သမာဓိစောင့်သိသောလမ်းစဉ်၌ လျှောက်လှမ်းလော့
သမာဓိစောင့်သိသောလမ်းစဉ်၌ လျှောက်လှမ်းလော့
‘အကျွန်ုပ်မူကား သမာဓိရှိစွာ လျှောက်လှမ်းပါမည်။’—ဆာလံ ၂၆:၁၁၊ ကဘ။
၁၊ ၂။ (က) ဘုရားသခင့်ပိုင်သအုပ်စိုးမှု အရေးကိစ္စတွင် လူ့သမာဓိစောင့်သိမှုသည် အရေးပါသောကဏ္ဍတစ်ခု မည်သို့ဖြစ်သနည်း။ (ခ) အသိဉာဏ်ရှိသော သတ္တဝါများသည် ယေဟောဝါ၏ပိုင်သအုပ်စိုးမှုကို ထောက်ခံကြောင်း မည်သို့တင်ပြနိုင်ကြသနည်း။
ဧဒင်ဥယျာဉ်၌ စာတန်ပုန်ကန်သည့်အခါ ဖန်ဆင်းရာများအပေါ် ဘုရားသခင်ပိုင်သအုပ်စိုးခွင့်နှင့်ပတ်သက်သော စကြဝဠာအရေးကိစ္စကို ပေါ်ပေါက်စေခဲ့သည်။ နောက်ပိုင်းတွင် သူက လူတို့သည် အကျိုးရနေမှသာလျှင် ကိုယ်တော်အား ဝတ်ပြုကြလိမ့်မည်ဟု ဘုရားသခင်ကို စိန်ခေါ်ခဲ့သည်။ (ယောဘ ၁:၉-၁၁; ၂:၄) သို့ဖြင့် လူ့သမာဓိစောင့်သိမှုသည် ယေဟောဝါ၏စကြဝဠာပိုင်သအုပ်စိုးခွင့် အရေးကိစ္စတွင် အရေးပါသောအပိုင်းကဏ္ဍတစ်ခု ဖြစ်လာလေသည်။
၂ ဘုရားသခင်၏ပိုင်သအုပ်စိုးမှုသည် ဖန်ဆင်းခံသတ္တဝါများ၏ သမာဓိစောင့်သိမှုအပေါ် မူတည်သည်မဟုတ်သော်လည်း ဤကိစ္စတွင် လူသားများနှင့် ဘုရားသခင့်ဝိညာဉ်သတ္တဝါများ မည်သည့်ဘက်၌ မိမိတို့ရှိကြောင်း တင်ပြနိုင်ကြသည်။ မည်သို့အားဖြင့်နည်း။ သမာဓိစောင့်သိသောလမ်းစဉ်ကိုလိုက်ခြင်း၊ မလိုက်ခြင်းအားဖြင့်ဖြစ်သည်။ ထို့ကြောင့် လူတစ်ဦးကို သူ၏သမာဓိစောင့်သိမှုပေါ်မူတည်ပြီး အကဲဖြတ်နိုင်သည်။
၃။ (က) ယောဘနှင့် ဒါဝိဒ်တို့သည် အဘယ်အရာကို ယေဟောဝါအား စစ်ကြောစီရင်စေလိုသနည်း။ (ခ) သမာဓိစောင့်သိခြင်းနှင့်ပတ်သက်၍ အဘယ်မေးခွန်းများပေါ်လာသနည်း။
၃ ယုံကြည်စိတ်ချစွာဖြင့် ယောဘဤသို့ပြောခဲ့သည်– “[ယေဟောဝါသည်] မှန်သောချိန်ခွင်၌ ငါကိုချိန်၍ ငါ့စုံလင်ခြင်း [“သမာဓိစောင့်သိမှု၊” ကဘ] ကိုဘုရားသခင်သိတော်မူပါစေသော။” (ယောဘ ၃၁:၆၊ သမ္မာ) ‘အိုယေဟောဝါ အကျွန်ုပ်သည် သမာဓိရှိစွာ လျှောက်လှမ်းခဲ့သောကြောင့် အကျွန်ုပ်အမှုကိုတရားစီရင်တော်မူပါ။ ရွေ့လျော့ခြင်းမရှိဘဲ ယေဟောဝါ၌ကိုးစားပါပြီ’ ဟုရှေးဣသရေလဘုရင် ဒါဝိဒ်ဆုတောင်းစဉ် သူ၏သမာဓိစောင့်သိမှုကို စစ်ကြောစီရင်ရန် ယေဟောဝါအား လျှောက်လဲခဲ့သည်။ (ဆာလံ ၂၆:၁၊ ကဘ) ကျွန်ုပ်တို့လည်း သမာဓိစောင့်သိသောလမ်းစဉ်ပေါ် လျှောက်လှမ်းဖို့ အလွန်အရေးကြီး၏! သို့သော် သမာဓိရှိခြင်းဟူသည် အဘယ်နည်း၊ ထိုလမ်းစဉ်အတိုင်း လျှောက်လှမ်းခြင်းသည် အဘယ်အဓိပ္ပာယ်ရှိသနည်း။ သမာဓိစောင့်သိမြဲစောင့်သိနေရန် အဘယ်အရာက ကူညီပေးမည်နည်း။
‘အကျွန်ုပ်သည် သမာဓိရှိစွာ လျှောက်လှမ်းပါပြီ’
၄။ သမာဓိရှိခြင်းဟူသည် အဘယ်နည်း။
၄ သမာဓိရှိခြင်းဟူသည် သမာသမတ်ဖြစ်ခြင်း၊ အပြစ်မရှိခြင်း၊ ဖြောင့်မတ်ခြင်းနှင့် အပြစ်ကင်းစင်ခြင်း အဓိပ္ပာယ်ဆောင်၏။ သို့သော် သမာဓိရှိခြင်းတွင် မှန်ရာကိုပြုလုပ်ခြင်းထက်မက ပါဝင်သည်။ ယင်းသည် ကိုယ်ကျင့်တရားကြံ့ခိုင်ခြင်း၊ ဘုရားသခင်ကို နှလုံးအကြွင်းမဲ့ချစ်မြတ်နိုးခြင်းသဘောလည်းဆောင်၏။ စာတန်က “ယခုမူကား လက်တော်ကိုဆန့်၍ [ယောဘ၏] အရိုးနှင့်အသားကို ထိခိုက်တော်မူလျှင် သူသည် မျက်မှောက်တော်၌ ကိုယ်တော်ကိုမုချကျိန်ဆဲပါလိမ့်မည်” ဟု ဘုရားသခင်အား လျှောက်သောအခါ ယောဘ၏ရည်ရွယ်ချက်ကို စောဒကတက်ခဲ့သည်။ (ယောဘ ၂:၅၊ သမ္မာ) သမာဓိရှိရန် တော်မှန်စွာပြုလုပ်ရသည့်အပြင် မှန်ကန်သောနှလုံးစေ့ဆော်မှုရှိဖို့လည်းလိုသည်။
၅။ သမာဓိစောင့်သိနေရန် စင်းလုံးချောစုံလင်သူဖြစ်စရာမလိုကြောင်း အဘယ်အရာက ဖော်ပြသနည်း။
၅ သို့သော် သမာဓိစောင့်သိနေဖို့ စင်းလုံးချောစုံလင်သူဖြစ်စရာမလိုပါ။ ဘုရင်ဒါဝိဒ်သည် မစုံလင်သူဖြစ်ပြီး သူ့ဘဝတစ်လျှောက် ကြီးလေးသောအပြစ်များ အကြိမ်ကြိမ်ပြုမိခဲ့သည်။ သို့တိုင် သမ္မာကျမ်းစာက သူ့ကို ‘သမာဓိနှလုံးဖြင့်’ ကျင့်ကြံပြုမူသူဟုဆိုထားသည်။ (၃ ဓမ္မရာဇဝင် ၉:၄) အဘယ်ကြောင့်နည်း။ ဒါဝိဒ်သည် ယေဟောဝါဘုရားသခင်အား စိတ်နှလုံးအကြွင်းမဲ့ ချစ်မြတ်နိုးသောကြောင့်ဖြစ်သည်။ မိမိ၏အပြစ်များကို ဝန်ခံပြီး ဆုံးမပဲ့ပြင်မှုကို လက်ခံကာ မိမိလမ်းစဉ်ကိုတည့်မတ်ရန် အသင့်ရှိခဲ့သည်။ မှန်ပါသည်၊ ဒါဝိဒ်သည် သူ၏ဘုရားသခင်၊ ယေဟောဝါကို စိတ်နှလုံးအကြွင်းမဲ့ ဆည်းကပ်ဝတ်ပြု၊ ချစ်မြတ်နိုးကြောင်း သူ၏သမာဓိစောင့်သိမှုက ထင်ရှားစေသည်။—တရားဟောရာ ၆:၅၊ ၆။
