“တစ်ဦးကိုတစ်ဦး ချစ်ခင်တွယ်တာကြလော့”
“တစ်ဦးကိုတစ်ဦး ချစ်ခင်တွယ်တာကြလော့”
“ညီအစ်ကိုချင်းချစ်ခြင်းအရာမှာ တစ်ဦးကိုတစ်ဦး ချစ်ခင်တွယ်တာကြလော့။”—ရောမ ၁၂:၁၀၊ ကဘ။
၁၊ ၂။ ခရစ်ယာန်သာသနာပြုတစ်ဦးနှင့် တမန်တော်ပေါလုတို့သည် မိမိတို့၏ညီအစ်ကိုများနှင့် အဘယ်သို့သောဆက်ဆံရေး ရှိခဲ့ကြသနည်း။
အရှေ့ဖျားဒေသတွင် ခရစ်ယာန်သာသနာပြုလုပ်ငန်းကို ၄၃ နှစ်ကြာ အမှုဆောင်ခဲ့စဉ်တစ်လျှောက်လုံး ဒေါ်န်သည် သူတစ်ထူးအကျိုးကို လှိုက်လှိုက်လှဲလှဲ ဆောင်ရွက်ပေးသူအဖြစ် လူသိများ၏။ သူ့အသက်ကို ခြွေယူသွားမည့်ရောဂါနှင့် ယခု နပန်းလုံးနေရချိန်တွင် ယခင်က သူကျမ်းစာသင်ပေးခဲ့သူတချို့သည် မိုင်ထောင်ချီဝေးသောအရပ်မှ ခရီးပြင်းနှင်လာကာ သူ၏ခုတင်ဘေးသို့ရောက်လာကြပြီး ကိုရီးယားဘာသာစကားဖြင့် ခမ်ဆာမ်နီတာ၊ ခမ်ဆာမ်နီတာ!—“ကျေးဇူးတင်ပါတယ်၊ ကျေးဇူးတင်ပါတယ်!” ဟူ၍ ပြောဆိုကြလေသည်။ ဒေါ်န်၏ ချစ်ခင်တွယ်တာတတ်မှုသည် သူတို့ရင်ထဲဝယ် စွဲနစ်နေလေသည်။
၂ အထက်ပါအခြေအနေမျိုးကို ဒေါ်န်တစ်ဦးတည်းသာ တွေ့ကြုံသည်မဟုတ်ပါ။ ပထမရာစုက တမန်တော်ပေါလုသည် မိမိအကျိုးဆောင်ပေးခဲ့သူတို့ကို အလွန်တွယ်တာခဲ့၏။ ထို့ပြင် ပေါလုသည် အနစ်နာလည်းခံခဲ့သည်။ သူသည် ခံယူချက်ခိုင်မာသူတစ်ဦးဖြစ်သော်လည်း “နို့ထိန်းသည် မိမိသူငယ်တို့ကို မွေးမြူသကဲ့သို့” နူးညံ့၍ ဂရုစိုက်ပေးတတ်သူဖြစ်သည်။ သက်သာလောနိတ်အသင်းတော်ထံ သူဤသို့ရေးသားခဲ့၏– “သင်တို့ကိုချစ်သောကြောင့် နို့ထိန်းသည် မိမိသူငယ်ကို ကျွေးမွေးပြုစုသကဲ့သို့၊ ငါတို့သည် သင်တို့ကို နှမြောစုံမက် [“ချစ်ခင်တွယ်တာ၊” ကဘ] ခြင်းနှင့်တကွ၊ ဘုရားသခင်၏ဧဝံဂေလိတရားကိုမျှမက၊ ကိုယ်အသက်ကိုပင်ပေးချင်သော စေတနာစိတ်ရှိကြ၏။” (၁ သက်သာလောနိတ် ၂:၇၊ ၈၊ သမ္မာ) နောက်ပိုင်းတွင် ပေါလုက မိမိကို နောက်တစ်ဖန် တွေ့ရတော့မည်မဟုတ်ကြောင်း ဧဖက်မြို့မှ ညီအစ်ကိုများကို ပြောပြသောအခါ “ထိုသူအပေါင်းတို့သည် အလွန်ငိုကြွေး၍ ပေါလု၏လည်ပင်းကိုဖက်ယမ်းလျက် သူ့ကိုနမ်းကြ၏။” (တမန်တော် ၂၀:၂၅၊ ၃၇) ပေါလုနှင့် ညီအစ်ကိုများ၏ပေါင်းသင်းဆက်ဆံမှုသည် ယုံကြည်ခြင်းတူရုံထက်မက ပို၍နက်ရှိုင်းသည်။ သူတို့သည် တစ်ဦးကိုတစ်ဦး ချစ်ခင်တွယ်တာခဲ့ကြသည်။
ချစ်ခင်တွယ်တာမှုနှင့် ချစ်ခြင်းမေတ္တာ
၃။ ချစ်ခင်တွယ်တာမှုနှင့် ချစ်ခြင်းမေတ္တာဟူသော ကျမ်းစာအသုံးအနှုန်းများသည် မည်သို့ဆက်စပ်နေကြသနည်း။
၃ သမ္မာကျမ်းစာတွင် ချစ်ခင်တွယ်တာမှု၊ ကိုယ်ချင်းစာနာမှုနှင့် ထောက်ထားညှာတာမှုတို့ကို ခရစ်ယာန်အရည်အသွေးများတွင် အမြင့်မြတ်ဆုံးဖြစ်သော ချစ်ခြင်းမေတ္တာနှင့် ပူးတွဲထားသည်။ (၁ သက်သာလောနိတ် ၂:၈; ၂ ပေတရု ၁:၇) ဘုရားသခင်ရေးရာ ထိုအရည်အသွေးအားလုံးသည် လှပသောစိန်တစ်လုံး၏ တာကွက်များကဲ့သို့ ညီမျှပြီး အပြန်အလှန်ဖြည့်ဆည်းပေးကြသည်။ ယင်းအရည်အသွေးများသည် ခရစ်ယာန်အချင်းချင်းကို ပို၍ရင်းနှီးစေသည်သာမက သူတို့၏ ကောင်းကင်ခမည်းတော်နှင့်လည်း ရင်းနှီးမှုရှိစေသည်။ ထို့ကြောင့် တမန်တော်ပေါလုက ယုံကြည်သူချင်းများကို ဤသို့တိုက်တွန်းသည်– “မေတ္တာစိတ်သည် အရေခြုံမှုနှင့် ကင်းစေလော့။ . . . ညီအစ်ကိုချင်းချစ်ခြင်းအရာမှာ တစ်ဦးကိုတစ်ဦး ချစ်ခင်တွယ်တာကြလော့။”—ရောမ ၁၂:၉၊ ၁၀၊ ကဘ။
