မက္ကဆီကိုနိုင်ငံ၏အင်္ဂလိပ်စကားပြောလယ်ကွင်းတွင် အလွတ်သဘောသက်သေခံခြင်း
မက္ကဆီကိုနိုင်ငံ၏အင်္ဂလိပ်စကားပြောလယ်ကွင်းတွင် အလွတ်သဘောသက်သေခံခြင်း
တမန်တော်ပေါလုသည် အေသင်မြို့တွင် မိမိ၏ခရီးသွားဖော်များအား စောင့်နေရသည့်အချိန်ကို အခွင့်ကောင်းယူ၍ အလွတ်သဘောသက်သေခံခဲ့၏။ ‘လူများစုဝေးရာအရပ်၌ နေ့တိုင်းတွေ့ကြုံသောသူတို့နှင့် ဆွေးနွေးနှီးနှောခြင်းကိုပြု၏’ ဟု ကျမ်းစာကဆိုသည်။ (တမန်တော် ၁၇:၁၇) ထို့ပြင် ယုဒနယ်မှ ဂါလိလဲနယ်သို့ ခရီးလှည့်လည်စဉ် ယေရှုသည် ရေတွင်းဘေး၌ ရှမာရိအမျိုးသမီးတစ်ဦးကို အလွတ်သဘောသက်သေခံတော်မူခဲ့၏။ (ယောဟန် ၄:၃-၂၆) အသင်ကော ဘုရားသခင့်နိုင်ငံတော်သတင်းကောင်းဟောရန် အခွင့်အရေးတိုင်းကို အရယူပါသလော။
မက္ကဆီကိုနိုင်ငံရှိ အင်္ဂလိပ်စကားပြောလယ်ကွင်းသည် အလွတ်သဘောသက်သေခံရန် အထူးသင့်လျော်သည်။ အပန်းဖြေစခန်းများသို့ လာရောက်လည်ပတ်ကြသည့် ကမ္ဘာလှည့်ခရီးသည်များ၊ အသစ်ဝင် အဟောင်းထွက် တက္ကသိုလ်ကျောင်းသားများနှင့် မက္ကဆီကိုနိုင်ငံတွင် အငြိမ်းစားယူလိုက်ကြသော တိုင်းတစ်ပါးသားများသည် ပန်းခြံများနှင့် စားသောက်ဆိုင်များသို့ မကြာခဏ လာရောက်တတ်ကြ၏။ အင်္ဂလိပ်စကားပြောတတ်သော ယေဟောဝါသက်သေများစွာတို့သည် ထိုသို့သောသူများနှင့် မိတ်ဖွဲ့စကားပြောရာ၌ အထူးကျွမ်းကျင်လာကြသည်။ အမှန်ဆိုရလျှင် သူတို့သည် တိုင်းတစ်ပါးပုံပေါက်သော သို့မဟုတ် အင်္ဂလိပ်စကားပြောသောသူ မည်သူမဆိုနှင့် စကားပြောဆိုရန် အခွင့်အရေးများရှာဖွေကြလေသည်။ ယင်းကို သူတို့မည်သို့လုပ်ဆောင်ကြကြောင်း ကြည့်ကြစို့။
အကြိမ်ပေါင်းများစွာပင် အင်္ဂလိပ်စကားပြောလယ်ကွင်းတွင် အမှုဆောင်နေကြသည့် တိုင်းတစ်ပါးမှ သက်သေခံများသည် အခြားနိုင်ငံများမှရောက်လာဟန်တူသူတို့ကို မိမိတို့ကိုယ်ကို မိတ်ဆက်ကြပြီး အဘယ်အရပ်မှရောက်လာကြောင်း မေးမြန်းကြသည်။ ယင်းက သက်သေခံဖြစ်သူသည် မက္ကဆီကိုနိုင်ငံတွင် ဘာလာလုပ်နေသည်ကို အမေးခံရလေ့ရှိသဖြင့် မိမိ၏ယုံကြည်ချက်များကို ဝေမျှခွင့်ရစေသည်။ ဥပမာအနေနှင့်၊ အကူအညီ အကြီးအကျယ်လိုအပ်နေသည့် ဝါဟားကာမြို့ရှိ အင်္ဂလိပ်စကားပြောလယ်ကွင်းတွင် အမှုဆောင်နေသည့် ဂလိုရီယာသည် ထိုနည်းဖြင့် စကားလက်ဆုံစပြောခြင်းသည် အထူးသဖြင့် လွယ်ကူကြောင်း