ဘဝအသက်တာကို အဘယ်အရာက အမှန်အဓိပ္ပာယ်ရှိစေသနည်း
ဘဝအသက်တာကို အဘယ်အရာက အမှန်အဓိပ္ပာယ်ရှိစေသနည်း
အသက် ၁၇ နှစ်အရွယ် အထက်တန်းကျောင်းသား ဂျက်စီသည် ဘဝ၏အဓိပ္ပာယ်ဟူသည် အဘယ်နည်းဟု မေးမြန်းခံရသောအခါ သူက “အသက်ရှင်သ၍ ပျော်ပျော်သာနေ” ဟုပြန်ဖြေလေသည်။ စူဇီ၏အမြင်ကမူ မတူ။ “ဘဝရဲ့အဓိပ္ပာယ်ဆိုတာ ကိုယ်ရွေးချယ်ဖန်တီးရာပဲလို့ ကျွန်မ ရိုးရိုးသားသားယုံကြည်တယ်” ဟု သူပြောသည်။
ဘဝ၏အဓိပ္ပာယ်ကို သင်တွေးတောမိသလော။ လူသားအပေါင်းအတွက် စကြဝဠာဆိုင်ရာရည်ရွယ်ချက် တစ်ခုတည်းသာ ရှိပါသလော။ သို့မဟုတ် စူဇီပြောသည့်အတိုင်းပင် ဘဝဟူသည် အမှန်အားဖြင့် ကျွန်ုပ်တို့တစ်ဦးစီ၏ ရွေးချယ်ဖန်တီးရာလော။ ကျွန်ုပ်တို့၏လူ့ဘောင်အဖွဲ့အစည်းသည် နည်းပညာပိုင်းအရ မည်မျှပင် ခေတ်မီတိုးတက်နေပါစေ ကျွန်ုပ်တို့၏အတွင်းစိတ်သဘောက ဘဝအဓိပ္ပာယ်ကို တောင့်တပုံရသည်။ ကျွန်ုပ်တို့၏ဘဝအသက်တာ တစ်ချိန်ချိန်တွင် ကျွန်ုပ်တို့အများစုက ‘ကျွန်ုပ်တို့ အဘယ်ကြောင့် ဤလောကတွင် ရောက်ရှိနေရသနည်း’ ဟု တွေးဆကြသည်။
ခေတ်သစ်သိပ္ပံပညာသည် ထိုမေးခွန်းကို ကြိုးစားဖြေဆိုခဲ့၏။ ယင်းအဖြေကား အဘယ်နည်း။ “အသက်ရှင်ခြင်းကိုယ်နှိုက်သည် ဆင့်ကဲဖြစ်စဉ်တွင် မည်သည့်အဓိပ္ပာယ်မျှမရှိချေ” ဟု စိတ်ပညာနှင့် သတ္တဗေဒပါမောက္ခ ဒေးဗစ် ပီ. ဘားရက်ရှ်က ဆိုသည်။ ဆင့်ကဲဇီဝဗေဒပညာရှင်များအဖို့ သက်ရှိသတ္တဝါများသည် ရည်ရွယ်ချက်တစ်ခုတည်းသာရှိ၍ ယင်းကား အသက်ရှင်၍ မျိုးပွားခြင်းသာဖြစ်သည်ဟူ၏။ သို့ဖြစ်၍ ပါမောက္ခ ဘားရက်ရှ်က ဤသို့အကြံပြုသည်– “ရည်ရွယ်ချက်မရှိ၊ လူအချင်းချင်း ဂရုစိုက်ခြင်းမရှိသည့် စကြဝဠာကြီးတွင် လွတ်လွတ်လပ်လပ်၊ အသိစိတ်ရှိရှိ၊ တမင်တကာ ရွေးချယ်ပြုမူခြင်းဖြင့် မိမိတို့ဘဝကို အဓိပ္ပာယ်ရှိစေရန်မှာ လူသားတို့၏တာဝန်သာဖြစ်သည်။”
ဘဝအဓိပ္ပာယ်နှင့် ရည်ရွယ်ချက်ရှိခြင်း ရင်းမြစ်