၄။ “ချစ်ခင်တွယ်တာမှု” ဟူသောအသုံးအနှုန်းက အဘယ်အရာကို ဆိုလိုသနည်း။
၄ “ချစ်ခင်တွယ်တာမှု” အတွက် ပေါလုအသုံးပြုခဲ့သည့် ဂရိစကားလုံးသည် ခင်မင်ရင်းနှီးမှုနှင့် ပင်ကိုတွယ်တာမှုတို့၏ နှစ်မျိုးစပ်အဓိပ္ပာယ်ဖြစ်သည်။ ကျမ်းပညာရှင်တစ်ဦး ရှင်းပြသည့်အတိုင်း ခရစ်ယာန်များတွင် “ချစ်ခင်စည်းလုံးပြီး အပြန်အလှန် ဖေးမပေးတတ်သည့် မိသားစုအသွင်ဆောင်သော တွယ်တာမြတ်နိုးမှုမျိုး ရှိရကြမည်” ဟူသည့် အဓိပ္ပာယ်ဖြစ်သည်။ သင်၏ ခရစ်ယာန်ညီအစ်ကိုညီအစ်မများနှင့်ပတ်သက်၍ သင်ထိုသို့ခံစားရသလော။ ခရစ်ယာန်အသင်းတော်တွင် ဆွေမျိုးရင်းချာပမာ ဖော်ရွေပျူငှာသည့် စရိုက်လက္ခဏာဝန်းကျင်မျိုး လွှမ်းမိုးနေသင့်သည်။ (ဂလာတိ ၆:၁၀) သို့ဖြစ်၍၊ ဂျေ. ဘီ. ဖီးလစ္စ၏ ခေတ်သစ်အင်္ဂလိပ်ဓမ္မသစ်ကျမ်းက ရောမ ၁၂:၁၀ ကို ဤသို့အနက်ဖွင့်သည်– “ညီရင်းအစ်ကိုများပမာ တစ်ဦးနှင့်တစ်ဦး အမှန်ဖော်ရွေပျူငှာ တွယ်တာကြစို့။” ယေရုရှလင်သမ္မာကျမ်းစာတွင်လည်း ဤသို့ဖတ်ရ၏– “ညီအစ်ကိုချင်းချစ်သကဲ့သို့ တတ်နိုင်သ၍ အချင်းချင်းချစ်ကြလော့။” ခရစ်ယာန်အချင်းချင်းချစ်ခြင်းသည် ချစ်သင့်၍၊ တာဝန်ရှိ၍ ချစ်ခြင်းမျှသာမဟုတ်ပေ။ “ညီအစ်ကိုတို့ကို ချစ်ယောင်မဆောင်၊” “စိတ်နှလုံးပါလျက် အချင်းချင်းအားကြီးသော ချစ်ခြင်းမေတ္တာရှိ” သင့်သည်။—၁ ပေတရု ၁:၂၂၊ သမ္မာ။
‘တစ်ဦးကိုတစ်ဦးချစ်ရန် ဘုရားသခင် သွန်သင်ပေး’
၅၊ ၆။ (က) မိမိလူမျိုးတော်အား ခရစ်ယာန်ချစ်ခင်တွယ်တာမှုအကြောင်း သွန်သင်ပေးရန် အပြည်ပြည်ဆိုင်ရာစည်းဝေးကြီးများကို ယေဟောဝါမည်သို့အသုံးပြုတော်မူသနည်း။ (ခ) ညီအစ်ကိုများစပ်ကြား ရင်းနှီးမှုနှောင်ကြိုးသည် အချိန်အတန်ကြာအတွင်း မည်သို့ပိုခိုင်မြဲလာသနည်း။
၅ ဤလောကတွင် “အများသောသူတို့၏ ချစ်ခြင်းမေတ္တာ” သည် ခေါင်းပါးနေသော်လည်း ‘တစ်ဦးကိုတစ်ဦးချစ်ရန်’ ခေတ်သစ်လူမျိုးတော်အား ယေဟောဝါသွန်သင်ပေးနေတော်မူသည်။ (မဿဲ ၂၄:၁၂; ၁ သက်သာလောနိတ် ၄:၉) ယေဟောဝါသက်သေများ၏ အပြည်ပြည်ဆိုင်ရာစည်းဝေးကြီးများသည် ဤလေ့ကျင့်ပေးမှုကို ရရှိထားကြောင်း တင်ပြသည့် ထူးခြားသောအခါသမယများဖြစ်ကြ၏။ ထိုစည်းဝေးကြီးများ၌ ဒေသခံသက်သေများသည် အလွန်ဝေးလံသည့်နိုင်ငံများမှ ရောက်လာကြသည့် ညီအစ်ကိုများနှင့် တွေ့ဆုံမိတ်ဆက်ကြကာ အများသောသူတို့သည် တိုင်းတစ်ပါးကိုယ်စားလှယ်များကို မိမိတို့၏အိမ်တွင် တည်းခိုစေခဲ့ကြသည်။ မကြာသေးမီက ကျင်းပသော စည်းဝေးကြီးတစ်ခုသို့ ဣန္ဒြေစောင့်စည်းတတ်သူများနေထိုင်ရာ နိုင်ငံများမှ လူတချို့ ရောက်လာကြ၏။ “အဲဒီကိုယ်စားလှယ်တွေ စရောက်လာချိန်မှာ အတော့်ကိုမဝံ့မရဲ ဖြစ်နေကြတယ်။ ဒါပေမဲ့ ခြောက်ရက်ကြာပြီးနောက် ခွဲခွာရတော့မယ့်အချိန်မှာ သူတို့ရဲ့ အိမ်ရှင်တွေရော သူတို့တွေပါ တစ်ယောက်ကိုတစ်ယောက်ဖက်ပြီး ငိုကြတော့တယ်။ သူတို့အားလုံး ဘယ်တော့မှ မေ့ကြမှာမဟုတ်တဲ့ ခရစ်ယာန်မေတ္တာကို လှိုက်လှိုက်လှဲလှဲ ခံစားခဲ့ရကြတယ်” ဟု တည်းခိုရေးတွင် ကူညီပေးခဲ့သည့် ခရစ်ယာန်တစ်ဦးက ပြန်ပြောပြ၏။ ညီအစ်ကိုများ၏နောက်ခံ မည်သို့ပင်ရှိပါစေ ဧည့်ဝတ်ပျူငှာခြင်းသည် ဧည့်သည်နှင့် အိမ်ရှင်တို့တွင်ရှိသည့် အကောင်းဆုံးအရည်အသွေးများကို ထွက်ပေါ်လာစေနိုင်သည်။—ရောမ ၁၂:၁၃။
၆ ထိုစည်းဝေးကြီးအတွေ့အကြုံများက ဘဝင်လှုပ်ရှားစရာပင်၊ သို့သော် ယေဟောဝါ၏အမှုတော်ကို အချိန်အတန်ကြာ အတူတကွထမ်းဆောင်ကြမည်ဆိုလျှင် ခရစ်ယာန်အချင်းချင်း ပိုမိုရင်းနှီးချစ်ခင်လာပေမည်။ ညီအစ်ကိုများနှင့် ကျွန်ုပ်တို့အကျွမ်းတဝင်ရှိလာသောအခါ သူတို့၏ ချစ်စရာအရည်အသွေးများဖြစ်သော ဖြောင့်မတ်မှု၊ ယုံကြည်ကိုးစားထိုက်မှု၊ တည်ကြည်မှု၊ ကြင်နာမှု၊ ရက်ရောမှု၊ ထောက်ထားစာနာမှုနှင့် ကိုယ်ကျိုးမဖက်မှုတို့ကို ပိုတန်ဖိုးထားတတ်လာသည်။ (ဆာလံ ၁၅:၃-၅; သု. ၁၉:၂၂) အရှေ့အာဖရိကတွင် ခရစ်ယာန်သာသနာပြုခဲ့သူ မာ့ခ်က “ညီအစ်ကိုတွေနဲ့ ပခုံးချင်းယှဉ်အမှုဆောင်ကြတဲ့အတွက် မေတ္တာနှောင်ကြိုး ပိုခိုင်မြဲလာတယ်” ဟု ပြောပြသည်။
၇။ အသင်းတော်တွင် ခရစ်ယာန်ချစ်ခင်တွယ်တာမှုရှိကြရန် ကျွန်ုပ်တို့ကို အဘယ်အရာတောင်းဆိုထားသနည်း။
၇ အသင်းတော်တစ်ခုတွင် ထိုနှောင်ကြိုးမျိုးရှိပြီး ဆက်ခိုင်မြဲစေဖို့ အသင်းသားများသည် တစ်ဦးနှင့်တစ်ဦး ခင်မင်ရင်းနှီးကြရမည်။ ခရစ်ယာန်အစည်းအဝေးများကို မှန်မှန်တက်ရောက်ခြင်းအားဖြင့် ညီအစ်ကိုညီအစ်မများအပေါ် သံယောဇဉ်ကြီးလာကြ၏။ အစည်းအဝေးမတိုင်မီ၊ အစည်းအဝေးကျင်းပနေစဉ်နှင့် အစည်းအဝေးပြီးနောက်တွင် ရှိနေခြင်းအားဖြင့် ‘မေတ္တာစိတ်ရှိစေ၍ ကောင်းသောအကျင့်ကျင့်စေရန်’ တစ်ဦးကိုတစ်ဦး အားပေးလှုံ့ဆော်ကြသည်။ (ဟေဗြဲ ၁၀:၂၄၊ ၂၅) “ကျွန်တော် မှတ်မိသေးတယ်၊ ငယ်ငယ်တုန်းကဆိုရင် ကျွန်တော်တို့မိသားစုဟာ ရင်းရင်းနှီးနှီးနဲ့ အားပေးစကားပြောဆိုဖို့ ဘုရားသခင့်နိုင်ငံတော်ခန်းမကနေ အမြဲလိုလို နောက်ဆုံးကျမှ ထွက်ခွာကြတယ်” ဟု အမေရိကန်ပြည်ထောင်စုမှ အကြီးအကဲတစ်ဦးက ပြောပြသည်။
“ကျယ်ဝန်းသောစိတ်ရှိ” ဖို့လိုသလော
၈။ (က) “ကျယ်ဝန်းသောစိတ်ရှိ” ကြရန် ကောရိန္သုမြို့သားများအား ပေါလုတိုက်တွန်းသောအခါ အဘယ်အရာကို သူဆိုလိုခဲ့ခြင်းဖြစ်သနည်း။ (ခ) အသင်းတော်အတွင်း ချစ်ခင်တွယ်တာမှုတိုးပွားလာရန် ကျွန်ုပ်တို့ အဘယ်အရာလုပ်ဆောင်နိုင်သနည်း။
