ကြီးမြတ်မှုအပေါ် ခရစ်တော်အမြင်မျိုး ပျိုးထောင်ခြင်း
ကြီးမြတ်မှုအပေါ် ခရစ်တော်အမြင်မျိုး ပျိုးထောင်ခြင်း
“သင်တို့တွင် အကဲအမှူးပြုလိုသောသူကို သင်တို့အစေခံဖြစ်စေ။”—မဿဲ ၂၀:၂၈။
၁။ ကြီးမြတ်မှုအပေါ် လောကအမြင်ကား အဘယ်နည်း။
ကိုင်ရိုမြို့တောင်ဘက်မိုင် ၃၀၀ ခန့်ရှိ ရှေးအီဂျစ်မြို့တော် သီးဘ်စ်မြို့ (မျက်မှောက်ခေတ် ကာနက်မြို့) အနားတွင် ပေ ၆၀ အမြင့်ရှိ ဖာရောအမဲန်ဟိုတက်ပ် ၃ ၏ရုပ်တုတစ်ခုရှိသည်။ ထိုဧရာမရုပ်တုကြီးနှင့် မိမိကိုယ်ကို နှိုင်းယှဉ်ကြည့်သော် အလွန်သေးငယ်သည်ဟု ထင်မြင်ရစေ၏။ ရှင်ဘုရင်ကို ကြည်ညိုထိတ်လန့်စေလို၍ ပုံဖော်ထားသော ဤကျောက်ရုပ်တုကြီးသည် မိမိကိုယ်ကိုအရေးပါအရာရောက်သူဖြစ်စေပြီး အခြားသူများကိုကား လူရာမဝင်သူများအဖြစ် ထင်မြင်စေသည့် ကြီးမြတ်မှုအပေါ် လောကအမြင်၏ သင်္ကေတတစ်ခုဖြစ်သည်။
၂။ ယေရှုသည် မိမိ၏နောက်လိုက်များအတွက် အဘယ်ပုံသက်သေ ချမှတ်ခဲ့သနည်း၊ ကျွန်ုပ်တို့ကိုယ်ကို အဘယ်မေးခွန်းများ မေးဖို့လိုသနည်း။
၂ ကြီးမြတ်မှုအပေါ် ဤအမြင်မျိုးနှင့် ယေရှုခရစ်သင်ပေးခဲ့သည့်အမြင်ကို နှိုင်းယှဉ်ကြည့်ပါ။ ယေရှုသည် မိမိနောက်လိုက်များ၏ ‘သခင်ဘုရားဖြစ်လျက်၊ ဆရာဖြစ်လျက်’ နှင့်သူတစ်ပါး၏အစေကိုခံခြင်းက ကြီးမြတ်သည်ဟု သင်ပေးခဲ့သည်။ ယေရှု၏မြေကြီးအသက်တာ နောက်ဆုံးနေ့ရက်တွင် တပည့်များ၏ခြေကို ဆေးပေးခြင်းအားဖြင့် ကိုယ်တော်သင်ပေးခဲ့သည့် ကြီးမြတ်မှုအဓိပ္ပာယ်ကို ဖော်ပြခဲ့သည်။ တကယ်ကို နှိမ့်ချသောလုပ်ရပ်ပါတကား! (ယောဟန် ၁၃:၄၊ ၅၊ ၁၄၊ သမ) သင်သည် သူတစ်ပါး၏အစေကိုခံခြင်း သို့မဟုတ် သူတစ်ပါးကိုစေစားခြင်း၊ အဘယ်အရာကို ပိုနှစ်သက်သနည်း။ ခရစ်တော်၏ပုံသက်သေက သင့်ကို ကိုယ်တော်ကဲ့သို့ပင် စိတ်နှိမ့်ချလိုသောသဘော ရှိစေသလော။ သို့ဖြစ်လျှင် ကြီးမြတ်မှုအပေါ် လောကအမြင်နှင့် ခရစ်တော်၏အမြင်ကို နှိုင်းယှဉ်ကြည့်ကြစို့။
ကြီးမြတ်မှုအပေါ် လောက၏အမြင်ကို ရှောင်လော့
၃။ အလွန်ဂုဏ်တင်ခံလိုကြသူများ၏ ဝမ်းနည်းဖွယ်အကျိုးဆက်ကို အဘယ်ကျမ်းစာပုံနမူနာများက ဖော်ပြသနည်း။
၃ ကြီးမြတ်မှုအပေါ် လောက၏အမြင်ထားရှိခြင်းသည် ပျက်စီးခြင်းသို့ရောက်စေကြောင်း ကျမ်းစာပုံနမူနာများစွာက ဖော်ပြ၏။ ဧသတာနှင့်မော်ဒကဲတို့ခေတ်က ပါးရှားနန်းတော်တွင် ထင်ပေါ်ခဲ့သော ဩဇာအာဏာရှိသူ ဟာမန်အကြောင်းကို စဉ်းစားကြည့်ပါ။ ဟာမန်၏ကျော်ကြားလိုစိတ် ပြင်းပြမှုကြောင့် နှိမ့်ချခံရပြီး သေပွဲဝင်ခဲ့ရ၏။ (ဧသတာ ၃:၅; ၆:၁၀-၁၂; ၇:၉၊ ၁၀) ဩဇာအာဏာ အထွတ်အထိပ်ရောက်ချိန်တွင် ရူးသွပ်သွားသည့် မောက်မာသောနေဗုခဒ်နေဇာကော အသို့နည်း။ ကြီးမြတ်မှုအပေါ် သူ၏လွဲမှားနေသောအမြင်ကို ဤစကားများဖြင့် ဖော်ပြခဲ့သည်– “ဤမြို့ကား ငါ့နိုင်ငံတည်ရာ၊ ငါ့ရွှေဘုန်းတော်ကို ချီးမြှောက်ရာဖို့ ငါ့တန်ခိုးအာနုဘော်အားဖြင့် ငါတည်လုပ်သော ဗာဗုလုန်မြို့ကြီးမဟုတ်လော။” (ဒံယေလ ၄:၃၀) ထို့ပြင် ဘုရားသခင်၏ဘုန်းတော်ကို ထင်ရှားစေမည့်အစား မထိုက်တန်သည့်ဂုဏ်အသရေကို လက်ခံယူခဲ့သည့် မာနကြီးသောဟေရုဒ်အဂြိပ္ပ ၁ လည်းရှိသေးသည်။ ယင်းကြောင့် သူသည် “ကိုယ်တွင်း၌ ပိုးများကိုက်သဖြင့် [သေဆုံး]လေ၏။” (တမန်တော် ၁၂:၂၁-၂၃) ကြီးမြတ်မှုအပေါ် ယေဟောဝါ၏အမြင်ကို သဘောမပေါက်သောကြောင့် သူတို့အားလုံး မာန်ဆွယ်ကျိုး ကျဆုံးခဲ့ကြရသည်။
၄။ ဤလောက၏မာန်မာနစိတ်ထား၏ နောက်ကွယ်တွင် မည်သူရှိသနည်း။
၄ ကျွန်ုပ်တို့သည် ဂုဏ်အသရေရှိပြီး လေးစားခံရသည့် ဘဝမျိုးဖြင့် အသက်ရှင်လိုခြင်းသည် လျော်ကန်၏။ သို့သော် စာတန်သည် အဆိုပါစိတ်ဆန္ဒကို အခွင့်ကောင်းယူပြီး သူ၏ကြီးပွားလိုစိတ်ကို ထင်ဟပ်စေသည့် မာန်မာနစိတ်ထားကို ကြီးထွားလာစေ၏။ (မဿဲ ၄:၈၊ ၉) သူသည် “ဤလောကကို အစိုးရသောဘုရား” ဖြစ်ကြောင်းနှင့် ဤကမ္ဘာမြေတွင် သူ၏စဉ်းစားတွေးခေါ်မှုကို မြှင့်တင်ပေးရန် သန္နိဋ္ဌာန်ချထားကြောင်း ဘယ်တော့မျှမမေ့ပါနှင့်။ (၂ ကောရိန္သု ၄:၄; ဧဖက် ၂:၂; ဗျာ. ၁၂:၉) ထိုစဉ်းစားတွေးခေါ်မှု၏ရင်းမြစ်ကို ခရစ်ယာန်များ သိထားသောကြောင့် ကြီးမြတ်မှုအပေါ်ထားရှိသည့် လောကအမြင်ကို ရှောင်ရှားကြသည်။
၅။ အောင်မြင်မှု၊ ကျော်ကြားမှုနှင့် ချမ်းသာကြွယ်ဝမှုတို့က တည်တံ့မြဲမြံသော စိတ်ကျေနပ်မှုကို အာမခံသလော။ ရှင်းပြပါ။
၅ စာတန်မြှောက်ပင့်ပေးသော စဉ်းစားတွေးခေါ်မှုတစ်ခုမှာ လောကတွင် နာမည်ကြီးခြင်း၊ ချီးမွမ်းခံရခြင်းနှင့် ချမ်းသာကြွယ်ဝခြင်းတို့သည် အလိုအလျောက် ပျော်ရွှင်မှုရစေသည်ဟူသော တွေးခေါ်မှုပင်ဖြစ်၏။ ၎င်းသည် မှန်ကန်သလော။ အောင်မြင်မှု၊ ကျော်ကြားမှုနှင့် ချမ်းသာကြွယ်ဝမှုတို့သည် ဘဝကို ကျေနပ်ရောင့်ရဲမှုရှိစေမည်ဟု အာမခံသလော။ ဤသို့သောတွေးခေါ်မှုဖြင့် ကျွန်ုပ်တို့ လှည့်ဖြားမခံရစေရန် သမ္မာကျမ်းစာက သတိပေးထား၏။ ပညာရှိရှင်ဘုရင်ရှောလမုန်က ဤသို့ရေးသားခဲ့သည်– “ကြိုးစားအားထုတ်ခြင်းအမှုနှင့် ကောင်းမွန်စွာပြီးစီးသော အမှုအလုံးစုံတို့ကိုလည်းကောင်း၊ ထိုသို့သောအမှုတို့ကြောင့် သူတစ်ပါးငြူစူကြောင်းကိုလည်းကောင်း ငါဆင်ခြင်၏။ ထိုအမှုအရာသည် အ[ချည်းနှီး]အမှု၊ လေကိုကျက်စားသောအမှုဖြစ်၏။” (ဒေ. ၄:၄) ဤလောကတွင် အောင်မြင်ကျော်ကြားရန် ဘဝကိုမြှုပ်နှံပြီး ကြိုးစားခဲ့သူများသည် ဤမှုတ်သွင်းခံကျမ်းစာဆုံးမစကား မှန်ကန်ကြောင်း ထောက်ခံကြ၏။ သာဓကတစ်ခုမှာ လကမ္ဘာသို့သွားသည့် အာကာသယာဉ်ကို ဒီဇိုင်းဆွဲ၍ ဆောက်လုပ်ပြီးနောက် စမ်းသပ်ရာတွင် ပါဝင်ကူညီပေးခဲ့ရသူ၏သာဓကဖြစ်သည်။ သူက ဤသို့ပြန်ပြောပြ၏– “ကျွန်တော် ကြိုးစားလုပ်ဆောင်ခဲ့တဲ့အတွက် အလုပ်မှာ ကျွမ်းကျင်လာတယ်။ ဒါပေမဲ့ အဲ့ဒီအတွက် ကျွန်တော့်မှာ တည်တံ့မြဲမြံတဲ့ပျော်ရွှင်မှုနဲ့ စိတ်ငြိမ်သက်မှုမရှိပါဘူး။” * စီးပွားရေး၊ အားကစား သို့မဟုတ် ဖျော်ဖြေရေးလောကတို့တွင်ဖြစ်စေ ကြီးမြတ်မှုနှင့်ပတ်သက်သည့် လောက၏အမြင်သည် တည်တံ့မြဲမြံသော စိတ်ကျေနပ်မှုကို အာမ,မခံချေ။