သို့ဆိုလျှင် ဘဝသည် ဤမျှသာလော၊ ကျွန်ုပ်တို့တစ်ဦးစီ မိမိအလိုရှိရာကို လုပ်ဆောင်ခြင်းမျှလော။ ရည်ရွယ်ချက်မရှိ၊ အဓိပ္ပာယ်ကင်းမဲ့သည့် စကြဝဠာတွင် ကျွန်ုပ်တို့အား ခြေဦးတည့်ရာ သွားလာနေစေမည့်အစား အကြောင်းရင်းတစ်ခုအတွက် ကျွန်ုပ်တို့ ဤလောကတွင်ရှိနေရကြောင်း သမ္မာကျမ်းစာက ကြာမြင့်စွာကတည်းက ဖော်ပြခဲ့ပြီဖြစ်သည်။ ကျွန်ုပ်တို့တည်ရှိနေရခြင်းသည် အာကာသမှ မတော်တဆမှုတစ်ခုခုကြောင့် ဖြစ်ပေါ်လာခြင်းမဟုတ်ချေ။ ဖန်ဆင်းရှင်သည် ကမ္ဘာမြေကြီးကို လူနေထိုင်ဖို့ နှစ်ပေါင်းများစွာ အချိန်ယူပြင်ဆင်ခဲ့ကြောင်း သိရှိရသည်။ အဘယ်အရာကိုမျှ မတော်တဆဖြစ်လာစေခဲ့သည် မဟုတ်ပါ။ အရာခပ်သိမ်းကို “အလွန်ကောင်း” မွန်စေရန် အသေအချာပြုလုပ်တော်မူခဲ့၏။ (ကမ္ဘာဦး ၁:၃၁; ဟေရှာယ ၄၅:၁၈) အဘယ်ကြောင့်နည်း။ အကြောင်းမှာ လူနှင့်ပတ်သက်၍ ဘုရားသခင်၌ ရည်ရွယ်ချက်ရှိတော်မူသောကြောင့်ဖြစ်၏။
သို့တိုင်၊ စိတ်ဝင်စားစရာမှာ ဘုရားသခင်သည် လူတစ်ဦးစီ၏အနာဂတ်ကို ကြားဝင်စီမံပေးခြင်းအားဖြင့်ဖြစ်စေ၊ အချို့သောဇီဝဖြစ်စဉ်အားဖြင့်ဖြစ်စေ တင်ကူးပြဋ္ဌာန်းခြင်းမရှိချေ။ ကျွန်ုပ်တို့အမွေရထားသော မျိုးရိုးဗီဇ၏ လွှမ်းမိုးမှုကို ခံရကြသော်လည်း အများအားဖြင့် ကျွန်ုပ်တို့၏လုပ်ရပ်ကို ကျွန်ုပ်တို့ထိန်းချုပ်နိုင်ကြပါသည်။ ကျွန်ုပ်တို့အားလုံးသည် မိမိတို့၏ဘဝလမ်းစဉ်ကို မိမိတို့ကိုယ်တိုင် လွတ်လွတ်လပ်လပ် ရွေးချယ်နိုင်ကြသည်။
မိမိတို့၏ဘဝအသက်တာကို မိမိတို့ မည်သို့အသုံးချမည်နှင့်ပတ်သက်၍ ကျွန်ုပ်တို့တစ်ဦးစီ ကိုယ်တိုင်ကိုယ်ကျရွေးချယ်ပြုလုပ်နိုင်သော်လည်း ဖန်ဆင်းရှင်မပါဘဲ ပြုမူလုပ်ကိုင်မည်ဆိုလျှင် မှားပေလိမ့်မည်။ အမှန်မှာ၊ ဘဝတွင် အဓိပ္ပာယ်အမှန်ရှိခြင်းနှင့် ရည်ရွယ်ချက်အမှန်ရှိခြင်းသည် ဘုရားသခင်နှင့်ရင်းနှီးသောဆက်ဆံရေးနှင့် ဆက်နွှယ်နေကြောင်း လူအများသိရှိလာကြပြီ။ ဘုရားသခင်နှင့် ကျွန်ုပ်တို့၏ဘဝရည်ရွယ်ချက်စပ်ကြား အဓိကဆက်စပ်မှုသည် “ကိုယ်တော်ဖြစ်လာစေသည်” ဟူ၍ စာသားအတိုင်း အဓိပ္ပာယ်ရှိသည့် ဘုရားသခင့် ကိုယ်ပိုင်နာမတော်၊ ယေဟောဝါတွင် ပေါ်လွင်ထင်ရှားသည်။ (ထွက်မြောက်ရာ ၆:၃; ဆာလံ ၈၃:၁၈) ဆိုလိုသည်မှာ၊ ကိုယ်တော်သည် မိမိကတိပြုသမျှကို အဆင့်ဆင့်ပြည့်စုံစေတော်မူပြီး