုချီးမွမ်းပြီးမှ မုန့်ကိုဖဲ့၍ ဤမုန့်ကား သင်တို့အဖို့အလိုငှာ ငါ၏ကိုယ်ဖြစ်၏။ ငါ့ကိုအောက်မေ့ဖို့ရာ ဤသို့ပြုကြလော့ဟု မိန့်တော်မူ၏။ ထိုနည်းတူ ညစာစားပြီးမှ ခွက်ကိုလည်းယူ၍ ဤခွက်ကား ငါ၏အသွေး၌တည်သော ပဋိညာဉ်တရားသစ်ဖြစ်၏။ ဤခွက်ကိုသောက်သောအခါခါ ငါ့ကိုအောက်မေ့ဖို့ရာ သောက်ကြလော့ဟု မိန့်တော်မူ၏။ အကြောင်းမူကား သင်တို့သည် ထိုမုန့်ကိုစား၍ ထိုခွက်ကိုသောက်သောအခါခါ အရှင်ဘုရားအသေခံတော်မူခြင်းကို ကြွလာတော်မူသည်တိုင်အောင် ဖော်ပြကြ၏။’—၁ ကောရိန္သု ၁၁:၂၃-၂၆၊ သမ္မာ။
ပေါလုဖော်ပြသည့်အတိုင်း ခရစ်တော်ကို နှက်တိုင်တင်သတ်ခြင်းငှာ ရောမလူမျိုးတို့အား ဖိအားပေးခဲ့သော ဂျူးဘာသာရေးခေါင်းဆောင်များ၏လက်သို့ ယုဒရှကာရုတ်အားဖြင့် “အပ်နှံခြင်းကို ခံရသောညဉ့်” တွင် ယေရှုသည် သခင့်ညစာစားပွဲကို အစပြုကျင်းပခဲ့သည်။ အဆိုပါစားသောက်ပွဲကို စီ.အီး. ၃၃၊ မတ်လ ၃၁ ရက်၊ ကြာသပတေးနေ့ ညနေချမ်းတွင် ကျင်းပခဲ့သည်။ ဧပြီလ ၁ ရက်၊ သောကြာနေ့ညနေပိုင်းတွင် ညှဉ်းဆဲရာသစ်တိုင်ပေါ်၌ ယေရှုကွယ်လွန်ခဲ့သည်။ ဂျူးပြက္ခဒိန်၏နေ့ရက်များကို နေ့တစ်နေ့၏ညချမ်းမှ နောက်တစ်နေ့ညချမ်းအထိ သတ်မှတ်လေ့ရှိသည့်အတွက် သခင့်ညစာစားပွဲရော ယေရှုသေဆုံးသည့်နေ့ပါ စီ.အီး. ၃၃၊ နိသန်လ ၁၄ ရက်နေ့တွင် ဖြစ်သည်။
မုန့်နှင့် စပျစ်ဝိုင်ကို သုံးဆောင်သူများသည် ယေရှုကို အောက်မေ့သတိရဖို့ “ဤသို့ပြုကြ” ရမည်ဖြစ်သည်။ အခြားဘာသာပြန်ကျမ်းတစ်ကျမ်းအရ ယေရှုက “ငါ့ကို သတိရအောက်မေ့ဖို့ရာ ဤသို့ပြုလော့” ဟု မိန့်တော်မူ၏။ (၁ ကောရိန္သု ၁၁:၂၄၊ ယေရုရှလင်ကျမ်းစာ) သခင့်ညစာစားပွဲကို ခရစ်တော်၏သေခြင်း သတိရအောက်မေ့ပွဲဟူ၍လည်း ခေါ်သည်။
ယေရှု၏သေခြင်းကို အဘယ်ကြောင့်အမှတ်တရကျင်းပ
ထိုသေခြင်းနှင့်ဆက်စပ်နေရာကို နားလည်ခြင်းဖြင့် အဖြေရနိုင်ပါသည်။ ယေရှုသည် ယေဟောဝါ၏အကြွင်းမဲ့ပိုင်သအုပ်စိုးမှုကို အထင်ရှားဆုံးထောက်ခံသူတစ်ဦးအနေနှင့် သေဆုံးသွားခဲ့သည်။ ထိုနည်းအားဖြင့် မိမိတို့ကိုယ်ကျိုးအတွက်သာ ဘုရားသခင်ကို လူတို့ကိုးကွယ်ခြင်းဖြစ်သည်ဟု စွပ်စွဲသူ စာတန်သည် မုသာပြောသူဖြစ်ကြောင်း ကိုယ်တော်သက်သေထူခဲ့သည်။ (ယောဘ ၂:၁-၅; သု.