၆၊ ၇။ သမာဓိရှိရှိ လျှောက်လှမ်းခြင်းတွင် အဘယ်အရာပါဝင်သနည်း။
၆ သမာဓိရှိခြင်းဟူသည် လူ့အမူအကျင့်ကဏ္ဍတစ်ခုဖြစ်သည့် ဘာသာရေးဆည်းကပ်ဝတ်ပြုမှုနှင့်သာ သက်ဆိုင်သည်မဟုတ်။ ကျွန်ုပ်တို့၏ဘဝပုံစံတစ်ခုလုံး အကျုံးဝင်သည်။ ဒါဝိဒ်သည် သမာဓိရှိရှိ ဆာလံ ၁၁၉:၁-၃၊ သမ္မာ) သမာဓိစောင့်သိရန် ဘုရားသခင့်အလိုတော်ကို အဆက်မပြတ်ရှာဖွေနေပြီး ကိုယ်တော်၏နည်းလမ်းတော်အတိုင်း လိုက်လျှောက်နေဖို့လိုသည်။
‘လျှောက်လှမ်းခဲ့’ သည်။ ‘လျှောက်လှမ်း’ ဟူသောကြိယာသည် ‘အသက်ရှင်နေထိုင်ပုံ’ သို့မဟုတ် ‘ဘဝပုံစံ’ ဟုအဓိပ္ပာယ်ရကြောင်း သည်နယူးအင်တာပရက်တာဘိုင်ဘယ်ကဆို၏။ “အကျင့်အကြံစုံလင်” သူတို့အကြောင်းနှင့်ပတ်သက်၍ ဆာလံဆရာ ဤသို့သီဆိုခဲ့သည်– “[ဘုရားသခင်၏] သက်သေခံတော်မူချက်များကို စောင့်ရှောက်၍ ကိုယ်တော်ကို စိတ်နှလုံးအကြွင်းမဲ့ရှာသောသူတို့သည် မင်္ဂလာရှိကြ၏။ အကယ်စင်စစ် ထိုသူတို့သည် မတရားသောအမှုကိုမပြု၊ နည်းလမ်းတော်သို့လိုက်သွားတတ်ကြ၏။” (၇ သမာဓိရှိရှိ လျှောက်လှမ်းနေရန် မနှစ်မြို့ဖွယ်အခြေအနေမျိုး၌ပင် ဘုရားသခင်ကို သစ္စာရှိရှိစွဲကပ်နေဖို့လိုသည်။ စမ်းသပ်မှုများကို ခံရပ်သောအခါ၊ ဘေးဆိုးများအကြား ဆက်လက်ကြံ့ခိုင်နေသောအခါ၊ ဆိုးညစ်သောဤလောက၏ သွေးဆောင်မှုများကို တွန်းလှန်သောအခါ ကျွန်ုပ်တို့၏သမာဓိစောင့်သိမှု ထင်ရှားလာလေသည်။ ယေဟောဝါသည် မိမိအားကဲ့ရဲ့ပြစ်တင်သူ၏စကားကို ပြန်ချေနိုင်ခွင့်ရသည်ဖြစ်ရာ ကျွန်ုပ်တို့သည် ‘ယေဟောဝါ၏စိတ်တော်ကို ရွှင်လန်းစေကြ’ သည်။ (သု. ၂၇:၁၁) သို့ဖြစ်၍ ယောဘနည်းတူ “ငါသည် သေသည့်တိုင်အောင် ငါ့သမာဓိကိုမစွန့်လွှတ်” ဟုကျွန်ုပ်တို့သန္နိဋ္ဌာန်ချရန် အကြောင်းကောင်းရှိသည်။ (ယောဘ ၂၇:၅၊ ကဘ) ကျွန်ုပ်တို့အား သမာဓိရှိရှိ လျှောက်လှမ်းစေမည့်အရာကို ဆာလံအခန်းကြီး ၂၆ က ဖော်ပြပါသည်။