မေတ္တာဖြင့် သူတစ်ပါး၏အစေကိုခံခြင်းမှရရှိသော ကြီးမြတ်မှု
၆။ ယာကုပ်နှင့်ယောဟန်တို့သည် ကြီးမြတ်မှုအပေါ် အမြင်မှားနေကြောင်း အဘယ်အရာက ဖော်ပြသနည်း။
၆ ယေရှု၏အသက်တာမှ အဖြစ်အပျက်တစ်ခုက ကြီးမြတ်မှုအစစ်အမှန်တွင် အဘယ်အရာပါဝင်ကြောင်း ဖော်ပြ၏။ ယေရှုနှင့် ကိုယ်တော်၏တပည့်များသည် စီ.အီး. ၃၃ ခုနှစ်တွင် ပသခါပွဲ တက်ရောက်ရန် ယေရုရှလင်မြို့သို့ ခရီးနှင်ခဲ့ကြသည်။ လမ်းခရီးတွင် ယေရှု၏ဝမ်းကွဲညီ ယာကုပ်နှင့် ယောဟန်တို့သည် ကြီးမြတ်မှုအပေါ် အမြင်မှားနေကြောင်း ဖော်ပြခဲ့သည်။ သူတို့၏မိခင်မှတစ်ဆင့် ယေရှုကို ဤသို့တောင်းလျှောက်ခဲ့ကြသည်– ‘ကိုယ်တော်၏နိုင်ငံတော်တွင် ကျွန်ုပ်တို့ကို လက်ယာတော်ဘက်၌တစ်ယောက်၊ လက်ဝဲတော်ဘက်၌တစ်ယောက် ထိုင်ရသောအခွင့် ပေးတော်မူပါ။’ (မဿဲ ၂၀:၂၁) လက်ယာဘက်တွင် သို့မဟုတ် လက်ဝဲဘက်တွင် ထိုင်ရခြင်းသည် ဂုဏ်အသရေရှိ၏ဟု ဂျူးတို့ ထင်မှတ်ခဲ့ကြသည်။ (၃ ဓမ္မရာဇဝင် ၂:၁၉) ယာကုပ်နှင့် ယောဟန်တို့သည် အထင်ပေါ်ဆုံးနေရာများကို ရည်မှန်းချက်ကြီးစွာ ရယူလိုခဲ့ကြ၏။ အဆိုပါ အခွင့်အာဏာရှိရာထူးတို့ကို သူတို့ရရှိရန် အဆိုတင်သွင်းထားလိုကြ၏။ ယေရှုသည် သူတို့၏စဉ်းစားတွေးခေါ်ပုံကို သိရှိပြီး ကြီးမြတ်မှုအပေါ် သူတို့၏အမြင်မှားကို တည့်မတ်ပေးရန် အခွင့်ကောင်းယူခဲ့သည်။
၇။ စစ်မှန်သောခရစ်ယာန်ကြီးမြတ်မှုကို ယေရှု မည်သို့ဖော်ပြသနည်း။
၇ မာနထောင်လွှားသော ဤလောကတွင် ကြီးမြတ်သူဟု ယူဆခံရသူသည် အခြားသူများကို ချုပ်ကိုင်ပြီး အာဏာနှင့် စေခိုင်းတတ်သည်၊ ထိုသူသည် လက်ဖျောက်တစ်ချက်တီးရုံဖြင့် လိုအင်ဆန္ဒအားလုံး ပြည့်နိုင်ကြောင်း ယေရှုသိတော်မူ၏။ ယေရှု၏နောက်လိုက်တို့မူ နှိမ့်ချစွာ သူတစ်ပါး၏အစေကိုခံခြင်းအားဖြင့် ကြီးမြတ်မှုကို တိုင်းတာကြရသည်။ ယေရှုက “သင်တို့တွင် အကဲအမှူးပြုလိုသောသူကို သင်တို့အစေခံဖြစ်စေ။ သင်တို့တွင် အထွတ်အမြတ်လုပ်ချင်သောသူကိုလည်း သင်တို့ကျွန်ဖြစ်စေ” ဟုမိန့်ဆိုခဲ့သည်။—မဿဲ ၂၀:၂၆-၂၈။
၈။ ခရစ်ယာန်ဓမ္မအမှုဆောင်ဖြစ်ခြင်းဟူသည် အဘယ်နည်း။ မိမိကိုယ်ကို အဘယ်မေးခွန်းများ မေးနိုင်သနည်း။
၈ သမ္မာကျမ်းစာတွင် ခရစ်ယာန် “ဓမ္မအမှုဆောင်” ဟူ၍ ပြန်ဆိုထားသော ဂရိစကားလုံးသည် လုံ့လဝီရိယရှိရှိ ကြိုးစားအားထုတ်၍ သူတစ်ပါး၏အစေခံသူကို ရည်ညွှန်း၏။ ယေရှုက အမိန့်ဖြင့်စေခိုင်းသူများမဟုတ်ဘဲ မေတ္တာဖြင့် သူတစ်ပါး၏အစေကိုခံမှသာလျှင် ကြီးမြတ်သူဖြစ်၏ဟု တပည့်များကို အရေးကြီးသင်ခန်းစာတစ်ခု သင်ပေးခဲ့သည်။ သင့်ကိုယ်ကို ဤသို့မေးမြန်းစစ်ဆေးပါ– ‘ကျွန်ုပ်သာ ယာကုပ် သို့မဟုတ် ယောဟန်ဖြစ်လျှင် မည်သို့ တုံ့ပြန်မည်နည်း။ မေတ္တာ၏လှုံ့ဆော်မှုဖြင့် သူတစ်ပါး၏အစေကိုခံခြင်းသည် စစ်မှန်သောကြီးမြတ်မှုဖြစ်သည်ကို သဘောပေါက်ပါသလော။’—၁ ကောရိန္သု ၁၃:၃။
