“ပင်လယ်စည်းစိမ်”
ယေဟောဝါ၏ဖန်ဆင်းခြင်းလက်ရာ ခံ့ညားထည်ဝါမှု
“ပင်လယ်စည်းစိမ်”
နေဝင်ဆည်းဆာအချိန်တွင် လေပြည်လေညင်းက ပင်လယ်ရေမျက်နှာပြင်ကိုမွှ့ေလိုက်ရာ ကမ်းစပ်သို့ ရေလှိုင်းများ အသာအယာရိုက်ခတ်လေသည်။ စိတ်ချမ်းမြေ့စရာ လှိုင်းပုတ်သံသည် အေးအေးဆေးဆေး၊ အနားယူရန် ကမ်းခြေသို့ အုပ်စုလိုက်လာကြသူများအတွက် အကြီးအကျယ်ဆွဲဆောင်မှုဖြစ်သည်။ *
ကမ္ဘာတစ်ဝန်းရှိ မိုင်ပေါင်းထောင်နှင့်ချီ၍ရှည်သော ကမ်းရိုးတန်းများတွင် ထိုသို့သောကမ်းခြေများရှိသည်။ သဲပြင်နှင့် ရေကိုပိုင်းခြားပေးသော အစဉ်ပြောင်းလဲနေသည့် ဤနယ်သတ်မျဉ်းသည် ပင်လယ်ပိုင်နက်ကို နယ်နိမိတ်သတ်မှတ်ပေးသည်။ ဖန်ဆင်းရှင်က ထိုသို့ပုံစံပြုထားခြင်းဖြစ်၏။ ဘုရားသခင်ကိုယ်တော်တိုင် “သမုဒ္ဒရာ . . . နယ်နိမိတ်အဖြစ် သဲပြင်ကို သတ်မှတ်” ထားကြောင်း မိန့်တော်မူခဲ့၏။ “လှိုင်းတံပိုးခတ်သော်လည်း မနိုင်။ ဟုန်းသံပြုသော်လည်း မကျော်ရ” ဟုထပ်ဆင့်၍ ကိုယ်တော်မိန့်တော်မူ၏။—ယေရမိ ၅:၂၂၊ သမ; ယောဘ ၃၈:၈; ဆာလံ ၃၃:၇။
ကျွန်ုပ်တို့၏ကမ္ဘာဂြိုဟ်သည် နေအဖွဲ့အစည်းရှိ အခြားမည်သည့်ဂြိုဟ်နှင့်မျှမတူဘဲ အမှန်ပင် ရေပေါကြွယ်သောဂြိုဟ်တစ်လုံးဖြစ်သည်။ ကမ္ဘာမြေကြီး၏ ၇၀ ရာခိုင်နှုန်းကျော်ကို ရေဖုံးလွှမ်းထား၏။ လူတို့နေထိုင်ဖို့ ကမ္ဘာမြေကြီးကို ပြင်ဆင်သောအခါ ယေဟောဝါက “မိုးကောင်းကင်အောက်၌ရှိသောရေ တစ်နေရာ၌စုဝေးစေ၊ ကုန်းပေါ်စေ” ဟုစီရင်ပြဋ္ဌာန်းခဲ့သည်။ သို့နှင့် “အမိန့်တော်ရှိသည်အတိုင်း ဖြစ်လေ၏။” မှတ်တမ်းက “ကုန်းကို မြေဟူသောအမည်ဖြင့်လည်းကောင်း၊ ရေစုဝေးရာကို ပင်လယ်ဟူသောအမည်ဖြင့်လည်းကောင်း ဘုရားသခင်ခေါ်ဝေါ်သမုတ်တော်မူ၍ ထိုအမှုအရာကောင်းသည်ကို ဘုရားသခင်မြင်တော်မူ၏” ဟုဆက်ဆိုသည်။ (ကမ္ဘာဦး ၁:၉၊ ၁၀၊ သမ္မာ) အဏ္ဏဝါပင်လယ်တည်ရှိခြင်းက အဘယ်အကျိုးပြုသနည်း။
ပင်လယ်သမုဒ္ဒရာရေသည် သက်ရှိများကို ထောက်ပံ့ရန် ထူးခြားသောနည်းများစွာဖြင့် ပုံစံပြုထားခံရသည်။ ဥပမာ၊ ရေသည် အပူထိန်းနိုင်စွမ်းရှိ၏။ ထို့ကြောင့် သမုဒ္ဒရာတို့သည် အပူသိုလှောင်ကန်ကြီးအဖြစ် ဆောင်းရာသီတွင် အအေးမလွန်စေရန် ထိန်းပေးသည်။
