သင်သည် ဘုရားသခင့် စိတ်တော်ကို ရွှင်လန်းစေနိုင်
သင်သည် ဘုရားသခင့် စိတ်တော်ကို ရွှင်လန်းစေနိုင်
ဘုရားသခင်၏ စိတ်နှလုံးကို ကျွန်ုပ်တို့အမှန်တကယ်ပင် ရွှင်လန်းစေနိုင် သို့မဟုတ် ထိခိုက်စေနိုင်ပါသလော။ ဘုရားသခင်၌ ပျော်ရွှင်နိုင်စွမ်းရှိသလော။ အချို့က ဘုရားသခင်ဟူသည် စွမ်းအားတစ်ခုမျှသာဖြစ်သည်ဟု ယူမှတ်ကြ၏။ ထိုသို့ဆိုလျှင် ပုဂ္ဂိုလ်တစ်ဦးမဟုတ်သော စွမ်းအားတစ်ခုသည် ရွှင်လန်းအားရနိုင်မည်လော။ ဖြစ်နိုင်မည်မဟုတ်ပါ။ သို့ဖြစ်၍ ဘုရားသခင်အကြောင်း သမ္မာကျမ်းစာ မည်သို့ဖော်ပြသည်ကို သုံးသပ်ကြည့်ပါ။
“ဘုရားသခင်သည် ... ဝိညာဉ်ဖြစ်တော်မူ၏” ဟုယေရှုခရစ်မိန့်တော်မူခဲ့သည်။ (ယောဟန် ၄:၂၄) ဝိညာဉ်သတ္တဝါတစ်ပါး၏ အသက်တာသည် လူသားအသက်တာနှင့် လုံးဝမတူပါ။ ၎င်းကို လူ့မျက်စိဖြင့် မမြင်နိုင်သော်လည်း ဝိညာဉ်သတ္တဝါတစ်ပါးတွင် ကိုယ်ခန္ဓာရှိပါသည်၊ ယင်းက ‘ဝိညာဉ်ကိုယ်ခန္ဓာဖြစ်၏။’ (၁ ကောရိန္သု ၁၅:၄၄; ယောဟန် ၁:၁၈) ဥပစာစကားအသုံးပြုကာ သမ္မာကျမ်းစာက ဘုရားသခင်၌ မျက်စိ၊ နား၊ လက် စသည်တို့ရှိသည်ဟူ၍ပင် ဖော်ပြထား၏။ * ဘုရားသခင်၌ ယေဟောဝါဟူသော နာမည်လည်း ရှိတော်မူ၏။ (ဆာလံ ၈၃:၁၈၊ ကဘ) သို့ဖြစ်သောကြောင့် သမ္မာကျမ်းစာပါဘုရားသခင်သည် ဝိညာဉ်ပုဂ္ဂိုလ်တစ်ပါးဖြစ်တော်မူသည်။ (ဟေဗြဲ ၉:၂၄) ကိုယ်တော်သည် “အသက်ရှင်သောဘုရား[သခင်]၊ ... ထာဝရဘုရင်ဖြစ်တော်မူ၏။”—ယေရမိ ၁၀:၁၀။
ယေဟောဝါသည် အမှန်တကယ်ပင်အသက်ရှင်သော ပုဂ္ဂိုလ်တစ်ပါး ဖြစ်သောကြောင့် ကိုယ်တော့်တွင် စဉ်းစားတွေးခေါ်နိုင်စွမ်း၊ ပြုမူလုပ်ဆောင်နိုင်စွမ်းရှိတော်မူ၏။ ကိုယ်တော်သည် အရည်အချင်းအမျိုးမျိုး၊ ခံစားမှုအမျိုးမျိုးရှိပြီး ကြိုက်နှစ်သက်ရာများနှင့် မကြိုက်သည့်အရာများရှိကြောင်း ဖော်ပြတော်မူ၏။ ကိုယ်တော်နှစ်သက်ရာများနှင့် မနှစ်သက်ရာများကို သမ္မာကျမ်းစာတွင် မြောက်မြားစွာ ဖော်ပြထားသည်။ အမှန်မှာ လူ့လက်ဖြစ်ဘုရားသခင်များနှင့် ရုပ်ပုံများသည် ၎င်းတို့ကိုပြုလုပ်ဖန်တီးသူတို့၏ စရိုက်လက္ခဏာများနှင့် အရည်အချင်းများကို ပုံဖော်ရုံမျှဖြစ်သည်၊ အတိုင်းအဆမဲ့တန်ခိုးရှင် ဘုရားသခင် ယေဟောဝါမူကား ကိုယ်တော်တိုင် စတင်ဖြစ်ပေါ်စေသော စိတ်လှုပ်ရှားမှုများကို လူတို့တွင် ထည့်သွင်းပေးတော်မူသော အရှင်ဖြစ်၏။—ကမ္ဘာဦး ၁:၂၇; ဟေရှာယ ၄၄:၇-၁၁။
