“ဘုရားသခင်ပြင်ဆင်တော်မူသော လက်နက်စုံကို ဝတ်ဆောင်ကြလော့”
“ဘုရားသခင်ပြင်ဆင်တော်မူသော လက်နက်စုံကို ဝတ်ဆောင်ကြလော့”
‘စာတန်၏ပရိယာယ်တို့ကို ဆီးတားနိုင်မည်အကြောင်း ဘုရားသခင်ပြင်ဆင်တော်မူသော လက်နက်စုံကို ဝတ်ဆောင်ကြလော့။’—ဧဖက် ၆:၁၁။
၁၊ ၂။ ခရစ်ယာန်များ ဝတ်ဆင်ထားဖို့လိုသည့် ဝိညာဉ်ရေးချပ်ဝတ်တန်ဆာကို ကိုယ်ပိုင်စကားဖြင့် ဖော်ပြပါ။
စီ.အီး. ပထမရာစုအတွင်းတွင် ရောမ၏တန်ခိုးအာဏာ အထွတ်အထိပ်ရောက်ရှိခဲ့သည်။ ရောမစစ်အင်အားကြောင့် ထိုစဉ်က လူအများသိ ကမ္ဘာ့ဒေသများစွာကို သိမ်းပိုက်နိုင်ခဲ့၏။ သမိုင်းပညာရှင်တစ်ဦးက ဤစစ်တပ်ကို “သမိုင်းတွင် အအောင်မြင်အကျော်ကြားဆုံး စစ်အဖွဲ့အစည်း” ဟုဖော်ပြခဲ့သည်။ ရောမ၏အဆင့်မြင့်စစ်တပ်ကို စည်းစနစ်ဖြင့် ပြင်းပြင်းထန်ထန်လေ့ကျင့်ထားသော စစ်သားများနှင့် ဖွဲ့စည်းထား၏၊ သို့သော် သူတို့၏အောင်မြင်မှုသည် ထက်မြက်သောစစ်အင်အားအပြင် သူတို့၏ချပ်ဝတ်တန်ဆာအပေါ်လည်း မူတည်၏။ တမန်တော်ပေါလုသည် ရောမစစ်သားတစ်ဦး၏ ချပ်ဝတ်တန်ဆာကိုအသုံးပြု၍ စာတန်အား အောင်မြင်စွာတွန်းလှန်နိုင်ရန် ခရစ်ယာန်များ ဝတ်ဆင်ထားဖို့လိုသည့် ဝိညာဉ်ရေးချပ်ဝတ်တန်ဆာကို ပုံဖော်ပြခဲ့သည်။
၂ ဧဖက် ၆:၁၄-၁၇ တွင် ဤဝိညာဉ်ရေးချပ်ဝတ်တန်ဆာအကြောင်း ဖော်ပြထားသည်။ ပေါလု ဤသို့ရေးသားခဲ့သည်– ‘အမှန်တရားတည်းဟူသော ခါးပန်းကိုစည်းလျက်၊ ဖြောင့်မတ်ခြင်းတည်းဟူသော ရင်အုပ်တန်ဆာကိုဝတ်ဆင်လျက်၊ ငြိမ်သက်ခြင်းနှင့်ယှဉ်သော ဧဝံဂေလိတရားကို ဟောပြောအံ့သောငှာ ပြင်ဆင်သောအဖြစ်တည်းဟူသော ဖိနပ်ကိုစီးလျက် ခံရပ်ကြလော့။ စာတန်ပစ်ခတ်သော မီးစက်လက်နက်ကို ကာသတ်နိုင်သော ယုံကြည်ခြင်းတည်းဟူသော ဒိုင်းလွှားကြီးကိုလည်း ခပ်သိမ်းသောလက်နက်တို့အပေါ်မှာ ထပ်ဆင့်၍ ယူဆောင်ကြလော့။ ကယ်တင်ခြင်းတည်းဟူသော သံခမောက်လုံးကိုလည်းကောင်း၊ ဘုရားသခင်၏နှုတ်ထွက်တည်းဟူသော ဝိညာဉ်တော်၏ဓားကိုလည်းကောင်း ယူကြလော့။’ လူ့ရှုထောင့်မှကြည့်လျှင် ပေါလုဖော်ပြခဲ့သည့် ချပ်ဝတ်တန်ဆာသည် ရောမစစ်သားတစ်ဦးကို အတော်အတန်ကာကွယ်မှုရရှိစေသည်။ တစ်ဦးချင်းထိုးသတ်ပွဲတွင် အဓိကအသုံးပြုသောလက်နက်မှာ ဓားဖြစ်သည်။
၃။ ယေရှုခရစ်၏ အမိန့်တော်များကို အဘယ်ကြောင့်နာခံပြီး ကိုယ်တော်၏ပုံနမူနာကို လိုက်လျှောက်သင့်သနည်း။
၃ ရောမစစ်တပ်၏အောင်မြင်မှုသည် ချပ်ဝတ်တန်ဆာနှင့် လေ့ကျင့်ခြင်းအပြင် စစ်အမိန့်ကို နာခံခြင်းအပေါ်လည်း မူတည်၏။ ထိုနည်းတူ၊ ခရစ်ယာန်များသည် “လူမျိုးခြားတို့အဖို့ စီရင်အုပ်စိုးသောအရှင်” ဟုသမ္မာကျမ်းစာက ဖော်ပြသည့် ယေရှုခရစ်၏အမိန့်ကို နာခံကြရမည်။ (ဟေရှာယ ၅၅:၄၊ သမ္မာ) ကိုယ်တော်သည် “အသင်းတော်၏အပေါ်မှာ ခေါင်း” လည်းဖြစ်တော်မူ၏။ (ဧဖက် ၅:၂၃) ယေရှုသည် ဝိညာဉ်ရေးတိုက်ပွဲတွင် ကျွန်ုပ်တို့ကို ညွှန်ကြားပြီး ဝိညာဉ်ရေးချပ်ဝတ်တန်ဆာ ဝတ်ဆင်ပုံနှင့်ပတ်သက်၍ ပုံသက်သေကောင်း