၈ အားလုံးနှင့် ချစ်ခင်တွယ်တာမှုရှိရန် “ကျယ်ဝန်းသောစိတ်ရှိ” ဖို့လိုပေမည်။ ကောရိန္သုအသင်းတော်ထံ တမန်တော်ပေါလု ဤသို့စာရေးခဲ့သည်– “ငါတို့ . . . စိတ်နှလုံးသည်လည်း ကျယ်ဝန်း၏။ ငါတို့၌ သင်တို့သည် ကျဉ်းမြောင်းသည်မဟုတ်။” တုံ့ပြန်သည့်အနေဖြင့် သူတို့တွင် “ကျယ်ဝန်းသောစိတ်ရှိ” ကြရန် ပေါလုတိုက်တွန်းခဲ့၏။ (၂ ကောရိန္သု ၆:၁၁-၁၃) အသင်လည်း မိမိ၏ချစ်ခင်တွယ်တာမှုကို “ကျယ်ဝန်း” စေနိုင်ပါသလော။ သင့်ထံ သူတစ်ပါးချဉ်းကပ်လာသည်အထိ စောင့်နေစရာမလိုပေ။ ရောမမြို့သားများထံ ပေါလုရေးသည့်စာတွင် ချစ်ခင်တွယ်တာမှု ရှိရမည့်အပြင် “အချင်းချင်း ချီးမြှောက်ဂုဏ်ပြုခြင်း၌ ဦးဆောင်ကြပါ” ဟု အကြံပေးထားသည်။ (ရောမ ၁၂:၁၀၊ ကဘ) အခြားသူများကို ချီးမြှောက်ဂုဏ်ပြုရန် အစည်းအဝေးများတွင် သင်ကအစပြု၍ သူတို့ကို နှုတ်ဆက်စကားပြောဆိုနိုင်သည်။ ထို့အပြင် လယ်ကွင်းဓမ္မအမှုတွင် သို့မဟုတ် စည်းဝေးအတွက် ပြင်ဆင်ရာတွင် သင်နှင့်အတူပါဝင်ရန် သူတို့ကို ဖိတ်ခေါ်နိုင်သည်။
၉။ လူတချို့သည် ခရစ်ယာန်ချင်းများနှင့် ပိုမိုရင်းနှီးသောမိတ်ဆွေများဖြစ်လာရန် အဘယ်ခြေလှမ်းများ လှမ်းခဲ့ကြပြီနည်း။ (ဒေသခံအဖြစ်အပျက်တစ်ခုခု ပါဝင်စေပါ။)
၉ ထို့အပြင် အသင်းတော်ရှိ မိသားစုများနှင့် တစ်ဦးစီတို့သည် အချင်းချင်းထံလည်ပတ်၍ မိတ်ဆုံစားသောက်ကြကာ ပေါင်းသင်းဆက်ဆံကြခြင်းအားဖြင့် “ကျယ်ဝန်းသောစိတ်ရှိ” နိုင်ကြသည်။ (လုကာ ၁၀:၄၂; ၁၄:၁၂-၁၄) ဟာကော့ပ်သည် အခါအားလျော်စွာ လူနည်းစုနှင့် ပျော်ပွဲစားထွက်လေ့ရှိသည်။ “လူကြီးလူငယ်အရွယ်စုံပဲ၊ ကြင်ဖော်မဲ့မိဘတွေကော ပါတယ်။ အားလုံး ပျော်ပျော်ရွှင်ရွှင်နဲ့ အိမ်ပြန်ကြတယ်၊ ပြီးတော့ တစ်ယောက်နဲ့တစ်ယောက် ပိုရင်းနှီးလာကြတယ်” ဟု သူက ပြန်ပြောပြသည်။ ခရစ်ယာန်များအနေနှင့် ကျွန်ုပ်တို့သည် ယုံကြည်သူချင်းများဖြစ်ဖို့သာမက မိတ်ဆွေစစ်များလည်းဖြစ်ဖို့ ကြိုးစားသင့်သည်။—၃ ယောဟန် ၁၄။
၁၀။ ဆက်ဆံရေးတင်းမာလာပါက ကျွန်ုပ်တို့ အဘယ်အရာလုပ်ဆောင်နိုင်သနည်း။
၁၀ သို့သော်၊ တစ်ခါတစ်ရံ မစုံလင်မှုများကြောင့် ခင်မင်ရင်းနှီးဖို့၊ ချစ်ခင်တွယ်တာဖို့ အခက်တွေ့နိုင်သည်။ ထိုအခါ အဘယ်အရာ လုပ်ဆောင်နိုင်သနည်း။ ဦးဆုံး၊ ညီအစ်ကိုများနှင့် ကောင်းသောဆက်ဆံရေးရှိဖို့ ကျွန်ုပ်တို့ဆုတောင်းနိုင်သည်။ ဘုရားသခင့်အလိုတော်မှာ မိမိ၏ကျေးကျွန်များ တစ်ဦးနှင့်တစ်ဦး ရင်းနှီးဖော်ရွေကြရန်ဖြစ်သည်။ ထိုသို့သောသူများ၏ စိတ်ရင်းမှန်နှင့်တောင်းသည့် ဆုတောင်းချက်များကို ကိုယ်တော်ဖြေကြားပေးတော်မူမည်။ (၁ ယောဟန် ၄:၂၀၊ ၂၁; ၅:၁၄၊ ၁၅) ထို့ပြင် ကျွန်ုပ်တို့သည် မိမိတို့၏ဆုတောင်းချက်များနှင့်အညီ လုပ်ဆောင်သင့်၏။ အရှေ့အာဖရိကရှိ နယ်လှည့်အမှုထမ်းတစ်ဦးဖြစ်သူ ရစ်ခ်က ခက်ထန်ကြမ်းတမ်းသည့်စရိုက်ကြောင့် ပေါင်းသင်းရခက်သည့် ညီအစ်ကိုတစ်ဦးအကြောင်း ပြန်ပြောပြသည်။ “အဲဒီညီအစ်ကိုကို ရှောင်ဖယ်ရှောင်ဖယ်လုပ်မယ့်အစား သူ့ကိုသိကျွမ်းလာဖို့ ကြိုးစားလိုက်တယ်။ အဲဒီညီအစ်ကိုရဲ့အဖေက စည်းကမ်းတင်းကျပ်သူဖြစ်မှန်း သိလာရတယ်။ သူ့ရဲ့နောက်ခံကြောင့် ခက်ထန်ကြမ်းတမ်းတဲ့သဘောကို ဘယ်လိုချိုးနှိမ်ခဲ့ရပြီး ဘယ်လောက်ပြောင်းလဲလာတယ်ဆိုတာကို ကျွန်တော်သဘောပေါက်သွားတဲ့အခါ သူ့ကို လေးစားမိတယ်။ နောက်တော့ ကျွန်တော်တို့ မိတ်ဆွေကောင်းတွေ ဖြစ်လာကြတယ်” ဟု ရစ်ခ်က ရှင်းပြ၏။—၁ ပေတရု ၄:၈။
ပွင့်လင်းစွာ ပြောဆိုပါ!
