‘သွား၍ တပည့်ဖြစ်စေကြလော့’
‘သွား၍ တပည့်ဖြစ်စေကြလော့’
‘ကောင်းကင်ဘုံ၌လည်းကောင်း၊ မြေကြီးပေါ်၌လည်းကောင်း အခွင့်တန်ခိုးရှိသမျှကို ငါခံရပြီ။ ထို့ကြောင့် သင်တို့သွား၍ ငါ့တပည့်ဖြစ်စေကြလော့။’—မဿဲ ၂၈:၁၈၊ ၁၉၊ သမ္မာ။
၁၊ ၂။ (က) ယေရှုသည် ကိုယ်တော်၏နောက်လိုက်များကို အဘယ်တာဝန် အပ်နှင်းခဲ့သနည်း။ (ခ) ယေရှု၏မိန့်မှာချက်များနှင့်စပ်လျဉ်းပြီး အဘယ်မေးခွန်းများကို သုံးသပ်ကြမည်နည်း။
စီ.အီး. ၃၃ ခုနှစ်၊ ဣသရေလနိုင်ငံ၏ နွေဦးနေ့တစ်နေ့၌ ယေရှု၏တပည့်များ ဂါလိလဲနယ်ရှိ တောင်တစ်တောင်တွင် စုရုံးရောက်ရှိနေကြ၏။ ရှင်ပြန်ထမြောက်ခဲ့သော သူတို့၏သခင်သည် ကောင်းကင်သို့ တက်ကြွခါနီး သူတို့ကို အရေးကြီးစကား မိန့်ဆို၍ တာဝန်တစ်ခုအပ်နှင်းခဲ့သည်။ ထိုတာဝန်ကား အဘယ်နည်း။ ကိုယ်တော်၏တပည့်များသည် ၎င်းတာဝန်ကို မည်သို့တုံ့ပြန်ခဲ့ကြသနည်း။ ထိုတာဝန်သည် ယနေ့ ကျွန်ုပ်တို့နှင့်လည်း မည်သို့သက်ဆိုင်သနည်း။
၂ ယေရှုမိန့်ဆိုရာကို မဿဲ ၂၈:၁၈-၂၀ (သမ္မာ) တွင်ဤသို့မှတ်တမ်းတင်ထားသည်– ‘ကောင်းကင်ဘုံ၌လည်းကောင်း၊ မြေကြီးပေါ်၌လည်းကောင်း အခွင့်တန်ခိုးရှိသမျှကို ငါခံရပြီ။ ထို့ကြောင့် သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက် ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ [နှစ်ခြင်း]ပေးကြလော့။ ငါသည် သင်တို့အား ပညတ်သမျှကို စောင့်ရှောက်စေခြင်းငှာ ဆုံးမ . . . ကြလော့။ ငါသည်လည်း ဤကပ်ကမ္ဘာကုန်သည်တိုင်အောင် သင်တို့နှင့်အတူ အစဉ်မပြတ်ရှိသည်။’ ယေရှုက “အခွင့်တန်ခိုးရှိသမျှ၊” “လူမျိုးတကာ၊” “သင်တို့အား ပညတ်သမျှ၊” နှင့် “အစဉ်မပြတ်” အစရှိသည်တို့ကို မိန့်ဆိုခဲ့၏။ အဆိုပါအချက်လေးချက်ပါဝင်သည့် ကိုယ်တော်၏မိန့်မှာချက်များကို အဘယ်ကြောင့်နည်း၊ အဘယ်နေရာ၌နည်း၊ အဘယ်အရာနည်း၊ အဘယ်အချိန်နည်းဟူသော စကားလုံးများဖြင့် အကျဉ်းချုပ်နိုင်သည့် အရေးကြီးမေးခွန်းအချို့ ပေါ်ပေါက်လာသည်။ မေးခွန်းတစ်ခုစီကို သုံးသပ်ကြည့်ကြစို့။ *
“အခွင့်တန်ခိုးရှိသမျှကို ငါခံရပြီ”
၃။ တပည့်ဖြစ်စေခြင်း မိန့်မှာချက်ကို ကျွန်ုပ်တို့ အဘယ်ကြောင့် နာခံသင့်သနည်း။
၃ ပထမတစ်ခုအနေနှင့်၊ ကျွန်ုပ်တို့သည် တပည့်ဖြစ်စေခြင်း မိန့်မှာချက်ကို အဘယ်ကြောင့် နာခံသင့်သနည်း။ ယေရှုက ‘ကောင်းကင်ဘုံ၌လည်းကောင်း၊ မြေကြီးပေါ်၌လည်းကောင်း အခွင့်တန်ခိုးရှိသမျှကို ငါခံရပြီ။ ထို့ကြောင့် သင်တို့သွား၍ တပည့်ဖြစ်စေကြလော့’ ဟုမိန့်ဆိုခဲ့သည်။ “ထို့ကြောင့်” ဟူသောစကားလုံးက ဤမိန့်မှာချက်ကို နာခံသင့်သည့် အဓိကအကြောင်းရင်းကို ဖော်ပြ၏။ ထိုမိန့်မှာချက်ကို ထုတ်ပြန်ခဲ့သူ ယေရှုသည် “အခွင့်တန်ခိုးရှိသမျှ” ကိုပိုင်ဆိုင်ထားသောကြောင့်ဖြစ်သည်။ ကိုယ်တော်၏စီရင်ပိုင်ခွင့်တန်ခိုးသည် မည်မျှကျယ်ပြန့်သနည်း။
၄။ (က) ယေရှု၏အခွင့်တန်ခိုးသည် မည်မျှကျယ်ပြန့်သနည်း။ (ခ) ယေရှု၏အခွင့်တန်ခိုးကို ကျွန်ုပ်တို့နားလည်မှုသည် တပည့်ဖြစ်စေခြင်း မိန့်မှာချက်အပေါ် ကျွန်ုပ်တို့ရှုမြင်ပုံကို မည်သို့အကျိုးသက်ရောက်စေသင့်သနည်း။
