စိတ်အားထက်သန်သော ရိတ်သိမ်းသူများအဖြစ် ဂိလဒ်ကျောင်းဆင်းများ ထွက်ခွာသွားကြ!
စိတ်အားထက်သန်သော ရိတ်သိမ်းသူများအဖြစ် ဂိလဒ်ကျောင်းဆင်းများ ထွက်ခွာသွားကြ!
“စပါးရိတ်စရာ များစွာရှိ၏။ ရိတ်သောသူတို့သည် နည်းကြ၏။ ထို့ကြောင့် လုပ်ဆောင်သောသူတို့ကို စပါးရိတ်ခြင်းငှာ စေလွှတ်တော်မူမည်အကြောင်း စပါးရှင်ကို ဆုတောင်းကြလော့။” (မဿဲ ၉:၃၇၊ ၃၈) ၁၁၆ ကြိမ်မြောက် ကင်းမျှော်စင် သမ္မာကျမ်းစာ ဂိလဒ်ကျောင်းဆင်းများသည် သူတို့၏ခရစ်ယာန်သာသနာပြုတာဝန်ကျရာ နေရာများသို့ ထွက်ခွာသွားရန် ပြင်ဆင်သည့်အခါ အဆိုပါစကားများသည် သူတို့အတွက် အထူးအဓိပ္ပာယ်ရှိ၏။
သင်တန်းဆင်းများ နှုတ်ခွန်းဆက်အားပေးစကားများ ကြားခဲ့ကြရသော ၂၀၀၄ ခုနှစ်၊ မတ်လ ၁၃ ရက်၊ စနေနေ့တွင် နယူးယောက်မြို့၊ ပက်တာစင်ရှိ ကင်းမျှော်စင်ပညာပေးဌာနနှင့် ကျောင်းဆင်းပွဲအစီအစဉ်အတွက် ထိုဌာနနှင့် ဂြိုဟ်တုဖြင့်ဆက်သွယ်ထားသော ဒေသများ၌ လူပေါင်း ၆,၆၈၄ ဦးစုရုံးရောက်ရှိနေသည်။ ကျွန်ုပ်တို့အားလုံး ဝိညာဉ်ရေးရိတ်သိမ်းခြင်းတွင် စိတ်အားထက်သန်စွာ ပါဝင်လုပ်ဆောင်ကြစဉ် သူတို့အား ပေးခဲ့သည့်အကြံပြုချက်မှ အကျိုးကျေးဇူးများစွာရရှိနိုင်၏။
အုပ်ချုပ်ရေးအဖွဲ့ဝင်ဖြစ်ပြီး ကိုယ်တိုင်လည်း ခုနစ်ကြိမ်မြောက် ဂိလဒ်ကျောင်းမှကျောင်းဆင်း သီအိုဒေါရ် ဂျဲရက်စ်၏ အဖွင့်စကားတွင် ‘သွား၍ လူမျိုးတကာတို့ကို တပည့်ဖြစ်စေလော့’ ဟူသော ယေရှု၏မိန့်ဆိုချက်ကို အလေးပေးဖော်ပြခဲ့သည်။ (မဿဲ ၂၈:၁၉၊ ၂၀) ကျောင်းဆင်းများကို နိုင်ငံ ၂၀ သို့စေလွှတ်တော့မည်ဖြစ်ရာ အဆိုပါအမှာစကားသည် တကယ်ကိုသင့်လျော်ပေ၏! သူက သမ္မာကျမ်းစာမှ လမ်းညွှန်ချက်သည် အရေးအပါဆုံးဖြစ်သော ဝိညာဉ်ရေးရိတ်သိမ်းမှုတွင် စိတ်အားထက်သန်သော ရိတ်သိမ်းသူများအဖြစ် အပြည့်အဝအသင့်ဖြစ်စေသည်ဟု သင်တန်းသားများကို သတိပေးခဲ့သည်။—မဿဲ ၅:၁၆။
ထုတ်လုပ်အားကောင်းသော ရိတ်သိမ်းသူများဖြစ်လာနိုင်ပုံ