၂၇:၁၁) ထို့ပြင် စုံလင်သောလူသားတစ်ဦးအနေနှင့် ကွယ်လွန်ခြင်းအားဖြင့် ယေရှုသည် “မိမိအသက်ကိုစွန့်၍ လူများကိုရွေး” တော်မူခဲ့သည်။ (မဿဲ ၂၀:၂၈) အာဒံမူ ဘုရားသခင်ကိုဆန့်ကျင်ကာ အပြစ်ပြုသောအခါ စုံလင်သောလူ့အသက်နှင့် ယင်း၏ အလားအလာများကိုပါ လက်လွတ်ဆုံးရှုံးခဲ့သည်။ သို့သော် “ဘုရားသခင်၏သားတော်ကို ယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ၊ ဘုရားသခင်သည် မိမိ၌တစ်ပါးတည်းသောသားတော်ကို စွန့်တော်မူသည်တိုင်အောင် လော[က]သားတို့ကိုချစ်တော်မူ၏။” (ယောဟန် ၃:၁၆) မှန်ပါသည်၊ “အပြစ်တရား၏အခကား သေခြင်းပေတည်း။ ဘုရားသခင်ပေးတော်မူသော ဆုကျေးဇူးတော်ကား ငါတို့သခင်ယေရှုခရစ်အားဖြင့် ထာဝရအသက်ပေတည်း။”—ရောမ ၆:၂၃။
သို့ဖြင့် ယေရှု၏သေခြင်းတွင် အကြီးမားဆုံးမေတ္တာဖော်ပြချက်နှစ်ရပ် ပါဝင်ဆက်စပ်နေသည်—လူသားတို့အတွက် မိမိ၏သားတော်ကိုပေးရာ၌ ယေဟောဝါပြခဲ့သော ကြီးမားသည့်မေတ္တာနှင့် မိမိ၏လူ့အသက်ကို တလိုတလားပေးဆက်ရာ၌ ယေရှုပြခဲ့သော ကိုယ်ကျိုးစွန့်မေတ္တာတို့ဖြစ်သည်။ ယေရှု၏သေခြင်းကို သတိရအောက်မေ့ခြင်းသည် အဆိုပါမေတ္တာဖော်ပြချက်နှစ်ရပ်ကို ချီးမွမ်းခြင်းဖြစ်သည်။ ကျွန်ုပ်တို့သည် ဤမေတ္တာကို ခံယူရရှိသူများဖြစ်သည့်အတွက် ယင်းကို ကျေးဇူးတင်သင့်သည်မဟုတ်လော။ ကျေးဇူးတင်ကြောင်းဖော်ပြနည်းတစ်ခုမှာ သခင့်ညစာစားပွဲကျင်းပချိန်တွင် ရှိနေခြင်းဖြစ်သည်။
မုန့်နှင့် စပျစ်ဝိုင်တို့၏အဓိပ္ပာယ်
သခင့်ညစာစားပွဲကို စတင်ကျင်းပသောအခါ ယေရှုသည် မုန့်တစ်လုံးနှင့် အနီရောင်စပျစ်ဝိုင်တစ်ခွက်ကို အထိမ်းအမှတ်များ သို့မဟုတ် တင်စားချက်များအဖြစ် အသုံးပြုခဲ့သည်။ ယေရှုသည် မုန့်ကိုယူ၍ “ကျေးဇူးတော်ကိုချီးမွမ်းပြီးမှ မုန့်ကိုဖဲ့၍၊ ဤမုန့်ကား၊ သင်တို့အဖို့အလိုငှာချိုးဖဲ့သော ငါ၏ကိုယ်ဖြစ်၏ ... ဟုမိန့်တော်မူ၏။” (၁ ကောရိန္သု ၁၁:၂၄) မုန့်မှာ တဆေး သို့မဟုတ် ကစော်ဖောက်ဆေးမပါဘဲ ဂျုံနှင့်ရေကိုနယ်ပြီးဖုတ်သော