ရည်ရွယ်တော်မူချက်ကို အမြဲအထမြောက်စေသည်။ (ထွက်မြောက်ရာ ၃:၁၄; ဟေရှာယ ၅၅:၁၀၊ ၁၁) ယင်းကို စဉ်းစားကြည့်လိုက်ပါ။ ယေဟောဝါဟူသောနာမတော်သည် ကျွန်ုပ်တို့အားလုံးအတွက် အာမခံချက်ဖြစ်၏၊ ကိုယ်တော်သည် မူလအစဖြစ်ကာ အဓိပ္ပာယ်ပြည့်ဝသော ရည်ရွယ်ချက်၏ တည်မြဲသောရင်းမြစ်ဖြစ်တော်မူ၏။
ဖန်ဆင်းရှင်တည်ရှိကြောင်းကို အသိအမှတ်ပြုရုံပြုခြင်းက လူတစ်ဦး၏ အသက်တာနှင့်ပတ်သက်သည့် ရှုမြင်ချက်အပေါ် အကျိုးများစွာသက်ရောက်သည်။ အသက် ၁၉ နှစ်အရွယ် လီနက်က ဤသို့ပြောပြသည်– “ယေဟောဝါဖန်ဆင်းထားတဲ့ အံ့ဖွယ်ရာတွေနဲ့ အဲဒါတွေရဲ့ရည်ရွယ်ချက်ကို တွေ့မြင်ရခြင်းက ကျွန်မကိုလည်း အကြောင်းရှိလို့ ဖန်ဆင်းထားတယ်ဆိုတာ ထင်ရှားတယ်။” အဲမ်ဘာက ဤသို့ပြောသည်– “လူတွေက ဘုရားသခင် ရှိမရှိ ‘မသိ’ လို့ ပြောကြတဲ့အခါ ကျွန်မကတော့ သိကိုသိနေတယ်လို့ အတွေးပေါ်လာတယ်။ ယေဟောဝါတည်ရှိတယ်ဆိုတာကို ကိုယ်တော်ဖန်ဆင်းထားတဲ့အရာတွေက သက်သေထူတယ်။” (ရောမ ၁:၂၀) ဖန်ဆင်းရှင်တည်ရှိကြောင်း အသိအမှတ်ပြုခြင်းက ကိစ္စတစ်ခုဖြစ်ပြီး ကိုယ်တော်နှင့် အဓိပ္ပာယ်ရှိရှိ တရင်းတနှီးဆက်ဆံခြင်းကို ပြုစုပျိုးထောင်ခြင်းက အခြားကိစ္စတစ်ခုဖြစ်သည်။
ဘုရားသခင်နှင့် ရင်းနှီးကျွမ်းဝင်ခြင်း
ဤတွင်တစ်ဖန် သမ္မာကျမ်းစာက အကူအညီပေးပါသည်။ ၎င်း၏အဖွင့်အခန်းကြီးများက ယေဟောဝါဘုရားသခင်သည် မေတ္တာပြည့်ဝသောဖခင်တစ်ပါးဖြစ်ကြောင်း ဖော်ပြသည်။ ဥပမာ၊ ကိုယ်တော်သည် အာဒံနှင့်ဧဝကို ဖန်ဆင်းပြီးနောက် မိမိ မည်သူမည်ဝါဖြစ်ကြောင်း အသိမပေးဘဲ မနေခဲ့ချေ။ သို့ပြုမည့်အစား၊ သူတို့နှင့် မှန်မှန် အဆက်အသွယ်ပြုတော်မူခဲ့၏။ အခြားအမှုကိစ္စများကို ကိုယ်တော် ဆက်လုပ်ဆောင်နေစဉ် သူတို့အား မိမိတို့ဘာသာ ရပ်တည်ကြရန် ဧဒင်ဥယျာဉ်တွင် ပစ်မထားခဲ့ချေ။ ယင်းအစား၊ ကိုယ်တော်သည် အသက်ရှင်နေထိုင်ရမည့် အကောင်းဆုံးနည်းကို သူတို့အား တိတိကျကျ ညွှန်ကြားခဲ့သည်။ သူတို့အား ကျေနပ်ဖွယ်အလုပ် လုပ်ကိုင်စေပြီး မပြတ်တမ်း လေ့ကျင့်သင်ကြားပေးခဲ့သည်။ (ကမ္ဘာဦး ၁:၂၆-၃၀; ၂:၇-၉) စွမ်းရည်ရှိ မေတ္တာပြည့်ဝသော မိဘတစ်ဦးသည် ဤအတိုင်းပင် ပြုမူမည်မဟုတ်ပေလော။ ယင်းက အဘယ်အရာကိုဆိုလိုကြောင်း စဉ်းစားကြည့်ပါ။ “ကမ္ဘာမြေကြီးကို ယေဟောဝါဖန်ဆင်းပြီး ဖန်ဆင်းရာတွေကို ပျော်မွေ့နိုင်တဲ့အစွမ်း ပေးထားတာက ကျွန်မတို့ကို ကိုယ်တော်ပျော်ရွှင်စေချင်တယ်ဆိုတာ ထင်ရှားတယ်” ဟု ဒဲန်ယဲလ်ပြောသည်။
ထို့ထက်ကား၊ မေတ္တာရှင်ဖခင်တစ်ဦးကဲ့သို့ပင် ယေဟောဝါသည် မိမိ၏သားသမီးအားလုံးကို မိမိနှင့် ရင်းနှီးသောဆက်ဆံရေးရှိစေလိုသည်။ ယင်းကြောင့် တမန်တော် ၁၇:၂၇ အာမခံသည့်အတိုင်း ‘ကိုယ်တော်သည် ငါတို့တွင် အဘယ်သူနှင့်မျှဝေးတော်မူသည် မဟုတ်ပါ။’ ယင်းကိုသိထားခြင်းက မည်သို့ထူးခြားစေသနည်း။ အဲမ်ဘာက ဤသို့ပြောသည်– “ယေဟောဝါကို သိကျွမ်းလာလို့ ကျွန်မ ဘယ်တော့မှ တစ်ယောက်တည်းမဟုတ်ဘူးဆိုတာ ယုံကြည်စိတ်ချတယ်။ ဘာပဲဖြစ်ဖြစ် အားကိုးရတဲ့သူတစ်ယောက် ကျွန်မနားမှာ အမြဲရှိတယ်။” ထို့အပြင်၊ ယေဟောဝါအား သင်သိကျွမ်းလာသည်နှင့်အမျှ ကိုယ်တော်သည် ကြင်နာ၍ မျှတပြီး ကောင်းမြတ်တော်မူကြောင်း သိရှိရပေမည်။ ကိုယ်တော်အား သင်မှီခိုအားထားနိုင်ပါသည်။ “ယေဟောဝါဟာ ကျွန်တော့်ရဲ့ ရင်းနှီးတဲ့မိတ်ဆွေဖြစ်လာတဲ့အခါ ကျွန်တော့်ကို အရန်သင့်ကူညီပေးမယ့် ကိုယ်တော်ထက် ကောင်းတဲ့သူ မရှိဘူးဆိုတာကို သိလာတယ်” ဟု ဂျက်ဖ်ကဆိုသည်။
ဝမ်းနည်းစရာမှာ ယေဟောဝါနှင့်ပတ်သက်၍ မဟုတ်မမှန်စကား များစွာပြောဆိုခဲ့ကြပြီ။ လူတို့၏ဆင်းရဲဝေဒနာများ၊ ဘာသာရေးအကျင့်ပျက်မှုတို့သည် ကိုယ်တော်ကြောင့်ဟု ပြစ်တင်ခဲ့ကြပြီ။ လူ့သမိုင်းတွင် ပေါ်ပေါက်ခဲ့သော အဆိုးဝါးဆုံး ရက်စက်ယုတ်မာမှုတို့သည် ကိုယ်တော်ကြောင့်ဟု ယူဆခဲ့ကြ၏။ သို့သော် တရားဟောရာ ၃၂:၄၊ ၅ [သမ္မာ] က ဤသို့ရှင်းပြသည်– “နည်းလမ်းတော်ရှိသမျှသည် တရားနှင့်ညီ . . . ၏။ သူတို့သည် ဖောက်ပြန်ကြပြီ။ ဘုရားသခင်၏သားမဟုတ်၊ အပြစ်အနာရှိသူသာ ဖြစ်ကြ၏။” ထို့ကြောင့် ကျွန်ုပ်တို့သည် အဖြစ်မှန်ကို ကျွန်ုပ်တို့ကိုယ်တိုင် စူးစမ်းစစ်ဆေးဖို့ တာဝန်ရှိသည်။—တရားဟောရာ ၃၀:၁၉၊ ၂၀။
ဘုရားသခင့်ရည်ရွယ်ချက် ပြည့်စုံခဲ့
