ဦးဆောင်ဖို့ အမှန်တကယ် အရည်အချင်းရှိသူတစ်ဦး
ဦးဆောင်ဖို့ အမှန်တကယ် အရည်အချင်းရှိသူတစ်ဦး
လွန်ခဲ့သော အနှစ်နှစ်ထောင်က ကောင်းကင်တမန်တစ်ပါးသည် မာရိအမည်ရှိ ဂျူးအမျိုးသမီးငယ်တစ်ဦးကို ဤသို့မိန့်ဆိုခဲ့သည်– “သင်သည် ပဋိသန္ဓေစွဲယူ၍ သားယောက်ျားကို ဖွားမြင်လိမ့်မည်။ ထိုသားကို ယေရှုအမည်ဖြင့် မှည့်ရမည်။ ထိုသားသည်ကား၊ ကြီးမြတ်သောသူဖြစ်လိမ့်မည်။ အမြင့်ဆုံးသောဘုရား[သခင်]၏ သားတော်ဟု ခေါ်ဝေါ်သမုတ်ခြင်းကို ခံရလိမ့်မည်။ သူ့အဘဒါဝိဒ်၏ရာဇပလ္လင်ကို ထာဝရအရှင်ဘုရားသခင်သည် သူ့အားပေးတော်မူမည်။ ထိုသူသည်လည်း ယာကုပ်အမျိုးအနွယ်ကို အစဉ်မပြတ်အုပ်စိုးလိမ့်မည်။ သူ၏နိုင်ငံသည်လည်း ဆုံးခြင်းမရှိရ။” (လုကာ ၁:၃၁-၃၃) မှန်ပါသည်၊ နာဇရက်မြို့သားယေရှုသည် သမ္မာကျမ်းစာပရောဖက်ပြုချက် ခွဲခြားဖော်ပြသည့် ရှင်ဘုရင်ဖြစ်သည်။
ဘာသာရေးပန်းချီကားချပ်တို့က ယေရှုကို ကလေးငယ်တစ်ဦးအဖြစ်၊ အာဟာရချို့တဲ့နေသော လူပျော့တစ်ဦးအဖြစ်၊ ကြုံတွေ့ရာကို မျက်စိစုံမှိတ် ခေါင်းငုံ့ခံသည့် ခြိုးခြံ၍ကျင့်သူတစ်ဦးအဖြစ် ပုံဖော်လေ့ရှိသည်။ အဆိုပါရုပ်ပုံများက ကိုယ်တော်အား အုပ်စိုးရှင်အဖြစ် ယုံကြည်ကိုးစားမှု မရှိစေပါ။ သို့သော် သမ္မာကျမ်းစာ၏ တကယ့်ယေရှုခရစ်သည် ဇွဲထက်သန်မှုနှင့် ဦးဆောင်မှုစွမ်းရည်အပြည့်ရှိ ထက်မြက်ရင့်ကျက်သော အမျိုးသားတစ်ဦးအဖြစ် ကြီးပြင်းလာပါသည်။ ထို့အပြင် ကိုယ်တော်တွင် ခေါင်းဆောင်မှုအတွက် အရည်အချင်းပြည့်မီစေသည့် အခြားအရည်အသွေးများလည်းရှိ၏။ (လုကာ ၂:၅၂) အောက်ပါတို့မှာ ကိုယ်တော်၏ ထူးခြားသောကိုယ်ရည်ကိုယ်သွေး အနည်းငယ်သာဖြစ်သည်။
ယေရှုသည် သမာဓိ အပြည့်အဝရှိ၏။ ကိုယ်တော်၏ ရိုးသားဖြောင့်မတ်သောအပြုအမူက ရန်သူများအား မိမိကို ခြေမြစ်သောစွဲချက်တင်ရန် လူသိရှင်ကြား စိန်ခေါ်စေခဲ့သည်။ ထိုရန်သူများသည် ကိုယ်တော်အား မစွပ်စွဲနိုင်ခဲ့ကြချေ။ (ယောဟန် ၈:၄၆) ကိုယ်တော်၏ အယောင်ဆောင်မှုကင်းမဲ့သည့် သွန်သင်ချက်များက စိတ်ရိုးမှန်သူများစွာကို ကိုယ်တော်၏နောက်တော်လိုက်များဖြစ်လာစေ၏။—ယောဟန် ၇:၄၆; ၈:၂၈-၃၀; ၁၂:၁၉။