ကြွပ်ဆတ်သောမုန့်ဖြစ်သောကြောင့် စားသုံးခြင်းငှာ ဖဲ့ဝေပေးဖို့လိုသည်။ သမ္မာကျမ်းစာတွင် တဆေးသည် အပြစ်ကိုပုံဆောင်သည်။ (မဿဲ ၁၆:၁၁၊ ၁၂; ၁ ကောရိန္သု ၅:၆၊ ၇) ယေရှု၌ အပြစ်မရှိပါ။ ထို့ကြောင့် ကိုယ်တော်၏စုံလင်သောကိုယ်ခန္ဓာသည် လူသားတို့အတွက် ရွေးနုတ်ဖိုးပူဇော်ရာယဇ်အဖြစ် အသုံးတော်ခံနိုင်သည်။ (၁ ယောဟန် ၂:၁၊ ၂) ခရစ်တော်၏အပြစ်မဲ့သော သွေးသားခန္ဓာကိုယ်ကို တဆေးမဲ့မုန့်က ကိုယ်စားပြုခြင်းသည် သင့်လျော်လိုက်လေခြင်း!
ထို့ပြင် ယေရှုသည် အနီရောင်စပျစ်ဝိုင်အစစ်ထည့်ထားသော ခွက်အတွက် ဆုတောင်းပြီးနောက် “ဤခွက်ကား ငါ၏အသွေး၌တည်သော ပဋိညာဉ်တရားသစ်ဖြစ်၏” ဟုမိန့်တော်မူခဲ့သည်။ (၁ ကောရိန္သု ၁၁:၂၅) ခွက်ထဲတွင်ရှိသော အနီရောင်စပျစ်ဝိုင်က ယေရှု၏အသွေးကိုပုံဆောင်သည်။ ဘီ.စီ.အီး. ၁၅၁၃ ခုနှစ်တွင် ဣသရေလလူမျိုးနှင့် ဘုရားသခင်ဖွဲ့တော်မူခဲ့သော ပညတ်ပဋိညာဉ်ကို ပူဇော်ခံနွားနှင့် ဆိတ်များ၏အသွေးက အတည်ပြုခဲ့သည့်အတိုင်းပင် သေခြင်း၌သွန်းတော်မူခဲ့သော ယေရှု၏အသွေးသည် ပဋိညာဉ်သစ်ကို အတည်ပြုခဲ့သည်။
မည်သူတို့ သုံးဆောင်ရမည်နည်း
သတိရအောက်မေ့ပွဲ အထိမ်းအမှတ်များကို မည်သူတို့ သုံးဆောင်ထိုက်ကြောင်း ခွဲခြားသိမြင်ရန် ပဋိညာဉ်သစ်ဟူသည် အဘယ်အရာဖြစ်ကြောင်း၊ ယင်း၌ မည်သူတို့ပါဝင်ကြောင်း နားလည်ဖို့လိုသည်။ သမ္မာကျမ်းစာက ဤသို့ဆို၏– ‘ထာဝရဘုရားသခင်မိန့်တော်မူသည်ကား ... ပဋိညာဉ်တရားသစ်ကို ဣသရေလအမျိုးသား၊ ယုဒအမျိုးသားတို့၌ ငါပေးသောအချိန်ကာလရောက်လိမ့်မည်။ ငါထာဝရဘုရားသခင်သည် ငါ၏ပညတ်တရားကို သူတို့အတွင်းထဲသို့သွင်းမည်။ သူတို့နှလုံးပေါ်မှာရေးထားမည်။ ငါသည် သူတို့၏ဘုရားသခင်ဖြစ်မည်။ သူတို့သည်လည်း ငါ၏လူဖြစ်ကြလိမ့်မည်။ ... ငါသည် သူတို့အပြစ်များကို သည်းခံမည်။ သူတို့ပြုသောမကောင်းမှုများကို မအောက်မေ့ဘဲနေမည်ဟု ... မိန့်တော်မူ၏။’—ယေရမိ ၃၁:၃၁-၃၄။
