ဘုရားသခင့်နိုင်ငံတော်အုပ်ချုပ်မှု—မျက်မှောက်ခေတ် အမှန်တရား
ဘုရားသခင့်နိုင်ငံတော်အုပ်ချုပ်မှု—မျက်မှောက်ခေတ် အမှန်တရား
“ဖွံ့ဖြိုးမှုအဆင့်အတန်း အမျိုးမျိုး၊ ယဉ်ကျေးမှုအဖုံဖုံ ဤမျှကွဲပြားခြားနားနေသည့် နိုင်ငံများစွာတို့သည် မည်သို့တသဘောတည်းဖြစ်နိုင်ပါမည်နည်း။ အခြားဂြိုဟ်တစ်ခုက ချင်းနင်းဝင်ရောက်တိုက်ခိုက်မှသာလျှင် လူသားမျိုးနွယ်သည် တစည်းတလုံးရှိလာပါလိမ့်မည်ဟုဆို၏။”—သည်အေ့ဂျ်၊ ဩစတြေးလျသတင်းစာ။
အခြားဂြိုဟ်တစ်ခုက ချင်းနင်းဝင်ရောက်တိုက်ခိုက်မည် ဟုတ်စ။ ယင်းက ကမ္ဘာ့တိုင်းနိုင်ငံရှိရှိသမျှကို စည်းလုံးစေမည်၊ မစည်းလုံးစေမည်ကို ကျွန်ုပ်တို့မသိနိုင်ကြသော်လည်း ကျမ်းစာပရောဖက်ပြုချက်က ကမ္ဘာ့တိုင်းနိုင်ငံများကို စည်းလုံးစေမည့် ရောက်အံ့ဆဲဆဲ အရေးအကြောင်းတစ်ခုကို ဖော်ပြသည်။ အဆိုပါအရေးကိစ္စကြီးကို အခြားကမ္ဘာမှအင်အားစုများက ဖြစ်ပေါ်စေမည်ဖြစ်သည်။
ရှေးဣသရေလဘုရင်ဒါဝိဒ်သည် ဤကမ္ဘာ့အခြေအနေအကြောင်း ပရောဖက်ပြုခဲ့သည်။ ဘုရားသခင့်မှုတ်သွင်းခြင်းခံရ၍ သူဤသို့ရေးသားခဲ့၏– ‘မြေကြီးဘုရင်တို့သည် ထကြ၍ မင်းအရာရှိတို့လည်း ယေဟောဝါနှင့် ကိုယ်တော်၏ဝိညာဉ်တော်ဖွား တစ်ဖက်၌ တိုင်ပင်လျက် “သူတို့အစည်းအနှောင်များကိုဖြတ်၍ ချည်နှောင်သောကြိုးများကို ပယ်ပစ်ကြကုန်အံ့!” ဟုဆိုကြ’ လေသည်။ (ဆာလံ ၂:၂၊ ၃၊ သမ္မာ; တမန်တော် ၄:၂၅၊ ၂၆) လောကအုပ်စိုးရှင်များသည် စကြဝဠာဖန်ဆင်းရှင်၊ ယေဟောဝါနှင့် ကိုယ်တော်ခန့်အပ်ထားသည့်ဘုရင်၊ ယေရှုခရစ်ဖြစ်သော ကိုယ်တော်၏ဝိညာဉ်တော်ဖွားကို တိုက်ခိုက်ဖို့ တစုတဝေး စုရုံးကြမည်ဖြစ်ကြောင်း သတိပြုမှတ်သားပါလေ။ ထိုသို့ အဘယ်နည်းဖြင့် ဖြစ်ပျက်လာမည်နည်း။
