စာရှုသူ​များ​ထံ​မှ မေးခွန်းလွှာ

တမန်​တော်​ယောဟန်​က “စုံလင်သော​မေတ္တာသည် ကြောက်ရွံ့ ခြင်း​ကို ပယ်ရှား​တတ်၏” ဟု ရေးသားခဲ့​သောအခါ “စုံလင်သော​မေတ္တာ” သည် အဘယ်အရာကို ဆိုလို​ပြီး အဘယ် “ကြောက်ရွံ့ ခြင်း” မျိုးကို ပယ်ရှား​ခဲ့​သနည်း။

“ချစ်ခြင်း​မေတ္တာ​၌ ကြောက်ရွံ့ ခြင်း​မရှိ။ ကြောက်ရွံ့ ခြင်း​သည် ဒဏ်​ခံရ​ခြင်း​နှင့်​ဆိုင်သော​ကြောင့် စုံလင်သော​မေတ္တာသည် ကြောက်ရွံ့ ခြင်း​ကို ပယ်ရှား​တတ်၏။ ကြောက်ရွံ့ ခြင်း​ရှိသောသူ​၌ မေတ္တာ​မစုံလင်​သေး” ဟု တမန်​တော်​ယောဟန် ရေးသားခဲ့​၏။—၁ ယောဟန် ၄:၁၈၊ သမ္မာ။

ယောဟန်​သည် လွတ်လပ်​စွာ​ပြောဆို​ခွင့်—အထူးသဖြင့် ဘုရားသခင်​အား​ချစ်​သည့်​မေတ္တာ​နှင့် ကိုယ်တော့်​ထံ လွတ်လပ်​စွာ​ပြောဆို​ခွင့်​တို့၏ ဆက်စပ်မှု—အကြောင်း ဆွေးနွေး​နေခြင်း​ဖြစ်သည်။ ယင်းကို အခန်းငယ် ၁၇ ပါ​စကား​များ​တွင် တွေ့ မြင်နိုင်​ပါ​သည်– “ငါ​တို့သည် ချစ်ခြင်း​မေတ္တာ​နှင့်​ပြည့်စုံသော​အားဖြင့် တရား​ဆုံးဖြတ်​တော်​မူ​သော​နေ့၌ ရဲရင့်​ရသော​အခွင့် [“လွတ်လပ်​စွာ​ပြောဆို​ခွင့်၊” က​ဘ] ရှိကြ​လိမ့်​မည်။” ခရစ်ယာန်​တစ်ဦး​က ဘုရားသခင်​အား ချစ်​သည့်​အတိုင်းအတာ၊ မိမိ​အား ဘုရားသခင်​ချစ်​သည်​ဟူ၍ ခံစားရ​သည့် အတိုင်းအတာ​တို့​က ဘုရားသခင်​ထံ သူ​ဆုတောင်း​ချဉ်းကပ်​သည့်​အခါ သူ၏​လွတ်လပ်​စွာ​ပြောဆို​ခွင့်​ရှိ​ခြင်း၊ မရှိခြင်း​အပေါ် တိုက်ရိုက်​အကျိုး​သက်ရောက်မှု​ရှိ​လေ​သည်။

“စုံလင်သော​မေတ္တာ” ဟူ​သည့်​အသုံးအနှုန်း​က အထူး​အဓိပ္ပာယ်​ရှိ၏။ သမ္မာကျမ်းစာ​တွင် အသုံးပြု​ထား​သည့်​အတိုင်း “စုံလင်” ဟူ​သည့်​စကားလုံး​သည် အမြင့်ဆုံး​အတိုင်းအတာ​အထိ အကြွင်းမဲ့​သဘောဖြင့် စုံလင်ခြင်း​ကို အမြဲတမ်း ဆိုလိုခြင်း​မဟုတ်ဘဲ နှိုင်း​ရ​သဘောဖြင့် စုံလင်ခြင်း​ကို ဆိုလို​လေ့​ရှိသည်။ ဥပမာ၊ တောင်ပေါ်​တရားတော်​တွင် ယေရှု ဤသို့​မိန့်ဆိုခဲ့​၏– “ကောင်းကင်ဘုံ​၌​ရှိတော်မူသော သင်တို့​အဘသည် စုံလင်​တော်​မူ​သည်​နည်းတူ သင်တို့သည်လည်း စုံလင်ခြင်း​ရှိကြလော့။” မိမိတို့​အား​ချစ်​မြတ်နိုး​သူများကို​သာ ချစ်​မည်​ဆိုလျှင် သူတို့၏​မေတ္တာသည် မပြည့်စုံ၊ ချို့တဲ့​၍ အပြစ်​အနာအဆာ​ရှိသော မေတ္တာ​ဖြစ်​မည်​ဟု မိမိ၏​နောက်တော်လိုက်​များ​ကို ယေရှု​မိန့်တော်မူ​နေခြင်း​ဖြစ်သည်။ မိမိတို့၏​ရန်သူများ​ကို​ပင် ချစ်ခြင်း​အားဖြင့် သူတို့၏​မေတ္တာကို စုံလင်​စေ​သင့်​သည်၊ အပြည့်အဝ​ဖြစ်စေ​သင့်​သည်။ အလားတူ “စုံလင်သော​မေတ္တာ” အကြောင်း ယောဟန်​ရေးသား​သည့်​အခါ စိတ်နှလုံး​အကြွင်းမဲ့၊ အပြည့်အဝ​နှင့် ဘဝ​ကဏ္ဍအသီးသီး​ကို အကျုံးဝင်​စေသည့် ဘုရားသခင်​အား ချစ်​သည့်​မေတ္တာ​အကြောင်း သူ​ပြောဆို​နေခြင်း​ဖြစ်သည်။—မဿဲ ၅:၄၆-၄၈; ၁၉:၂၀၊ ၂၁။