၄ ယေရှုသည် အသင်းတော်အပေါ် အခွင့်တန်ခိုးရှိ၏၊ ၁၉၁၄ ခုနှစ်ကတည်းက တည်ထောင်ခါစ ဘုရားသခင့်နိုင်ငံတော်အပေါ် အခွင့်တန်ခိုးရရှိခဲ့သည်။ (ကောလောသဲ ၁:၁၃; ဗျာ. ၁၁:၁၅) ကိုယ်တော်သည် ကောင်းကင်တမန်မင်းဖြစ်တော်မူရာ သန်းရာနှင့်ချီကောင်းကင်တမန်များပါဝင်သည့် ကောင်းကင်တပ်အပေါ် အခွင့်တန်ခိုးရှိ၏။ (၁ သက်သာလောနိတ် ၄:၁၆; ၁ ပေတရု ၃:၂၂; ဗျာ. ၁၉:၁၄-၁၆) ခမည်းတော်သည် ဖြောင့်မတ်သောမူများကို ဆန့်ကျင်သည့် “အထွတ်အမြတ်အာဏာတန်ခိုးအမျိုးမျိုးကို” ဖျက်ဆီးနိုင်ခွင့်တန်ခိုးအာဏာ ကိုယ်တော်အား အပ်နှင်းထားသည်။ (၁ ကောရိန္သု ၁၅:၂၄-၂၆; ဧဖက် ၁:၂၀-၂၃) ယေရှု၏အခွင့်တန်ခိုးသည် သက်ရှိများအပေါ်သာ ကန့်သတ်ထားသည်မဟုတ်။ ကိုယ်တော်သည် “အသက်ရှင်သောသူတို့နှင့် သေသောသူတို့ကို တရားစီရင်သောသခင်” လည်းဖြစ်ရာ သေခြင်း၌အိပ်ပျော်နေသူများကို ရှင်ပြန်ထမြောက်ပေးရန် ဘုရားသခင်ပေးတန်ခိုးအာဏာ ရရှိထား၏။ (တမန်တော် ၁၀:၄၂; ယောဟန် ၅:၂၆-၂၈) ဤမျှတန်ခိုးအာဏာကြီးမားသူ၏မိန့်မှာချက်ကို အရေးတကာ့အရေးကြီးဆုံးအဖြစ် ရှုမြင်သင့်သည်။ ထို့ကြောင့် ကျွန်ုပ်တို့သည် ‘သွား၍တပည့်ဖြစ်စေကြ’ ဟူသော ခရစ်တော်၏မိန့်မှာချက်ကို လေးစားစွာ တလိုတလားနာခံကြသည်။
၅။ (က) ယေရှု၏စကားကို ပေတရု မည်သို့နာခံခဲ့သနည်း။ (ခ) ယေရှု၏ညွှန်ကြားချက်များကို ပေတရု နာခံသည့်အခါ အဘယ်ကောင်းကျိုး ရရှိခဲ့သနည်း။
၅ ယေရှု၏မြေကြီးဓမ္မအမှုအစောပိုင်းတွင် မိမိ၏အခွင့်တန်ခိုးကို အသိအမှတ်ပြုပြီး မိန့်မှာချက်များကို နာခံခြင်းသည် အကျိုးကြီးကြောင်း ထူးဆန်းသောနည်းဖြင့် တပည့်များအား သင်ပေးခဲ့သည်။ တစ်ချိန်တွင် ကိုယ်တော်က တံငါသည်ပေတရုကို “ရေနက်ရာအရပ်သို့ ရွှေ့ဦးလော့။ ပိုက်ကွန်ကိုချ၍ ငါးကိုအုပ်စမ်းလော့” ဟုမိန့်ဆိုခဲ့သည်။ ထိုတွင် ငါးမရှိကြောင်း ပေတရု တပ်အပ်သိထားရာ ယေရှုအား “သခင်၊ အကျွန်ုပ်တို့သည် တစ်ညလုံးကြိုးစားသော်လည်း တစ်ကောင်ကိုမျှမရပါ” ဟုလျှောက်ခဲ့သည်။ သို့ရာတွင် ပေတရုက စိတ်နှိမ့်ချစွာဖြင့် “အမိန့်တော်ရှိလျှင် ပိုက်ကွန်ကိုချပါမည်” ဟုထပ်မံလျှောက်လေသည်။ ခရစ်တော်မိန့်မှာသည့်အတိုင်း ပေတရု နာခံလုပ်ဆောင်ခဲ့ရာ “အလွန်များစွာသော ငါးတို့ကို” ဖမ်းမိခဲ့၏။ ထိုအခါ ပေတရုသည် ထိတ်လန့်စွာ “ယေရှု၏ပုဆစ်တော်ကိုဦးတိုက်၍ ‘သခင်၊ အကျွန်ုပ်သည် အပြစ်များသောသူဖြစ်ပါ၏။ အကျွန်ုပ်ဆီမှကြွသွားတော်မူပါ’ ဟုလျှောက်လေ၏။” သို့သော် ယေရှုက “ကြောက်ရွံ့ခြင်းမရှိနှင့်။ သင်သည် ယခုမှစ၍ လူတို့ကို ဖမ်းမိသောသူဖြစ်လိမ့်မည်” ဟုဖြေတော်မူ၏။ (လုကာ ၅:၁-၁၀; မဿဲ ၄:၁၈) ကျွန်ုပ်တို့သည် အဆိုပါမှတ်တမ်းမှ အဘယ်သင်ခန်းစာရသနည်း။
၆။ (က) အံ့ဖွယ်ငါးဖမ်းခြင်း မှတ်တမ်းက ယေရှုတောင်းဆိုသည့် နာခံခြင်းမျိုးကို မည်သို့ပုံဖော်ပြသနည်း။ (ခ) ယေရှုကို ကျွန်ုပ်တို့ မည်သို့တုပနိုင်သနည်း။
၆ ပေတရု၊ အန္ဒြေနှင့် အခြားတမန်တော်များသည် ဤအံ့ဖွယ်ငါးဖမ်းခြင်းပြီးမှသာ ယေရှုက သူတို့အား “လူကိုမျှားသောတံငါဖြစ်စေခြင်း” တာဝန်ကို အပ်နှင်းခဲ့သည်။ (မာကု ၁:၁၆၊ ၁၇) မျက်စိစုံမှိတ်နာခံခြင်းမျိုးကို ယေရှုမတောင်းဆိုခဲ့ကြောင်း ထင်ရှား၏။ ကိုယ်တော်၏စကားကိုနာခံသင့်သည့် ယုံကြည်စိတ်ချရသော အကြောင်းရင်းကို သူတို့အား ပြသပေးခဲ့သည်။ ပိုက်ကွန်ချပါဟူသော ယေရှု၏မိန့်မှာချက်ကို လိုက်နာသည့်အခါ အကျိုးများစွာရရှိခဲ့သကဲ့သို့ပင် ‘လူကိုမျှား’ ပါဟူသော ယေရှု၏မိန့်မှာချက်ကို နာခံလျှင်လည်း အကျိုးများစွာရရှိပေလိမ့်မည်။ တမန်တော်များသည် ယုံကြည်ခြင်းအပြည့်အဝဖြင့် လုပ်ဆောင်ခဲ့ကြ၏။ မှတ်တမ်းက ဤသို့နိဂုံးချုပ်သည်– “ကမ်းနားမှာ လှေကိုဆိုက်ပြီးလျှင် ထိုသူတို့သည် ရှိသမျှတို့ကိုစွန့်ပစ်၍ နောက်တော်သို့လိုက်ကြ၏။” (လုကာ ၅:၁၁) ယနေ့ အခြားသူများကို တပည့်ဖြစ်စေခြင်းလုပ်ငန်းတွင် ပါဝင်ရန် ကျွန်ုပ်တို့ အားပေးသည့်အခါ ယေရှုကို တုပကြ၏။ ကျွန်ုပ်တို့ပြောသည့်အတိုင်း လုပ်ဆောင်ဖို့သာ လူတို့ကို မတောင်းဆိုဘဲ ခရစ်တော်၏မိန့်မှာချက်ကို နာခံရန် ယုံကြည်စိတ်ချရသော အကြောင်းရင်းများကို ကျွန်ုပ်တို့ ပြောပြကြသည်။