နှစ်နှင့်ချီပြီး ဂိလဒ်ကျောင်းနှင့် ရင်းနှီးခဲ့သူ ရောဘတ် ဝေါ်လဲန်သည် အစီအစဉ်၏ပထမဆုံးဟောပြောသူဖြစ်သည်။ သူသည် “စာနာရိုင်းပင်းတတ်မှု၏ အလှ” ဟူသည့် အဓိကအကြောင်းကို ဟောပြောပြီး “စာနာရိုင်းပင်းတတ်မှုသည် နားပင်းသူများပင် ကြားနိုင်၊ မျက်စိကန်းသူများပင် မြင်နိုင်သည့် ဘာသာစကားဖြစ်သည်” ဟုသင်တန်းသားများကို ပြောခဲ့သည်။ ယေရှုသည် သူတစ်ထူး၏သောကကို ကောင်းစွာသိရှိခံစားပေးတတ်ပြီး လျော့ပါးသက်သာစေရန် ကြိုးစားကူညီပေးခဲ့သည်။ (မဿဲ ၉:၃၆) သင်တန်းသားများသည်လည်း ဟောပြောခြင်းလုပ်ငန်းတွင်၊ အသင်းတော်တွင်၊ ခရစ်ယာန်သာသနာပြုအိမ်တွင်၊ မိမိအိမ်ထောင်တွင် ထိုနည်းတူ လုပ်ဆောင်ရန် အခွင့်အရေးများစွာ တွေ့ရှိလိမ့်မည်။ ဟောပြောသူသည် သူတို့ကို ဤသို့တိုက်တွန်းခဲ့၏– “သူတစ်ပါးအကျိုး သယ်ပိုးနေတဲ့အခါ သင့်အသက်တာမှာ စာနာရိုင်းပင်းတတ်မှုရဲ့အလှ ပေါ်လွင်နေပါစေ။ ခရစ်ယာန်သာသနာပြုအိမ်မှာ နေ့စဉ်နေထိုင်နိုင်ဖို့ သင်တို့ရဲ့ အကောင်းဆုံးအမူအကျင့်တွေကသာ ဖြစ်စေနိုင်မယ်။ ဒါကြောင့် စာနာစိတ်ကို ဝတ်ဆင်ထားဖို့ သန္နိဋ္ဌာန်ချပါ။”—ကောလောသဲ ၃:၁၂။
၎င်းနောက် အုပ်ချုပ်ရေးအဖွဲ့ဝင်လည်းဖြစ် ၄၁ ကြိမ်မြောက် ဂိလဒ်ကျောင်းမှ ကျောင်းဆင်းတစ်ဦးလည်းဖြစ်သူ ဂဲရစ်တ် လော့ရှ်သည် “ကယ်တင်ခြင်းသတင်း ကြေညာသူများ” အကြောင်း ဟောပြောခဲ့သည်။ (ဟေရှာယ ၅၂:၇) လက်ရှိအစီအစဉ်စနစ် ဖျက်ဆီးခံရချိန်တွင် ကပ်ကျော်လိုသူများသည် သမ္မာကျမ်းစာမှ တိကျမှန်ကန်သောအသိပညာကို ဆည်းပူး၍ သူတို့၏ယုံကြည်ချက်ကို လူထုရှေ့ကြေညာကာ နှစ်ခြင်းခံရကြမည်ဖြစ်သည်။ (ရောမ ၁၀:၁၀; ၂ တိမောသေ ၃:၁၅; ၁ ပေတရု ၃:၂၁) သို့သော် ကယ်တင်ခြင်းအကြောင်း ကြေညာရသည့် အဓိကအကြောင်းရင်းမှာ လူတို့ကို ကယ်တင်ရန်မဟုတ်ဘဲ ဘုရားသခင်ကို ချီးမွမ်းရန်ဖြစ်၏။ ထို့ကြောင့် ညီအစ်ကိုလော့ရှ်က ခရစ်ယာန်သာသနာပြုလောင်းများကို ဤသို့နှိုးဆော်လိုက်သည်– “ယေဟောဝါအား ချီးမွမ်းစရာဖြစ်စေရန် ဘုရားသခင့်နိုင်ငံတော်သတင်းတရားကို မြေကြီးစွန်းတိုင်အောင် သယ်ဆောင်သွားပါ၊ စိတ်အားထက်သန်တဲ့ ကယ်တင်ခြင်းကြေညာသူများဖြစ်ကြပါ။”—ရောမ ၁၀:၁၈။
ဂိလဒ်သင်တန်းပို့ချသူ လောရဲန့်စ် ဘိုဝင်န်သည် “သင်တို့ မည်မျှတောက်ပသနည်း” ဟူ၍ မေးခွန်းထုတ်ခဲ့သည်။ သူသည် မဿဲ ၆:၂၂ တွင်မှတ်တမ်းတင်ထားသည့် ယေရှု၏စကားများကို ရည်ညွှန်း၍ “ယေဟောဝါ၏ဘုန်းတော်ကို ထင်ရှားစေပြီး လူသားချင်းများအတွက် အကျိုးရရှိစေသည့် ဝိညာဉ်ရေးအလင်းကို ရောင်ပြန်ဟပ်” နိုင်ရန် မိမိတို့၏မျက်စိကို ရိုးရှင်းစွာထားရှိကြဖို့ သင်တန်းသားများအား အားပေးခဲ့သည်။ ယေရှုသည် ခရစ်ယာန်ဓမ္မအမှုစဆောင်ရွက်ကတည်းက ဘုရားသခင်၏အလိုတော်ဆောင်ခြင်းအပေါ် အာရုံစိုက်ခြင်းဖြင့် အလွန်ကောင်းသောစံနမူနာချမှတ်ခဲ့၏။ ကောင်းကင်တွင် ခမည်းတော် သွန်သင်ပေးခဲ့သည့် မွန်မြတ်ရာများကို တွေးတောဆင်ခြင်ခြင်းကြောင့် တောကန္တာရတွင် စာတန်၏စမ်းသပ်မှုများကို ယေရှုခံရပ်နိုင်ခဲ့သည်။ (မဿဲ ၃:၁၆; ၄:၁-၁၁) ယေဟောဝါစေခိုင်းထားရာကို ကိုယ်တော်အပြီးဆောင်ရွက်နိုင်ရန် ဘုရားသခင်အား လုံးလုံးလျားလျား ယုံကြည်အားကိုးခဲ့သည်။ ထိုနည်းတူ၊ ခရစ်ယာန်သာသနာပြုများသည်လည်း ရှေ့တွင် စိန်ခေါ်ချက်များ ရင်ဆိုင်ကြရမည်ဖြစ်ရာ ကျမ်းစာကို ကောင်းစွာလေ့လာပြီး ယေဟောဝါအပေါ် အပြည့်အဝယုံကြည်ကိုးစားကြရမည်။
ဂိလဒ်သင်တန်းပို့ချသူဖြစ်ပြီး ၇၇ ကြိမ်မြောက် ဂိလဒ်ကျောင်းမှကျောင်းဆင်း မာ့ခ် နူမဲရ်သည် ဤအခန်းဆက်ဟောပြောချက်ကို “ကျွန်တော်တို့သည် ကိုယ်တော်လက်တွင်ရှိပါ၏” ဟူသော အဓိကအကြောင်းဖြင့် နိဂုံးချုပ်ခဲ့သည်။ (ယောရှု ၉:၂၅) ရှေးဂိဗောင်မြို့သားများ၏ စိတ်သဘောထားကို တုပကြရန် သင်တန်းသားများအား သူတိုက်တွန်းခဲ့သည်။ ဂိဗောင်မြို့သည် “ကြီးစွာသောမြို့၊ . . . မြို့သားယောက်ျားအပေါင်းတို့သည် ခွန်အားနှင့်ပြည့်စုံ” သူများဖြစ်ကြသော်လည်း ဂိဗောင်မြို့သားများသည် မိမိတို့ကို ထင်ရှားပေါ်လွင်စေရန် တောင်းဆိုခြင်း သို့မဟုတ် မိမိတို့တောင်းဆိုရာကိုပေးရန် မမျှော်လင့်ခဲ့ချေ။ (ယောရှု ၁၀:၂) သူတို့သည် ယေဟောဝါ၏ဝတ်ပြုရေးကို ထောက်ခံသည့်အနေဖြင့် လေဝိသားများ၏လက်အောက်တွင် စိတ်လိုကိုယ်လျောက် “ထင်းခုတ်၍ ရေခပ်” ပေးကြသည်။ (ယောရှု ၉:၂၇) သင်တန်းဆင်းများသည် ယောရှုထက် သာ၍ကြီးမြတ်သော ယေရှုခရစ်အား “ကျွန်တော်တို့သည် ကိုယ်တော်လက်တွင်ရှိပါ၏” ဟုတစ်နည်းအားဖြင့်ပြောဆိုခဲ့ကြပြီ။ ယခု သူတို့၏တိုင်းတစ်ပါးတာဝန်များကို စထမ်းဆောင်ကြသည့်အခါ ယောရှုထက်သာ၍ကြီးမြတ်သူ စေခိုင်းသမျှကို လက်ခံဖို့လို၏။
တွေ့ကြုံမှုများနှင့် လူတွေ့မေးမြန်းခန်းများ
၆၁ ကြိမ်မြောက် ဂိလဒ်ကျောင်းမှကျောင်းဆင်း သင်တန်းပို့ချသူ ဝေါလ်လေးစ် လစ်ဗာရန်စ်သည် “ကျမ်းစာအနက်ကိုဖွင့်ပြလော့” ဟူသည့်အကြောင်းကို သင်တန်းသားတို့နှင့်အတူ ဆွေးနွေးခဲ့သည်။ သင်တန်းကာလအတွင်း လယ်ကွင်းဓမ္မအမှုတွင်ပါဝင်ချိန်၌ ရရှိခဲ့သော တွေ့ကြုံမှုများကို ပြန်ပြောပြပြီး သရုပ်ပြခဲ့ကြ၏။ သင်တန်းကာလ ငါးလအတွင်း ကျမ်းစာကို အားစိုက်လေ့လာခဲ့ကြရာ သူတို့လှုံ့ဆော်ပေးခံခဲ့ကြရ၍ သင်ယူခဲ့ရာတို့ကို သူတစ်ပါးအား ပြောပြလိုကြောင်း ထင်ရှား၏။ (လုကာ ၂၄:၃၂) သင်တန်းကာလငါးလအတွင်း သင်တန်းသားတစ်ဦးသည် သင်ယူခဲ့ရာတို့ကို သူ၏ညီအရင်းအား ပြောပြနိုင်ခဲ့သည်။ ယင်းကြောင့် သူ၏ညီသည် ဒေသန္တရအသင်းတော်ကို ရှာဖွေပြီး ကျမ်းစာလေ့လာလိုခဲ့၏။ ယခု သူသည် နှစ်ခြင်းမခံရသေးသော ကြေညာသူအဖြစ် အရည်အချင်းပြည့်မီနေပြီဖြစ်သည်။
