‘ကူးလာ၍ ကျွန်ုပ်တို့ကို မစပါ’
ဘုရားသခင့်နိုင်ငံတော် ကြွေးကြော်သူများ မှတ်တမ်း
‘ကူးလာ၍ ကျွန်ုပ်တို့ကို မစပါ’
ဇူလိုင်လ၊ ၂၀၀၀ ပြည့်နှစ်တွင် ဩစတြီးယား၊ ဂျာမနီနှင့် ဆွစ်ဇာလန်နိုင်ငံတို့ရှိ ဂျာမန်ဘာသာစကားပြောတတ်သူ သက်သေခံများကို ဘိုလီးဗီးယားနိုင်ငံသို့ ရွှေ့ပြောင်းနေထိုင်ရန် ဖိတ်ခေါ်ခဲ့သည်။ အဘယ့်ကြောင့်နည်း။ အကြောင်းမှာ ဘိုလီးဗီးယားနိုင်ငံ၊ စဲန်တာခရုဇ်မြို့မှ မိုင် ၁၈၀ အတွင်းရှိ လယ်သမားသီးခြားအုပ်စုများမှ ဂျာမန်စကားပြောသော မဲန္နနိုက်အဖွဲ့ဝင်တို့သည် သမ္မာကျမ်းစာကို အလွန်စိတ်ဝင်စားနေကြသောကြောင့်ဖြစ်၏။
သက်သေခံ ၁၄၀ နီးပါးတို့သည် ထိုဖိတ်ခေါ်ချက်ကို လက်ခံခဲ့ကြသည်။ အချို့သည် အပတ်အနည်းငယ်ကြာ၊ အခြားသူတို့မှာမူ တစ်နှစ် သို့မဟုတ် ထိုထက်မကကြာသည့်တိုင် သွားရောက်နေထိုင်ခဲ့ကြသည်။ ထိုသို့ပြုခြင်းအားဖြင့် သူတို့သည် “မာကေဒေါနိပြည်သို့ ကူးပါ။ ငါတို့ကို မစပါ” ဟူသောဖိတ်ခေါ်ချက်ကို လက်ခံခဲ့သည့် ပထမရာစုခရစ်ယာန်သာသနာပြုများ၏ စိတ်ဓာတ်မျိုးရှိကြောင်း တင်ပြခဲ့ကြသည်။—တမန်တော် ၁၆:၉၊ ၁၀။
ထိုနယ်မြေဒေသတွင် သက်သေခံခြင်းသည် အသို့နည်း။ ဒေသခံအသင်းတော်ရှိ အကြီးအကဲတစ်ဦးက ဤသို့ရှင်းပြ၏– “မဲန္နနိုက်အစု ၄၃ စုထဲကတစ်ခုဆီရောက်ဖို့ ကြမ်းတမ်းတဲ့လမ်းတွေပေါ် လေးဘီးယက်ကားနဲ့ ရှစ်နာရီကြာသွားရတယ်။ ဒီထက် ပိုဝေးတဲ့နေရာတွေကျတော့ လေးရက်ကြာပြီး တချို့ညတွေမှာ ယာယီတဲထိုးပြီး အိပ်ရတယ်။ ဒါပေမဲ့ အဲ့ဒီလူတွေဟာ သတင်းကောင်းကို တစ်ခါမှ မကြားဖူးတဲ့အတွက် ပင်ပန်းရကျိုးနပ်ပါတယ်။”
