သက်ကြီးရွယ်အိုများ—ခရစ်ယာန်ညီအစ်ကိုအသင်းအပင်းရှိ အဖိုးတန်သူများ
သက်ကြီးရွယ်အိုများ—ခရစ်ယာန်ညီအစ်ကိုအသင်းအပင်းရှိ အဖိုးတန်သူများ
‘ထာဝရဘုရားသခင်၏အိမ်တော်၌စိုက်ပျိုးသောသူတို့သည် ... ပွင့်လန်းကြလိမ့်မည်။ အသက်ကြီးသောကာလတွင်ပင် အသီးကိုသီး၍ ကြွယ်ဝစိမ်းလန်းကြလိမ့်မည်။’—ဆာလံ ၉၂:၁၃၊ ၁၄။
၁။ သက်ကြီးရွယ်အိုများကို လူအများ မည်သို့ရှုမြင်ကြသနည်း။
ယေဟောဝါသည် အသက်ကြီးရင့်လာသူများအပါအဝင် မိမိ၏သစ္စာရှိကျေးကျွန်အားလုံးကို ချစ်တော်မူ၏။ သို့သော် နိုင်ငံ့ခန့်မှန်းချက်တစ်ခုအရ အမေရိကန်ပြည်ထောင်စုရှိ သက်ကြီးရွယ်အို သန်းတစ်ဝက်နီးပါးသည် နှစ်စဉ် မတော်မတရားပြုခံရ သို့မဟုတ် ပစ်ပယ်ခံနေရသည်။ ကမ္ဘာတစ်ဝန်းမှ အလားတူသတင်းများအရ သက်ကြီးရွယ်အိုများကို မတော်မတရားပြုခြင်းသည် ကမ္ဘာချီပြဿနာဖြစ်နေကြောင်း သိရသည်။ ဤပြဿနာ၏ရင်းမြစ်ကို အဖွဲ့အစည်းတစ်ခုက ဤသို့ဆို၏– “ဇရာအိုများသည် အသုံးမကျ၊ အကျိုးမဖြစ်ထွန်းဘဲ သူတစ်ပါးကို မှီခိုအားထားလွန်းသည်ဟူသော သဘောထား လူတို့တွင် ပျံ့နှံ့လျက်ရှိသည်။”
၂။ (က) မိမိ၏တည်ကြည်သော ဇရာအိုကျေးကျွန်များကို ယေဟောဝါမည်သို့ရှုမြင်သနည်း။ (ခ) ဆာလံ ၉၂:၁၂-၁၅ တွင် အဘယ်စိတ်တက်ကြွဖွယ်ဖော်ပြချက်ကို တွေ့ရသနည်း။
၂ ယေဟောဝါဘုရားသခင်သည် တည်ကြည်သော သက်ကြီးရွယ်အိုကျေးကျွန်များကို တန်ဖိုးထားတော်မူ၏။ ကိုယ်တော်သည် ကျွန်ုပ်တို့၏ကာယရေး မစွမ်းဆောင်နိုင်မှုများထက် “အတွင်းလူ” ဖြစ်သည့် ကျွန်ုပ်တို့၏ဝိညာဉ်ရေးအခြေအနေကို အာရုံစိုက်တော်မူသည်။ (၂ ကောရိန္သု ၄:၁၆) ကိုယ်တော်၏နှုတ်မြွက်စကားတော် သမ္မာကျမ်းစာတွင် စိတ်တက်ကြွဖွယ် ဤအာမခံချက်ကို ကျွန်ုပ်တို့ တွေ့ရှိရသည်– “ဖြောင့်မတ်သောသူသည် စွန်ပလွံပင်ကဲ့သို့ပွင့်လန်း၍ လေဗနုန်တောင်ပေါ်မှာ အာရဇ်ပင်ကဲ့သို့ကြီးပွားလိမ့်မည်။ ထာဝရဘုရား[သခင်]၏အိမ်တော်၌ စိုက်ပျိုးသောသူတို့သည် ငါတို့ဘုရားသခင်၏တံတိုင်းတော်တွင် ပွင့်လန်းကြလိမ့်မည်။ အသက်ကြီးသောကာလတွင်ပင် အသီးကိုသီး၍ ကြွယ်ဝစိမ်းလန်းကြလိမ့်မည်။ ထိုသို့အားဖြင့် ... ထာဝရဘုရား[သခင်]သည် ဖြောင့်မတ်တော် ... မူသည်ဟု ထင်ရှား [ဖော်ပြ] လိမ့်သတည်း။” (ဆာလံ ၉၂:၁၂-၁၅) ဤအခန်းငယ်များကို စဉ်းစားသုံးသပ်ခြင်းဖြင့် အသင် အသက်ကြီးသူများသည် ခရစ်ယာန်ညီအစ်ကိုအသင်းအပင်းအတွက် အဖိုးတန်သူများဖြစ်နိုင်သည့်ကဏ္ဍများကို သိရှိရပါလိမ့်မည်။
‘အသက်ကြီးသောကာလတွင် အသီး,သီးခြင်း’
၃။ (က) ဖြောင့်မတ်သူများကို စွန်ပလွံပင်များနှင့် အဘယ်ကြောင့် ခိုင်းနှိုင်းထားသနည်း။ (ခ) သက်ကြီးရွယ်အိုများသည် မည်သို့ ‘အသက်ကြီးသောကာလတွင် အသီးကိုသီး’ နိုင်သနည်း။
