ရှိရှိသမျှ အမွေအနှစ်တို့တွင် အဖိုးအထိုက်ဆုံး
ရှိရှိသမျှ အမွေအနှစ်တို့တွင် အဖိုးအထိုက်ဆုံး
သက်ကြီးရွယ်အိုတမန်တော်ယောဟန်သည် သူ့ဘဝနိဂုံးပိုင်းတွင် ဤသို့ရေးသားခဲ့သည်– “ငါ၏သားသမီးတို့သည် [အမှန်]တရား၌ကျင်လည်သည်ကို ငါကြား၍ဝမ်းမြောက်ခြင်းထက် သာ၍ဝမ်းမြောက်ခြင်းမရှိ။”—၃ ယောဟန် ၄။
ဤတွင် တည်ကြည်သောတမန်တော်သည် ဝိညာဉ်ရေးသားသမီးတော်စပ်သူများကို ရည်ညွှန်းနေ၏။ သို့သော် တမန်တော်၏စကားကို သံယောင်လိုက်မည့် မိဘများစွာရှိပါမည်။ သူတို့သည် သားသမီးများကို “ယေဟောဝါ၏ ပဲ့ပြင်ဆုံးမခြင်းနှင့် စိတ်သဘောတော်ဆိုင်ရာ စည်းမျဉ်းဥပဒေအရ” ကြိုးစားကျွေးမွေးပြုစုခဲ့ကြရာ ယခု အရွယ်ရောက်နေသော သားသမီးများသည် ‘အမှန်တရား၌လျှောက်လှမ်းနေ’ သည်ကိုမြင်တွေ့ရသဖြင့် ဝမ်းမြောက်ကြပေမည်။ (ဧဖက် ၆:၄) အမှန်အားဖြင့် ထာဝရအသက်လမ်းကို သားသမီးများအား သင်ကြားပေးခြင်းသည် အဖိုးအထိုက်ဆုံးအမွေအနှစ်ပေးခြင်းဖြစ်သည်။ သို့ဖြစ်ရခြင်းမှာ ယေဟောဝါအလိုတော်အတိုင်း အသက်ရှင်ခြင်းပါဝင်သော ဘုရားသခင်ဝတ်၌မွေ့လျော်ခြင်းသည် “ယခုဘဝ၊ နောင်ဘဝနှင့်စပ်ဆိုင်သော ကတိတော်ကိုရ” ရှိစေသောကြောင့်ဖြစ်၏။—၁ တိမောသေ ၄:၈။
စုံလင်တော်မူသောခမည်းတော် ယေဟောဝါသည် ဝိညာဉ်ရေးဘက် မိမိတို့သားသမီးများအား သွန်သင်ပေးသော မိဘများကို အလွန်တန်ဖိုးထားတော်မူ၏။ ထိုသွန်သင်မှုကို သားသမီးများ လက်ခံလျှင် မိဘများနှင့်အတူ စစ်မှန်သောဝတ်ပြုရေး၌ ပါဝင်ကြမည်ဖြစ်ရာ အလွန်ပျော်ရွှင်ကြပေမည်။ ထိုကလေးငယ်များ အရွယ်ရောက်လာကြသောအခါ အဆိုပါအမှတ်တရဖြစ်သည့် တွေ့ကြုံမှုများကို မမေ့ဘဲ မှတ်ထားကြလိမ့်မည်။ အချို့က သီအိုကရက်တစ်ဓမ္မအမှုကျောင်း *တွင် ပထမဦးဆုံးအကြိမ် ပါဝင်ခဲ့ချိန်ကို ပြန်သတိရကြသည်။ သို့မဟုတ် တစ်အိမ်မှတစ်အိမ်ဓမ္မအမှုတွင် မိဘတစ်ဦး၏နံဘေး၌ရပ်ပြီး ဦးဆုံးအကြိမ် ကျမ်းချက်ဖတ်ပြခဲ့ချိန်ကို မှတ်မိပေမည်။ ကျွန်ုပ်၏ကျမ်းစာပုံပြင်စာအုပ် သို့မဟုတ် ကြီးမြတ်သောဆရာ့စကားကိုနားထောင်ခြင်း *စာအုပ်မှ မိဘများဖတ်ပြသည်ကို သူတို့မေ့နိုင်ပါမည်လော။ ဂေဘရီယယ်လ် အလွန်ကြိုက်နှစ်သက်ခဲ့သောအရာကို