ကျမ်းစာဖြစ်ပျက်မှုခုနှစ်နှင့် ပြည့်စုံပြီးသောပရောဖက်ပြုချက်များအရ ၁၉၁၄ ခုနှစ်တွင် ဘုရားသခင့်နိုင်ငံတော်ကို ဘုရင်ဖြစ်သောယေရှုခရစ်နှင့်အတူ ကောင်းကင်၌ တည်ထောင်ခဲ့သည်။ * ထိုအချိန်က ကမ္ဘာ့တိုင်းနိုင်ငံများသည် တစ်ကျိတ်တည်းတစ်ဉာဏ်တည်းဖြစ်ခဲ့ကြသည်။ ဘုရားသခင့်မွေးကင်းစနိုင်ငံတော်၏ ပိုင်သအုပ်စိုးမှုကို လက်အောက်ခံမည့်အစား ၎င်းတို့သည် ပထမကမ္ဘာစစ်ကြီးတွင် အားကုန်လောင်း တိုက်ခိုက်ခဲ့ကြ၏။
လူ့အုပ်စိုးရှင်များဘက်မှ ဤသို့တုံ့ပြန်ကြသည်ကို ယေဟောဝါဘုရားသခင်မည်သို့ယူဆသနည်း။ “ကောင်းကင်ဘုံ၌ ထိုင်တော်မူသောသူသည် ပြုံးရယ်၍ ထာဝရဘုရား[သခင်]သည် သူတို့ကို ကဲ့ရဲ့တော်မူ၏။ ထိုအခါ အမျက်တော်ထွက်၍ သူတို့ကို မိန့်တော်မူမည်။ ပြင်းစွာသောအမျက်တော်နှင့် သူတို့ကို ပူပန်စေတော်မူမည်။” ထို့နောက်၊ ယေဟောဝါသည် မိမိ၏သားတော် ဘုရားသခင့်နိုင်ငံတော်၏ ခန့်အပ်ခံဘုရင်အား ဤသို့မိန့်ဆိုတော်မူလိမ့်မည်– “ငါ့ကိုတောင်းလော့။ လူအမျိုးမျိုးတို့ကို သင်၏အမွေဥစ္စာဖို့ ငါပေးမည်။ မြေကြီးစွန်းတိုင်အောင် ပိုင်ထိုက်သောအခွင့်ကိုလည်း ငါပေးမည်။ သင်သည် သူတို့ကို သံလှံတံနှင့်အုပ်စိုး၍ မြေအိုးကိုခွဲဖျက်သကဲ့သို့ ခွဲဖျက်လိမ့်မည်။”—ဆာလံ ၂:၄၊ ၅၊ ၈၊ ၉။
သံလှံတံဖြင့် ညက်ညက်ကြေအောင် ချေမှုန်းခံရမည့် ဆန့်ကျင်သည့်တိုင်းနိုင်ငံများ၏ ဤနောက်ဆုံးအရေးနိမ့်မှုသည် ဟာမဂေဒုန် သို့မဟုတ် အာမဂေဒုန်တွင် ဖြစ်ပျက်လာပါလိမ့်မည်။ သမ္မာကျမ်းစာ၏ နောက်ဆုံးစာစောင်ဖြစ်သော ဗျာ.ကျမ်းက ဤအထွတ်အထိပ်ဖြစ်ရပ်ကို “တစ်လောကလုံးတွင်ရှိသော ဘုရင်တို့” ကို စုရုံးစေမည့် ‘အတိုင်းအဆမဲ့တန်ခိုးနှင့်ပြည့်စုံတော်မူသော ဘုရားသခင်၏နေ့ကြီးစစ်ပွဲ’ ဟုဖော်ပြသည်။ (ဗျာ. ၁၆:၁၄၊ ၁၆) အဆုံး၌ နတ်ဆိုးသြဇာလွှမ်းမိုးမှုအောက်တွင် တိုင်းနိုင်ငံတို့သည် အတိုင်းအဆမဲ့တန်ခိုးရှင်ဘုရားသခင်နှင့် စစ်ဆင်နွှဲရန် ရည်ရွယ်ချက်တစ်ခုတည်းအတွက် စည်းလုံးလာကြပေမည်။
