“သူစိမ်းတို့ စကားသံ” ကိုသတိပြု
“သူစိမ်းတို့ စကားသံ” ကိုသတိပြု
“သူစိမ်းတို့ စကားသံကိုကား မသိသောကြောင့် သူစိမ်းနောက်မလိုက်ဘဲ ထွက်ပြေးကြလိမ့်မည်။”—ယောဟန် ၁၀:၅၊ သမ။
၁၊ ၂။ (က) ယေရှုသည် မာရိကို နာမည်ဖြင့်ခေါ်လိုက်သောအခါ သူသည် မည်သို့တုံ့ပြန်ခဲ့သနည်း၊ ဤအဖြစ်အပျက်သည် အစောပိုင်းက ယေရှုမိန့်မြွက်ခဲ့သည့် အဘယ်စကားကို ပုံပေါ်စေသနည်း။ (ခ) အဘယ်အရာက ကျွန်ုပ်တို့ကို ယေရှုနှင့် အနီးကပ်နေစေနိုင်သနည်း။
ရှင်ပြန်ထမြောက်ပြီဖြစ်သော ယေရှုသည် ဗလာကျင်းသင်္ချိုင်းဂူအနားတွင် ရပ်နေသောအမျိုးသမီးကို သတိပြုမိသည်။ သူ့ကို ကိုယ်တော် ကောင်းစွာသိ၏။ သူသည် မာဂဒလမာရိဖြစ်၏။ လွန်ခဲ့သောနှစ်နှစ်နီးပါးက ကိုယ်တော်သည် သူ့ထံမှ နတ်ဆိုးကိုနှင်ထုတ်ပေးခဲ့ဖူးသည်။ ထိုအချိန်ကတည်းက သူသည် ကိုယ်တော်နှင့် ကိုယ်တော်၏တမန်တော်များနောက် လိုက်ပြီး နေ့စဉ်ဝေယျာဝစ္စများကို ပြုလုပ်ဆောင်ရွက်ပေးခဲ့သည်။ (လုကာ ၈:၁-၃) သို့သော် ယနေ့မူ မာရိသည် ယေရှုကွယ်လွန်ခဲ့သည်ကို မြင်တွေ့ရပြီး ယခု ကိုယ်တော်၏ရုပ်အလောင်းပင် မရှိတော့သောကြောင့် ငိုကြွေးနေ၏! ထို့ကြောင့် ယေရှုက “အချင်းမိန်းမ၊ အဘယ်ကြောင့် ငိုကြွေးသနည်း။ အဘယ်သူကိုရှာသနည်း” ဟုမေးသည်။ မာရိသည် ဥယျာဉ်စောင့်ဟုထင်မှတ်ပြီး “သင်သည် သူ့ကိုဆောင်သွားသည်မှန်လျှင် အဘယ်မှာထားသည်ကို ကျွန်မအားပြောပါ။ ကျွန်မယူသွားပါမည်အရှင်” ဟုဖြေဆို၏။ ထိုအခါ ယေရှုက “မာရိ” ဟူ၍ တရင်းတနှီးခေါ်လိုက်သံကြောင့် မာရိ ချက်ချင်းမှတ်မိသွားလေသည်။ သို့နှင့် “ရဗ္ဗုနိ” ဟုဝမ်းသာအားရ အော်ခေါ်ပြီး ကိုယ်တော့်အား ပွေ့ဖက်လေသည်။—ယောဟန် ၂၀:၁၁-၁၈။
၂ ဤမှတ်တမ်းသည် မကြာသေးမီက ယေရှုမိန့်ဆိုခဲ့ရာကို ထိထိမိမိပုံဖော်ပြသည်။ ကိုယ်တော်သည် မိမိကိုယ်ကို သိုးထိန်းအဖြစ်၊ မိမိ၏နောက်လိုက်တို့ကို သိုးများအဖြစ် ခိုင်းနှိုင်းကာ သိုးထိန်းသည် မိမိသိုးများကို နာမည်ဖြင့်ခေါ်သောအခါ ၎င်းတို့သည် သိုးထိန်း၏အသံကို သိရှိကြသည်ဟု ဆို၏။ (ယောဟန် ၁၀:၃၊ ၄၊ ၁၄၊ ၂၇၊ ၂၈) သိုးတစ်ကောင်သည် ၎င်း၏သိုးထိန်းကို မှတ်မိသကဲ့သို့ မာရိသည်လည်း သူ၏သိုးထိန်း ခရစ်တော်ကို မှတ်မိသည်။ ယနေ့ ယေရှု၏နောက်လိုက်များသည် ထိုအတိုင်းပင်ဖြစ်၏။ (ယောဟန် ၁၀:၁၆) သိုးတွင် ခွဲခြားသိမြင်နိုင်သော အကြားအာရုံရှိသောကြောင့် ၎င်း၏သိုးထိန်းနှင့်မခွဲမခွာ အနီးကပ်နေစေသကဲ့သို့ ကျွန်ုပ်တို့တွင် ဝိညာဉ်ရေး ပိုင်းခြားသိမြင်မှုရှိသောကြောင့် သိုးထိန်းကောင်းယေရှုခရစ်၏ ခြေရာအတိုင်း အနီးကပ်လိုက်လျှောက်စေသည်။—ယောဟန် ၁၃:၁၅; ၁ ယောဟန် ၂:၆; ၅:၂၀။
၃။ ယေရှု၏သိုးခြံပုံဥပမာကြောင့် စိတ်ထဲတွင်ပေါ်ပေါက်လာသည့် မေးခွန်းအချို့ကား အဘယ်နည်း။