‘အကျွန်ုပ်၏ နှလုံးနှင့်ကျောက်ကပ်တို့ကို သန့်စင်ပေးတော်မူပါ’
၈။ ယေဟောဝါအား မိမိ၏ကျောက်ကပ်များနှင့် နှလုံးကိုစစ်ဆေးရန် ဒါဝိဒ်အသနားခံခြင်းမှ သင်အဘယ်အရာ သိရှိရသနည်း။
၈ ဒါဝိဒ်က ‘အိုယေဟောဝါ အကျွန်ုပ်ကို စစ်ဆေးစုံစမ်း၍ နှလုံးနှင့်ကျောက်ကပ်တို့ကို သန့်စင်ပေးတော်မူပါ’ ဟုဆုတောင်းခဲ့သည်။ (ဆာလံ ၂၆:၂) ကိုယ်ခန္ဓာအတွင်းကျကျတွင် ကျောက်ကပ်များ တည်ရှိသည်။ ပုံဆောင်သဘောအရ ကျောက်ကပ်များသည် လူတစ်ဦး၏အနက်ရှိုင်းဆုံးတွေးတောမှု၊ စိတ်လှုပ်ရှားမှုများကို တင်စားသည်။ ပုံဆောင်နှလုံးမှာမူ သူ၏စိတ်လှုံ့ဆော်မှု၊ သူ၏သဘောထားများ၊ သူ၏အသိဉာဏ်တို့ပါဝင်သော အတွင်းလူတစ်ခုလုံးကို ဆိုလိုသည်။ ဒါဝိဒ်က မိမိအားစစ်ဆေးတော်မူပါဟု ယေဟောဝါထံဆုတောင်းသောအခါ သူ၏အတွင်းအကျဆုံး တွေးတောဆင်ခြင်မှုများနှင့် သဘောထားတို့ကို ရှာဖွေစစ်ဆေးပေးရန် တောင်းလျှောက်နေခြင်းဖြစ်သည်။
၉။ ယေဟောဝါသည် ကျွန်ုပ်တို့၏ပုံဆောင်ကျောက်ကပ်များနှင့် နှလုံးကို အဘယ်နည်းဖြင့် သန့်စင်ပေးသနည်း။
၉ မိမိ၏ကျောက်ကပ်များနှင့် နှလုံးကို သန့်စင်ပေးပါရန် ဒါဝိဒ်အသနားခံခဲ့သည်။ ကျွန်ုပ်တို့၏အတွင်းလူကို ယေဟောဝါ မည်သို့သန့်စင်ပေးသနည်း။ ဒါဝိဒ်ဤသို့သီဆိုခဲ့သည်– “အကြံပေးတော်မူသော ထာဝရဘုရား[သခင်]ကို ဩဘာပြုပါမည်။ ညဉ့်တိုင်း ငါ့နှလုံးကျောက်ကပ်ဆုံးမပါ၏။” (ဆာလံ ၁၆:၇၊ သမ) အဘယ်အရာကို ဆိုလိုသနည်း။ ဘုရားသခင့်ဆုံးမစကားသည် ဒါဝိဒ်၏အူထဲအသည်းထဲရောက်ရှိကာ ထိုတွင် ကိန်းအောင်းနေပြီး သူ၏အတွင်းအကျဆုံးတွေးတောမှုများနှင့် စိတ်လှုပ်ရှားမှုများကို တည့်မတ်ပေးကြောင်း ဆိုလိုသည်။ ကျွန်ုပ်တို့လည်း ဘုရားသခင့်နှုတ်မြွက်စကားတော်၊ ကိုယ်တော်၏ကိုယ်စားလှယ်များနှင့် ကိုယ်တော်၏အဖွဲ့အစည်းမှတစ်ဆင့်ရရှိသော ဆုံးမစကားကို တန်ဖိုးထားကာ စဉ်းစားဆင်ခြင်ပြီး စိတ်နှလုံးအတွင်း ကိန်းအောင်းစေမည်ဆိုလျှင် အလားတူဖြစ်နိုင်ပါသည်။ ဤနည်းဖြင့် ကျွန်ုပ်တို့ကို သန့်စင်ပေးရန် ယေဟောဝါထံ မှန်မှန်ဆုတောင်းခြင်းက သမာဓိရှိရှိ လျှောက်လှမ်းစေပါလိမ့်မည်။
