“ဧဝံဂေလိဟောပြောသူတစ်ဦး ဆောင်ရွက်ရသောအမှုကို ဆောင်ရွက်လော့”
“ဧဝံဂေလိဟောပြောသူတစ်ဦး ဆောင်ရွက်ရသောအမှုကို ဆောင်ရွက်လော့”
‘အရာရာ၌ ကောင်းသောသတိရှိစေလော့။ ... ဧဝံဂေလိဟောပြောသူတစ်ဦး ဆောင်ရွက်ရသောအမှုကို ဆောင်ရွက်လော့။’—၂ တိမောသေ ၄:၅။
၁။ ယေရှုသည် မိမိ၏နောက်လိုက်များအား အဘယ်တာဝန်ပေးခဲ့သနည်း။
ယေဟောဝါ၏နာမတော်နှင့် ရည်ရွယ်တော်မူချက်တို့ကို ကမ္ဘာတစ်ဝန်း ကြေညာလျက်ရှိ၏။ ဤသို့ဖြစ်ရခြင်းမှာ ဘုရားသခင်ထံ ဆက်ကပ်အပ်နှံထားသည့်လူမျိုးသည် “သွား၍ လူမျိုးတကာတို့ကို ငါ့တပည့်ဖြစ်စေလျက် ခမည်းတော်၊ သားတော်နှင့် သန့်ရှင်းသောဝိညာဉ်တော်၏နာမ၌ [နှစ်ခြင်း]ပေးကြလော့။ သင်တို့အား ငါပေးသမျှသော ပညတ်တော်တို့ကို စောင့်ရှောက်စေခြင်းငှာ ဆုံးမ ... ပေးကြလော့” ဟူသော မိမိ၏နောက်လိုက်များအား ယေရှုပေးခဲ့သည့်တာဝန်ကို နှလုံးထဲစွဲမှတ်ထားကြ၍ဖြစ်သည်။—မဿဲ ၂၈:၁၉၊ ၂၀။
၂။ ကြီးကြပ်မှူးတိမောသေသည် အဘယ်ညွှန်ကြားချက်ကို လက်ခံရရှိခဲ့သနည်း၊ မျက်မှောက်ခေတ် ခရစ်ယာန်ကြီးကြပ်မှူးများသည် ခရစ်ယာန်ဓမ္မအမှုတွင် မည်သို့ဦးဆောင်နိုင်ကြသနည်း။
၂ ယေရှု၏ပထမရာစု တပည့်နောက်လိုက်များသည် ထိုတာဝန်ကို အလေးအနက်သဘောထားခဲ့ကြသည်။ ဥပမာအနေနှင့်၊ မိမိ၏ခရစ်ယာန်ချင်း ကြီးကြပ်မှူးဖြစ်သူ တိမောသေအား တမန်တော်ပေါလုက ‘ဧဝံဂေလိဟောပြောသူတစ်ဦး ဆောင်ရွက်ရသောအမှုကို ဆောင်ရွက်လော့၊ သင်၏ခရစ်ယာန်ဓမ္မအမှုကို အပြည့်အဝကျေပွန်စေလော့’ ဟု တိုက်တွန်းခဲ့၏။ (၂ တိမောသေ ၄:၅၊ ကဘ) မျက်မှောက်ခေတ်တွင် ကြီးကြပ်မှူးတစ်ဦး မိမိ၏ခရစ်ယာန်ဓမ္မအမှုကို ကျေပွန်စေသည့် နည်းတစ်နည်းမှာ လယ်ကွင်းဓမ္မအမှုတွင် မှန်မှန်ပါဝင်သူဖြစ်ခြင်း၊ စိတ်အားထက်သန်သည့် ဘုရားသခင့်နိုင်ငံတော်ကြွေးကြော်သူတစ်ဦးဖြစ်ခြင်းအားဖြင့် ဖြစ်သည်။ ဥပမာ၊ အသင်းတော်စာအုပ်ကြီးသင်တန်း ကြီးကြပ်မှူးတွင် ဟောပြောခြင်းလုပ်ငန်း၌ အခြားသူများအား ဦးဆောင်လေ့ကျင့်ပေးရသည့် ကျေနပ်နှစ်သိမ့်မှုဖြစ်စေသော အခွင့်ထူးရှိသည်။ ပေါလုသည် မိမိ၏တာဝန်ဖြစ်သော သတင်းကောင်းကြေညာခြင်းကို ကျေပွန်အောင်ဆောင်ရွက်ခဲ့ပြီး အခြားသူတို့ကို ခရစ်ယာန်ဓမ္မအမှုအတွက် လေ့ကျင့်ပေးခဲ့လေသည်။—တမန်တော် ၂၀:၂၀; ၁ ကောရိန္သု ၉:၁၆၊ ၁၇။
အထက်ကာလ စိတ်အားထက်သန်သော ဧဝံဂေလိဟောပြောသူများ
၃၊ ၄။ ဧဝံဂေလိဟောပြောသူတစ်ဦးအနေနှင့် ဖိလိပ္ပုတွင် အဘယ်တွေ့ကြုံမှုများ ရှိခဲ့သနည်း။
၃ အစောပိုင်းခရစ်ယာန်တို့သည် စိတ်အားထက်သန်သော ဧဝံဂေလိဟောပြောသူများအဖြစ် လူသိများခဲ့ကြသည်။ ဧဝံဂေလိဆရာဖိလိပ္ပုကို သုံးသပ်ကြည့်ပါ။ သူသည် ယေရုရှလင်မြို့ရှိ ဂရိဘာသာစကားနှင့် ဟေဗြဲဘာသာစကားပြောသော ခရစ်ယာန်မုဆိုးမများအား အစားအသောက်ကို မျက်နှာမလိုက်ဘဲ နေ့စဉ်ဝေငှပေးရန် ရွေးချယ်ခံရသည့် “ဝိညာဉ်တော်နှင့်လည်းကောင်း၊ ပညာနှင့်လည်းကောင်းပြည့်စုံလျက် အသရေရှိသော လူခုနစ်ယောက်” တွင် တစ်ဦးဖြစ်သည်။ (တမန်တော် ၆:၁-၆) ထိုအထူးတာဝန် ပြီးဆုံးသွားပြီးနောက်ပိုင်း နှိပ်စက်ညှဉ်းပန်းမှုကြောင့် တမန်တော်များမှတစ်ပါး ကျန်ခရစ်ယာန်အားလုံး ကစဉ့်ကရဲထွက်ပြေးခဲ့ကြရာ ဖိလိပ္ပုသည် ရှမာရိနယ်သို့သွားခဲ့၏။ ထိုတွင် သူသည် သတင်းကောင်းကြေညာခဲ့ပြီး သန့်ရှင်းသောဝိညာဉ်တော်၏ အစွမ်းတန်ခိုးဖြင့် နတ်ဆိုးများကို နှင်ထုတ်ကာ ခြေကျိုးသူနှင့် လေဖြတ်သူတို့ကို ကုသပေးလေသည်။ များစွာသော ရှမာရိလူတို့သည် ဘုရားသခင့်နိုင်ငံတော်သတင်းတရားကို လက်ခံကာ နှစ်ခြင်းခံခဲ့ကြသည်။ ယင်းအကြောင်းကြားသိသွားသော ယေရုရှလင်မြို့ရှိ တမန်တော်တို့သည် အဆိုပါနှစ်ခြင်းခံခါစယုံကြည်သူများ သန့်ရှင်းသောဝိညာဉ်တော်ရရန်အလို့ငှာ တမန်တော်ပေတရုနှင့် ယောဟန်တို့ကို ရှမာရိနယ်သို့ စေလွှတ်လိုက်ကြ၏။—တမန်တော် ၈:၄-၁၇။
၄ တစ်ဖန် ဘုရားသခင့်ဝိညာဉ်တော်သည် ဖိလိပ္ပုအား ဂါဇမြို့သို့သွားရာလမ်းပေါ်တွင် အဲသယောပိအမတ်နှင့် တွေ့ဆုံစေခဲ့သည်။ ဟေရှာယပရောဖက်ပြုချက်နှင့်ပတ်သက်၍ ဖိလိပ္ပု ရှင်းရှင်းလင်းလင်း ရှင်းပြပေးပြီးနောက် ဤ “အဲသယောပိပြည်ကိုအစိုးရသော ကန္ဒက်ဘုရင်မထံ၌ ဘုန်းကြီးသောအမတ်” သည် ယေရှုခရစ်ကို ယုံကြည်လာကာ နှစ်ခြင်းခံခဲ့လေသည်။ (တမန်တော် ၈:၂၆-၃၈၊ သမ္မာ) ထို့နောက် ဖိလိပ္ပုသည် အာဇုတ်မြို့သို့ထွက်သွားပြီး ထိုမြို့မှ ကဲသရိမြို့တိုင်အောင် “မြို့ရွာအစဉ်အတိုင်းလျှောက်သွား၍ ဧဝံဂေလိတရားကိုဟောလေ၏။” (တမန်တော် ၈:၃၉၊ ၄၀) သူသည် ဧဝံဂေလိဟောပြောသူတစ်ဦး ဆောင်ရွက်ရသောအမှုကို ဆောင်ရွက်ရာတွင် ပုံသက်သေကောင်း အမှန်ချမှတ်ပေးခဲ့၏!
၅။ ဖိလိပ္ပု၏သမီးကညာလေးဦးသည် အထူးသဖြင့် အဘယ်အတွက်နှင့် လူသိများခဲ့ကြသနည်း။
၅ ဖိလိပ္ပုသည် ကဲသရိမြို့တွင် နောက် အနှစ် ၂၀ ခန့်အထိ ခရစ်ယာန်ဓမ္မအမှုတွင် တက်တက်ကြွကြွ ပါဝင်နေဆဲဖြစ်၏။ သူ၏အိမ်၌ ပေါလုနှင့်လုကာတို့နေထိုင်ခဲ့ချိန်က သူ့တွင် “ပရောဖက်ပြုသော သမီးကညာလေးယောက်ရှိ၏။” (တမန်တော် ၂၁:၈-၁၀) သူတို့သည် ဝိညာဉ်ရေးအရ ကောင်းစွာလေ့ကျင့်ပေးခြင်းခံခဲ့ရကာ ခရစ်ယာန်ဓမ္မအမှုအတွက် စိတ်အားထက်သန်ခဲ့ကြပြီး ပရောဖက်ပြုရသည့်အခွင့်ထူးကိုပင် ခံစားခဲ့ရ၏။ ယနေ့ မိဘများ ခရစ်ယာန်ဓမ္မအမှုအတွက် စိတ်အားထက်သန်ခြင်းသည် သားသမီးများအပေါ် ကောင်းစွာအကျိုးသက်ရောက်နိုင်ပြီး ထက်ထက်သန်သန် ဧဝံဂေလိဟောပြောခြင်းကို သူတို့၏ဘဝတစ်သက်တာ လုပ်ငန်းဖြစ်စေရန် လှုံ့ဆော်ပေးသည်။
ယနေ့ခေတ် စိတ်အားထက်သန်သော ဧဝံဂေလိဟောပြောသူများ
၆။ ပထမရာစုဧဝံဂေလိဟောပြောသူများသည် အဘယ်အောင်မြင်မှုရရှိခဲ့ကြသနည်း။
၆ ကျွန်ုပ်တို့၏ခေတ်နှင့် ဆုံးခန်းချိန်ကိုညွှန်ပြသည့် မိမိ၏အရေးကြီးသောပရောဖက်ပြုချက်တွင် ယေရှုခရစ်က “ဧဝံဂေလိတရားကို ရှေးဦးစွာ လူမျိုးအပေါင်းတို့အား ဟောရလိမ့်မည်” ဟုကြေညာခဲ့၏။ (မာကု ၁၃:၁၀) သတင်းကောင်းကို “လော[က]နိုင်ငံအရပ်ရပ်ရှိသမျှတို့၌” ဟောပြောပြီးနောက် အဆုံးရောက်လာမည်။ (မဿဲ ၂၄:၁၄) ပေါလုနှင့် အခြားသော ပထမရာစု ဧဝံဂေလိဟောပြောသူတို့သည် ဤသတင်းကောင်းကြွေးကြော်ခဲ့ကြသည့်အတွက် လူအများ ယုံကြည်သူများဖြစ်လာခဲ့ကြရာ ရောမအင်ပါယာတစ်လျှောက်တွင် တစ်နေရာပြီး တစ်နေရာ အသင်းတော်များ ဖွဲ့စည်းတည်ထောင်ခဲ့ရ၏။ အဆိုပါအသင်းတော်များတွင် အမှုထမ်းဆောင်ရန် ခန့်အပ်ခံရသည့် အကြီးအကဲများသည် ညီအစ်ကိုညီအစ်မများနှင့်အတူ ဧဝံဂေလိလုပ်ငန်း၌ ပါဝင်ခဲ့ကြပြီး ဟောပြောခြင်းလုပ်ငန်းကို နေရာအနှံ့ တိုးချဲ့ခဲ့ကြသည်။ ထိုအချိန်က ယေဟောဝါ၏စကားတော်သည် ဆက်၍တိုးပွားပျံ့နှံ့ခဲ့သကဲ့သို့ ယနေ့လည်း သန်းနှင့်ချီသော ယေဟောဝါသက်သေများသည် ဧဝံဂေလိဟောပြောသူများ ဆောင်ရွက်သောလုပ်ငန်းကို လုပ်ဆောင်နေကြသောကြောင့် ထပ်တူတိုးပွားပျံ့နှံ့နေ၏။ (တမန်တော် ၁၉:၂၀) ယေဟောဝါ၏ အဆိုပါပျော်ရွှင်သော ချီးမွမ်းသူများတွင် တစ်ဦးအဖြစ် သင်ရပ်တည်နေပြီလော။
၇။ ယနေ့ဘုရားသခင့်နိုင်ငံတော်ကြွေးကြော်သူများအဘယ်အရာကို လုပ်ဆောင်နေကြသနည်း။
၇ မျက်မှောက်ခေတ် ဘုရားသခင့်နိုင်ငံတော် ကြွေးကြော်သူများစွာတို့သည် ဧဝံဂေလိဟောပြောခြင်းလုပ်ငန်း၌ တိုးချဲ့ပါဝင်ရန် အခွင့်အရေးများရှာယူနေကြသည်။ ခရစ်ယာန်သာသနာပြုလယ်ကွင်းတွင် ထောင်နှင့်ချီ၍ ပါဝင်ခဲ့ကြပြီး သိန်းသောင်းမကသောသူတို့သည် ရှေ့ဆောင်များအဖြစ် အချိန်ပြည့် ဧဝံဂေလိဟောပြောခြင်းလုပ်ငန်းတွင် ပါဝင်နေကြသည်။ အလွန်ပင်မွန်မြတ်သောလုပ်ငန်းကို စိတ်အားထက်သန်သော ဘုရားသခင့်နိုင်ငံတော်ကြွေးကြော်သူများအဖြစ် အမှုဆောင်နေကြသည့် အမျိုးသားများ၊ အမျိုးသမီးများနှင့် ကလေးသူငယ်များ လုပ်ဆောင်နေကြသည်တကား! ယေဟောဝါ၏လူမျိုးတော်အားလုံးတို့သည် ခရစ်ယာန်ဧဝံဂေလိဟောပြောသူများအဖြစ် ကိုယ်တော်၏အမှုတော်ကို ပခုံးချင်းယှဉ်၍ ထမ်းဆောင်ကြသည်နှင့်အမျှ ကိုယ်တော်၏ကြွယ်ဝသော ကောင်းချီးကို အမှန်ပင် ခံစားနေကြရသည်။—ဇေဖနိ ၃:၉။
၈။ ယနေ့ အဘယ်အမှတ်ရေးထိုးခြင်းလုပ်ငန်းကို ဆောင်ရွက်လျက်ရှိပြီး မည်သူတို့အားဖြင့်နည်း။
၈ ဘုရားသခင်သည် ယေရှု၏ ဝိညာဉ်တော်ဖွားနောက်လိုက်များအား ကမ္ဘာအနှံ့ သတင်းကောင်းကြွေးကြော်ရန် တာဝန်ပေးထားတော်မူ၏။ ဤဧဝံဂေလိဟောပြောခြင်းလုပ်ငန်းတွင် သူတို့ကိုကူညီပေးလျက်ရှိသည့် ခရစ်တော်၏ “အခြားသိုး” အရေအတွက်သည် တိုးပွားများပြားလာနေသည်။ (ယောဟန် ၁၀:၁၆) ပရောဖက်ပြုချက်အရ ဤအသက်ကယ်ဆယ်သည့်လုပ်ငန်းသည် ယခုဖြစ်ပျက်လျက်ရှိသည့် စက်ဆုပ်ရွံရှာဖွယ်အမှုတို့ကြောင့် ညည်းတွားငိုကြွေးသောသူတို့၏နဖူးပေါ်တွင် အမှတ်ရေးထိုးနေခြင်းနှင့်တူကြောင်း ဖော်ပြထားသည်။ မကြာမီ ဆိုးယုတ်သူများ ဖျက်ဆီးခံရတော့မည်။ ဤအတောအတွင်း ကမ္ဘာသူကမ္ဘာသားများထံ အသက်ကယ်ဆယ်သည့် အမှန်တရားယူဆောင်ပေးရခြင်းသည် အခွင့်ထူးဖြစ်ပေသည်!—ယေဇကျေလ ၉:၄-၆၊ ၁၁။
၉။ ခရစ်ယာန်ဓမ္မအမှုတွင် လူသစ်များသည် မည်သို့အကူအညီရနိုင်သနည်း။
၉ ကျွန်ုပ်တို့သည် ဧဝံဂေလိဟောပြောခြင်းလုပ်ငန်းတွင် အတန်ကြာ ပါဝင်လုပ်ဆောင်ခဲ့ပြီဆိုလျှင် အသင်းတော်ရှိ လူသစ်များကို တစ်စုံတစ်ရာ အကူအညီပေးနိုင်ဖို့ အကြောင်းများသည်။ တစ်ခါတစ်ရံ ခရစ်ယာန်ဓမ္မအမှုတွင် သူတို့ကို ကျွန်ုပ်တို့နှင့်အတူ လိုက်ပါစေနိုင်မည်။ အကြီးအကဲများအဖြစ် အမှုထမ်းနေကြသူတို့သည် သူတို့တတ်နိုင်သလောက် ယုံကြည်သူချင်းများကို ဝိညာဉ်ရေးအရ တည်ဆောက်ပေးလိုကြမည်။ နှိမ့်ချသောကြီးကြပ်မှူးများ၏ ကြိုးပမ်းအားထုတ်မှုကောင်းများက အခြားသူများအား စိတ်ထက်သန်ပြီး အသီးသီးသော ဧဝံဂေလိဟောပြောသူများဖြစ်ကြရန် များစွာအကူအညီဖြစ်စေနိုင်သည်။—၂ ပေတရု ၁:၅-၈။