၉။ ယေရှုသည် အခြားသူများနှင့်ဆက်ဆံရာတွင် အဘယ်ပုံသက်သေပြခဲ့သနည်း။
၉ လောက၏ကြီးမြတ်မှုစံနှုန်းသည် ခရစ်တော်၏ကြီးမြတ်မှုစံနှုန်းနှင့် မတူကြောင်း တပည့်များအား ယေရှုပြသခဲ့၏။ ကိုယ်တော်ကူညီပေးခဲ့သူများအပေါ် အထင်သေးသည့်သဘောထား တစ်ခါမျှမပြဖူးချေ၊ လူရာမဝင်သူများဖြစ်သည်ဟူ၍ သူတို့အား တစ်ခါမျှမခံစားစေခဲ့ပါ။ လူအမျိုးမျိုးဖြစ်ကြသော ယောက်ျား၊ မိန်းမနှင့်ကလေး၊ ဆင်းရဲချမ်းသာနှင့် ဩဇာအာဏာရှိသူများသာမက နာမည်ကြီးအပြစ်ကျူးလွန်သူများပင် ကိုယ်တော်နှင့် သက်သောင့်သက်သာ ပေါင်းသင်းဆက်ဆံနိုင်ကြ၏။ (မာကု ၁၀:၁၃-၁၆; လုကာ ၇:၃၇-၅၀) လူတို့သည် ချို့တဲ့အားနည်းချက်ရှိသူများကို စိတ်ရှည်လေ့မရှိကြချေ။ ယေရှုမူကား ထိုသို့မဟုတ်ပေ။ ကိုယ်တော်၏တပည့်များသည် တစ်ခါတစ်ရံ အဆင်အခြင်မဲ့ပြီး ငြင်းခုံတတ်ကြသော်လည်း ကိုယ်တော်သည် သူတို့ကို စိတ်ရှည်စွာ သွန်သင်ပေးပြီး မိမိသည် အမှန်တကယ်ပင် စိတ်နှိမ့်ချသော နူးညံ့သိမ်မွေ့သူဖြစ်ကြောင်း ဖော်ပြခဲ့သည်။—ဇာခရိ ၉:၉; မဿဲ ၁၁:၂၉; လုကာ ၂၂:၂၄-၂၇။
၁၀။ သူတစ်ပါးအကျိုးကို ကိုယ်ကျိုးစွန့် သယ်ပိုးပေးကြောင်း ယေရှု၏အသက်တာ တစ်ခုလုံးက မည်သို့ပေါ်လွင်စေသနည်း။
၁၀ ဘုရားသခင်၏ထင်ပေါ်သည့် ဤသားတော် ချမှတ်ခဲ့သော ကိုယ်ကျိုးစွန့် ပုံသက်သေက ကြီးမြတ်မှုအဓိပ္ပာယ်မှန်ကို ဖော်ပြ၏။ ယေရှုသည် သူတစ်ပါးကိုစေစားဖို့ ဤကမ္ဘာမြေပေါ် ကြွလာခြင်းမဟုတ်ဘဲ သူတစ်ပါးအစေခံရန်ဖြစ်သည်၊ ကိုယ်တော်သည် “အထူး ထူးအပြားပြားသော အနာစွဲသောသူများတို့ကို” ကုသပေးပြီး နတ်ဆိုးများကို နှင်ထုတ်ပေးခဲ့၏။ ကိုယ်တော်သည် မောပန်းပြီး အနားယူဖို့လိုသော်လည်း ကိုယ့်အကျိုးထက် သူတစ်ပါးအကျိုးကို အမြဲရှေးရှုကာ တကူးတကသွား၍ နှစ်သိမ့်ပေးတတ်သည်။ (မာကု ၁:၃၂-၃၄; ၆:၃၀-၃၄; ယောဟန် ၁၁:၁၁၊ ၁၇၊ ၃၃) ယေရှု၏မေတ္တာက လူတို့ကို ဝိညာဉ်ရေးအရ ကူညီပေးရန် ကိုယ်တော်အား လှုံ့ဆော်တိုက်တွန်းခဲ့ရာ ဘုရားသခင့်နိုင်ငံတော်သတင်းကောင်းကို ဟောပြောဖို့ ဖုန်ထူသောလမ်းများပေါ် မိုင်ပေါင်းရာနှင့်ချီ ခရီးနှင်ခဲ့၏။ (မာကု ၁:၃၈၊ ၃၉) ယေရှုသည် သူတစ်ပါး၏အစေခံခြင်းကို အမှန်ပင် အလေးအနက်ထား၏။
ခရစ်တော်၏စိတ်နှိမ့်ချမှုကို တုပလော့
၁၁။ အသင်းတော်တွင် ကြီးကြပ်မှူးများအဖြစ် အမှုဆောင်ရန် ခန့်အပ်ခံရသည့် ညီအစ်ကိုများတွင် အဘယ်အရည်အချင်းများရှိဖို့လိုသနည်း။
၁၁ ၁၈၀၀ ပြည့်လွန်နှစ်များနှောင်းပိုင်တွင် ခရစ်ယာန်ကြီးကြပ်မှူးများ ပြုစုပျိုးထောင်သင့်သည့် စိတ်ထားအမှန်ကို အလေးအနက်ဖော်ပြခဲ့သည်၊ ထိုစဉ်က ဘုရားသခင့်လူမျိုးတော်၏ အကျိုးကို သယ်ပိုးရန် နယ်လှည့်ကိုယ်စားလှယ်များကို ရွေးချယ်ခဲ့သည်။ ထိုသူတို့သည် “မိမိ၏အသိပညာကိုမဟုတ်ဘဲ ခရစ်တော်၏တရားတော်ကို ရိုးရိုးနှင့် အားမာန်ပါပါဟောပြောသည့် မာန်မာနမရှိ . . . စိတ်နှိမ့်ချသူများ” ဖြစ်ဖို့လိုကြောင်း ၁၈၉၄၊ စက်တင်ဘာ ၁ ရက် ဇိအုန်ကင်းမျှော်စင်က ဖော်ပြ၏။ ခရစ်ယာန်စစ်များသည် ကိုယ်ပိုင်ရည်မှန်းချက်များ ဖြစ်မြောက်ဖို့၊ ကျော်ကြားဖို့၊ ဩဇာအာဏာရှိဖို့၊ သူတစ်ပါးကို ချုပ်ကိုင်နိုင်ဖို့အလို့ငှာ တာဝန်ကို ဘယ်တော့မျှ လက်မခံသင့်ချေ။ စိတ်နှိမ့်ချသောကြီးကြပ်မှူးတစ်ဦးက မိမိ၏တာဝန်များသည် မိမိကိုဂုဏ်အသရေရှိစေသည့် ရာထူးကြီးတစ်ခုမဟုတ်ဘဲ ‘အလုပ်မွန်’ တစ်ခုဖြစ်ကြောင်း အမြဲစိတ်စွဲမှတ်ထားရမည်။ (၁ တိမောသေ ၃:၁၊ ၂) အကြီးအကဲများနှင့် ဓမ္မအမှုထမ်းအားလုံးတို့သည် စိတ်နှိမ့်ချစွာ သူတစ်ပါးအစေခံရန်နှင့် မြင့်မြတ်သောလုပ်ငန်းတော်တွင် ဦးစီးရန် အခြားသူများတုပထိုက်သည့် ပုံသက်သေကောင်းကို အစွမ်းကုန်ကြိုးစား ချမှတ်ပေးသင့်သည်။—၁ ကောရိန္သု ၉:၁၉; ဂလာတိ ၅:၁၃; ၂ တိမောသေ ၄:၅။
၁၂။ အသင်းတော်တွင် အခွင့်အရေးများကို လှမ်းယူနေသူများသည် မိမိတို့ကိုယ်ကို အဘယ်မေးခွန်းများ မေးမည်နည်း။
၁၂ အခွင့်အရေးများကို လက်လှမ်းယူနေသော မည်သည့်ညီအစ်ကိုမဆို မိမိကိုယ်ကို ဤသို့မေးဖို့လိုပေမည်– ‘ကျွန်ုပ်သည် သူတစ်ပါး၏အစေကိုခံရန် အခွင့်အရေးရှာယူသလော သို့မဟုတ် သူတစ်ပါးကိုစေစားလိုသလော။ သူတစ်ပါး တွေ့ချင်မှတွေ့မည့် အကျိုးပြုလုပ်ငန်းများကို ထမ်းဆောင်လိုသလော။’ ဥပမာ၊ လူငယ်တစ်ဦးသည် ခရစ်ယာန်အသင်းတော်တွင် ဟောပြောချက်များပေးရန် အသင့်ရှိသော်လည်း သက်ကြီးရွယ်အိုများကို မကူညီလိုဘဲနေပေမည်။ အသင်းတော်တွင် တာဝန်ရှိသူများနှင့် ပေါင်းသင်းရခြင်းကို ပျော်မွေ့သော်လည်း ဟောပြောခြင်းလုပ်ငန်းတွင် မပါဝင်လိုဘဲနေပေမည်။ ထိုသို့သောလူငယ်သည် မိမိကိုယ်ကို ဤသို့မေးသင့်၏– ‘လူအများ အသိအမှတ်ပြု ချီးမွမ်းမည့် ဘုရားသခင့်လုပ်ငန်းတော် ကဏ္ဍများကို အဓိကထားအာရုံစိုက်သလော။ သူတစ်ပါးရှေ့ ပေါ်လွင်ထင်ရှားရန် ကြိုးစားနေသလော။’ မိမိကိုယ်ကိုဂုဏ်တင်ခြင်းသည် ခရစ်တော်နှင့် လုံးဝတူမည်မဟုတ်ပါ။—ယောဟန် ၅:၄၁။
၁၃။ (က) ကြီးကြပ်မှူးတစ်ဦး၏ စိတ်နှိမ့်ချသောပုံသက်သေသည် သူတစ်ပါးကို မည်သို့အကျိုးသက်ရောက်နိုင်သနည်း။ (ခ) ခရစ်ယာန်တစ်ဦးသည် စိတ်နှိမ့်ချခြင်းကို မဖြစ်မနေမွေးမြူရမည်ဟု အဘယ်ကြောင့် ဆိုနိုင်သနည်း။
၁၃ ကျွန်ုပ်တို့သည် ခရစ်တော်၏စိတ်နှိမ့်ချမှုကို ကြိုးစားတုပသောအခါ သူတစ်ပါး၏အစေကိုခံရန် လှုံ့ဆော်ခံရ၏။ ယေဟောဝါသက်သေများ၏ ဌာနခွဲရုံးတစ်ရုံး၏လုပ်ငန်းစဉ်များကို ကြည့်ရှုစစ်ဆေးနေသော ဇုန်ကြီးကြပ်မှူးတစ်ဦး၏ပုံနမူနာကို သုံးသပ်ကြည့်ပါ။ ထိုကြီးကြပ်မှူးသည် အလွန်အလုပ်များပြီး ကြီးလေးသည့်တာဝန် ထမ်းဆောင်နေရသည့်ကြားမှ စာအုပ်ချုပ်စက်ကို ချိန်ညှိရန် ကြိုးစားနေသော ညီအစ်ကိုငယ်တစ်ဦးကို ခေတ္တကူညီပေးခဲ့၏။ ထိုညီအစ်ကိုငယ်က