‘ကိုယ်တော်၏ချစ်ခင်ကြင်နာမှုသည် အကျွန်ုပ်မျက်မှောက်၌ရှိပါ၏’
၁၀။ အဘယ်အရာက ဒါဝိဒ်ကို ဘုရားသခင့်အမှန်တရားလမ်းပေါ် လျှောက်လှမ်းစေခဲ့သနည်း။
၁၀ ‘ကိုယ်တော်၏ချစ်ခင်ကြင်နာမှုသည် အကျွန်ုပ်မျက်မှောက်၌ရှိပါ၏၊ ကိုယ်တော်၏အမှန်တရား၌ အကျွန်ုပ်လျှောက်လိုက်ပါပြီ’ ဟုဒါဝိဒ်ဆက်ပြောသည်။ (ဆာလံ ၂၆:၃၊ ကဘ) ဒါဝိဒ်သည် ဘုရားသခင်၏ချစ်ခင်ကြင်နာမှုရှိ စီရင်ချက်များကို ကောင်းစွာသိရှိပြီး ၎င်းတို့ကို ကျေးဇူးတင်စိတ်ဖြင့် တွေးတောဆင်ခြင်ခဲ့သည်။ သူဤသို့သီဆိုခဲ့၏– “အိုငါ့ဝိညာဉ် ထာဝရဘုရား[သခင်]ကို ကောင်းချီးပေးလော့။ ကျေးဇူးတော်အပေါင်းကို မမေ့လျော့နှင့်။” ဘုရားသခင်၏ “ကျေးဇူးတော်” တစ်ခုကိုအောက်မေ့ကာ ဒါဝိဒ်ဤသို့ဆက်ပြောသည်– “ထာဝရဘုရား[သခင်]သည် ညှဉ်းဆဲခြင်းခံရသမျှသော သူတို့အဖို့ တရားသောအမှု၊ ဖြောင့်မတ်စွာစီရင်သောအမှုများကို ပြုတော်မူ၏။ နည်းလမ်းတော်များကို မောရှေအားလည်းကောင်း၊ အမှုတော်များကို ဣသရေလအမျိုးသားတို့အားလည်းကောင်း ဖော်ပြတော်မူပြီ။” (ဆာလံ ၁၀၃:၂၊ ၆၊ ၇၊ သမ္မာ) ဤတွင် ဒါဝိဒ်သည် မောရှေခေတ်၌ အီဂျစ်လူမျိုးလက်အောက် ဣသရေလလူမျိုးခံခဲ့ရသော ညှဉ်းဆဲခြင်းများကို သတိရခြင်းဖြစ်ပေမည်။ သို့ဖြစ်လျှင် မောရှေအား ယေဟောဝါသိစေခဲ့သော ကယ်မခြင်းနည်းလမ်းများကို အောက်မေ့ဆင်ခြင်ခြင်းက ဒါဝိဒ်၏နှလုံးကို ထိမိစေခဲ့ပြီး ဘုရားသခင့်အမှန်တရားလမ်းပေါ် လျှောက်လှမ်းရန် သူ၏စိတ်ပိုင်းဖြတ်ချက်ကို ပိုမိုခိုင်ခံ့စေခဲ့ပေမည်။
၁၁။ အဘယ်အရာက ကျွန်ုပ်တို့ကို သမာဓိစောင့်သိသောလမ်းစဉ်၌ လျှောက်လှမ်းစေနိုင်သနည်း။
