၆၆၆ ပဟေဠိတစ်ခုမျှသာမဟုတ်
၆၆၆ ပဟေဠိတစ်ခုမျှသာမဟုတ်
သားရဲ၏အမည် သို့မဟုတ် ၎င်းအမည်၏ကိန်းဂဏန်းတည်းဟူသော ထိုအမှတ်တံဆိပ်ရိုက်ထားသူမှလွဲ၍ မည်သူ့အားမျှ ရောင်းဝယ်ခွင့်မပေး။ ဤတွင် ပညာရှိရန်လို၏။ ဉာဏ်ရှိသူမှန်လျှင် သားရဲ၏ကိန်းဂဏန်းကိုတွက်ချက်ပါစေ။ အကြောင်းမှာ၊ ၎င်းသည် လူ့ကိန်းဂဏန်းဖြစ်၍ ခြောက်ရာခြောက်ဆယ့်ခြောက်ဖြစ်သည်။”—ဗျာ. ၁၃:၁၇-၁၈၊ ကဘ။
ကျမ်းစာအကြောင်းအရာများထဲတွင် ပဟေဠိဆန်သော “သားရဲ” ၏အမှတ်အသား သို့မဟုတ် အမည်—၆၆၆ ဂဏန်းတမျှ စိတ်ဝင်စားဖွယ်၊ အလေးထားဖွယ် ပရောဖက်ပြုချက်မျိုး များများစားစားမရှိလှပေ။ သားရဲ၏အမှတ်တံဆိပ်အကြောင်း မှန်းဆချက်များသည် ရုပ်မြင်သံကြား၊ အင်တာနက်၊ ရုပ်ရှင်၊ စာနယ်ဇင်းတို့တွင် မဆုံးနိုင်အောင် များပြားလှပေသည်။
အချို့က ၆၆၆ ဂဏန်းသည် သမ္မာကျမ်းစာတွင်ပါသော အန္တိခရစ်ဖြစ်သည်ဟု ယုံကြည်ကြ၏။ ယင်းသည် လူတစ်ဦးကို သားရဲ၏ကျေးကျွန်တစ်ဦးအဖြစ် မှတ်သားဖော်ပြသော ဆေးမင်ကြောင် သို့မဟုတ် ခန္ဓာကိုယ်ထဲသို့ ထည့်သွင်းထားသော ဒစ်ဂျစ်တယ်ကုတ်ပါ မိုင်ခရိုချစ်ပ်တစ်ခုစသည့် ရှိနေရမည့် အမှတ်အသားပုံစံတစ်မျိုးဖြစ်သည်ဟု ဆိုကြသူများလည်းရှိသည်။ အခြားသူတို့ကမူ ၆၆၆ ဂဏန်းသည် ကက်သလစ်ပုပ်ရဟန်းမင်း၏ အမှတ်တံဆိပ်ဖြစ်သည်ဟု ယူဆကြသည်။ Vicarius Filii Dei(ဘုရားသခင့်သားတော်ဖြစ်သော ဗစ်ကာ) ဟူသော ပုပ်၏ဘွဲ့နာမအက္ခရာကို ရောမကိန်းဂဏန်းဖြင့် အစားထိုးပြီး ရရှိလာသည့်ကိန်းဂဏန်းကို အနည်းငယ်ကုလားဖန်ထိုးလိုက်သည့်အခါ ၆၆၆ ဂဏန်းကိုရသည်။ ရောမဧကရာဇ်မင်း ဒိုင်အိုကလီလျှံ၏ လက်တင်အမည်နှင့် နီရိုဆီဇာ၏ ဟေဗြဲပုံစံအမည်မှ ထိုကိန်းဂဏန်းကို တွက်ချက်ယူနိုင်သည်ဟူ၍လည်း ဆိုကြသည်။ *
သို့သော် နောက်ဆောင်းပါးတွင် ကျွန်ုပ်တို့တွေ့မြင်ရမည့်အတိုင်း ဤစိတ်ကူးယဉ် ဖန်တီးထားသော အဓိပ္ပာယ်ကောက်ယူချက်များသည် သားရဲ၏အမှတ်တံဆိပ်အကြောင်း သမ္မာကျမ်းစာပြောဆိုရာနှင့် လုံးဝမတူချေ။ သမ္မာကျမ်းစာဖော်ပြသည်မှာ သားရဲ၏အမှတ်တံဆိပ်ရှိသူများသည် လက်ရှိအစီအစဉ်စနစ်ကို ဘုရားသခင်အဆုံးတိုင်စေသောအခါ ကိုယ်တော်၏အမျက်တော်ကို ခံရလိမ့်မည်ဖြစ်သည်။ (ဗျာ. ၁၄:၉-၁၁; ဗျာ. ၁၉:၂၀) ထို့ကြောင့် ၆၆၆ ဂဏန်း၏အနက်အဓိပ္ပာယ်ကို နားလည်ထားခြင်းသည် စိတ်ဝင်စားဖွယ်ပဟေဠိတစ်ခုကို အဖြေရှာခြင်းမျှ မကချေ။ ဤအရေးပါသောကိစ္စတွင် မေတ္တာ၏ပြယုဂ်နှင့် ဝိညာဉ်ရေးအလင်း၏ရင်းမြစ်ဖြစ်တော်မူသော ယေဟောဝါဘုရားသခင်သည် မိမိ၏ကျေးကျွန်များကို အသိမပေးဘဲနေတော်မမူခြင်းက ဝမ်းသာစရာပင်။—၂ တိမောသေ ၃:၁၆; ၁ ယောဟန် ၁:၅; ၄:၈။
[အောက်ခြေမှတ်ချက်]
^ အပိုဒ်၊ 4 ကိန်းဂဏန်းနှင့်ပတ်သက်သောဆွေးနွေးချက်ကို နိုးလော့! ၂၀၀၂၊ စက်တင်ဘာ၈(လိပ်) ကိုရှု။