ယေရှုသည် ဘုရားသခင်ထံ အပြည့်အဝ ဆက်ကပ်အပ်နှံထား၏။ ကိုယ်တော်သည် ဘုရားသခင်ခန့်အပ်ထားသည့် လုပ်ငန်းကို အပြီးလုပ်ဆောင်ရန် အလွန်စိတ်ထက်သန်သည်၊ ကိုယ်တော်အား ခြိမ်းခြောက်ဟန့်တားနိုင်သည့် လူသားပြိုင်ဘက် သို့မဟုတ် နတ်ဆိုးပြိုင်ဘက် မရှိချေ။ အကြမ်းဖက်တိုက်ခိုက်မှုများက ကိုယ်တော်အား ထိတ်လန့်မသွားစေပါ။ (လုကာ ၄:၂၈-၃၀) ပင်ပန်းနွမ်းနယ်မှုနှင့် ဆာလောင်မွတ်သိပ်မှုတို့က ကိုယ်တော့်ကို စိတ်ဓာတ်မကျစေခဲ့ပါ။ (ယောဟန် ၄:၅-၁၆၊ ၃၁-၃၄) ယေရှု၏မိတ်ဆွေများက ကိုယ်တော်ကို စွန့်ပစ်သွားသည့်တိုင် ကိုယ်တော်သည် မိမိ၏ပန်းတိုင်မှ လွဲချော်မသွားခဲ့ချေ။—မဿဲ ၂၆:၅၅၊ ၅၆; ယောဟန် ၁၈:၃-၉။
ယေရှုသည် လူတို့အတွက် အလွန်စိုးရိမ်ပူပန်တော်မူ၏။ ဆာလောင်နေသူတို့ကို အစားအသောက် စီမံပေးခဲ့၏။ (ယောဟန် ၆:၁၀၊ ၁၁) စိတ်ဓာတ်ကျနေသူတို့ကို နှစ်သိမ့်အားပေးခဲ့၏။ (လုကာ ၇:၁၁-၁၅) မျက်မမြင်သူတို့ကို မျက်စိပြန်မြင်စေ၏၊ နားမကြားသူတို့ကို နားပြန်ကြားစေ၏၊ ဖျားနာသူတို့ကို ပြန်ကျန်းမာလာစေခဲ့၏။ (မဿဲ ၁၂: ၂၂; လုကာ ၈:၄၃-၄၈; ယောဟန် ၉:၁-၆) အလုပ်ကြိုးစားသည့် တမန်တော်များကိုလည်း ကိုယ်တော်အားပေးခဲ့သည်။ (ယောဟန် အခန်းကြီး ၁၃-၁၇) မိမိ၏သိုးတို့ကို ဂရုစိုက်သည့် “ကောင်းသောသိုးထိန်း” ဖြစ်ကြောင်း ကိုယ်တော်သက်သေထူခဲ့၏။—ယောဟန် ၁၀:၁၁-၁၄။
ယေရှုသည် အလုပ်လုပ်ကိုင်ဖို့ အသင့်ရှိသည်။ အရေးကြီးသောသင်ခန်းစာတစ်ရပ်ကို ကိုယ်တော်သွန်သင်ပေးရန် တမန်တော်များ၏ခြေကို ဆေးပေးခဲ့၏။ (ယောဟန် ၁၃: ၄- ၁၅) ဣသရေလတိုင်းပြည်၏ ဖုန်ထူသောလမ်းများပေါ်တွင် သတင်းကောင်း လိုက်လံဟောပြောစဉ် ကိုယ်တော်တိုင်၏ခြေများ ပေရေခဲ့သည်။ (လုကာ ၈:၁) “ဆိတ်ကွယ်ရာအရပ်” ၌ အနားယူရန် ကြံရွယ်ထားချိန်၌ပင် ကိုယ်တော့်ကို လူအုပ်က လာရှာ၍ လမ်းညွှန်ချက် ထပ်မံတောင်းဆိုသောအခါ ကိုယ်တော်ချက်ချင်းကူညီပေးခဲ့သည်။ (မာကု ၆:၃၀-၃၄) ဤနည်းဖြင့် ခရစ်ယာန်တိုင်းအတွက် လုံ့လဝီရိယရှိသည့် ပုံသက်သေကို ကိုယ်တော်တင်ပြခဲ့သည်။—၁ ယောဟန် ၂:၆။
