သူ၏ယုံကြည်ချက်များကို ကျောင်းနေဖက်များအား ဝေမျှခဲ့
သူ၏ယုံကြည်ချက်များကို ကျောင်းနေဖက်များအား ဝေမျှခဲ့
ကျမ်းစာကိုအခြေပြုသော သင့်ယုံကြည်ချက်များကို ကျောင်းနေဖက်များအား ပိုမိုသိရှိနားလည်စေလိုပါသလော။ ပိုလန်နိုင်ငံမှ ၁၈ နှစ်အရွယ် အထက်တန်းကျောင်းသူ မာဒလေးနာသည် ယေဟောဝါသက်သေတစ်ဦးအနေနှင့် သူ၏ယုံကြည်ချက်များကို ကျောင်းနေဖက်များအား ပြောပြလေ့ရှိသည်။ ထိုသို့ပြောပြသည့်အတွက် ‘ယေဟောဝါသက်သေတစ်ယောက်ဖြစ်ခြင်းက ဘာကိုဆိုလိုသလဲ’ နှင့် ‘ယေရှုခရစ်ကို မယုံကြည်ဘူးလား’ စသည့်မေးခွန်းများ အမေးခံရလေ့ရှိသည်။ ကျောင်းနေဖက်များကို သူမည်သို့ ကူညီပေးနိုင်ခဲ့သနည်း။ မာဒလေးနာသည် လမ်းညွှန်မှုရဖို့ ယေဟောဝါထံ ဆုတောင်းပြီး ဆုတောင်းချက်နှင့်အညီ လုပ်ဆောင်ခဲ့သည်။—ယာကုပ် ၁:၅။
တစ်နေ့တွင် မာဒလေးနာသည် ယေဟောဝါသက်သေများ—နာမည်နောက်ဝယ်ရှိအဖွဲ့အစည်း * ဗီဒီယိုခွေကို အတန်းထဲပြသ၍ရမရ သူ့ကိုကူညီလိုစိတ်ရှိသောဆရာမအား မေးကြည့်သည်။ ဆရာမက ယင်းကို သဘောတူ၏။ ထိုအခါ မာဒလေးနာက သူ၏အတန်းဖော်များကို ဤသို့ပြောပြသည်– “မိနစ် ၉၀ ကြာတဲ့ အစီအစဉ်တစ်ခုကို အတန်းရှေ့တင်ဆက်ဖို့ ကျွန်မရဲ့သူငယ်ချင်းတစ်ယောက်နဲ့အတူ စီစဉ်ထားတယ်။ ဗီဒီယိုပြမယ်၊ ပြီးတော့ ယေဟောဝါသက်သေတွေနဲ့ပတ်သက်ပြီး ဆွေးနွေးမယ်။ မင်းတို့လာချင်သလား။” ယောက်တိုင်းက လာမည်ဟုဆို၏။ မာဒလေးနာနှင့် အတွေ့အကြုံများသော အချိန်ပြည့်ဧဝံဂေလိတရားဟောပြောသူ ဝို့စီရေ့ဂျ်တို့သည် ထိုအစီအစဉ်အတွက် စတင်ပြင်ဆင်ကြသည်။
ယေဟောဝါသက်သေများ—သူတို့မည်သူများနည်း။ သူတို့ဘာကိုယုံကြည်ကြသနည်း။ * ဘရိုရှာကိုအခြေပြုသည့် မိနစ် ၂၀ ဟောပြောချက်ဖြင့် အစီအစဉ်တင်ဆက်မှုကို အစပြုပြီးနောက် အမေးအဖြေဆွေးနွေးရန်ဖြစ်သည်။ ထို့နောက် ကျောင်းစာကြည့်တိုက်တွင် ဗီဒီယိုခွေကို ပြသမည်။ အတန်းထဲရှိ ကျောင်းသူကျောင်းသားယောက်တိုင်းကို လက်ဆောင်တစ်ခု—ဘရိုရှာအနည်းငယ်၊ လူငယ်များအမေး—တာသွားသည့်အဖြေ * စာအုပ်၊ ဝေစာနှင့် မဂ္ဂဇင်းအချို့ပါသော စာအိတ်ကြီးတစ်လုံး—ပေးမည်ဖြစ်သည်။