၃ ဆာလံဆရာသည် ဖြောင့်မတ်သူများကို ‘ငါတို့ဘုရားသခင်၏တံတိုင်းတော်တွင် စိုက်ပျိုးထားသော’ စွန်ပလွံပင်များနှင့် ခိုင်းနှိုင်းထားသည်။ ထိုသူတို့သည် “အသက်ကြီးသောကာလတွင်ပင် အသီးကိုသီး” ကြ၏။ ယင်းသည် အလွန်အားရှိဖွယ်ဖြစ်သည် မဟုတ်ပေလော။ ကျက်သရေရှိ၍ ပင်စည်ဖြောင့်သော စွန်ပလွံပင်များကို ကျမ်းစာခေတ်ရှိ အရှေ့တိုင်းခြံဝင်းများတွင် မြင်တွေ့ရလေ့ရှိသည်။ စွန်ပလွံပင်များသည် လှပတင့်တယ်သည့်အပြင် အသီးလှိုင်လှိုင်သီးသောကြောင့် တန်ဖိုးထားခံရသည်၊ အချို့စွန်ပလွံပင်များသည် အနှစ်တစ်ရာကျော်အထိ အသီးဆက်သီးတတ်၏။ * သင်သည် စစ်မှန်သော ဝတ်ပြုရေးတွင် အခိုင်အမာရပ်တည်နေခြင်းအားဖြင့် အလားတူ “ကောင်းသောအကျင့်အမျိုးမျိုးတွင် အသီး,သီးနေ” နိုင်ပါသည်။—ကောလောသဲ ၁:၁၀၊ ကဘ။
၄၊ ၅။ (က) ခရစ်ယာန်များသည် အဘယ်အရေးပါသောအသီးများကို သီးရမည်နည်း။ (ခ) “နှုတ်ခမ်းအသီး” များသီးခဲ့ကြသော ကျမ်းစာထဲမှ သက်ကြီးရွယ်အိုများ၏ပုံနမူနာများကို ဖော်ပြပါ။
၄ ယေဟောဝါသည် ကိုယ်တော်နှင့် ကိုယ်တော့်ရည်ရွယ်တော်မူချက်များအကြောင်း ချီးမွမ်းပြောဆိုသည့်စကားများဖြစ်သော “နှုတ်ခမ်းအသီး” များကို ခရစ်ယာန်များအား သီးပွင့်စေလိုပါသည်။ (ဟေဗြဲ ၁၃:၁၅) ယင်းသည် ဇရာအိုဖြစ်နေသော သင်နှင့် သက်ဆိုင်ပါသလော။ အမှန်ပင်သက်ဆိုင်ပါ၏။
၅ သမ္မာကျမ်းစာတွင် ယေဟောဝါ၏နာမတော်နှင့် ရည်ရွယ်ချက်များအကြောင်း ရဲစွမ်းသတ္တိရှိရှိ သက်သေခံခဲ့သော သက်ကြီးရွယ်အိုများ၏ပုံနမူနာများစွာ ပါရှိသည်။ ယေဟောဝါ၏ပရောဖက်နှင့် ပြောရေးဆိုခွင့်ရှိသူအဖြစ် တာဝန်ခန့်အပ်ခံရချိန်တွင် မောရှေသည် အသက် “ခုနစ်ဆယ်” ကျော်နေပြီ။ (ဆာလံ ၉၀:၁၀; ထွက်မြောက်ရာ ၄:၁၀-၁၇) ယေဟောဝါ၏အကြွင်းမဲ့ပိုင်သအုပ်စိုးမှုအကြောင်း အသက်ကြီးရင့်သော ပရောဖက်ဒံယေလ သက်သေမခံဝံ့ဘဲ မနေခဲ့ပါ။ နံရံပေါ်မှ အံ့ဖွယ်လက်ရေးစာ၏ အနက်ကိုဖော်ပြရန် ဗေလရှာဇာဆင့်ခေါ်သောအခါ ဒံယေလသည် အသက် ၉၀ ကျော်ရှိလောက်ပြီ။ (ဒံယေလအခန်းကြီး ၅) သက်ကြီးရွယ်အို တမန်တော်ယောဟန်ကော။ တည်ကြည်စွာ အမှုထမ်းခဲ့ချိန်အကုန်ပိုင်း၌ သူသည် “ဘုရားသခင့်အကြောင်းကိုပြောခြင်း၊ ယေရှုအကြောင်းသက်သေခံခြင်းကြောင့်” ပတ်မုကျွန်းတွင် အကျဉ်းချခံခဲ့ရသည်။ (ဗျာ. ၁:၉၊ ကဘ) သက်ကြီးပိုင်းတွင် “နှုတ်ခမ်းအသီး” များသီးခဲ့ကြသည့် အခြားသော ကျမ်းစာဇာတ်ကောင်များကိုလည်း သင်သတိရပေမည်။—၁ ဓမ္မရာဇဝင် ၈:၁၊ ၁၀; ၁၂:၂; ၃ ဓမ္မရာဇဝင် ၁၄:၄၊ ၅; လုကာ ၁:၇၊ ၆၇-၇၉; ၂:၂၂-၃၂။
၆။ ယေဟောဝါသည် ဤနောက်ဆုံးကာလတွင် ပရောဖက်ပြုရန် “အသက်ကြီးသောသူတို့” ကို မည်သို့အသုံးပြုခဲ့ပြီနည်း။
၆ တမန်တော်ပေတရုသည် ဟေဗြဲပရောဖက်ယောလကို ကိုးကားပြီး ဤသို့ကြေညာခဲ့သည်– “ဘုရားသခင်က နောက်ဆုံးသောနေ့ရက်ကာလ၌ [“အသက်ကြီးသောသူတို့” အပါအဝင်] လူမျိုးတကာတို့အပေါ်သို့ ငါ၏ဝိညာဉ်တော်ကို ငါသွန်းလောင်းမည်။ ... [သူ]တို့သည် ပရောဖက်ပြုရကြလိမ့်မည်။” (တမန်တော် ၂:၁၇၊ ၁၈၊ သမ္မာ; ယောလ ၂:၂၈) ထိုသို့နှင့်အညီ ဤနောက်ဆုံးကာလတွင် ယေဟောဝါသည် မိမိ၏ရည်ရွယ်ချက်များကိုကြေညာရန် ဝိညာဉ်တော်ဖွားအတန်းအစားနှင့် “အခြားသိုး” များမှ သက်ကြီးရွယ်အိုများကို အသုံးပြုတော်မူပြီ။ (ယောဟန် ၁၀:၁၆) သူတို့ထဲမှအချို့သည် ဘုရားသခင့်နိုင်ငံတော်အသီးများကို ဆယ်စုနှစ်ချီ၍ တည်ကြည်စွာ သီးပွင့်ခဲ့ကြပြီ။
၇။ သက်ကြီးရွယ်အိုများသည် ကာယရေးအရ မစွမ်းဆောင်နိုင်ရာများရှိသော်လည်း ဘုရားသခင့်နိုင်ငံတော်အသီးကို မည်သို့ဆက်သီးပွင့်နေကြကြောင်း ဥပမာပေးပါ။