ယေရှုသည် မိမိ၏တာဝန်ကို အပြီးထမ်းဆောင်ကာ ကမ္ဘာမြေကြီးပေါ်မှ ထွက်ခွာသွားခဲ့၏။ ကိုယ်တော်သည် တည်ကြည်သောကြောင့် ကိုယ်တော်အား ကောင်းကင်တွင် မသေနိုင်သောအသက်တာရှိ ဘုရင်အရာကို ယေဟောဝါဘုရားသခင် ပေးအပ်ခဲ့လေသည်။ ရှင်ပြန်ထမြောက်ခဲ့သည့် ယေရှုနှင့်စပ်လျဉ်း၍ သမ္မာကျမ်းစာက ဤသို့ဆိုသည်– “ခရစ်တော်သည် သေခြင်းမှထမြောက်သောအခါ၊ သေခြင်းနှင့်အစဉ်ကင်းလွတ်တော်မူ၏။ သေခြင်းတရားသည် နောက်တစ်ဖန် ကိုယ်တော်ကို မအုပ်စိုးရ။” (ရောမ ၆:၉) ကိုယ်တော်၏လုပ်ငန်းသည်လည်း အရည်အချင်းမရှိသော ဆက်ခံသူတစ်ဦးကြောင့် ပျက်စီးသွားစရာအကြောင်း ရှိမည်မဟုတ်။ သို့သော် လူ့အကျိုးအတွက် အဘယ်အရာကို ကိုယ်တော် အထူးသဖြင့် လုပ်ဆောင်တော်မူမည်နည်း။
ဤခေါင်းဆောင်အသစ် လုပ်ဆောင်မည့်အမှု
စုံလင်၍ မသေနိုင်သော ဤရှင်ဘုရင်သည် မည်သို့အုပ်ချုပ်သွားမည်နှင့်စပ်လျဉ်း၍ ဆာလံ ၇၂ [သမ္မာ] က ပရောဖက်ပြုချက်ဆိုင်ရာ အသေးစိတ်အချက်အလက်တချို့ကို ဖော်ပြပေးထားပါသည်။ အခန်းငယ် ၇ နှင့် ၈ တွင် ကျွန်ုပ်တို့ ဤသို့ဖတ်ရ၏– “လက်ထက်တော်၌ ဖြောင့်မတ်ခြင်းတိုးတက်၍ လသည် ပပျောက်ခြင်းသို့ ရောက်သည်တိုင်အောင် ငြိမ်သက်ချမ်းသာများပြားပါစေသော။ ပင်လယ်တစ်ပြင်မှတစ်ပြင်တိုင်အောင်လည်းကောင်း၊ မြစ်ကြီးမှမြေကြီးစွန်းတိုင်အောင်လည်းကောင်း အစိုးရတော်မူပါစေသော။” ကိုယ်တော်၏ အကျိုးပြု အုပ်ချုပ်မှုအောက်တွင် မြေကြီးသားများသည် စဉ်ဆက်မပြတ် ထာဝစဉ်တည်ရှိသော လုံခြုံမှု၌ ပျော်မွေ့ကြရလိမ့်မည်။ ကိုယ်တော်သည် လက်ရှိအဖျက်လက်နက်အားလုံးကို ဖျက်ဆီးပစ်လိုက်ပြီး ဆိုင်ပြိုင်တိုက်ခိုက်လိုသည့် စိတ်ဆန္ဒကိုပင် လူ့နှလုံးထဲမှ ဖယ်ရှားပစ်ပါလိမ့်မည်။ ယနေ့ လုယက်ဖျက်ဆီးတတ်သော ခြင်္သေ့များကဲ့သို့ အခြားသူတို့ကို ရန်မူတိုက်ခိုက်ကြသူများ သို့မဟုတ် မိမိတို့၏အိမ်နီးချင်းများကို ခက်ထန်သောဝက်ဝံများကဲ့သို့ ပြုမူကျင့်ကြံသူများ၏ စိတ်နေစိတ်ထားများသည် လုံးလုံးပြောင်းလဲသွားကြလိမ့်မည်။ (ဟေရှာယ ၁၁:၁-၉) ငြိမ်းချမ်းသာယာမှု များပြားပေလိမ့်မည်။
