အလုပ်ခွင်၌ လူတို့ကိုရှာဖွေခြင်း
ဘုရားသခင့်နိုင်ငံတော်ကြွေးကြော်သူများမှတ်တမ်း
အလုပ်ခွင်၌ လူတို့ကိုရှာဖွေခြင်း
တမန်တော်မဿဲ၊ ပေတရု၊ အန္ဒြေ၊ ယာကုပ်နှင့် ယောဟန်တို့တွင် အဘယ်တူညီချက်ရှိသနည်း။ သူတို့အားလုံး မိမိတို့အလုပ်ခွင်၌ရှိစဉ် ယေရှု၏ခေါ်တော်မူခြင်းခံခဲ့ရကြသည်။ ယေရှုက “ငါ့နောက်သို့လိုက်ကြလော့” ဟု သူတို့ကို ခေါ်ဖိတ်စဉ် ပေတရု၊ အန္ဒြေ၊ ယာကုပ်နှင့် ယောဟန်တို့သည် တံငါလုပ်ငန်း၌ အလုပ်များနေခဲ့ကြသည်။ မဿဲသည် အခွန်ကောက်ရုံး၌ရှိစဉ် ယေရှု၏တပည့်ဖြစ်လာရန် ဖိတ်ခေါ်ခံခဲ့ရသည်။—မဿဲ ၄:၁၈-၂၁; ၉:၉။
သူတို့၏အလုပ်ခွင်၌ လူတို့ကို သက်သေခံခြင်းသည် အကျိုးဖြစ်ထွန်းစေနိုင်သည်။ ယင်းကို သိရှိကာ ဂျပန်နိုင်ငံမှ ယေဟောဝါသက်သေများသည် မကြာသေးမီက ဤဓမ္မအမှုကဏ္ဍ၌ပါဝင်ရန် ပေါင်းစည်းလုပ်ဆောင်ခဲ့ကြသည်။ အဘယ်အကျိုးကျေးဇူးများ ရခဲ့သနည်း။ လအနည်းငယ်အတွင်း ပြန်လည်ပတ်မှု ထောင်ပေါင်းများစွာရရှိခဲ့ပြီး ကျမ်းစာသင်အံမှု ၂၅၀ ခန့် စခဲ့ကြသည်။ အောက်ပါတွေ့ကြုံမှုများကို သုံးသပ်ကြည့်ပါ။
တိုကျိုမြို့ရှိ အချိန်ပြည့်ခရစ်ယာန်ဓမ္မအမှုဆောင်တစ်ဦးသည် လွန်ခဲ့သောအနှစ် ၃၀ နီးပါးက ကျောင်းတွင် သက်သေခံတစ်ဦးနှင့် ဆွေးနွေးခဲ့ဖူးသော စားသောက်ဆိုင်မန်နေဂျာနှင့် ဆုံတွေ့ခဲ့သည်။ မန်နေဂျာသည် ကျောင်းသားဘဝက သူကြားသိခဲ့ရာများကို သိပ်နားမလည်သော်လည်း သမ္မာကျမ်းစာကို စိတ်ဝင်စားသွားသည်။ ယခု သူ၏စိတ်ဝင်စားမှု ပြန်လည်နှိုးဆွခံရရာ ထာဝရအသက်ကိုရစေသော အသိပညာ * စာအုပ်ဖြင့် ကျမ်းစာသင်ရန် တလိုတလားလက်ခံလိုက်သည်။ ထို့ပြင် အိပ်ရာမဝင်မီ ညတိုင်း ကိုယ်ပိုင်ကျမ်းစာဖတ်ရှုသည့်အစီအစဉ်ကို သူစတင်ခဲ့သည်။
