တောလည်ရာကျမ်းမှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
တောလည်ရာကျမ်းမှ ပေါ်လွင်ချက်များ
အီဂျစ်ပြည်မှ ထွက်ခွာလာပြီးနောက် ဣသရေလလူတို့သည် လူမျိုးတစ်မျိုးအဖြစ် ဖွဲ့စည်းခံခဲ့ရသည်။ သူတို့သည် ကတိထားရာပြည်တော်ထဲ မကြာမီ ဝင်ရောက်ဖို့ဖြစ်သော်လည်း မဝင်ရောက်နိုင်ခဲ့ကြချေ။ သို့အစား သူတို့သည် ‘ကြောက်မက်ဖွယ် တောကြီး’ တွင် အနှစ်လေးဆယ်ခန့် လှည့်လည်သွားလာခဲ့ရ၏။ (တရားဟောရာ ၈:၁၅) အဘယ်ကြောင့်နည်း။ တောလည်ရာကျမ်း၌ပါသော သမိုင်းဝင်မှတ်တမ်းက အဘယ်အရာဖြစ်ပျက်ခဲ့ကြောင်း ကျွန်ုပ်တို့ကို ပြောပြသည်။ ယင်းက ယေဟောဝါဘုရားသခင်အား နာခံဖို့နှင့် ကိုယ်တော်၏ကိုယ်စားလှယ်များကို ရိုသေလေးစားဖို့လိုကြောင်း ကျွန်ုပ်တို့အား စွဲမှတ်စေသင့်သည်။
တောကန္တာရနှင့် မောဘလွင်ပြင်တို့တွင် မောရှေရေးသားခဲ့သော တောလည်ရာကျမ်း (“စာရင်းတော်ဝင်ကျမ်း၊” သမ) သည် ၃၈ နှစ်နှင့် ၉ လ—ဘီ.စီ.အီး. ၁၅၁၂ မှ ဘီ.စီ.အီး. ၁၄၇၃ အထိ—ကြာကာလကို ငုံမိသည်။ (တောလည်ရာ ၁:၁; တရားဟောရာ ၁:၃) အဆိုပါမှတ်တမ်းကို အပိုင်းသုံးပိုင်း ခွဲခြားထားပါသည်။ ပထမအပိုင်းသည် သိနာတောင်၌ ဖြစ်ပျက်ခဲ့သည့်အရာများကို ပြန်ပြောပြသည်။ ဒုတိယအပိုင်းသည် တောကန္တာရ၌ ဣသရေလလူမျိုး လှည့်လည်နေစဉ်အတွင်း ဖြစ်ပျက်ခဲ့ရာနှင့်သက်ဆိုင်သည်။ နောက်ဆုံးအပိုင်းတွင်မူ မောဘလွင်ပြင်မှ အဖြစ်အပျက်များကို သုံးသပ်ထားသည်။ ဤမှတ်တမ်းကို သင်ဖတ်ရှုသည့်အခါ ‘ဤအဖြစ်အပျက်များက ကျွန်ုပ်ကို အဘယ်အရာသင်ပေးသနည်း။ ယနေ့ ကျွန်ုပ်အတွက် အကျိုးရှိစေနိုင်သည့် မူများ ဤကျမ်းစာစောင်တွင် ရှိသလော’ ဟူသည့် မေးခွန်းများကို သင်မေးလိုပေမည်။
သိနာတောင်၌
သန်းခေါင်စာရင်းယူခဲ့ချိန် နှစ်ကြိမ်အနက် ပထမအကြိမ်သည် သိနာတောင်ခြေ၌ ဣသရေလလူတို့ ရှိနေသေးချိန်တွင် ဖြစ်ပျက်ခဲ့၏။ လေဝိအမျိုးမှတစ်ပါး အသက်နှစ်ဆယ်အရွယ်နှင့်အထက်ရှိ အမျိုးသားများအရေအတွက်မှာ စုစုပေါင်း ၆၀၃,၅၅၀ ဖြစ်သည်။ အဆိုပါသန်းခေါင်စာရင်းယူခြင်းသည် စစ်ရေးအတွက်ဖြစ်ကြောင်း ထင်ရှားသည်။ အမျိုးသမီး၊ ကလေးသူငယ်နှင့် လေဝိသားများ အပါအဝင် တပ်စခန်းတစ်ခုလုံး၏ စုစုပေါင်းအရေအတွက်သည် သုံးသန်းကျော်ရှိပေမည်။
သန်းခေါင်စာရင်းယူပြီးနောက် ဣသရေလလူတို့သည် ချီတက်ခြင်းအစီအစဉ်၊ တဲတော်လုပ်ငန်းနှင့် လေဝိသားတို့၏တာဝန်နှင့်စပ်လျဉ်းသည့် အသေးစိတ်အချက်အလက်များ၊ ကူးစက်ရောဂါတားဆီးရန် သီးသန့်ထားခြင်း မိန့်မှာချက်များ၊ မနာလိုမှုများနှင့်ဆက်နွှယ်သည့် ပညတ်ချက်များနှင့် နာဇရိကတိကဝတ်များနှင့်စပ်လျဉ်းသည့် ညွှန်ကြားချက်များကို ရရှိကြသည်။ အခန်းကြီး ၇ တွင် မျိုးနွယ်စုအကဲအမှူးများ ယဇ်ပလ္လင်ကို စတင်အသုံးပြု၍ ပူဇော်ရသည့် ယဇ်များနှင့်စပ်လျဉ်းသည့် အချက်အလက်များပါဝင်ပြီး အခန်းကြီး ၉ တွင် ပသခါပွဲအကြောင်း ဆွေးနွေးတင်ပြထားသည်။ ထို့အပြင် ဣသရေလပရိသတ်အား တပ်စခန်းချခြင်း၊ ပြောင်းရွှေ့ခြင်း ညွှန်ကြားချက်များကိုလည်း ပေးထားသည်။
ကျမ်းစာမေးခွန်းများ အဖြေ–
၂:၁၊ ၂—တောကန္တာရ၌ အနွယ်သုံးနွယ်စီ တပ်ချရမည့်နေရာကို ပိုင်းခြားပေးသည့် “အလံ[“အမှတ်သင်္ကေတ၊” ကဘ]များ” ကား အဘယ်နည်း။ အဆိုပါအလံများသည် အဘယ်အရာများဖြစ်ကြောင်း ကျမ်းစာက ကွဲကွဲပြားပြား မဖော်ပြပါ။ သို့ရာတွင်၊ ယင်းတို့ကို အထွတ်အမြတ်ထားသည့် အမှတ်လက္ခဏာများအဖြစ်၊ ဘာသာရေးပွဲတော်နှင့်ဆိုင်သော အမှတ်လက္ခဏာများအဖြစ် မယူမှတ်ကြပါ။ အဆိုပါအမှတ်သင်္ကေတများကို တပ်စခန်းအတွင်း မိမိနေရာကို ရှာတွေ့ရန်ဟူသော လက်တွေ့ကျရည်ရွယ်ချက်တစ်ခုအတွက် အသုံးပြုခဲ့ကြသည်။
၅:၂၇—သူ့သားအိမ်ရာပြစ်မှားသည့် အပြစ်ရှိ ဇနီးတစ်ဦးအား ‘ပေါင်ပိန်ခြင်းသို့ရောက်စေခြင်း’ က အဘယ်အရာကို ဆိုလိုသနည်း။ ဤတွင် “ပေါင်” ဟူသောအသုံးအနှုန်းသည် ကလေးမွေးဖွားနိုင်စွမ်းရှိသော အင်္ဂါများကိုဆိုလိုသည်။ (ကမ္ဘာဦး ၄၆:၂၆) ပေါင် ‘ပိန်သွားခြင်း’ ဟူသည် အဆိုပါအင်္ဂါများ ပျက်စီးယိုယွင်းသွားသဖြင့် ပဋိသန္ဓေစွဲကပ်ရန် မဖြစ်နိုင်တော့သည်ကို ဆိုလိုပေသည်။
ကျွန်ုပ်တို့အတွက် သင်ခန်းစာများ–
၆:၁-၇။ နာဇရိလူတို့သည် စပျစ်ရည်နှင့် ယစ်မူးစေသည့် ယမကာမှန်သမျှကို ရှောင်ကြဉ်ကြရသည်၊ သို့ဖြင့် ကိုယ့်အလိုကို ငြင်းပယ်ကြရ၏။ သူတို့ဆံပင်ကို အရှည်ထားရ၏၊ ယင်းက အမျိုးသမီးများသည် မိမိတို့၏လင်သား သို့မဟုတ် ဖခင်ကို လက်အောက်ခံကြရသကဲ့သို့ ယေဟောဝါအား လက်အောက်ခံခြင်း၏ လက္ခဏာဖြစ်သည်။ နာဇရိလူတို့သည် မည်သည့်လူသေကောင်ကိုမဆို၊ ဆွေမျိုးရင်းချာတစ်ဦး၏အသေကောင်ပင်ဖြစ်ပါစေ ဝေးဝေးရှောင်ခြင်းအားဖြင့် စင်ကြယ်ကြရ၏။ ယနေ့ အချိန်ပြည့်ကျေးကျွန်များသည် ကိုယ့်ကိုယ်ကိုငြင်းပယ်၍ ယေဟောဝါနှင့် ကိုယ်တော်၏အစီအစဉ်ကို လက်အောက်ခံခြင်းအားဖြင့် ကိုယ်ကျိုးစွန့်စိတ်ဓာတ် တင်ပြကြ၏။ တိုင်းတစ်ပါးသို့ သွားရောက်အမှုဆောင်ရသည့် တာဝန်အချို့ရှိရာ မိသားစုအရင်းအချာ၏ ဈာပနကိစ္စအတွက် အိမ်သို့ ပြန်၍မဖြစ်နိုင် သို့မဟုတ် ပြန်ရခက်သည့်အဖြစ်မျိုးပင် ရှိပေမည်။
၈:၂၅၊ ၂၆။ လေဝိလုပ်ငန်းများကို သင့်တော်လျောက်ပတ်စွာ ဖြည့်ဆည်းဆောင်ရွက်နိုင်ရန်နှင့် အသက်အရွယ်ကို ထောက်ထားစာနာမှုပြရန် အသက်ကြီးသူအမျိုးသားများအား မဖြစ်မနေ အမှုဆောင်ခြင်းမှ အနားယူဖို့ မိန့်မှာထားသည်။ သို့ရာတွင်၊ အခြားလေဝိသားများကို စေတနာအလျောက် သူတို့ကူညီပေးနိုင်ကြပါသည်။ ယနေ့ ဘုရားသခင့်နိုင်ငံတော်ကြွေးကြော်သူတစ်ဦးအတွက် အနားယူခြင်းမရှိသော်လည်း ဤပညတ်တရား၏မူက အဖိုးတန်သင်ခန်းစာတစ်ရပ် သွန်သင်ပေးသည်။ ခရစ်ယာန်တစ်ဦးသည် အသက်အရွယ်ကြီးရင့်လာမှုကြောင့် တစ်စုံတစ်ရာသောတာဝန်များကို အပြည့်အဝမထမ်းဆောင်နိုင်သော်လည်း တတ်နိုင်သောအမှုတော်ကို ထမ်းဆောင်နိုင်ပါသည်။
တောကန္တာရအတွင်း တစ်နေရာမှတစ်နေရာသို့
ဝတ်ပြုရာတဲတော်အထက်ရှိ မိုးတိမ်သည် နောက်ဆုံး အထက်သို့တက်ကြွသွားသောအခါ ဣသရေလလူတို့သည် စတင်ချီတက်ကြကာ နောက် ၃၈ နှစ်နှင့် တစ်လနှစ်လအကြာတွင် မောဘလွင်ပြင်သဲကန္တာရသို့ ရောက်ရှိကြမည်ဖြစ်သည်။ ယေဟောဝါသက်သေများထုတ်ဝေသည့် “ကောင်းမွန်သောပြည်ကို ကြည့်လော့” ဘရိုရှာ၏ စာမျက်နှာ ၉ ရှိ မြေပုံတွင် သူတို့၏ခရီးလမ်းကြောင်းကို လိုက်ကြည့်ခြင်းက အကျိုးရှိပေမည်။
ပါရန်တောကန္တာရရှိ ကာဒေရှအရပ်သို့အသွားတွင် မကျေမနပ်ညည်းညူခဲ့သည့်အကြိမ်ပေါင်း အနည်းဆုံးသုံးကြိမ်ရှိသည်။ ပထမတစ်ကြိမ်တွင် ယေဟောဝါသည် လူတချို့အပေါ် မီးကျရောက်စေသည့်အခါ ငြိမ်သွား၏။ ထို့နောက် ဣသရေလလူတို့သည် အသားတောင်းစားကြပြန်ရာ ယေဟောဝါက ငုံးငှက်များကို ချပေးလေသည်။ မောရှေကို မိရိအံနှင့်အာရုန်တို့ မကျေမနပ်ဖြစ်၍ ပြစ်တင်ပြောဆိုကြသဖြင့် မိရိအံသည် တစ်ခဏနူနာစွဲသွား၏။