၃ သို့သော် အဆိုပါပုံဥပမာအရ လူ့အသံများကို ကျက်မိနိုင်စွမ်းရှိသော သိုးသည် ၎င်း၏မိတ်ဆွေကိုသာမက ရန်သူကိုပါ ခွဲခြားသိမြင်နိုင်၏။ ယင်းသည် အလွန်အရေးကြီး၏၊ အကြောင်းမှာ ကျွန်ုပ်တို့တွင် စဉ်းလဲသောရန်သူများရှိသည်။ ၎င်းတို့ကား မည်သူတို့နည်း။ သူတို့ မည်သို့ပြုမူတတ်ကြသနည်း။ ကျွန်ုပ်တို့ကိုယ်ကို မည်သို့ကာကွယ်နိုင်သနည်း။ အဖြေရရန် သိုးခြံပုံဥပမာတွင် အခြားအဘယ်အရာကို ယေရှုမိန့်ဆိုသေးကြောင်း ကြည့်ကြစို့။
‘တံခါးဝမှမဝင်သူ’
၄။ သိုးထိန်းပုံဥပမာအရ သိုးတို့သည် မည်သူနောက်သို့လိုက်ပြီး မည်သူနောက်သို့ မလိုက်ဘဲနေကြသနည်း။
၄ ယေရှုက ဤသို့မိန့်ဆိုခဲ့၏– ‘သိုးထိန်းမူကား၊ တံခါးဝဖြင့်ဝင်တတ်၏။ ထိုသူအား တံခါးစောင့်လည်း ဖွင့်တတ်၏။ သူ၏စကားသံကို သိုးတို့သည် နားထောင်တတ်ကြ၏။ သူသည် မိမိသိုးတို့ကို နာမည်ဖြင့်ခေါ်၍ ပြင်သို့ထုတ်ဆောင်တတ်၏။ သိုးများကိုထုတ်သောအခါ သိုးတို့ရှေ့မှာသွား၍ သိုးများသည် သူ၏စကားသံကို ကျွမ်းသောကြောင့် လိုက်တတ်ကြ၏။ သူစိမ်းတို့ စကားသံကိုကား မသိသောကြောင့် သူစိမ်းနောက်မလိုက်ဘဲ ထွက်ပြေးကြလိမ့်မည်။’ (ယောဟန် ၁၀:၂-၅) ဤတွင် “စကားသံ” ဟူသော စကားလုံးကို ယေရှု သုံးကြိမ်အသုံးပြုထားကြောင်း သတိပြုပါ။ သိုးထိန်း၏စကားသံဟု နှစ်ကြိမ်ပြောပြီးနောက် တတိယအကြိမ်တွင် “သူစိမ်းတို့ စကားသံ” ဟုဆို၏။ အဘယ်သူစိမ်းကို ယေရှု ရည်ညွှန်းနေခြင်းဖြစ်သနည်း။
၅။ ယောဟန်ကျမ်းအခန်းကြီး ၁၀ တွင်ဖော်ပြထားသော သူစိမ်းကို အဘယ်ကြောင့် ဧည့်ဝတ်မပြုသင့်သနည်း။
၅ ယေရှုသည် ကျွန်ုပ်တို့ဧည့်ဝတ်ပြုလိုသော သူစိမ်းအကြောင်း ပြောဆိုနေခြင်းမဟုတ်ပါ၊ မူရင်းကျမ်းစာဘာသာစကားတွင် ဧည့်ဝတ်ပြုခြင်းဟူသောစကားလုံးသည် “သူစိမ်းများကိုချစ်ပါ” ဟူ၍ အဓိပ္ပာယ်ရှိ၏။ (ဟေဗြဲ ၁၃:၂) ယေရှု၏ပုံဥပမာမှသူစိမ်းသည် ဖိတ်ခေါ်ထားသော ဧည့်သည်တစ်ဦးမဟုတ်ပါ။ အကြောင်းမှာ သူသည် “သိုးခြံထဲသို့ တံခါးဝဖြင့်မဝင်၊ အခြားလမ်းဖြင့် ကျော်ဝင်” ၏။ သူသည် “သူခိုးဓားပြဖြစ်၏။” (ယောဟန် ၁၀:၁) အဘယ်သူသည် သမ္မာကျမ်းစာတွင်ဖော်ပြထားသော သူခိုးဓားပြ ဦးဆုံးဖြစ်လာသနည်း။ စာတန်ပင်ဖြစ်၏။ ဤအထောက်အထားကို ကမ္ဘာဦးကျမ်းတွင် တွေ့ရှိရသည်။
သူစိမ်း၏စကားသံကို ဦးဆုံးကြားခဲ့ရချိန်
၆၊ ၇။ စာတန်ကို သူစိမ်း၊ သူခိုးဟူ၍ အဘယ်ကြောင့် မှန်ကန်စွာခေါ်ဆိုနိုင်သနည်း။
၆ ကမ္ဘာမြေပေါ်တွင် သူစိမ်း၏စကားသံကို ပထမဆုံးအကြိမ် မည်သို့ကြားခဲ့ရကြောင်း ကမ္ဘာဦး ၃:၁-၅ ကဖော်ပြထား၏။ စာတန်သည် ပထမမိန်းမ ဧဝထံချဉ်းကပ်၍ မြွေအားဖြင့် လှည့်ဖြားခဲ့ကြောင်း ထိုမှတ်တမ်းက ဖော်ပြသည်။ ဤမှတ်တမ်းတွင် စာတန်ကို စာသားအတိုင်း “သူစိမ်း” ဟုမခေါ်ထားသည်မှာ မှန်၏။ မည်သို့ဆိုစေ၊ သူ၏လုပ်ရပ်များက ယောဟန်ကျမ်းအခန်းကြီး ၁၀ တွင်မှတ်တမ်းတင်ထားသည့် ယေရှု၏ပုံဥပမာပါ သူစိမ်းနှင့် နည်းအမျိုးမျိုးဖြင့် တူသည်။ တူညီချက်အချို့ကို သုံးသပ်ကြည့်ပါ။
၇ ထိုသူစိမ်းသည် သိုးခြံထဲရှိ သူ၏သားကောင်များထံသို့ ကွေ့ပတ်လာသည်ဟု ယေရှုဖော်ပြ၏။ ထိုနည်းတူ စာတန်သည် သူ၏သားကောင်ထံသို့ မြွေမှတစ်ဆင့် သွယ်ဝိုက်ချဉ်းကပ်လာခဲ့သည်။ ဤသို့လျှို့ဝှက်ချဉ်းကပ်မှုက စာတန်သည် အမှန်အားဖြင့် ကောက်ကျစ်သော ကျူးကျော်သူဖြစ်ကြောင်း ထင်ရှား၏။ ထို့ပြင် သိုးခြံထဲရောက်နေသော သူစိမ်းသည် ပိုင်ရှင်အစစ်၏သိုးတို့ကို လုယူရန် ကြံရွယ်သည်။ အမှန်မှာ သူ၏ရည်ရွယ်ချက်သည် ‘သတ်ဖို့၊ ဖျက်ဆီးဖို့’ ဖြစ်ရာ ဤသူခိုးထက်ပင် သာ၍ယုတ်မာ၏။ (ယောဟန် ၁၀:၁၀) ထိုနည်းတူ စာတန်သည် သူခိုးဖြစ်၏။ သူသည် ဘုရားသခင့်အပေါ် ဧဝထားရှိသည့် ကျေးဇူးသစ္စာတရားကို လှည့်စားခိုးယူခဲ့သည်။ ထို့ပြင် စာတန်သည် လူသားများကိုလည်း သေတွင်းသို့ပို့ခဲ့သည်။ ထို့ကြောင့် သူသည် လူသတ်ကောင်ဖြစ်၏။
၈။ စာတန်သည် ယေဟောဝါ၏စကားနှင့် ရည်ရွယ်ချက်များကို မည်သို့လိမ်လည်ပြောဆိုခဲ့သနည်း။
၈ ယေဟောဝါ၏စကားတော်နှင့် ရည်ရွယ်ချက်များကို စာတန်လိမ်လည်ပြောဆိုပုံတွင် သူ၏မရိုးသားမှု ထင်ရှားသည်။ သူက ဧဝအား “သင်တို့သည် ဥယျာဉ်၌ရှိသမျှသော အပင်တို့၏အသီးကို မစားရဟု ဧကန်စင်စစ် ဘုရားသခင်မိန့်တော်မူသလော” ဟုမေးခဲ့သည်။ ‘ဘုရားသခင် ဒီလောက်တောင် အဆင်အခြင်ကင်းမဲ့နိုင်ရသလား’ ဟုပြောဆိုဘိသကဲ့သို့ စာတန်သည် အံ့အားသင့်သယောင်ပြုခဲ့၏။ ထပ်ဆင့်၍ သူက “ထိုအသီးကိုစားသောနေ့၌ သင်တို့သည် မျက်စိပွင့်လင်းလျက် ကောင်းမကောင်းကိုသိ၍ ဘုရားသခင်ကဲ့သို့ဖြစ်ကြလတ္တံ့သည်ကို ဘုရားသခင်သိတော်မူသည်” ဟုဆို၏။ “ဘုရားသခင်သိတော်မူသည်” ဟူသော သူ၏စကားကို သတိပြုပါ။ ‘ဘုရားသခင်သိတာတွေ ငါလည်းသိတယ်။ သူ့ရဲ့ရည်ရွယ်ချက်တွေကို ငါသိတယ်၊ တစ်ခုမှမကောင်းဘူး’ ဟုစာတန်ဆိုလိုက်သကဲ့သို့ပင်ဖြစ်သည်။ (ကမ္ဘာဦး ၂:၁၆၊ ၁၇; ၃:၁၊ ၅) ဧဝနှင့်အာဒံတို့သည် ဤသူစိမ်း၏စကားသံကို ကြားလိုက်သည်နှင့် လှည့်ထွက်မသွားခဲ့သည်မှာ ဝမ်းနည်းစရာပင်။ ထိုသို့ပြုမည့်အစား နားယောင်ခဲ့ကြသဖြင့် သူတို့ရော၊ သူတို့၏သားစဉ်မြေးဆက်များပါ ဘေးသင့်ခဲ့ကြရသည်။—ရောမ ၅:၁၂၊ ၁၄။
၉။ ယနေ့ သူစိမ်းများ၏စကားသံကို ကြားရမည်ဟု အဘယ်ကြောင့် မျှော်လင့်သင့်သနည်း။
၉ ယနေ့ ဘုရားသခင့်လူမျိုးတော်ကို လမ်းလွဲသွားစေရန် အလားတူနည်းများ စာတန်အသုံးပြုလျက်ရှိ၏။ (ဗျာ. ၁၂:၉) သူသည် “မုသာ၏အဘ” ဖြစ်ပြီး သူ့နည်းတူ ဘုရားသခင်၏ကျေးကျွန်များကို လမ်းလွဲသွားစေရန် ကြိုးစားသူများသည် သူ၏သားသမီးများဖြစ်ကြ၏။ (ယောဟန် ၈:၄၄) ယနေ့ အဆိုပါသူစိမ်းများ၏စကားသံကို ကြားရနိုင်သည့် နည်းအချို့ကို သတိပြုကြည့်ကြစို့။
ယနေ့ သူစိမ်းတို့၏စကားသံကို ကြားနေရပုံ
၁၀။ သူစိမ်းများ၏စကားသံကို ကြားရသည့် နည်းတစ်နည်းကား အဘယ်နည်း။
၁၀ လှည့်စားသောဆင်ခြင်မှုများ။ တမန်တော်ပေါလုက “အထူးထူး အပြားပြားသော အယူဝါဒသစ်ကိုလိုက်၍ မဖောက်ပြန်ကြနှင့်” ဟုဆိုသည်။ (ဟေဗြဲ ၁၃:၉) အဘယ်အယူဝါဒမျိုးများဖြစ်သနည်း။ ၎င်းအယူဝါဒတို့သည် ‘ကျွန်ုပ်တို့ကို ဖောက်ပြန်စေ’ နိုင်သောကြောင့် ကျွန်ုပ်တို့၏ဝိညာဉ်ရေးဟန်ချက် ပျက်သွားစေနိုင်သည့် အယူဝါဒများကို ပေါလုရည်ညွှန်းနေခြင်းဖြစ်သည်မှာ ထင်ရှား၏။ ဤအယူဝါဒအသစ်အဆန်းများကို မည်သူတို့မြွက်ဆိုနေကြသနည်း။ ခရစ်ယာန်အကြီးအကဲတစ်စုကို ပေါလုဤသို့ပြောခဲ့သည်– ‘တပည့်များကို