သူဤသို့ပြန်ပြောပြသည်– “ကျွန်တော်လေးနှစ်အရွယ်ပဲရှိတုန်းက အမေဟာ ချက်ပြုတ်နေရင်း နေ့တိုင်း သီချင်းဆိုပြခဲ့တယ်။ ဘုရားသခင့်နိုင်ငံတော်သီချင်းတစ်ပုဒ်ကို ကျွန်တော်အခုထိမှတ်မိတုန်းပဲ။ နောက်ပိုင်းမှာ အဲဒီသီချင်းက ယေဟောဝါရဲ့အမှုတော်ဆောင်ဖို့ အရေးကြီးတဲ့အကြောင်း ကျွန်တော့်ကိုသိစေတယ်။” ဂေဘရီယယ်လ် ရည်ညွှန်းသည့် ရသမြောက်သော ထိုသီချင်းကို အသင်လည်း သတိရပေမည်။ ယေဟောဝါအားချီးမွမ်းကျူးဧခြင်းသီချင်းစာအုပ်မှ သီချင်းနံပါတ် ၁၅၇ ဖြစ်ပြီး ခေါင်းစဉ်မှာ “လူငယ်ဘဝတွင် ယေဟောဝါကိုဝတ်ပြုကိုးကွယ်ကြ” ဖြစ်သည်။
သီချင်းက ဤသို့အစပြုသည်– “ချီးမွမ်းဝတ် တစ်ချိန်တွင်ကလေးများပြု/သံကုန်လွှင့် ယေရှုအားထောမနာပြု။” ယေရှုနှင့် ခင်ခင်မင်မင်ပေါင်းသင်းခွင့်ရသော ကလေးများ အမှန်တကယ်ရှိခဲ့ကြပြီး သူတို့၏ချစ်စရာကောင်းသော၊ ပွင့်လင်းသောအပြုအမူအပြောအဆိုတို့က ကိုယ်တော်အား ပျော်ရွှင်စေခဲ့ပေမည်။ ယေရှုသည် ကလေးသူငယ်များ၏ သင်ယူလိုစိတ်ကို မိမိ၏နောက်လိုက်များ အတုယူစရာနမူနာအဖြစ်ပင် အသုံးပြုခဲ့သည်။ (မဿဲ ၁၈:၃၊ ၄) ထို့ကြောင့် ယေဟောဝါအားဝတ်ပြုကိုးကွယ်ရေးတွင် ကလေးသူငယ်များသည် သင့်တော်လျောက်ပတ်စွာ ပါဝင်နိုင်ကြသည်။ အမှန်မှာ ထိုသီချင်း၏စာသားက “မွေးစကလေးပင် ဂုဏ်တော်ချီးကျူးနိုင်” ဟုဆက်၍ဆိုသည်။
ကလေးသူငယ်များစွာတို့သည် ပုံသက်သေကောင်းသော အမူအကျင့်အားဖြင့် သူတို့အိမ်၊ သူတို့ကျောင်းနှင့် အခြားနေရာများတွင် ဘုရားသခင်နှင့် သူတို့၏မိသားစုကို ဂုဏ်တင်ခဲ့ကြပြီ။ သူတို့သည် “တရားမှန်မြတ်နိုး ခရစ်ယာန်မိဘများ” ရှိထားသည့်အတွက် တကယ်ကောင်းချီးရကြ၏။ (တရားဟောရာ ၆:၇) ဘုရားသခင်ကိုကြောက်ရွံ့သော မိဘများသည် မိမိ၏ဖန်ဆင်းခံများ လျှောက်အပ်သောလမ်းကို သွန်သင်ပေးသည့် မေတ္တာရှင်ခမည်းတော် ဘုရားသခင်ဘက် ရပ်တည်ကြသည်။ ထိုသို့ပြုခြင်းကြောင့် ရရှိထားကြသော ကောင်းချီးသည် များပြားလေစွ! သူတို့ကတစ်ဖန် သူတို့၏မိသားစုရှိ ကလေးသူငယ်များကို သွန်သင်ပေးကြရာ “ပျော်ရွှင်လှ ကလေးများ နားထောင်သောခါ” ပီတိဖြစ်စရာပင်။ (ဟေရှာယ ၄၈:၁၇၊ ၁၈) ယေဟောဝါသက်သေများ၏ မက္ကဆီကိုဌာနခွဲရုံးတွင် လောလောဆယ် အမှုထမ်းနေသော အဲန်ဂျလီကာက ဤသို့ဆိုသည်– “ကျွန်မရဲ့မိဘတွေဟာ ကျမ်းစာမူတွေကို လက်တွေ့ကျင့်သုံးဖို့ အမြဲကြိုးစားခဲ့ကြတယ်။ အဲဒါကြောင့် ကျွန်မရဲ့ကလေးဘဝဟာ တကယ်သာယာခဲ့တာ။ ကျွန်မပျော်ခဲ့ရတယ်။”