၇ ၁၉၄၁ ခုနှစ်တွင် အချိန်ပြည့်နိုင်ငံတော်ကြေညာသူတစ်ဦးဖြစ်ခဲ့သော ဆိုနီယာအကြောင်း သုံးသပ်ကြည့်ပါ။ နာတာရှည်ရောဂါသည်ဖြစ်နေသော်လည်း သူ၏နေအိမ်တွင် ကျမ်းစာသင်အံမှုများစွာကို သူ မှန်မှန်ကျင်းပခဲ့သည်။ “သတင်းကောင်းဟောပြောခြင်းဟာ ကျွန်မဘဝရဲ့ ကဏ္ဍတစ်ခုပဲ။ တကယ်တော့ အဲဒီအတွက် ကျွန်မအသက်ရှင်တာ။ ကျွန်မ ဘယ်တော့မှ မဟောဘဲမနေဘူး” ဟုဆိုနီယာရှင်းပြသည်။ မကြာသေးမီက ဆိုနီယာနှင့် သူ့အစ်မသြလစ်ဗ်တို့သည် ဆေးရုံစောင့်ဆိုင်းခန်းတွင် သူတို့ဆုံတွေ့ခဲ့သော ရောဂါကျွမ်းနေသူ ဂျဲနက်အား သမ္မာကျမ်းစာပါ မျှော်လင့်ချက်ကို ပြောပြခဲ့သည်။ ဘာသာတရားကိုင်းရှိုင်းသူဖြစ်သော ဂျဲနက်၏မိခင်သည် သူ၏သမီးအား ဤသို့မေတ္တာပြသည်ကို အလွန်အားရသွား၍ အိမ်တွင်းကျမ်းစာသင်အံမှု လက်ခံခဲ့ရာ ယခု အထူးတိုးတက်လျက်ရှိသည်။ အသင်လည်း ဘုရားသခင့်နိုင်ငံတော်အသီးကိုသီးရန် အလားတူ အခွင့်ကောင်းများယူနိုင်မည်လော။
၈။ ယေဟောဝါကို ယုံကြည်ကိုးစားကြောင်း ဇရာအိုကာလက် မည်သို့တင်ပြခဲ့သနည်း၊ သက်ကြီးရွယ်အိုခရစ်ယာန်များသည် သူ၏ပုံသက်သေကို မည်သို့တုပနိုင်သနည်း။
၈ ဇရာထောင်းမှုကြောင့် မစွမ်းဆောင်နိုင်ရာများရှိလာသော်လည်း ဘုရားသခင့်နိုင်ငံတော်ဟောပြောခြင်းလုပ်ငန်းကို မဆုတ်မနစ်ဇွဲဖြင့် ရဲရင့်စွာလုပ်ဆောင်နေခြင်းအားဖြင့် သက်ကြီးရွယ်အိုခရစ်ယာန်များသည် မောရှေနှင့်အနှစ်လေးဆယ် တောလမ်းလျှောက်ခဲ့သော တည်ကြည်သူ ဣသရေလအမျိုးသား ကာလက်၏ခြေရာကို လိုက်နေကြသည်။ ကတိထားရာပြည်ထဲဝင်ရန် ယော်ဒန်မြစ်ကိုဖြတ်ကူးချိန်တွင် ကာလက်သည် အသက် ၇၉ နှစ်ရှိလေပြီ။ သူသည် အောင်ပွဲခံ ဣသရေလတပ်သားတစ်ဦးအဖြစ် ခြောက်နှစ်တိုင် စစ်တိုက်ခိုက်ယောရှု ၁၄:၉-၁၄; ၁၅:၁၃၊ ၁၄) ယေဟောဝါသည် ကာလက်နှင့်အတူရှိခဲ့သကဲ့သို့ အသက်ကြီးရင့်ချိန်၌ ဘုရားသခင့်နိုင်ငံတော်အသီးကို သင်ဆက်၍သီးပွင့်နေစဉ် သင်နှင့်လည်းအတူရှိမည်ဖြစ်ကြောင်း စိတ်ချပါ။ သင်သည် ဆက်၍တည်ကြည်မည်ဆိုလျှင် ကိုယ်တော်ကတိထားရာ ကမ္ဘာသစ်တွင် သင့်အား နေရာတစ်နေရာ ပေးသနားပါလိမ့်မည်။—ဟေရှာယ ၄၀:၂၉-၃၁; ၂ပေတရု ၃:၁၃။
ပြီးနောက် ရရှိသည့်ဂုဏ်ဒြပ်ဖြင့် အေးအေးဆေးဆေးနေနိုင်ပါသည်။ သို့သော် ထိုသို့သူမနေခဲ့ဘဲ အလွန်ထွားကျိုင်းသော အာနကအမျိုးသားများနေထိုင်ရာ ယုဒပြည် တောင်တန်းဒေသရှိ “ကြီးမားခိုင်ခံ့သောမြို့” များကို တိုက်ခိုက်သိမ်းပိုက်ဖို့ ခက်ခဲသောတာဝန်ကို သူသတ္တိရှိရှိတောင်းဆိုခဲ့သည်။ ကာလက်သည် ယေဟောဝါ၏အကူအညီဖြင့် “ထာဝရဘုရား[သခင်] ... အမိန့်တော်ရှိသည်အတိုင်း ထိုသူတို့ကို နှင်ထုတ်” ခဲ့သည်။ (“ကြွယ်ဝစိမ်းလန်းကြလိမ့်မည်”
၉၊ ၁၀။ ဇရာအိုခရစ်ယာန်များသည် ယုံကြည်ခြင်းကျန်းခံ့ပြီး ဝိညာဉ်ခွန်အားကို မည်သို့ဆက်ထိန်းထားကြသနည်း။ (စာမျက်နှာ ၁၃ မှလေးထောင့်ကွက်ကိုရှု။)
၉ ယေဟောဝါ၏ သက်ကြီးရွယ်အိုကျေးကျွန်များ၏ တည်ကြည်မှုကို အသိအမှတ်ပြုစေလို၍ ဆာလံဆရာ ဤသို့သီဆိုခဲ့သည်– “ဖြောင့်မတ်သောသူသည် စွန်ပလွံပင်ကဲ့သို့ ပွင့်လန်း၍ လေဗနုန်တောင်ပေါ်မှာ အာရဇ်ပင်ကဲ့သို့ကြီးပွားလိမ့်မည်။ အသက်ကြီးသောကာလတွင်ပင် အသီးကိုသီး၍ ကြွယ်ဝစိမ်းလန်းကြလိမ့်မည်။”—ဆာလံ ၉၂:၁၂၊ ၁၄။