၁၁ သမ္မာကျမ်းစာကို မှန်မှန်လေ့လာပြီး ၎င်းမှသိရှိထားရာများကို တွေးတောဆင်ခြင်ခြင်းကလည်း သမာဓိစောင့်သိသောလမ်းစဉ်၌ လျှောက်လှမ်းစေပါလိမ့်မည်။ ဥပမာ၊ အကျင့်ယိုယွင်းရန် ပေါတိဖာမယား၏ သွေးဆောင်ခံရချိန်တွင် ယောသပ်ထွက်ပြေးခဲ့ခြင်းအကြောင်း ပြန်သတိရခြင်းက ကျွန်ုပ်တို့၏အလုပ်ခွင်တွင်၊ ကျောင်းတွင် သို့မဟုတ် အခြားနေရာတွင် အလားတူချဉ်းကပ်ခံရလျှင် ထွက်ပြေးစေပါလိမ့်မည်။ (ကမ္ဘာဦး ၃၉:၇-၁၂) ဤလောကတွင် စည်းစိမ်ချမ်းသာရှိဖို့၊ ထင်ပေါ်ကျော်ကြားဖို့ အခွင့်အလမ်းများ အပေးခံရလျှင်ကော။ အီဂျစ်ပြည်၏စည်းစိမ်ချမ်းသာကို ငြင်းပယ်ခဲ့သော မောရှေ၏ပုံသက်သေရှိ၏။ (ဟေဗြဲ ၁၁:၂၄-၂၆) ယောဘ၏ခံနိုင်ရည်အကြောင်း စိတ်စွဲမှတ်ထားခြင်းက ဖျားနာမှုများနှင့် အခြေအနေမလှမှုများကြား ယေဟောဝါအပေါ် ဆက်လက်တည်ကြည်ရန် ကျွန်ုပ်တို့၏သန္နိဋ္ဌာန်ကို ခိုင်ခံ့စေမည်မှာ သေချာသည်။ (ယာကုပ် ၅:၁၁) နှိပ်စက်ညှဉ်းပန်းမှု ခံလာရလျှင်ကော။ သို့ဖြစ်လျှင် ခြင်္သေ့တွင်းထဲရှိ ဒံယေလ၏အတွေ့အကြုံကို ပြန်သတိရခြင်းက သတ္တိရှိလာစေပါလိမ့်မည်!—ဒံယေလ ၆:၁၆-၂၂။
“လိမ်လည်သူတို့နှင့်အတူမထိုင်ပါ”
၁၂၊ ၁၃။ အဘယ်အပေါင်းအသင်းမျိုးကို ကျွန်ုပ်တို့ရှောင်ကြဉ်သင့်သနည်း။
၁၂ သူ၏သမာဓိကိုခိုင်ခံ့စေသော အကြောင်းရင်းနောက်တစ်ခုကို ဒါဝိဒ်ဤသို့ပြောပြခဲ့သည်– “လိမ်လည်သူတို့နှင့်အတူမထိုင်ပါ၊ လျှို့ဝှက်သူတို့နှင့်ထွက်ဝင်မည်မဟုတ်ပါ။ လူဆိုးတို့၏အပေါင်းအသင်းကိုမုန်းထားပါ၏။ ဆိုးသွမ်းသူတို့နှင့်အတူ ထိုင်မည်မဟုတ်ပါ။” (ဆာလံ ၂၆:၄၊ ၅) ဒါဝိဒ်သည် ဆိုးသွမ်းသူများနှင့် လုံးဝထိုင်လိမ့်မည်မဟုတ်။ မကောင်းသောအပေါင်းအသင်းများကို သူမုန်းပါသည်။
၁၃ ကျွန်ုပ်တို့ကော။ ရုပ်မြင်သံကြားအစီအစဉ်များ၊ ဗီဒီယိုများ၊ ရုပ်ရှင်များ၊ အင်တာနက်ဆိုက်များ သို့မဟုတ် အခြားနည်းများဖြင့် လိမ်လည်သူတို့နှင့်ပေါင်းဖော်ခြင်းကို ကျွန်ုပ်တို့ငြင်းပယ်ကြသလော။ ထိုလျှို့ဝှက်သူတို့ကို ဝေးဝေးရှောင်ပါသလော။ ကျောင်း သို့မဟုတ် အလုပ်ခွင်ရှိသူအချို့သည် မရိုးသားသောစိတ်ဖြင့် ကျွန်ုပ်တို့ကို ခင်မင်ဟန်ဆောင်ကြပေမည်။ ဘုရားသခင့်အမှန်တရားလမ်းပေါ် မလျှောက်သူများနှင့် ကျွန်ုပ်တို့တရင်းတနှီးရှိလိုကြသလော။ အယူဖောက်ပြန်သူတို့သည် စိတ်ရင်းမှန်ပုံ မျက်နှာပန်းပြပြီး ကျွန်ုပ်တို့ကို ယေဟောဝါ၏ဝတ်ပြုမှုမှ သွေဖည်သွားစေရန် သွေးဆောင်မည့် သူတို့၏အကြံကို ဖုံးကွယ်ထားတတ်ကြသည်။ ခရစ်ယာန်အသင်းတော်တွင် နှစ်ဘဝစံနေသူအချို့ရှိလျှင်ကော။ သူတို့သည်လည်း မိမိတို့၏အဖြစ်မှန်ကို လျှို့ဝှက်ထားတတ်ကြသည်။ ယခု ဓမ္မအမှုထမ်းတစ်ဦးဖြစ်သူ ဂျေစင် ငယ်စဉ်က ထိုသို့သောမိတ်ဆွေများ ရှိခဲ့ဖူးသည်။ သူတို့အကြောင်း ဤသို့ပြောပြသည်– “တစ်နေ့ကျတော့ သူတို့ထဲကတစ်ယောက်က ကျွန်တော့်ကိုဒီလိုပြောတယ်– ‘စနစ်သစ်ရောက်တဲ့အခါ ငါတို့သေနေပြီပဲဥစ္စာ၊ အခု ဒို့ဘာလုပ်လုပ် အရေးမကြီးပါဘူး။ ဘာကိုလက်လွတ်ရှုံးဆုံးခဲ့တယ်ဆိုတာ ဒို့သိမှာမှမဟုတ်ဘဲ။’ အဲဒီအပြောမျိုးက ကျွန်တော့်ကို တပ်လှန့်သတိပေးလိုက်သလိုပဲ။ စနစ်သစ်ရောက်လာမှတော့ ကျွန်တော်မသေချင်တော့ဘူး။” သို့နှင့် ဂျေစင်သည် ပညာရှိစွာ ထိုသူတို့နှင့်အဆက်ဖြတ်ခဲ့သည်။ တမန်တော်ပေါလုက ဤသို့သတိပေးခဲ့သည်– “အလွဲမယူကြနှင့်။ မကောင်းသောသူတို့နှင့်ပေါင်းဖော်ခြင်းအားဖြင့် ကောင်းသောအကျင့်ဓလေ့ယိုယွင်းတတ်၏။” (၁ ကောရိန္သု ၁၅:၃၃) မကောင်းသောအပေါင်းအသင်းများကို ရှောင်ကြဉ်ရန် အလွန်အရေးကြီး၏!
‘အံ့ဖွယ်သောအမှုတော်အလုံးစုံကို ကြားပြောပါမည်’
၁၄၊ ၁၅။ ကျွန်ုပ်တို့သည် မည်သို့ “[ယေဟောဝါ၏] ယဇ်ပလ္လင်တော်ကို လှည့်ပတ်” နိုင်ကြမည်နည်း။
၁၄ “အကျွန်ုပ်သည် ကိုယ့်လက်ကိုအပြစ်ကင်းခြင်းနှင့်ဆေး၍ ယဇ်ပလ္လင်တော်ကို လှည့်ပတ်လျက်နေပါမည်၊ အိုထာဝရဘုရား [သခင်]” ဟုဒါဝိဒ်ဆက်ပြောခဲ့သည်။ အဘယ်ကြောင့်နည်း။ “ကျေးဇူးတော်ချီးမွမ်းသံနှင့်ကြွေးကြော်၍ အံ့ဖွယ်သောအမှုတော်အလုံးစုံကို ကြားပြောခြင်းငှာ” ဖြစ်သည်။ (ဆာလံ ၂၆:၆၊ ၇၊ သမ္မာ) ဒါဝိဒ်သည် ယေဟောဝါအား ဝတ်ပြုပြီး ဘုရားသခင်အား ချစ်မြတ်နိုးကြောင်း ကြေညာလိုသဖြင့် ကိုယ်ကျင့်တရားစင်ကြယ်လိုခဲ့သည်။