ပဋိညာဉ်တရားသစ်က ယေဟောဝါဘုရားသခင်နှင့် အထူးဆက်ဆံရေးတစ်မျိုး ရရှိစေသည်။ ဤပဋိညာဉ်အားဖြင့် လူမျိုးတစ်မျိုးသည် ကိုယ်တော်၏လူမျိုးဖြစ်လာပြီး ကိုယ်တော်သည် သူတို့၏ဘုရားသခင်ဖြစ်လာသည်။ ယေဟောဝါ၏ပညတ်တရားကို သူတို့၏အထဲ၊ သူတို့၏နှလုံးထဲ၌ရေးသွင်းထားပြီး အရေဖျားလှီးခြင်းခံသော ဂျူးမဟုတ်သူများပင် ပဋိညာဉ်သစ်ထဲပါဝင်လာကြပြီး ဘုရားသခင်နှင့်ဆက်ဆံရေးရှိနိုင်ကြသည်။ (ရောမ ၂:၂၉) “နာမတော်အဖို့ လူတစ်မျိုးကိုနုတ်ယူခြင်းငှာ ရှေ့ဦးစွာ လူမျိုးခြားတို့ကို အကြည့်အရှုကြွလာတော်မူ” မည့် ဘုရားသခင့်ရည်ရွယ်ချက်အကြောင်း ကျမ်းရေးသူလုကာကရေးသည်။ (တမန်တော် ၁၅:၁၄) ၁ ပေတရု ၂:၁၀ အရ သူတို့သည် “အထက်ကလူမျိုးမဟုတ်သော်လည်း ယခုတွင် ဘုရားသခင်၏လူမျိုးတော်ဖြစ်ကြ၏။” သမ္မာကျမ်းစာက သူတို့အား “ဘုရားသခင်၏ဣသရေလအမျိုး” တစ်နည်းအားဖြင့် ဝိညာဉ်ရေးဣသရေလအမျိုးဟု ခေါ်ဝေါ်ထားသည်။ (ဂလာတိ ၆:၁၆; ၂ ကောရိန္သု ၁:၂၁) သို့ဖြစ်၍ ပဋိညာဉ်တရားသစ်ဟူသည် ယေဟောဝါနှင့် ဝိညာဉ်ရေးဣသရေလလူမျိုးတို့ စပ်ကြား ဖွဲ့သောပဋိညာဉ်တစ်ခုဖြစ်သည်။
တပည့်များနှင့်အတူရှိသော နောက်ဆုံးညတွင် ယေရှုကိုယ်တော်တိုင် ခြားနားသောပဋိညာဉ်တစ်ခုကို သူတို့နှင့်ဖွဲ့ခဲ့သည်။ သူတို့ကို ကိုယ်တော်ဤသို့ဆို၏– ‘ငါ့ခမည်းတော်သည် နိုင်ငံတစ်ခုအတွက် ငါနှင့်ပဋိညာဉ်ဖွဲ့ထားသည့်နည်းတူ ငါသည် သင်တို့နှင့် ပဋိညာဉ်ဖွဲ့သည်။’ (လုကာ ၂၂:၂၉၊ ကဘ) ဤကား ဘုရားသခင့်နိုင်ငံတော်ပဋိညာဉ်ဖြစ်၏။ မစုံလင်သောလူသား ၁၄၄,၀၀၀ တို့သည် ဘုရားသခင့်နိုင်ငံတော်ပဋိညာဉ်ထဲ ခေါ်ဆောင်ခံရကြသည်။ သူတို့သည် ကောင်းကင်သို့ ရှင်ပြန်ထမြောက်ခံရပြီးနောက် ဘုရင်နှင့် ယဇ်ပုရောဟိတ်များအဖြစ် ခရစ်တော်နှင့်အတူ အုပ်စိုးကြမည်။ (ဗျာ. ၅:၉၊ ၁၀; ၁၄:၁-၄) သို့ဖြင့် ယေဟောဝါဘုရားသခင်နှင့် ပဋိညာဉ်သစ်ဖွဲ့ထားသူများသည် ယေရှုခရစ်နှင့်လည်း ဘုရားသခင့်နိုင်ငံတော်ပဋိညာဉ်ဖွဲ့ထားသူများဖြစ်ကြသည်။ သူတို့သာလျှင် သခင့်ညစာစားပွဲ၏ အထိမ်းအမှတ်များကို သုံးဆောင်ထိုက်ပါသည်။
သတိရအောက်မေ့ပွဲ အထိမ်းအမှတ်များကို စားထိုက်သူများအနေနှင့် မိမိတို့သည် ဘုရားသခင်နှင့် ထူးခြားသောဆက်ဆံရေးရှိပြီး ခရစ်တော်နှင့် တွဲဖက်အမွေခံများဖြစ်ကြောင်း မည်သို့သိရှိကြသနည်း။ ပေါလုဤသို့ရှင်းပြသည်– “ငါတို့သည် ဘုရားသခင်၏သားဖြစ်ကြသည်ဟု [သန့်ရှင်းသော] ဝိညာဉ်တော်သည် ငါတို့၏ဝိညာဉ် [စိတ်သဘော] နှင့်အတူ သက်သေခံတော်မူ၏။ သားမှန်လျှင်အမွေခံ၊ ဘုရားသခင်၏အမွေခံဖြစ်ကြ၏။ ခရစ်တော်နှင့်အတူဘုန်းဝင်စားမည်အကြောင်း၊ ထိုသခင်နှင့်အတူ ဆင်းရဲ ... ကိုခံရလျှင်၊ ထိုသခင်နှင့်ဆက်ဆံသော အမွေခံလည်းဖြစ်ကြ၏။”—ရောမ ၈:၁၆၊ ၁၇။
ဘုရားသခင်သည်ခရစ်တော်၏တွဲဖက်အမွေခံများကို ကိုယ်တော်၏သန့်ရှင်းသောဝိညာဉ်တော် သို့မဟုတ် တက်ကြွလှုပ်ရှားသောစွမ်းအားဖြင့် ခန့်အပ်တော်မူ၏။ ထိုဝိညာဉ်တော်က သူတို့သည် ဘုရားသခင့်နိုင်ငံတော်အမွေခံများဖြစ်ကြောင်း သေချာစေသည်။ ယင်းက ဝိညာဉ်တော်ဖွားခရစ်ယာန်များစိတ်တွင် ကောင်းကင်မျှော်လင့်ချက်ဖြစ်ပေါ်စေသည်။ ကောင်းကင်အသက်တာအကြောင်း ကျမ်းစာဖော်ပြသမျှသည် မိမိတို့နှင့်သက်ဆိုင်သည်ဟု သူတို့ယူမှတ်ကြသည်။ ထို့ပြင် သူတို့သည် မြေကြီးအသက်တာနှင့် လူမှုဆက်ဆံရေးအားလုံးအပါအဝင် မြေကြီးနှင့်ဆိုင်သောအရာဟူသ၍ကို စွန့်လွှတ်ရန်အသင့်ရှိကြသည်။ မြေကြီးပရဒိသုတွင် အသက်ရှင်ရခြင်းသည် နှစ်သက်ပျော်ရွှင်ဖွယ်ကောင်းမည်ကို ဝိညာဉ်တော်ဖွားခရစ်ယာန်တို့ သိရှိထားကြသော်လည်း ယင်းသည် သူတို့၏ မျှော်လင့်ချက်မဟုတ်ပါ။ (လုကာ ၂၃:၄၃) မှားယွင်းသောဘာသာရေးရှုမြင်ချက်ကြောင့်မဟုတ်ဘဲ ဘုရားသခင့်ဝိညာဉ်တော်လှုပ်ရှားမှုကြောင့် သူတို့တွင် မပြောင်းလဲနိုင်သော ကောင်းကင်မျှော်လင့်ချက်ရှိသည့်အတွက် သတိရအောက်မေ့ပွဲအထိမ်းအမှတ်များကို သင့်လျော်စွာ သုံးဆောင်ကြသည်။
တစ်ဦးတစ်ယောက်သည် ပဋိညာဉ်သစ်နှင့် ဘုရားသခင့်နိုင်ငံတော်ပဋိညာဉ်၌ မိမိပါဝင်ကြောင်း မသေမချာဖြစ်သည်ဆိုပါစို့။ မိမိသည် ခရစ်တော်နှင့်တွဲဖက်အမွေခံဖြစ်ကြောင်း ဘုရားသခင့်ဝိညာဉ်တော်၏ သက်သေခံချက်ကိုလည်းမရ ဖြစ်နေလျှင်ကော အသို့နည်း။ သို့ဖြစ်လျှင် သတိရအောက်မေ့ပွဲအထိမ်းအမှတ်များကို သုံးဆောင်ခြင်းသည် မှားပေလိမ့်မည်။ အမှန်မှာ မိမိသည် ကောင်းကင်ဘုရင်၊ ယဇ်ပုရောဟိတ်အဖြစ် အမှန်တကယ် ခေါ်တော်မူခြင်းမခံရကြောင်း သိလျက်နှင့် ခေါ်တော်မူခြင်းခံရသည်ဟုဆိုသူ မည်သူကိုမဆို ဘုရားသခင် နှစ်သက်လိမ့်မည်မဟုတ်ချေ။—ရောမ ၉:၁၆; ဗျာ. ၂၂:၅။