တွေ့ရှိရ၏။ မြို့လယ်ရင်ပြင်တွင် အလွတ်သဘော ဟောပြောရာမှ အိမ်သို့ပြန်လာစဉ် အင်္ဂလန်နိုင်ငံမှရောက်လာသော စုံတွဲတစ်တွဲက ဂလိုရီယာထံ ချဉ်းကပ်လာသည်။ အမျိုးသမီးဖြစ်သူက “ဝါဟားကာမြို့လမ်းမပေါ်မှာ လူမည်းအမျိုးသမီးတစ်ယောက် လမ်းလျှောက်နေတာကို တွေ့ရတာ ကျွန်မဖြင့် မယုံနိုင်လောက်အောင်ပဲ!” ဟု ဆိုလိုက်လေသည်။ ဂလိုရီယာသည် ဗွေယူမည့်အစား ရယ်မောလိုက်ကာ သူ အဘယ်ကြောင့် မက္ကဆီကိုနိုင်ငံတွင်ရှိနေရကြောင်း သူတို့နှင့် စကားလက်ဆုံ စပြောဖြစ်သွားခဲ့သည်။ အဆိုပါ အမျိုးသမီးက ဂလိုရီယာအား ကော်ဖီသောက်ရန် ၎င်း၏အိမ်သို့ ဖိတ်ခေါ်လေသည်။ အချိန်းအချက်ပြုကြပြီးနောက် ဂလိုရီယာက ကင်းမျှော်စင် နှင့် နိုးလော့! မဂ္ဂဇင်းများကို ဝေငှရာ အမျိုးသမီးက သူသည် ဘုရားသခင်မဲ့ဝါဒီတစ်ဦးဖြစ်သည်ဟုဆိုကာ ငြင်းလိုက်၏။ ဂလိုရီယာက ဘုရားသခင်မဲ့ဝါဒီများနှင့် စကားပြောဆိုရသည်ကို သူနှစ်သက်သဘောကျကြောင်း၊ “ဝတ်ပြုကိုးကွယ်ရာနေရာများ—ယင်းတို့ကို ကျွန်ုပ်တို့လိုအပ်သလော” ဟူသည့်ဆောင်းပါးနှင့်စပ်လျဉ်း၍ သူ၏ထင်မြင်ချက်ကို ကြားလိုကြောင်း တုံ့ပြန်ပြောဆိုခဲ့သည်။ အဆိုပါအမျိုးသမီးက “ဘုရားသခင်ရှိကြောင်း ကျွန်မကို ယုံအောင်လုပ်နိုင်ရင်တော့ တကယ့်ကို အံ့ဩစရာကောင်းမယ်” ဟုပြောဆိုကာ လက်ခံလိုက်သည်။ ကော်ဖီသောက်ရင်း စိတ်ဝင်စားဖွယ် အကြောင်းအရာ အတော်များများကို ဆွေးနွေးပြောဆိုခဲ့ကြ၏။ မကြာမီ အဆိုပါ ဇနီးမောင်နှံသည် အင်္ဂလန်နိုင်ငံသို့ပြန်သွားသော်လည်း အီးမေးလ်ဖြင့် ဆွေးနွေးမှုများ ဆက်ပြုလုပ်ခဲ့ကြသည်။
ဂလိုရီယာသည် ဝါရှင်တန်၊ ဒီ.စီ. မှ ကျောင်းသူတစ်ဦးဖြစ်သူ ဆာရွန်ကိုလည်း ချဉ်းကပ်၍စကားပြောဆိုခဲ့သည်၊ ထိုမိန်းကလေးသည် မဟာဘွဲ့အတွက် ဒေသခံအမျိုးသမီးများနှင့်အတူ စေတနာ့ဝန်ထမ်းရန် ဝါဟားကာမြို့သို့ ရောက်ရှိနေခြင်းဖြစ်သည်။ ဆာရွန်၏ ကြိုးစားမှုများကို ချီးမွမ်းပြောဆိုပြီးနောက် ဂလိုရီယာက မိမိအဘယ်ကြောင့် မက္ကဆီကိုနိုင်ငံတွင်ရှိနေရကြောင်း ရှင်းပြခဲ့သည်။ ယင်းကြောင့် သမ္မာကျမ်းစာအကြောင်း၊ ဆင်းရဲသားများအတွက်သာမက လူတိုင်းအတွက်ပါ ဘုရားသခင်လုပ်ဆောင်ပေးမည့်အရာတို့ကို ကောင်းကောင်း ပြောဆိုဆွေးနွေးခဲ့ရသည်။ ယူနိုက်တက်စတိတ်တွင် သက်သေခံများနှင့် သူတစ်ခါမျှ စကားမပြောခဲ့ဖူးသော်လည်း၊ ဖြစ်ချင်တော့ မက္ကဆီကိုနိုင်ငံတွင် ဦးဆုံးတွေ့ဆုံမိခဲ့ရသူသည် သက်သေခံဖြစ်နေသည်ဟု သူမှတ်ချက်ချခဲ့သည်! ဆာရွန်သည် ကျမ်းစာသင်အံမှုကို လက်ခံလိုက်ကာ ခရစ်ယာန်အစည်းအဝေးများကိုလည်း ချက်ချင်းပင် စတက်လေတော့သည်။
တိုင်းတစ်ပါးသားများစွာတို့သည် ပရဒိသုပုံစံမျိုး ရှာဖွေလို၍ မက္ကဆီကိုနိုင်ငံရှိ ပင်လယ်ကမ်းခြေ အပန်းဖြေစခန်းများသို့ ထွက်ခွာသွားခဲ့ကြသည်။ လော်ရယ်လ်သည် လူတို့၏ ဤဆန္ဒကို အစွဲပြုကာ အကာပူလ်ကိုမြို့တွင် စကားလက်ဆုံစပြောနိုင်ရန် လူတို့အား ဤသို့မေးသည်၊ အကာပူလ်ကိုမြို့သည် ၎င်းတို့နေထိုင်ရာဒေသထက် ပရဒိသုနှင့်ပို၍တူသလော၊ ဤမြို့တွင် ဘာကိုနှစ်သက်သနည်းဟု မေးမြန်းလေသည်။ ၎င်းနောက် သူက မကြာမီ ကမ္ဘာမြေတစ်ခုလုံးသည် တကယ့်ပရဒိသု ဖြစ်လာတော့မှာဖြစ်ကြောင်း ရှင်းပြသည်။ ဤနည်းလမ်းကြောင့် တိရစ္ဆာန်ဆေးပေးခန်းတစ်ခုတွင် ကနေဒါအမျိုးသမီးတစ်ဦးနှင့် သူတွေ့ဆုံခဲ့ပြီး ကျမ်းစာသင်အံမှုရရှိခဲ့သည်။ သင်နေထိုင်ရာအရပ်တွင်လည်း အလားတူချဉ်းကပ်ပါက အကျိုးဖြစ်ထွန်းပါမည်လော။
‘လမ်းမများနှင့် ပြည်သူ့ရင်ပြင်များတွင်’
မကြာခဏပင် လမ်းမများနှင့် ပြည်သူ့ရင်ပြင်များတွင် “ခင်ဗျား အင်္ဂလိပ်စကားပြောပါသလား” ဟု မေးမြန်းခြင်းဖြင့် စကားလက်ဆုံပြောဆိုမှုကို အစပြုလေ့ရှိသည်။ မက္ကဆီကန်လူမျိုးများစွာသည် ၎င်းတို့၏ အသက်မွေးပညာကြောင့် သို့မဟုတ် ယူနိုက်တက်စတိတ်တွင် နေထိုင်ခဲ့ဖူးသောကြောင့် အင်္ဂလိပ်စကားပြောတတ်ကြသည်။
သက်သေခံမောင်နှံတစ်စုံသည် လမ်းမပေါ်တွင် သူနာပြုတစ်ဦးက တွန်းပေးသည့် ဘီးတပ်ကုလားထိုင်ပေါ်ရှိ အဘွားအိုတစ်ဦးထံ ချဉ်းကပ်ခဲ့ကြသည်။ အဆိုပါအမျိုးသမီးကြီးအား အင်္ဂလိပ်စကားပြောတတ်သလားဟု မေးလိုက်၏။ သူက မိမိသည် ယူနိုက်တက်စတိတ်တွင် နှစ်ပေါင်းများစွာ နေထိုင်ခဲ့ဖူးသည့်အတွက် ပြောတတ်ကြောင်း ပြန်ဖြေလေသည်။ သူသည် တစ်ခါမျှ မဖတ်ဖူးသည့် ကင်းမျှော်စင် နှင့် နိုးလော့! တို့ကို လက်ခံယူလိုက်ပြီး သူ၏အမည် ကော်န်စူလိုဟုပြောကာ လိပ်စာလည်း ပေးလိုက်သည်။ လေးရက်ကြာပြီးနောက် လိပ်စာအတိုင်း သွားလည်ပတ်ကြရာ ကက်သလစ် သီလရှင်များ တည်ထောင်ဖွင့်လှစ်ထားသည့် ဘိုးဘွားရိပ်သာဖြစ်နေသည်ကို သူတို့တွေ့ရှိသွားသည်။ ပထမတွင် သီလရှင်များက သူတို့အား မယုံသင်္ကာဖြစ်နေပြီး ကော်န်စူလို လက်ခံစကားပြောနိုင်မည်မဟုတ်ဟု ပြောဆိုကြသဖြင့် ကော်န်စူလိုနှင့်ဆက်သွယ်ဖို့ အခက်တွေ့ခဲ့ကြသည်။ အဆိုပါဇနီးမောင်နှံသည် ၎င်းတို့ ရောက်နေကြောင်းနှင့် သူ့အား နှုတ်ဆက်လိုကြောင်း ကော်န်စူလိုကို အသိပေးပါရန် သီလရှင်များကို မရမကတောင်းဆိုခဲ့ကြသည်။ ကော်န်စူလိုသည် အဆိုပါဇနီးမောင်နှံအား လက်ခံကြိုဆိုလေသည်။ ထိုအချိန်မှစ၍ အသက် ၈၆ နှစ်အရွယ်ရှိ ဤအမျိုးသမီးသည် သီလရှင်များ ဆန့်ကျင်နေသည့်ကြားမှ ကျမ်းစာကို မှန်မှန်လေ့လာတော့သည်။ ထို့ပြင် သူသည် ခရစ်ယာန်အစည်းအဝေးတချို့ကိုလည်း တက်ရောက်ခဲ့၏။
နယပုံပြင် ၁:၂၀ က ‘စစ်မှန်သောဉာဏ်ပညာသည် ပြင်မှာကြွေးကြော်၍ ပြည်သူ့ရင်ပြင်တို့၌ မိမိစကားသံကို လွှင့်တတ်၏’ ဟုဆိုသည်။ စာန် မီဂဲ့လ် ဒေ အားယယ့်ဒေ ရင်ပြင်တွင် ဖြစ်ပျက်ခဲ့ပုံလေးကို သတိပြုကြည့်ပါ။ တစ်မနက်အစောပိုင်းတွင် ရာ့လ်ဖ်သည် ခုံတန်းရှည်ပေါ်တွင်ထိုင်နေသည့် အသက် ၅၀ ကျော်အရွယ် အမျိုးသားတစ်ဦးထံ ချဉ်းကပ်ခဲ့၏။ အဆိုပါအမျိုးသားသည် ကင်းမျှော်စင်နှင့် နိုးလော့!ကမ်းလှမ်းခံရသဖြင့် အလွန်အံ့ဩသွားပြီး သူ့ဘဝဇာတ်ကြောင်းကို ရာ့လ်ဖ်အား ပြောပြခဲ့သည်။
သူသည် စစ်မှုထမ်းနေစဉ်အတွင်း အသက်ပေါင်းများစွာ ဆုံးရှုံးသွားသည်ကို တွေ့လိုက်ရ၍ စိတ်ထိခိုက်သွားသဖြင့် စိတ်ပင်ပန်းလွန်ဝေဒနာခံစားနေရရှာသော ဗီယက်နမ်စစ်ပြန်တစ်ဦးဖြစ်နေသည်။ သူသည် ရှေ့တန်းစစ်မျက်နှာမှ စစ်အခြေစိုက်စခန်းသို့ အပို့ခံလိုက်ရသည်။ ထိုတွင် သေဆုံးသွားသောစစ်သားများ၏ အလောင်းများကို ဆေးကြော၍ ယူနိုက်တက်စတိတ်သို့ သင်္ဘောဖြင့်တင်ပို့ရန် ပြင်ဆင်ရာတွင် တာဝန်ပေးခြင်းခံခဲ့ရ၏။ ယခု နှစ်ပေါင်း ၃၀ ကြာပြီဖြစ်သော်လည်း သူသည် အိပ်မက်ဆိုးများ အဆက်မပြတ် မြင်မက်နေဆဲရှိကာ စိုးရွံ့ထိတ်လန့်နေသည်။ ထိုနံနက်က ရင်ပြင်တွင်ထိုင်နားနေစဉ် သူသည် အကူအညီအတွက် တိတ်တဆိတ် ဆုတောင်းနေခဲ့၏။