၁၀ တဖြည်းဖြည်းအသက်ကြီးရင့်လာသော်လည်း သင်၏ဝိညာဉ်ခွန်အားကို မည်သို့ဆက်ထိန်းထားနိုင်သနည်း။ စွန်ပလွံပင်သည် နှစ်ပေါင်းများစွာ လှပတင့်တယ်နေခြင်း၏လျှို့ဝှက်ချက်မှာ ရေချိုဖောဖောသီသီရခြင်းဖြစ်သည်။ အလားတူ သင်သည် ဘုရားသခင့်နှုတ်မြွက်စကားတော်ကို လေ့လာခြင်းနှင့် ကိုယ်တော့်အဖွဲ့အစည်းနှင့်ပေါင်းသင်းခြင်းအားဖြင့် ကျမ်းစာအမှန်တရားရေမှ အာဟာရ,ရယူနိုင်သည်။ (ဆာလံ ၁:၁-၃; ယေရမိ ၁၇:၇၊ ၈) သင့်တွင် ဝိညာဉ်ခွန်အားရှိနေခြင်းကြောင့် သင်သည် ယုံကြည်သူချင်းများအတွက် အဖိုးတန်သူဖြစ်သည်။ အသက်အရွယ်ကြီးရင့်သူ ယဇ်ပုရောဟိတ်မင်းယောယဒ၏အဖြစ်က ယင်းကို မည်သို့သက်သေထူကြောင်း သုံးသပ်ကြည့်ပါ။
၁၁၊ ၁၂။ (က) ယောယဒသည် ယုဒနိုင်ငံသမိုင်းတွင် အဘယ်အရေးပါသောအခန်းကဏ္ဍမှ ပါဝင်ခဲ့သနည်း။ (ခ) ယောယဒသည် စစ်မှန်သောဝတ်ပြုရေးကို မြှင့်တင်ရန် သူ၏သြဇာကို မည်သို့သုံးခဲ့သနည်း။
၁၁ ရည်မှန်းချက်ကြီးလွန်းသော မိဖုရားအာသလိသည် သူ၏မြေးအရင်းခေါက်ခေါက်တို့ကို သုတ်သင်ပယ်ရှင်းပြီး ယုဒပြည်ကိုအာဏာသိမ်းချိန်တွင် ယောယဒသည် အသက်တစ်ရာကျော်လောက်ပြီ။ သက်ကြီးရွယ်အိုယောယဒ အဘယ်အရာပြုလုပ်နိုင်သနည်း။ သူနှင့် သူ၏ဇနီးသည် လွတ်မြောက်ကျန်ရစ်သည့် တစ်ဦးတည်းသော နန်းမွေခံယောရှကို ဝတ်ပြုရာအိမ်တော်၌ ခြောက်နှစ်တိုင် ဝှက်ထားခဲ့၏။ ထို့နောက် ယောယဒသည် ခုနစ်နှစ်သားယောရှအား ရှင်ဘုရင်အဖြစ် လျှပ်တစ်ပြက်ကြေညာပြီး အာသလိကို ကွပ်မျက်စေခဲ့သည်။—၂ရာဇဝင်ချုပ် ၂၂:၁၀-၁၂; ၂၃:၁-၃၊ ၁၅၊ ၂၁။
၁၂ ရှင်ဘုရင်ကို စောင့်ရှောက်အုပ်ထိန်းသူအနေနှင့် ယောယဒသည် သူ၏သြဇာဖြင့် စစ်မှန်သောဝတ်ပြုရေးကို မြှင့်တင်ပေးခဲ့သည်။ “ရှင်ဘုရင်နှင့်လူအပေါင်းတို့သည် ထာဝရဘုရား[သခင်]၏လူဖြစ်ရမည်အကြောင်း ယောယဒသည် မိမိထံ၌ပဋိညာဉ်ဖွဲ့စေ၏။” ယောယဒ၏အမိန့်ဖြင့် လူတို့သည် မှားယွင်းသောဗာလဘုရား၏အိမ်တော်ကို ဖြိုဖျက်ကာ ၎င်း၏ ယဇ်ပလ္လင်များ၊ ရုပ်ပုံများနှင့် ယဇ်ပုရောဟိတ်များကို ပယ်ရှင်းလိုက်ကြ၏။ ယောယဒ၏လမ်းညွှန်မှုအတိုင်း ယောရှသည် ဝတ်ပြုရာအိမ်တော်လုပ်ငန်းများကို နဂိုအတိုင်းပြန်ဖြစ်စေပြီး အတော်ပင်လိုအပ်နေသော ပြုပြင်ခြင်းလုပ်ငန်းကို လုပ်ဆောင်ခဲ့သည်။ “ယဇ်ပုရောဟိတ်ယောယဒ သွန်သင်သောကာလပတ်လုံး ယောရှသည် ထာဝရဘုရား[သခင်]ရှေ့တော်၌ တရားသောအမှုကိုပြု၏။” (၂ ရာဇဝင်ချုပ် ၂၃:၁၁၊ ၁၆-၁၉; ၂၄:၁၁-၁၄; ၄ ဓမ္မရာဇဝင် ၁၂:၂) အသက် ၁၃၀ တွင် ယောယဒကွယ်လွန်သောအခါ သူသည် “ဣသရေလလူမျိုးတွင် ဘုရားသခင့်အမှုတော်နှင့် အိမ်တော်အမှုကို ကောင်းမွန်စွာဆောင်ရွက်သောသူဖြစ်” သောကြောင့် ရှင်ဘုရင်တို့နှင့်အတူ သင်္ဂြိုဟ်ခံရသည့် အထူးဂုဏ်ပြုခြင်းခံခဲ့ရသည်။—၂ ရာဇဝင်ချုပ် ၂၄:၁၅၊ ၁၆၊ သမ္မာ။
၁၃။ အသက်ကြီးရင့်သောခရစ်ယာန်များသည် မည်သို့ ‘စစ်မှန်သောဘုရားသခင်နှင့် ကိုယ်တော့်အိမ်တော်အမှုကို ကောင်းမွန်စွာဆောင်ရွက်’ နိုင်သနည်း။