သွေးဆောင်ခြားငှာ မှားသောစကားကို ပြောတတ်သော လူတို့သည် သင်တို့အထဲ၌လည်း ပေါ်လာမည်ကိုလည်းကောင်း ငါသိ၏။’ (တမန်တော် ၂၀:၃၀) မှန်ပါသည်၊ ပေါလုခေတ်ကကဲ့သို့ပင် ယနေ့လည်း တစ်ချိန်က ခရစ်ယာန်အသင်းတော်ဝင်များ ဖြစ်ခဲ့ဖူးသူအချို့သည် ယခုအခါ “မှားသောစကား” များဖြစ်သည့် မမှန်တစ်ဝက်မှန်တစ်ဝက်စကား၊ လုံးလုံးမုသာစကားတို့ဖြင့် သိုးတို့ကို လမ်းလွဲသွားစေရန် ကြိုးစားနေကြ၏။ တမန်တော်ပေတရုဖော်ပြသည့်အတိုင်း “ချော့မော့သောစကား” ဖြစ်သည့် အစစ်နှင့်တူသော တန်ဖိုးမရှိသည့် ငွေစက္ကူအတုကဲ့သို့ အဓိပ္ပာယ်မဲ့စကားများကို သူတို့သုံးကြသည်။—၂ ပေတရု ၂:၃။
၁၁။ ၂ ပေတရု ၂:၁၊ ၃ တွင်ပါသည့် စကားများက အယူဖောက်ပြန်သူများ၏ နည်းလမ်းနှင့် ရည်ရွယ်ချက်တို့ကို မည်သို့ဖော်ပြသနည်း။
၁၁ အယူဖောက်ပြန်သူတို့သည် “ဖျက်ဆီးတတ်သောမိစ္ဆာ . . . အယူများကို ပရိယာယ်အားဖြင့်သွင်း” ကြမည်ဟု သတိပေးကာ သူတို့၏နည်းပရိယာယ်များကို ပေတရုဖော်ထုတ်ပြခဲ့၏။ (၂ ပေတရု ၂:၁၊ ၃) ယေရှု၏သိုးခြံပုံဥပမာမှ သူခိုးသည် “တံခါးဝဖြင့်မဝင် အခြားလမ်းဖြင့်ကျော်ဝင်” သကဲ့သို့ အယူဖောက်ပြန်သူများသည် ကျွန်ုပ်တို့ထံ မသိမသာချဉ်းကပ်လာတတ်ကြသည်။ (ဂလာတိ ၂:၄; ယုဒ ၄) သူတို့၏ရည်ရွယ်ချက်ကား အဘယ်နည်း။ ပေတရုက “သင်တို့ကို ကုန်သွယ်ကြလိမ့်မည်” ဟုထပ်သတိပေးသည်။ ဤအယူဖောက်ပြန်သူများသည် မည်သို့ပင်လိမ်လည်ပြောဆိုစေကာမူ ထိုသူစိမ်းများ၏ တကယ့်ရည်ရွယ်ချက်မှာ “ခိုးခြင်း၊ သတ်ခြင်း၊ ဖျက်ဆီးခြင်း” အတွက်သာဖြစ်သည်။ (ယောဟန် ၁၀:၁၀) ဤသို့သောသူစိမ်းများကို သတိထားပါလေ!
၁၂။ (က) ကျွန်ုပ်တို့၏အပေါင်းအသင်းများထံမှ သူစိမ်းများ၏စကားသံ မည်သို့ပေါ်ထွက်လာနိုင်သနည်း။ (ခ) စာတန်နှင့် သူစိမ်းများ၏နည်းဗျူဟာများသည် ယနေ့ အဘယ်ဆင်တူချက်များရှိသနည်း။
၁၂ ဘေးသင့်စေနိုင်သောအပေါင်းအသင်းများ။ သူစိမ်း၏စကားသံကို ကျွန်ုပ်တို့ပေါင်းသင်းနေသူများထံမှ ကြားရပေမည်။ ဘေးသင့်စေနိုင်သောအပေါင်းအသင်းများသည် အထူးသဖြင့် လူငယ်များကို အန္တရာယ်ပြုသည်။ (၁ ကောရိန္သု ၁၅:၃၃) စာတန်သည် ပထမလူသားမောင်နှံတွင် ငယ်ရွယ်ပြီး အတွေ့အကြုံနည်းသော ဧဝကို ပစ်မှတ်ထားခဲ့ကြောင်း သတိရပါ။ လွတ်လပ်စွာပြုမူနိုင်ခွင့်ရှိလျက်နှင့် ယေဟောဝါသည် ဧဝ၏လွတ်လပ်မှုကို မတရားချုပ်ကိုင်ထားသည်ဟု ယုံကြည်စေခဲ့သည်။ အမှန်မှာ ယေဟောဝါသည် မိမိဖန်ဆင်းထားသော လူသတ္တဝါကို ချစ်တော်မူပြီး သူတို့အကျိုးကို လိုလားတော်မူ၏။ (ဟေရှာယ ၄၈:၁၇) ယနေ့လည်း သူစိမ်းများသည် အသင်လူငယ်တို့၏မိဘများ သင်တို့၏လွတ်လပ်မှုကို မတရားချုပ်ကိုင်ထားသည်ဟု ယူမှတ်စေရန် ကြိုးစားပြောဆိုကြသည်။ ထိုသို့သောသူစိမ်းများသည် သင့်ကို မည်သို့ ထိခိုက်နိုင်သနည်း။ ခရစ်ယာန်မိန်းကလေးတစ်ဦးက ဤသို့ဝန်ခံ၏– “ကျွန်မရဲ့အတန်းဖော်တွေကြောင့် ကျွန်မရဲ့ယုံကြည်ခြင်း အတော်ကြာကြာ အားနည်းခဲ့ရတယ်။ ကျွန်မရဲ့ဘာသာတရားက မတရားချုပ်ချယ်လွန်းတယ်လို့ သူတို့အမြဲပြောတတ်ကြတယ်။” သို့တိုင် သင့်မိဘများက သင့်ကို အလွန်ချစ်သည်မှာ အမှန်ပင်။ ထို့ကြောင့် သင့်မိဘများအပေါ် သံသယရှိစေရန် အတန်းဖော်များက ကြိုးစားပြောဆိုသည့်အခါ ဧဝကဲ့သို့ လှည့်စားမခံပါနှင့်။