ဘုရားသခင်၏ပိုင်သအုပ်စိုးမှုကို လူသားတို့ ဆန့်ကျင်တိုက်ခိုက်ရန် စုဝေးလာကြမည့်အချိန်သည် အလွန်နီးကပ်နေပြီ။ ထူးဆန်းသည်မှာ၊ ၎င်းတို့၏ “စည်းလုံးမှု” သည် သူတို့အတွက် အကျိုးရှိမည်မဟုတ်ချေ။ သို့အစား၊ ၎င်းတို့၏လုပ်ရပ်က လူသားထုတစ်ရပ်လုံး ကြာမြင့်စွာစောင့်မျှော်ခဲ့ရသည့် ငြိမ်းချမ်းရေးအတွက် လမ်းခင်းပေးလိုက်သလိုဖြစ်သွားပေမည်။ မည်သို့အားဖြင့်နည်း။ ထိုနောက်ဆုံးစစ်ပွဲတွင် ဘုရားသခင့်နိုင်ငံတော်သည် “[လောက၏] နိုင်ငံရှိသမျှတို့ကို ချိုးဖဲ့ဖျက်ဆီး၍ အစဉ်အမြဲတည်လိမ့်မည်။” (ဒံယေလ ၂:၄၅) မည်သည့်လူသားအဖွဲ့အစည်းမျှမဟုတ်ဘဲ ဘုရားသခင့်နိုင်ငံတော်သည်သာ ကမ္ဘာ့ငြိမ်းချမ်းရေးလိုလားသည့် လူသားတို့၏စိတ်ဆန္ဒကို ဖြည့်ဆည်းပေးမည့်အစိုးရ ဖြစ်ပါလိမ့်မည်။
ဘုရားသခင့်နိုင်ငံတော်အုပ်ချုပ်မှု၏ အဓိကအုပ်ချုပ်ရေးမှူး
ထိုနိုင်ငံတော်အတွက် စိတ်ရိုးမှန်သူအမြောက်အမြား ဤသို့ဆုတောင်းခဲ့ကြပြီ– “[ဘုရားသခင့်] နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာ ပြည့်စုံပါစေသော။” (မဿဲ ၆:၁၀) ဘုရားသခင်၏နိုင်ငံတော်သည် အကောင်အထည်မရှိသော နှလုံးအခြေအနေဖြစ်မည့်အစား တကယ့်အုပ်ချုပ်မှုတစ်ခုဖြစ်ရာ ၁၉၁၄ ခုနှစ်တွင် ကောင်းကင်၌ စတင်တည်ထောင်ကတည်းက အလွန်ကောင်းသောအမှုများစွာကို အောင်မြင်စွာ ဆောင်ရွက်ခဲ့ပြီဖြစ်သည်။ ဘုရားသခင့်နိုင်ငံတော်သည် ယနေ့ အပြည့်အဝလှုပ်ရှားနေသည့် အမှန်တကယ်ရှိသောအစိုးရဖြစ်ကြောင်း ဖော်ပြသည့် အဓိကအချက်တချို့ကို သုံးသပ်ကြည့်ကြစို့။
ဦးဆုံးအနေနှင့်၊ ဘုရားသခင့်နိုင်ငံတော်တွင် နန်းထိုင်ဘုရင် ယေရှုခရစ်ဦးစီးသော တန်ခိုးကြီးမားပြီး စွမ်းဆောင်နိုင်သည့် စီမံခန့်ခွဲရေးအဖွဲ့ရှိသည်။ စီ.