ယေဟောဝါသည် “ပျော်ရွှင်သောဘုရားသခင်” အမှန်ပင်ဖြစ်တော်မူ၏။ (၁ တိမောသေ ၁:၁၁) ကိုယ်တော်၏ဖန်ဆင်းခြင်း လက်ရာတော်များကြောင့် ကိုယ်တော်ရွှင်လန်းအားရသည်သာမက ရည်ရွယ်တော်မူချက် ပြီးမြောက်အောင်မြင်မှု၌ နှစ်ထောင်းအားရတော်မူ၏။ ပရောဖက်ဟေရှာယမှတစ်ဆင့် ယေဟောဝါ ဤသို့ကြေညာသည်– “ငါ့အလိုရှိသမျှကို ငါပြည့်စုံစေမည်၊ ... ငါသည် နှုတ်ထွက်အတိုင်းပြုမည်။ ကြံသည်အတိုင်းစီရင်မည်။” (ဟေရှာယ ၄၆:၉-၁၁) ဆာလံဆရာ ဤသို့သီဆိုခဲ့၏– “ထာဝရဘုရား[သခင်]သည် မိမိအမှုတော်တို့တွင် ဝမ်းမြောက်တော်မူ၏။” (ဆာလံ ၁၀၄:၃၁) သို့သော် ဘုရားသခင်အား ရွှင်လန်းအားရစေသည့် အခြားအကြောင်းတစ်ခုရှိသေးသည်။ ကိုယ်တော် ဤသို့မိန့်တော်မူ၏– “ငါ့သား ပညာရှိလော့၊ ... ငါ့စိတ်ကို ရွှင်လန်းစေလော့။” (သု. ၂၇:၁၁) ထိုစကားက အဘယ်အရာကိုဆိုလိုကြောင်း စဉ်းစားကြည့်ပါ၊ ကျွန်ုပ်တို့သည် ဘုရားသခင်၏စိတ်တော်ကို ရွှင်လန်းစေနိုင်၏!
ဘုရားသခင့်စိတ်တော် ရွှင်လန်းရန် ကျွန်ုပ်တို့လုပ်ဆောင်နိုင်ပုံ
အိမ်ထောင်ဦးစီးဖြစ်သူနောဧသည် ယေဟောဝါ၏စိတ်နှလုံးကို မည်သို့ရွှင်လန်းစေခဲ့ကြောင်း သုံးသပ်ကြည့်ပါ။ နောဧသည် “ထာဝရဘုရား[သခင်]စိတ်တော်နှင့် တွေ့သောသူဖြစ်သတည်း၊” အကြောင်းမှာ “[နောဧသည်] မိမိအမျိုး၌ စုံလင်သောသူဖြစ်၏။” ထိုခေတ်က လူဆိုးများနှင့် လားလားမျှမတူ၊ နောဧ၏ယုံကြည်ခြင်းနှင့် နာခံမှုကြောင့် သူသည် ဘုရားသခင့်မျက်နှာသာရသဖြင့် ‘နောဧသည် ဘုရားသခင်နှင့်အတူ သွားလာ၏’ ဟုဆိုနိုင်သည်။ (ကမ္ဘာဦး ၆:၆၊ ၈၊ ၉၊ ၂၂) “နောဧသည် ... ယုံကြည်ခြင်းအားဖြင့် ကြောက်ရွံ့သောစိတ်ရှိ၍ မိမိအိမ်သူအိမ်သားတို့ကိုကယ်တင်ခြင်းငှာ သင်္ဘောကိုတည်လေ၏။” (ဟေဗြဲ ၁၁:၇) ယေဟောဝါသည် နောဧကို နှစ်သက်သဘောကျသဖြင့် လူ့သမိုင်း၏ ကသောင်းကနင်းနိုင်သော ထိုကာလတစ်လျှောက် သူနှင့်သူ၏မိသားစုကို ကယ်တင်ခြင်းဖြင့် ကောင်းချီးပေးတော်မူခဲ့သည်။