ဘုရားသခင်​ထံ ခရစ်ယာန်​တစ်ဦး ဆုတောင်း​ချဉ်းကပ်​သောအခါ မိမိသည် အပြစ်​ရှိ၍ မစုံလင်သူ​ဖြစ်​ကြောင်း ကောင်းစွာ​သိထား​သည်။ သို့ရာတွင်၊ မိမိသည် ဘုရားသခင်​ကို ချစ်​ကြောင်း၊ ဘုရားသခင်​က​လည်း မိမိကို​ချစ်​ကြောင်း အပြည့်အဝ​ခံစားရ​မည်​ဆိုလျှင် အပြစ်တင်​ခံရ​မည် သို့​မဟုတ် ငြင်းပယ်​ခံရ​မည်​ဟု ကြောက်ရွံ့​နေစရာ​အကြောင်း မရှိ​ချေ။ ယင်းအစား ယေရှု​ခရစ်​မှ​တစ်ဆင့် မေတ္တာ​ပြည့်ဝ​စွာ ဘုရားသခင်​စီမံ​ပေး​ခဲ့​သည့် ရွေးနုတ်ဖိုး​ပူဇော်ရာ​ယဇ်ကို အခြေပြု​၍ ခွင့်လွှတ်​မှု တောင်းခံ​ရန်​နှင့် မိမိ၏​နှလုံး​တွင် အဘယ်အရာ​ရှိကြောင်း​ဖော်ပြ​ရာ​တွင် လွတ်လပ်​စွာ​ပြောဆို​ခွင့်​ရှိ​မည်။ သူ၏​အသနားခံချက်များ​ကို ဘုရားသခင် နားညောင်း​တော်​မူ​ကြောင်း သူ​ယုံကြည်​စိတ်ချ​ပေမည်။

လူတစ်ဦး​သည် “မေတ္တာ” ကို မည်သို့ “စုံလင်” စေနိုင်​ပြီး ပြစ်တင်​ရှုတ်ချ​ခံရ​မည် သို့​မဟုတ် ငြင်းပယ်​ခံရ​မည်​ကို ကြောက်ရွံ့​သည့်​စိတ်အား မည်သို့ “ပယ်ရှား” စေနိုင်​သနည်း။ “[ဘုရားသခင်​၏] စကားတော်​ကို နားထောင်​သော​သူ​မည်​သည်​ကား၊ ဘုရားသခင်​ကို ချစ်ခြင်း​မေတ္တာ​နှင့် အမှန်​ပြည့်စုံ​၏” ဟု တမန်​တော်​ယောဟန်​က​ဆို​သည်။ (၁ ယောဟန် ၂:၅) ဤ​အချက်​ကို​သုံးသပ်ကြည့်​ပါ– ကျွန်ုပ်​တို့ အပြစ်ရှိ​နေစဉ်​ပင် ဘုရားသခင်​ချစ်တော်မူ​လျှင် ကျွန်ုပ်​တို့သည် အမှန်​နောင်တ​ရပြီး “ကိုယ်တော်​၏​စကားတော်​ကို” လုံ့လ​ဝီရိယ​ရှိ​ရှိ “လိုက်နာ​စောင့်ထိန်း” မည်​ဆိုလျှင် ပို​၍​ပင် ချစ်တော်မူ​မည်​မဟုတ်လော။ (ရောမ ၅: ၈; ၁ ယောဟန် ၄:၁၀) အမှန်​ဆို​ရ​လျှင်၊ ကျွန်ုပ်​တို့ တည်ကြည်​နေသရွေ့ ဘုရားသခင်​အကြောင်း တမန်​တော်​ပေါလု ဤသို့​ပြောဆို​ခဲ့​ချိန်​က သူ၏​ယုံကြည်​စိတ်ချမှု​မျိုး ကျွန်ုပ်​တို့​၌​လည်း ရှိ​နိုင်​ပါ​သည်– “မိမိ​သားတော်ရင်းကို မ​နှမြော​ဘဲ၊ ငါ​တို့​ရှိသမျှ​အဖို့​အ​လို့​ငှာ စွန့်​တော်​မူ​သော​သူသည် သားတော်​နှင့်​တကွ ခပ်သိမ်း​သော​အရာ​တို့ကို ငါ​တို့အား​မပေး​ဘဲ အဘယ်​သို့​နေ​တော်​မူ​မည်​နည်း။”—ရောမ ၈:၃၂။