အီး. ၃၃ ခုနှစ်တွင် ယေဟောဝါဘုရားသခင်သည် ယေရှုခရစ်အား အသင်းတော်၏ဦးစီးဖြစ်စေခဲ့သည်။ (ဧဖက် ၁:၂၂) ထိုအချိန်ကတည်းက ယေရှုဦးစီးခဲ့ရာ ကိုယ်တော်၏စီမံအုပ်ချုပ်နိုင်စွမ်းကို အထင်အရှားဖော်ပြခဲ့သည်။ ဥပမာ၊ ပထမရာစုတွင် ယုဒနယ်၌ အကြီးအကျယ်အစာခေါင်းပါးသောအခါ ခရစ်ယာန်အသင်းတော်သည် မိမိ၏အသင်းသားများကို ချက်ချင်းကူညီပေးခဲ့သည်။ ကယ်ဆယ်ရေးလုပ်ငန်းကို စီစဉ်ဖွဲ့စည်းပြီး ဗာနဗနှင့် ရှောလုတို့ကို ကယ်ဆယ်ရေးပစ္စည်းများနှင့် အန္တိအုတ်မြို့မှ စေလွှတ်လိုက်ကြသည်။—တမန်တော် ၁၁:၂၇-၃၀။
ယခု ဘုရားသခင့်နိုင်ငံတော်အစိုးရ အုပ်ချုပ်နေပြီဖြစ်ရာ ထိုအတိုင်းပင် ယေရှုခရစ်ပြုမူဆောင်ရွက်တော်မူမည်ဟု မျှော်လင့်နိုင်ပေသည်။ မြေငလျင်၊ အစာငတ်မွတ်ခြင်း၊ ရေလွှမ်းမိုးခြင်း၊ ဟာရီကိန်း၊ မုန်တိုင်း သို့မဟုတ် မီးတောင်ပေါက်ကွဲခြင်းအစရှိသော မည်သည့်ဘေးဆိုးများပင် ကျရောက်ပါစေ ယေဟောဝါသက်သေများ၏ ခရစ်ယာန်အသင်းတော်သည် ယုံကြည်သူချင်းများနှင့် ဘေးသင့်ရာအရပ်များရှိ အခြားသူများကိုပါ ကူညီပေးရန် အလျင်အမြန် တုံ့ပြန်ကြသည်။ ဥပမာ၊ ၂၀၀၁၊ ဇန်နဝါရီနှင့် ဖေဖော်ဝါရီလတို့တွင် အယ်လ်ဆာဗေးဒေါနိုင်ငံ၌ မြေငလျင် အကြီးအကျယ်လှုပ်သွားသောအခါ နိုင်ငံတစ်ဝန်း ကယ်ဆယ်ရေးလုပ်ငန်းများ စီစဉ်ဖွဲ့စည်းလိုက်ကြပြီး ကနေဒါ၊ ဂွာတီမာလာနှင့် အမေရိကန်ပြည်ထောင်စုမှ ယေဟောဝါသက်သေများက အကူအညီပေးခဲ့ကြသည်။ ဝတ်ပြုရာနေရာ သုံးနေရာအပြင် အိမ်ခြေ ၅၀၀ ကျော်ကိုပါ တစ်ခဏချင်းတွင် ပြန်ဆောက်ပေးခဲ့ကြ၏။
ဘုရားသခင့်နိုင်ငံတော်အုပ်ချုပ်မှု၏ လက်အောက်ခံများ
၁၉၁၄ ခုနှစ်တွင် ဘုရားသခင့် ကောင်းကင်နိုင်ငံတော် တည်ထောင်လာကတည်းက ကမ္ဘာတစ်ဝန်းမှ ၎င်း၏လက်အောက်ခံများကို စနစ်တကျ စုသိမ်းဖွဲ့စည်းခဲ့သည်။ ယင်းသည် ဟေရှာယမှတ်တမ်းတင်ခဲ့သည့် ထူးခြားမှတ်သားဖွယ်ကောင်းသော ဤပရောဖက်ပြုချက်၏ ပြည့်စုံချက်အတိုင်းပင်ဖြစ်၏– ‘နောင်ကာလ၌ ယေဟောဝါ၏အိမ်တော်တည်ရာတောင် [ကိုယ်တော်ချီးမြှောက်ခဲ့သော စစ်မှန်သည့်ဝတ်ပြုရေး] သည် ကုန်းတို့ထက်ချီးမြှင့်ခံ၍ တောင်များတို့၏ထိပ်ပေါ်တွင် တည်လိမ့်မည်။ ခပ်သိမ်းသောလူမျိုးတို့သည်လည်း စီတန်းတက်လာကြလိမ့်မည်။’ “ခပ်သိမ်းသောလူမျိုးတို့” သည် ထိုတောင်ပေါ်သို့ တက်သွားကြပြီး ယေဟောဝါ၏လမ်းညွှန်ချက်များနှင့် ပညတ်ဥပဒေများကို ခံယူကြမည်ဟု အဆိုပါပရောဖက်ပြုချက်က ဖော်ပြသည်။—ဟေရှာယ ၂:၂၊ ၃၊ သမ္မာ။