သို့ရာတွင် ကျွန်ုပ်တို့အဘယ်အရာကိုပင် ဆုံးဖြတ်ပါစေ ဤကမ္ဘာမြေကြီးနှင့် လူသားတို့အတွက် ကိုယ်တော့်ရည်ရွယ်ချက် အပြည့်အဝ အထမြောက်အောင်မြင်စေရေးတွင် အဘယ်အရာကမျှ တားဆီးမည်မဟုတ်ပါ။ ကိုယ်တော်သည် ဖန်ဆင်းရှင်ဖြစ်ကြောင်း သတိရပါ။ သို့ဆိုလျှင် ကိုယ်တော်၏ရည်ရွယ်ချက်ကား အဘယ်နည်း။ တောင်ပေါ်တရားတော်တွင် ခရစ်တော်ယေရှု ဤသို့မိန့်ဆိုခဲ့ချိန်က ယင်းကို ရည်ညွှန်းခဲ့သည်– ‘စိတ်နူးညံ့သိမ်မွေ့သောသူတို့သည် ပျော်ရွှင်ကြ၏။ အကြောင်းမူကား၊ မြေကြီးကို အမွေခံရကြလတ္တံ့။’ နောက်ပိုင်းတွင် တမန်တော်ယောဟန်အား ကိုယ်တော်က ဘုရားသခင်သည် “မြေကြီးကိုဖျက်ဆီးသောသူတို့ကို ဖျက်ဆီး” ပစ်ဖို့ ဆုံးဖြတ်ထားကြောင်း ဖော်ပြခဲ့သည်။ (မဿဲ ၅:၅; ဗျာ. ၁၁:၁၈) ယေရှုသည် ဖန်ဆင်းရာကာလအတွင်း ဘုရားသခင်နှင့်အတူရှိတော်မူခဲ့ရာ စုံလင်သော လူ့မိသားစုကို ပရဒိသုမြေကြီးပေါ်တွင် ထာဝစဉ်နေထိုင်စေလိုခြင်းသည် ဘုရားသခင့်ရည်ရွယ်ချက်ဖြစ်ကြောင်း အစကတည်းက ကိုယ်တော်သိရှိထား၏။ (ကမ္ဘာဦး ၁:၂၆၊ ၂၇; ယောဟန် ၁:၁-၃) ဘုရားသခင်သည် ပြောင်းလဲခြင်းမရှိချေ။ (မာလခိ ၃:၆) ဘုရားသခင်က “ငါကြံစည်သည်အတိုင်းဖြစ်၍ ငါစီရင်ချက်လည်း တည်ရလိမ့်မည်” ဟု ကတိပြုတော်မူသည်။—ဟေရှာယ ၁၄:၂၄။
ကျွန်ုပ်တို့ခေတ်တွင် ယေဟောဝါသည် ယခုလောကကဲ့သို့ လောဘကြီးခြင်း၊ ကိုယ်ကျိုးရှာခြင်းအပေါ်မဟုတ်ဘဲ ဘုရားသခင်နှင့် အိမ်နီးချင်းကိုချစ်ခြင်းအပေါ် အခြေပြုသည့် စည်းလုံးသောလူမျိုးစုတစ်စု၏ အုတ်မြစ်ကို စတင်ချမှတ်ထားတော်မူပြီ။ (ယောဟန် ၁၃:၃၅; ဧဖက် ၄:၁၅၊ ၁၆; ဖိလိပ္ပိ ၂:၁-၄) ယင်းသည် တိုးတက်လိုစိတ်ရှိပြီး ဤအစီအစဉ်စနစ်၏အဆုံးမတိုင်မီ ဘုရားသခင့်နိုင်ငံတော်သတင်းကောင်း ဟောပြောရန်တာဝန်ကို ကျေပွန်လိုစိတ် ပြင်းပြသူများနှင့် ဖွဲ့စည်းထားသော စေတနာ့ဝန်ထမ်းအဖွဲ့ဖြစ်သည်။ (မဿဲ ၂၄:၁၄; ၂၈:၁၉၊ ၂၀) နိုင်ငံပေါင်း ၂၃၀ ကျော်တွင် ခြောက်သန်းကျော်သော ခရစ်ယာန်များသည် မေတ္တာပါ၍ စည်းလုံးသော အပြည်ပြည်ဆိုင်ရာ ညီအစ်ကိုများအသင်းအပင်းတွင် အတူတကွ ဝတ်ပြုလျက်ရှိကြသည်။