ဘိုးဘေးအာဗြဟံသည်လည်း ယေဟောဝါ၏ စိတ်တော်ကို အကင်းပါးစွာသိရှိခဲ့သည်။ ဘုရားသခင်၏တွေးခေါ်ပုံကို သူကောင်းစွာသိရှိထားကြောင်း သောဒုံနှင့် ဂေါမောရမြို့၏ အကျင့်ယိုယွင်းဖောက်ပြန်မှုကြောင့် ထိုမြို့တို့ကိုဖျက်ဆီးတော့မည်ဟု ယေဟောဝါ သူ့အားအသိပေးခဲ့ချိန်တွင် အထင်အရှားပေါ်လွင်သည်။ ဖြောင့်မတ်သောသူကို မတရားသောသူနှင့် ရောဖျက်ဆီးရန် ဘုရားသခင်တွေးတောလိမ့်မည်မဟုတ်ဟု ပြောနိုင်သည်အထိ ယေဟောဝါအား အာဗြဟံ ကောင်းစွာသိကျွမ်း၏။ (ကမ္ဘာဦး ၁၈:၁၇-၃၃) ထို့နောက် နှစ်အတန်ကြာကုန်လွန်လေသော် အာဗြဟံသည် “သေခြင်းမှထမြောက်စေခြင်းငှာ ဘုရားသခင် တတ်နိုင်တော်မူသည်ကို ... အောက်မေ့” သဖြင့် ဘုရားသခင့်ညွှန်ကြားချက်ကိုနာခံကာ “ဣဇာက်ကို ပူဇော်” ခဲ့သည်။ (ဟေဗြဲ ၁၁:၁၇-၁၉; ကမ္ဘာဦး ၂၂:၁-၁၈) အာဗြဟံသည် ဘုရားသခင်၏စိတ်တော်ကို ကောင်းစွာသိပြီး ခိုင်မာသောယုံကြည်ခြင်းနှင့် နာခံမှု အပြည့်ရှိသောကြောင့် သူ့ကို “‘ဘုရားသခင်၏အဆွေ’ ဟူ၍ ခေါ်ဝေါ်” ခဲ့ကြသည်။—ယာကုပ် ၂:၂၃။
ဘုရားသခင့်စိတ်တော်နှင့်တွေ့ရန် ကြိုးစားခဲ့သူ အခြားတစ်ဦးမှာ ရှေးဣသရေလနိုင်ငံ၏မင်း ဒါဝိဒ်ဖြစ်သည်။ သူနှင့်ပတ်သက်၍ ယေဟောဝါ ဤသို့မိန့်တော်မူခဲ့၏– “စိတ်နှလုံး၌ညီညွတ်သည်ဖြစ်၍ ငါ့အလိုကိုပြည့်စုံစေမည့်သူ၊ ယေရှဲ၏သားဒါဝိဒ်ကို ငါတွေ့ရပြီ။” (တမန်တော် ၁၃:၂၂) လူ့ဘီလူးကြီးဂေါလျတ်နှင့် မရင်ဆိုင်မီ ဒါဝိဒ်သည် ဘုရားသခင်အပေါ် လုံးလုံးလျားလျားယုံကြည်ကိုးစားမှုဖြင့် ဘုရင်ရှောလုကို ဤသို့ပြောခဲ့၏– “ခြင်္သေ့လက်၊ ဝံလက်မှ ကျွန်တော်ကို ကယ်နုတ်တော်မူသော ထာဝရဘုရား[သခင်]သည် ထိုဖိလိတ္တိလူလက်မှ ကယ်နုတ်တော်မူလိမ့်မည်။” ယေဟောဝါအား ဒါဝိဒ်ယုံကြည်ကိုးစားခြင်းကြောင့် ဂေါလျတ်ကို သတ်ပစ်နိုင်သည့်ကောင်းချီး ရခဲ့သည်။ (၁ ဓမ္မရာဇဝင် ၁၇:၃၇၊ ၄၅-၅၄) ဒါဝိဒ်သည် မိမိ၏လုပ်ဆောင်မှုများသာမက ‘ပြောသောစကားများ၊ စိတ်နှလုံးအကြံအစည်များကိုပါ ယေဟောဝါရှေ့တော်၌ နှစ်သက်ဖွယ်ဖြစ်’ စေလိုခဲ့သည်။—ဆာလံ ၁၉:၁၄။