ယင်းကြောင့် နိုင်ငံပေါင်း ၂၃၀ ကျော်တွင် အပြည်ပြည်ဆိုင်ရာ ခရစ်ယာန်ညီအစ်ကိုအသင်းအပင်း ၆,၀၀၀,၀၀၀ ကျော်တို့သည် မျက်မှောက်ခေတ်၏ အထူးခြားဆုံး လှုပ်ရှားမှုတွင် တက်ကြွစွာပါဝင်နေကြသည်။ ယေဟောဝါသက်သေများ၏ အပြည်ပြည်ဆိုင်ရာ စည်းဝေးကြီးများတွင် နိုင်ငံသား၊ ယဉ်ကျေးမှုနှင့် ဘာသာစကား အတားအဆီးများမရှိသော ကြီးမားလှသည့် လူအုပ်ကြီးတွင် မေတ္တာ၊ ငြိမ်းချမ်းမှုနှင့် စည်းလုံးမှုကို တွေ့မြင်ကြရ၍ အကဲခတ်လေ့လာသူများက တအံ့တသြဖြစ်လေ့ရှိ၏။ (တမန်တော် ၁၀:၃၄၊ ၃၅) ရာနှင့်ချီသော လူမျိုးစုများကို သွေးစည်းညီညွတ် ငြိမ်းချမ်းစေနိုင်သည့် အုပ်ချုပ်မှုတစ်ခုဖြစ်ဖို့ ယင်းအစိုးရသည် ထိရောက်မှုရှိ၍ တည်မြဲရုံမက အမှန်တကယ်ရှိသောအစိုးရ ဖြစ်ရမည်မဟုတ်ပေလော။
ဘုရားသခင့်နိုင်ငံတော်နှင့်ပညာရေး
အစိုးရအသီးသီးတွင် တိုင်းသူပြည်သားများ လိုက်မီရမည့် စံနှုန်းများရှိကြသည်၊ ထိုအစိုးရလက်အောက် နေထိုင်လိုသူတိုင်းသည် ယင်းတို့ကို လိုက်မီရပေမည်။ အလားတူ၊ ဘုရားသခင့်နိုင်ငံတော်တွင်လည်း စံနှုန်းများရှိ၏၊ ၎င်း၏လက်အောက်ခံများအဖြစ် အရည်အချင်းပြည့်မီသူတိုင်း ထိုစံနှုန်းများကို လိုက်မီကြရမည်ဖြစ်သည်။ သို့ရာတွင်၊ နောက်ခံအမျိုးမျိုးရှိ လူများစွာတို့အတွက် စံနှုန်းတစ်မျိုးတည်းရှိ၍ ၎င်းတို့ကိုလက်ခံပြီး ထိုအတိုင်းနေထိုင်နိုင်ဖို့ဟူသည် ဧရာမတာဝန်ကြီးတစ်ရပ်ဖြစ်သည်။ ဤတွင် ဘုရားသခင့်နိုင်ငံတော် အမှန်တကယ်တည်ရှိကြောင်း သက်သေထူသည့် သာဓကနောက်တစ်ခု တွေ့ရှိရသည်၊ ယင်းသည် ဘုရားသခင့်နိုင်ငံတော်၏ ထိရောက်သော ပညာရေး အစီအစဉ်ကြောင့် လူတို့ စိတ်နှလုံးထိမိပြီး ပြောင်းလဲလာခြင်းဖြစ်သည်။