ရေတွင် အသက်ကိုထောက်ပံ့ပေးနိုင်သောစွမ်းအင် နောက်တစ်မျိုးရှိသည်။ အခြားမည်သည့်အရည်ထက်မဆို အရာဝတ္ထုများကို အလွယ်တကူ အရည်ပျော်စေနိုင်သည်။ ဓာတုဓာတ်ပြုမှုများကြောင့် အသက်ဖြစ်စဉ် တည်ရှိနိုင်သည်ဖြစ်ရာ ဓာတ်ပြုတတ်သောဒြပ်ဝတ္ထုများကို အရည်ပျော်စေပြီး ၎င်းတို့၏မော်လီကျူးများကို ဓာတ်ပေါင်းဖြစ်စေဖို့ ရေလိုအပ်သည်။ သက်ရှိတစ်ရှူးများ၌ တွေ့ ရှိရသော ဓာတုဒြပ်ပေါင်းများစွာတွင် ရေပါရှိသည်။ အဏ္ဏဝါပင်လယ်ဟူသောစာအုပ်က ဤသို့ဆို၏– “သက်ရှိဟူသ၍၊ ကုန်းမြေပေါ်ရှိအပင်များနှင့် တိရစ္ဆာန်များပင်လျှင် အဆုံး၌ သမုဒ္ဒရာများမှ အရင်းတည်လာရမည့် ရေကို လိုအပ်ကြသည်။”
ကမ္ဘာ့လေထုကိုသန့်စင်ရာ၌လည်း ကမ္ဘာ့ပင်လယ်သမုဒ္ဒရာများသည် အရေးပါသောအခန်းကဏ္ဍမှ ပါဝင်သည်။ သမုဒ္ဒရာများရှိ မျောလှေးပိုးမွှားတို့သည် ကာဗွန်ဒိုင်အောက်ဆိုဒ်ကိုစုပ်ယူပြီး အောက်ဆီဂျင်ကို ထုတ်လွှတ်ပေးသည်။ သုတေသီတစ်ဦးအရ “နှစ်စဉ်နှစ်တိုင်း ကမ္ဘာ့လေထုရှိ အရန်အောက်ဆီဂျင် ၇၀ ရာခိုင်နှုန်းမှာ ပင်လယ်ထဲရှိ မျောလှေးများထံမှဖြစ်သည်။”
ထို့အပြင် ပင်လယ်သမုဒ္ဒရာတို့သည် အနာရောဂါကုသဖို့ သဘာဝဆေးဖက်ဝင်ပစ္စည်းများ ထုတ်လုပ်ပေးနိုင်သည်။ ငါးအဆီကို ဆေးဝါးအဖြစ် အသုံးပြုခဲ့သည်မှာ ရာစုနှစ်များစွာရှိပြီ။ ငါးကြီးဆီကို လူတို့အသုံးပြုခဲ့သည်မှာ ကြာပေပြီ။ မကြာသေးမီက ပန်းနာရင်ကြပ်ရောဂါကုသရန်၊ ဗိုင်းရပ်စ်ပိုးများနှင့် ကင်ဆာရောဂါကို ကာကွယ်တားဆီးရန် ငါးနှင့် အခြားပင်လယ်သတ္တဝါများမှရသော ဓာတုပစ္စည်းများကို အသုံးပြုခဲ့ကြသည်။
သမုဒ္ဒရာထွက်ပစ္စည်းများနှင့် ဝန်ဆောင်မှုများ၏ အကျိုးကျေးဇူးများကို ခန့်မှန်းကြည့်ဖို့ ကြိုးပမ်းခဲ့ကြပြီ။ အတိအကျကောက်ချက်မချနိုင်သေးသော်လည်း ကမ္ဘာချီဂေဟစနစ်ဝန်ဆောင်မှုများ၏ အကျိုးကျေးဇူး သုံးပုံနှစ်ပုံခန့်ကို သမုဒ္ဒရာများမှရရှိသည်ဟု သုတေသီများခန့်မှန်းခဲ့ကြသည်။ အဏ္ဏဝါပင်လယ်ကို ဖန်ဆင်းခဲ့သည့်ရည်ရွယ်ချက်ရှိကြောင်း၊ သက်ရှိများလိုအပ်ရာကို ဖြည့်ဆည်း၊ ထောက်ပံ့ပေးဖို့ဖြစ်ကြောင်းကို ယင်းက အတည်ပြုသည်။ ယင်းသည် “ပင်လယ်စည်းစိမ်” ဟု သမ္မာကျမ်းစာခေါ်ဆိုရာနှင့် အမှန်တကယ်ကိုက်ညီပါသည်!—တရားဟောရာ ၃၃:၁၉။