ကျွန်ုပ်တို့ကော မည်သို့နည်း။ ယေဟောဝါနှစ်သက်တော်မူသောအမှုကို ကျွန်ုပ်တို့မည်သို့ပြုနိုင်မည်နည်း။ ဘုရားသခင်၏စိတ်တော်ကို ကျွန်ုပ်တို့ပိုသိမြင်လာလေ ကိုယ်တော်အား စိတ်ရွှင်လန်းစေရန် ကျွန်ုပ်တို့အဘယ်အရာပြုလုပ်ရမည်ကို ပိုသဘောပေါက်လာလေဖြစ်မည်။ သို့ဖြစ်၍ သမ္မာကျမ်းစာကို ကျွန်ုပ်တို့ဖတ်ရှုသည့်အခါ ဘုရားသခင်၏ စိတ်တော်ကိုသိရှိရန် ကြိုးစားအားထုတ်ဖို့ အရေးကြီးသည်၊ သို့မှသာ ကျွန်ုပ်တို့သည် ‘ယေဟောဝါနှင့် ထိုက်လျောက်စွာကျင့်၍ အရာရာ၌ နှစ်သက်တော်မူစေခြင်းငှာ ပညာအမျိုးမျိုး၊ ဝိညာဉ်ရေးဉာဏ်ပညာအမျိုးမျိုးအားဖြင့် တိကျမှန်ကန်သောအသိပညာကို အကုန်အစင်နားလည်လာမည်’ ဖြစ်သည်။ (ကောလောသဲ ၁:၉၊ ၁၀) အသိပညာက တစ်ဖန် ယုံကြည်ခြင်းကို တိုးပွားစေသည်။ ယင်းသည် အရေးကြီး၏၊ အကြောင်းမူကား “ယုံကြည်ခြင်းမရှိလျှင် ဘုရားသခင်၏စိတ်တော်နှင့် မတွေ့နိုင်” ပါ။ (ဟေဗြဲ ၁၁:၆) မှန်ပါသည်၊ ခိုင်ခံ့သောယုံကြည်ခြင်းရှိရန် ကြိုးစားအားထုတ်ခြင်း၊ ကျွန်ုပ်တို့၏ အသက်တာကို ယေဟောဝါ၏အလိုတော်နှင့် ကိုက်ညီစေခြင်းအားဖြင့် ကိုယ်တော်၏စိတ်တော်ကို ရွှင်လန်းစေနိုင်သည်။ တစ်ချိန်တည်းတွင် ယေဟောဝါ၏စိတ်တော် မနာစေရန် ကျွန်ုပ်တို့ဂရုစိုက်ကြရမည်။
ဘုရားသခင်အား စိတ်မနာစေနှင့်
ယေဟောဝါ၏စိတ်တော် နာခြင်းနှင့်ပတ်သက်သည့် ပုံဥပမာတစ်ခုကို နောဧခေတ်မှတ်တမ်းတွင် တွေ့ရှိရသည်။ ထိုအချိန်က “မြေကြီးသည် [မကောင်းမှု]နှင့် ပြည့်စုံလေ၏။ ဘုရားသခင်သည် မြေကြီးကိုကြည့်ရှုသောအခါ ပုပ်စပ်လျက်ရှိသည်ကို မြင်တော်မူ၏။ အကြောင်းမူကား မြေကြီးပေါ်မှာ လူအပေါင်းတို့သည် ဖောက်ပြန်ခြင်းသို့ရောက်ကြပြီ။” ဖောက်ပြန်ပြီး မကောင်းမှုနှင့်ပြည့်နေသည်ကို ဘုရားသခင် တွေ့မြင်သောအခါ မည်သို့ခံစားခဲ့ရသနည်း။ “မြေကြီးပေါ်မှာ လူကိုဖန်ဆင်းတော်မူသည်ကို နောင်တရ၍ နှလုံးတော်ပူပန် [“နာကျင်၊” ကဘ] လျက်ရှိတော်မူ၏” ဟုသမ္မာကျမ်းစာကဖော်ပြ၏။ (ကမ္ဘာဦး ၆:၅၊ ၆၊ ၁၁၊ ၁၂) လူတို့၏အကျင့်အကြံသည် အလွန်ဆိုးညစ်သောကြောင့် ဘုရားသခင်နောင်တရ၊ ဝမ်းနည်းတော်မူခဲ့သည်၊ ရေလွှမ်းမိုးဘေးမတိုင်မီ ဆိုးသွမ်းသောလူများနှင့်ပတ်သက်၍ ကိုယ်တော်၏သဘောထား ပြောင်းလဲသွားသည်အထိ ဖြစ်ခဲ့သည်။ ဆိုးသွမ်းမှုကို ဘုရားသခင် မနှစ်သက်သောကြောင့် လူသားတို့၏ဖန်ဆင်းရှင်အဖြစ်မှ သူတို့ကိုဖျက်ဆီးသူအဖြစ်သို့ ကိုယ်တော်၏သဘောထား ပြောင်းလဲခဲ့သည်။