တစ်အိမ်မှတစ်အိမ် သက်သေခံခြင်း
၁၀။ ခရစ်တော်နှင့် ကိုယ်တော်၏အစောပိုင်းနောက်လိုက်များသည် ခရစ်ယာန်ဓမ္မအမှုတွင် အဘယ်စံနမူနာချမှတ်ခဲ့ကြသနည်း။
၁၀ ယေရှုခရစ်သည် မိမိ၏နောက်လိုက်များအတွက် ဧဝံဂေလိဟောပြောသူတစ်ဦးအဖြစ် အလွန်ကောင်းသောပုံသက်သေ ချမှတ်ပေးခဲ့၏။ ခရစ်တော်နှင့် သူ၏တမန်တော်များလုပ်ဆောင်ခဲ့သည့် ခရစ်ယာန်ဓမ္မအမှုနှင့်စပ်လျဉ်း၍ ဘုရားသခင့်နှုတ်မြွက်စကားတော်က ဤသို့ဆိုသည်– ‘ကိုယ်တော်သည် မြို့ရွာအစဉ်အတိုင်း ဒေသစာရီလှည့်လည်၍ ဘုရားသခင်၏နိုင်ငံတော်နှင့်ယှဉ်သော ဧဝံဂေလိတရားကို ဟောတော်မူ၏။ တစ်ကျိပ်နှစ်ပါးသောတပည့်တော်တို့သည် နောက်တော်သို့လိုက်ကြ၏။’ (လုကာ ၈:၁၊ ၂) တမန်တော်များကိုယ်တိုင်နှင့်ပတ်သက်၍ကော အသို့နည်း။ စီ.အီး. ၃၃ ပင်တေကုတ္တေပွဲနေ့တွင် သန့်ရှင်းသောဝိညာဉ်တော်သွန်းလောင်းပြီးနောက် “[ဝတ်ပြုရာအိမ်]တော်၌လည်းကောင်း၊ အိမ်များ[“တစ်အိမ်မှတစ်အိမ်၊” ကဘ]၌လည်းကောင်း၊ နေ့တိုင်းအစဉ် ဆုံးမသွန်သင်လျက်၊ ယေရှုသည် ခရစ်တော်ဖြစ်၏ဟူ၍ ဧဝံဂေလိတရားကို မပြတ်ဟောပြောလျက်နေကြ၏။”—တမန်တော် ၅:၄၂။
၁၁။ တမန်တော် ၂၀:၂၀၊ ၂၁ အရ တမန်တော်ပေါလုသည် မိမိ၏ခရစ်ယာန်ဓမ္မအမှုတွင် အဘယ်အမှုပြုခဲ့သနည်း။
၁၁ ဧဝံဂေလိဟောပြောခြင်းလုပ်ငန်းတွင် သူစိတ်ထက်သန်သောကြောင့် ဧဖက်မြို့မှ ခရစ်ယာန်အကြီးအကဲများကို တမန်တော်ပေါလုက “သင်တို့အကျိုးပြုစုရာတစ်စုံတစ်ခုကိုမျှ ငါမထိမ်မဝှက်။ လူစုဝေးရာ၌လည်းကောင်း၊ အိမ်များ[“တစ်အိမ်မှတစ်အိမ်၊” ကဘ]၌ လည်းကောင်း သင်တို့အားဟောပြော၍ ဆုံးမသွန်သင်” ပေးခဲ့သည်ဟု ပြောဆိုနိုင်ခဲ့၏။ ပေါလုသည် ‘တစ်အိမ်မှတစ်အိမ်၌ ဆုံးမသွန်သင်ပေး’ သည်ဟုဆိုရာတွင် ယေဟောဝါအား ဝတ်ပြုသူချင်းများ၏အိမ်များကို သူလည်ပတ်၍ ယုံကြည်သူများထံ သိုးထိန်းလည်ပတ်မှုများ ပြုလုပ်နေခြင်းလော။ မဟုတ်ပါ၊ အကြောင်းရင်းကို သူဤသို့ဆက်ရှင်းပြသည်– “ဘုရားသခင့်ရှေ့တော်၌ နောင်တရခြင်းတရားကိုလည်းကောင်း၊ ငါတို့သခင်ယေရှုခရစ်ကို ယုံကြည်ခြင်းတရားကိုလည်းကောင်း ယုဒလူ၊ ဟေလသလူတို့အားသက်သေခံသည်။” (တမန်တော် ၂၀:၂၀၊ ၂၁) ယေဘုယျအားဖြင့် ယေဟောဝါထံ ဆက်ကပ်အပ်နှံထားပြီးသူတို့သည် ‘ဘုရားသခင့်ရှေ့တော်၌ နောင်တရခြင်းနှင့် ငါတို့သခင်ယေရှုခရစ်ကို ယုံကြည်ခြင်း’ နှင့်ပတ်သက်၍ သွန်သင်ခံဖို့မလိုချေ။ နောင်တရခြင်း၊ ယုံကြည်ခြင်းနှင့်ပတ်သက်၍ မယုံကြည်သူများကို ပေါလုသွန်သင်ဆုံးမပေးစဉ် ဧဖက်မြို့မှ ခရစ်ယာန်အကြီးအကဲများကို တစ်အိမ်မှတစ်အိမ်ခရစ်ယာန်ဓမ္မအမှုတွင် လေ့ကျင့်သင်ကြားပေးခဲ့သည်။ ယင်းသို့လုပ်ဆောင်ခြင်းဖြင့် ယေရှုချမှတ်ခဲ့သည့် နည်းစနစ်ကို ပေါလုအတုယူခဲ့၏။
၁၂၊ ၁၃။ ဖိလိပ္ပိ ၁:၇ ပါစကားနှင့်အညီ ယေဟောဝါ၏လူမျိုးတော်သည် မိမိတို့၏ဟောပြောခြင်း အခွင့်အရာနှင့်ပတ်သက်၍ အဘယ်အရာလုပ်ဆောင်ခဲ့ပြီနည်း။