ကာဒေရှအရပ်၌ စခန်းချရပ်နားနေစဉ် မောရှေသည် ကတိထားရာပြည်တော်ကို ထောက်လှမ်းရန် အမျိုးသား ၁၂ ယောက်ကို စေလွှတ်ခဲ့သည်။ ရက်ပေါင်း ၄၀ ကြာပြီးနောက် သူတို့ပြန်ရောက်လာကြသည်။ သူလျှိုဆယ်ယောက်၏ မကောင်းသတင်းကို နားယောင်လျက် လူတို့သည် မောရှေ၊ အာရုန်နှင့် တည်ကြည်သောသူလျှို ယောရှုနှင့်ကာလက်တို့ကို ခဲဖြင့်ပေါက်သတ်လိုကြသည်။ ထိုအခါ ယေဟောဝါသည် ထိုသူတို့ကို ကပ်ဘေးဖြင့် ဒဏ်ခတ်လိုသော်လည်း မောရှေက ကြားဝင်တောင်းပန်သဖြင့် ဘုရားသခင်က ရေတွက်ထားသူတို့ သေဆုံးသွားသည်အထိ နှစ်ပေါင်းလေးဆယ်တိုင် တောကန္တာရတွင် လှည့်လည်သွားလာနေကြရလိမ့်မည်ဟု ကြေညာတော်မူ၏။
ထို့နောက် ယေဟောဝါသည် စည်းမျဉ်းဥပဒေများ ထပ်မံပေးတော်မူ၏။ ကောရနှင့် အခြားသူတို့သည် မောရှေနှင့်အာရုန်ကို ပုန်ကန်ကြရာ အဆိုပါပုန်ကန်သူတို့သည် မီးဖြင့်၊ သို့မဟုတ် မြေမျိုခြင်းဖြင့် အဆုံးစီရင်ခံရသည်။ နောက်တစ်နေ့တွင် ဣသရေလပရိသတ်တစ်ခုလုံးသည် မောရှေနှင့်အာရုန်တို့ကို ညည်းတွားမြည်တမ်းကြပြန်သည်။ ယင်းကြောင့် ယေဟောဝါဒဏ်ခတ်လိုက်ရာ လူပေါင်း ၁၄,၇၀၀ သေဆုံးသွား၏။ ကိုယ်တော်ရွေးချယ်ထားတော်မူသော ယဇ်ပုရောဟိတ်မင်းကြီးကို လူတို့သိစေရန် ဘုရားသခင်သည် အာရုန်၏လှံတံကို အဖူးထွက်စေသည်။ ၎င်းနောက် လေဝိတာဝန်ဝတ္တရားများနှင့် လူတို့ကိုသန့်ရှင်းစင်ကြယ်စေခြင်း ပညတ်ချက်များကို ယေဟောဝါ ထပ်၍ပေးတော်မူသည်။ အနီရောင်နွားမ၏ပြာကို အသုံးပြုခြင်းက ယေရှု၏ပူဇော်ရာယဇ်အားဖြင့် သန့်ရှင်းစင်ကြယ်စေခြင်းကို တင်ကူးဖော်ပြသည်။—ဟေဗြဲ ၉:၁၃၊ ၁၄။
ဣသရေလလူတို့သည် ကာဒေရှအရပ်သို့ပြန်ရောက်လာရာ ထိုတွင် မိရိအံကွယ်လွန်သည်။ ဣသရေလပရိသတ်တို့သည် မောရှေနှင့်အာရုန်ကို မကျေမနပ်ဖြစ်ကြပြန်သည်။ သူတို့၏အကြောင်းပြချက်ကား အဘယ်နည်း။ ရေမရှိ၍တည်း။ ထိုအချိန်တွင် မောရှေနှင့်အာရုန်သည် အံ့ဖွယ်နည်းဖြင့် ရေရရှိစေသောအခါ ယေဟောဝါ၏နာမတော် သန့်ရှင်းမြင့်မြတ်မှုကို မထုတ်ဖော်ခဲ့ကြသောကြောင့် ကတိထားရာပြည်တော်ထဲ သူတို့ဝင်ခွင့်မရကြချေ။ ဣသရေလလူတို့သည် ကာဒေရှအရပ်မှ ထွက်ခွာသွားကြပြီးနောက် ဟောရတောင်၌ အာရုန်သေဆုံးလေသည်။ ဧဒုံပြည်အနားလျှောက်သွားစဉ် ဣသရေလလူတို့သည် မောပန်းလာကြရာ ဘုရားသခင်နှင့်မောရှေကို အပြစ်တင်ကြ၏။ ထိုအခါ ယေဟောဝါသည် သူတို့ကို အဆိပ်ပြင်းသောမြွေများစေလွှတ်၍ ဒဏ်ခတ်လေသည်။ ဤတစ်ကြိမ်၌လည်း မောရှေ ကြားဝင်တောင်းပန်ပြန်သည်၊ ထိုအခါ ဘုရားသခင်က ကြေးဝါမြွေရုပ်ပြုလုပ်စေ၍ ထိုမြွေရုပ်ကို တိုင်ပေါ်စိုက်ထားစေ၏၊ မြွေကိုက်ခံရသူတို့၏မြွေဆိပ် ပြယ်သွားစေရန် ယင်းကိုကြည့်ကြဖို့ ညွှန်ကြားသည်။ အဆိုပါမြွေရုပ်သည် ကျွန်ုပ်တို့၏ထာဝရကောင်းကျိုးအတွက် ယေရှုခရစ်နှက်တိုင်တင် အသတ်ခံရခြင်းကို အရိပ်အယောင်ပြ၏။ (ယောဟန် ၃:၁၄၊ ၁၅) ဣသရေလလူတို့သည် အမ္မုန်မင်းကြီး ရှိဟုန်နှင့် ဩဃတို့ကို အနိုင်ရကာ သူတို့၏တိုင်းပြည်များကို သိမ်းပိုက်လိုက်လေသည်။
ကျမ်းစာမေးခွန်းများ အဖြေ–
၁၂:၁—မိရိအံနှင့်အာရုန်တို့သည် မောရှေကို အဘယ်ကြောင့်မကျေမနပ် ပြစ်တင်ပြောဆိုခဲ့ကြသနည်း။ သူတို့မကျေမနပ်ဖြစ်ရသည့် အကြောင်းရင်းမှာ မိရိအံ၏ ဩဇာပိုရလိုစိတ် ဖြစ်ဟန်တူသည်။ မောရှေ၏ဇနီး ဇိပေါရသည် တောကန္တာရတွင် သူနှင့်အတူ ပြန်လာနေထိုင်သောအခါ တပ်စခန်းတွင် ဦးဆောင်နေသောအမျိုးသမီးအဖြစ် မိမိအား ရှုမြင်ကြတော့မည်မဟုတ်ဟု မိရိအံ စိုးရိမ်ခဲ့ပုံရှိ၏။—ထွက်မြောက်ရာ ၁၈:၁-၅။
၁၂:၉-၁၁—မိရိအံတစ်ဦးတည်းသာ အဘယ်ကြောင့်နူနာစွဲရသနည်း။ ဖြစ်နိုင်ဖွယ်ရှိသည်မှာ၊ သူသည် အာရုန်ကို သွေးဆောင်ပြီး မိမိနှင့်အတူ မကျေမနပ်ပြောဆိုရန် ဆွပေးခဲ့ပုံပေါ်သည်။ အာရုန်သည် မိမိအမှားကိုဝန်ခံခြင်းအားဖြင့် စိတ်ထားမှန်ရှိကြောင်း ပြသခဲ့၏။
၂၁:၁၄၊ ၁၅—ဤတွင်ဖော်ပြထားသည့်စာ[အုပ်]ကား အဘယ်နည်း။ ပင်ရင်းအကြောင်းအရာအဖြစ် ကျမ်းရေးသူများ အသုံးပြုခဲ့ကြသည့် စာ[အုပ်]အမျိုးမျိုးကို သမ္မာကျမ်းစာက ရည်ညွှန်းသည်။ (ယောရှု ၁၀:၁၂၊ ၁၃; ၃ ဓမ္မရာဇဝင် ၁၁:၄၁; ၁၄:၁၉၊ ၂၉) ‘ယေဟောဝါ၏စစ်တိုက်စာ’ သည် ထိုသို့သောစာအုပ်တစ်အုပ်ဖြစ်၏။ ၎င်းတွင် ယေဟောဝါလူမျိုးတော်၏ သမိုင်းဝင်စစ်မှတ်တမ်း ပါဝင်သည်။
ကျွန်ုပ်တို့အတွက် သင်ခန်းစာများ–
၁၁:၂၇-၂၉။ ယေဟောဝါ၏အမှုတော်တွင် အခြားသူတို့ အခွင့်ထူးများရရှိကြသောအခါ ကျွန်ုပ်တို့တုံ့ပြန်သင့်ပုံနှင့်စပ်လျဉ်း၍ အလွန်ကောင်းသောပုံနမူနာတစ်ခုကို မောရှေပေးသည်။ မိမိကျော်စောထင်ရှားဖို့ စိုးရိမ်ကြောင့်ကြနေမည့်အစား ပရောဖက်များအဖြစ် ဧလဒဒ်နှင့်မေဒဒ်တို့ စတင်လုပ်ဆောင်ကြသည်ကို မောရှေဝမ်းသာခဲ့သည်။