အထူးရှေ့ဆောင်ဓမ္မအမှုဆောင်တစ်ဦးသည် ရုံးတစ်ရုံးကို လည်ပတ်ခဲ့သည်။ မန်နေဂျာနှင့်မတွေ့သော်လည်း ဖုန်းကိုင်သောအမျိုးသမီးငယ်က “ကျွန်မနဲ့ စကားပြောလို့ရမလား” ဟုမေးမြန်းခဲ့သည်။ တယ်လီဖုန်းဖြင့် ခဏမျှ စကားစမြည်ပြောပြီးနောက် ထိုအမျိုးသမီးငယ်သည် ဧည့်ခန်းသို့ထွက်လာကာ ကျမ်းစာဖတ်ရသည်ကို သူစိတ်ဝင်စားကြောင်း ပြောပြလေသည်။ အထူးရှေ့ဆောင်ညီမသည် သမ္မာကျမ်းစာတစ်အုပ်နှင့် ပြန်လည်ပတ်ရန်စီစဉ်ပြီး ထိုအမျိုးသမီး အလုပ်ချိန်မတိုင်မီ အနီးရှိပန်းခြံတစ်ခုတွင် သူနှင့် ကျမ်းစာသင်အံမှု စခဲ့သည်။
အခြားရုံးတစ်ခုတွင် လုပ်ဖော်ဆောင်ဖက်အမျိုးသမီးတစ်ဦးသည် သက်သေခံထံမှ ကင်းမျှော်စင်နှင့် နိုးလော့! မဂ္ဂဇင်းများကို လက်ခံယူထားသော်လည်း သက်သေခံထွက်သွားသည်နှင့် ပစ်လိုက်သည်ကို အမျိုးသားတစ်ဦး မြင်လိုက်မိသည်။ ထိုအမျိုးသားသည် အိမ်သို့ပြန်ရောက်သောအခါ ၎င်းအဖြစ်အပျက်ကို သက်သေခံဇနီးသည်အား ပြန်ပြောပြကာ မိမိသာဆိုလျှင် အနည်းဆုံးတော့ နားထောင်လိုက်မည်ဟု ထုတ်ပြောခဲ့သည်။ သူထိုသို့ပြောသည်ကို သမီးဖြစ်သူက အမှတ်တမဲ့ကြားလိုက်မိပြီး အဆိုပါစီးပွားရေးရပ်ကွက်၌ အမှုဆောင်သော သက်သေခံအမျိုးသားတစ်ဦးကို ပြောပြခဲ့သည်။ သက်သေခံသည် ထိုလင်ယောက်ျားထံ ချက်ချင်းသွားလည်ပတ်ကာ သူနှင့် ကျမ်းစာသင်အံမှုစခဲ့သည်။ မကြာမီ သူသည် တနင်္ဂနွေနေ့အစည်းအဝေးများကို မှန်မှန်တက်လေတော့သည်။
အလုပ်ခွင်၌ လူများကို သက်သေခံခြင်းသည် အခြားသောအကျိုးကျေးဇူးများကိုလည်း ရစေပါသည်။ ဂျပန်နိုင်ငံရှိ ကြေညာသူများစွာတို့သည် ဈေးရုံများ၊ စက်ရုံများနှင့် ရုံးခန်းများကို ပြန်လည်ပတ်ရာ၌ ကျွမ်းကျင်လာကြသည်။ ထို့အပြင် ဤသက်သေခံနည်းကြောင့် နှစ်များတစ်လျှောက် မလှုပ်မရှားဖြစ်နေသူများနှင့် ဆုံတွေ့ခွင့်ရပြီး သူတို့နှင့် သင်အံမှုများစခဲ့ကြပြီ။ ထူးခြားသောအကျိုးကျေးဇူးများရခဲ့ကြသည်။ မကြာသေးမီက တိုကျိုမြို့လယ်ရှိ အသင်းတော်တစ်ခုသည် အိမ်တွင်းကျမ်းစာသင်အံမှုပေါင်း ၁၀၈ ခုမှတ်တမ်းသွင်းခဲ့ရာ လွန်ခဲ့သောနှစ်ထက် နှစ်ဆကျော်ရခဲ့သည်။
[အောက်ခြေမှတ်ချက်]
^ အပိုဒ်၊ 5 ယေဟောဝါသက်သေများထုတ်ဝေခဲ့။