အဆိုပါစစ်ပြန်သည် စာပေကို လက်ခံသည့်အပြင် ဘုရားသခင့်နိုင်ငံတော်ခန်းမသို့ ဖိတ်ခေါ်ချက်ကိုလည်း လက်ခံလိုက်လေသည်။ အစည်းအဝေးတက်ပြီးနောက် ဘုရားသခင့်နိုင်ငံတော်ခန်းမတွင်ရှိနေသည့် နှစ်နာရီအချိန်သည် နှစ်ပေါင်း ၃၀ အတွင်း ပထမဦးဆုံးခံစားရသော ငြိမ်သက်မှုဖြစ်သည်ဟု သူပြောဆိုခဲ့သည်။ ဤအမျိုးသားသည် စာန် မီဂဲ့လ် ဒေ အားယယ့်ဒေတွင် နှစ်ပတ်ကြာသာရှိနေခဲ့သော်လည်း အကြိမ်ပေါင်းများစွာ ကျမ်းစာလေ့လာဖြစ်ခဲ့ပြီး နေရပ်သို့ပြန်ချိန်အထိ အစည်းအဝေးများကို တက်ရောက်ခဲ့သည်။ ထိုသူ ဆက်လေ့လာနိုင်ရန် စီစဉ်ဆောင်ရွက်ပေးခဲ့သည်။
အလုပ်နှင့် ကျောင်းတွင် အလွတ်သဘောသက်သေခံခြင်း
အလုပ်ခွင်တွင် သင့်ကို ယေဟောဝါသက်သေတစ်ဦးအဖြစ် လူများအား သိရှိထားစေပါသလော။ ကိပ် စာန် လူးကပ်စ်မြို့တွင် အားလပ်ရက်အပန်းဖြေ အခန်းတွဲများ အရောင်းအဝယ်လုပ်သူ အာဒရီယန်သည် ထိုသို့ပြောပြထားသည်။ ရလဒ်အနေနှင့် သူ၏အလုပ်ဖော် ဂျူဒီက ဤသို့ပြန်ပြောင်းပြောပြသည်– “လွန်ခဲ့တဲ့ သုံးနှစ်လောက်က ကျွန်မကို သက်သေခံတစ်ယောက်ဖြစ်လာမယ်လို့ တစ်ယောက်ယောက်ကပြောခဲ့ရင် ‘သေတာတောင် မဖြစ်ဘူး!’ လို့ ပြောမိလိုက်မှာပဲ။ ဒါပေမဲ့ ကျမ်းစာဖတ်ဖို့ ကျွန်မဆုံးဖြတ်ခဲ့တယ်။ ‘ငါက စာဖတ်ဝါသနာပါတော့ အခက်အခဲမရှိနိုင်ပါဘူး’ လို့ ကျွန်မထင်ခဲ့တာ။ ခြောက်မျက်နှာတောင် မပြီးလိုက်ဘူးထင်ပါရဲ့ အကူအညီလိုတယ်ဆိုတာ သိလိုက်ရတယ်။ ကျွန်မစဉ်းစားမိသလောက် အလုပ်ဖော် အာဒရီယန်ပဲ အကူအညီပေးနိုင်မယ်ဆိုတာပါပဲ။” အလုပ်ထဲမှာ ဖြောင့်မှန်သူဆိုလို့ သူတစ်ယောက်ပဲရှိတာကြောင့် သူနဲ့ပဲဆွေးနွေးပြောဆိုချင်တယ်။” အာဒရီယန်သည် ဂျူဒီအား သူနှင့်စေ့စပ်ထားသူ ကေသီနှင့်အတူလာခဲ့ရန် ကမ်းလှမ်းလိုက်ပြီး သူ၏မေးခွန်းအားလုံးကို ဖြေပေးလေသည်။ ဂျူဒီသည် ကေသီနှင့် ကျမ်းစာသင်အံမှုစခဲ့ပြီး များမကြာမီ နှစ်ခြင်းခံပြီးသော သက်သေခံတစ်ဦးဖြစ်လာခဲ့သည်။
ကျောင်း၌ အလွတ်သဘောသက်သေခံခြင်းကော အသို့နည်း။ တက္ကသိုလ်၌ စပိန်ဘာသာစကားသင်တန်းတက်နေသော သက်သေခံနှစ်ဦးသည် ခရစ်ယာန်စည်းဝေးပွဲကိုတက်ရောက်ရန် တစ်ရက် အတန်းပျက်ခဲ့ကြသည်။ သူတို့ အတန်းပြန်တက်သောအခါ ၎င်းတို့လုပ်ဆောင်ခဲ့ရာနှင့်ပတ်သက်၍ စပိန်ဘာသာဖြင့် ပြန်ပြောပြရန် တောင်းဆိုခံခဲ့ရသည်။ သူတို့သည် စပိန်ဘာသာဖြင့် အတတ်နိုင်ဆုံး သက်သေခံဖို့ အခွင့်ကောင်းယူခဲ့ကြ၏။ ဆရာမ စီလ်ဗီယာက ကျမ်းစာပရောဖက်ပြုချက်ကို အလွန်စိတ်ဝင်စားသွားသည်။ အင်္ဂလိပ်စကားဖြင့်ကျမ်းစာသင်ဖို့ လက်ခံခဲ့ပြီး ယခု သတင်းကောင်းကြေညာသူတစ်ဦးဖြစ်နေပြီ။ သူ၏မိသားစုဝင်အတော်များများလည်း ကျမ်းစာလေ့လာလျက်ရှိ၏။ စီလ်ဗီယာက “ကျွန်မဘဝတစ်လျှောက်လုံး ရှာဖွေနေခဲ့တဲ့အရာကို ကျွန်မတွေ့သွားပြီ” ဟုဆို၏။ မှန်ပါသည်၊ အလွတ်သဘောသက်သေခံခြင်းသည် ကောင်းသောအသီး သီးပွင့်စေနိုင်ပါသည်။
အခြားအခွင့်အရေးများကို အသုံးချခြင်း
ဧည့်ဝတ်ပျူငှာခြင်းကလည်း သက်သေခံခွင့်ရစေနိုင်၏။ စိုနိုရာပြည်နယ်၊ စာန် ကာလော့စ်မြို့တွင် အမှုဆောင်နေကြသည့် ဂျင်မ်နှင့် ဂေးလ်တို့သည် ထိုအရာမှန်ကန်ကြောင်း တွေ့ရှိခဲ့ကြသည်။ နံနက် ၆ နာရီတွင် ခွေးများနှင့်အတူ လမ်းလျှောက်ထွက်နေသည့် အမျိုးသမီးတစ်ဦးသည် ၎င်းတို့၏ခြံကို ချီးမွမ်းရန် ရပ်တန့်လိုက်သည်။ ဂျင်မ်နှင့်ဂေးလ်က ကော်ဖီသောက်ရန် သူ့ကို ဖိတ်ခေါ်ခဲ့၏။ အနှစ် ၆၀ အတွင်း ဦးဆုံးအကြိမ်အနေနှင့် ယေဟောဝါအကြောင်း၊ ထာဝရအသက် အလားအလာအကြောင်းတို့ကို သူကြားသိသွားခဲ့ရသည်။ ကျမ်းစာသင်အံမှုကို အစပြုလိုက်ကြ၏။
အေဒရီအန်းသည်လည်း သူစိမ်းများကို ကြင်နာစွာ ဆက်ဆံတတ်သည်။ ကန်ကွန်မြို့ရှိ စားသောက်ဆိုင်တစ်ဆိုင်တွင် သူစားသောက်နေစဉ် လူငယ်လေးတစ်ဦးရောက်လာပြီး သူ့အား ကနေဒါနိုင်ငံကလားဟု မေးလေသည်။ ဟုတ်ကြောင်း ပြန်ဖြေလိုက်သောအခါ သူက သူနှင့် သူ့မိခင်တို့သည် ကနေဒါလူမျိုးအကြောင်း ကျောင်းအစီရင်ခံစာပြင်ဆင်နေသည့် သူ၏ညီမလေးကို ကူညီပေးဖို့ ကြိုးစားနေကြကြောင်း ရှင်းပြခဲ့သည်။ အင်္ဂလိပ်စကားပြောတတ်သော မိခင်က အနားတွင် လာထိုင်သည်။ ကနေဒါလူမျိုးတို့နှင့်ပတ်သက်သည့် သူ၏မေးခွန်းများကို စိတ်ရှည်ရှည်နှင့် ဖြေပေးပြီးနောက် အေဒရီအန်းက “ဒါပေမဲ့ ကနေဒါနိုင်ငံကနေ ကျွန်မ ဘာကြောင့် ဒီကိုရောက်လာရသလဲဆိုတဲ့ တကယ့်ကိုအရေးကြီးတဲ့ အကြောင်းရင်းတစ်ခုတော့ရှိတယ်၊ အဲဒါကတော့ ကျမ်းစာအကြောင်း လူတွေသိအောင် ကူညီပေးဖို့ဖြစ်တယ်။ ရှင်ကော စိတ်ဝင်စားသလား” ဟုဆိုလိုက်၏။ အဆိုပါအမျိုးသမီးက စိတ်ဝင်စားကြောင်း ပြန်ဖြေလေသည်။ သူသည် ချာ့ခ်ျမှ လွန်ခဲ့သည့် ဆယ်နှစ်ကတည်းက နုတ်ထွက်ခဲ့ပြီး မိမိဘာသာ ကျမ်းစာလေ့လာဖို့ ကြိုးစားနေသူဖြစ်၏။ သူ၏ဖုန်းနံပါတ်နှင့် လိပ်စာကို ရယူလိုက်ပြီး အကျိုးနပ်သော ကျမ်းစာသင်အံမှုကို အစပြုခဲ့ရလေသည်။