၁၃ ကျန်းမာရေးမကောင်းခြင်း သို့မဟုတ် အခြားသောအခြေအနေများကြောင့် သင်သည် စစ်မှန်သောဝတ်ပြုရေးကို တိုးမြှင့်ပေးလိုသလောက် မပြုလုပ်နိုင်ဘဲနေပေမည်။ ထိုသို့ဖြစ်လျှင်ပင် သင်သည် ‘စစ်မှန်သောဘုရားသခင်နှင့် ကိုယ်တော့်အိမ်တော်အမှုကို ကောင်းမွန်စွာဆောင်ရွက်’ နိုင်ပါသည်။ အသင်းတော်အစည်းအဝေးများကို တက်ရောက်၊ ပါဝင်ဖြေဆိုခြင်းနှင့် လယ်ကွင်းဓမ္မအမှုတွင် တတ်နိုင်သ၍ ပါဝင်ခြင်းအားဖြင့် ယေဟောဝါ၏ဝိညာဉ်ရေးအိမ်တော်အတွက် ဇွဲကိုတင်ပြနိုင်ပါသည်။ ကျမ်းစာသွန်သင်ချက်ကို တလိုတလား သင်လက်ခံခြင်းနှင့် ‘သစ္စာနှင့်သတိပညာရှိသောကျွန်’ နှင့် အသင်းတော်ကို တည်ကြည်စွာထောက်မခြင်းတို့က ခရစ်ယာန်ညီအစ်ကိုအသင်းအပင်းကို အားရှိစေပါလိမ့်မည်။ (မဿဲ ၂၄:၄၅-၄၇) ထို့ပြင် “မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကိုကျင့်စေခြင်းငှာလည်းကောင်း” ဝတ်ပြုသူချင်း များကို အားပေးနိုင်သည်။ (ဟေဗြဲ ၁၀:၂၄၊ ၂၅; ဖိလေမုန် ၈၊ ၉) “အသက်ကြီးရင့်သောယောက်ျားတို့သည် [ကောင်းသော]သတိရှိသောသူ၊ ဣန္ဒြေစောင့်သောသူ၊ တည်ကြည်သောသူ၊ ယုံကြည်ခြင်း၊ ချစ်ခြင်း၊ သည်းခံခြင်း၌စိတ်ထက်သန်သောသူ ဖြစ်ရကြမည်အကြောင်း၊ ထိုနည်းတူ အသက်ကြီးရင့်သောမိန်းမတို့သည် အမူအရာမှာ [ခရစ်ယာန်]ဓမ္မအမှုနှင့်ထိုက်တန်သောသူ၊ မချောစားတတ်သောသူ၊ သောက်ကြူးခြင်းဖြင့် စပျစ်ရည်၌ကျွန်မခံသောသူ၊ ကောင်းသောအရာကိုသင်ပေးတတ်သောသူ ကိုယ်တိုင်ဖြစ်” ကြလော့ဟူသော တမန်တော်ပေါလု၏ဆုံးမစကားနှင့်အညီ ပြုမူလုပ်ဆောင်မည်ဆိုလျှင် သင်သည် အခြားသူများအတွက် ကောင်းချီးတစ်ရပ်ဖြစ်ပါလိမ့်မည်။—တိတု ၂:၂-၄၊ သမ္မာ။
၁၄။ စစ်မှန်သောဝတ်ပြုရေးကို တိုးမြှင့်ပေးရန် သက်တမ်းကြာခရစ်ယာန်ဦးစီးကြီးကြပ်မှူးများ အဘယ်အရာပြုလုပ်နိုင်သနည်း။
၁၄ အသင်သည် အသင်းတော်အကြီးအကဲတစ်ဦးအဖြစ် နှစ်ပေါင်းများစွာ အမှုထမ်းခဲ့ပြီလော။ လုပ်သက်ကြာပြီဖြစ်သော အသင်းတော်အကြီးအကဲတစ်ဦး၏ အကြံပြုချက်မှာ ဤသို့ဖြစ်သည်– “နှစ်များတစ်လျှောက် သင်ရရှိထားသောဉာဏ်ပညာကို ကိုယ်ကျိုးမဖက် အသုံးပြုပါ။ တာဝန်များကို ခွဲဝေပေးပါ၊ သင်၏အတွေ့အကြုံကို သင်ယူလိုစိတ်ရှိသူများအား ဝေမျှပေးပါ။ ... အခြားသူများ၏စွမ်းရည်ကို သိမြင်ပါ။ အဆိုပါစွမ်းရည်ကို တိုးတက်ထင်ရှားစေပြီး ပြုစုပျိုးထောင်ပေးပါ။ အနာဂတ်အတွက် ပြင်ဆင်ပါ။” (တရားဟောရာ ၃:၂၇၊ ၂၈) အစဉ်တိုးချဲ့လျက်ရှိသော ဘုရားသခင့်နိုင်ငံတော်လုပ်ငန်းကို သင်အမှန်တကယ် စိတ်ဝင်စားခြင်းက ကျွန်ုပ်တို့၏ခရစ်ယာန်ညီအစ်ကိုအသင်းအပင်းရှိ အခြားသူများကို များစွာအကျိုးပြုပါလိမ့်မည်။
‘ယေဟောဝါသည် ဖြောင့်မတ်တော်မူ၏ဟု ဖော်ပြကြ’
၁၅။ သက်ကြီးရွယ်အိုခရစ်ယာန်များသည် ‘ယေဟောဝါသည် ဖြောင့်မတ်တော်မူ၏’ ဟုမည်သို့ ‘ဖော်ပြ’ ကြသနည်း။