ပြတော်မူ၏။ (၁ ပေတရု ၂:၂၁) ခရစ်တော်တင်ပြခဲ့သော အရည်အသွေးသည် ဝိညာဉ်ရေးလက်နက်စုံနှင့် ဆင်တူချက် များစွာရှိရာ ခရစ်တော်၏စိတ်သဘောထားကို “လက်နက်ပြု၍ သုံးစွဲကြ” ရန်သမ္မာကျမ်းစာက အကြံပြု၏။ (၁ ပေတရု ၄:၁) သို့ဖြစ်၍ ကျွန်ုပ်တို့၏ဝိညာဉ်ရေးချပ်ဝတ်တန်ဆာမှ လက်နက်တစ်ခုချင်းစီကို ဆန်းစစ်ကြစဉ် ၎င်းတို့၏အရေးပါမှုနှင့် အစွမ်းထက်မြက်မှုကို ဖော်ပြရန် ယေရှု၏ပုံသက်သေကို အသုံးပြုသွားကြမည်။
ခါး၊ ရင်အုပ်နှင့် ခြေထောက်တို့ကို ကာကွယ်ခြင်း
၄။ စစ်သား၏ချပ်ဝတ်တန်ဆာတွင် ခါးပန်းသည် မည်မျှအရေးပါသနည်း၊ ယင်းက အဘယ်အရာကို ဖော်ပြသနည်း။
၄ အမှန်တရားတည်းဟူသော ခါးပန်းကိုစည်းလျက်။ ကျမ်းစာခေတ်က စစ်သားများသည် နှစ်လက်မမှ ခြောက်လက်မအပြားရှိ သားရေခါးပတ်ကြီးကို ပတ်ထားရသည်။ “ခါးပတ်အဖြစ် သင်၏ခါးတွင် အမှန်တရားကို တင်းကျပ်စွာ စည်းထားလော့” ဟူ၍ ဤအခန်းငယ်ကို ဖတ်သင့်သည်ဟု ဘာသာပြန်သူအချို့က အကြံပြုကြသည်။ စစ်သား၏ခါးပတ်သည် သူ၏ခါးကို အကာအကွယ်ဖြစ်စေပြီး ဓားချိတ်ရန် အဆင်ပြေမည်ဖြစ်သည်။ စစ်သားတစ်ဦးသည် ခါးပတ်စည်းလိုက်သည့်အခါ စစ်တိုက်ရန် အသင့်အနေအထားသို့ ရောက်ရှိသွား၏။ ကျမ်းစာအမှန်တရားသည် ကျွန်ုပ်တို့အသက်တာတွင် မည်မျှတိုင် လွှမ်းမိုးသင့်ကြောင်း ပုံဖော်ပြရန် စစ်သား၏ခါးပတ်ကို ပေါလုအသုံးပြုခဲ့သည်။ အမှန်တရားနှင့်အညီ ပြုမူနေထိုင်ကြပြီး အချိန်အခါမရွေး ယင်းကိုခုခံကာကွယ်ပေးနိုင်ရန် ပုံဆောင်သဘောအရ ခါးပန်းကို တင်းကျပ်စွာ ကျွန်ုပ်တို့စည်းထားသင့်သည်။ (ဆာလံ ၄၃:၃; ၁ ပေတရု ၃:၁၅) ထိုသို့ဖြစ်စေရန် သမ္မာကျမ်းစာကို ဝီရိယရှိရှိ လေ့လာပြီး ထိုတွင်ပါသောအကြောင်းအရာများကို တွေးတောဆင်ခြင်ဖို့လို၏။ ယေရှုသည် ဘုရားသခင်၏တရားတော်ကို “နှလုံးထဲ” သွင်းထား၏။ (ဆာလံ ၄၀:၈) ကိုယ်တော်သည် အတိုက်အခံပြုသူများ၏ မေးမြန်းမှုကို ကျမ်းချက်များဖြင့် အလွတ်ကိုးကား ဖြေဆိုနိုင်ခဲ့သည်။—မဿဲ ၁၉:၃-၆; ၂၂:၂၃-၃၂။
၅။ ဆွဲဆောင်မှု သို့မဟုတ် စမ်းသပ်မှုခံရချိန်တွင် သမ္မာကျမ်းစာ၏အကြံပြုချက်သည် ကျွန်ုပ်တို့ကို မည်သို့ကူညီပေးနိုင်ကြောင်း ရှင်းပြပါ။
၅ ကျမ်းစာအမှန်တရား၏လမ်းညွှန်မှုကို ကျွန်ုပ်တို့ခံယူသည့်အခါ မှားယွင်းသောဆင်ခြင်မှုများမှ အကာအကွယ်ရပြီး ပညာရှိဆုံးဖြတ်ချက်များကို ချစေ၏။ ဆွဲဆောင်မှု သို့မဟုတ် စမ်းသပ်မှုခံရချိန်တွင် သမ္မာကျမ်းစာ၏လမ်းညွှန်မှုများက မှန်ရာကိုပြုလုပ်ဖို့ ကျွန်ုပ်တို့၏သန္နိဋ္ဌာန်ကို ခိုင်မာစေ၏။ သို့မှသာ ကျွန်ုပ်တို့၏မဟာသွန်သင်ရှင် ယေဟောဝါကို တွေ့မြင်ရဘိသကဲ့သို့၊ ကျွန်ုပ်တို့၏နောက်မှ “ဤမည်သောလမ်းသည် မှန်၏။ ဤလမ်း၌သွားလော့” ဟုကြားနေရဘိသကဲ့သို့ ဖြစ်ပေလိမ့်မည်။—ဟေရှာယ ၃၀:၂၀၊ ၂၁။
၆။ ကျွန်ုပ်တို့၏ပုံဆောင်နှလုံးကို အဘယ်ကြောင့် ကာကွယ်ပေးဖို့လိုသနည်း၊ ဖြောင့်မတ်ခြင်းက နှလုံးကို မည်သို့ထိရောက်စွာ ကာကွယ်ပေးနိုင်သနည်း။