အဆိုပါခရစ်ယာန်များသည် သူတို့ရရှိခဲ့သောဝိညာဉ်ရေးအမွေအနှစ်ကို ကောင်းစွာထိန်းသိမ်းထိုက်ကြောင်း သဘောတူကြသည်။ အသင်သည် စစ်မှန်သောခရစ်ယာန်စံနှုန်းများကို တန်ဖိုးထားသည့်မိသားစုတွင် ကြီးပြင်းလာသော လူငယ်တစ်ဦးဖြစ်သည် ဆိုပါစို့။ ထိုသို့ဖြစ်လျှင် ထိုသီချင်းက သင့်ကို “အိုသန့်ရှင်းကြလေ ခရစ်ယာန်လူငယ်များ” ဟုတိုက်တွန်းပါသည်။ ကိုယ်ပိုင်ဆုံးဖြတ်ချက်များ ချရမည့်အချိန် ရောက်လာလိမ့်မည်ဖြစ်သောကြောင့် ယခု “ငယ်ရွယ်စဉ်ကြိုးစား ယေဟောဝါကိုးစား/လူအများကြိုက်ဘယ်ခါ လိုက်မလုပ်လေ” နှင့်။
အထင်မှားပြီး သင်၏ဘဝတွင် လူအများကြိုက်လိုက်လုပ်ခြင်းကို ဦးစားပေးမည်ဆိုလျှင် သင်ရရှိထားသော လေ့ကျင့်သင်ကြားမှုမှန်သမျှ အချည်းနှီးဖြစ်သွားလိမ့်မည်၊ သင်၏အနာဂတ်မျှော်လင့်ချက်များကိုလည်း ပျက်ပြားစေနိုင်၏။ လူကြိုက်များသူဖြစ်လိုသောစိတ်သည် သင့်ကို သတိလက်လွတ်ဖြစ်သွားစေနိုင်သည်။ လူငယ်အချို့ဆိုလျှင်၊ အန္တရာယ်ကင်းဟန်ရှိပြီး လူရည်မွန်ပင်ဖြစ်ပုံရသော်လည်း ခရစ်ယာန်စံနှုန်းများကို စိတ်မဝင်စားသူတို့နှင့် ပေါင်းဖော်လာကြသည်။ “လူငယ်များအမေး—မိတ်ဆွေစစ်မည်သို့ ဖွဲ့နိုင်မည်နည်းဟူသော ဗီဒီယိုခွေမှ အဓိကဇာတ်ဆောင်တစ်ဦးဖြစ်သူ တာရာက ယင်းကိုသရုပ်ဖော်ပြသည်။ စစ်မှန်သောဝတ်ပြုရေးကို တန်ဖိုးမထားသူတို့နှင့် ပေါင်းဖော်သည့်၊ တာရာနှင့်တူသော မည်သည့်ခရစ်ယာန်လူငယ်မဆိုသည် သီချင်းတွင်ဆိုသည့်အတိုင်း “မကောင်းပေါင်းဖော် အကျင့် . . . ပျက်” စေကြောင်း အနှေးနှင့်အမြန် သိလာပါလိမ့်မည်။ အမူအကျင့်ကောင်းများကို နှစ်ချီ၍ ကြိုးစားပြုစုပျိုးထောင်ရ၏၊ သို့သော်လည်း အကျင့်ပျက်ပြားသွားဖို့ကား လျင်မြန်ပါသည်။