ထိုတွေ့ကြုံမှုများ ကြားရပြီးနောက် ရစ်ချာ့ဒ် အက်ရှ်နှင့် ဂျောန် ဂီဘာဒ်တို့သည် ကင်းမျှော်စင်ပညာပေးဌာနတွင် အထူး လေ့ကျင့်မှုခံယူနေကြသော နယ်လှည့်ကြီးကြပ်မှူးများအပါအဝင် ယေဟောဝါ၏ သက်တမ်းကြာ သစ္စာရှိကျေးကျွန်အချို့ကို လူတွေ့မေးမြန်းခဲ့သည်။ သူတို့သည် ဂိလဒ်ကျောင်း အစောပိုင်းသင်တန်းများ၏ ကျောင်းဆင်းများဖြစ်ကြသည်။ သင်တန်းကာလအတွင်း ညီအစ်ကိုနောရ်က ဤသို့ပြောဆိုခဲ့ကြောင်းကို ညီအစ်ကိုတစ်ဦး သတိရသည်– “ဂိလဒ်မှာ တော်တော်စာဖတ်ကြရလိမ့်မယ်။ ဒါပေမဲ့ ကိုယ့်ကိုယ်ကိုအထင်ကြီးလာကြမယ်ဆိုရင် ကျွန်တော်တို့ရည်ရွယ်ချက် အောင်မြင်မှာမဟုတ်ဘူး။ သင်တို့ကို သဘောထားကြီးလာစေချင်တယ်။” နယ်လှည့်ကြီးကြပ်မှူးများကလည်း လက်ရှိသင်တန်းသားများအား လူတိုင်းကိုစိတ်ဝင်စားဖို့၊ အခြားသူများကို ယေရှုဆက်ဆံသကဲ့သို့ ဆက်ဆံဖို့၊ ပေးအပ်ခံရသမျှတာဝန်ကို စိတ်နှိမ့်ချစွာ လက်ခံဖို့ အကြံပြုခဲ့၏။ အဆိုပါအကြံပြုချက်ကို လိုက်နာကျင့်သုံးလျှင် ခရစ်ယာန်သာသနာပြုလောင်းများသည် သူတို့တာဝန်ကျရာနေရာတွင် ထုတ်လုပ်အားကောင်းသူများဖြစ်မည် သေချာသည်။
စိတ်အားထက်သန်သော ရိတ်သိမ်းသူများအဖြစ် ထွက်သွားကြ!
ပရိသတ်သည် အုပ်ချုပ်ရေးအဖွဲ့ဝင် နောက်တစ်ဦးဖြစ်သူ စတီဗင် လက်တ်၏အားပေးချက်ကို ကြားနာခွင့်ရရှိခဲ့ကြသည်။ သူသည် အစီအစဉ်၏အဓိကဟောပြောချက်ဖြစ်သည့် “စိတ်အားထက်သန်သော ရိတ်သိမ်းသူများအဖြစ် ထွက်သွားကြလော့!” အကြောင်းကိုဟောခဲ့သည်။ (မဿဲ ၉:၃၈) ပကတိရိတ်သိမ်းခြင်းတွင် စပါးရိတ်သိမ်းချိန်သည် တိုတောင်း၏။ ထို့ကြောင့် ရိတ်သိမ်းသူများသည် ကြိုးစားအားထုတ်ကြရ၏။ ဤအစီအစဉ်စနစ်၏ဆုံးခန်းတွင် ထိုသို့ပြုရန် သာ၍အရေးကြီးလေစွ! ကြီးမားသောဝိညာဉ်ရေးရိတ်သိမ်းမှုသည် သေရေးရှင်ရေးနှင့်သက်ဆိုင်သည်။ (မဿဲ ၁၃:၃၉) ညီအစ်ကိုလက်တ်က နောက်နောင်ပြန်ဆောင်ရွက်တော့မည်မဟုတ်သော ဤရိတ်သိမ်းခြင်းကို “မဖင့်မနွှဲလုံ့လထုတ်” ဆောင်ရွက်လျက် “စိတ်စေတနာထက်သန်” စွာ ‘ယေဟောဝါ၏အစေတော်ကိုခံကြ’ ဖို့ ကျောင်းဆင်းများအား အားပေးခဲ့သည်။ (ရောမ ၁၂:၁၁) ဟောပြောသူသည် ယေရှု၏စကားကို ကိုးကားပြီး “စပါးရိတ်ခြင်းအလို့ငှာ လယ်ပြင်တို့သည် ယခုပင် ဝင်းဝင်းရှိသည်ကို မျှော်၍ကြည့်ကြလော့” ဟုပြောဆို၏။ (ယောဟန် ၄:၃၅) ထို့နောက် လူတို့ကို တွေ့ရှိနိုင်မည့်အချိန်နှင့် နေရာတွင် သူတို့ထံ အတတ်နိုင်ဆုံးကြိုးစားသွားရောက်ခြင်းအားဖြင့်ဖြစ်စေ၊ အလွတ်သဘောသက်သေခံရန် အခွင့်အရေးရသမျှကို ရှာယူခြင်းအားဖြင့်ဖြစ်စေ ရိတ်သိမ်းခြင်းလုပ်ငန်းတွင် စိတ်အားထက်သန်စွာပါဝင်ကြရန် ကျောင်းဆင်းများအား တိုက်တွန်းခဲ့သည်။ ထိရောက်စွာသက်သေခံနိုင်ရန် အခွင့်အရေးများကို အမြဲရှာယူပါ။ ယေဟောဝါသည် စိတ်အားထက်သန်သော ဘုရားသခင်ဖြစ်ရာ ကျွန်ုပ်တို့အားလုံး ကိုယ်တော့်ကို တုပစေလို၏၊ ဝိညာဉ်ရေးရိတ်သိမ်းခြင်းတွင် ကြိုးစားအားထုတ်ပါဝင်စေလို၏။—၄ ဓမ္မရာဇဝင် ၁၉:၃၁; ယောဟန် ၅:၁၇။
အစီအစဉ်၏နိဂုံးပိုင်းတွင် သဘာပတိညီအစ်ကိုဂျဲရက်စ်သည် ဌာနခွဲရုံးအသီးသီးမှ ပေးပို့သော နှုတ်ခွန်းဆက်စကားများကို ဖတ်ကြားပြီး ကျောင်းသားများအား ဒီပလိုမာ ပေးအပ်ခဲ့သည်။ ကျောင်းဆင်းတစ်ဦးသည် အတန်းကိုယ်စား မိမိတို့ရရှိခဲ့သည့် လေ့ကျင့်မှုအတွက် အလွန်ကျေးဇူးတင်ကြောင်းဖော်ပြသည့်စာကို ဖတ်ပြ၏။ ၁၁၆ ကြိမ်မြောက် ကျောင်းဆင်းအစီအစဉ်သည် တက်ရောက်သူအားလုံးကို စိတ်အားထက်သန်သော ရိတ်သိမ်းသူများအဖြစ် ထွက်ခွာသွားကြရန် တိုး၍သန္နိဋ္ဌာန်ချစေခဲ့ကြောင်း ထင်ရှားပါသည်။
[စာမျက်နှာ ၂၅ ပါ လေးထောင့်ကွက်]
သင်တန်းဆိုင်ရာအချက်အလက်များ
ကိုယ်စားပြုနိုင်ငံအရေအတွက်– ၆
တာဝန်ပေးအပ်ခံရသည့် နိုင်ငံအရေအတွက်– ၂၀
ကျောင်းသား/သူအရေအတွက်– ၄၆
ပျမ်းမျှအသက်– ၃၄.၂
ပျမ်းမျှအမှန်တရားသက်တမ်း– ၁၇.၂
ပျမ်းမျှအချိန်ပြည့် အမှုဆောင်သက်တမ်း– ၁၃.၉
[စာမျက်နှာ ၂၆ ပါ ရုပ်ပုံ]
ဂိလဒ်ကင်းမျှော်စင်ကျမ်းစာကျောင်း၏ ၁၁၆ ကြိမ်မြောက်သင်တန်း
အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။
(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.