စိတ်ချရသောအကြောင်းပြချက်များနှင့် ရည်ရွယ်ချက်မှန်များ
၇၊ ၈။ (က) ဘုရားသခင့်နိုင်ငံတော်သတင်းဟောပြောခြင်းနှင့် တပည့်ဖြစ်စေခြင်း၌ပါဝင်ရန် ကျမ်းစာအကြောင်းပြချက်အချို့ကား အဘယ်နည်း။ (ခ) ဟောပြောခြင်းလုပ်ငန်းတွင် ဆက်ပါဝင်ရန် အထူးသဖြင့် လှုံ့ဆော်ပေးသောကျမ်းချက်ကား အဘယ်နည်း။ (အောက်ခြေမှတ်ချက်ကိုလည်းရှု။)
၇ ခရစ်တော်၏အခွင့်တန်ခိုးကို ကျွန်ုပ်တို့ အသိအမှတ်ပြုကြသောကြောင့် ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် ကျွန်ုပ်တို့ပါဝင်ကြခြင်းဖြစ်၏။ အလုပ်မွန်များတွင် ကျွန်ုပ်တို့ ပါဝင်လုပ်ဆောင်စေလိုသူများအား ထိုလုပ်ငန်းလုပ်ရခြင်းအကြောင်းနှင့်ပတ်သက်သည့် တခြားကျမ်းချက်များကို ပြနိုင်သေးသလော။ နိုင်ငံအသီးသီးမှ သစ္စာရှိသက်သေခံအချို့ ပြောပြသည့် အောက်ပါစကားများကို သုံးသပ်ပြီး ကိုးကားထားသောကျမ်းချက်များက သူတို့၏စကားကို မည်သို့ထောက်ခံကြောင်း သတိပြုပါ။
၈ ၁၉၅၁ ခုနှစ်တွင် နှစ်ခြင်းခံခဲ့သော ရွိုင်က “ယေဟောဝါထံ ကျွန်တော် ဆက်ကပ်အပ်နှံချိန်မှာ ကိုယ်တော့်ကို အမြဲတမ်းဝတ်ပြုပါမယ်လို့ ကတိပေးခဲ့တယ်။ ကျွန်တော် ကတိတည်ချင်တယ်” ဟုဆိုသည်။ (ဆာလံ ၅၀:၁၄; မဿဲ ၅:၃၇) ၁၉၆၂ ခုနှစ်က နှစ်ခြင်းခံခဲ့သော ဟယ်သာက ဤသို့ဆိုသည်– “ကျွန်မအတွက် ယေဟောဝါပြုလုပ်ပေးသမျှကို စဉ်းစားမိတဲ့အခါ ကိုယ်တော့်ကို သစ္စာရှိရှိဝတ်ပြုပြီး ကျေးဇူးတင်ကြောင်း ပြချင်တယ်။” (ဆာလံ ၉:၁၊ ၉-၁၁; ကောလောသဲ ၃:၁၅) ၁၉၅၄ ခုနှစ်တွင် နှစ်ခြင်းခံခဲ့သော ဟဲန်နာလိုရာက “အမှုဆောင်ထွက်တိုင်း ကျွန်မတို့နဲ့အတူ ကောင်းကင်တမန်တွေ လိုက်ပါလာတယ်—ဒါဟာ အခွင့်ထူးတစ်ခုပဲ!” ဟုဆို၏။ (တမန်တော် ၁၀:၃၀-၃၃; ဗျာ. ၁၄:၆၊ ၇) ၁၉၆၉ ခုနှစ်တွင် နှစ်ခြင်းခံခဲ့သော အာနာရ်က “ယေဟောဝါတရားစီရင်တဲ့နေ့ ရောက်လာတဲ့အခါ ‘သတိပေးချက်ကို တစ်ခါမှမကြားဖူးဘူး!’ လို့ ကျွန်မရဲ့ရပ်ကွက်ကလူတွေပြောပြီး ယေဟောဝါနဲ့ ကိုယ်တော်ရဲ့သက်သေခံတွေ တာဝန်ပျက်ကွက်တယ်လို့ စွပ်စွဲတာမခံစေချင်ဘူး” ဟုပြောခဲ့သည်။ (ယေဇကျေလ ၂:၅; ၃:၁၇-၁၉; ရောမ ၁၀:၁၆၊ ၁၈) ၁၉၇၄ ခုနှစ်တွင် နှစ်ခြင်းခံခဲ့သော ကလော်ဒီယိုက ဤသို့ဆိုသည်– “ကျွန်တော်တို့ အမှုဆောင်ထွက်တဲ့အခါ ‘ဘုရားသခင့်ရှေ့မှောက်မှာရှိပြီး ခရစ်တော်နဲ့အတူ တွဲသွားနေကြတာ။’ စဉ်းစားကြည့်ပါ! ကျွန်တော်တို့ အမှုဆောင်ထွက်နေတဲ့အခါ ကျွန်တော်တို့ရဲ့အကောင်းဆုံးမိတ်ဆွေတွေနဲ့ ပေါင်းသင်းခွင့်ရတယ်!”—၂ ကောရိန္သု ၂:၁၇။ *
၉။ (က) ပေတရုနှင့် အခြားတမန်တော်များ၏ ငါးဖမ်းခြင်းအတွေ့အကြုံသည် ခရစ်တော်ကိုနာခံခြင်း၏ ရည်ရွယ်ချက်မှန်နှင့်ပတ်သက်၍ အဘယ်အရာဖော်ပြသနည်း။ (ခ) ယနေ့ ဘုရားသခင်နှင့် ခရစ်တော်တို့ကို နာခံခြင်း၏ရည်ရွယ်ချက်မှန်ကား အဘယ်နည်း၊ အဘယ်ကြောင့်နည်း။