၁၃။ ဒါဝိဒ်သည် အဘယ်ပညာရှိလမ်းစဉ်ကို လိုက်လျှောက်ခဲ့သနည်း၊ သူ့ကို ကျွန်ုပ်တို့အတုယူနိုင်သည့် နည်းတစ်နည်းကား အဘယ်နည်း။
၁၃ ဘေးသင့်စေနိုင်သောအပေါင်းအသင်းများနှင့်စပ်လျဉ်း၍ ဆာလံဆရာဒါဝိဒ်က ဤသို့ဆိုသည်– “လျှပ်ပေါ်သောလူတို့နှင့် အတူမထိုင်ပါ။ လျှို့ဝှက်သောလူစုထဲသို့ မဝင်ပါ။” (ဆာလံ ၂၆:၄) သူစိမ်းများ၏စရိုက်ကို သင်သတိပြုမိသလော။ စာတန်သည် မြွေကိုအသုံးပြု၍ မိမိမည်သူမည်ဝါဖြစ်ကြောင်း အသိမပေးသကဲ့သို့ သူတို့သည်လည်း အဘယ်လူစားမျိုးဖြစ်ကြောင်း အသိမပေးကြချေ။ ယနေ့ အကျင့်ယိုယွင်းသူအချို့သည် အင်တာနက်ကိုအသုံးပြု၍ မိမိတို့မည်သူမည်ဝါဖြစ်ကြောင်းနှင့် သူတို့၏ရည်ရွယ်ချက်အစစ်အမှန်ကို အသိမပေးကြချေ။ ကောက်ကျစ်စဉ်းလဲသောလူကြီးများသည် စကားဝိုင်းများ (chat rooms) တွင် လူငယ်များအဖြစ် ဟန်ဆောင်၍ သင့်ကိုကျော့ဖမ်းရန် ဖြားယောင်းပေမည်။ ထို့ကြောင့် အသင်လူငယ်တို့၊ သင်တို့၏ဝိညာဉ်ရေး မထိခိုက်စေရန် ကျေးဇူးပြု၍ အထူးသတိထားကြပါလေ။—ဆာလံ ၁၁၉:၁၀၁; သု. ၂၂:၃။
၁၄။ တစ်ခါတစ်ရံ သတင်းမီဒီယာများသည် သူစိမ်းများ၏အသံကို မည်သို့ထုတ်လွှင့်ပေးသနည်း။
၁၄ မဟုတ်မမှန်စွပ်စွဲချက်များ။ သတင်းမှတ်တမ်းအချို့သည် ယေဟောဝါသက်သေများအကြောင်း ဘက်လိုက်မှုမရှိ ကြေညာပေးကြသော်လည်း တစ်ခါတစ်ရံ ဤသတင်းမီဒီယာများသည် သူစိမ်းတို့၏ ဘက်လိုက်သောအသံများကို ထုတ်လွှင့်ပေးနေတတ်ပြန်သည်။ ဥပမာ၊ နိုင်ငံတစ်နိုင်ငံတွင် သတင်းမှတ်တမ်းတစ်ပုဒ်က သက်သေခံများသည် ဒုတိယကမ္ဘာစစ်အတွင်း ဟစ်တလာအစိုးရကို ထောက်ခံအားပေးခဲ့သည်ဟု မဟုတ်မမှန်ဆို၏။ နောက်တစ်နိုင်ငံတွင် သက်သေခံများသည် ချာ့ခ်ျအဆောက်အဦများကို ဖျက်ဆီးပစ်သည်ဟု သတင်းလွှင့်၏။ နိုင်ငံအတော်များများတွင် သက်သေခံများသည် သူတို့၏ကလေးများကို ဆေးမကုသပေးကြောင်းနှင့် ယုံကြည်သူချင်းများ ကျူးလွန်သော ကြီးလေးသည့်အပြစ်များကို တမင်မသိဟန်ဆောင်နေကြောင်း သတင်းမီဒီယာမှတစ်ဆင့် စွပ်စွဲပြောဆိုခဲ့သည်။ (မဿဲ ၁၀:၂၂) သို့သော်လည်း ကျွန်ုပ်တို့ကို ပုဂ္ဂိုလ်ရေးအရသိရှိကြသော စိတ်ရင်းမှန်သူများသည် အဆိုပါစွပ်စွဲချက်များ မဟုတ်မမှန်ကြောင်း အသိအမှတ်ပြုကြ၏။
၁၅။ သတင်းမီဒီယာများမှထုတ်လွှင့်သမျှကို ယုံခြင်းသည် အဘယ်ကြောင့် ပညာမဲ့ရာရောက်သနည်း။
၁၅ ထိုသို့သောသူစိမ်းများ၏အသံက ဖွထားသည့် စွပ်စွဲချက်များနှင့် ကျွန်ုပ်တို့ရင်ဆိုင်တိုးသည့်အခါ အဘယ်သို့ပြုလုပ်သင့်သနည်း။ နယပုံပြင် ၁၄:၁၅ ပါဤဆုံးမစကားကို နှလုံးသွင်းအပ်သည်– “ဉာဏ်တိမ်သောသူသည် သူတစ်ပါးပြောသမျှကိုယုံတတ်၏။ ပညာသတိရှိသောသူမူကား မိမိသွားရာလမ်းကို စေ့စေ့ကြည့်ရှုတတ်၏။” သတင်းမီဒီယာများက ထုတ်လွှင့်သမျှကို အမှန်ချည်းဖြစ်သည်ဟု ယုံခြင်းသည် ပညာမဲ့ရာရောက်၏။ လောကသတင်းအချက်အလက်မှန်သမျှကို ကျွန်ုပ်တို့ သံသယဝင်မည်မဟုတ်သော်လည်း ‘လောကသားအပေါင်းတို့သည် စာတန်၏လက်၌ရှိကြ’ ကြောင်းကိုမူ ကျွန်ုပ်တို့အသိအမှတ်ပြုကြသည်။—၁ ယောဟန် ၅:၁၉။