ဘုရားသခင့်နိုင်ငံတော်အစိုးရသည် ဤခက်ခဲသောလုပ်ငန်းကို မည်သို့ဖြစ်မြောက်စေသနည်း။ တမန်တော်များနည်းတူ ‘တစ်အိမ်မှတစ်အိမ်’ ဟောပြောခြင်းနှင့် သမ္မာကျမ်းစာကို တစ်ဦးချင်းစီ သွန်သင်ပေးခြင်းအားဖြင့်ဖြစ်သည်။ (တမန်တော် ၅:၄၂; ၂၀:၂၀) ဤပညာရေးစနစ်သည် မည်မျှထိရောက်သနည်း။ ကက်သလစ်ဘုန်းကြီးတစ်ဦးဖြစ်သူ ယာ့ခ်စ် ဂျွန်ဆင်သည် ယေဟောဝါသက်သေများနှင့် ကျမ်းစာမလေ့လာဖြစ်အောင် အမျိုးသမီးတစ်ဦးအား ကြိုးစားနားချခဲ့ခြင်းအကြောင်း ကနေဒါပတ်စဉ်သတင်းစာတစ်စောင်တွင် ရေးသားခဲ့သည်။ “ကျွန်တော် အတော်လေး ဦးနှောက်ခြောက်ခဲ့တာ၊ သူ့ကို ဘယ်လိုဖျောင်းဖျရမှန်းမသိဘူး၊ ပြောလို့ရမှာမဟုတ်ဘူးဆိုတာ သေချာတယ်” ဟု သူဆိုခဲ့၏။ “အဲ့ဒီ ဂျေဒဗလျူ (ယေဟောဝါသက်သေ) အမျိုးသမီးတွေဟာ ဒီငယ်ရွယ်တဲ့ အိမ်တွင်းပုန်းမိခင်နဲ့ လပေါင်းများစွာ အဓိပ္ပာယ်ရှိရှိ ရင်းနှီးကျွမ်းဝင်လာကြမှန်း ကျွန်တော်သိလိုက်ရတယ်။ သူတို့ဟာ သူ့ကို ကူညီပေးကြတယ်၊ မိတ်ဖွဲ့တယ်၊ သံယောဇဉ်တွယ်လာအောင် အဓိပ္ပာယ်ရှိရှိ ပေါင်းဖော်ခဲ့ကြတယ်။ မကြာပါဘူး သူလည်း သူတို့ဘာသာမှာ တက်ကြွတဲ့ အဖွဲ့ဝင်တစ်ယောက်ဖြစ်လာတယ်၊ သူ့ကို ဘယ်လိုမှ ဟန့်တားလို့မရဘူး။” ယခင်က ကက်သလစ်ဘာသာဝင်ဖြစ်ခဲ့သူ၏နှလုံးသားကို ယေဟောဝါသက်သေများ သွန်သင်ပေးသည့် ကျမ်းစာသတင်းတရားနှင့် သူတို့၏ခရစ်ယာန်အမူအကျင့်တို့က လှုံ့ဆော်ပေးခဲ့သကဲ့သို့ ကမ္ဘာတစ်ဝန်းမှ သန်းပေါင်းများစွာသောသူတို့၏ နှလုံးသားကိုလည်း လှုံ့ဆော်ပေးလျက်ရှိပါသည်။
ဘုရားသခင့်နိုင်ငံတော်ပညာရေးအစီအစဉ်သည် သမ္မာကျမ်းစာအပေါ် အခြေပြုသည်၊ ၎င်း၏စံများနှင့် ကျင့်ဝတ်စံနှုန်းများကို ထောက်ခံသည်။ မည်သည့်နောက်ခံမှပင်ဖြစ်ပါစေ လူလူချင်း ဂုဏ်တင်ရန်နှင့် ချစ်ကြရန် အားလုံးကို သွန်သင်ပေးသည်။ (ယောဟန် ၁၃:၃၄၊ ၃၅) ထို့ပြင် ဤတိုက်တွန်းချက်ကို တုံ့ပြန်ရန် လူတို့ကို