၉ အံ့ဖွယ်ငါးဖမ်းခြင်းအကြောင်းသည် ခရစ်တော်စကားနားထောင်ခြင်း ရည်ရွယ်ချက်မှန်ဖြစ်သည့် မေတ္တာရှိခြင်း၏ အရေးကြီးမှုကိုလည်း ဖော်ပြသည်။ ပေတရုက “အကျွန်ုပ်သည် အပြစ်များသောသူဖြစ်ပါ၏။ အကျွန်ုပ်ဆီမှကြွသွားတော်မူပါ” ဟုလျှောက်သောအခါ ယေရှု မထွက်ခွာသွားသည့်အပြင် ပေတရု၏အပြစ်တစ်ခုခုကိုဖော်၍ အပြစ်တင်ခြင်းလည်း မပြုခဲ့ပါ။ (လုကာ ၅:၈) ထွက်သွားပါဟု ပေတရု၏လျှောက်ဆိုချက်ကိုပင် ယေရှု အပြစ်မတင်ခဲ့ချေ။ ၎င်းအစား၊ ကြင်နာစွာဖြင့် “ကြောက်ရွံ့ခြင်းမရှိနှင့်” ဟု ယေရှု မိန့်ဆိုခဲ့၏။ အလွန်အမင်းကြောက်ရွံ့ပြီး ခရစ်တော်ကိုနာခံခြင်းသည် ရည်ရွယ်ချက် မှားပေမည်။ ယေရှုသည် ပေတရုနှင့် သူ၏အပေါင်းပါများအား လူကိုမျှားသောတံငါသည်များအဖြစ် အသုံးဝင်လာလိမ့်မည်ဟု မိန့်ဆိုခဲ့သည်။ ယနေ့ ကျွန်ုပ်တို့သည်လည်း ခရစ်တော်ကို နာခံရန် သူတစ်ပါးအား တိုက်တွန်းသည့်အခါ ကြောက်ရွံ့စိတ်၊ သို့မဟုတ် အပြစ်ရှိသည်၊ ရှက်စရာဖြစ်သည်အစရှိသော အပျက်သဘောထားများကို အကြောင်းပြရန်မလိုချေ။ ယေဟောဝါနှင့် ခရစ်တော်တို့ကို ချစ်သည့်မေတ္တာဖြင့် စိတ်နှလုံးအကြွင်းမဲ့နာခံမှုကသာ ဘုရားသခင်၏စိတ်တော်ကို ရွှင်လန်းစေနိုင်မည်။—မဿဲ ၂၂:၃၇။
‘လူမျိုးတကာတို့ကို တပည့်ဖြစ်စေကြလော့’
၁၀။ (က) တပည့်ဖြစ်စေပါဟူသော ယေရှု၏မိန့်မှာချက်နှင့်စပ်လျဉ်း၍ အဘယ်အသေးစိတ်အချက်အလက်သည် တပည့်များအတွက် ကြီးမားသော စိန်ခေါ်ချက်တစ်ရပ်ဖြစ်ခဲ့သနည်း။ (ခ) ယေရှု၏မိန့်မှာချက်ကို တပည့်များ မည်သို့ တုံ့ပြန်ခဲ့ကြသနည်း။
၁၀ ခရစ်တော်၏မိန့်မှာချက်နှင့်ပတ်သက်ပြီး မေးစရာ ဒုတိယမေးခွန်းမှာ ဤတပည့်ဖြစ်စေခြင်းလုပ်ငန်းကို အဘယ်နေရာတွင် လုပ်ဆောင်သင့်သနည်းဖြစ်သည်။ ယေရှုက နောက်လိုက်များအား ‘လူမျိုးတကာတို့ကို တပည့်ဖြစ်စေကြလော့’ ဟုမိန့်မှာခဲ့သည်။ ယေရှု၏ ခရစ်ယာန်ဓမ္မအမှုမတိုင်မီအချိန်က ယေဟောဝါအား ဝတ်ပြုရန် ဣသရေလနိုင်ငံသို့ ရောက်ရှိလာသော လူမျိုးအပေါင်းကို ဝမ်းပန်းတသာကြိုဆိုခဲ့ကြ၏။ (၃ ဓမ္မရာဇဝင် ၈:၄၁-၄၃) ယေရှုကိုယ်တော်တိုင် ဣသရေလလူမျိုးကို အဓိကထားဟောပြောခဲ့သော်လည်း ယခု ကိုယ်တော်က လူမျိုးတကာတို့ကို ဟောပြောရန် နောက်လိုက်များအား မိန့်မှာလေ၏။ အမှန်စင်စစ် တပည့်များ၏ ငါးဖမ်းပိုင်နက် သို့မဟုတ် ဟောပြောခြင်းရပ်ကွက်ကို ဇာတိဂျူးများဖြစ်သည့် “ရေအိုင်” ငယ်ဖြင့်သာ ကန့်သတ်ထားသော်လည်း မကြာမီ လူသား “ပင်လယ်” တစ်ခုလုံး ပါဝင်လာတော့မည်ဖြစ်သည်။ ဤအပြောင်းအလဲသည် တပည့်များအတွက် စိန်ခေါ်ချက်တစ်ရပ်ဖြစ်ပုံရှိသော်လည်း ယေရှု၏မိန့်မှာချက်ကို သူတို့ တလိုတလားနာခံခဲ့ကြ၏။ ယေရှုသေပြီး အနှစ် ၃၀ မပြည့်မီ ဂျူးလူမျိုးကိုသာမက “ကောင်းကင်အောက်၌ရှိသမျှသော . . . သတ္တဝါ” အပေါင်းကိုပါ သတင်းကောင်းဟောပြောခဲ့ပြီဟု တမန်တော်ပေါလု ရေးသားနိုင်ခဲ့သည်။—ကောလောသဲ ၁:၂၂၊ ၂၃။
၁၁။ ၂၀ ရာစုနှစ်စပိုင်းကတည်းက ‘ငါးဖမ်းပိုင်နက်များ’ ကိုမည်သို့တိုးချဲ့ခဲ့သနည်း။
၁၁ များမကြာသေးမီက ဟောပြောခြင်းရပ်ကွက်ကို တိုးချဲ့ခဲ့ကြောင်း တွေ့မြင်ခဲ့ရပြီ။ ၂၀ ရာစုနှစ်စပိုင်း၌ ‘ငါးဖမ်းပိုင်နက်များ’ သည် နိုင်ငံအနည်းငယ်တွင်သာ ရှိခဲ့သည်။ သို့တိုင် ထိုအချိန်က ခရစ်တော်၏တပည့်နောက်လိုက်များသည် ပထမရာစုခရစ်ယာန်များ၏ ပုံသက်သေကို တုပပြီး သူတို့ဟောပြောသည့် ရပ်ကွက်ကို စိတ်အားထက်သန်စွာ တိုးချဲ့ခဲ့ကြသည်။ (ရောမ ၁၅:၂၀) ၁၉၃၀ ပြည့်လွန်နှစ်များ အစောပိုင်း၌ သူတို့သည် နိုင်ငံပေါင်းတစ်ရာခန့်တွင် တပည့်များဖြစ်စေခဲ့ကြ၏။ ယနေ့ ကျွန်ုပ်တို့၏ ‘ငါးဖမ်းပိုင်နက်များ’ ကို ၂၃၅ နိုင်ငံအထိ တိုးချဲ့ခဲ့ပြီ။—မာကု ၁၃:၁၀။
‘ဘာသာအသီးအသီးတို့မှ’
၁၂။ ဇာခရိ ၈:၂၃ တွင်တွေ့ရှိရသော ပရောဖက်ပြုချက်သည် အဘယ်စိန်ခေါ်ချက်ကို အလေးပေးဖော်ပြသနည်း။