၁၂ တစ်အိမ်မှတစ်အိမ်ခရစ်ယာန်ဓမ္မအမှုသည် စိန်ခေါ်ချက်ဖြစ်နိုင်သည်။ ဥပမာ၊ လူအချို့သည် ကျမ်းစာသတင်းတရားကို သူတို့အိမ်ဝတွင် သွားပြောပြသည့်အခါ စိတ်အနှောင့်အယှက်ဖြစ်သွားကြ၏။ ကျွန်ုပ်တို့သည် လူတို့ကို စိတ်အနှောင့်အယှက်ဖြစ်စေဖို့ မရည်ရွယ်ပါ။ သို့တိုင်၊ တစ်အိမ်မှတစ်အိမ်ခရစ်ယာန်ဓမ္မအမှုသည် ကျမ်းပေးတာဝန်ဖြစ်ပြီး ဘုရားသခင်နှင့် အိမ်နီးချင်းကိုချစ်သည့်မေတ္တာက ဤနည်းလမ်းဖြင့် သက်သေခံရန် ကျွန်ုပ်တို့အား လှုံ့ဆော်ပေးသည်။ (မာကု ၁၂:၂၈-၃၁) ကျွန်ုပ်တို့၏ တစ်အိမ်မှတစ်အိမ်ဟောပြောခွင့်ကို တရားဥပဒေနှင့်အညီဖြစ်စေရန် အမေရိကန်ပြည်ထောင်စုရှိ တရားရုံးချုပ်အပါအဝင် တရားရုံးများတွင် တရားရင်ဆိုင်ခဲ့ကြရသည်။ (ဖိလိပ္ပိ ၁:၇) တရားရုံးသည် အမြဲလိုလို ကျွန်ုပ်တို့ဘက်မှ ဆုံးဖြတ်ပေးခဲ့ကြသည်။ အောက်ပါဆုံးဖြတ်ချက်က စံနမူနာဖြစ်သည်–
၁၃ “ခရစ်ယာန်ဘာသာရေးဝေစာများကို လက်ကမ်းဝေငှခြင်းသည် စာပုံနှိပ်လုပ်ငန်းများ၏ သမိုင်းသက်တမ်းတမျှ ရှေးကျလှသော ခရစ်ယာန်သာသနာပြုဧဝံဂေလိဟောပြောခြင်း၏ ရှေးရိုးပုံစံတစ်ခုဖြစ်၏။ ယင်းသည် နှစ်များတစ်လျှောက် ခရစ်ယာန်ဘာသာရေးလှုပ်ရှားမှုအမျိုးမျိုးတွင် ဩဇာကြီးမားသည့် စွမ်းအားတစ်ခုဖြစ်လာခဲ့သည်။ ဤဧဝံဂေလိဟောပြောခြင်းပုံစံကို ယနေ့လည်း အသုံးပြုနေသည်၊ ခရစ်ယာန်ဘာသာရေးဂိုဏ်းဂဏအမျိုးမျိုးမှ ကော်လ်ပိုတာများသည် ဝမ်းမြောက်ဖွယ်သတင်းတရားကို ထောင်သောင်းမကသောအိမ်များသို့ ယူဆောင်လာခဲ့ကြပြီး ၎င်းတို့၏ယုံကြည်ခြင်းကို သက်ဝင်ယုံကြည်စေရန် ကိုယ်တိုင်လည်ပတ်မှုများပြုခြင်းဖြင့် ကြိုးစားအားထုတ်ကြသည်။ ... ဤခရစ်ယာန်ဘာသာရေးလှုပ်ရှားမှုပုံစံသည် ချာ့ခ်ျဝတ်ပြုရေးနှင့် တရားဟောစင်များမှ ဟောပြောရေးတို့နည်းတူ [ယူနိုက်တက်စတိတ်အခြေခံဥပဒေနှင့်အညီ] ပထမပြင်ဆင်ချက်အောက်ရှိ မြင့်မားသော ဥပဒေဘောင်နှင့် အံဝင်၏။”—မားဒေါ့ခ် ဗွီ. ပဲန်စယ်လ်ဗေးနီးယား၊ ၁၉၄၃။
အဘယ်ကြောင့် ဆက်ဟောပြောရသနည်း
၁၄။ ခရစ်ယာန်ဓမ္မအမှု၏ထိရောက်မှုသည် အဘယ်သို့ ဆင့်ကဲဆင့်ကဲတိုးလာနိုင်သနည်း။
၁၄ တစ်အိမ်မှတစ်အိမ်သက်သေခံရသည့် အကြောင်းရင်းများစွာရှိပါသည်။ အိမ်ရှင်တစ်ဦးထံ ကျွန်ုပ်တို့စသွားသည့်အချိန်တိုင်း ကျမ်းစာအမှန်တရားမျိုးစေ့ချပေးရန် ကြိုးစားကြသည်။ ပြန်လည်ပတ်မှုများပြုလုပ်ခြင်းအားဖြင့် ယင်းမျိုးစေ့ကို ရေလောင်းပေးရန် ကျွန်ုပ်တို့ကြိုးစားကြသည်။ ထို့ပြင် “ငါသည် စိုက်ပျိုးသောသူဖြစ်၏။ အာပေါလုသည် ရေလောင်းသောသူဖြစ်၏။ အပင်ကိုကြီးပွားစေသောသူကား ဘုရားသခင်ပေတည်း” ဟု ပေါလုရေးသားခဲ့ရာ ထိရောက်မှုသည် ဆင့်ကဲဆင့်ကဲ ကောင်းစွာတိုးလာနိုင်သည်။ (၁ ကောရိန္သု ၃:၆) ထို့ကြောင့် ကျွန်ုပ်တို့သည် ဆက်လက်၍ ‘ရေလောင်းစိုက်ပျိုး’ ကြကာ ယေဟောဝါသည် ‘ကြီးထွားစေမည်’ ဖြစ်ကြောင်းကို ယုံကြည်စိတ်ချကြပါစို့။
၁၅၊ ၁၆။ လူတို့၏အိမ်များသို့ ကျွန်ုပ်တို့အဘယ်ကြောင့် ထပ်ခါတလဲလဲ လည်ပတ်ကြသနည်း။