၁၅ ‘ယေဟောဝါသည် ဖြောင့်မတ်တော်မူ၏ဟု ဖော်ပြ’ ရမည့်တာဝန်ကို ဘုရားသခင်၏ သက်ကြီးရွယ်အိုကျေးကျွန်များ ရွှင်လန်းစွာ ဆောင်ရွက်ကြသည်။ အသင်သည် သက်ကြီးရွယ်အိုခရစ်ယာန်တစ်ဦးဖြစ်မည်ဆိုလျှင် ‘သင်၏ကျောက် ယေဟောဝါသည် မတရားသောအမှုနှင့် ကင်းလွတ်တော်မူ’ ကြောင်း သင်၏အပြောအဆို၊ အပြုအမူအားဖြင့် တင်ပြနိုင်ပါသည်။ (ဆာလံ ၉၂:၁၅) စွန်ပလွံပင်သည် ဖန်ဆင်းရှင်၏ အမြင့်မြတ်ဆုံးအရည်အသွေးများကို အသံတိတ်သက်သေခံသည်။ သို့သော် ယေဟောဝါသည် စစ်မှန်သောဝတ်ပြုရေးကို ယခု ယုံကြည်သက်ဝင်လာကြသူတို့အား မိမိအကြောင်း သက်သေခံရန်အခွင့်ထူးကို သင့်အား ပေးသနားထားတော်မူပြီ။ (တရားဟောရာ ၃၂:၇; ဆာလံ ၇၁:၁၇၊ ၁၈; ယောလ ၁:၂၊ ၃) ဤသို့သက်သေခံဖို့ အဘယ်ကြောင့်အရေးကြီးသနည်း။
၁၆။ ‘ယေဟောဝါသည် ဖြောင့်မတ်တော်မူ၏ဟု ဖော်ပြခြင်း’ သည်အရေးကြီးကြောင်း အဘယ်ကျမ်းစာပုံနမူနာက သရုပ်ဖော်သနည်း။
၁၆ ဣသရေလခေါင်းဆောင် ယောရှုသည် “အသက်ကြီး၍အိုမင်း” သောအခါ ဘုရားသခင်၏ဖြောင့်မတ်သောလုပ်ရပ်များကို ပြန်ယောရှု ၂၃:၁၊ ၂၊ ၁၄) အဆိုပါစကားများက လူတို့အား တစ်ခဏမျှ တည်ကြည်စေခဲ့သည်။ သို့သော် ယောရှုသေပြီးနောက် “ထာဝရဘုရား[သခင်]ကိုလည်းကောင်း၊ ဣသရေလအမျိုးအဖို့ပြုတော်မူသော အမှုတို့ကိုလည်းကောင်း မသိသောနောင်ကာလအမျိုးသားတို့သည် ပေါ်လာကြ၏။ ထိုကာလအခါ ဣသရေလအမျိုးသားတို့သည် ထာဝရဘုရား[သခင်]ရှေ့တော်၌ [မကောင်းမှု]ပြု၍ ဗာလဘုရားတို့ကို ဝတ်ပြုကြ၏။”—တရားသူကြီး ၂:၈-၁၁။
သတိရစေရန် “ဣသရေလအမျိုး အသက်ကြီးသူ၊ အကဲအမှူး၊ တရားသူကြီး၊ အရာရှိသောသူများနှင့်တကွ အမျိုးသားအပေါင်းတို့ကိုခေါ်” ခဲ့သည်။ သူဤသို့ဆိုသည်– “သင်တို့၏ဘုရားသခင် ... သည် သင်တို့အဖို့မိန့်တော်မူသော ကောင်းကျိုးတစ်စုံတစ်ပါးမျှ မယုတ်မလျော့၊ အကုန်အစင်ပြည့်စုံ ... ကြ၏။” (၁၇။ ယေဟောဝါသည် မျက်မှောက်ခေတ်တွင် မိမိ၏လူမျိုးတော်နှင့် မည်သို့ဆက်ဆံခဲ့ပြီနည်း။
၁၇ မျက်မှောက်ခေတ်ခရစ်ယာန်အသင်းတော်၏ တည်ကြည်မှုသည် ဘုရားသခင့်သက်ကြီးရွယ်အိုကျေးကျွန်များ၏ သက်သေထွက်ဆိုချက်အပေါ် မူမတည်ပါ။ သို့တိုင် ဤနောက်ဆုံးကာလတွင် မိမိ၏လူမျိုးတော်အတွက် ယေဟောဝါပြုတော်မူလျက်ရှိသော “အမှုကြီး” များအကြောင်းကို ကျွန်ုပ်တို့ကိုယ်တွေ့ ကြားသိရသောအခါ ကိုယ်တော်နှင့် ကိုယ်တော့်ကတိတော်များကို တိုး၍ယုံကြည်လာပါသည်။ (တရားသူကြီး ၂:၇; ၂ ပေတရု ၁:၁၆-၁၉) အသင်သည် ယေဟောဝါ၏အဖွဲ့အစည်းနှင့် နှစ်ပေါင်းများစွာပေါင်းသင်းခဲ့ပြီဖြစ်လျှင် သင့်ဒေသ၊ သင့်နိုင်ငံတွင် ဘုရားသခင့်နိုင်ငံတော်ကြေညာသူ အနည်းငယ်မျှသာရှိခဲ့သည့်အချိန် သို့မဟုတ် ဟောပြောခြင်းလုပ်ငန်း အပြင်းအထန် အတိုက်အခံကြုံခဲ့ရချိန်တို့ကို ပြန်သတိရပေမည်။ နှစ်များကုန်လွန်လာလေသော် ယေဟောဝါသည် အချို့သောအတားအဆီးများကို ဖယ်ရှားပစ်ပြီး ဘုရားသခင့်နိုင်ငံတော်လုပ်ငန်းကို ‘အရှိန်အဟုန်ဖြင့်မြှင့်တင်’ ပေးကြောင်း တွေ့မြင်ခဲ့ပေပြီ။ (ဟေရှာယ ၅၄:၁၇; ၆၀:၂၂) ကျမ်းစာအမှန်တရား ပိုမိုရှင်းလင်းလာ၍ ဘုရားသခင့်မျက်မြင်ရအဖွဲ့အစည်းသည် အဆင့်ဆင့်တိုးတက်ပြုပြင်လာသည်ကိုလည်း သင်တွေ့မြင်ခဲ့ပြီဖြစ်မည်။ (သု. ၄:၁၈; ဟေရှာယ ၆၀:၁၇) ယေဟောဝါ၏ဖြောင့်မတ်သောလုပ်ရပ်များနှင့်ပတ်သက်၍ သင်၏တွေ့ကြုံမှုများကို အခြားသူများအား ပြောပြခြင်းအားဖြင့် အားပေးတည်ဆောက်ရန် ကြိုးစားသလော။ ဤသို့ပြုလုပ်ခြင်းသည် ခရစ်ယာန်ညီအစ်ကိုအသင်းအပင်းကို အလွန်အားတက်စေ၍ ခွန်အားရှိစေသည်တကား!