အစီအစဉ်တင်ဆက်သည့်နေ့တွင် အတန်းဖော် ၁၄ ဦး၊ ဆရာမနှင့် စာကြည့်တိုက်တွင် အမှတ်မထင်ရှိနေသည့် အခြားကျောင်းသား ၄ ဦး တက်ရောက်ကြသည်။ ဦးဆုံး ဝို့စီရေ့ဂျ်က အချို့သော ပိုလန်ကဗျာဆရာများနှင့် စာရေးဆရာများသည် မိမိတို့၏လက်ရာစာစောင်များတွင် ဘုရားသခင့်နာမတော် ယေဟောဝါကိုအသုံးပြုကြကြောင်း ရှင်းပြသည်။ ဘုရားသခင့်နာမတော်ပါဝင်သော ကက်သလစ်ဓမ္မပုစ္ဆာကျမ်းဟောင်းအချို့ကိုလည်း သူဖော်ပြသည်။ ယေဟောဝါသက်သေများ၏ ယခုခေတ်လုပ်ဆောင်မှုအကြောင်းရှင်းပြသောအခါ ဌာနခွဲရုံးအသီးသီးနှင့် စည်းဝေးပွဲခန်းမအချို့၏ဓာတ်ပုံများပါသော ဘရိုရှာများကို သူပြသခဲ့သည်။
အသက်ဝင်သောဆွေးနွေးမှုကို ဖြစ်ပေါ်စေခဲ့သည်။ မာဒလေးနာနှင့် ဝို့စီရေ့ဂျ်တို့သည် ကျမ်းစာကိုသုံးပြီး မေးခွန်းများကိုဖြေဆိုကြသည်။ ထိုသို့ပြုခြင်းက ပရိသတ်ကိုစွဲမှတ်စေပြီး ယေဟောဝါသက်သေများသည် မိမိတို့ကိုယ်ပိုင်အယူအဆများကို သွန်သင်နေကြခြင်းမဟုတ်ကြောင်း လက်ခံယုံကြည်စေခဲ့သည်။ မေးခွန်းအချို့ကား အဘယ်နည်း၊ သူတို့မည်သို့ဖြေဆိုခဲ့ကြသနည်း။
မေး– သမ္မာကျမ်းစာဟာ မရှင်းလင်းတဲ့အသုံးအနှုန်းတွေ၊ အဓိပ္ပာယ်အမျိုးမျိုးကောက်နိုင်တဲ့ ဥပစာစကားတွေနဲ့ ပြည့်နေတယ်။ ဘယ်လိုလုပ်ပြီး ကျမ်းစာနဲ့အညီ အသက်ရှင်နေထိုင်နိုင်မလဲ။
ဖြေ– သမ္မာကျမ်းစာဟာ ကိုယ်ကြိုက်သလို သံစဉ်ညှိနိုင်တဲ့ တယောတစ်လက်နဲ့တူတယ်လို့ တချို့ကပြောကြတယ်။ ဒါပေမဲ့ စဉ်းစားကြည့်– စာရေးသူတစ်ယောက်ရဲ့ ရေးသားချက်တွေက ဘာကိုဆိုလိုတယ်ဆိုတာသိချင်ရင် သူ့ကိုမေးကြည့်တာ အကောင်းဆုံးပဲမဟုတ်လား။ သေမျိုးဖြစ်တဲ့ လူသားစာရေးဆရာတွေနဲ့မတူဘဲ သမ္မာကျမ်းစာရဲ့အာဘော်ရှင် ယေဟောဝါဘုရားသခင်ဟာ အသက်ရှင်တယ်။ (ရောမ ၁:၂၀; ၁ ကောရိန္သု ၈:၅၊ ၆) ကျမ်းချက်တစ်ချက်ရဲ့ ရှေ့နောက်စကားတွေက အဓိပ္ပာယ်အမှန်ကို ဖော်ပြနိုင်တယ်။ ဒါ့အပြင် သမ္မာကျမ်းစာဟာ တစ်ခုတည်းသောအကြောင်းအရာကို