၆ ဖြောင့်မတ်ခြင်းတည်းဟူသော ရင်အုပ်တန်ဆာ။ စစ်သား၏ရင်အုပ်တန်ဆာသည် အဓိကအင်္ဂါရပ်ဖြစ်သည့် နှလုံးကို ကာကွယ်ပေး၏။ ကျွန်ုပ်တို့၏ပုံဆောင်နှလုံးဖြစ်သော အတွင်းလူသည် ဆိုးညစ်သည့်ဘက်သို့ ယိမ်းယိုင်တတ်သောကြောင့် ယင်းကို အထူးကာကွယ်ပေးဖို့လို၏။ (ကမ္ဘာဦး ၈:၂၁) သို့ဖြစ်၍ ကျွန်ုပ်တို့သည် ယေဟောဝါ၏ဖြောင့်မတ်သောစံနှုန်းများကို သိရှိ၊ နှစ်သက်လာကြရမည်။ (ဆာလံ ၁၁၉:၉၇၊ ၁၀၅) ဖြောင့်မတ်ခြင်းကို ကျွန်ုပ်တို့နှစ်သက်မြတ်နိုးလျှင် ယေဟောဝါ၏ရှင်းလင်းပြတ်သားသော လမ်းညွှန်ချက်များကို ဥပေက္ခာပြုစေသည့်၊ ပေါ့ပျက်ပျက်ယူမှတ်စေသည့် လောကအတွေးအခေါ်ကို ငြင်းပယ်ရာရောက်၏။ ထို့ပြင် ကျွန်ုပ်တို့သည် ကောင်းမှုကို နှစ်သက်ပြီး မကောင်းမှုကို မုန်းသည့်အခါ ကျွန်ုပ်တို့၏ဘဝကို ပျက်စီးစေနိုင်သည့် လမ်းစဉ်ကို ရှောင်ကြဉ်ကြသည်။ (ဆာလံ ၁၁၉:၉၉-၁၀၁; အာမုတ် ၅:၁၅) ယင်းနှင့်ပတ်သက်၍ ယေရှုသည် စံနမူနာကောင်းဖြစ်ပြီး ကိုယ်တော့်အကြောင်း သမ္မာကျမ်းစာက ဤသို့ဆို၏– “ကိုယ်တော်သည် ဖြောင့်မတ်ခြင်းတရားကို နှစ်သက်၍ မတရားသောအမှုကို မုန်းတော်မူ၏။”—ဟေဗြဲ ၁:၉။ *
၇။ ရောမစစ်သားတစ်ဦးသည် တာရှည်ခိုင်ခံ့သည့်ဖိနပ် အဘယ်ကြောင့်ဝတ်ထားဖို့လိုသနည်း၊ ယင်းက အဘယ်အရာကို ပုံဖော်သနည်း။
၇ ငြိမ်သက်ခြင်းနှင့်ယှဉ်သော ဧဝံဂေလိတရားကို ဟောပြောအံ့သောငှာ ပြင်ဆင်သောအဖြစ်တည်းဟူသော ဖိနပ်။ ရောမစစ်သားများသည် စစ်ဆင်ရေးတွင် ပေါင် ၆၀ ခန့်လေးသော လက်နက်စုံကို ဝတ်ဆင် သယ်ဆောင်ရပြီး နေ့စဉ်မိုင် ၂၀ ချီတက်ရလေ့ရှိသောကြောင့် တာရှည်ခံရှူးဖိနပ်များ သို့မဟုတ် ခိုင်ခံ့သည့်ကြိုးသိုင်းဖိနပ်များ စီးထားကြရ၏။ ပေါလုသည် ဘုရားသခင့်နိုင်ငံတော်သတင်းတရား နားထောင်လိုသူတိုင်းအား ဟောပြောရန် ကျွန်ုပ်တို့ အသင့်ရှိမှုကိုဖော်ပြဖို့ ဖိနပ်နှင့် လျောက်ပတ်စွာ နှိုင်းယှဉ်ပြခဲ့သည်။ ယင်းသည် အရေးကြီး၏၊ အကြောင်းမှာ ကျွန်ုပ်တို့သည် အသင့်မရှိ၊ တလိုတလားမဟောပြောလိုလျှင် ယေဟောဝါကို လူတို့ မည်သို့သိရှိလာနိုင်မည်နည်း။—ရောမ ၁၀:၁၃-၁၅။
၈။ သတင်းကောင်းဟောပြောသူတစ်ဦးအနေနှင့် ယေရှု၏ပုံနမူနာကို ကျွန်ုပ်တို့ မည်သို့တုပနိုင်သနည်း။
၈ ယေရှု၏အသက်တာတွင် အရေးကြီးဆုံးလုပ်ငန်းကား အဘယ်နည်း။ ကိုယ်တော်က ‘အမှန်တရားဘက်၌ သက်သေခံခြင်းငှာ ဤလောကသို့ကြွလာပြီ’ ဟုပုန္တိပိလတ်မင်းအား မိန့်တော်မူခဲ့သည်။ ယေရှုသည် နားထောင်လိုသူကိုတွေ့တိုင်း ဟောပြောခဲ့သည်၊ ခရစ်ယာန်ဓမ္မအမှုတွင် အလွန်ပျော်မွေ့ပြီး ကိုယ်တော်၏ကာယရေးလိုအပ်ရာများထက် ယင်းကို ရှေးဦးထားခဲ့သည်။ (ယောဟန် ၄:၅-၃၄; ၁၈:၃၇) ကျွန်ုပ်တို့သည်လည်း ယေရှုကဲ့သို့ သတင်းကောင်းကို စိတ်အားထက်သန်စွာ ဟောပြောလိုကြမည်ဆိုလျှင် သူတစ်ပါးကို ဟောပြောရန် အခွင့်အရေးများစွာ ရှာတွေ့ပါလိမ့်မည်။ ထို့ပြင် ခရစ်ယာန်ဓမ္မအမှုတွင် ကျွန်ုပ်တို့အပြည့်အဝပါဝင်ခြင်းဖြင့် ဝိညာဉ်ရေးတွင် အမြဲသန်မာနေပါလိမ့်မည်။—တမန်တော် ၁၈:၅။