အစပိုင်းတွင် မဲန္နနိုက်အများစုသည် သူတို့ထံလာရောက်လည်ပတ်ခြင်းကို လက်မခံလိုကြချေ။ သို့သော် ထပ်ခါတလဲကြိုးပမ်းမှုများက သက်သေခံတို့ကမ်းလှမ်းသည့် သတင်းတရားကို တန်ဖိုးထားတတ်သွားစေသည်။ သာဓကအနေဖြင့် လယ်သမားတစ်ဦးက သူသည် နိုးလော့!မဂ္ဂဇင်းကို ဖတ်ခဲ့သည်မှာ တစ်နှစ်ကြာပြီဟု ပြောပြသည်။ ထို့နောက် သူဤသို့ ဆက်ပြော၏– “ဒီမှာရှိတဲ့လူအများစုက ခင်ဗျားတို့ပြောတာကို လက်မခံချင်ဘူးဆိုတာ ကျွန်တော်သိတယ်၊ ဒါပေမဲ့ ဒါဟာအမှန်တရားပဲလို့ ကျွန်တော်ယုံတယ်။” အခြားအုပ်စုတစ်ခုမှ လူတစ်ဦးက– “ကျွန်တော့်အိမ်နီးချင်းတချို့က ခင်ဗျားတို့ဟာ ပရောဖက်အတုအယောင်တွေလို့ ပြောကြတယ်၊ တချို့ကျတော့ ခင်ဗျားတို့မှာ အမှန်တရားရှိတယ်လို့ ပြောကြတယ်၊ ကျွန်တော်ကိုယ်တိုင် ဆန်းစစ်ကြည့်ချင်တယ်။”
ယခု ဘိုလီးဗီးယားနိုင်ငံတွင် ဂျာမန်စကားပြောအသင်းတော်တစ်ခုရှိနေပြီ၊ သတင်းကောင်းကို အချိန်ပြည့်ဟောပြောသူ ၁၄ ဦးအပါအဝင် ကြေညာသူ ၃၅ ယောက်ရှိသည်။ ယခုအချိန်ထိ ယခင်က မဲန္နနိုက်အဖွဲ့ဝင်ဖြစ်ခဲ့သူ ၁၄ ဦးတို့သည် ဘုရားသခင်၏ နိုင်ငံတော်ကြေညာသူများဖြစ်လာကြပြီ၊ အခြားသူ ၉ ဦးတို့မှာ အစည်းအဝေးများကို မှန်မှန်တက်ရောက်နေပါသည်။ မကြာသေးမီက နှစ်ခြင်းယူခဲ့သော အသက်ကြီးသူတစ်ဦး ဤသို့ပြောခဲ့၏– “ယေဟောဝါရဲ့လမ်းညွှန်မှုကို ကျွန်တော်တို့ အသေအချာတွေ့ မြင်ရတယ်။ ကိုယ်တော်ဟာ ကျွန်တော်တို့ကို ကူညီပေးဖို့ ဂျာမန်စကားပြောတတ်တဲ့ အတွေ့အကြုံရှိ ညီအစ်ကို၊ ညီအစ်မတွေကို စေလွှတ်ပေးတာ။ သိပ်ကျေးဇူးတင်တာပဲ။” ထိုသူ၏ အသက် ၁၇ နှစ်အရွယ်သမီးငယ်လည်း နှစ်ခြင်းယူခဲ့၍ သူက ဤသို့ ထပ်ဆင့်ပြောခဲ့သည်– “ဒီကိုရောက်လာကြတဲ့ လူငယ်ညီအစ်ကို၊ ညီအစ်မတွေရဲ့ စိတ်အားထက်သန်မှုဟာ တစ်ယောက်ကနေတစ်ယောက် ကူးစက်နေတယ်။ သူတို့အများစုဟာ ရှေ့ဆောင်တွေဖြစ်ကြတယ်၊ သူတို့ရဲ့အချိန်၊ သူတို့ရဲ့ငွေကို အသုံးပြုပြီး တခြားသူတွေကို ကူညီပေးနေကြတာ။ ကျွန်မလည်း သူတို့လို လုပ်ချင်တဲ့စိတ်ရှိတယ်။”
မှန်ပါသည်၊ အခြားသူများကိုကူညီဖို့ ‘ကူးလာ’ ခဲ့ကြသူများသည် ကြီးစွာသောရွှင်လန်းမှုနှင့် ကျေနပ်ရောင့်ရဲမှု ရရှိနေကြသည်။