သင့်ဘဝအသက်တာကို အဓိပ္ပာယ်ရှိစေပါ
သင်သည် အဓိပ္ပာယ်ပိုပြည့်ဝသော ဘဝအသက်တာရလိုလျှင် မိမိ၏ “ဖြောင့်မတ်သောလူမျိုး” နှင့် ယခုပင် ပေါင်းသင်းရန် ယေဟောဝါဘုရားသခင် ဖိတ်ခေါ်လျက်ရှိသည်ကို သိမြင်သင့်သည်။ (ဟေရှာယ ၂၆:၂) သို့သော် ‘ဒီခရစ်ယာန်အသိုင်းအဝိုင်းမှာ နေရတဲ့ဘဝက ဘယ်လိုလဲ။ ငါ တကယ်ပဲ အဲဒီအထဲမှာပါချင်သလား’ ဟု သင်တွေးတောနေပေမည်။ လူငယ်တချို့၏စကားကို ဂရုပြုပါလေ–
ကွဲန်တင်– “ဒီလောကမှာ အသင်းတော်ဟာ ကျွန်တော့်ရဲ့အကာအကွယ်ပဲ။ ယေဟောဝါဟာ ကျွန်တော့်ဘဝမှာ သက်ဝင်လှုပ်ရှားနေတာကို သိမြင်ရခြင်းက ကိုယ်တော်တည်ရှိတယ်၊ ကျွန်တော့်ကို ကိုယ်တော်ပျော်ရွှင်စေလိုတယ်ဆိုတာကို တွေ့မြင်စေဖို့ ထောက်ကူပေးတယ်။”
ဂျက်ဖ်– “ကျွန်တော်အားပေးမှုရဖို့သွားနိုင်တဲ့ အကောင်းဆုံးနေရာက အသင်းတော်ပဲ။ အဲဒီမှာ ကျွန်တော့်ကို ထောက်မကူညီပေးမယ့်၊ ချီးမွမ်းစကားပြောဆိုမယ့် ညီအစ်ကိုညီအစ်မတွေရှိတယ်။ သူတို့ဟာ တကယ်ပဲ ကျွန်တော့်ရဲ့ ဆွေမျိုးရင်းချာမိသားစုပဲ။”
လီနက်– “ကျမ်းစာအမှန်တရားကို သက်ဝင်ယုံကြည်လာပြီး ယေဟောဝါအမှုတော်ထမ်းဆောင်ဖို့ ဆုံးဖြတ်လိုက်တဲ့သူတစ်ယောက်ကို တွေ့မြင်ရတာကနေ ရရှိတဲ့ရွှင်လန်းဝမ်းမြောက်မှုဟာ ဘာနဲ့မှ နှိုင်းယှဉ်လို့မရဘူး။ အဲဒါက ကျွန်မဘဝမှာ အကြီးအကျယ် အားရစရာဖြစ်တယ်။”
ကိုဒီ– “ယေဟောဝါသာမရှိရင် ကျွန်တော့်ဘဝဟာ အလကားပဲ။ သူများတွေလို ပျော်ရွှင်မှုကို ကြိုးစားရှာဖွေနေကြပေမဲ့ ရှာမတွေ့ဘဲ ဦးတည်ရာမဲ့ ဖြစ်နေမှာ။ အခုတော့ ယေဟောဝါဟာ သူနဲ့ မယုံနိုင်လောက်အောင် ရင်းနှီးကျွမ်းဝင်ခွင့် ပေးထားလို့ ကျွန်တော့်ဘဝဟာ အဓိပ္ပာယ်ရှိနေတာ။”
အသင်လည်း ကိုယ်တိုင်စူးစမ်းကြည့်ပါလေ။ သင်၏ဖန်ဆင်းရှင်၊ ယေဟောဝါဘုရားသခင်ထံ ချဉ်းကပ်ခြင်းအားဖြင့် ဘဝအသက်တာသည် အမှန်အဓိပ္ပာယ်ရှိကြောင်း သင်တွေ့ရှိရပါလိမ့်မည်။
[စာမျက်နှာ ၃၁ ပါ ရုပ်ပုံ]
ဘုရားသခင်နှင့် ရင်းနှီးသော ဆက်ဆံရေးသည် ကျွန်ုပ်တို့၏ ဘဝအသက်တာကို အဓိပ္ပာယ်ရှိစေ
[Picture Credit Line on page 29]
NASA photo