“သင်၏အစာကို ရေပေါ်မှာ ပစ်ချလော့”
အခါအခွင့်သင့်တိုင်း ကျမ်းစာအမှန်တရားအကြောင်း ပြောဆိုခြင်းကဘုရားသခင့်နိုင်ငံတော်သတင်းတရားကိုကြားခွင့်မရသလောက်ဖြစ်သည့် သို့မဟုတ် လုံးဝမကြားရသည့် လူတို့ကို သက်သေခံရာတွင်အကျိုးရလဒ်များ ရစေလေ့ရှိသည်။ ဇီဟွှာတာနီဂျို ဆိပ်ကမ်းမြို့ရှိ လူစည်ကားသော ကဖေးဆိုင်တစ်ဆိုင်တွင် သက်သေခံတစ်ဦးသည် ဆိုင်၌ လူပြည့်နေသောကြောင့် နိုင်ငံခြားသားနှစ်ဦးကို သူ၏စားပွဲတွင်ထိုင်ဖို့ ခေါ်ဖိတ်ခဲ့သည်။ အဆိုပါဇနီးမောင်နှံသည် တစ်နေရာမှတစ်နေရာသို့ ရွက်လွှင့်သွားလာနေသည်မှာ ခုနစ်နှစ်ရှိပြီဖြစ်၏။ သူတို့သည် ယေဟောဝါသက်သေများနှင့်ပတ်သက်၍ အပျက်သဘောထားများ ပြခဲ့ကြသည်။ ကဖေးဆိုင်တွင် တွေ့ဆုံခဲ့ပြီးနောက် သက်သေခံသည် ဇနီးမောင်နှံကို ၎င်းတို့၏သင်္ဘောပေါ်တွင် သွားလည်ပတ်ခဲ့ပြီး သူ၏အိမ်သို့လာလည်ရန် သူတို့အား ဖိတ်ခေါ်ခဲ့သည်။ သူတို့သည် မဂ္ဂဇင်းအစောင် ၂၀ ကျော်နှင့် စာအုပ် ၅ အုပ်ကို လက်ခံယူလိုက်ကြပြီး နောက်ဆိပ်ကမ်းတစ်ခုသို့ ဆိုက်ကပ်သည့်အခါ သက်သေခံများကို ရှာဖွေဖို့ ကတိပေးခဲ့ကြသည်။
ဂျက်ဖ်နှင့် ဒက်ဘ်တို့သည် ကန်ကွန်မြို့ရှိ ဈေးရုံတစ်ရုံ၏ အစားအသောက်တန်းတွင် ချစ်စဖွယ်သမီးငယ်လေးနှင့် နိုင်ငံခြားသားမိသားစုတစ်စုကို သတိပြုမိလိုက်သည်။ သူတို့သည် ကလေးငယ် ချစ်စရာကောင်းကြောင်း ချီးမွမ်းပြောဆိုလိုက်ရာ ကလေး၏မိဘများက သူတို့အား ပီဇာစားရန် ခေါ်ဖိတ်လိုက်သည်။ ဤမိသားစုသည် အိန္ဒိယနိုင်ငံမှဖြစ်ကြောင်း သိလိုက်ရ၏။ သူတို့သည် ယေဟောဝါသက်သေများအကြောင်း တစ်ခါမျှ မကြားဖူးကြချေ၊ ကျွန်ုပ်တို့၏စာပေကိုလည်း တစ်ခါမျှ မတွေ့ဖူးခဲ့ကြချေ။ သူတို့သည် သက်သေခံစာပေတချို့ယူ၍ ဈေးရုံမှ ထွက်ခွာသွားခဲ့ကြသည်။
ကမ္ဘာလှည့်ခရီးသည်များ မျက်စိကျသည့် မျူဂျီရပ်စ်ကျွန်းပေါ်တွင် ကြင်စဦး တရုတ်လူမျိုးမောင်နှံတစ်စုံနှင့် ထပ်တူအဖြစ်မျိုး ဖြစ်ပျက်ခဲ့သည်။ သူတို့အား ဓာတ်ပုံရိုက်ပေးရန် ဂျက်ဖ်အား အကူအညီတောင်းရာ ဝမ်းပန်းတသာဖြင့် ရိုက်ပေးလိုက်၏။ ထို့နောက် သူတို့နှင့်စကားပြောကြည့်ရာမှ ယူနိုက်တက်စတိတ်တွင် ၎င်းတို့နေထိုင်ခဲ့သည်မှာ ၁၂ နှစ် ရှိပြီဖြစ်သော်လည်း ယေဟောဝါသက်သေများအကြောင်း မကြားဖူး၊ မမြင်ဖူးကြောင်း သိလိုက်ရလေသည်! စကားကောင်းကောင်း ပြောဖြစ်ခဲ့သည်။ ဂျက်ဖ်သည် သူတို့ပြန်သွားသည့်အခါ သက်သေခံများကို ရှာဖွေရန် အားပေးခဲ့လေသည်။