၁၈။ (က) ‘ယေဟောဝါသည် ဖြောင့်မတ်တော်မူ၏ဟု ဖော်ပြခြင်း’ ၏ရေရှည်အကျိုးကျေးဇူးကို ဥပမာပေးပါ။ (ခ) ယေဟောဝါ၏ဖြောင့်မတ်ခြင်းကို အသင်ကိုယ်တိုင် မည်သို့ကြုံတွေ့ဖူးသနည်း။
၁၈ သင့်ကိုယ်ရေးကိုယ်တာကိစ္စတွင် ယေဟောဝါ၏မေတ္တာပါသော စောင့်ရှောက်မှု၊ လမ်းပြမှု ရရှိခဲ့ချိန်များ၌ကော။ (ဆာလံ ၃၇:၂၅; မဿဲ ၆:၃၃; ၁ ပေတရု ၅:၇) မာသအမည်ရှိသော သက်ကြီးရွယ်အိုညီအစ်မတစ်ဦးသည် အခြားသူများကို ဤသို့အားပေးလေ့ရှိသည်– “ဘာတွေပဲဖြစ်နေပါစေ၊ ယေဟောဝါကို ဘယ်တော့မှမစွန့်ပါနဲ့။ သင့်ကို ကိုယ်တော်ထောက်မပါလိမ့်မယ်။” ဤအကြံပေးချက်သည် ၁၉၆၀ ပြည့်လွန်နှစ်အစောပိုင်း၌ နှစ်ခြင်းခံခဲ့သော မာသ၏ကျမ်းစာသင်သားတစ်ဦးဖြစ်သူ တော်လ်မီးနာအပေါ် များစွာအကျိုးသက်ရောက်ခဲ့သည်။ တော်လ်မီးနာက ဤသို့ပြန်ပြောပြသည်– “ကျွန်မရဲ့ခင်ပွန်းဆုံးသွားတော့ ကျွန်မ တော်တော်လေးစိတ်ဓာတ်ကျခဲ့တယ်၊ ဒါပေမဲ့ မာသရဲ့စကားကိုသတိရပြီး အစည်းအဝေးတစ်ခုမှ မပျက်ဖို့ ကျွန်မစိတ်ပိုင်းဖြတ်ခဲ့တာ။ ဆက်လက်ရပ်တည်နိုင်ဖို့ ကျွန်မကိုယေဟောဝါ တကယ်ပဲခွန်အားပေးခဲ့တယ်။” တော်လ်မီးနာကိုယ်တိုင် သူ၏ကျမ်းစာသင်သားများကို နှစ်များတစ်လျှောက် အလားတူအကြံပေးခဲ့ပြီ။ အခြားသူများကို အားပေးခြင်း၊ ယေဟောဝါ၏ဖြောင့်မတ်သောလုပ်ရပ်များကို ဖော်ပြပြောဆိုခြင်းအားဖြင့် ယုံကြည်သူချင်းတို့၏ ယုံကြည်ခြင်းကို များစွာတည်ဆောက်ပေးနိုင်ပါသည်။
တည်ကြည်သောသက်ကြီးရွယ်အိုများကို ယေဟောဝါတန်ဖိုးထား
၁၉၊ ၂၀။ (က) ယေဟောဝါသည် သက်ကြီးရွယ်အိုကျေးကျွန်များ၏ လုပ်ဆောင်မှုများကို မည်သို့ရှုမြင်သနည်း။ (ခ) နောက်ဆောင်းပါးတွင် အဘယ်အကြောင်း သုံးသပ်ကြမည်နည်း။
၁၉ ကျေးဇူးတင်စိတ်ကင်းမဲ့သော မျက်မှောက်ခေတ်လောကသည် သက်ကြီးရွယ်အိုများကို ထည့်မစဉ်းစားကြချေ။ (၂ တိမောသေ ၃:၁၊ ၂) သူတို့အကြောင်း ထည့်စဉ်းစားလျှင်လည်း များသောအားဖြင့် အတိတ်က သူတို့၏ဖြစ်မြောက်မှုများနှင့်ပတ်သက်သည်၊ ယခု သူတို့လုပ်ဆောင်နေရာကို သတိရလေ့မရှိချေ။ သမ္မာကျမ်းစာကမူ ဤသို့ဆို၏– “သင်တို့လုပ်ဆောင်သောအလုပ်မှစ၍ သန့်ရှင်းသူတို့ကို အထက်ကလုပ်ကျွေးသည်သာမက ယခုပင်လုပ်ကျွေးခြင်းအမှုကိုလည်းကောင်း၊ ထိုသို့ပြုသောအားဖြင့် နာမတော်ကိုထောက်၍ ပြသောမေတ္တာကိုလည်းကောင်း ဘုရားသခင်သည်မေ့လျော့ရအောင် မတရားသောအရှင်ဖြစ်တော်မူသည်မဟုတ်။” (ဟေဗြဲ ၆:၁၀၊ သမ္မာ) မှန်ပါသည်၊ ယေဟောဝါဘုရားသခင်သည် အတိတ်က သင်ပြုလုပ်ခဲ့ရာများကို သတိရရုံမက ကိုယ်တော်၏လုပ်ငန်းတော်၌ သင်ဆက်လက်ပြုလုပ်နေရာတို့ကြောင့်လည်း သင့်ကို တန်ဖိုးထားတော်မူသည်။ မှန်ပါ၏၊ ကိုယ်တော်သည် တည်ကြည်မှုရှိသော သက်ကြီးရွယ်အိုများကို သီးပွင့်ဖြစ်ထွန်းသူများ၊ ဝိညာဉ်ရေးတွင် ကျန်းမာသန်စွမ်းပြီး စိတ်ထက်သန်သောခရစ်ယာန်များအဖြစ်ယူမှတ်ရာ ကိုယ်တော်၏တန်ခိုးတော်ကို ထင်ရှားစေသော သက်ရှိလူသားသက်သေများအဖြစ် သူတို့ကို ကိုယ်တော်ရှုမြင်တော်မူ၏။—ဖိလိပ္ပိ ၄:၁၃။