၁၂ လူမျိုးအပေါင်းကို တပည့်ဖြစ်စေခြင်းသည် ပထဝီအနေအထားအရသာမက ဘာသာစကားအရပါ စိန်ခေါ်ချက်တစ်ခုဖြစ်သည်။ ပရောဖက်ဇာခရိအားဖြင့် ယေဟောဝါ ဤသို့ကြိုဟောခဲ့သည်– “ထိုကာလ၌ ဘာသာအသီးအသီးကိုပြောတတ်သော လူအမျိုးမျိုးတို့တွင် တစ်ကျိပ်သောလူတို့သည် ယုဒလူဖြစ်သောသူ၏ အဝတ်စွန်းကိုကိုင်လျက် ဘုရားသခင်သည် သင်နှင့်အတူ ရှိတော်မူသည်ဟု အကျွန်ုပ်တို့သည်ကြားသိ၍ သင်တို့နှင့်အတူလိုက်ပါမည်ဟု ဆိုကြလိမ့်မည်။” (ဇာခရိ ၈:၂၃) ဤပရောဖက်ပြုချက်၏ အကြီးစားပြည့်စုံချက်တွင် “ယုဒလူ” သည် ဝိညာဉ်တော်ဖွားခရစ်ယာန် အကြွင်းအကျန်ကို ကိုယ်စားပြုပြီး “တစ်ကျိပ်သောလူတို့သည်” “လူအုပ်ကြီး” ကိုကိုယ်စားပြု၏။ * (ဗျာ. ၇:၉၊ ၁၀၊ ကဘ; ဂလာတိ ၆:၁၆) ခရစ်တော်၏တပည့်များဖြစ်ကြသော ဤလူအုပ်ကြီးကို လူမျိုးအပေါင်းတွင် တွေ့ရှိရပြီး ဇာခရိဖော်ပြခဲ့သည့်အတိုင်း သူတို့သည် ဘာသာစကားအမျိုးမျိုး ပြောဆိုကြလိမ့်မည်။ မျက်မှောက်ခေတ် ဘုရားသခင့်လူမျိုးတော်၏သမိုင်းသည် တပည့်ဖြစ်စေခြင်း၏ ထိုအပိုင်းကို ဖော်ပြသလော။ ဖော်ပြပါသည်။
၁၃။ (က) ဘာသာစကားနှင့်ပတ်သက်၍ အဘယ်တိုးတက်မှုကို မျက်မှောက်ခေတ် ဘုရားသခင့်လူမျိုးတော်တွင် တွေ့မြင်နေရသနည်း။ (ခ) သစ္စာရှိကျေးကျွန်အတန်းအစားသည် ဘာသာစကားအမျိုးမျိုးဖြင့် ဝိညာဉ်အစာ ပိုမိုလိုအပ်မှုကို မည်သို့တုံ့ပြန်ခဲ့ပြီနည်း။ (“မျက်မမြင်တို့အတွက် စာအုပ်များ” လေးထောင့်ကွက်ပါဝင်။)
၁၃ ၁၉၅၀ ပြည့်နှစ်၌ ကမ္ဘာတစ်ဝန်းရှိ ယေဟောဝါသက်သေ ၅ ဦးတွင် ၃ ဦးခန့်၏ မိခင်ဘာသာစကားမှာ အင်္ဂလိပ်စကားဖြစ်သည်။ ၁၉၈၀ ပြည့်နှစ်တိုင်သော် ၅ အချိုး ၂ အထိ ကျသွားပြီး ယနေ့ သက်သေခံ ၅ ဦးလျှင် ၁ ဦးသာ အင်္ဂလိပ်စကားပြောသည်။ ဤသို့ဖြစ်လာခြင်းကို သစ္စာနှင့်သတိပညာရှိကျေးကျွန်သည် မည်သို့တုံ့ပြန်ခဲ့သနည်း။ ယခင်ကထက် ဘာသာစကားများစွာနှင့် ဝိညာဉ်အစာကို ကျွေးမွေးခြင်းအားဖြင့်ဖြစ်သည်။ (မဿဲ ၂၄:၄၅၊ ကဘ) ဥပမာ၊ ၁၉၅၀ ပြည့်နှစ်တွင် ကျွန်ုပ်တို့၏စာပေကို ဘာသာစကား ၉၀ ဖြင့် ထုတ်ဝေခဲ့သော်လည်း ယနေ့ ဘာသာစကားပေါင်း ၄၀၀ ခန့်တိုး၍ထုတ်ဝေနေပြီ။ ဘာသာစကားအမျိုးမျိုးပြောဆိုသူ အုပ်စုများကို ဤသို့အာရုံစိုက်ခြင်းကြောင့် အကျိုးဖြစ်ထွန်းခဲ့ပြီလော။ ဖြစ်ထွန်းခဲ့ပြီ! တစ်ပတ်လျှင် ပျမ်းမျှ “အသီးအသီးဘာသာစကားကိုပြော” ဆိုသူ ၅,၀၀၀ ခန့်သည် ခရစ်တော်၏တပည့်စစ်များ ဖြစ်လာနေကြသည်! (ဗျာ. ၇:၉) ဆက်၍လည်း တိုးများလာနေဆဲပင်။ နိုင်ငံအချို့တွင် “ပိုက်ကွန်” ဖြင့်ငါးများစွာကို ဖမ်းမိနေကြပြီ!—လုကာ ၅:၆; ယောဟန် ၂၁:၆။
အကျိုးနပ်သော ခရစ်ယာန်ဓမ္မအမှု —အသင် ပါဝင်နိုင်သလော
၁၄။ ကျွန်ုပ်တို့၏ရပ်ကွက်ရှိ ဘာသာခြားစကားပြောဆိုသူကို မည်သို့ကူညီပေးနိုင်သနည်း။ (“လက်ဟန်ပြဘာသာစကားနှင့် တပည့်ဖြစ်စေခြင်း” လေးထောင့်ကွက်ပါဝင်။)
၁၄ အနောက်တိုင်းနိုင်ငံများစွာတွင် တိုင်းတစ်ပါးမှ လာရောက်နေထိုင်ကြသူများကြောင့် အနီးပတ်ဝန်းကျင်၌ “အသီးအသီးဘာသာစကား” ပြောဆိုသူများကို တပည့်ဖြစ်စေရန် အခက်အခဲပေါ်လာ၏။ (ဗျာ. ၁၄:၆) ဘာသာခြားစကားပြောဆိုသူ ကျွန်ုပ်တို့၏ရပ်ကွက်သားများကို မည်သို့ကူညီပေးနိုင်မည်နည်း။ (၁ တိမောသေ ၂:၄) ပုံဆောင်စကားအရ တော်သင့်မှန်ကန်သော ငါးဖမ်းကိရိယာကို အသုံးပြုနိုင်၏။ သူတို့ဘာသာစကားဖြင့် စာပေများကို ဝေငှပါ။ ဖြစ်နိုင်လျှင် သူတို့ဘာသာစကားပြောဆိုတတ်သူ သက်သေခံတစ်ဦးအား သူတို့ထံလည်ပတ်ရန် စီစဉ်ပေးပါ။ (တမန်တော် ၂၂:၂) သက်သေခံများစွာသည် တိုင်းတစ်ပါးသားများကို ခရစ်တော်၏တပည့်ဖြစ်လာစေရန် ကူညီပေးဖို့ ဘာသာခြားစကားများ သင်ယူနေကြပြီဖြစ်ရာ ထိုသို့အစီအစဉ်များဆွဲခြင်းသည် ယခု သာ၍ပင်လွယ်ကူလာပြီ။ ဤသို့ကူညီပေးရကျိုးနပ်ကြောင်း မှတ်တမ်းများက ဖော်ပြသည်။