၁၅ သေရေးရှင်ရေးကိစ္စဖြစ်နေသည့်အတွက် ဧဝံဂေလိဟောပြောသူတို့ ဆောင်ရွက်ရသောအမှုကို ကျွန်ုပ်တို့ဆောင်ရွက်ကြသည်။ ဟောပြောခြင်းအားဖြင့် ကျွန်ုပ်တို့ကိုယ်တိုင်နှင့် ကျွန်ုပ်တို့စကားကိုနားထောင်သူတို့၏အသက်ကို ကယ်ပေးနိုင်သည်။ (၁ တိမောသေ ၄:၁၆) လူတစ်ဦး၏အသက်သည် အန္တရာယ်ကျရောက်နေကြောင်း ကျွန်ုပ်တို့သိထားမည်ဆိုလျှင် ထိုသူအား မကူညီချင်သလို၊ ကူညီချင်သလို တွေဝေနေမည်လော။ တွေဝေနေမည်မဟုတ်! အသက်ကယ်ခြင်းနှင့် ပတ်သက်နေသည့်အတွက် လူတို့၏အိမ်များသို့ ထပ်ခါတလဲလဲ ကျွန်ုပ်တို့လည်ပတ်ကြရခြင်းဖြစ်သည်။ အခြေအနေသည် ပြောင်းလဲနေတတ်၏။ တစ်ချိန်တစ်ခါက နားမထောင်နိုင်လောက်အောင် အလုပ်များလွန်းနေသူတစ်ဦးသည် နောက်တစ်ကြိမ်တွင် ကျမ်းစာသတင်းတရားကို ကြားနာလိုစိတ်ရှိကောင်းရှိနိုင်သည်။ မိသားစုဝင် အခြားတစ်ဦးဦးက တံခါးလာဖွင့်ပေးနိုင်ကာ ယင်းက ကျမ်းစာအကြောင်း ဆွေးနွေးဖြစ်သွားနိုင်သည်။
၁၆ အိမ်ရှင်များ၏အခြေအနေသာမက ၎င်းတို့၏သဘောထားကပါ ပြောင်းလဲသွားနိုင်သည်။ ဥပမာအနေနှင့်၊ ချစ်မြတ်နိုးရသူတစ်ဦးကို သေခြင်း၌ ဆုံးရှုံးရသည့်နာကျင်မှုက လူတစ်ဦးအား ဘုရားသခင့်နိုင်ငံတော်သတင်းတရားကို နားထောင်စေပေမည်။ ထိုသူအားနှစ်သိမ့်ပေးနိုင်မည်ဟု ကျွန်ုပ်တို့ မျှော်လင့်ထားကြသည်၊ ထိုသူ၏ဝိညာဉ်ရေးလိုအပ်ချက်ကို သတိပြုစေကာ ဤလိုအပ်ချက်ကို မည်သို့ဖြည့်ဆည်းပေးနိုင်ကြောင်း ပြကြသည်။—မဿဲ ၅:၃၊ ၄။
၁၇။ ကျွန်ုပ်တို့၏ဟောပြောခြင်းလုပ်ငန်းအတွက် အဦးဆုံးသောအကြောင်းရင်းမှာ အဘယ်နည်း။
၁၇ တစ်အိမ်မှတစ်အိမ်သက်သေခံခြင်း သို့မဟုတ် ခရစ်ယာန်ဓမ္မအမှု၏ အခြားပုံစံတစ်မျိုးမျိုးတွင်ပါဝင်ခြင်း၏ အကြောင်းရင်းများအနက် အဦးဆုံးမှာ ယေဟောဝါ၏နာမတော်ထင်ရှားစေရေးတွင် ပါဝင်လိုခြင်းဖြစ်သည်။ (ထွက်မြောက်ရာ ၉:၁၆; ဆာလံ ၈၃:၁၈) ကျွန်ုပ်တို့၏ ဧဝံဂေလိဟောပြောခြင်းလုပ်ငန်းသည် ဖြောင့်မတ်မှုနှင့် အမှန်တရား ချစ်မြတ်နိုးသူများကို ယေဟောဝါအားချီးမွမ်းသူများဖြစ်လာစေသည့်အခါ အလွန်အကျိုးရှိသွားပြီတကား! “လူပျိုနှင့်အပျိုများ၊ လူအိုနှင့်လူကလေးများတို့ ထာဝရဘုရား[သခင်]ကိုချီးမွမ်းကြလော့။ နာမတော်တစ်ပါးတည်းသာလျှင်မြတ်၍ ဘုန်းတော်သည် မြေကြီးနှင့် ကောင်းကင်အပေါ်ထက်၌ရှိသောကြောင့် ထာဝရဘုရား[သခင်]၏နာမတော်ကို ချီးမွမ်းကြစေ” ဟူ၍ ဆာလံဆရာသီဆိုခဲ့သည်။—ဆာလံ ၁၄၈:၁၂၊ ၁၃။
ဧဝံဂေလိဟောပြောခြင်းက ကျွန်ုပ်တို့တစ်ဦးစီကို အကျိုးပြု
၁၈။ ဧဝံဂေလိဟောပြောခြင်းလုပ်ငန်းကို လုပ်ဆောင်ခြင်းမှ ကျွန်ုပ်တို့မည်သို့အကျိုးရရှိကြသနည်း။
၁၈ ဧဝံဂေလိဟောပြောသူတစ်ဦး ဆောင်ရွက်ရသောအမှုကို လုပ်ဆောင်ခြင်းက နည်းလမ်းအမျိုးမျိုးဖြင့် ကျွန်ုပ်တို့တစ်ဦးစီကို အကျိုးပြုပါသည်။ သတင်းကောင်းကို တစ်အိမ်မှတစ်အိမ် သွား၍ ဟောပြောခြင်းက အထူးသဖြင့် ကြင်နာသည့်အမူအရာဖြင့် ကျွန်ုပ်တို့ကြိုဆိုမခံရသည့်အခါ နှိမ့်ချမှုကို မွေးမြူရန် ကျွန်ုပ်တို့အား ကူညီပေးသည်။ ထိရောက်သော ဧဝံဂေလိဟောပြောသူများဖြစ်ရန် ကျွန်ုပ်တို့သည် ‘အချို့သောသူတို့ကို ကယ်တင်ရန် ခပ်သိမ်းသောသူတို့၌ ခပ်သိမ်းသောအရာဖြစ်’ လာခဲ့သူ ပေါလုနှင့်တူဖို့လိုပေသည်။ (၁ ကောရိန္သု ၉:၁၉-၂၃) ခရစ်ယာန်ဓမ္မအမှုမှတွေ့ကြုံမှုက လိမ္မာပါးနပ်ရန် ကျွန်ုပ်တို့ကို ကူညီပေးသည်။ ယေဟောဝါအား မှီခိုအားထားခြင်းဖြင့်လည်းကောင်း၊ စကားလုံးများတော်သင့်စွာ ရွေးချယ်ခြင်းဖြင့်လည်းကောင်း ပေါလု၏ ဤသွန်သင်ချက်ကို ကျွန်ုပ်တို့လက်တွေ့ကျင့်သုံးနိုင်ကြပါသည်– “လူအသီးအသီးတို့အား အဘယ်သို့ပြန်ပြောရမည်ကို သိနိုင်မည်အကြောင်း၊ သင်တို့စကားသည် ဆားအားဖြင့် ငန်သောအရသာနှင့်ပြည့်စုံလျက်၊ အစဉ်မပြတ်တင့်တယ်လျောက်ပတ်ပါစေ။”—ကောလောသဲ ၄:၆။