၁၁။ (က) အသင်းတော်၌ ချစ်ခင်တွယ်တာမှုတိုးပွားလာစေရန် အဘယ်အရာလိုအပ်သနည်း။ (ခ) အခြားသူများနှင့်စိမ်းကားနေခြင်းက အဘယ်ကြောင့် ဝိညာဉ်ရေးကို ထိခိုက်စေနိုင်သနည်း။
၁၁ ယနေ့ လူများစွာတို့သည် ခင်မင်ရင်းနှီးသည့် မိတ်ဆွေမရှိဘဲ ဘဝကို ကျော်ဖြတ်ကြသည်။ အလွန်ဝမ်းနည်းစရာပင်! ခရစ်ယာန်အသင်းတော်၌ ဤသို့ ဖြစ်စရာမလိုပါ၊ ဖြစ်လည်းမဖြစ်သင့်ချေ။ စစ်မှန်သော ညီအစ်ကိုချင်းမေတ္တာသည် ယဉ်ကျေးသိမ်မွေ့စွာ ပြုမူပြောဆိုခြင်းမျှမဟုတ်; အခြားသူများအပေါ် ဟန်မူရာပိုလွန်းခြင်းမျိုးလည်း မဟုတ်ပေ။ ယင်းအစား၊ ပေါလုသည် ကောရိန္သုမြို့သားများကို ပွင့်လင်းစွာ ပြောဆိုခဲ့သကဲ့သို့ ကျွန်ုပ်တို့လည်း ပွင့်လင်းစွာ ပြောဆိုကာ ယုံကြည်သူချင်းများ၏အကျိုးကို အမှန်စိတ်ဝင်စားကြောင်း ဖော်ပြလိုစိတ်ရှိသင့်သည်။ လူတိုင်းသည် ပင်ကိုအားဖြင့် အဖော်မင်တတ်သူ၊ စကားများသူ ဖြစ်မည်မဟုတ်သော်လည်း ဘာသိဘာသာနေလွန်းလျှင်လည်း ထိခိုက်နစ်နာနိုင်သည်။ “သူတစ်ပါးနှင့် မရောနှောသောသူသည် မိမိအလိုဆန္ဒ ပြည့်စုံစေရန်သာ ရှာဖွေ၍ ပညာလမ်းအတိုင်းမလိုက်ဘဲ မကောင်းကြံစည်ပြုလုပ်တတ်၏” ဟု ကျမ်းစာကသတိပေး၏။—သု. ၁၈:၁၊ သမ္မာ။
၁၂။ အသင်းတော်၌ ရင်းနှီးသောဆက်ဆံရေးရှိရန် အဘယ်ကြောင့် ကောင်းသောဆက်သွယ်ရေး မရှိမဖြစ်လိုအပ်သနည်း။
၁၂ ရိုးသားပွင့်လင်းစွာ ပြောဆိုဆက်ဆံမှုသည် စစ်မှန်သောမိတ်ဆွေဖွဲ့မှု၏ အခြေခံဖြစ်သည်။ (ယောဟန် ၁၅:၁၅) ကျွန်ုပ်တို့၏ မျိုသိပ်ထားသော သဘောထားနှင့် ခံစားချက်များကို ပြောပြနိုင်မည့် မိတ်ဆွေများ ရှိဖို့လိုသည်။ ထို့အပြင်၊ တစ်ဦးကိုတစ်ဦး ကောင်းကောင်းသိကျွမ်းလာလေ တစ်ဦးနှင့်တစ်ဦး လိုအပ်ရာများကို ဖြည့်ဆည်းပေးရန် ပို၍လွယ်ကူလာလေဖြစ်သည်။ ဤနည်းဖြင့် တစ်ဦးနှင့်တစ်ဦး စိတ်ဝင်စားမှုပြသည့်အခါ ချစ်ခင်တွယ်တာမှုတိုးပွားလာပြီး ယေရှု၏ ဤစကားများ မှန်ကန်ကြောင်း ကျွန်ုပ်တို့ခံစားရပေလိမ့်မည်– “ခံယူခြင်းအရာထက် ပေးကမ်းခြင်းအရာသည် သာ၍[ပျော်ရွှင်] သည်။”—တမန်တော် ၂၀:၃၅၊ သမ္မာ; ဖိလိပ္ပိ ၂:၁-၄။
၁၃။ ကျွန်ုပ်တို့၏ညီအစ်ကိုများအပေါ် စစ်မှန်သောချစ်ခင်တွယ်တာမှုရှိကြောင်း ဖော်ပြရန် ကျွန်ုပ်တို့ အဘယ်အရာလုပ်ဆောင်နိုင်သနည်း။
၁၃ ကျွန်ုပ်တို့၏ချစ်ခင်တွယ်တာမှုမှ အကျိုးအများဆုံးရရှိစေရန် ယင်းကို ဖော်ပြပေးဖို့လိုသည်။ (သု. ၂၇:၅) ကျွန်ုပ်တို့၏ချစ်ခင်တွယ်တာမှုသည် စစ်မှန်ပါက မျက်နှာတွင်ပေါ်လွင်နေကာ သူတစ်ဖက်သားအား တုံ့ပြန်လာစေသည်။ ပညာရှိတစ်ဦးက “မျက်စိအလင်း [“တောက်ပသောမျက်ဝန်း”၊ ကဘ] သည် စိတ်နှလုံးကို ရွှင်လန်းစေတတ်၏” ဟု ရေးသားခဲ့၏။ (သု. ၁၅:၃၀) ထောက်ထားစာနာမှုရှိသော လုပ်ရပ်များကလည်း ချစ်ခင်တွယ်တာမှုကို တိုးပွားလာစေသည်။ စစ်မှန်သောချစ်ခင်တွယ်တာမှုကို မည်သူမျှ ငွေနှင့်မဝယ်ယူနိုင်သော်လည်း စိတ်စေတနာအပြည့်ဖြင့်ပေးသော လက်ဆောင်လေးတစ်ခုသည် အလွန်အဓိပ္ပာယ်ရှိနိုင်သည်။ ကတ်လေးတစ်ခု၊ စာလေးတစ်စောင်၊ ‘အခန့်သင့်ပြောဆိုလိုက်သော စကားလေးတစ်ခွန်း’ က အလွန်ချစ်ခင်တွယ်တာကြောင်း ဖော်ပြပေးနိုင်သည်။ (သု. ၂၅:၁၁၊ ကဘ; ၂၇:၉) အခြားသူများနှင့် ကျွန်ုပ်တို့ ရင်းနှီးမှုရှိလာပြီဆိုလျှင် မိတ်မပျက်ဖို့ ကိုယ်ကျိုးမဖက်သည့် ချစ်ခင်တွယ်တာမှုကို ဆက်တင်ပြသွားရမည်။ အထူးသဖြင့် အကူအညီလိုအပ်နေသည့်အချိန်တွင် ကျွန်ုပ်တို့၏မိတ်ဆွေများကို ကူညီပေးလိုပေမည်။ သမ္မာကျမ်းစာက ဤသို့ဆိုသည်– “အဆွေခင်ပွန်းသည် အခါခပ်သိမ်းချစ်တတ်၏။ ညီအစ်ကိုသည် ဒုက္ခကာလအဖို့ မွေးဖွားလျက်ရှိ၏။”—သု. ၁၇:၁၇။