၁၂:၂၊ ၉၊ ၁၀; ၁၆:၁-၃၊ ၁၂-၁၄၊ ၃၁-၃၅၊ ၄၁၊ ၄၆-၅၀။ ယေဟောဝါသည် မိမိ၏ဝတ်ပြုသူများအား ဘုရားသခင်ပေးအခွင့်အာဏာကို လေးစားစေလိုသည်။
၁၄:၂၄ [သမ္မာ]။ အမှားပြုစေသည့် လောကဖိအားပေးမှုများကို တွန်းလှန်စေသော အရေးကြီးသော့ချက်မှာ “ခြားနားသောသဘော” ကို မွေးမြူခြင်းဖြစ်သည်။ ယင်းသည် လောကနှင့်မတူသည့် စိတ်သဘောထားဖြစ်ရမည်။
၁၅:၃၇-၄၁။ ဣသရေလလူမျိုးတို့၏ ထူးခြားသောဝတ်ရုံပန်းဖွားက သူတို့သည် ဘုရားသခင်အားဝတ်ပြုကိုးကွယ်ရန်နှင့် ကိုယ်တော်၏မိန့်မှာချက်များကို လိုက်နာရန် သီးသန့်ခွဲခြားထားသော လူမျိုးတစ်မျိုးဖြစ်ကြောင်း သတိပေးဖို့ဖြစ်သည်။ ကျွန်ုပ်တို့လည်း ဘုရားသခင်၏စံနှုန်းတော်များနှင့်အညီ အသက်ရှင်နေထိုင်ကာ လောကနှင့်ကွဲပြားခြားနားကြောင်း ပေါ်လွင်ထင်ရှားသင့်သည်မဟုတ်လော။
မောဘလွင်ပြင်၌
မောဘလွင်ပြင်သဲကန္တာရတွင် ဣသရေလလူတို့ တပ်စခန်းချသောအခါ သူတို့ကြောင့် မောဘလူမျိုးသည် ကြောက်ရွံ့တုန်လှုပ်လာကြ၏။ ထို့ကြောင့် မောဘရှင်ဘုရင် ဗာလက်သည် ဣသရေလလူတို့ကို ကျိန်ဆဲရန် ဗာလမ်အားငှားလိုက်သည်။ သို့သော် သူတို့အား ကောင်းချီးပေးဖို့ ဗာလမ်ကို ယေဟောဝါ အကျပ်ကိုင်သည်။ ထို့နောက် မောဘနှင့် မိဒျန်အမျိုးသမီးများအား ဣသရေလအမျိုးသားများကို လိင်အကျင့်ယိုယွင်းရန်နှင့် ရုပ်ပုံကိုးကွယ်ရန် သွေးဆောင်စေခဲ့၏။ ထို့ကြောင့် ယေဟောဝါသည် အမှားပြုသူ ၂၄,၀၀၀ ကို ဖျက်ဆီးလိုက်လေသည်။ နောက်ဆုံးတွင် ယေဟောဝါဘက်၌စိတ်အားကြီးမှုကို ဖိနဟပ်တင်ပြလိုက်သောအခါ ဘေးဒဏ် ရပ်စဲလေသည်။
ဒုတိယအကြိမ် သန်းခေါင်စာရင်းကောက်ယူချိန်တွင် ပထမစာရင်းယူချိန်က ပါဝင်ခဲ့သည့် အမျိုးသားများအနက် ယောရှုနှင့်ကာလက်တို့သာ ကျန်ရှိကြောင်း ဖော်ပြသည်။ ယောရှုသည် မောရှေ၏အရာကိုဆက်ခံရန် တာဝန်ရခဲ့၏။ ဣသရေလလူတို့သည် ယဇ်ပူဇော်မှုအမျိုးမျိုးအတွက် လုပ်ထုံးလုပ်နည်းများနှင့် ကတိကဝတ်ပြုခြင်းဆိုင်ရာ လမ်းညွှန်ချက်များကို ရရှိခဲ့ကြသည်။ ဣသရေလလူတို့သည် မိဒျန်လူမျိုးကိုလည်း သွေးကြွေးဆပ်လိုက်ကြ၏။ ရုဗင်၊ ဂဒ်နှင့် မနာရှေ၏အမျိုးမှ ထက်ဝက်တို့သည် ယော်ဒန်မြစ်အရှေ့ဘက်တွင် အတည်တကျနေထိုင်ကြ၏။ ဣသရေလလူမျိုးသည် ယော်ဒန်မြစ်ကိုဖြတ်ကူးပြီး နယ်မြေဒေသကိုသိမ်းပိုက်ဖို့ လမ်းညွှန်ချက်များရ၏။ နယ်မြေအပိုင်းအခြားကို သတ်မှတ်လိုက်ကြသည်။ မဲစနစ်ဖြင့် အမွေခံကြရမည်ဟု ဆုံးဖြတ်ခဲ့ကြသည်။ လေဝိသားများကို မြို့ ၄၈ မြို့အပ်ပေးထားပြီး ၎င်းမြို့များအနက် ၆ မြို့မှာ ခိုလှုံရာမြို့များဖြစ်ကြသည်။
ကျမ်းစာမေးခွန်းများ အဖြေ–
၂၂:၂၀-၂၂—ဗာလမ်ကို ယေဟောဝါ အဘယ်ကြောင့် အမျက်ထွက်ရသနည်း။ ဣသရေလလူမျိုးများကို မကျိန်ဆဲရဟု ပရောဖက်ဗာလမ်ကို ယေဟောဝါမိန့်တော်မူခဲ့ပြီးဖြစ်သည်။ (တောလည်ရာ ၂၂:၁၂) သို့သော် အဆိုပါပရောဖက်သည် ဣသရေလလူမျိုးကို ကျိန်ဆဲမည် ရည်ရွယ်ချက်အပြည့်ဖြင့် ဗာလက်၏လူများနှင့်အတူ ထွက်သွားလေသည်။ ဗာလမ်သည် မောဘရှင်ဘုရင်၏စိတ်တော်နှင့်တွေ့လိုပြီး သူ့ထံမှ ဆုလာဘ်ရလိုသည်။ (၂ ပေတရု ၂:၁၅၊ ၁၆; ယုဒ ၁၁) ဗာလမ်သည် ဣသရေလလူမျိုးကို ကျိန်ဆဲမည့်အစား မဖြစ်မနေကောင်းချီးပေးရသည့်အခါ၌ပင် ဗာလဝတ်ပြုသူ အမျိုးသမီးများကို အသုံးပြုပြီး ဣသရေလအမျိုးသားများကို လှည့်ပတ်ဖြားယောင်းပါဟု အကြံပြုခြင်းဖြင့် ရှင်ဘုရင်၏မျက်နှာသာကိုရရန် ကြိုးစားခဲ့သည်။ (တောလည်ရာ ၃၁:၁၅၊ ၁၆) သို့နှင့် ဗာလမ်အား ဘုရားသခင်အမျက်ထွက်ရခြင်းမှာ အဆိုပါပရောဖက်၏ မသမာသောလောဘကြောင့်ဖြစ်ပေသည်။
၃၀:၆-၈—ခရစ်ယာန်အမျိုးသားတစ်ဦးသည် မိမိဇနီးသည်ပြုထားသည့် သစ္စာကတိများကို ပယ်နိုင်ပါသလော။ သစ္စာကတိပြုမှုများနှင့်စပ်လျဉ်း၍ ယေဟောဝါသည် မိမိအားဝတ်ပြုသူများကို တစ်ဦးချင်းစီနှင့် ရှင်းတော်မူသည်။ ဥပမာ၊ ယေဟောဝါထံဆက်ကပ်အပ်နှံခြင်းသည် ကိုယ်တိုင်ပြုရသည့် သစ္စာကတိဖြစ်၏။ (ဂလာတိ ၆:၅) ခင်ပွန်းသည်ဖြစ်သူသည် ထိုသို့သောသစ္စာကတိမျိုးကို ပယ်ဖျက်ပိုင်ခွင့်မရှိချေ။ သို့သော် ဇနီးသည်,သည် ဘုရားသခင့်နှုတ်မြွက်စကားတော်နှင့်ဆန့်ကျင်သော သို့မဟုတ် မယားဝတ်များနှင့်ဆန့်ကျင်သော သစ္စာကတိမျိုးကိုမူ မပြုသင့်ပေ။
ကျွန်ုပ်တို့အတွက် သင်ခန်းစာများ–