ယေဟောဝါ၏လူမျိုးဖြစ်သော ရှေးဣသရေလလူမျိုးသည် ကိုယ်တော်၏စိတ်တော်ကို မထောက်ထား၊ မေတ္တာပါညွှန်ကြားချက်များကို ထပ်ခါတလဲ လျစ်လျူရှုကြသည့်အတွက်လည်း ကိုယ်တော်စိတ်နာခဲ့သည်။ ဆာလံဆရာ ဤသို့မြည်တမ်းခဲ့၏– “သူတို့သည် ကိုယ်တော်ကို တော၌ပုန်ကန်၍ လူဆိတ်ညံရာအရပ်၌ စိတ်တော်နာဖွယ်သောအကြောင်းကို ကြိမ်ဖန်များစွာ ပြုကြပါသည်တကား! ဘုရားသခင်ကို အဖန်ဖန်စုံစမ်း၍ ဣသရေလအမျိုး၌ သန့်ရှင်းတော်မူသောဘုရား[သခင်]ကို ဆန့်ကျင်ဘက်ပြုကြပါသည်။” သို့တိုင် “ကိုယ်တော်မူကား [ကြင်နာ]စိတ်ရှိ၍ သူတို့ကိုမဖျက်ဆီးဘဲ အပြစ်လွှတ်တော်မူ၏။ ကြိမ်ဖန်များစွာစိတ်တော်ပြေ၍ အမျက်တော်ကို နှိုးဆော်တော်မမူ။” (ဆာလံ ၇၈:၃၈-၄၁) ပုန်ကန်သော ဣသရေလလူမျိုးသည် သူတို့ခံထိုက်သည့် အပြစ်၏အကျိုးဆက်ကို ခံစားနေရချိန်တွင်ပင် “သူတို့ခံရသမျှ [ဆင်းရဲခြင်း] ကို [ဘုရားသခင်] ကိုယ်တော်တိုင်ခံရာ ရောက်တော်မူ၍” ဟုသမ္မာကျမ်းစာဆို၏။—ဟေရှာယ ၆၃:၉၊ သမ။
ဘုရားသခင်သည် သူတို့ကို သနားကြင်နာကြောင်း အထောက်အထားများစွာတွေ့ရှိကြရသော်လည်း ဣသရေလလူမျိုးသည် “ဘုရားသခင်၏တမန်တို့ကိုသရော်၍ စကားတော်ကိုမထီမဲ့မြင်ပြုလျက် ပရောဖက်တို့ကို ပြောင်လှောင်သောကြောင့် ထာဝရဘုရား[သခင်]၏အမျက်တော် မငြိမ်းနိုင်အောင် မိမိလူမျိုးအပေါ်သို့ရောက်” ခဲ့သည်။ (၂ ရာဇဝင်ချုပ် ၃၆:၁၆၊ သမ္မာ) လည်ပင်းခိုင်မာစွာ သူတို့ပုန်ကန်လျက်နေကြသောကြောင့် နောက်ဆုံးတွင် “သန့်ရှင်းသောဝိညာဉ်တော်ကို [စိတ်]နာစေ” သဖြင့် ယေဟောဝါ၏မျက်နှာသာတော် ဆုံးရှုံးခဲ့ရလေသည်။ (ဟေရှာယ ၆၃:၁၀) ရလဒ်ကား အဘယ်နည်း။ သူတို့ကို ဘုရားသခင်ကာကွယ်မပေးတော့သဖြင့် ဗာဗုလုန်လူမျိုးများက ယုဒနိုင်ငံကိုသိမ်းပိုက်အနိုင်ယူပြီး ယေရုရှလင်မြို့ကို ဝင်ရောက်ဖျက်ဆီးချိန်တွင် သူတို့အပေါ် ဘေးဆိုးဆိုက်ခဲ့လေသည်။ (၂ ရာဇဝင်ချုပ် ၃၆:၁၇-၂၁) လူတို့သည် ရွံရှာဖွယ် အပြစ်ရှိသောဘဝလမ်းစဉ်ကို ရွေးချယ်လုပ်ဆောင်ခြင်းဖြင့် ဖန်ဆင်းရှင်၏စိတ်တော်ကို ထိခိုက်စေကြခြင်းသည် ဝမ်းနည်းစရာပင်!