၁၄။ ကျွန်ုပ်တို့၏ချစ်ခင်တွယ်တာမှုကို တစ်စုံတစ်ယောက်က တုံ့ပြန်ပုံမပေါက်လျှင် ကျွန်ုပ်တို့ အဘယ်အရာလုပ်ဆောင်နိုင်သနည်း။
၁၄ အမှန်အားဖြင့် အသင်းတော်ရှိသူတိုင်းနှင့် ကျွန်ုပ်တို့ ခင်မင်ရင်းနှီးနိုင်မည်မဟုတ်ချေ။ လူတချို့ကို အခြားသူတွေထက် ကျွန်ုပ်တို့ ပိုရင်းနှီးကြမည်မှာ အမှန်ပင်။ ထို့ကြောင့် တစ်ဦးတစ်ယောက်သည် သင်ဖြစ်စေချင်သလို သင်နှင့်ရင်းနှီးမလာလျှင် မိမိဖြစ်စေ၊ ထိုသူဖြစ်စေ ချွတ်ယွင်းနေ၍ဖြစ်မည်ဟု အလျင်အမြန် ကောက်ချက်မချလိုက်ပါနှင့်။ ထိုသူနှင့် ခင်မင်ရင်းနှီးအောင် အတင်းမကြိုးစားပါနှင့်။ ထိုသူခွင့်ပြုသ၍ သင်ဖော်ရွေမှုပြနိုင်သမျှ ဆက်ပြသွားမည်ဆိုလျှင် နောင်တွင် တဖြည်းဖြည်း သင်နှင့်ရင်းနှီးလာစရာအကြောင်း ရှိပေမည်။
“သင်ကား ငါနှစ်သက်မြတ်နိုးရာ” ဖြစ်၏
၁၅။ ချီးမွမ်းပြောဆိုခြင်း၊ မပြောဆိုခြင်းက အခြားသူတို့အပေါ် အဘယ်အကျိုးသက်ရောက်သနည်း။
၁၅ မိမိနှစ်ခြင်းခံချိန်တွင် “သင်ကား ငါနှစ်သက်မြတ်နိုးရာ” ဖြစ်၏ဟူသော ကောင်းကင်မှအသံတော်ကို ကြားရသောအခါ ယေရှု ဝမ်းသာလိုက်မည်ဖြစ်ခြင်း! (မာကု ၁:၁၁) နှစ်သက်လက်ခံကြောင်း ဤဖော်ပြချက်သည် မိမိအား ခမည်းတော်အလွန်ချစ်ခင်တွယ်တာသည်ဟူသော ယေရှု၏ခံယူချက်ကို ပိုခိုင်မြဲစေခဲ့ရမည်။ (ယောဟန် ၅:၂၀) ဝမ်းနည်းစရာမှာ လူအချို့သည် မိမိတို့လေးစားချစ်မြတ်နိုးသူများထံမှ ဤသို့သော စကားမျိုးကို မကြားဖူးကြပေ။ “ကျွန်မလိုပဲ လူငယ်အတော်များများမှာ ကိုယ့်ရဲ့ခရစ်ယာန်ယုံကြည်ချက်ကို လက်မခံတဲ့ အိမ်သားတွေရှိကြတယ်။ အိမ်မှာ ဝေဖန်သံတွေပဲ ကြားရတယ်။ အဲဒါက ကျွန်မတို့ကို အရမ်းဝမ်းနည်းစေတယ်” ဟု အဲန်းကဆိုသည်။ သို့သော် ထိုသူတို့သည် အသင်းတော်သားများဖြစ်လာကြသောအခါ ယုံကြည်ခြင်းတူသူ ဝိညာဉ်ရေး ဖခင်မိခင်များ၊ ညီအစ်ကိုညီအစ်များ၏ ဖေးမကူညီမှု၊ ဂရုစိုက်မှုတို့က သူတို့ကို နွေးထွေးမှုရှိစေသည်။—မာကု ၁၀:၂၉၊ ၃၀; ဂလာတိ ၆:၁၀။
၁၆။ အခြားသူတို့ကို အပြစ်ရှာခြင်းက အဘယ်ကြောင့် အထောက်အကူမဖြစ်နိုင်သနည်း။
၁၆ အချို့သော ယဉ်ကျေးမှုများတွင် မိဘများ၊ အသက်ကြီးသူများနှင့် ဆရာဆရာမများသည် လူငယ်များကို အားတက်သရော မချီးမွမ်းကြချေ၊ ထိုသို့ချီးမွမ်းပေးခြင်းက သူတို့လေးများအား ကိုယ့်ကိုယ်ကို အားရကျေနပ် သို့မဟုတ် ဘဝင်မြင့်သွားစေနိုင်သည်ဟု ထင်မြင်ယူဆကြသည်။ ခရစ်ယာန်မိသားစုများနှင့် အသင်းတော်၌ပင် ထိုအတွေးမျိုး ရှိနိုင်သည်။ ဟောပြောချက်တစ်ခု သို့မဟုတ် အခြားကြိုးပမ်းလုပ်ဆောင်မှုတစ်ခုနှင့်ပတ်သက်၍ လူကြီးများက “မဆိုးပါဘူး၊ ဒါပေမဲ့ ဒီထက်ပိုကောင်းအောင် ကြိုးစားနိုင်သေးတယ်!” ဟုဆိုပေမည်။ သို့မဟုတ် အခြားတစ်နည်းနည်းဖြင့် လူငယ်တစ်ဦးအား အားရကျေနပ်မှုမရှိသေးကြောင်း ပြောပေမည်။ ထိုသို့ပြုခြင်းအားဖြင့် လူငယ်လူရွယ်များ သူတို့၏အလားအလာကို အပြည့်အဝအသုံးချရန် လှုံ့ဆော်ပေးခြင်းဖြစ်သည်ဟု အများက ယူဆကြသည်။ သို့သော် ထိုလုပ်ပုံလုပ်နည်းသည် ဆိုးကျိုးသာဖြစ်စေလေ့ရှိ၏၊ အကြောင်းမှာ ယင်းသည် လူငယ်လူရွယ်များအား တွန့်ဆုတ်သွားစေနိုင်သည် သို့မဟုတ် လက်လှမ်းမမီနိုင်ဟု ခံစားရစေနိုင်သည်။