ဒိုင်းလွှား၊ သံခမောက်နှင့် ဓား
၉။ ဒိုင်းလွှားကြီးသည် ရောမစစ်သားတစ်ဦးကို မည်သို့ကာကွယ်ပေးသနည်း။
၉ ယုံကြည်ခြင်းတည်းဟူသော ဒိုင်းလွှားကြီး။ “ဒိုင်းလွှားကြီး” ဟုပြန်ဆိုထားသော ဂရိစကားလုံးသည် ကိုယ်ခန္ဓာတစ်ခုလုံးနီးပါးကို ကာပေးနိုင်သည့် အတော်အတန်ကြီးမားသော ဒိုင်းလွှားကို ရည်ညွှန်း၏။ ထိုဒိုင်းလွှားမျိုးသည် ဧဖက် ၆:၁၆ တွင်ဖော်ပြထားသော “မီးစက်လက်နက်” များကို ကာသတ်ပေးနိုင်မည်ဖြစ်သည်။ ကျမ်းစာခေတ်က စစ်သားများသည် အခေါင်းပွကျူရိုးများဖြင့် ပြုလုပ်ထားသော မြားတိုများကို အသုံးပြုကြသည်၊ ယင်းမြားတိုများတွင် မီးရှို့ထားသော ရေနံကတ္တရာစေး ထည့်ပစ်နိုင်သည့် သံခွက်လေးများ ပါသည်။ ဤမြားများသည် “ရှေးခေတ်တိုက်ပွဲများတွင် အန္တရာယ်အရှိဆုံး လက်နက်များအနက် တစ်ခု” ဖြစ်သည်ဟု ကျမ်းပညာရှင်တစ်ဦးက ဖော်ပြ၏။ အကယ်၍ စစ်သားတစ်ဦးသည် ဤသို့သောလက်နက်များကို ကာသတ်ရန် ဒိုင်းလွှားကြီးတစ်ခုမရှိလျှင် အကြီးအကျယ်ဒဏ်ရာရနိုင်ရုံမက သေပင်သေနိုင်၏။
၁၀၊ ၁၁။ (က) စာတန်၏ အဘယ် “မီးစက်လက်နက်” များသည် ကျွန်ုပ်တို့၏ယုံကြည်ခြင်းကို အားနည်းသွားစေနိုင်သနည်း။ (ခ) စမ်းသပ်မှုခံရချိန်အတွင်း ယုံကြည်ခြင်း၏အရေးပါမှုကို ယေရှု၏ပုံနမူနာက မည်သို့ဖော်ပြသနည်း။
၁၀ ကျွန်ုပ်တို့၏ယုံကြည်ခြင်း အားနည်းသွားစေရန် အဘယ် “မီးစက်လက်နက်” များကို စာတန်အသုံးပြုသနည်း။ သူသည် မိသားစုတွင်၊ အလုပ်ခွင်တွင်၊ ကျောင်းတွင် ညှဉ်းပန်းနှိပ်စက်မှု သို့မဟုတ် အတိုက်အခံပြုမှုများကို ဖြစ်ပေါ်စေနိုင်သည်။ အချို့သူများသည် ပစ္စည်းဥစ္စာများကို အတောမသတ်နိုင်အောင် ပိုင်ဆိုင်လိုစိတ်နှင့် အကျင့်ယိုယွင်းမှုတို့ကြောင့် ဝိညာဉ်ရေး ပျက်စီးခဲ့ကြပြီ။ ထိုသို့သောအခြေအနေမျိုးများမှ မိမိကိုယ်ကို ကာကွယ်ပေးရန် ‘ယုံကြည်ခြင်းတည်းဟူသော ဒိုင်းလွှားကြီးကို ခပ်သိမ်းသောလက်နက်တို့အပေါ်မှာ ထပ်ဆင့်၍ ယူဆောင်ကြရမည်။’ ယုံကြည်ခြင်း ဖြစ်ပေါ်လာရန် ယေဟောဝါအကြောင်း လေ့လာရမည်၊ ဆုတောင်းခြင်းအားဖြင့် ကိုယ်တော်နှင့် မှန်မှန်ဆက်သွယ်ရမည်၊ ကျွန်ုပ်တို့ကို ကိုယ်တော် မည်သို့ကာကွယ်ပေးပြီး ကောင်းချီးပေးတော်မူကြောင်း ပိုင်းခြားသိမြင်ရမည်။—ယောရှု ၂၃:၁၄; လုကာ ၁၇:၅; ရောမ ၁၀:၁၇။
၁၁ ကမ္ဘာမြေပေါ် ယေရှုရှိစဉ်က ခဲယဉ်းကျပ်တည်းချိန်အတွင်း ခိုင်ခံ့သောယုံကြည်ခြင်းရှိခြင်း၏ အရေးပါမှုကို ဖော်ပြခဲ့သည်။ ကိုယ်တော်သည် ခမည်းတော်၏ဆုံးဖြတ်ချက်များကို အကြွင်းမဲ့ယုံကြည်ကိုးစားကာ ဘုရားသခင်၏အလိုတော် ထမ်းဆောင်ခြင်းကို အားရနှစ်သက်ခဲ့၏။ (မဿဲ ၂၆:၄၂၊ ၅၃၊ ၅၄; ယောဟန် ၆:၃၈) ဂေသရှေမန်ဥယျာဉ်တွင် ပြင်းစွာသောဝေဒနာကို ယေရှုခံစားနေရစဉ်ပင် ခမည်းတော်အား “အကျွန်ုပ်အလိုရှိသည်အတိုင်း မဖြစ်ပါစေနှင့်။ ကိုယ်တော်အလိုရှိသည်အတိုင်း ဖြစ်ပါစေသော” ဟုလျှောက်ဆိုခဲ့သည်။ (မဿဲ ၂၆:၃၉) သမာဓိဆက်ထိန်းထားပြီး ခမည်းတော်၏စိတ်တော်ကို ရွှင်လန်းစေခြင်း၏အရေးကြီးမှုကို ကိုယ်တော် တစ်ခါမျှမျက်ခြည်မပြတ်ခဲ့ချေ။ (သု. ၂၇:၁၁) ကျွန်ုပ်တို့သည်လည်း ထိုနည်းတူ ယေဟောဝါအား ယုံကြည်စိတ်ချမည်ဆိုလျှင် အပြစ်တင်ဝေဖန်မှု၊ အတိုက်အခံပြုမှုတို့ကြောင့် ကျွန်ုပ်တို့၏ယုံကြည်ခြင်းကို အားနည်းစေခွင့်ပြုမည်မဟုတ်ပေ။ ၎င်းအစား၊ ဘုရားသခင်ကို မှီခိုအားထားမည်၊ ကိုယ်တော့်ကို ချစ်ကြောင်းဖော်ပြမည်၊ ကိုယ်တော်၏အမိန့်တော်များကို အစဉ်နာခံသွားမည်ဆိုလျှင် ကျွန်ုပ်တို့၏ယုံကြည်ခြင်းသည် ခိုင်ခံ့လာပါလိမ့်မည်။ (ဆာလံ ၁၉:၇-၁၁; ၁ ယောဟန် ၅:၃) ပစ္စည်းဥစ္စာတိုးများလာခြင်း၊ တဒင်္ဂမျှ ကာမဂုဏ်ခံစားခြင်းတို့သည် ယေဟောဝါအား ချစ်မြတ်နိုးသူများ ရရှိမည့် ကောင်းချီးများနှင့် နှိုင်းယှဉ်၍မရနိုင်ချေ။—သု. ၁၀:၂၂။
၁၂။ ပုံဆောင်သံခမောက်သည် ကျွန်ုပ်တို့၏အဘယ်အရေးကြီးသောအပိုင်းကို ကာကွယ်ပေးသနည်း၊ ဤသို့သောအကာအကွယ်သည် အဘယ်ကြောင့် အရေးပါသနည်း။
၁၂ ကယ်တင်ခြင်းတည်းဟူသော သံခမောက်။ သံခမောက်သည် စစ်သား၏ဦးခေါင်းနှင့် စိတ်စွမ်းအားတည်ရှိရာ ဦးနှောက်ကို ကာကွယ်ပေး၏။ သံခမောက်သည် ကျွန်ုပ်တို့၏စိတ်စွမ်းအားကို ကာကွယ်ပေးသောကြောင့် ကျွန်ုပ်တို့၏ခရစ်ယာန်မျှော်လင့်ချက်နှင့် တူသည်။ (၁ သက်သာလောနိတ် ၅:၈) တိကျမှန်ကန်သော ကျမ်းစာအသိပညာဖြင့် ကျွန်ုပ်တို့ကိုယ်ကို ပြုပြင်ပြောင်းလဲခဲ့သော်လည်း ကျွန်ုပ်တို့သည် အားနည်းသော မစုံလင်သူများ ဖြစ်နေကြဆဲပင်။ ကျွန်ုပ်တို့၏စိတ်သည် အလွယ်တကူ ယိုယွင်းသွားနိုင်၏။ ဤအစီအစဉ်စနစ်၏ပန်းတိုင်များသည် ကျွန်ုပ်တို့ကို စိတ်ပျံ့လွင့်စေပြီး ဘုရားသခင်ပေးမျှော်လင့်ချက်ကိုပင် ပျောက်လွင့်သွားစေနိုင်သည်။ (ရောမ ၇:၁၈; ၁၂:၂) “ဤလောက၌ရှိသမျှသော တိုင်းနိုင်ငံတို့ကိုလည်းကောင်း၊ ထိုတိုင်းနိုင်ငံတို့၏ ဘုန်းစည်းစိမ်ကိုလည်းကောင်း” ယေရှုအား ပြညွှန်၍ ၎င်းတို့ကိုပေးမည်ဟု ကမ်းလှမ်းခြင်းအားဖြင့် ကိုယ်တော်၏အာရုံ ပျံ့လွင့်သွားစေရန် စာတန်၏ကြိုးစားမှုသည် အချည်းနှီးပင်ဖြစ်ခဲ့ရ၏။ (မဿဲ ၄:၈) သို့သော် ထိုကမ်းလှမ်းမှုကို ယေရှုလုံးလုံးငြင်းပယ်ခဲ့သည်၊ ကိုယ်တော်နှင့်ပတ်သက်၍ ပေါလုက ဤသို့ဆိုသည်– “ထိုသခင်သည် မိမိရှေ့၌ထားသော ဝမ်းမြောက်ခြင်းအကြောင်းကြောင့် ရှက်ကြောက်သောအရာကိုမမှတ်ဘဲ လက်ဝါးကပ်တိုင်၌ခံပြီးမှ ဘုရားသခင်၏ပလ္လင်တော် လက်ယာဘက်၌ ထိုင်နေတော်မူ၏။”—ဟေဗြဲ ၁၂:၂။
၁၃။ ရှေ့တွင်ရှိ မျှော်လင့်ခြင်း၌ ကျွန်ုပ်တို့၏ယုံကြည်စိတ်ချမှုကို မည်သို့ထိန်းထားနိုင်သနည်း။
၁၃ ယေရှုတွင်ရှိခဲ့သည့် ယုံကြည်စိတ်ချမှုသည် အလိုအလျောက်ဖြစ်ပေါ်လာသည်မဟုတ်။ ရှေ့တွင်ရှိသည့်မျှော်လင့်ချက်ကို အာရုံမစိုက်ဘဲ ကျွန်ုပ်တို့စိတ်တွင် ဤလောက၏စိတ်ကူးများနှင့် ပန်းတိုင်များသာရှိနေမည်ဆိုလျှင် ဘုရားသခင်၏ကတိတော်များကို ကျွန်ုပ်တို့ယုံကြည်စိတ်ချမှု လျော့နည်းသွားပေလိမ့်မည်။ အတန်ကြာလျှင် ကျွန်ုပ်တို့၏မျှော်လင့်ချက် လုံးဝပင် ပျောက်ကွယ်သွားနိုင်၏။ အခြားတစ်ဖက်တွင်မူ၊ ဘုရားသခင်၏ကတိတော်များကို မှန်မှန်တွေးတောဆင်ခြင်မည်ဆိုပါက ကျွန်ုပ်တို့ရှေ့တွင်ချထားသည့် မျှော်လင့်ခြင်း၌ ဆက်၍ဝမ်းမြောက်ရွှင်လန်းနေကြပေလိမ့်မည်။—ရောမ ၁၂:၁၂။
၁၄၊ ၁၅။ (က) ကျွန်ုပ်တို့၏ပုံဆောင်ဓားကား အဘယ်နည်း၊ ယင်းကို မည်သို့အသုံးပြုနိုင်သနည်း။ (ခ) သွေးဆောင်မှုကို ဝိညာဉ်တော်ဓားဖြင့် မည်သို့တွန်းလှန်နိုင်ကြောင်း ဥပမာပေးပါ။
၁၄ ဝိညာဉ်တော်၏ဓား။ သမ္မာကျမ်းစာတွင် မှတ်တမ်းတင်ထားသော ဘုရားသခင်၏စကားတော် သို့မဟုတ် သတင်းတရားသည် ဘာသာရေးမှောက်မှားမှုကို ဖယ်ရှားပေးနိုင်ပြီး စိတ်နှလုံးရိုးဖြောင့်သူများအား ဝိညာဉ်ရေးလွတ်လပ်မှု ရှိစေနိုင်သည့် အစွမ်းထက်သော အသွားနှစ်ဖက်ရှိဓားနှင့် တူသည်။ (ယောဟန် ၈:၃၂; ဟေဗြဲ ၄:၁၂) ဤဝိညာဉ်တော်ဓားသည် ကျွန်ုပ်တို့၏ယုံကြည်ခြင်း ပျက်စီးသွားစေရန် အယူဖောက်ပြန်သူများ၏ ဆွဲဆောင်မှုခံရသည့်အခါ ကျွန်ုပ်တို့ကို ကာကွယ်ပေးနိုင်၏။ (၂ ကောရိန္သု ၁၀:၄၊ ၅) ‘ကျမ်းစာရှိသမျှသည် ဘုရားသခင်မှုတ်သွင်းတော်မူပြီး ကောင်းသောအမှုအမျိုးမျိုးတို့ကို ပြုစု’ စေသည့်အတွက် တကယ်ကို ကျေးဇူးတင်စရာပင်!—၂ တိမောသေ ၃:၁၆၊ ၁၇။
၁၅ ယေရှုသည် တော၌ စာတန်၏သွေးဆောင်မှုကိုခံခဲ့ရစဉ် မဟုတ်မမှန်သောဆင်ခြင်မှုနှင့် စဉ်းလဲသောသွေးဆောင်မှုများကို ဆီးတားရန် ဝိညာဉ်တော်ဓားကို ထိရောက်စွာအသုံးပြုခဲ့သည်။ ကိုယ်တော်သည် စာတန်၏သွေးဆောင်မှုတစ်ခုစီကို “ကျမ်းစာလာသည်ကား” ဟူ၍ ပြောဆိုချေပခဲ့သည်။ (မဿဲ ၄:၁-၁၁) ထိုနည်းတူ စပိန်နိုင်ငံမှ ယေဟောဝါသက်သေတစ်ဦးဖြစ်သူ ဒေးဗစ်သည် သွေးဆောင်မှုကို ကျော်လွှားရန် သမ္မာကျမ်းစာက သူ့ကို ကူညီပေးကြောင်း တွေ့ရှိရ၏။ သူ့အသက် ၁၉ နှစ်အရွယ်၌ သန့်ရှင်းရေးလုပ်ငန်းတစ်ခုတွင် အတူတူအလုပ်လုပ်သော မိန်းမချောလေးတစ်ဦးက “ဒို့နှစ်ယောက် သွားပျော်ပါးကြရအောင်” ဟုဆိုခဲ့သည်။ သူ၏မြှူဆွယ်မှုများကို ဒေးဗစ်ငြင်းပယ်ခဲ့သည်၊ ထိုအခြေအနေမျိုး ပြန်မပေါ်စေဖို့ နောက်တစ်နေရာသို့ ပြောင်းရွှေ့ပေးပါရန် သူ၏အလုပ်ရှင်ကို မေတ္တာရပ်ခံခဲ့သည်။ ဒေးဗစ်က “ယောသပ်ရဲ့ပုံသက်သေကို ကျွန်တော် သတိရတယ်။ သူဟာ အကျင့်ယိုယွင်းမှုကို ငြင်းပယ်ပြီး အဲ့ဒီနေရာကနေ ချက်ချင်းထွက်ပြေးခဲ့တယ်။ ကျွန်တော်လည်း အဲ့ဒီအတိုင်း ပြုလုပ်ခဲ့တယ်။”—ကမ္ဘာဦး ၃၉:၁၀-၁၂။
၁၆။ ကျွန်ုပ်တို့သည် “သမ္မာတရားကို မှန်ကန်စွာပိုင်းခြားတတ်” ရန် အဘယ်ကြောင့် လေ့ကျင့်မှုလိုကြောင်း ရှင်းပြပါ။