ဘုရားသခင်သည် မဖြောင့်မတ်သောအမူအကျင့်ကြောင့် စိတ်အလွန်နာတတ်ကြောင်း သမ္မာကျမ်းစာက ရှင်းလင်းပြတ်သားစွာဖော်ပြသည်။ (ဆာလံ ၇၈:၄၁) ဘုရားသခင်စက်ဆုပ်ရွံရှာသည့်အရာများတွင် မာနကြီးခြင်း၊ လိမ်လည်ခြင်း၊ လူ့အသက်သတ်ခြင်း၊ မှော်အတတ်လိုက်စားခြင်း၊ ဗေဒင်ဟောခြင်း၊ ဘိုးဘေးကိုးကွယ်ခြင်း၊ အကျင့်ယိုယွင်းခြင်း၊ လိင်တူဆက်ဆံခြင်း၊ အိမ်ထောင်ရေးဖောက်ပြန်ခြင်း၊ သွေးနီးလွန်းသူချင်း အိမ်ထောင်ပြုခြင်း၊ ဆင်းရဲသားများကို ဖိနှိပ်ခြင်းတို့ ပါဝင်သည်။—ဝတ်ပြုရာ ၁၈:၉-၂၉; ၁၉:၂၉; တရားဟောရာ ၁၈:၉-၁၂; သု. ၆:၁၆-၁၉; ယေရမိ ၇:၅-၇; မာလခိ ၂:၁၄-၁၆။
ရုပ်ပုံကိုးကွယ်ခြင်းကို ယေဟောဝါ မည်သို့ယူမှတ်သနည်း။ ထွက်မြောက်ရာ ၂၀:၄၊ ၅ ကဤသို့ဆိုသည်– “အထက်မိုးကောင်းကင်၌လည်းကောင်း၊ အောက်အရပ်မြေကြီးပေါ်၌လည်းကောင်း၊ မြေကြီးအောက်ရေထဲ၌လည်းကောင်း ရှိသောအရာနှင့် ပုံသဏ္ဌာန်တူ ... ကို ကိုယ်အဖို့မလုပ်နှင့်။ ဦးမချ ဝတ်မပြုနှင့်။” အဘယ်ကြောင့်နည်း။ ယင်းတို့ကို “ထာဝရဘုရား[သခင်]သည် စက်ဆုပ်ရွံရှာတော်မူ” သောကြောင့်ဖြစ်သည်။ (တရားဟောရာ ၇:၂၅၊ ၂၆) တမန်တော်ယောဟန်က “ချစ်သားတို့ ရုပ်[ပုံ]ကို ကြဉ်ရှောင်ကြလော့” ဟုသတိပေးခဲ့သည်။ (၁ ယောဟန် ၅:၂၁) ထို့ပြင် ပေါလုက “ငါ့ချစ်သူတို့၊ ရုပ်[ပုံ]ကိုးကွယ်ခြင်းအမှုကို ကြဉ်ရှောင်ကြလော့” ဟုရေးသားခဲ့သည်။—၁ ကောရိန္သု ၁၀:၁၄။
ဘုရားသခင့် မျက်နှာသာရရန် ကြိုးစားပါ
“ဖြောင့်မတ်သောသူတို့မူကား [ဘုရားသခင်]နှင့် မိတ်သဟာယဖွဲ့ရသောအခွင့်ရှိကြ၏။” “ဖြောင့်သောလမ်းသို့လိုက်သောသူတို့ကို [ကိုယ်တော်] နှစ်သက်တော်မူ၏။” (သု. ၃:၃၂; ၁၁:၂၀) ဘုရားသခင်၏ဖြောင့်မတ်သော စိတ်တော်ကို ခေါင်းမာမာနှင့် လျစ်လျူရှုနေမည်၊ ဆက်တော်လှန်နေမည်ဆိုလျှင်ကား ကိုယ်တော်၏အမျက်ကို မကြာမီခံစားကြရလိမ့်မည်။ (၂ သက်သာလောနိတ် ၁:၆-၁၀) ကိုယ်တော်သည် ယနေ့ နေရာအနှံ့တွေ့နေရသော ဆိုးသွမ်းမှုအားလုံးကို မကြာမီ အဆုံးတိုင်စေတော့မည်။—ဆာလံ ၃၇:၉-၁၁; ဇေဖနိ ၂:၂၊ ၃။
သို့သော် ယေဟောဝါသည် “အဘယ်သူမျှမပျက်စီးဘဲ ရှိသမျှတို့သည် နောင်တရစေခြင်းငှာ အလိုတော်ရှိ” ကြောင်း သမ္မာကျမ်းစာက ရှင်းလင်းစွာဖော်ပြထား၏။ (၂ ပေတရု ၃:၉) ပြုပြင်ပြောင်းလဲ၍မရသူဖြစ်လိုသူတို့ကို မနှစ်သက်ကြောင်း ကိုယ်တော်ဖော်ပြရသည်ထက် ကိုယ်တော်အားချစ်မြတ်နိုးသော ဖြောင့်မတ်သူများကို နှစ်သက်မြတ်နိုးကြောင်းဖော်ပြရန် ပို၍နှစ်သက်တော်မူ၏။ ယေဟောဝါသည် ‘ဆိုးသောသူ အသေခံခြင်းအမှုကို နှစ်သက်သည်မဟုတ်။ ဆိုးသောသူသည် မိမိဆိုးသောလမ်းမှလွှဲ၍ အသက်ရှင်ခြင်းအမှုကိုသာ နှစ်သက်၏။’—ယေဇကျေလ ၃၃:၁၁။