၁၉။ သန့်ရှင်းသောဝိညာဉ်တော်သည် ဧဝံဂေလိဟောပြောသူများကို မည်သို့အကူအညီပေးသနည်း။
၁၉ ဧဝံဂေလိဟောပြောခြင်းလုပ်ငန်းသည် ဘုရားသခင့်သန့်ရှင်းသောဝိညာဉ်တော်အပေါ် အားထားမှီခိုရန်လည်း ကျွန်ုပ်တို့အားလှုံ့ဆော်ပေးသည်။ (ဇာခရိ ၄:၆) တစ်ဖန်၊ ၎င်း၏အသီးများဖြစ်သော “ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကြင်နာခြင်း၊ ကောင်းမြတ်ခြင်း၊ ယုံကြည်ခြင်း၊ နူးညံ့သိမ်မွေ့ခြင်း၊ ချုပ်တည်းခြင်း” တို့သည် ကျွန်ုပ်တို့၏ခရစ်ယာန်ဓမ္မအမှုတွင် ထင်ရှားသီးပွင့်လာသည်။ (ဂလာတိ ၅:၂၂၊ ၂၃၊ ကဘ) ယင်းက လူတို့နှင့် ကျွန်ုပ်တို့၏ဆက်ဆံရေးအပေါ် အကျိုးသက်ရောက်မှုရှိစေသည်၊ အကြောင်းမှာ ဝိညာဉ်တော်၏လမ်းညွှန်မှုကို ခံယူခြင်းက သတင်းကောင်းကြေညာနေစဉ် မေတ္တာတင်ပြစေသည်၊ ရွှင်လန်း၍ ငြိမ်သက်မှုရှိစေသည်၊ စိတ်ရှည်ပြီး ကြင်နာမှုရှိစေသည်၊ ကောင်းမြတ်ခြင်းနှင့်ယုံကြည်ခြင်းတို့ကို တင်ပြစေသည်၊ နူးညံ့သိမ်မွေ့ခြင်းနှင့် ချုပ်တည်းခြင်းရှိစေပါသည်။
၂၀၊ ၂၁။ ဧဝံဂေလိဟောပြောသူများအဖြစ် အလုပ်များနေခြင်း၏ ကောင်းချီးနှင့် အကျိုးကျေးဇူးတချို့ကား အဘယ်နည်း။
၂၀ ဧဝံဂေလိဟောပြောသူများအဖြစ် ကျွန်ုပ်တို့ခံစားရသည့်နောက်ကောင်းချီးတစ်ခုမှာ ကျွန်ုပ်တို့ ပို၍စာနာတတ်လာခြင်းဖြစ်၏။ လူတို့သည် ၎င်းတို့၏ပြဿနာများဖြစ်သည့် ဖျားနာခြင်း၊ အလုပ်လက်မဲ့ဖြစ်ခြင်း၊ အိမ်တွင်းအကျပ်အတည်းဖြစ်ခြင်းတို့ကို ပြောပြကြသောအခါ ကျွန်ုပ်တို့သည် အကြံပေးသူများအဖြစ် မပြုမူကြသော်လည်း သူတို့ကို အားပေး၍ နှစ်သိမ့်မှုဖြစ်စေသောကျမ်းချက်များ ဝေမျှပြောဆိုကြသည်။ ဝိညာဉ်ရေးအရ အလင်းကွယ်ခြင်းခံခဲ့ရသော်လည်း ဖြောင့်မတ်မှန်ကန်မှုကို မြတ်နိုးသူများဖြစ်ဟန်တူသော သူတို့၏အရေးကို ကျွန်ုပ်တို့ဂရုစိုက်ကြသည်။ (၂ ကောရိန္သု ၄:၄) “ထာဝရအသက်ကို တလိုတလားရှိ” သူတို့ကို ဝိညာဉ်ရေးအကူအညီပေးရခြင်းသည် အမှန်ပင်ကောင်းချီးဖြစ်သည်!—တမန်တော် ၁၃:၄၈၊ ကဘ။
၂၁ ဧဝံဂေလိဟောပြောခြင်းလုပ်ငန်းတွင် မှန်မှန်ပါဝင်ခြင်းက ဝိညာဉ်ရေးရာများအပေါ် အဓိကထားအာရုံစိုက်စေသည်။ (လုကာ ၁၁:၃၄) ယင်းက အမှန်ပင်အကျိုးဖြစ်ထွန်းစေပါသည်၊ အကြောင်းမှာ ဝိညာဉ်ရေးရာများအပေါ် ကျွန်ုပ်တို့အာရုံမစိုက်ပါက ဤလောကတွင် မြင်တွေ့နေကျဖြစ်သော ရုပ်ဝါဒဆန်သည့်သွေးဆောင်မှုများခံရနိုင်စရာ အကြောင်းရှိသည်။ တမန်တော်ယောဟန်က ဤသို့တိုက်တွန်းခဲ့၏– “လောကကိုလည်းကောင်း၊ လောက၌ရှိသောအရာတို့ကိုလည်းကောင်း မချစ်ကြနှင့်။ လောကကိုချစ်သောသူမည်သည်ကား ခမည်းတော်ကိုချစ်ခြင်းမေတ္တာမရှိ။ လောက၌ရှိသမျှသောအရာတည်းဟူသော ကိုယ်ကာယတပ်မက်ခြင်း၊ မျက်စိတပ်မက်ခြင်း၊ လော[က]စည်းစိမ်၌ဝါကြွားခြင်းတို့သည် ခမည်းတော်နှင့်မစပ်ဆိုင်၊ လောကနှင့်သာစပ်ဆိုင်ကြ၏။ လောကနှင့်လော[က]တပ်မက်ခြင်းသည် ရွေ့သွားကွယ်ပျောက်တတ်၏။ ဘုရားသခင်၏အလိုတော်နှင့်အညီ ကျင့်သောသူမူကား ... ထာဝရတည်၏။” (၁ ယောဟန် ၂:၁၅-၁၇) သခင့်လုပ်ငန်းတော်တွင် ဧဝံဂေလိဟောပြောသူတစ်ဦးအဖြစ် အလုပ်များနေခြင်းက လောကကိုမချစ်ရန် အကူအညီပေးသည်။—၁ ကောရိန္သု ၁၅:၅၈။