၁၆ စာတန်၏ချုပ်ကိုင်မှုအောက်မှ အခြားသူများ လွတ်မြောက်သွားစေရန် ဝိညာဉ်တော်ဓားကို ယေရှုအသုံးပြုခဲ့သည်။ ယေရှုက ‘ငါဟောသောတရားတော်သည် ငါ၏တရားတော်မဟုတ်။ ငါ့ကိုစေလွှတ်တော်မူသောသူ၏ တရားတော်ဖြစ်၏’ ဟုမိန့်ဆိုခဲ့သည်။ (ယောဟန် ၇:၁၆) ယေရှု၏ထိရောက်သောသွန်သင်ခြင်းကို ကျွန်ုပ်တို့ တုပရန် လေ့ကျင့်မှုလိုသည်။ ရောမစစ်သားများနှင့်ပတ်သက်၍ ဂျူးသမိုင်းပညာရှင် ဂျိုစီဖတ်စ်က ဤသို့ရေးသားခဲ့၏– “စစ်သားတိုင်းသည် တိုက်ပွဲဝင်နေချိန်ကဲ့သို့ပင် အကြီးအကျယ်ဝီရိယစိုက်ထုတ်၍ နေ့စဉ် လေ့ကျင့်ရသည်၊ ယင်းကြောင့် သူတို့သည် စစ်၏ပင်ပန်းမောဟိုက်ခြင်းဒဏ်ကို အခက်အခဲမရှိ ခံရပ်နိုင်ကြခြင်းဖြစ်သည်။” ကျွန်ုပ်တို့၏ဝိညာဉ်ရေးတိုက်ပွဲတွင် သမ္မာကျမ်းစာကို အသုံးပြုဖို့လိုသည်။ ထို့ပြင် ကျွန်ုပ်တို့သည် “ဝန်ခံတော်မူသောသူ၊ ရှက်ကြောက်စရာအကြောင်းမရှိဘဲ၊ သမ္မာတရားကို မှန်ကန်စွာပိုင်းခြားတတ်သော ဆရာသမားဖြစ်လျက် ဘုရားသခင့်ရှေ့၌ ကိုယ်ကိုကိုယ်ဆက်သခြင်းငှာ ကြိုးစားအားထုတ်” ကြရမည်။ (၂ တိမောသေ ၂:၁၅) စိတ်ဝင်စားသူတစ်ဦး၏ စိတ်ရင်းမှန်ဖြင့်မေးသောမေးခွန်းကို ကျမ်းစာအသုံးပြုပြီး ဖြေဆိုပေးသည့်အခါ တကယ့်ကို ကျေနပ်မှုခံစားရ၏!
ကာလအစဉ် ဆုတောင်းကြလော့
၁၇၊ ၁၈။ (က) စာတန်ကိုတွန်းလှန်ရန် ဆုတောင်းခြင်းသည် မည်မျှအရေးပါသနည်း။ (ခ) ဆုတောင်းခြင်း တန်ဖိုးကို ဖော်ပြရန် ဥပမာတစ်ခုပေးပါ။
၁၇ ဝိညာဉ်ရေးလက်နက်စုံအကြောင်း သုံးသပ်ပြီးနောက် နောက်ထပ်အရေးကြီးသောအကြံပြုချက်တစ်ခုကို ပေါလုထပ်ဆင့်တင်ပြသည်။ ခရစ်ယာန်များသည် စာတန်ကို တွန်းလှန်ရာတွင် “ဆုတောင်းခြင်းနှင့် တိုးလျှိုးအသနားခံခြင်းအမျိုးမျိုး” ပြုလုပ်သင့်သည်။ အကြိမ်ပေါင်းမည်မျှ ဆုတောင်းသင့်သနည်း။ “ကာလအစဉ် စိတ်နှလုံးပါလျက် . . . ဆုတောင်းကြလော့” ဟူ၍ ပေါလုရေးသားခဲ့သည်။ (ဧဖက် ၆:၁၈) သွေးဆောင်မှုများ၊ စမ်းသပ်မှုများ၊ သို့မဟုတ် စိတ်ပျက်အားလျော့မှုတို့ကို ကျွန်ုပ်တို့ ရင်ဆိုင်ရသည့်အခါ ဆုတောင်းခြင်းသည် ကျွန်ုပ်တို့ကို အတိုင်းထက်အလွန် ခိုင်မာလာစေနိုင်သည်။ (မဿဲ ၂၆:၄၁) ယေရှုသည် “သေခြင်းမှကယ်လွှတ်နိုင်တော်မူသောသူကို ကြီးစွာသောကြွေးကြော်ခြင်း၊ မျက်ရည်ကျခြင်းနှင့် [“တိုးလျှိုးအသနားခံ၊” ကဘ] ဆုတောင်း . . . သဖြင့် ကြောက်ရွံ့ရာအမှု၌ ချမ်းသာရ” ခဲ့သည်။—ဟေဗြဲ ၅:၇။
၁၈ နာတာရှည်ရောဂါသည် ခင်ပွန်းကို ၁၅ နှစ်ကျော် ပြုစုပေးခဲ့သည့် မီလာဂရို့စ်သည် ဤသို့ပြောပြ၏– “ကျွန်မ စိတ်ဓာတ်ကျတဲ့အခါ ယေဟောဝါဆီ ဆုတောင်းပြီး ချဉ်းကပ်တယ်။ ကိုယ်တော်လောက် ကျွန်မကို ဘယ်သူမှ မကူညီပေးနိုင်ဘူး။ ခံနိုင်ရည်မရှိတော့ဘူးလို့ ကျွန်မခံစားရတဲ့အချိန်တွေလည်း မနည်းဘူး။ ဒါပေမဲ့ ယေဟောဝါကို ဆုတောင်းပြီးတာနဲ့ တဖြည်းဖြည်း ခွန်အားပြန်ရလာပြီး စိတ်အားတက်ကြွခဲ့တယ်။”
၁၉၊ ၂၀။ စာတန်နှင့် ကျွန်ုပ်တို့တိုက်ပွဲဆင်နွှဲကြရာတွင် အနိုင်ရရန် အဘယ်အရာလိုအပ်သနည်း။