ဘုရားသခင်အားကြောက်ရွံ့သော အသက်တာလမ်းစဉ်ပေါ် လိုက်လျှောက်ရန် အမှန်မလွယ်ကူပါ။ သို့သော် သီချင်းတွင်ဆက်ဆိုသည့်အတိုင်း “ငယ်စဉ်ချိန် ဘုရားသခင်သတိရအစဉ် /ထိုခါယေဟောဝါ ကြွင်းမဲ့ဆည်းကပ်လျှင်” စစ်မှန်သောအောင်မြင်မှုရရှိဖို့ ခိုင်မာသောအုတ်မြစ်ကို သင်ချနိုင်ပါလိမ့်မည်။ ထိုအခါ သင်သည် “သက်ရွယ်ကြီးရင့်လာရာ ပို၍ပျော်ရွှင်” လိမ့်မည်။ ယေဟောဝါ၏မေတ္တာပါသော စောင့်ရှောက်မှုအောက် ကိုယ်တော်၏မျက်မှောက်တွင် မှန်ကန်ရာပြုလုပ်ခြင်းကို အဘယ်အရာကမျှ တားဆီးနိုင်မည် မဟုတ်ကြောင်း သင်ပိုမိုသိနားလည်လာပါလိမ့်မည်။ ဤနည်းအားဖြင့် အသင်သည် ရင့်ကျက်၍ ဘုရားသခင်ကိုကြောက်ရွံ့သော လူလားမြောက်သူ ဖြစ်လာပါလိမ့်မည်။ ထို့ထက်မက ခရစ်ယာန်မွေးမြူပဲ့ပြင်မှုကို ပညာရှိစွာ သင်ယူခြင်းသည် ‘ဘုရားသခင်အား ဝမ်းမြောက်စေ’ နိုင်သည့်အခွင့်ထူး ရရှိစေပါသည်။ ထို့ထက်သာလွန်ကောင်းမွန်သောအခွင့်ထူး ရှိနိုင်ပါဦးမည်လော!—သု. ၂၇:၁၁။
သို့ဖြစ်၍ လူငယ်တို့၊ ယေဟောဝါနှင့် သင်တို့၏ ခရစ်ယာန်မိဘများထံမှရရှိသော လေ့ကျင့်ပဲ့ပြင်မှုသည် အလွန်အဖိုးထိုက်ကြောင်း အစဉ်သတိရပါ။ သူတို့၏ကြီးမားသောမေတ္တာက ယေဟောဝါနှစ်သက်ရာကို ပြုလုပ်ရန် သင့်ကို စေ့ဆော်ပေးပါလေစေ။ ယေရှုခရစ်တော်နှင့် တည်ကြည်သောလူငယ်တိမောသေကဲ့သို့ အသင်သည် ကောင်းကင်ခမည်းတော်နှင့် မြေကြီးပေါ်ရှိ သင်၏မိဘများကို စိတ်ရွှင်လန်းစေပါလိမ့်မည်။ အသင်ကိုယ်တိုင် မိဘတစ်ဦးဖြစ်လာမည်ဆိုလျှင် အစောပိုင်းတွင်ဖော်ပြခဲ့၍ ဤသို့ပြောဆိုခဲ့သော အဲန်ဂျလီကာနှင့် သင်သဘောတူကောင်း တူပါလိမ့်မည်– “ကျွန်မကလေးရှိခဲ့မယ်ဆိုရင် နို့စို့အရွယ်ကတည်းက သူ့နှလုံးထဲမှာ ယေဟောဝါကိုချစ်မြတ်နိုးစိတ်ရှိဖို့၊ အဲဒီမေတ္တာကို သူ့ဘဝမီးအိမ်ဖြစ်စေဖို့ ကြိုးစားသွန်သင်ပေးမယ်။” မှန်ပါသည်၊ ထာဝရအသက်သို့ပို့ဆောင်သော လမ်းမှန်သည် ရှိရှိသမျှအမွေအနှစ်တို့တွင် ဧကန်အမှန် အဖိုးအထိုက်ဆုံးပင်!
[အောက်ခြေမှတ်ချက်များ]
^ အပိုဒ်၊ 4 ယေဟောဝါသက်သေများ၏ အသင်းတော်များတွင် ကျင်းပသည့် ဤ သမ္မာကျမ်းစာပညာပေးအစီအစဉ်ကို လူကြီးလူငယ်မရွေး တက်ရောက်နိုင်၏။
^ အပိုဒ်၊ 4 ဖော်ပြထားသောစာပေစာတမ်းများကို ယေဟောဝါသက်သေများထုတ်ဝေခဲ့။