ဘုရားသခင့် မျက်နှာသာရရန် လူသားတို့၏ရှာပုံတော်
ဘုရားသခင့် မျက်နှာသာရရန် လူသားတို့၏ရှာပုံတော်
“ဘုရားသခင်ကို အယုံအကြည်မရှိသော၊ ကိုယ်တော်အား စကြဝဠာထိန်းချုပ်ရှင်၊ ဖန်ဆင်းရှင်အဖြစ် အယုံအကြည်မရှိသော လူ့အဖွဲ့အစည်းဟူ၍ မရှိဖူးပါ။ ဘာသာရေးနှင့်ပတ်သက်မှုမရှိအောင် တမင်တကာသီးသန့်ခွဲခြားနေသော အသင်းအဖွဲ့များပင် ထိုသို့ဖြစ်သည်။” ဘုရားသခင်—ရာဇဝင်အကျဉ်းချုပ်စာအုပ်၌ ဂျွန် ဘိုကာက ထိုသို့ဆိုထားသည်။ တစ်နည်းနည်းဖြင့် ဘုရားသခင်ကိုရှာပြီး ကိုယ်တော့်မျက်နှာသာရရန် ရှာပုံတော်ဖွင့်ခြင်းသည် လူ့အမူအကျင့်၏ ပင်ကိုစရိုက်တစ်ခုဖြစ်သည်။ ကမ္ဘာတစ်ဝန်းရှိ လူများစွာသည် ဘုရားသခင်၏မျက်နှာသာ အမှန်ရလိုကြသည်။ လူတို့၏ခံယူချက်များနှင့်အညီ ယင်းကို သူတို့ကြိုးစားပြုလုပ်ပုံကား ကွဲပြားခြားနားပေသည်။
ဘုရားသခင့်မျက်နှာသာရရန် လူကောင်းတစ်ယောက်ဖြစ်ဖို့သာလိုသည်ဟု အချို့ကယူမှတ်သည်။ အခြားသူများမှာမူ ဆင်းရဲသားတို့အား ပေးကမ်းစွန့်ကြဲခြင်းဖြင့် ဘုရားသခင့်မျက်နှာသာရနိုင်သည်ဟု ယူဆကြသည်။ ထို့အပြင် သန်းနှင့်ချီသောသူတို့က ဘာသာရေးအခမ်းအနားများပြုလုပ်ရန်၊ ထုံးတမ်းစဉ်လာများလိုက်လျှောက်ရန် အရေးကြီးသည်ဟု ယူဆကြ၏။
အခြားတစ်ဖက်တွင်မူ ဘုရားသခင်ထံ မချဉ်းကပ်နိုင်၊ ကိုယ်တော်သည် လူတို့နှင့် ခပ်တန်းတန်းနေ၏၊ ကိုယ်တော်သည် အလွန်အလုပ်များသောကြောင့် သာမန်လူတို့ကို ဂရုမစိုက်နိုင်ဟု ဆိုသူများလည်းရှိ၏။ ရှေးဂရိအတွေးအခေါ်ပညာရှင် ဧပိကုရုက ‘ဘုရား[သခင်]များသည် အလွန်အလှမ်းကွာဝေးသောကြောင့် လူတို့ကိုကောင်းကျိုး၊ ဆိုးကျိုး မပြုနိုင်’ ဟုယုံကြည်သည်ဟုဆိုကြ၏။ သို့သော် ထိုသို့တွေးခေါ်သူအများသည် ဘာသာရေးကိုင်းရှိုင်းသူများဖြစ်ကြသည်။ အချို့ဆိုလျှင် သေဆုံးသွားသော ဘိုးဘေးများ၏ မျက်နှာသာရရန် ပူဇော်ပသတတ်ကြသည်။
သင် မည်သို့ယူဆသနည်း။ ဘုရားသခင့် မျက်နှာသာရရန် ကျွန်ုပ်တို့၏ ကြိုးစားအားထုတ်မှုများကို ကိုယ်တော် အမှန်ပင် ဂရုပြုပါသလော။ ကျွန်ုပ်တို့သည် ဘုရားသခင့်စိတ်တော်နှင့်တွေ့ပြီး ကိုယ်တော်၏မျက်နှာသာရနိုင်သလော။
[Picture Credit Line on page 2]
COVER: Courtesy of ROE/Anglo-Australian Observatory, photograph by David Malin