၂၅:၁၁။ ယေဟောဝါ၏ဝတ်ပြုရေးအတွက် ဖိနဟပ်၏ ဇွဲထက်သန်မှုသည် ကျွန်ုပ်တို့အတွက် အလွန်ကောင်းသောပုံနမူနာဖြစ်သည်! အသင်းတော်၏ သန့်ရှင်းစင်ကြယ်မှုကို ဆက်ထိန်းသိမ်းလိုသည့် ဆန္ဒကြောင့် အလွန်ဆိုးရွားသော မည်သည့်အကျင့်ယိုယွင်းမှုကိုမဆို သိရှိရပါက ခရစ်ယာန်အကြီးအကဲများအား အသိပေးလိုစိတ် ရှိသင့်သည်မဟုတ်လော။
၃၅:၉-၂၉။ မရည်ရွယ်ဘဲ လူသတ်မိသူတစ်ဦးသည် မိမိ၏နေအိမ်မှထွက်၍ ခိုလှုံရာမြို့တစ်မြို့တွင် အခိုက်အတန့် ထွက်ပြေးနေထိုင်ရခြင်းက အသက်သည် မြင့်မြတ်ကြောင်းနှင့် ယင်းကို ကျွန်ုပ်တို့လေးမြတ်ရကြောင်း သင်ခန်းစာပေးသည်။
၃၅:၃၃။ အပြစ်မဲ့သူသွန်းသောအသွေးဖြင့် ညစ်ညမ်းသွားသောမြေကြီးကို အသွေးသွန်းသူတို့၏ အသွေးဖြင့်သာ ကျေအေးစေနိုင်သည်။ ယေဟောဝါသည် ကမ္ဘာမြေကြီးကို ပရဒိသုအဖြစ် အသွင်မပြောင်းလဲမီ လူဆိုးများကို ဖျက်ဆီးပစ်မည်မှာ တကယ်သင့်လျော်လှသည်တကား!—သု. ၂:၂၁၊ ၂၂; ဒံယေလ ၂:၄၄၊ ၄၅။
ဘုရားသခင့်နှုတ်မြွက်စကားတော်သည် တန်ခိုးနှင့်ပြုပြင်
ကျွန်ုပ်တို့သည် ယေဟောဝါနှင့် ကိုယ်တော်၏လူမျိုးတော်အလယ် တာဝန်ရရှိထားကြသူတို့ကို လေးစားကြရမည်။ ဤအမှန်တရားကို တောလည်ရာကျမ်းက အမှန်ပင် အလေးပေးဖော်ပြသည်။ ယနေ့ အသင်းတော်တွင် စည်းလုံးမှုနှင့် ငြိမ်သက်မှုကို ထိန်းသိမ်းထားရန် အလွန်အရေးပါသည့် သင်ခန်းစာဖြစ်သည်!
မိမိတို့၏ ဝိညာဉ်ရေးကို လျစ်လျူရှုသူတို့သည် ညည်းညူခြင်း၊ အကျင့်ယိုယွင်းခြင်းနှင့် ရုပ်ပုံကိုးကွယ်ခြင်းအစရှိသည့် မှားယွင်းမှုများကို အလွယ်တကူပြုလုပ်နိုင်ကြောင်း တောလည်ရာကျမ်းပါ အဖြစ်အပျက်များက ဖော်ပြသည်။ ဤကျမ်းစာစောင်မှ သင်ခန်းစာများနှင့် ပုံနမူနာအချို့ကို ယေဟောဝါသက်သေများ၏ အသင်းတော်များ၌ လုပ်ငန်းတော်အစည်းအဝေး၏ ဒေသလိုအပ်ရာအပိုင်းတွင် အသုံးပြုဖို့ အခြေခံဖြစ်နိုင်ပါသည်။ ‘ဘုရားသခင်၏နှုတ်မြွက်စကားတော်’ သည် အမှန်ပင် ‘အသက်ရှင်’ ၍ ကျွန်ုပ်တို့၏ဘဝကို ‘တန်ခိုးနှင့်ပြုပြင်’ ပေးနိုင်သည်တကား။—ဟေဗြဲ ၄:၁၂။
[စာမျက်နှာ ၂၄၊ ၂၅ ပါ ရုပ်ပုံ]
ဝတ်ပြုရာတဲတော်ပေါ် တည်ရှိသည့် အံ့ဖွယ်မိုးတိမ်အားဖြင့် ဣသရေလလူတို့ကို တပ်စခန်းချရန်၊ ပြောင်းရွှေ့ရန် ယေဟောဝါညွှန်ကြားခဲ့
[စာမျက်နှာ ၂၆ ပါ ရုပ်ပုံ]
ယေဟောဝါသည် ကျွန်ုပ်တို့၏နာခံမှုကို ရထိုက်ပြီး ကိုယ်တော်၏ကိုယ်စားလှယ်များအား ရိုသေလေးစားဖို့ မျှော်လင့်