အလွတ်သဘောသက်သေခံရန် အခွင့်အလမ်းရနိုင်သည့် အထူးအခါသမယတစ်ခု သင့်ဒေသတွင် ရှိကောင်းရှိနိုင်သည်။ ယူနိုက်တက်စတိတ်သမ္မတသည် ဂွာနာဂျွာတိုပြည်နယ်အနီး မက္ကဆီကိုသမ္မတ၏ နွားမွေးမြူရေးခြံတွင် ၎င်းအားလာရောက်တွေ့ဆုံသောအခါ ကမ္ဘာတစ်ဝန်းမှ သတင်းထောက်များ လာရောက်သတင်းယူခဲ့ကြသည်။ သက်သေခံမိသားစုတစ်စုသည် ယင်းဖြစ်ရပ်ကို အခွင့်ကောင်းယူ၍ အင်္ဂလိပ်လိုဟောပြောရန် ဆုံးဖြတ်လိုက်ကြသည်။ လိုလိုလားလား တုံ့ပြန်ခံခဲ့ရ၏။ ဥပမာ၊ သတင်းထောက်တစ်ဦးသည် ကိုဆိုဗိုနှင့် ကူဝိတ်စစ်ပွဲကဲ့သို့သော စစ်ပွဲတော်တော်များများအကြောင်း သတင်းယူခဲ့ရ၏။ သူ၏လုပ်ဖော်ဆောင်ဖက်တစ်ဦးသည် ချောင်းမြောင်းပစ်ခတ်ခံရသဖြင့် သူ၏လက်တွင် သေဆုံးသွားခဲ့ရသည်။ အဆိုပါသတင်းထောက်သည် ရှင်ပြန်ထမြောက်ခြင်းအကြောင်း ကြားသိသွားသောအခါ ဘဝသည် ရည်ရွယ်ချက်ရှိကြောင်း သူ့ကိုသိခွင့်ပေးသည့်အတွက် ဘုရားသခင်အား မျက်ရည်ကျလျက် ကျေးဇူးတင်ခဲ့သည်။ သက်သေခံမောင်နှံကို နောက်ထပ်ပြန်တွေ့ရတော့မည်မဟုတ်သော်လည်း သမ္မာကျမ်းစာမှ ဤသတင်းကောင်းကို သူဘယ်တော့မျှ မေ့လျော့မှာမဟုတ်ကြောင်း ဆိုခဲ့ရှာသည်။
တွေ့ရှိရသည့်အတိုင်း ထိုသို့သောသက်သေခံခြင်း၏ အဆုံးရလဒ် မည်သို့ဖြစ်မည်ကိုကား မသိရှိရသေးချေ။ သို့ရာတွင်၊ ပညာရှိရှောလမုန်ဘုရင်က “သင်၏အစာကို ရေပေါ်မှာ ပစ်ချလော့။ ကာလကြာမြင့်မှ တစ်ဖန် တွေ့လေဦးမည်” ဟု မိန့်ဆိုခဲ့သည်။ ထို့ပြင် ဤသို့လည်း သူဆိုခဲ့၏– “နံနက်အချိန်၌ မျိုးစေ့ကိုကြဲလော့။ ညဦးအချိန်၌လည်း မကြဲဘဲမနေနှင့်။ အကြောင်းမူကား အဘယ်အရာသည် အကျိုးရှိမည်ကိုလည်းကောင်း၊ နှစ်ပါးစလုံးတို့သည် အညီအမျှအကျိုးရှိမည်ကိုလည်းကောင်း မသိနိုင်။” (ဒေ. ၁၁:၁၊ ၆) ပေါလုနှင့် ယေရှုတို့ ပြုခဲ့သည့်အတိုင်း၊ မက္ကဆီကိုနိုင်ငံ၏ အင်္ဂလိပ်စကားပြောလယ်ကွင်းတွင် ခေတ်သစ်သက်သေခံများ ပြုကြသည့်အတိုင်း ရေများစွာတို့အပေါ် “သင့်အစာကို” စိတ်ထက်သန်စွာ “ပစ်ချ” ပြီး “မျိုးစေ့ကို” ရက်ရက်ရောရော “ကြဲ” ပါလေ။