ဆာလံ ၇၂ အခန်းငယ် ၁၂ မှ ၁၄ တွင် ဤသို့ထပ်၍ဆိုသည်– “နွမ်းပါးသူအော်ဟစ်သောအခါ ထိုသူကိုလည်းကောင်း၊ ခိုကိုးရာမရသောဆင်းရဲသူကိုလည်းကောင်း ကယ်လွှတ်တော်မူ၏။ ဆင်းရဲသူနှင့် နွမ်းပါးသူကို သနား၍ နွမ်းပါးသူတို့၏အသက်ကို ကယ်တင်တော်မူ၏။ သူတို့အသွေးကို နှမြောတော်မူသဖြင့် အသက်ကို ညှဉ်းဆဲခြင်းနှင့် ကြမ်းကြုတ်ခြင်း၏လက်မှ ရွေးနုတ်တော်မူ၏။” ဆင်းရဲနွမ်းပါးသူနှင့် ဖိနှိပ်ခံရသူတို့သည် ဘုရင်ယေရှုခရစ်၏ဦးဆောင်မှုအောက်တွင် စည်းလုံးပျော်ရွှင်သော လူ့မိသားစုကြီးထဲတွင် ပါဝင်လာကြလိမ့်မည်။ ထိုအခါ သူတို့ဘဝအသက်တာတွင် နာကျင်မှုနှင့် မျှော်လင့်ချက်ကင်းမဲ့မှုတို့ မရှိတော့ဘဲ ရွှင်လန်းဝမ်းမြောက်မှုရှိလိမ့်မည်။—ဟေရှာယ ၃၅:၁၀။
အခန်းငယ် ၁၆ က ဤသို့ကတိပေးသည်– “ပြည်တော်၌ များစွာသောစပါးရှိ၍ အသီးအနှံသည် လေဗနုန်တောကဲ့သို့
တောင်ထိပ်ပေါ်မှာလှုပ်ရှားလိမ့်မည်။” ယနေ့ ကမ္ဘာပေါ်ရှိ လူသန်းပေါင်းများစွာသည် ဆာလောင်မွတ်သိပ်နေကြ၏။ နိုင်ငံရေးအယူဝါဒနှင့် လိုဘကြီးမှုတို့ကြောင့် အစားအစာ လုံလုံလောက်လောက် မျက်နှာမလိုက် ဖြန့်ဝေပေးမှုကို ဟန့်တားလေ့ရှိရာ လူအမြောက်အမြား အထူးသဖြင့် ကလေးသူငယ်များသည် ငတ်မွတ်ပြီး သေဆုံးနေကြရရှာသည်။ သို့ရာတွင် ယေရှုခရစ်၏အုပ်ချုပ်မှုအောက်တွင် ဤပြဿနာ ရှိမည်မဟုတ်။ ကမ္ဘာမြေကြီးပေါ် အလွန်ကောင်းမွန်သောအသီးအနှံတို့ ဖြစ်ထွန်းနေပါလိမ့်မည်။ လူသားအားလုံး ဝဝလင်လင် သုံးဆောင်ရကြမည်။ခေါင်းဆောင်မှုကောင်းနှင့်ဆိုင်သော အဆိုပါကောင်းချီးများကို သင်ခံစားလိုပါသလော။ သင်ခံစားလိုလျှင် မြေတစ်ပြင်လုံးကို မကြာမီ အပြည့်အဝထိန်းချုပ်တော့မည့် ခေါင်းဆောင်အကြောင်း သင်ယူဖို့ သင့်ကို ကျွန်ုပ်တို့အားပေးပါသည်။ ယေဟောဝါသက်သေများသည် သင့်အား ဝမ်းမြောက်ဝမ်းသာ ကူညီပေးကြပါလိမ့်မည်။ ယေဟောဝါဘုရားသခင်ကိုယ်တော်တိုင် မိမိ၏သားတော်နှင့်စပ်လျဉ်း၍ ဤသို့မိန့်တော်မူသည့်အတွက် သင်စိတ်ပျက်ရမည်မဟုတ်ချေ– “ငါ၏ရှင်ဘုရင်ကို သန့်ရှင်းသောဇိအုန်တောင်တော်ပေါ်မှာ ငါကိုယ်တိုင်ဘိသိက်ပေးပြီ။။”—ဆာလံ ၂:၆။
[စာမျက်နှာ ၅ ပါ ရုပ်ပုံ]
ယေရှုသည် ဆာလောင်မွတ်သိပ် နေသူတို့ကို ကျွေးမွေးခဲ့သည်၊ ဖျားနာနေသူတို့ကို ကုသပေးခဲ့၍ ခရစ်ယာန်အားလုံးအတွက် ပုံသက်သေကောင်း တင်ပြခဲ့၏