ဤသို့ပြန်ပြောပြ၏– “ကျွန်တော် မယုံနိုင်လောက်အောင် ဖြစ်ခဲ့ရတယ်! သူငယ်စဉ်က ဗေသလမှာ ဒီလိုစက်မျိုးကို ကိုင်ခဲ့ရလို့ အတိအကျချိန်ညှိဖို့ ဘယ်လောက်ခက်တယ်ဆိုတာ မှတ်မိသေးတယ်လို့ပြောတယ်။ တခြားအရေးကြီးတဲ့အလုပ်တွေ အများကြီးရှိတဲ့ကြားကနေ ကျွန်တော့်ကို အတော်ကြာကြာ ဝိုင်းကူပေးခဲ့တယ်။ ကျွန်တော့်အတွက် အမှတ်တရပဲ။” ယခု ယေဟောဝါသက်သေများ၏ ဌာနခွဲတစ်ခုတွင် ကြီးကြပ်မှူးဖြစ်နေသော ၎င်းညီအစ်ကိုသည် ထိုနှိမ့်ချမှုလုပ်ရပ်ကို အမှတ်ရနေဆဲရှိသည်။ နိမ့်ကျသည်ဟုထင်ရသော အလုပ်များကို လုပ်ကိုင်ရန် ကျွန်ုပ်တို့သည် မြင့်မြတ်လွန်းသည် သို့မဟုတ် အောက်ခြေသိမ်း အလုပ်များကို မပြုလုပ်နိုင်သည့်အထိ မိမိကိုယ်ကို အရေးပါလွန်းသည်ဟု ဘယ်တော့မျှ မယူဆပါနှင့်။ ယင်းအစား၊ “နှိမ့်ချ” ခြင်းကို အစဉ်မွေးမြူသင့်သည်။ မဖြစ်မနေမွေးမြူရမည်။ ခရစ်ယာန်တစ်ဦး ဝတ်ဆင်ထားရမည့် ‘ဥပဓိရုပ်သစ်’ တွင် ယင်းသည် တစ်စိတ်တစ်ပိုင်းပါဝင်၏။—ဖိလိပ္ပိ ၂:၃; ကောလောသဲ ၃:၁၀၊ ၁၂; ရောမ ၁၂:၁၆။
ကြီးမြတ်မှုအပေါ် ခရစ်တော်၏အမြင်မျိုး ထားရှိပုံ
၁၄။ ဘုရားသခင်နှင့်လည်းကောင်း၊ လူလူချင်းနှင့်လည်းကောင်း ကျွန်ုပ်တို့၏ဆက်ဆံရေးကို ဆင်ခြင်တွေးတောခြင်းဖြင့် ကြီးမြတ်မှုအပေါ် လျောက်ပတ်သောအမြင်ကို မည်သို့ပျိုးထောင်စေနိုင်သနည်း။
၁၄ ကြီးမြတ်မှုအပေါ် လျောက်ပတ်သောအမြင် မည်သို့ထားရှိနိုင်သနည်း။ တစ်နည်းမှာ ယေဟောဝါဘုရားသခင်နှင့် ကျွန်ုပ်တို့၏ဆက်ဆံရေးကို ဆင်ခြင်တွေးတောခြင်းအားဖြင့်ဖြစ်သည်။ ကိုယ်တော်၏ ဘုန်း၊ တန်ခိုးနှင့် ဉာဏ်ပညာတို့သည် သေးနုပ်သောလူသားတို့ လက်လှမ်းမမီနိုင်လောက်အောင် မြင့်မားလှပေသည်။ (ဟေရှာယ ၄၀:၂၂) လူလူချင်းနှင့် ကျွန်ုပ်တို့၏ဆက်ဆံရေးကို ဆင်ခြင်တွေးတောခြင်းဖြင့်လည်း စိတ်နှိမ့်ချမှုကို ပျိုးထောင်နိုင်စေ၏။ ဥပမာ၊ ကျွန်ုပ်တို့သည် ကဏ္ဍအချို့တွင် အခြားသူများထက် သာကောင်းသာမည်ဖြစ်သော်လည်း သူတို့သည် ထိုထက်ပို၍အရေးကြီးသည့် အခြားကဏ္ဍများတွင် ကျွန်ုပ်တို့ထက်သာနေပေမည်၊ သို့မဟုတ် ကျွန်ုပ်တို့တွင်မရှိသည့် အရည်အချင်းအချို့ ကျွန်ုပ်တို့၏ညီအစ်ကိုများတွင် ရှိပေမည်။ အမှန်ဆိုသော် ဘုရားသခင်တန်ဖိုးထားသူများစွာသည် သူတို့၏နူးညံ့သိမ်မွေ့မှုနှင့် နှိမ့်ချသောသဘောတို့ကြောင့် မထင်မရှားနေတတ်ကြသည်။—သု. ၃:၃၄; ယာကုပ် ၄:၆။
၁၅။ မိမိသည် အခြားသူများထက် သာလွန်သည်ဟု မည်သူမျှ ယူမှတ်စရာအကြောင်းမရှိဟု ဘုရားသခင့်လူမျိုးတော်၏သမာဓိက မည်သို့ဖော်ပြသနည်း။
၁၅ ယုံကြည်ခြင်းကြောင့် စမ်းသပ်ခံရသော ယေဟောဝါသက်သေများ၏တွေ့ကြုံမှုများက အဆိုပါအချက်ကို အတော်အသင့်ဖော်ပြ၏။ ဤလောက,က အညတရဟု ယူမှတ်ထားသူများသည် စမ်းသပ်မှုအပြင်းအထန်ခံရချိန်တွင် ဘုရားသခင်အပေါ် ဆက်၍တည်ကြည်သွားကြသည်မှာ အကြိမ်ကြိမ်အခါခါပင်။ ဤသို့သောပုံနမူနာများကို ဆင်ခြင်တွေးတောခြင်းသည် ကျွန်ုပ်တို့အား အစဉ်စိတ်နှိမ့်ချမှုရှိစေနိုင်ပြီး “ကိုယ်ကိုထင်သင့်သည်အတိုင်းထက် လွန်၍မထင်” ရန်သင်ပေး၏။—ရောမ ၁၂:၃။ *