၁၅၊ ၁၆။ (က) နိုင်ငံခြားဘာသာစကားပြောသူများကို ကူညီပေးခြင်းသည် အကျိုးနပ်ကြောင်း အဘယ်ဥပမာများက ဖော်ပြသနည်း။ (ခ) နိုင်ငံခြားဘာသာစကားပြော လယ်ကွင်းလုပ်ငန်းနှင့်စပ်လျဉ်း၍ အဘယ်မေးခွန်းများကို ကျွန်ုပ်တို့ သုံးသပ်နိုင်ကြသနည်း။
၁၅ ဘာသာစကား ၃၄ မျိုးဖြင့် ဘုရားသခင့်နိုင်ငံတော်ဟောပြောခြင်းလုပ်ငန်းကို ထမ်းဆောင်နေသော နယ်သာလန်နိုင်ငံမှ ပုံနမူနာနှစ်ခုကို သုံးသပ်ကြည့်ပါ။ သက်သေခံဇနီးမောင်နှံတစ်စုံသည် ပိုလန်စကားပြော နိုင်ငံခြားသားများထံသွား၍ တပည့်ဖြစ်စေရန် စေတနာ့ဝန်ထမ်းခဲ့ကြသည်။ သူတို့၏ကြိုးစားအားထုတ်မှုကို အားရပါးရတုံ့ပြန်ကြရာ ခင်ပွန်းဖြစ်သူသည် စိတ်ဝင်စားသူများနှင့် ကျမ်းစာသင်အံမှုပြုလုပ်နိုင်ဖို့ တစ်ပတ်လျှင် အချိန်တစ်ရက် ပိုရရှိရန် ဝမ်းစာရှာအလုပ်ကို မဖြစ်မနေလျှော့ချရမည်ဖြစ်ကြောင်း သိလိုက်လေသည်။ မကြာမီ ဤဇနီးမောင်နှံသည် အပတ်စဉ် ကျမ်းစာသင်အံမှု ၂၀ ကျော်ကျင်းပနေကြသည်။ သူတို့ ဤသို့ပြောသည်– “ခရစ်ယာန်ဓမ္မအမှုမှာပါဝင်ရတာ ကျွန်တော်တို့ သိပ်ပျော်တယ်။” မိမိတို့ဘာသာစကားဖြင့် ကျမ်းစာအမှန်တရားကြားနာရသူများက ကျေးဇူးတင်ကြောင်း ပြောဆိုသောအခါ အထူးသဖြင့် တပည့်ဖြစ်စေသူများ ပျော်ရွှင်ကြ၏။ ဥပမာ၊ ဗီယက်နမ်ဘာသာစကားဖြင့်ကျင်းပသော အစည်းအဝေးတစ်ခုတွင် သက်ကြီးရွယ်အိုအမျိုးသားတစ်ဦးက မတ်တတ်ထ၍ စကားပြောခွင့်ပေးပါရန် ခွင့်ပန်ခဲ့သည်။ သက်သေခံများအား မျက်ရည်စက်လက်နှင့် သူဤသို့ပြော၏–
“ကျွန်တော့်ရဲ့ခက်ခဲတဲ့ဘာသာစကားကို ခင်ဗျားတို့ ကြိုးစားသင်ယူနေကြလို့ ကျေးဇူးတင်ပါတယ်။ အသက်ကြီးမှ သမ္မာကျမ်းစာထဲက တကယ့်ကောင်းတဲ့အချက်တွေ သိလာရလို့ အများကြီးကျေးဇူးတင်တယ်။”၁၆ ထို့ကြောင့် နိုင်ငံခြားဘာသာစကားပြော အသင်းတော်များတွင် အမှုဆောင်နေကြသူများသည် အလွန်ပင်ပန်းရကျိုးနပ်ကြောင်း ခံစားရသည်မှာ အံ့အားသင့်စရာမဟုတ်ပေ။ ဗြိတိန်နိုင်ငံမှ ဇနီးမောင်နှံတစ်စုံက ဤသို့ပြောပြသည်– “ကျွန်တော်တို့အမှုဆောင်ခဲ့တဲ့ အနှစ် ၄၀ အတွင်း နိုင်ငံခြားဘာသာစကားပြောလယ်ကွင်းမှာ အမှုဆောင်ရတာ စိတ်အလှုပ်ရှားဆုံးပဲ။” စိတ်လှုပ်ရှားဖွယ် ဤခရစ်ယာန်ဓမ္မအမှုမျိုးတွင် ပါဝင်ရန် သင်၏အခြေအနေများကို ပြုပြင်ပြောင်းလဲနိုင်ပါသလော။ အကယ်၍ သင်သည် ကျောင်းတက်နေသေးလျှင် ဤခရစ်ယာန်ဓမ္မအမှုတွင် ပါဝင်နိုင်ရန် ဘာသာခြားစကားတစ်မျိုးမျိုးကို သင်ယူလေ့လာနိုင်သလော။ ထိုသို့သင်ယူခြင်းသည် ကောင်းချီးပြည့်ဝသော အကျိုးရှိဘဝလမ်းစဉ်အတွက် လမ်းဖွင့်ပေးရာရောက်နိုင်သည်။ (သု. ၁၀:၂၂) ဤအကြောင်းကို သင်၏မိဘများနှင့် ဆွေးနွေးကြည့်ပါလေ။
ကျွန်ုပ်တို့၏နည်းလမ်းများကို ပြောင်းလဲခြင်း
၁၇။ ကျွန်ုပ်တို့အသင်းတော်ရပ်ကွက်တွင် ပို၍လူများများထံ မည်သို့ ရောက်ရှိနိုင်သနည်း။
၁၇ ကျွန်ုပ်တို့အများစုသည် နိုင်ငံခြားဘာသာစကားပြောရပ်ကွက်များတွင် “ပိုက်ကွန်” ချရန် အခြေအနေမပေးကြောင်း နားလည်နိုင်ပါသည်။ သို့သော် ကျွန်ုပ်တို့အသင်းတော်ရပ်ကွက်တွင်ပင် ယခင်ကထက် ပို၍လူများများထံ ရောက်ရှိနိုင်ကြ၏။ မည်သို့အားဖြင့်နည်း။ ကျွန်ုပ်တို့၏သတင်းတရားကိုမဟုတ်ဘဲ နည်းလမ်းများကို ပြောင်းလဲခြင်းအားဖြင့်ဖြစ်သည်။ ဒေသများစွာ၌ အဆင့်မြင့်လုံခြုံရေး အဆောက်အအုံများတွင် နေထိုင်ကြသူ များသည်ထက်များလာပြီ။ အခြားသူများမှာမူ ကျွန်ုပ်တို့ အမှုဆောင်ထွက်ချိန်တွင် အိမ်၌မရှိကြချေ။ ထို့ကြောင့် ကျွန်ုပ်တို့၏ “ပိုက်ကွန်” ချရန် အချိန်နှင့်နေရာကို ပြောင်းလဲပေးဖို့ လိုပေမည်။ ဤနည်းဖြင့် ယေရှုကို ကျွန်ုပ်တို့ တုပကြ၏။ ကိုယ်တော်သည် အခြေအနေအလိုက် လူတို့ကို ဟောပြောရန် နည်းလမ်းရှာခဲ့သည်။—မဿဲ ၉:၉; လုကာ ၁၉:၁-၁၀; ယောဟန် ၄:၆-၁၅။