အကြိမ်မည်မျှ ကျင်းပရမည်နည်း
ယေရှု၏သေခြင်းကိုအပတ်စဉ် သို့မဟုတ် နေ့စဉ်ပင် ကျင်းပသင့်သလော။ခရစ်တော်သည် သခင့်ညစာစားပွဲကို စတင်ကျင်းပပြီးနောက် ပသခါပွဲနေ့ဖြစ်သော အီဂျစ်ပြည်ကျွန်ဘဝမှ ဣသရေလလူမျိုးတို့လွတ်မြောက်လာခြင်းကိုအထိမ်းအမှတ်အဖြစ် ကျင်းပသည့်နေ့တွင် ကိုယ်တော် မတရားအသတ်ခံခဲ့ရသည်။ ပသခါပွဲကို နိသန်လ ၁၄ ရက်နေ့တွင် တစ်နှစ်တစ်ကြိမ်သာ ကျင်းပခဲ့ကြသည်။ (ထွက်မြောက်ရာ ၁၂:၆၊ ၁၄; ဝတ်ပြုရာ ၂၃:၅) သို့ဖြစ်၍ “ခရစ်တော်တည်းဟူသော ငါတို့ပသခါသိုးသငယ်” ၏သေခြင်းကို အပတ်စဉ် သို့မဟုတ် နေ့စဉ်မဟုတ်ဘဲ တစ်နှစ်လျှင်တစ်ကြိမ်သာ သတိရအောက်မေ့ပွဲ ကျင်းပသင့်သည်။ (၁ ကောရိန္သု ၅:၇) ခရစ်ယာန်များသည် သခင့်ညစာစားပွဲကို ယေရှုစတင်ကျင်းပခဲ့စဉ်က ပုံစံအတိုင်း ကျင်းပကြသည်။
သို့ဖြစ်လျှင် “သင်တို့သည် ထိုမုန့်ကိုစား၍ ထိုခွက်ကိုသောက်သောအခါခါ အရှင်ဘုရားအသေခံတော်မူခြင်းကို ကြွလာတော်မူသည်တိုင်အောင် ဖော်ပြကြ၏” ဟူသော ပေါလု၏စကားများက ဘာကိုဆိုလိုသနည်း။ (၁ ကောရိန္သု ၁၁:၂၆၊ သမ္မာ) ဤကျမ်းချက်တွင် ပေါလုသည် “အကြိမ်တိုင်း” သို့မဟုတ် “အခါတိုင်း” ဟုအဓိပ္ပာယ်ရှိသောစကားလုံးကို အသုံးပြုခဲ့သည်။ ထို့ကြောင့် ဝိညာဉ်တော်ဖွားခရစ်ယာန်များသည် အထိမ်းအမှတ်များကို သုံးဆောင်သည့်အခါတိုင်း သူတို့သည် ယေရှု၏ရွေးဖိုးပူဇော်ရာယဇ်ကို ယုံကြည်ကြောင်း ကြေညာကြမည်ဟု သူပြောနေခြင်းဖြစ်သည်။
ဝိညာဉ်တော်ဖွားခရစ်ယာန်များသည် ခရစ်တော်၏သေခြင်းကို“ကြွလာတော်မူသည်တိုင်အောင်”ကျင်းပကြပါမည်။ ကိုယ်တော် ‘ရောက်ရှိနေချိန်’အတွင်းဝိညာဉ်အသက်တာသို့ ရှင်ပြန်ထမြောက်စေခြင်းအားဖြင့် မိမိ၏ဝိညာဉ်တော်ဖွားနောက်လိုက်များကို သိမ်းဆည်းရန် ယေရှုရောက်ရှိချိန်တိုင်အောင် ဤပွဲတော်ကို သူတို့ ဆက်ကျင်းပနေကြမည်။ (၁ သက်သာလောနိတ် ၄:၁၄-၁၇) ယင်းသည် တည်ကြည်သောတမန်တော် ၁၁ ပါးအား မိန့်မှာခဲ့သော ခရစ်တော်၏ဤစကားနှင့် ကိုက်ညီပါသည်– “ငါသည်သွား၍ သင်တို့နေစရာအရပ်ကိုပြင်ဆင်ပြီးမှ တစ်ဖန်လာပြန်၍၊ ငါရှိရာအရပ်၌ သင်တို့ရှိစေခြင်းငှာ သင်တို့ကို ငါ့ထံသို့သိမ်းဆည်းမည်။”—ယောဟန် ၁၄:၃။
