သားသမီးလေ့ကျင့်သင်ကြားပေးခြင်းဆိုင်ရာ မျက်မှောက်ခေတ် စိန်ခေါ်ချက်
သားသမီးလေ့ကျင့်သင်ကြားပေးခြင်းဆိုင်ရာ မျက်မှောက်ခေတ် စိန်ခေါ်ချက်
စားသောက်ဆိုင် ပိုင်ရှင်တစ်ဦးသည် ညနေမိုးချုပ်ချိန်တွင် ဆိုင်ပိတ်ပြီး အိမ်ပြန်ဖို့ပြင်ဆင်နေသည်။ ထိုအခါ အမျိုးသမီးနှစ်ဦးနှင့် ကလေးတစ်ဦး ဆိုင်ထဲဝင်လာပြီး အစားအစာမှာယူလေ၏။ ဆိုင်ရှင်မှာ အလွန်ပင်ပန်းနေသဖြင့် ဆိုင်ပိတ်ပြီဟု ပြောလိုသော်လည်း သူတို့ မှာသည့်အတိုင်း တည်ခင်းပေးဖို့ဆုံးဖြတ်လိုက်သည်။ အမျိုးသမီးနှစ်ဦးသည် စကားပြောရင်း အစာစားနေစဉ် ကလေးမှာ စားသောက်ဆိုင်ထဲ ဟိုဟိုဒီဒီပြေးလွှားကာ ကြမ်းပြင်ပေါ်ကျသွားသော ကွတ်ကီးမုန့်များကို တက်နင်းလျက်ရှိသည်။ ကလေး၏မိခင်မှာ သားကို ဆုံးမမည့်အစား ပြုံး၍သာနေသည်။ ညစာစားပြီး၍ သူတို့ထွက်သွားသောအခါ မောဟိုက်နေသောပိုင်ရှင်ခမျာ ဆေးကြောသန့်ရှင်းရပြန်သည်။
သင်သိသည့်အတိုင်း မိသားစုများစွာတွင် ကလေးများကို ကောင်းစွာ လေ့ကျင့်သင်ကြားပေးခြင်းမရှိကြောင်း ဤဖြစ်ရပ်မှန်က ဖော်ပြသည်။ အကြောင်းအမျိုးမျိုးကြောင့်ဖြစ်၏။ မိဘအချို့သည် သားသမီးများကို လွတ်လွတ်လပ်လပ် စိတ်ကြိုက်နေထိုင်ခွင့်ပေးသင့်သည်ဟုယူဆကြပြီး မိမိတို့သားသမီးများကို တတ်တိုင်းနေရန် လွှတ်ထားကြသည်။ သို့တည်းမဟုတ် မိဘများသည် အလုပ်များလွန်းသောကြောင့် သားသမီးများကို ဂရုစိုက်မှုနှင့် လိုအပ်သောလေ့ကျင့်သင်ကြားမှု မပေးအားဘဲရှိပေမည်။ မိဘအချို့မူ ကလေး၏ကျောင်းပညာရေးသည် အရေးအကြီးဆုံးဟု ယူဆကြသောကြောင့် ကျောင်းတွင် အဆင့်ကောင်းရနေပြီး အဆင့်မြင့်ကောလိပ်သို့ ဝင်နိုင်မည်ဆိုလျှင် အကန့်အသတ်မရှိ လွတ်လပ်ခွင့်ပေးတတ်ကြသည်။
သို့တိုင် အချို့က မိဘများနှင့် လူ့အဖွဲ့အစည်း၏ အကျင့်စရိုက်စံကို ပြုပြင်ပြောင်းလဲဖို့လိုသည်ဟု ဆိုကြပြန်သည်။ ကလေးများသည် ရာဇဝတ်မှုအမျိုးမျိုးတွင် ပါဝင်ပတ်သက်လာကြပြီး ကျောင်းတွင်လည်း အကြမ်းဖက်မှု တရိပ်ရိပ်တိုးများလာနေသည်ဟု သူတို့ကျိုးကြောင်းဖော်ပြကြသည်။ ထို့ကြောင့် ပင်ကိုစရိုက်ကို ဦးစားပေး လေ့ကျင့်သင်ကြားပေးသင့်သည်ဟု ကိုရီးယားသမ္မတနိုင်ငံ၊ ဆိုးလ်မြို့မှ အလယ်တန်းကျောင်းတစ်ကျောင်း၏ ကျောင်းအုပ်က အလေးပေးဖော်ပြသည်။ သူဤသို့ပြောသည်– “အရင်ဦးဆုံး အကျင့်စရိုက်ကောင်းရှိအောင် ပျိုးထောင်ပေးပြီးမှ ပညာသင်ပေးသင့်တယ်။”
မိမိတို့ ကလေးများ တက္ကသိုလ်ဝင်ခွင့်ရပြီး ဘဝတွင် အောင်မြင်မှုရရှိစေလိုသော မိဘများစွာတို့သည် ဤသို့သောသတိပေးစကားများကို အလေးမမူကြချေ။ အသင်သည် မိဘတစ်ဦးဖြစ်မည်ဆိုလျှင် သင့်ကလေးကို အဘယ်လူစားမျိုး ဖြစ်စေလိုသနည်း။ ကိုယ်ကျင့်တရားသိစိတ်ရှိပြီး တာဝန်သိတတ်သည့် လူလားမြောက်သူတစ်ဦး ဖြစ်စေလိုသလော။ အခြားသူများကို ကိုယ်ချင်းစာနာတတ်သူ၊ ပြောင်းသာလဲသာရှိ၍ အပြုသဘောရှိသူတစ်ဦး ဖြစ်စေလိုပါသလော။ ထိုသို့ဖြစ်စေလိုပါက နောက်ဆောင်းပါးကို ကျေးဇူးပြု၍ သုံးသပ်ကြည့်ပါ။