၁၈။ နေရာအသီးသီးတွင် သက်သေခံခြင်းသည် မည်သို့ထိရောက်မှုရှိသနည်း။ (“စီးပွားရေးလုပ်ကိုင်သူများကို တပည့်ဖြစ်စေခြင်း” လေးထောင့်ကွက်ပါဝင်။)
၁၈ ကမ္ဘာ့ဒေသအချို့တွင် လူတို့ကို ရှာတွေ့နိုင်သည့် မည်သည့်နေရာ၌မဆို သက်သေခံခြင်းသည် တပည့်ဖြစ်စေခြင်း၏ အရေးကြီးနည်းလမ်းတစ်ခုဖြစ်လာသည်။ ရင့်ကျက်သော တပည့်ဖြစ်စေသူများသည် နေရာဒေသအသီးသီးတွင် သက်သေခံခြင်းကို ပို၍အာရုံစိုက်လာကြပြီ။ ယခုအခါ ကြေညာသူများသည် တစ်အိမ်မှတစ်အိမ်ဓမ္မအမှုတွင် ပါဝင်သည့်အပြင် လေဆိပ်များ၊ ရုံးများ၊ စတိုးဆိုင်များ၊ ကားရပ်ရန်နေရာများ၊ ကားမှတ်တိုင်များ၊ လမ်းများ၊ ပန်းခြံများ၊ ကမ်းခြေများနှင့် မည်သည့်နေရာတွင်မဆို သက်သေခံနေကြပြီ။ ဟာဝိုင်ယီရှိ နှစ်ခြင်းခံပြီးစ သက်သေခံများစွာကို ထိုသို့သောနေရာများတွင် ဦးဆုံးတွေ့ဆုံခဲ့၏။ ကျွန်ုပ်တို့၏နည်းလမ်းများကို ပြောင်းလဲပေးခြင်းအားဖြင့် တပည့်ဖြစ်စေပါဟူသော ယေရှု၏မိန့်မှာချက်ကို အပြည့်အဝလိုက်နာနိုင်စေ၏။—၁ ကောရိန္သု ၉:၂၂၊ ၂၃။
၁၉။ ကျွန်ုပ်တို့အား ယေရှုမိန့်မှာထားသည့် အဘယ်ကဏ္ဍနှစ်ရပ်ကို နောက်ဆောင်းပါးတွင် ဆွေးနွေးမည်နည်း။
၁၉ တပည့်ဖြစ်စေရန် ယေရှု၏တာဝန်ပေးချက်တွင် ထိုလုပ်ငန်းကို အဘယ်ကြောင့် နှင့် အဘယ်နေရာတွင် ပြုလုပ်သင့်သည်သာမက အဘယ်အရာကို ဟောပြောသင့်ပြီး အဘယ်အချိန်ထိတိုင် ဆက်ဟောပြောသင့်သည်နှင့်စပ်လျဉ်း၍ အသေးစိတ်အချက်အလက်များ ပါဝင်သည်။ ကျွန်ုပ်တို့အား ယေရှုမိန့်မှာထားသည့် အဆိုပါကဏ္ဍနှစ်ရပ်ကို နောက်ဆောင်းပါးတွင် သုံးသပ်ကြပါမည်။
[အောက်ခြေမှတ်ချက်များ]
^ အပိုဒ်၊ 2 ဤဆောင်းပါးတွင် ပထမမေးခွန်းနှစ်ခုကို သုံးသပ်ကြမည်။ နောက်ဆောင်းပါးတွင် နောက်ဆုံးမေးခွန်းနှစ်ခုကို ဆွေးနွေးကြမည်။
^ အပိုဒ်၊ 8 ဟောပြောခြင်း၌ပါဝင်ရန် ထပ်ဆင့်အကြောင်းပြချက်များကို သု. ၁၀:၅; အာမုတ် ၃:၈; မဿဲ ၂၄:၄၂; မာကု ၁၂:၁၇; ရောမ ၁:၁၄၊ ၁၅ တို့တွင် တွေ့ရှိရသည်။
^ အပိုဒ်၊ 12 ဤပရောဖက်ပြုချက်ပြည့်စုံခြင်းအကြောင်းများနှင့်စပ်လျဉ်း၍ ထပ်ဆင့်သိလိုလျှင် ယေဟောဝါသက်သေများထုတ်ဝေသော ၂၀၀၁၊ မေ ၁၅ ရက် ကင်းမျှော်စင် စာမျက်နှာ ၁၂ နှင့် ဟေရှာယပရောဖက်ပြုချက်—လူခပ်သိမ်းအတွက်အလင်း အတွဲ ၂၊ စာမျက်နှာ ၁၉၅ တို့ကိုရှု။
သင်မှတ်မိသလော
• ကျွန်ုပ်တို့သည် အဘယ်အကြောင်းပြချက်များနှင့် အဘယ် ရည်ရွယ်ချက်တို့ဖြင့် ဘုရားသခင့်နိုင်ငံတော်သတင်း ဟောပြောပြီး တပည့်ဖြစ်စေခြင်းလုပ်ငန်းကို လုပ်ဆောင် နေကြသနည်း။
• ယနေ့ ယေဟောဝါကျေးကျွန်များသည် လူမျိုးတကာတို့အား တပည့်ဖြစ်စေပါဟူသော ယေရှု၏မိန့်မှာချက်ကို အဘယ် အတိုင်းအတာအထိ ပါဝင်လုပ်ဆောင်နေကြသနည်း။
• ကျွန်ုပ်တို့၏ ‘ငါးဖမ်းနည်း’ ကိုမည်သို့ ပြောင်းလဲနိုင်မည်နည်း၊ အဘယ်ကြောင့် ထိုသို့ပြောင်းလဲပေးသင့်သနည်း။
[လေ့လာရန်မေးခွန်းများ]
[စာမျက်နှာ ၁၀ ပါ လေးထောင့်ကွက်/ ရုပ်ပုံ]
မျက်မမြင်တို့အတွက် စာအုပ်များ