ကူညီပေးသည်– “သင်တို့သည် လော[က]ပုံသဏ္ဌာန်ကို မဆောင်ကြနှင့်။ ကောင်းမြတ်သောအရာ၊ နှစ်သက်ဖွယ်သောအရာ၊ စုံလင်သောအရာတည်းဟူသော ဘုရားသခင်အလိုတော်ရှိသောအရာသည် အဘယ်အရာဖြစ်သည်ကို သင်နိုင်မည်အကြောင်း စိတ်နှလုံးကိုအသစ်ပြင်ဆင်၍ ပုံသဏ္ဌာန်ပြောင်းလဲခြင်းသို့ရောက်ကြလော့။” (ရောမ ၁၂:၂) ယခင်ဘဝလမ်းစဉ်ကို စွန့်လွှတ်ကြပြီး ဘုရားသခင့်နိုင်ငံတော်အစိုးရ၏ ပညတ်ဥပဒေနှင့် မူများကို ပျော်ရွှင်စွာလိုက်နာခဲ့ခြင်းဖြင့် သန်းပေါင်းများစွာသောသူတို့သည် ယခုပင် ပျော်ရွှင်ချမ်းမြေ့မှုနှင့် ငြိမ်းချမ်းမှုကို တွေ့ရှိထားကြသည်သာမက အနာဂတ်အတွက်လည်း အားရဝမ်းသာစရာမျှော်လင့်ချက်များ တွေ့ရှိရပေဦးမည်။—ကောလောသဲ ၃:၉-၁၁။
ဤကမ္ဘာချီစည်းလုံးမှုရရှိရေးကို ထူးခြားစွာ ကူညီပေးသည့်အရာတစ်ခုမှာ ဤကင်းမျှော်စင်မဂ္ဂဇင်းဖြစ်သည်။ ညှိနှိုင်းဖွဲ့စည်းထားသည့် ဘာသာပြန်နည်းစနစ်များနှင့် ဘာသာစကားပေါင်းစုံထုတ်ဝေရေးကိရိယာတို့ဖြင့် ကင်းမျှော်စင်တွင်ပါသော အဓိကဆောင်းပါးများကို ၁၃၅ ဘာသာစကားဖြင့် တစ်ပြိုင်တည်းထုတ်ဝေထား၏၊ ယင်းကြောင့် ကမ္ဘာတစ်ဝန်းမှ စာရှုသူ ၉၅ ရာခိုင်နှုန်းကျော်တို့သည် ထိုဆောင်းပါးများကို မိမိတို့၏ကိုယ်ပိုင်ဘာသာစကားဖြင့် တစ်ပြိုင်တည်း လေ့လာနိုင်ကြသည်။
မော်မန်စာရေးဆရာတစ်ဦးသည် မိမိ၏ချာ့ခ်ျပြင်ပရှိ ခရစ်ယာန်သာသနာပြုဆိုင်ရာ အထူးခြားဆုံး အောင်မြင်မှုများကို စာရင်းပြုစုခဲ့၏။ သူသည် ယေဟောဝါသက်သေများထုတ်ဝေသည့် ကင်းမျှော်စင်နှင့် နိုးလော့!တို့ကို ဝမ်းမြောက်ဖွယ်သတင်းကြေညာသည့် အကောင်းဆုံး မဂ္ဂဇင်းများအဖြစ် ဤသို့ဖော်ပြပြောဆိုခဲ့သည်– “ကင်းမျှော်စင် သို့မဟုတ် နိုးလော့! မဂ္ဂဇင်းတို့သည် မိမိဘာသာအားရကျေနပ်နေစေရန် အားပေးအားမြှောက်ပြုသည်ဟု မည်သူကမျှ မစွပ်စွဲနိုင်ပါ၊ သို့အစား၊ အခြားအဘယ်ဘာသာရေးစာပေများ၌မျှ မတွေ့ရှိရသည့် နိုးကြားမှုသဘောထားကို ယင်းတို့က ဖြစ်ပေါ်စေသည်။ ကင်းမျှော်စင်နှင့် နိုးလော့! တို့သည် ဖြစ်ရပ်မှန်များကို အခြေပြု၍ အသေအချာလေ့လာရေးသားထားကာ ကမ္ဘာ့တကယ့်အဖြစ်အပျက်များနှင့်ဆက်စပ်ပြီး အားသစ်လောင်းပေးသည်။”