၁၇။ အခြားသူတို့အား ချီးမွမ်းရန် အဘယ်ကြောင့် အခွင့်အရေးများ ရှာယူသင့်သနည်း။
၁၇ သို့ရာတွင် အကြံဉာဏ်ပေးရန် လမ်းခင်းသည့်အနေဖြင့်သာ ချီးမွမ်းပေးခြင်းမျိုး မဖြစ်သင့်ပေ။ စိတ်ရင်းမှန်ဖြင့် ချီးမွမ်းပေးခြင်းက မိသားစုနှင့် အသင်းတော်အတွင်း ချစ်ခင်တွယ်တာမှုကို တိုးစေသည်၊ ဤသို့ဖြင့် လူငယ်လူရွယ်များသည် အတွေ့အကြုံရှိ ညီအစ်ကိုညီအစ်မများထံ အကြံဉာဏ်တောင်းခံလာမည်။ ထို့ကြောင့် ခေတ်ယဉ်ကျေးမှုအရ အခြားသူများနှင့် ဆက်ဆံမည့်အစား “မှန်သောဖြောင့်မတ်ခြင်းနှင့် တည်ကြည်ခြင်းဖြင့် ဘုရားသခင်၏အလိုတော်နှင့်အတူအမျှ ဖန်ဆင်းသောလူသစ်ကို ယူတင်ဝတ်ဆောင်ကြ” ပါစို့။ ယေဟောဝါနည်းတူ ချီးမွမ်းပြောဆိုကြပါလေ။—ဧဖက် ၄:၂၄၊ ကဘ။
၁၈။ (က) လူကြီးများထံမှ အကြံဉာဏ်ကို လူငယ်လူရွယ်များ မည်သို့ရှုမြင်သင့်သနည်း။ (ခ) လူကြီးများသည် မည်သို့အကြံပေးနိုင်ပုံနှင့်ပတ်သက်၍ အဘယ်ကြောင့်ဂရုတစိုက်ရှိရမည်နည်း။
၁၈ အခြားတစ်ဖက်တွင်မူ လူငယ်လူရွယ်တို့၊ လူကြီးများက သင့်ကို ဆုံးမပဲ့ပြင်မည်၊ အကြံပြုမည်ဆိုလျှင် သင့်ကို သူတို့သဘောမကျ၍ဖြစ်မည်ဟု ကောက်ချက်မချပါနှင့်။ (ဒေ. ၇:၉) ထိုသို့လုံးဝမဟုတ်ပါ! သူတို့သည် သင့်အတွက် စိုးရိမ်ပူပန်ပြီး သင့်ကို အလွန်ချစ်ခင်တွယ်တာကြ၍သာ ဖြစ်သည်။ ထိုသို့မဟုတ်ခဲ့လျှင် ယင်းကိစ္စကို သင့်အား အဘယ်ကြောင့်အပင်ပန်းခံပြီး ထုတ်ပြောပါမည်နည်း။ စကားများသည် မည်မျှအကျိုးသက်ရောက်မှုရှိနိုင်သည်ကို လူကြီးများ၊ အထူးသဖြင့် အသင်းတော်အကြီးအကဲများ သိထားကြကာ သူတို့သည် ကောင်းမှုကိုသာပြုလိုကြသောကြောင့် သွန်သင်ချက်မပေးမီ အချိန်များစွာအကုန်ခံ၍ စဉ်းစားတွေးတောကာ ဆုတောင်းတတ်ကြသည်။—၁ ပေတရု ၅:၅။
‘ယေဟောဝါသည် အလွန်ချစ်ခင်တွယ်တာတော်မူ၏’
၁၉။ စိတ်ပျက်အားလျော့နေသူတို့သည် ထောက်မမှုရရန် အဘယ်ကြောင့် ယေဟောဝါအား မျှော်ကိုးနိုင်သနည်း။
၁၉ မနှစ်မြို့ဖွယ်အတွေ့အကြုံများကြောင့် ချစ်ခင်တွယ်တာမှုပြခြင်းသည် ထပ်၍ စိတ်ပျက်ဖွယ်ရာသာ ဖြစ်မည်ဟု လူတချို့ ခံစားခဲ့ရပေမည်။ ထို့ကြောင့် အခြားသူများကို ပြန်၍ရင်ဖွင့်ဖို့ကား သူတို့တွင် ခိုင်မာသောယုံကြည်ခြင်းနှင့် သတ္တိရှိဖို့လို၏။ သို့သော် ယေဟောဝါသည် ‘ကျွန်ုပ်တို့တစ်ဦးစီနှင့် ဝေးတော်မမူ’ ကြောင်း သူတို့မမေ့လျော့သင့်ပေ။ မိမိထံချဉ်းကပ်ကြရန် ကျွန်ုပ်တို့အား ကိုယ်တော်ဖိတ်ခေါ်တော်မူ၏။ (တမန်တော် ၁၇:၂၇; ယာကုပ် ၄:၈) ထို့ပြင် စိတ်ထိခိုက်မည်ကို ကျွန်ုပ်တို့စိုးရွံ့ကြောင်း ကိုယ်တော်နားလည်တော်မူကာ ကျွန်ုပ်တို့ကို ကူညီထောက်မပေးမည်ဟု ကတိပြုတော်မူ၏။ ကျွန်ုပ်တို့အား ဆာလံဆရာဒါဝိဒ်က ဤသို့အာမခံသည်– ‘ယေဟောဝါသည် နှလုံးကြေကွဲသူတို့နှင့် နီးတော်မူ၏; စိတ်ကြေမွသူတို့ကိုလည်း ကယ်တင်တော်မူ၏။’—ဆာလံ ၃၄:၁၈၊ သမ္မာ။