သင့်အတွက် အဘယ်အဓိပ္ပာယ်ရှိသနည်း
ယေရှု၏ပူဇော်ရာယဇ်မှ အကျိုးခံစားရပြီး မြေကြီးပေါ် ထာဝရအသက်ရရှိရန် သတိရအောက်မေ့ပွဲအထိမ်းအမှတ်များကို သုံးဆောင်ဖို့လိုပါသလော။ မလိုပါ။ ဘုရားသခင်ကိုကြောက်ရွံ့သူများဖြစ်သော နောဧ၊ အာဗြဟံ၊ စာရာ၊ ဣဇာက်၊ ရေဗက္က၊ ယောသပ်၊ မောရှေနှင့် ဒါဝိဒ်တို့သည် မြေကြီးပေါ် ထမြောက်လာကြပြီးနောက် ဤအထိမ်းအမှတ်များကို သုံးဆောင်ကြလိမ့်မည်ဟု သမ္မာကျမ်းစာတွင် အဘယ်နေရာ၌မျှ မတွေ့ရပါ။ သို့သော် သူတို့နှင့် မြေကြီးပေါ် အဆုံးမဲ့အသက် ခံစားလိုသူအားလုံးတို့သည် ဘုရားသခင်နှင့် ခရစ်တော်ကိုလည်းကောင်း၊ ယေဟောဝါပြင်ဆင်ပေးသော ရွေးနုတ်ဖိုးပူဇော်ရာယဇ်ကိုလည်းကောင်း ယုံကြည်ကြောင်းတင်ပြရကြမည်။ (ယောဟန် ၃:၃၆; ၁၄:၁) ထာဝရအသက်ရရှိဖို့ အသင်လည်း ထိုသို့သောယုံကြည်ခြင်းကို တင်ပြရမည်။ ခရစ်တော်၏သေခြင်းကို နှစ်ပတ်လည်ကျင်းပချိန်၌ သင်ရောက်ရှိနေခြင်းက ထိုကြီးမြတ်သောပူဇော်ရာယဇ်ကို သတိရစေပြီး ယင်းကို ကျေးဇူးတင်လေးမြတ်စိတ် တိုးစေသင့်သည်။
တမန်တော်ယောဟန်က ‘သင်တို့ [ဝိညာဉ်တော်ဖွားရောင်းရင်းများ] သည် မကောင်းမှုကိုမပြုစေခြင်းငှာ ဤအရာများကို သင်တို့အားငါရေး၍ပေးလိုက်၏။ တစ်စုံတစ်ယောက်သောသူသည် မကောင်းမှုကိုပြုမိလျှင်၊ ဖြောင့်မတ်တော်မူသောအရှင်ယေရှုခရစ်တည်းဟူသော ငါတို့အမှုဆောင်သခင်သည် ခမည်းတော်ထံ၌ရှိတော်မူ၏။ ထိုသခင်သည် ငါတို့၏အပြစ်မက၊ လောကသားအပေါင်းတို့၏ အပြစ်ဖြေစရာအကြောင်းဖြစ်တော်မူ၏’ ဟုဆိုသောအခါ ယေရှု၏ပူဇော်ရာယဇ်အရေးပါမှုကို အလေးပေးဖော်ပြခဲ့သည်။ (၁ယောဟန် ၂:၁၊ ၂) ယေရှု၏ပူဇော်ရာယဇ်သည် မိမိတို့၏အပြစ်ဖြေစရာအကြောင်းဖြစ်သည်ဟု ဝိညာဉ်တော်ဖွားများ ဆိုနိုင်ပါသည်။ သို့ရာတွင် ကိုယ်တော်သည် တစ်လောကလုံး၏အပြစ်အတွက် ပူဇော်ရာယဇ်လည်းဖြစ်သဖြင့် နာခံမှုရှိသူများကို ထာဝရအသက်ရစေနိုင်ပါသည်!