၁၉ စာတန်သည် သူ၏ကာလ တစ်ခဏသာရှိသည်ကို သိထားရာ ကျွန်ုပ်တို့ကို နှိပ်ကွပ်ရန် မီးကုန်ယမ်းကုန် ကြိုးစားလျက်ရှိ၏။ (ဗျာ. ၁၂:၁၂၊ ၁၇) ကျွန်ုပ်တို့သည် တန်ခိုးရှိသော ဤရန်သူကို ခုခံပြီး “ယုံကြည်ခြင်းနှင့်ဆိုင်၍ ကောင်းစွာသောတိုက်လှန်ခြင်းကိုပြု” ရကြမည်။ (၁ တိမောသေ ၆:၁၂) သို့ပြုရန် သာမန်ထက်ထူးကဲသော ခွန်အားရှိဖို့လိုသည်။ (၂ ကောရိန္သု ၄:၇) ဘုရားသခင်၏သန့်ရှင်းသောဝိညာဉ်တော် အကူအညီကိုလည်း ကျွန်ုပ်တို့ လိုအပ်သောကြောင့် ၎င်းအတွက် ဆုတောင်းသင့်သည်။ ယေရှုက ဤသို့မိန့်ဆိုခဲ့သည်– “သင်တို့သည် အဆိုးဖြစ်လျက်ပင် ကိုယ်သားတို့အား ကောင်းသောအရာကိုပေးတတ်လျှင် ထိုမျှမက ကောင်းကင်ဘုံ၌ရှိတော်မူသော သင်တို့အဘသည် ဆုတောင်းသောသူတို့အား သန့်ရှင်းသောဝိညာဉ်တော်ကို သာ၍ပေးတော်မူမည်မဟုတ်လော။”—လုကာ ၁၁:၁၃။
၂၀ ယေဟောဝါပေးအပ်ထားသည့် လက်နက်စုံကို ကျွန်ုပ်တို့ မဖြစ်မနေဝတ်ဆင်ထားဖို့လိုကြောင်း ထင်ရှားသည်။ ဤဝိညာဉ်ရေးလက်နက်စုံကို ဝတ်ဆင်ထားရန် ယုံကြည်ခြင်းနှင့် ဖြောင့်မတ်ခြင်း အစရှိသော ဘုရားသခင့်ရေးရာအရည်အသွေးများကို တိုးပွားစေရမည်။ အမှန်တရားဖြင့် ရစ်ပတ်ထားသကဲ့သို့ ယင်းကိုနှစ်သက်မြတ်နိုးဖို့လိုသည်၊ အချိန်အခါမရွေး သတင်းကောင်းပျံ့နှံ့စေရန် ကျွန်ုပ်တို့အသင့်ရှိပြီး အနာဂတ်မျှော်လင့်ချက်ကို စိတ်စွဲမှတ်ထားဖို့လိုသည်။ ဝိညာဉ်တော်ဓားကို ကျွမ်းကျင်စွာ အသုံးပြုတတ်ရန် သင်ယူရမည်။ ဘုရားသခင်ပေးအပ်ထားသော လက်နက်စုံကို ဝတ်ဆင်ထားခြင်းဖြင့် ကျွန်ုပ်တို့သည် နတ်ဆိုးများနှင့် နပန်းသတ်ပွဲတွင် အနိုင်ရနိုင်ပြီး ယေဟောဝါ၏သန့်ရှင်းမြင့်မြတ်သောနာမတော်ကို ထင်ရှားစေနိုင်ပါလိမ့်မည်။—ရောမ ၈:၃၇-၃၉။
[အောက်ခြေမှတ်ချက်]
^ အပိုဒ်၊ 6 ဟေရှာယပရောဖက်ပြုချက်တွင် ယေဟောဝါသည် “ဖြောင့်မတ်ခြင်းတရားတည်းဟူသော ရင်ကျပ်ကိုဝတ်ဆင်” ထားသည်ဟု ဖော်ပြ၏။ သို့ဖြစ်၍ တရားသဖြင့်စီရင်၍ ဖြောင့်မတ်စွာလုပ်ဆောင်ကြရန် အသင်းတော်ကြီးကြပ်မှူးများအား ကိုယ်တော် တောင်းဆိုတော်မူ၏။—ဟေရှာယ ၅၉:၁၄၊ ၁၅၊ ၁၇။
သင်မည်သို့ဖြေဆိုမည်နည်း
• အဘယ်သူသည် ဝိညာဉ်ရေးချပ်ဝတ်တန်ဆာ ဝတ်ဆင်ခြင်းတွင် အကောင်းဆုံးစံနမူနာဖြစ်သနည်း၊ ကိုယ်တော်၏စံနမူနာကို အဘယ်ကြောင့် အသေအချာသုံးသပ်သင့်သနည်း။
• ကျွန်ုပ်တို့၏စိတ်နှင့် ပုံဆောင်နှလုံးကို မည်သို့ကာကွယ်နိုင်သနည်း။
• ဝိညာဉ်တော်ဓားကို ကျွမ်းကျင်စွာ မည်သို့အသုံးပြုတတ်လာနိုင်သနည်း။
• ကျွန်ုပ်တို့သည် အဘယ်ကြောင့် ကာလအစဉ် ဆုတောင်းနေသင့်သနည်း။
[လေ့လာရန်မေးခွန်းများ]
[စာမျက်နှာ ၁၉ ပါ ရုပ်ပုံ]
ဝီရိယရှိရှိ ကျမ်းစာလေ့လာမှုသည် သတင်းကောင်းကို အချိန်အခါမရွေး ကြေညာရန် ကျွန်ုပ်တို့အား လှုံ့ဆော်ပေးနိုင်
[စာမျက်နှာ ၁၉ ပါ ရုပ်ပုံ]
တပ်အပ်သေချာသော ကျွန်ုပ်တို့၏မျှော်လင့်ချက်သည် စမ်းသပ်မှုများကို ရင်ဆိုင်နိုင်စေ
[စာမျက်နှာ ၁၉ ပါ ရုပ်ပုံ]
သင်သည် ခရစ်ယာန်ဓမ္မအမှုတွင် “ဝိညာဉ်တော်၏ဓား” ကိုအသုံးပြုပါသလော