‘စိတ်ဝိညာဉ်တို့ကို စုံစမ်းကြလော့’
၁၆။ (က) ယောဟန် ၁၀:၄ တွင်ပါသည့် ယေရှု၏စကားမှန်ကန်ကြောင်း ပကတိသိုးတို့၏အပြုအမူက မည်သို့ဖော်ပြသနည်း။ (ခ) သမ္မာကျမ်းစာက ကျွန်ုပ်တို့ကို အဘယ်အရာပြုလုပ်ရန် တိုက်တွန်းသနည်း။
၁၆ ကျွန်ုပ်တို့ ပေါင်းသင်းဆက်ဆံနေသူသည် မိတ်ဆွေလော၊ ရန်သူလောဟူ၍ မည်သို့သေချာစွာ သိရှိနိုင်မည်နည်း။ သိုးတို့သည် ‘သိုးထိန်း၏စကားသံကို ကျွမ်းသောကြောင့်’ သူ့နောက်လိုက်သည်ဟု ယေရှုမိန့်ဆိုခဲ့သည်။ (ယောဟန် ၁၀:၄) သိုးထိန်း၏အသွင်အပြင်ကိုသိ၍မဟုတ်ဘဲ သူ၏စကားသံကိုကျွမ်းသောကြောင့် သိုးများ လိုက်လာကြခြင်းဖြစ်သည်။ သိုးတို့သည် ၎င်းတို့၏သိုးထိန်းကို စကားသံအားဖြင့်မဟုတ်ဘဲ သူ၏အဝတ်အစားအားဖြင့် မှတ်မိကြသည်ဟု တစ်ချိန်က အလည်အပတ်သွားသူတစ်ဦး ဆိုခဲ့ဖူးကြောင်း ကျမ်းစာနယ်မြေများအကြောင်းစာအုပ်တစ်အုပ်တွင် ဖော်ပြ၏။ သိုးထိန်းတစ်ဦးကမူ သိုးတို့သည် စကားသံကို ကျက်မိသည်ဟု ဖြေဆိုသည်။ ယင်းကိုသက်သေပြရန် သူသည် ထိုသူစိမ်းနှင့် အဝတ်အစား လဲလိုက်ကြသည်။ သိုးထိန်း၏အဝတ်ကို ဝတ်ထားသော ထိုသူစိမ်းသည် သိုးများကိုခေါ်သော်လည်း သူတို့မလာကြချေ။ သူ့အသံကို မကြားဖူး၍ဖြစ်သည်။ ၎င်းနောက် အဝတ်အစားပြောင်းဝတ်ထားသည့် သိုးထိန်းသည် သိုးများကို ခေါ်လိုက်ရာ သူ့ထံသို့ ချက်ချင်း ရောက်လာကြသည်။ ထို့ကြောင့် တစ်ဦးတစ်ယောက်သည် သိုးထိန်းပုံထွက်နေသော်လည်း ထိုသူအား သိုးထိန်းအစစ်ဟု သိုးတို့က လက်ခံလိမ့်မည်မဟုတ်ပေ။ မှန်သည်၊ သိုးတို့သည် ခေါ်သူ၏အသံကို သိုးထိန်း၏အသံနှင့် နှိုင်းယှဉ်၍ ခွဲခြားသိရှိနိုင်သည်။ သမ္မာကျမ်းစာကလည်း ထိုနည်းတူပြုရန် ဤသို့တိုက်တွန်း၏– “စိတ်ဝိညာဉ်တို့သည် ဘုရားသခင်နှင့်စပ်ဆိုင်သည်၊ မစပ်ဆိုင်သည်ကို စုံစမ်းကြလော့။” (၁ ယောဟန် ၄:၁; ၂ တိမောသေ ၁:၁၃) အဘယ်အရာက ကျွန်ုပ်တို့ကို ထိုသို့ပြုလုပ်စေနိုင်သနည်း။
၁၇။ (က) ယေဟောဝါ၏စကားသံကို မည်သို့အကျွမ်းဝင်လာနိုင်သနည်း။ (ခ) ယေဟောဝါနှင့်အကျွမ်းတဝင်ရှိခြင်းက ကျွန်ုပ်တို့အား အဘယ်အရာပြုလုပ်စေနိုင်သနည်း။
၁၇ ယေဟောဝါ၏စကားသံ သို့မဟုတ် သတင်းတရားကို ကျွန်ုပ်တို့ ပို၍အကျွမ်းဝင်လာလေ သူစိမ်း၏စကားသံကို ပို၍သတိပြုမိလာနိုင်သည်မှာ အံ့ဩစရာမဟုတ်ပေ။ ဤအသိပညာနှင့် မည်သို့အကျွမ်းဝင်လာနိုင်ပုံကို သမ္မာကျမ်းစာက ဤသို့ဖော်ပြသည်– “‘ဤမည်သောလမ်းသည်မှန်၏။ ဤလမ်း၌သွားလော့’ ဟု သင့်နောက်၌ ပြောသောစကားသံကို ကိုယ်နားနှင့်ကြားရလိမ့်မည်။” (ဟေရှာယ ၃၀:၂၁) ကျွန်ုပ်တို့နောက်၌ ကြားရသော “စကားသံ” သည် သမ္မာကျမ်းစာမှဖြစ်၏။ သမ္မာကျမ်းစာကို ကျွန်ုပ်တို့ဖတ်တိုင်း ကျွန်ုပ်တို့၏မဟာသိုးထိန်းရှင် ယေဟောဝါ၏စကားသံကို ကြားရဘိသကဲ့သို့ဖြစ်သည်။ (ဆာလံ ၂၃:၁) သို့ဖြစ်၍ သမ္မာကျမ်းစာကို များများဖတ်လေ၊ ဘုရားသခင်၏စကားသံနှင့် ပိုမိုအကျွမ်းဝင်လာလေဖြစ်၏။ ထိုသို့အကျွမ်းတဝင်သိရှိလာခြင်းကြောင့် သူစိမ်းများ၏စကားသံကို ချက်ချင်းသိရှိနိုင်ခြင်းဖြစ်သည်။—ဂလာတိ ၁:၈။