ယေဟောဝါသည် ဤစည်းစိမ်ဘဏ္ဍာ၏ မဟာပုံစံပြုရှင်နှင့် ဖန်ဆင်းရှင်အဖြစ် ဂုဏ်တင်ခံရပါသည်။ အောက်ပါစကားများဖြင့် ကိုယ်တော်အား ချီးမွမ်းရန် နေဟမိစေ့ဆော်ခံခဲ့ရ၏– ‘ကိုယ်တော်သာလျှင် ယေဟောဝါဖြစ်တော်မူ၏။ အမြင့်ဆုံးသောကောင်းကင် . . . ကိုလည်းကောင်း၊ ပင်လယ်နှင့် ပင်လယ်၌ပါသမျှတို့ကိုလည်းကောင်း ဖန်ဆင်းတော်မူ၏။ အလုံးစုံတို့ကို စောင့်မတော်မူ၏။’—နေဟမိ ၉:၆။
[အောက်ခြေမှတ်ချက်]
^ အပိုဒ်၊ 3 ယေဟောဝါသက်သေများ၏ ၂၀၀၄ ပြက္ခဒိန် စက်တင်ဘာ/အောက်တိုဘာကိုရှု။
[စာမျက်နှာ ၉ ပါ လေးထောင့်ကွက်/ ရုပ်ပုံ]
ရေ၊ လေနှင့် လှိုင်းများ
ရေနှင့် လေကြောင့် လှိုင်းလုံးကြီးများဖြစ်ပေါ်လာပြီး အမေရိကန်ပြည်ထောင်စု၊ ကယ်လီဖိုးနီးယားပြည်နယ်ရှိ ဤကဲ့သို့သော ကျောက်ကမ်းပါးယံများကို တဝုန်းဝုန်း ရိုက်ခတ်လေသည်။ ရေလှိုင်းလုံးကြီးများသည် ထိတ်လန့်စရာအင်အားကို ထင်ရှားပြရာ ပင်လယ်သမုဒ္ဒရာ၏ အံ့ဖွယ်သဏ္ဌာန်တစ်ခု အစဉ်ဖြစ်ခဲ့ပြီ။ ၎င်းတို့သည် ဖန်ဆင်းရှင်၏တန်ခိုးကြီးမားမှုကို အံ့ဖွယ်နည်းဖြင့် သတိပေးလျက်ရှိသည်။ ယေဟောဝါသည် “သမုဒ္ဒရာလှိုင်းတံပိုးကို နင်း” တော်မူသောအရှင်ဖြစ်၏။ ကိုယ်တော်၏ “တန်ခိုးတော်အားဖြင့် သမုဒ္ဒရာကိုဆုံးမတော်မူ၏။ ပညာတော်အားဖြင့် သူ၏မာနကိုချိုးဖျက်တော်မူ၏။” (ယောဘ ၉:၈; ၂၆:၁၂) အမှန်မှာ ‘ရေများဟုန်းသံနှင့်တကွ သမုဒ္ဒရာလှိုင်းတံပိုးတို့သည် အားကြီးသည်ထက် ယေဟောဝါသည် မြင့်သောအရပ်၌ သာ၍တန်ခိုးကြီးတော်မူ၏။’—ဆာလံ ၉၃:၄။
သဲပန်းပုလက်ရာများ
အခါအားလျော်စွာ ပင်လယ်ကမ်းခြေသည် ဤတွင်မြင်တွေ့ရသော တောင်အာဖရိက၊ နမီးဘီးယားကမ်းရိုးတန်းရှိ သဲခုံများကဲ့သို့သော သဲပန်းပုလက်ရာကြီးများကို ဖြစ်ပေါ်စေလေ့ရှိသည်။ သဲပြင်ကို ပုံစံမျိုးစုံ ပုံဖော်ပေးရာတွင် လေသည် အခရာပင်။ သဲသောင်ခုံအချို့မှာ သဲခင်တန်းလေးများမျှသာ ဖြစ်ပုံရသော်လည်း အခြားသဲသောင်ခုံများမူ အမြင့်ပေ ၁,၃၀၀ ရှိသည်။ ၎င်းသဲပမာဏကြီးမားများပြားမှုက “သမုဒ္ဒရာသဲလုံးကဲ့သို့” ဟူသော ကျမ်းစာအသုံးအနှုန်းကို နားလည်စေ၏။ မရေမတွက်နိုင်သော၊ တိုင်းတာရခက်သောအရာကို ရည်ညွှန်း၍ အသုံးပြုထားသောစကားဖြစ်သည်။ (ကမ္ဘာဦး ၂၂:၁၇) လှိုင်းလေထန်သော ပင်လယ်၏ ကျူးကျော်မှုကို တားဆီးပေးသော၊ ပညာသားပါသည့် ဤလှိုင်းကာသဲတန်းကို ပုံစံပြုသောသခင်၊ ဖန်ဆင်းရှင်ရှေ့မှောက် ကျွန်ုပ်တို့ အံ့သြမိန်းမောကြရပေသည်။
[စာမျက်နှာ ၉ ပါ ရုပ်ပုံ]
နေဝင်ဆည်းဆာကမ်းရိုးတန်း၊ ဘီယာဖရာပင်လယ်ကွေ့၊ ကဲန်မရွန်း