၁၆။ အသင်းတော်ရှိသူအားလုံးသည် ယေရှုချမှတ်ပေးခဲ့သော စံနမူနာကို တုပသည့်အနေဖြင့် ကြီးမြတ်မှုကို မည်သို့ပျိုးထောင်နိုင်သနည်း။
၁၆ လူကြီးလူငယ်မရွေး ခရစ်ယာန်အားလုံးသည် ကြီးမြတ်မှုအပေါ် ခရစ်တော်၏အမြင်မျိုး ကြိုးစားပျိုးထောင်သင့်သည်။ အသင်းတော်တွင် တာဝန်အမျိုးမျိုး လုပ်ဆောင်ရ၏။ နိမ့်ကျပုံရသည့်အမှုများကိုလုပ်ဆောင်ရန် တောင်းဆိုခံရလျှင် ဘယ်တော့မျှ မကျေမနပ်မဖြစ်ပါနှင့်။ (၁ ဓမ္မရာဇဝင် ၂၅:၄၁; ၄ ဓမ္မရာဇဝင် ၃:၁၁) အသင်မိဘတို့၊ သင်တို့၏သားသမီးများနှင့် ဆယ်ကျော်သက်များကို ဘုရားသခင့်နိုင်ငံတော်ခန်းမတွင်ဖြစ်စေ၊ စည်းဝေးပွဲတွင်ဖြစ်စေ၊ စည်းဝေးကြီးကျင်းပမည့်နေရာတွင်ဖြစ်စေ ပေးအပ်ထားသော မည်သည့်တာဝန်ကိုမဆို ဝမ်းမြောက်ဝမ်းသာလုပ်ဆောင်ရန် အားပေးသလော။ နိမ့်ကျသောအလုပ်များ သင်,လုပ်ဆောင်ခြင်းကို သူတို့တွေ့သလော။ ယခု ယေဟောဝါသက်သေများ၏ ကမ္ဘာ့ဌာနချုပ်တွင် အမှုဆောင်နေသော ညီအစ်ကိုတစ်ဦးသည် သူ့မိဘများ၏ပုံသက်သေကို အထင်းသား ပြန်မြင်ယောင်နေသေး၏။ သူက ဤသို့ပြောပြသည်– “ဘုရားသခင့်နိုင်ငံတော်ခန်းမမှာပဲဖြစ်ဖြစ်၊ စည်းဝေးကြီးကျင်းပမယ့်နေရာမှာပဲဖြစ်ဖြစ် သန့်ရှင်းရေးအလုပ်ကို ကျွန်တော့်မိဘတွေရဲ့လုပ်ဆောင်ပုံက သန့်ရှင်းရေးလုပ်တာကို သူတို့ ဘယ်လောက်အရေးထားတယ်ဆိုတာ ကျွန်တော်သိခဲ့ရတယ်။ အဲ့ဒီအလုပ်တွေက ဘယ်လောက်ပဲနိမ့်ကျတဲ့ပုံပေါက်ပါစေ အသင်းတော် ဒါမှမဟုတ် ညီအစ်ကိုအသင်းအပင်းအတွက် အကျိုးရှိစေမယ့်အလုပ်တွေကို စေတနာအပြည့်နဲ့ လုပ်ဆောင်ခဲ့ကြတယ်။ အဲ့ဒီစိတ်ထားကြောင့် ဗေသလမှာ ဘာအလုပ်ကိုမဆို စိတ်ပါလက်ပါလုပ်ဆောင်ဖို့ ကျွန်တော်အသင့်ရှိနေတာ။”
၁၇။ စိတ်နှိမ့်ချသောအမျိုးသမီးများသည် အသင်းတော်အတွက် အဘယ်နည်းများဖြင့် ကောင်းချီးဖြစ်စေနိုင်သနည်း။
၁၇ ကိုယ့်အကျိုးထက် သူတစ်ပါးအကျိုးကို ရှေးဦးထားခြင်းနှင့်စပ်လျဉ်း၍ ဘီ.စီ.အီး. ပဉ္စမရာစုတွင် ပါးရှားအင်ပါယာ၏ ဘုရင်မဖြစ်လာသူ ဧသတာ၏စံနမူနာကောင်းရှိပါသည်။ သူသည် နန်းတော်တွင် နေထိုင်သူဖြစ်သော်လည်း ဘုရားသခင်၏အလိုတော်နှင့်အညီ လုပ်ဆောင်၍ကိုယ်တော်၏လူမျိုးတော်အတွက် အသက်စွန့်ရန် အသင့်ရှိခဲ့သည်။ (ဧသတာ ၁:၅၊ ၆; ၄:၁၄-၁၆) ယနေ့ ခရစ်ယာန် အမျိုးသမီးများသည် သူတို့၏စီးပွားရေးအခြေအနေ မည်သို့ပင်ဖြစ်ပါစေ၊ စိတ်ဓာတ်ကျနေသူများကို အားပေးခြင်း၊ ဖျားနာသူများထံ လည်ပတ်ခြင်း၊ ဟောပြောခြင်းလုပ်ငန်းတွင် ပါဝင်ခြင်း၊ အကြီးအကဲများနှင့် ပူးပေါင်းဆောင်ရွက်ခြင်းတို့ဖြင့် ဧသတာကဲ့သို့သောစိတ်ထားရှိကြောင်း ဖော်ပြနိုင်၏။ ဤစိတ်နှိမ့်ချသောညီအစ်မများသည် အသင်းတော်အတွက် တကယ်ကောင်းချီးတစ်ရပ်ပါတကား!