၁၈။ (က) ယေဟောဝါ၏စကားသံကို အကျွမ်းတဝင်ရှိခြင်းတွင် အဘယ်အရာ ပါဝင်သနည်း။ (ခ) မဿဲ ၁၇:၅ အရ၊ ယေရှု၏စကားသံကို ကျွန်ုပ်တို့ အဘယ်ကြောင့် နားထောင်သင့်သနည်း။
၁၈ ယေဟောဝါ၏စကားသံကို ကျက်မိခြင်းတွင် အခြားအဘယ်အရာပါဝင်သနည်း။ ၎င်းကိုကြားသည့်အပြင် လိုက်နာခြင်းလည်းပါဝင်၏။ ဟေရှာယ ၃၀:၂၁ ကို တစ်ဖန် ဂရုစိုက်ဖတ်ပါ။ ဘုရားသခင်၏စကားတော်က “ဤမည်သောလမ်းသည် မှန်၏” ဟုကြေညာသည်။ မှန်ပါသည်၊ သမ္မာကျမ်းစာကို လေ့လာခြင်းအားဖြင့် ယေဟောဝါ၏လမ်းညွှန်ချက်များကို ကျွန်ုပ်တို့ ကြားသိရ၏။ တစ်ဖန် ကိုယ်တော်က “ဤလမ်း၌သွားလော့” ဟုမိန့်ဆိုသည်။ ယေဟောဝါသည် ကျွန်ုပ်တို့ကြားရသည့်အတိုင်း ကျင့်သုံးစေလို၏။ သို့ဖြစ်၍ ကျွန်ုပ်တို့သိရှိရာကို ကျင့်သုံးခြင်းအားဖြင့် ကျွန်ုပ်တို့သည် ယေဟောဝါ၏စကားသံကို ကြားနာရုံသက်သက်မဟုတ်ဘဲ လိုက်နာကျင့်သုံးနေကြောင်း ဖော်ပြကြသည်။ (တရားဟောရာ ၂၈:၁) ယေဟောဝါ၏စကားသံကို လိုက်နာခြင်းသည် ယေရှု၏စကားသံကို လိုက်နာခြင်းဖြစ်၏၊ အကြောင်းမှာ ယေဟောဝါကိုယ်တော်တိုင်က ထိုသို့နားထောင်ရန် မိန့်မှာတော်မူခဲ့သည်။ (မဿဲ ၁၇:၅) သိုးထိန်းကောင်း ယေရှုသည် ကျွန်ုပ်တို့ကို အဘယ်အရာပြုလုပ်ရန် မိန့်ဆိုသနည်း။ တပည့်ဖြစ်စေကြရန်နှင့် ‘သစ္စာနှင့်သတိပညာရှိကျေးကျွန်’ ကိုယုံကြည်ကိုးစားကြရန် ကိုယ်တော်သွန်သင်တော်မူ၏။ (မဿဲ ၂၄:၄၅; ၂၈:၁၈-၂၀) ကိုယ်တော်၏စကားသံကို လိုက်နာခြင်းသည် ကျွန်ုပ်တို့ကို ထာဝရအသက်ရရှိစေသည်။—တမန်တော် ၃:၂၃။
‘သူတို့ထွက်ပြေးသွားကြလိမ့်မည်’
၁၉။ ကျွန်ုပ်တို့သည် သူစိမ်းတို့၏စကားသံကို မည်သို့တုံ့ပြန်သင့်သနည်း။
၁၉ သို့ဖြစ်၍ ကျွန်ုပ်တို့သည် သူစိမ်းတို့၏စကားသံကို မည်သို့တုံ့ပြန်သင့်သနည်း။ သိုးများနည်းတူ တုံ့ပြန်သင့်သည်။ ယေရှုက “သူစိမ်းနောက် [“အလျှင်း၊” ကဘ] မလိုက်ဘဲ ထွက်ပြေးကြလိမ့်မည်” ဟုဆိုသည်။ (ယောဟန် ၁၀:၅၊ သမ) ကျွန်ုပ်တို့ နည်းနှစ်နည်းဖြင့် တုံ့ပြန်ရမည်။ ဦးဆုံး၊ “သူစိမ်းနောက် အလျှင်းမလိုက်” ကြရပါ။ မှန်သည်၊ ကျွန်ုပ်တို့သည် သူစိမ်းကို လုံးဝငြင်းပယ်ကြသည်။ ဂရိကျမ်းစာစကားတွင် “အလျှင်း” ဟူသော စကားလုံးသည် ထိုဘာသာစကားဖြင့် ခိုင်မာပြတ်သားစွာ ငြင်းပယ်မှုကို ဖော်ပြခြင်းဖြစ်၏။ (မဿဲ ၂၄:၃၅; ဟေဗြဲ ၁၃:၅) ဒုတိယအနေနှင့်၊ ကျွန်ုပ်တို့သည် ‘သူ့ထံမှထွက်ပြေးကြမည်’ သို့မဟုတ် သူ့ထံမှ လှည့်ထွက်သွားမည်။ ထိုသို့ပြုခြင်းသည် သိုးထိန်းကောင်း၏စကားသံနှင့်မညီသည့် သွန်သင်ချက်များကို သင်ပေးသူများအား တုံ့ပြန်ရမည့်နည်းလမ်းမှန်ဖြစ်သည်။
၂၀။ ကျွန်ုပ်တို့သည် (က) စဉ်းလဲသောအယူဖောက်ပြန်သူများနှင့်၊ (ခ) ဘေးသင့်စေသောအပေါင်းအဖော်များနှင့်၊ (ဂ) ဘက်လိုက်သော သတင်းမီဒီယာများနှင့် ပက်ပင်းတိုးသည့်အခါ မည်သို့တုံ့ပြန်မည်နည်း။