ယူနိုက်တက်စတိတ်တွင် နေထိုင်သော အဲလ်ဘတ်သည် ခရစ်ယာန်အကြီးအကဲတစ်ဦး ဖြစ်သည့်အပြင် အချိန်ပြည့်အမှုဆောင်လည်း ဖြစ်၏။ သူသည် မျက်မမြင်သူဖြစ်၏။ လုပ်ငန်း တော်ကြီးကြပ်မှူးအနေနှင့် ခရစ်ယာန်ဓမ္မအမှုကို ပိုမိုထိရောက်စွာ ထမ်းဆောင်ရန် မျက်မမြင် ကျမ်းစာ,စာပေ ဖတ်ရှုခြင်းက သူ့ကိုအထောက်အကူ ပြုသည်။ အသင်းတော်တာဝန်ကို သူမည်သို့ ထမ်းဆောင် နေသနည်း။
ဦးစီးကြီးကြပ်မှူး ဂျိမ်းစ်က “ကျွန်တော်တို့အသင်းတော်မှာ အဲလ်ဘတ်လို ကောင်းကောင်း အမှုဆောင်နိုင်တဲ့ လုပ်ငန်းတော်ကြီးကြပ်မှူး တစ်ယောက်မျှမရှိခဲ့ဖူးဘူး” ဟုပြောပြသည်။ အဲလ်ဘတ်သည် နှစ်များတစ်လျှောက် အင်္ဂလိပ်နှင့် စပိန်မျက်မမြင်စာ ဖြင့်ရေးထားသည့် ကျမ်းစာအခြေပြုစာပေများရရှိခဲ့သော ယူနိုက်တက်စတိတ်မှ မျက်မမြင် ၅,၀၀၀ မှတစ်ဦးဖြစ်သည်။ အမှန်မှာ သစ္စာနှင့်သတိပညာရှိကျေးကျွန်အတန်း အစားသည် ၁၉၁၂ ခုနှစ်မှစ၍ မျက်မမြင်စာ ဖြင့် စာအုပ်အမျိုးပေါင်း တစ်ရာကျော် ထုတ်ဝေခဲ့ပြီ။ ယခုအခါ ယေဟောဝါသက်သေများ၏ ပုံနှိပ်တိုက်များက တိုးတက်နေသောနည်း စနစ်များကို အသုံးပြု၍ မျက်မမြင်စာပေများကို ဘာသာစကားပေါင်း တစ်ဆယ် ကျော်ဖြင့် နှစ်စဉ် သန်းနှင့်ချီထုတ်ဝေပေးပြီး နိုင်ငံ ၇၀ ကျော်တွင် ဖြန့်ချိလျက်ရှိ၏။ မျက်မမြင်များအတွက် ထုတ်ဝေထားသော ကျမ်းစာအခြေပြုစာပေများမှ အကျိုးရရှိနိုင်မည့် တစ်ဦးတစ်ယောက်ကို သင် သိရှိ ပါသလော။
[စာမျက်နှာ ၁၁ ပါ လေးထောင့်ကွက်/ ရုပ်ပုံ]
လက်ဟန်ပြဘာသာစကားနှင့် တပည့်ဖြစ်စေခြင်း
စိတ်အားထက်သန်သော လူငယ်များစွာအပါအဝင် ကမ္ဘာ တစ်ဝန်းရှိ ထောင်နှင့်ချီသက်သေခံများသည် နားလေးသူတို့လည်း ခရစ်တော်တပည့်ဖြစ်လာစေရန် လက်ဟန်ပြဘာသာစကားကို သင်ယူခဲ့ကြပြီ။ ယင်းကြောင့် ဘရာဇီးတစ်နိုင်ငံတည်းတွင် မကြာသေးမီ တစ်နှစ်အတွင်း နားလေးသူ ၆၃ ဦး နှစ်ခြင်းခံခဲ့ပြီး ယခုအခါ နားလေးသူသက်သေခံ ၃၅ ဦးသည် အချိန်ပြည့်ဧဝံဂေလိ တရားဟောပြောသူများအဖြစ် အမှုဆောင်လျက်ရှိကြ၏။ ကမ္ဘာတစ်ဝန်းတွင် လက်ဟန်ပြဘာသာစကားအသင်းတော်များနှင့် အုပ်စုများ ၁,၂၀၀ ကျော်ရှိ၏။ ပထဝီအနေအထားအရပြောရလျှင် ရုရှားနိုင်ငံရှိ တစ်ခုတည်းသော လက်ဟန်ပြဘာသာစကားတိုက်နယ်သည် ကမ္ဘာပေါ်တွင် အကြီးဆုံးတိုက်နယ်ဖြစ်ပြီး ရုရှားတစ်နိုင်ငံလုံး ပါဝင်၏!
[စာမျက်နှာ ၁၂ ပါ လေးထောင့်ကွက်]
စီးပွားရေးလုပ်ကိုင်သူများကို တပည့်ဖြစ်စေခြင်း
ဟာဝိုင်ယီမှ သက်သေခံတစ်ဦးသည် စီးပွားရေးလုပ်ကိုင်သူများ၏ ရုံးခန်းများ တွင် အမှုဆောင်စဉ် သယ်ယူပို့ဆောင်ရေး ကုမ္ပဏီတစ်ခု၏အရာရှိတစ်ဦးနှင့်တွေ့ဆုံခဲ့သည်။ သူသည် အလုပ်များသော်လည်း သူ၏ရုံးခန်းတွင် တစ်ပတ်လျှင် မိနစ် ၃၀ ကျမ်းစာသင်ရန် သဘောတူလိုက်သည်။ ဗုဒ္ဓဟူးမနက်တိုင်း ဖုန်းလာလျှင် သူ့ကိုမခေါ်ရန် သူ၏ ဝန်ထမ်းများအား မှာထားပြီး ကျမ်းစာ သင်အံမှုကို လုံးလုံးအာရုံစိုက်လေ့လာခဲ့သည်။ ဟာဝိုင်ယီမှ သက်သေခံနောက်တစ်ဦးသည် ဖိနပ်ချုပ်ဆိုင်ပိုင်ရှင်နှင့် တစ်ပတ်လျှင် တစ်ကြိမ် ကျမ်းစာသင်အံမှုပြုလုပ်သည်။ ဆိုင်ကောင်တာတွင်ပင် သင်အံမှုကို ကျင်းပ ၏။ ဖောက်သည်တစ်ဦးရောက်လာလျှင် သက်သေခံသည် ဘေးဖယ်ပေးလိုက်သည်။ ထိုဖောက်သည် ပြန်သွားသည့်အခါ သင်အံမှု ပြန်စကြသည်။
သက်သေခံများသည် နေရာအသီးသီးတွင် သူတို့၏ “ပိုက်ကွန်” ချရန် အစပြု ကြိုးစားလုပ်ဆောင်ခဲ့ကြသောကြောင့် ထိုအရာရှိနှင့် ဆိုင်ရှင်တို့ကို တွေ့ဆုံခဲ့ကြခြင်းဖြစ်၏။ အိမ်၌တွေ့ရခဲသူများကို သင်တွေ့ဆုံနိုင်မည့် အသင်းတော်ရပ်ကွက်ရှိ အခြားနေရာများကို စဉ်းစားနိုင်ပါသလော။
[စာမျက်နှာ ၁၂ ပါ ရုပ်ပုံ]
နိုင်ငံခြားဘာသာစကားပြော လယ်ကွင်းတွင် အသင် အမှုဆောင်နိုင်သလော