ခရစ်တော်ကဲ့သို့သောကြီးမြတ်မှုရှိခြင်း၏ကောင်းချီးများ
၁၈။ ခရစ်တော်ကဲ့သို့သော ကြီးမြတ်မှုကို တင်ပြလျှင် အဘယ်အကျိုးကျေးဇူးများ ရရှိသနည်း။
၁၈ သင်သည် ကြီးမြတ်မှုအပေါ် ခရစ်တော်၏အမြင်မျိုးကို ဆက်ထိန်းထားလျှင် အကျိုးကျေးဇူးများစွာ ရရှိမည်။ ကိုယ်ကျိုးစွန့်၍ သူတစ်ပါးအစေခံခြင်းမှ သူတို့ရော၊ ကိုယ်တိုင်ပါ အားရရွှင်လန်းနိုင်မည်။ (တမန်တော် ၂၀:၃၅) သင့်ညီအစ်ကိုများ၏အကျိုးကို စိတ်လိုကိုယ်လျောက်၊ ထက်သန်စွာ ဆောင်ရွက်လျှင် သူတို့သည် သင့်ကို ပိုချစ်ခင်မြတ်နိုးလိမ့်မည်။ (တမန်တော် ၂၀:၃၇) ထိုထက်ကား ယေဟောဝါသည် ခရစ်ယာန်ချင်းများ၏အကျိုးအတွက် သင်လုပ်ဆောင်ရာကို ကိုယ်တော်နှစ်သက်သည့် ချီးမွမ်းရာယဇ်အဖြစ် တွေ့မြင်၏။—ဖိလိပ္ပိ ၂:၁၇။
၁၉။ ကြီးမြတ်မှုအပေါ် ခရစ်တော်၏အမြင်မျိုးနှင့်စပ်လျဉ်း၍ ကျွန်ုပ်တို့၏သန္နိဋ္ဌာန်သည် မည်သို့ဖြစ်သင့်သနည်း။
၁၉ ကျွန်ုပ်တို့တစ်ဦးစီသည် မိမိ၏နှလုံးကို ဆန်းစစ်ပြီး ဤသို့မေးဖို့လိုသည်– ‘ကြီးမြတ်မှုအပေါ် ခရစ်တော်၏အမြင်ကို အပြောဖြင့်သာ ပျိုးထောင်မည်လော သို့မဟုတ် ဝီရိယရှိရှိ လက်တွေ့ကျင့်သုံးမည်လော။ မာနကြီးသူများအပေါ် ယေဟောဝါ၏သဘောထားသည် ရှင်းလင်းပြတ်သား၏။ (သု. ၁၆:၅; ၁ ပေတရု ၅:၅) ခရစ်ယာန်အသင်းတော်တွင်ဖြစ်စေ၊ ကျွန်ုပ်တို့၏မိသားစုတွင်ဖြစ်စေ၊ နေ့စဉ် လူလူချင်းနှင့် ဆက်ဆံရာတွင်ဖြစ်စေ ဘုရားသခင်၏ဘုန်းတော်ကိုထောက်၍ ခပ်သိမ်းသောအမှုကိုပြုရာတွင် ကြီးမြတ်မှုအပေါ် ခရစ်တော်၏အမြင်မျိုးပြသခြင်းကို နှစ်သက်မြတ်နိုးကြောင်း တင်ပြနိုင်ပါလေစေ။—၁ ကောရိန္သု ၁၀:၃၁။
[အောက်ခြေမှတ်ချက်]
^ အပိုဒ်၊ 5 ၁၉၈၂၊ မေ ၁ ကင်းမျှော်စင် စာမျက်နှာ ၃-၆ [လိပ်] မှ “အောင်မြင်မှုကို ရှာဖွေခြင်း” ကိုရှု။
^ အပိုဒ်၊ 15 သာဓကအနေနှင့် ၁၉၉၂၊ ယေဟောဝါသက်သေများ၏ နှစ်ချုပ်စာအုပ် စာမျက်နှာ ၁၈၁-၂ [လိပ်] နှင့် ၁၉၉၃၊ စက်တင်ဘာ ၁ ရက် ကင်းမျှော်စင် စာမျက်နှာ ၂၇-၃၁ တို့ကိုရှု။
သင်ရှင်းပြနိုင်သလော
• ကြီးမြတ်မှုအပေါ် လောက၏အမြင်ကို အဘယ်ကြောင့် ရှောင်သင့်သနည်း။
• ယေရှုသည် ကြီးမြတ်မှုကို မည်သို့တိုင်းတာခဲ့သနည်း။
• ကြီးကြပ်မှူးများသည် ခရစ်တော်၏စိတ်နှိမ့်ချမှုကို မည်သို့တုပနိုင်သနည်း။
• အဘယ်အရာက ခရစ်တော်ကဲ့သို့သော ကြီးမြတ်မှုကိုပျိုးထောင်စေနိုင်သနည်း။
[လေ့လာရန်မေးခွန်းများ]
[စာမျက်နှာ ၁၇ ပါ လေးထောင့်ကွက်]
ခရစ်တော်ကဲ့သို့သောကြီးမြတ်မှု အဘယ်သူတွင်ရှိသနည်း
စေစားလိုသူလော၊ အစေခံရန် အသင့်ရှိသူလော။
ထင်ပေါ်ကျော်ကြားမှုကို နှစ်သက်သူလော၊ နိမ့်ကျသောအလုပ်တာဝန်များကို လက်ခံယူသူလော။
မိမိကိုယ်ကိုချီးမြှောက်သူလော၊ သူတစ်ပါးကို ချီးမြှောက်သူလော။
[စာမျက်နှာ ၁၄ ပါ ရုပ်ပုံ]
ဖာရောအမဲန်ဟိုတက်ပ် ၃ ၏ဧရာမရုပ်တုကြီး
[စာမျက်နှာ ၁၅ ပါ ရုပ်ပုံ]
ဟာမန်ကို ကျဆုံးစေခဲ့သည့်အရာကို သင်သိသလော
[စာမျက်နှာ ၁၆ ပါ ရုပ်ပုံ]
သူတစ်ပါးအစေခံရန် အခွင့်အရေးများ ရှာယူနေသလော