၂၀၊ ၂၁။ (က) ယေဟောဝါနှင့်ရင်းနှီးသောဆက်ဆံရေး ရှိနိုင်ကြောင်း ကျွန်ုပ်တို့မည်သို့သိရသနည်း။ (ခ) ယေဟောဝါနှင့်ရင်းနှီးကျွမ်းဝင်ဖို့ အဘယ်အရာလိုအပ်သနည်း။
၂၀ ယေဟောဝါနှင့် ရင်းနှီးကျွမ်းဝင်ခြင်းသည် ကျွန်ုပ်တို့ပြုစုပျိုးထောင်နိုင်သည့် အရေးအပါဆုံးသော ဆက်ဆံရေးဖြစ်၏။ သို့သော် ထိုကဲ့သို့ရင်းနှီးကျွမ်းဝင်မှုမျိုး အမှန်တကယ်ရှိနိုင်ပါမည်လော။ ရှိနိုင်ပါသည်။ ဖြောင့်မတ်သောအမျိုးသား၊ အမျိုးသမီးများသည် ကျွန်ုပ်တို့၏ကောင်းကင်ခမည်းတော်နှင့် အလွန်ရင်းနှီးကျွမ်းဝင်ခဲ့ကြောင်း သမ္မာကျမ်းစာက ဖော်ပြပေးသည်။ ကျွန်ုပ်တို့လည်း ယေဟောဝါနှင့်ရင်းနှီးကျွမ်းဝင်နိုင်ကြောင်း ယုံကြည်စိတ်ချစေရန် သူတို့၏ လှိုက်လှိုက်လှဲလှဲ ဖော်ပြကြသည့် စကားများကို မှတ်တမ်းတင် ရေးသားထားသည်။—ဆာလံ ၂၃၊ ၂၄၊ ၁၃၉; ယောဟန် ၁၆:၂၇; ရောမ ၁၅:၄။
၂၁ ယေဟောဝါနှင့်ရင်းနှီးကျွမ်းဝင်ရန် ကိုယ်တော်၏တောင်းဆိုချက်များကို လူတိုင်း လက်လှမ်းမီနိုင်ကြသည်။ ‘အိုယေဟောဝါ၊ တဲတော်၌ အဘယ်သူသည် တည်းရပါမည်နည်း’ ဟု ဒါဝိဒ်မေးခဲ့သည်။ ‘ဖြောင့်မတ်သောအကျင့်၊ တရားသောအမှုကိုပြုကျင့်၍ အမှန်တရားကို စိတ်နှလုံးပါလျက် ပြောသောသူပေတည်း။’ (ဆာလံ ၁၅:၁၊ ၂; ၂၅:၁၄) ဘုရားသခင်၏အမှုတော်ကိုဆောင်ခြင်းသည် အကျိုးဖြစ်ထွန်းစေပြီး ကိုယ်တော်၏လမ်းညွှန်မှုနှင့် ကာကွယ်စောင့်ရှောက်မှုကိုရရှိစေကြောင်း ကျွန်ုပ်တို့သိမြင်လာသည်နှင့်အမျှ ‘ယေဟောဝါသည် အလွန်သနားစုံမက် [“ချစ်ခင်တွယ်တာ၊” ကဘ] တော်မူကြောင်း’ ကျွန်ုပ်တို့သဘောပေါက်လာပါလိမ့်မည်။—ယာကုပ် ၅:၁၁။
၂၂။ ယေဟောဝါသည် မိမိလူမျိုးတော်အား အဘယ်ရင်းနှီးမှုမျိုးကို ရရှိစေလိုတော်မူသနည်း။
၂၂ ယေဟောဝါသည် မစုံလင်သည့်လူသားများနှင့် ထိုသို့သောနှစ်ကိုယ်ကြားဆက်ဆံရေး ရှိလိုတော်မူခြင်းသည် ကျွန်ုပ်တို့အတွက် အမှန်တကယ်ပင် ကောင်းချီးပါတကား! သို့ဖြစ်၍ ကျွန်ုပ်တို့သည် တစ်ဦးနှင့်တစ်ဦး ချစ်ခင်တွယ်တာမှု ပြသင့်သည်မဟုတ်ပေလော။ ယေဟောဝါ၏အကူအညီဖြင့် ကျွန်ုပ်တို့တစ်ဦးစီသည် ခရစ်ယာန်ညီအစ်ကိုအသင်းအပင်း၏ သွင်ပြင်လက္ခဏာဖြစ်သော ချစ်ခင်တွယ်တာမှုကို ပေးကမ်းရယူနိုင်ကြသည်။ ဘုရားသခင့်နိုင်ငံတော်တွင် ကမ္ဘာမြေကြီးပေါ်ရှိသူအားလုံး ဤချစ်ခင်တွယ်တာမှုကို ထာဝစဉ်ခံစားရကြပါလိမ့်မည်။
သင်ရှင်းပြနိုင်သလော
• ခရစ်ယာန်အသင်းတော်တွင် အဘယ်စရိုက်လက္ခဏာဝန်းကျင်မျိုး ရှိသင့်သနည်း။
• အသင်းတော်တွင် ချစ်ခင်တွယ်တာမှုကို ကျွန်ုပ်တို့တစ်ဦးစီ မည်သို့တင်ပြနိုင်သနည်း။
• စိတ်ရင်းမှန်ဖြင့် ချီးမွမ်းပေးခြင်းက ခရစ်ယာန်ချစ်ခင်တွယ်တာမှုကို မည်သို့ တိုးပွားစေနိုင်သနည်း။
• ယေဟောဝါ၏ချစ်ခင်တွယ်တာမှုသည် ကျွန်ုပ်တို့ကို မည်သို့ ထောက်မကူညီပေးနိုင်သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
ခရစ်ယာန်အချင်းချင်းသည် တာဝန်ရှိ၍သာ ချစ်သည်မဟုတ်
[စာမျက်နှာ ၁၆၊ ၁၇ ပါ ရုပ်ပုံ]
သင်၏ချစ်ခင်တွယ်တာမှုကို “ကျယ်ဝန်း” စေနိုင်ပါသလော
[စာမျက်နှာ ၁၈ ပါ ရုပ်ပုံ]
သင်သည် အပြစ်ရှာတတ်သလော၊ အားပေးတည်ဆောက်တတ်ပါသလော