ကောင်းကင်ဘဏ္ဍာကို ဆည်းပူးလော့
၂၂၊ ၂၃။ (က) ခရစ်ယာန်ဧဝံဂေလိဟောပြောသူတို့သည် အဘယ်ဘဏ္ဍာများကို ဆည်းပူးကြသနည်း။ (ခ) နောက်ဆောင်းပါးက ကျွန်ုပ်တို့ကို မည်သို့ကူညီပေးမည်နည်း။
၂၂ ဘုရားသခင့်နိုင်ငံတော်ဟောပြောခြင်းလုပ်ငန်းတွင်စိတ်အားထက်သန်ခြင်းက တည်မြဲသောအကျိုးကျေးဇူးများရရှိစေသည်။ ယင်းကို ယေရှုဤသို့မိန့်ဆို၍ ဖော်ပြခဲ့သည်– “သံချေး၊ ပိုးရွဖျက်ဆီး၍ သူခိုးထွင်းဖောက်ခိုးယူရာ မြေကြီးပေါ်မှာ ဘဏ္ဍာကိုမဆည်းပူးကြနှင့်။ သံချေး၊ ပိုးရွမဖျက်ဆီး၍ သူခိုးမထွင်းမဖောက် မခိုးမယူရာ ကောင်းကင်ဘုံ၌ဘဏ္ဍာကို ဆည်းပူးကြလော့။ အကြောင်းမူကား၊ အကြင်အရပ်၌ သင်တို့၏ဘဏ္ဍာရှိ၏။ ထိုအရပ်သို့ သင်တို့၏စိတ်နှလုံးရောက်တတ်၏။”—မဿဲ ၆:၁၉-၂၁။
၂၃ အကြွင်းမဲ့ပိုင်သအုပ်စိုးရှင် ယေဟောဝါ၏သက်သေများအဖြစ် ကိုယ်စားပြုရခြင်းထက် သာ၍ကြီးမားသောအခွင့်ထူး ကျွန်ုပ်တို့တွင် ရှိနိုင်မည်မဟုတ်ကြောင်းကို သိရှိကာ ကောင်းကင်ဘဏ္ဍာကို ကျွန်ုပ်တို့ဆက်၍ ဆည်းပူးနေနိုင်ပါစေ။ (ဟေရှာယ ၄၃:၁၀-၁၂) ဘုရားသခင့်အမှုတော်ဆောင်များအဖြစ် ကျွန်ုပ်တို့၏တာဝန်ကို ထမ်းဆောင်နေသည်နှင့်အမျှ ဘဝတစ်လျှောက်လုံး ဘုရားသခင့်အမှုတော်ထမ်းခဲ့ခြင်းနှင့်ပတ်သက်ပြီး အသက် ၉၀ ကျော် ခရစ်ယာန်အမျိုးသမီးတစ်ဦး ဤသို့ပြောသကဲ့သို့ ကျွန်ုပ်တို့လည်း ခံစားနိုင်ပါစေ– “အဲဒီနှစ်တွေတစ်လျှောက်လုံး လုပ်ငန်းတော်မှာ ကျွန်မကို ယေဟောဝါ သည်းခံပြီးအသုံးပြုခဲ့တဲ့အတွက် ကိုယ်တော်ကိုကျေးဇူးတင်ပါတယ်၊ ကျွန်မရဲ့ မေတ္တာပြည့်ဝတဲ့ဖခင် အမြဲထာဝရဖြစ်ပါစေကြောင်းလည်း ထက်ထက်သန်သန်ဆုတောင်းတယ်။” ဘုရားသခင်နှင့်ကျွန်ုပ်တို့၏ဆက်ဆံရေးကို ထပ်တူအမြတ်တနိုး တန်ဖိုးထားမည်ဆိုလျှင် ဧဝံဂေလိဟောပြောသူတစ်ဦး ဆောင်ရွက်ရသောအမှုကို အပြည့်အဝ ဆောင်ရွက်လိုကြမည်မှာ သေချာပါသည်။ နောက်ဆောင်းပါးက ကျွန်ုပ်တို့၏ခရစ်ယာန်ဓမ္မအမှုကို မည်သို့အပြည့်အဝ ဆောင်ရွက်နိုင်ကြောင်း ကျွန်ုပ်တို့အား သိမြင်စေပါလိမ့်မည်။
သင်မည်သို့ဖြေဆိုမည်နည်း
• ဧဝံဂေလိဟောပြောသူတစ်ဦး ဆောင်ရွက်ရသောအမှုကို ကျွန်ုပ်တို့ အဘယ်ကြောင့် လုပ်ဆောင်သင့်သနည်း။
• အထက်ကာလနှင့် ယနေ့ခေတ် ဧဝံဂေလိဟောပြောသူတို့၏ လုပ်ငန်းနှင့်ပတ်သက်၍ သင်အဘယ်အရာပြောဆိုနိုင်သနည်း။
• ကျွန်ုပ်တို့သည် အဘယ်ကြောင့် တစ်အိမ်မှတစ်အိမ် သက်သေခံကြသနည်း။
• ဧဝံဂေလိဟောပြောသူတစ်ဦး ဆောင်ရွက်ရသောအမှုကို လုပ်ဆောင်ခြင်းမှ သင်မည်သို့အကျိုးခံစားရသနည်း။
[လေ့လာရန်မေးခွန်းများ]
[စာမျက်နှာ ၁၀ ပါ ရုပ်ပုံ]
ဖိလိပ္ပုနှင့် သူ၏သမီးများကဲ့သို့သော ဧဝံဂေလိဟောပြောသူတို့တွင် ဝမ်းမြောက်ပျော်ရွှင်သော ခေတ်သစ် ဧဝံဂေလိ ဟောပြောသူများရှိကြ
[စာမျက်နှာ ၁၄ ပါ ရုပ်ပုံ]
အခြားသူတို့ကို သင်သတင်းကောင်းဝေမျှသည့်အခါ အသင်ကိုယ်တိုင် မည်သို့အကျိုးခံစားရသနည်း