၂၀ ထို့ကြောင့် အယူဖောက်ပြန်သောသွန်သင်ချက်များကို ထုတ်လွှင့်သူများနှင့် ပက်ပင်းတိုးသည့်အခါ ဤသို့သမ္မာကျမ်းစာဆိုသည့်အတိုင်း ကျွန်ုပ်တို့ပြုလုပ်လိုကြသည်– “သင်တို့ခံရပြီးသော ဆုံးမ[စကား]နှင့် ဆန့်ကျင်ဘက်ဖြစ်သော သင်းခွဲခြင်း၊ မှားယွင်းခြင်းအကြောင်းကိုပြုတတ်သော သူတို့ကိုမှတ်၍ ရှောင်ကြလော့။” (ရောမ ၁၆:၁၇; တိတု ၃:၁၀) ထိုနည်းတူစွာ၊ ဘေးသင့်စေမည့်အပေါင်းအဖော်များ၏ အန္တရာယ်ကိုရင်ဆိုင်နေရသော ခရစ်ယာန်လူငယ်များသည် လူငယ်တိမောသေအား ပေါလုဆုံးမခဲ့သော ဤစကားကို လိုက်လျှောက်လိုကြသည်– “လူပျိုတို့၏တပ်မက်ခြင်း ကိလေသာစိတ်ကို ကြဉ်ရှောင်လော့။” သတင်းမီဒီယာမှတစ်ဆင့် ထုတ်လွှင့်သော မတရားစွပ်စွဲချက်များနှင့် ပက်ပင်းတိုးသည့်အခါ တိမောသေကို ပေါလုက ဤသို့ထပ်ဆင့်အကြံပြုခဲ့ကြောင်း သတိရလိုကြမည်– ‘[သူစိမ်းတို့၏စကားသံကို နားထောင်သူများသည်] ဒဏ္ဍာရီစကားကိုနားထောင်၍ လွဲသွားကြလိမ့်မည်။ သင်မူကား၊ အရာရာ၌ ကောင်းသောသတိ မပြတ်ရှိစေလော့။’ (၂ တိမောသေ ၂:၂၂; ၄:၃-၅) သူစိမ်းတို့၏စကားသံသည် မည်မျှပင်နှစ်လိုဖွယ်ကောင်းပုံရှိပါစေ၊ ကျွန်ုပ်တို့၏ယုံကြည်ခြင်းကို ထိခိုက်စေနိုင်သည့် အရာခပ်သိမ်းမှ ထွက်ပြေးကြသည်။—ဆာလံ ၂၆:၅; သု. ၇:၅၊ ၂၁; ဗျာ. ၁၈:၂၊ ၄။
၂၁။ သူစိမ်းတို့၏စကားသံကို ငြင်းပယ်သူများသည် အဘယ်ဆုကျေးဇူးကို စောင့်မျှော်နိုင်သနည်း။
၂၁ ဝိညာဉ်တော်ဖွားခရစ်ယာန်များသည် သူစိမ်းတို့၏စကားသံကို ငြင်းပယ်ခြင်းအားဖြင့် လုကာ ၁၂:၃၂ တွင်ပါသည့် သိုးထိန်းကောင်း၏စကားကို လက်ခံနာယူကြသည်။ ထိုတွင် ယေရှု ဤသို့မိန့်ဆိုသည်– “သိုးစုငယ်၊ သင်တို့သည် မကြောက်ကြနှင့်။ သင်တို့အဘသည် သင်တို့အား နိုင်ငံကိုပေးခြင်းငှာ အလိုရှိတော်မူ၏။” ထိုနည်းတူ၊ “အခြားသိုးတို့” သည်ယေရှု၏ဤစကားကို ကြားနာရရန် စိတ်အားထက်သန်စွာ စောင့်မျှော်နေကြသည်– “ငါ့ခမည်းတော်ထံ ကောင်းချီးမင်္ဂလာကိုခံသောသူတို့၊ ကမ္ဘာဦးကပင် သင်တို့အဖို့ ပြင်ဆင်သောနိုင်ငံကို လာ၍အမွေခံကြလော့။” (ယောဟန် ၁၀:၁၆; မဿဲ ၂၅:၃၄) “သူစိမ်းတို့စကားသံ” ကို ကျွန်ုပ်တို့ ငြင်းပယ်ကြမည်ဆိုလျှင် အမှန်ပင်ကြည်နူးစရာ ဆုကျေးဇူးကို စောင့်မျှော်နိုင်သတည်း!
သင်မှတ်မိသလော
• ယေရှု၏သိုးခြံပုံဥပမာတွင် ဖော်ပြထားသည့် သူစိမ်း၏ သဏ္ဌာန်သည် စာတန်နှင့် မည်သို့ကိုက်ညီသနည်း။
• ယနေ့ သူစိမ်းတို့၏စကားသံကို မည်သို့ကြားရသနည်း။
• သူစိမ်းတို့၏စကားသံကို ကျွန်ုပ်တို့ မည်သို့သိရှိနိုင်သနည်း။
• သူစိမ်းတို့၏စကားသံကို ကျွန်ုပ်တို့ မည်သို့ တုံ့ပြန်သင့် သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
မာရိသည် ခရစ်တော်ကို မှတ်မိခဲ့
[စာမျက်နှာ ၁၆ ပါ ရုပ်ပုံ]
သူစိမ်းသည် သိုးများထံ တန်းတန်းမတ်မတ် မချဉ်းကပ်
[စာမျက်နှာ ၁၈ ပါ ရုပ်ပုံ]
ကျွန်ုပ်တို့သည် သူစိမ်းတို့၏စကားသံကို မည်သို့တုံ့ပြန်သနည်း