တခြားနေရာတွေမှာ ထပ်ကျော့ဖော်ပြလေ့ရှိတဲ့အတွက် အဲဒီကျမ်းချက်တွေကို နှိုင်းယှဉ်ကြည့်ခြင်းက အထောက်အကူပြုနိုင်တယ်။ ဒီနည်းအားဖြင့် ဘုရားသခင်ကိုယ်တိုင် ကျမ်းချက်ကို ရှင်းပြနေသလိုမျိုး၊ ကျွန်ုပ်တို့ရဲ့အတွေးအခေါ်တွေအပေါ် ကိုယ်တော်လမ်းညွှန်တာကို ခံယူနိုင်တယ်။ ဒီလိုလုပ်ခြင်းအားဖြင့် သမ္မာကျမ်းစာမှာ ဖော်ပြထားတဲ့ ကိုယ်တော်ရဲ့အလိုတော်ကို ကျွန်ုပ်တို့သိရှိလာပြီး အဲဒီအတိုင်းအသက်ရှင်နိုင်မယ်၊ ဟုတ်တယ်မဟုတ်လား။
မေး– ခရစ်ယာန်တွေနဲ့ ယေဟောဝါသက်သေတွေ ဘယ်လိုကွာသလဲ။
ဖြေ– ကျွန်ုပ်တို့ဟာ ခရစ်ယာန်တွေဖြစ်ပါတယ်! ဒါပေမဲ့ ခရစ်ယာန်တွေပါလို့ပြောရုံပြောမယ့်အစား ယေဟောဝါသက်သေတွေဟာ သူတို့ရဲ့ယုံကြည်ချက်၊ ပြီးတော့ သူတို့အကျိုးအတွက် ဘုရားသခင့်သွန်သင်ပေးချက်တွေနဲ့အညီ ကြိုးစားနေထိုင်ကြပါတယ်။ (ဟေရှာယ ၄၈:၁၇၊ ၁၈) သူတို့ရဲ့သွန်သင်ချက်မှန်သမျှ သမ္မာကျမ်းစာအပေါ် အခြေပြုတာကြောင့် သူတို့မှာ အမှန်တရားရှိတယ်ဆိုတာ သိထားကြတယ်။—မဿဲ ၇:၁၃၊ ၁၄၊ ၂၁-၂၃။
မေး– သူစိမ်းပြင်ပြင်တွေဆီ ချဉ်းကပ်ပြီး ဘာဖြစ်လို့ မရမက စကားလိုက်ပြောတာလဲ။ အဲလိုလုပ်တာက ခင်ဗျားတို့ရဲ့ယုံကြည်ခြင်းကို အတင်းအကျပ်ခံယူစေတာ မဟုတ်ဘူးလား။
ဖြေ– လမ်းပေါ်ကလူတစ်ယောက်က ခင်ဗျားကို ယဉ်ယဉ်ကျေးကျေးစကားပြောပြီး တစ်ခုခုနဲ့ပတ်သက်လို့ ခင်ဗျားရဲ့အမြင်မေးတာကို မှားတယ်လို့ ယူဆသလား။ (ယေရမိ ၅:၁; ဇေဖနိ ၂:၂၊ ၃) (ထို့နောက် ပိုလန်နိုင်ငံတွင် မကြာသေးမီက ရေလွှမ်းမိုးဘေးခံရသူတို့အား ဘုရားသခင် ဂရုစိုက်မစိုက် ဖြတ်လျှောက်သွားသူအား မေးမြန်းပုံကို ဝို့စီရေ့ဂျ်နှင့် မာဒလေးနာတို့ သရုပ်ပြကြသည်။) အဲဒီလူရဲ့ယူဆချက်ကို နားထောင်ပြီးတော့ သမ္မာကျမ်းစာကို ကျွန်ုပ်တို့ညွှန်ပြတယ်။ တစ်ယောက်ယောက်က စကားမပြောချင်ဘူးဆိုရင် သူ့ကိုနှုတ်ဆက်ပြီး ဆက်သွားတယ်။ (မဿဲ ၁၀:၁၁-၁၄) အဲဒါက အတင်းအကျပ် လိုက်စကားပြောတာလား။ ဒါမှမဟုတ် လုံးလုံးစကားစမြည် မပြောရတော့ဘူးလား။