၂၀ ခရစ်ယာန်ညီအစ်ကိုအသင်းအပင်းရှိ ကျွန်ုပ်တို့၏သက်ကြီးရွယ်အိုများကို ယေဟောဝါရှုမြင်သကဲ့သို့ သင်ရှုမြင်ပါသလော။ ထိုသို့ရှုမြင်ပါက သူတို့ကို သင်မေတ္တာပြပါလိမ့်မည်။ (၁ ယောဟန် ၃:၁၈) သူတို့၏လိုအပ်ချက်များကို မေတ္တာပါပါ ဖြည့်စွက်ပေးနိုင်သည့် လက်တွေ့ကျနည်းလမ်းအချို့ကို နောက်ဆောင်းပါးတွင် သုံးသပ်ကြပါမည်။
[အောက်ခြေမှတ်ချက်]
^ အပိုဒ်၊ 3 စွန်ပလွံသီးတစ်တွဲလျှင် အသီးတစ်ထောင်မျှရှိနိုင်ပြီး ၁၈ ပေါင် သို့မဟုတ် ထို့ထက်မက အလေးချိန်ရှိသည်။ စာရေးဆရာတစ်ဦးက “အသီးသီးသော[စွန်ပလွံ]ပင်တစ်ပင်သည် ယင်း၏သက်တမ်းတစ်လျှောက်တွင် နှစ်တန်၊ သုံးတန်မျှသောအသီးများကို ယင်း၏ပိုင်ရှင်များအတွက် သီးပေးပေလိမ့်မည်” ဟုခန့်မှန်းသည်။
သင့်အဖြေများကား အဘယ်နည်း
• သက်ကြီးရွယ်အိုများ မည်သို့ ‘အသီး,သီး’ ကြသနည်း။
• သက်ကြီးရွယ်အိုခရစ်ယာန်များ၏ ဝိညာဉ်ခွန်အားသည် အဘယ်ကြောင့် အဖိုးတန်သောအရာဖြစ်သနည်း။
• ‘ယေဟောဝါသည် ဖြောင့်မတ်တော်မူ၏’ ဟု သက်ကြီးရွယ်အိုများ မည်သို့ ‘ဖော်ပြ’ နိုင်သနည်း။
• ယေဟောဝါသည် မိမိ၏သက်တမ်းကြာကျေးကျွန်များကို အဘယ်ကြောင့်တန်ဖိုးထားသနည်း။
[လေ့လာရန်မေးခွန်းများ]
[စာမျက်နှာ ၁၃ ပါ လေးထောင့်ကွက်]
ယုံကြည်ခြင်း၌ သူတို့ဆက်လက်ကျန်းခံ့နေကြပုံ
ယုံကြည်ခြင်း၌ကျန်းခံ့နေပြီး ဝိညာဉ်ခွန်အား ဆက်ရှိနေရန် သက်တမ်းကြာခရစ်ယာန်များကို အဘယ်အရာက ကူညီပေးခဲ့ပြီနည်း။ အချို့ ဤသို့ပြောပြကြသည်–
“ယေဟောဝါနဲ့ ကျွန်မတို့ရဲ့ဆက်ဆံရေးကို အာရုံစိုက်စေတဲ့ ကျမ်းချက်တွေဖတ်တာက တော်တော်အရေးပါတယ်။ ဆာလံ ၂၃ နဲ့ ၉၁ ကို ကျွန်မ ညတိုင်းနီးပါး ရွတ်ဆိုတယ်။”—ဩလစ်ဖ်၊ ၁၉၃၀ ပြည့်နှစ်တွင် နှစ်ခြင်းခံခဲ့။
“နှစ်ခြင်းဟောပြောချက်တိုင်းကို မပျက်မကွက် တက်ရောက်ပြီး ကျွန်တော့်အတွက် ဟောနေတာလို့ယူမှတ်ပြီး အသေအချာနားထောင်တယ်။ ကျွန်တော့်ကိုယ်ကိုဆက်ကပ်အပ်နှံထားတယ်လို့ ပီပီပြင်ပြင် အမြဲသတိရနေတာက ဆက်တည်ကြည်နိုင်ဖို့ အရေးပါတဲ့ခြေလှမ်းပဲ။”—ဟယ်ရီ၊ ၁၉၄၆ ခုနှစ်တွင် နှစ်ခြင်းခံခဲ့။
“နေ့စဉ်ဆုတောင်းဖို့ အရေးကြီးတယ်၊ ယေဟောဝါရဲ့အကူအညီ၊ ကာကွယ်မှုနဲ့ ကောင်းချီးကို အမြဲတမ်း တောင်းခံပြီး ‘သွားလေရာရာမှာ ကိုယ်တော်ကိုမျက်မှောက်ပြု’ ဖို့လိုတယ်။” (သု. ၃:၅၊ ၆)—အန်တိုနီယို၊ ၁၉၅၁ ခုနှစ်တွင် နှစ်ခြင်းခံခဲ့။
“နှစ်တွေ ဒီလောက်ကြာပြီးနောက် ယေဟောဝါအမှုတော်ကို အခုထိ တည်တည်ကြည်ကြည် ထမ်းဆောင်နေကြသူတွေရဲ့ တွေ့ကြုံမှုတွေကို နားထောင်တဲ့အခါ ကိုယ်တော့်အပေါ် ဆက်ပြီးတည်ကြည်ဖို့ ကျွန်မရဲ့စိတ်ဆုံးဖြတ်ချက်ကို အားသစ်လောင်းပေးတယ်။”—ဂျိုအဲန်း၊ ၁၉၅၄ ခုနှစ်တွင် နှစ်ခြင်းခံခဲ့။
“ကိုယ့်ကိုယ်ကို သိပ်အထင်မကြီးဖို့ အရေးကြီးတယ်။ ကျွန်မတို့မှာရှိတာတွေက ဘုရားသခင်ရဲ့မခံစားထိုက်တဲ့ကြင်နာမှုကြောင့်ပဲ။ ဒီလိုအမြင်မျိုး ရှိထားတာက အဆုံးတိုင်အောင် ခံနိုင်ရည်ရှိဖို့လိုအပ်တဲ့ ဝိညာဉ်အာဟာရအတွက် မှန်ကန်တဲ့လမ်းညွှန်မှုကို အမြဲမျှော်ကိုးစေပါတယ်။”—အာလီးန်၊ ၁၉၅၄ ခုနှစ်တွင် နှစ်ခြင်းခံခဲ့။
[စာမျက်နှာ ၁၁ ပါ ရုပ်ပုံ]
သက်ကြီးရွယ်အိုများသည် အဖိုးတန်ဘုရားသခင့်နိုင်ငံတော်အသီးများ သီးပွင့်ကြ
[စာမျက်နှာ ၁၄ ပါ ရုပ်ပုံ]
သက်ကြီးရွယ်အိုများ၏ ဝိညာဉ်ခွန်အားသည် အဖိုးတန်