ဘုရားသခင့်နိုင်ငံတော်သည် အပြည့်အဝလှုပ်ရှားဆောင်ရွက်နေသည့် တကယ်တည်ရှိသောအစိုးရဖြစ်ကြောင်း သက်သေအထောက်အထား ဒုနှင့်ဒေးရှိပါသည်။ ယေဟောဝါသက်သေများသည် “[ဘုရားသခင့်] နိုင်ငံတော်နှင့်ယှဉ်သော ဤဝမ်းမြောက်ဖွယ်သတင်းတရားတော်ကို” သူတို့၏အိမ်နီးချင်းများအား ဝမ်းသာအားရနှင့် စိတ်ထက်သန်စွာ ဟောပြောနေကြပြီး နိုင်ငံတော်လက်အောက်ခံများဖြစ်လာကြရန် လူတကာကို ဖိတ်ခေါ်လျက်ရှိ၏။ (မဿဲ ၂၄:၁၄၊ သမ္မာ) ယင်းမျှော်လင့်ချက်သည် သင့်အတွက် နှစ်သက်စရာဖြစ်ပါသလော။ ဘုရားသခင့်နိုင်ငံတော်၏ စံနှုန်းများနှင့်အညီ ကြိုးစားအသက်ရှင်နေထိုင်ကာ အသိပညာဆည်းပူးနေကြသူတို့နှင့် ပေါင်းဖော်ခြင်းမှ ရရှိသည့် ကောင်းချီးများကို အသင်ခံစားနိုင်ပါသည်။ ထို့ထက်ကား၊ သင်သည် “ဖြောင့်မတ်ခြင်းတရားတည်နေရာ” ကတိထားရာကမ္ဘာသစ်တွင် ဘုရားသခင့်နိုင်ငံတော်အုပ်ချုပ်မှုအောက် အသက်ရှင်နေထိုင်ရသည့် မျှော်လင့်ချက် ရှိလာနိုင်ပါသည်။—၂ ပေတရု ၃:၁၃။
[အောက်ခြေမှတ်ချက်]
^ အပိုဒ်၊ 5 အသေးစိတ်အချက်အလက်ကိုသိလိုပါက၊ ယေဟောဝါသက်သေများထုတ်ဝေသည့် ထာဝရအသက်ရစေသော အသိပညာစာအုပ်ရှိ “ဘုရားသခင့်နိုင်ငံတော်အုပ်စိုးပြီ” ဟူသော အခန်း ၁၀၊ စာမျက်နှာ ၉၀-၇ ကိုရှုပါ။
[စာမျက်နှာ ၄၊ ၅ ပါ ရုပ်ပုံ]
၁၉၁၄ ခုနှစ်တွင် တိုင်းနိုင်ငံတို့သည်ကမ္ဘာစစ်ပွဲတွင် ပါဝင်လာခဲ့ကြ
[စာမျက်နှာ ၆ ပါ ရုပ်ပုံ]
စေတနာအလျောက်လုပ်ဆောင်သောကယ်ဆယ်ရေးလုပ်ငန်းသည် ခရစ်ယာန်မေတ္တာ၏ထင်ရှားသောအထောက်အထားဖြစ်
[စာမျက်နှာ ၇ ပါ ရုပ်ပုံ]
ကမ္ဘာတစ်ဝန်းမှ ယေဟောဝါသက်သေများသည် ပညာရေးအစီအစဉ် တစ်မျိုးတည်းမှ အကျိုးကျေးဇူးရရှိနေကြ