မေး– အခါကြီးရက်ကြီးတွေကို ခင်ဗျားတို့ ဘာဖြစ်လို့ မကျင်းပတာလဲ။
ဖြေ– ယေရှုခရစ်ရဲ့သေခြင်းကို သတိရအောက်မေ့ပွဲဆိုတဲ့ သမ္မာကျမ်းစာမိန့်မှာထားတဲ့ တစ်ခုတည်းသောပွဲကိုပဲ ကျွန်ုပ်တို့ ကျင်းပတယ်။ (၁ ကောရိန္သု ၁၁:၂၃-၂၆) အခါကြီးရက်ကြီးတွေနဲ့ပတ်သက်လို့ကတော့ စွယ်စုံကျမ်းတွေနဲ့ တခြားစိတ်ချနိုင်တဲ့ ရင်းမြစ်တွေကနေ အဲဒီပွဲနေ့တွေရဲ့ဇာစ်မြစ်ကို ရှာဖွေကြည့်ရှုနိုင်ပါတယ်။ အဲလိုလုပ်မယ်ဆိုရင် အဲဒီပွဲတစ်ခုကိုမှ ကျွန်ုပ်တို့ မကျင်းပရတဲ့အကြောင်းရင်းကို ရှာတွေ့မှာပါ။—၂ ကောရိန္သု ၆:၁၄-၁၈။
အခြားမေးခွန်းများစွာကို မေးဖြေပြုလုပ်ခဲ့ကြသည်။ ဆွေးနွေးမှုအလွန်ကြာသွားရာ ဗီဒီယိုပြသမှုကို ရွှေ့ဆိုင်းလိုက်ရသည်။
ကျောင်းသားများ မည်သို့တုံ့ပြန်ခဲ့ကြသနည်း။ မာဒလေးနာပြောပြပါစေ– “မိုက်ရူးရဲလုပ်ပြီး တခြားသူတွေကို လှောင်ပြောင်လေ့ရှိတဲ့ ကျောင်းသားတချို့က အရေးကြီးတဲ့မေးခွန်းတွေမေးကြလို့ ကျွန်မအံ့သြခဲ့ရတယ်။ ဘုရားသခင်မဲ့ဝါဒီတွေပါလို့ ဆိုကြပေမဲ့ ဆွေးနွေးနှီးနှောချိန်အတွင်း ဘုရားသခင်ကို ယုံကြည်ကြောင်း သူတို့ဖော်ပြခဲ့ကြတယ်!” တက်ရောက်ခဲ့ကြသူတို့သည် လက်ဆောင်များကို ကျေးဇူးတင်စွာ လက်ခံခဲ့ကြရာ စုစုပေါင်း စာအုပ် ၃၅ အုပ်၊ ဘရိုရှာ ၆၃ စောင်နှင့် မဂ္ဂဇင်း ၃၄ စောင်ဝေငှခဲ့ရသည်။
ကျောင်းအစီအစဉ်မှ အလွန်ကောင်းသောအကျိုးဆက်များရခဲ့ခြင်းပင်! ထိုအစီအစဉ်သည် ယေဟောဝါသက်သေများအကြောင်း မာဒလေးနာ၏အတန်းဖော်များကို ပိုမိုသိရှိနားလည်စေရုံမက ဘဝရည်ရွယ်ချက်အကြောင်းစဉ်းစားရန် လူငယ်များစွာကို အားပေးမှုလည်းဖြစ်စေခဲ့သည်။ သင်၏ယုံကြည်ချက်အကြောင်း သင်၏အတန်းဖော်များ ပိုမိုသိရှိလာစေဖို့ ကြိုးစားကူညီပေးကြည့်ပါ။
[အောက်ခြေမှတ်]
^ အပိုဒ်၊ 3 ယေဟောဝါသက်သေများ ထုတ်ဝေသည်။
^ အပိုဒ်၊ 4 ယေဟောဝါသက်သေများ ထုတ်ဝေသည်။
^ အပိုဒ်၊ 4 ယေဟောဝါသက်သေများ ထုတ်ဝေသည်။
[စာမျက်နှာ ၃၁ ပါ ရုပ်ပုံ]
မာဒလေးနာနှင့် ဝို့စီရေ့ဂျ်တို့ ဆွေးနွေးရန် ပြင်ဆင်နေ