ထို့ကြောင့် မည်သူမျှ ယေဟောဝါ၏အမျက်တော်ကိုခံရသူ ဖြစ်စရာမလိုပါ။ ‘ယေဟောဝါသည် အလွန်သနားစုံမက်တော်မူ၏။’ (ယာကုပ် ၅:၁၁) ဘုရားသခင်သည် “သင်တို့ကို သတိနှင့်ကြည့်ရှုတော်မူသောကြောင့်” ကိုယ်တော်အား အပြည့်အဝယုံကြည်စိတ်ချစွာဖြင့် သင်တို့၏ “စိုးရိမ်ခြင်းအမှုရှိသမျှတို့ကို ကိုယ်တော်၌အပ်နှံ” နိုင်ပါသည်။ (၁ပေတရု ၅:၇) ဘုရားသခင်အား စိတ်နှလုံးရွှင်လန်းစေသူများသည် ကိုယ်တော်၏မျက်နှာသာရ ကိုယ်တော့်မိတ်ဆွေများဖြစ်ခွင့်ရှိကြောင်း ယုံကြည်စိတ်ချပါ။ သို့ဖြစ်၍ “သခင်ဘုရားနှစ်သက်တော်မူသောအရာသည် အဘယ်အရာဖြစ်သည်ကို သင်ကြ” ရန် ယခင်ကထက် ယခု ပို၍အရေးတကြီးလိုအပ်နေသည်။—ဧဖက် ၅:၁၀။
မခံစားထိုက်သောကြင်နာမှုအားဖြင့် ဘုရားသခင်သည် ကိုယ်တော်၏ မွန်မြတ်သည့်အရည်အသွေးများနှင့် စိတ်တော်ကို ဖော်ပြခဲ့ခြင်းသည် အလွန်ကောင်းလိုက်လေခြင်း! အသင်သည်လည်း ကိုယ်တော်၏စိတ်နှလုံးကို ရွှင်လန်းစေနိုင်၏။ ထို့ကြောင့် ဘုရားသခင့်စိတ်တော်ကို သင်ရွှင်လန်းစေလိုပါက သင့်ဒေသရှိ ယေဟောဝါသက်သေများနှင့် ဆက်သွယ်ပါဟု ကျွန်ုပ်တို့တိုက်တွန်းလိုသည်။ ဘုရားသခင့်စိတ်တော်နှင့်တွေ့ရန် သူတို့ကြိုးစားအားထုတ်ခဲ့ရာတွင် လက်တွေ့ကျပြီး လုပ်ဆောင်နိုင်သည်ကား အဘယ်အရာများဖြစ်ကြောင်း သူတို့ဝမ်းသာအားရ ဖော်ပြလိုကြပါလိမ့်မည်။
[အောက်ခြေမှတ်ချက်]
^ အပိုဒ်၊ 3 “သမ္မာကျမ်းစာက ဘုရားသခင်ကို လူ့အသွင်ဖြင့် အဘယ်ကြောင့်ဖော်ပြသနည်း” ခေါင်းစဉ်ရှိ လေးထောင့်ကွက်ကိုရှု။
[စာမျက်နှာ ၇ ပါ လေးထောင့်ကွက်]
သမ္မာကျမ်းစာက ဘုရားသခင်ကို လူ့အသွင်ဖြင့် အဘယ်ကြောင့်ဖော်ပြသနည်း
‘ဘုရားသခင်သည် ဝိညာဉ်ဖြစ်တော်မူ’ သောကြောင့် ကိုယ်တော်အား ပကတိမျက်စိဖြင့် မမြင်နိုင်ပါ။ (ယောဟန် ၄:၂၄) ထို့ကြောင့် ဘုရားသခင်၏ တန်ခိုးကြီးမားမှု၊ ဂုဏ်ကျက်သရေကြီးမြင့်မှုနှင့် စီရင်တော်မူချက်များကို ကျွန်ုပ်တို့ သဘောပေါက်နားလည်စေရန် သမ္မာကျမ်းစာက ဘုရားသခင်ကို ဥပမာအလင်္ကာ၊ ရူပကအလင်္ကာနှင့် လူ့အသွင်ကဲ့သို့သော ဥပစာအသုံးအနှုန်းတို့ဖြင့် ဖော်ပြထားသည်။ ဘုရားသခင်၏ ဝိညာဉ်ခန္ဓာသည် မည်သို့မည်ပုံရှိသည်ကို ကျွန်ုပ်တို့မသိရသော်လည်း သမ္မာကျမ်းစာက ဘုရားသခင်တွင် မျက်စိ၊ နားရွက်၊ လက်၊ လက်ရုံး၊ လက်ချောင်း၊ ခြေထောက်နှင့် နှလုံးတို့ရှိသည့်ပုံစံမျိုးဖြင့် ဖော်ပြထားခြင်းဖြစ်သည်။—ကမ္ဘာဦး ၈:၂၁; ထွက်မြောက်ရာ ၃:၂၀; ၃၁:၁၈; ယောဘ ၄၀:၉; ဆာလံ ၁၈:၉; ၃၄:၁၅။
ထိုသို့ရုပ်လုံးဖော်ရေးသားထားခြင်းကြောင့် ဘုရားသခင်၏ ဝိညာဉ်ခန္ဓာတွင် လူ့ကိုယ်အင်္ဂါများရှိသည်ဟု မဆိုလိုပါ။ ဘုရားသခင်ကို လူအသွင်ဖြင့်ဖော်ပြခြင်းကြောင့် စာသားအတိုင်း ယူမှတ်ရမည်မဟုတ်ပါ။ ယင်းသို့ဖော်ပြခြင်းက ဘုရားသခင်အား လူတို့ ပိုနားလည်စေရန်သာဖြစ်သည်။ ထိုကဲ့သို့သော ဥပစာအသုံးအနှုန်းများမသုံးပါက ဘုရားသခင်ကို လူသားတို့ နားလည်သဘောပေါက်ရန် ခဲယဉ်းလိမ့်မည်၊ လုံးလုံးပင်နားမလည်နိုင်ဘဲ ဖြစ်ပေလိမ့်မည်။ ထိုသို့ဆိုသောကြောင့် ယေဟောဝါဘုရားသခင်၏ ကိုယ်ရည်ကိုယ်သွေးကို လူတို့ကြံဖန်ဖော်ပြထားသည်ဟု မဆိုလိုပါ။ လူသည် ဘုရားသခင်၏ ပုံသဏ္ဌာန်တော်နှင့်အညီ ဖန်ဆင်းခံရသည်ဟု သမ္မာကျမ်းစာက ရှင်းရှင်းလင်းလင်းဖော်ပြထားသည်၊ လူ့ပုံသဏ္ဌာန်နှင့်အညီ ဘုရားသခင် ဖြစ်လာခြင်းမဟုတ်ပါ။ (ကမ္ဘာဦး ၁:၂၇) ကျမ်းရေးသူများကို “ဘုရားသခင်မှုတ်သွင်းတော်မူ” သောကြောင့် ဘုရားသခင်၏ကိုယ်ရည်ကိုယ်သွေးကို သူတို့ရေးသားဖော်ပြရာတွင် အမှန်မှာ ဘုရားသခင်ကိုယ်တော်တိုင် ဖော်ပြသောအရည်အချင်းများကို ပြန်ဖော်ပြကြခြင်းသာဖြစ်သည်၊ ကိုယ်တော်သည် ထိုအရည်အသွေးများကို အတိုင်းအတာတစ်ခုအထိ လူတို့တွင် ထည့်သွင်းပေးထားသည်။ (၂တိမောသေ ၃:၁၆၊ ၁၇) ထို့ကြောင့် ဘုရားသခင်၌ လူ၏အရည်အသွေးများ ရှိနေခြင်းမဟုတ်ဘဲ အမှန်မှာ ဘုရားသခင်၏အရည်အသွေးများကို လူတို့ရရှိထားခြင်းဖြစ်သည်။
[စာမျက်နှာ ၄ ပါ ရုပ်ပုံ]
နောဧသည် ဘုရားသခင့်ရှေ့ မျက်နှာသာရခဲ့
[စာမျက်နှာ ၅ ပါ ရုပ်ပုံ]
အာဗြဟံ၏စိတ်ထားသည် ဘုရားသခင်၏စိတ်တော်နှင့် တူညီခဲ့
[စာမျက်နှာ ၆ ပါ ရုပ်ပုံ]
ဒါဝိဒ်သည် ယေဟောဝါအပေါ် အပြည့်အဝယုံကြည်ကိုးစားခဲ့
[စာမျက်နှာ ၇ ပါ ရုပ်ပုံ]
သင်သည် သမ္မာကျမ်းစာကိုဖတ်ရှုသည်နှင့်အမျှ ဘုရားသခင့်စိတ်တော်ကို ရွှင်လန်းစေတတ်လာမည်
[Picture Credit Line on page 4]
Courtesy of Anglo-Australian Observatory, photograph by David Malin