၂၀၀၄၊ ဧပြီလ ၄ ရက်နေ့တွင် ယေရှု၏သေခြင်းကို သတိရအောက်မေ့ပွဲကျင်းပသောအခါ သင်တက်ရောက်မည်လော။ ကမ္ဘာတစ်ဝန်းရှိ ယေဟောဝါသက်သေများ၏ အစည်းအဝေးကျင်းပရာ နေရာများ၌ ထိုပွဲတော်ကို ကျင်းပကြပါမည်။ အသင်သည် ထိုပွဲတော်ကိုတက်ရောက်ပါက အလွန်အရေးကြီးသော ကျမ်းစာဟောပြောချက်မှ အကျိုးခံစားရပါလိမ့်မည်။ ယေဟောဝါဘုရားသခင်နှင့် ယေရှုခရစ်တို့သည် ကျွန်ုပ်တို့အတွက် မည်မျှလုပ်ဆောင်ပေးခဲ့ကြကြောင်း ပြန်သတိရစေပါလိမ့်မည်။ ဘုရားသခင်နှင့် ခရစ်တော်ကိုလည်းကောင်း၊ ယေရှု၏ရွေးနုတ်ဖိုးပူဇော်ရာယဇ်ကိုလည်းကောင်း အလွန်ရိုသေလေးမြတ်သူတို့နှင့်အတူ စည်းဝေးခြင်းကလည်း ဝိညာဉ်ရေးဘက် အကျိုးဖြစ်ထွန်းစေပါလိမ့်မည်။ ဘုရားသခင်၏မခံစားထိုက်သောကြင်နာမှုကို ခံစားရသဖြင့် ထာဝရအသက်ရမည့်သူတစ်ဦးဖြစ်လိုသောဆန္ဒကိုလည်း ယင်းက တိုးပွားခိုင်ခံ့စေနိုင်သည်။ ထိုအခါသမယကို တက်ရောက်ရန် မည်သည့်အရာကမျှ မဟန့်တားပါစေနှင့်။ ကျွန်ုပ်တို့၏ကောင်းကင်ခမည်းတော်၊ ယေဟောဝါဘုရားသခင်ကို ဂုဏ်တင်ချီးမြှောက်ပြီး စိတ်တော်နှင့်တွေ့စေသော ဤကြည်နူးအားရဖွယ် အထိမ်းအမှတ်ပွဲကို တက်ရောက်ကြည့်ပါ။
[စာမျက်နှာ ၅ ပါ ရုပ်ပုံ]
ယေရှု၏သေခြင်းသည် အကြီးမားဆုံး မေတ္တာဖော်ပြချက်နှစ်ရပ်နှင့် ဆက်စပ်နေ
[စာမျက်နှာ ၆ ပါ ရုပ်ပုံ]
တဆေးမဲ့မုန့်နှင့် စပျစ်ဝိုင်တို့သည် ယေရှု ၏အပြစ်မဲ့ကိုယ်ခန္ဓာနှင့် သွန်းတော် မူခဲ့သောအသွေးတော်တို့၏ ဆီလျော်သောအထိမ်းအမှတ်များဖြစ်