၁၅ တဲတော်၌လည်းကောင်း၊ နောက်ပိုင်းတွင် ဝတ်ပြုရာအိမ်တော်၌လည်းကောင်း ပြုသည့် စစ်မှန်သောဝတ်ပြုရေးနှင့်ဆိုင်သမျှသည် “ကောင်းကင်အရာတို့၏ ပုံပမာအရိပ်နှင့်သာဆိုင်” ကြ၏။ (ဟေဗြဲ ၈:၅; ၉:၂၃) ယဇ်ပလ္လင်သည် လူအပေါင်းကိုရွေးနုတ်ရန် ယေရှုခရစ်၏ပူဇော်ရာယဇ်ကို ယေဟောဝါလက်ခံခြင်းနှင့်ဆိုင်သော ကိုယ်တော်၏အလိုတော်ကို ပုံတင်ပြသည်။ (ဟေဗြဲ ၁၀:၅-၁၀) ထိုပူဇော်ရာယဇ်ကို ကျွန်ုပ်တို့ယုံကြည်ကြောင်းတင်ပြခြင်းအားဖြင့် အပြစ်ကင်းခြင်းနှင့်လက်ဆေးပြီး “[ယေဟောဝါ၏] ယဇ်ပလ္လင်တော်ကို လှည့်ပတ်” ကြပါသည်။—ယောဟန် ၃:၁၆-၁၈။
၁၆။ ဘုရားသခင်၏အံ့ဖွယ်အမှုတော်များအကြောင်း အခြားသူများအား ကြားပြောခြင်းက ကျွန်ုပ်တို့ကို မည်သို့အကျိုးပြုသနည်း။
၁၆ ရွေးနုတ်ဖိုးကြောင့် ဖြစ်လာနိုင်သမျှကို ကျွန်ုပ်တို့စဉ်းစားကြည့်သောအခါ ယေဟောဝါနှင့် ကိုယ်တော်၏တစ်ပါးတည်းသောသားတော်ကို ကျေးဇူးတင်စိတ် ယိုဖိတ်မလာပေလော။ သို့ဖြစ်လျှင် စိတ်နှလုံးအပြည့် ကျေးဇူးတင်စိတ်ဖြင့် ဘုရားသခင်၏အံ့ဖွယ်အမှုတော်များကို အခြားသူများအား ကြားပြောကြပါစို့၊ ဧဒင်ဥယျာဉ်တွင် လူကိုဖန်ဆင်းခြင်းအကြောင်းမှ ဘုရားသခင့်ကမ္ဘာသစ်တွင် အရာခပ်သိမ်းကို အသစ်ပြုပြင်ခြင်းအကြောင်းအထိ ကြားပြောပါလေ။ (ကမ္ဘာဦး ၂:၇; တမန်တော် ၃:၂၁) ဘုရားသခင့်နိုင်ငံတော်သတင်းဟောပြောခြင်းနှင့် တပည့်ဖြစ်စေခြင်းလုပ်ငန်းကလည်း ဝိညာဉ်ရေးဘက် အမှန်တကယ်အကာအကွယ်ရရှိစေပါသည်! (မဿဲ ၂၄:၁၄; ၂၈:၁၉၊ ၂၀) ထိုလုပ်ငန်း၌အလုပ်များနေခြင်းသည် အနာဂတ်မျှော်လင့်ချက်ကို တောက်ပစေသည်၊ ဘုရားသခင့်ကတိတော်များဆိုင်ရာ ကျွန်ုပ်တို့၏ယုံကြည်ခြင်းကို ခိုင်ခံ့စေပြီး ယေဟောဝါနှင့် လူလူချင်းအား ချစ်သည့်မေတ္တာကို ရှင်သန်နေစေသည်။
‘အိမ်တော်တည်ရာကို အကျွန်ုပ်နှစ်သက်ပါ၏’
၁၇၊ ၁၈။ ခရစ်ယာန်အစည်းအဝေးများကို ကျွန်ုပ်တို့မည်သို့သဘောထားသင့်သနည်း။
၁၇ တဲတော်နှင့် ၎င်း၏ယဇ်ပူဇော်ရာပလ္လင်သည် ဣသရေလနိုင်ငံတွင် ယေဟောဝါဝတ်ပြုရေး၏ဗဟိုဖြစ်ခဲ့သည်။ ထိုအရပ်ကိုနှစ်သက်ကြောင်း ဖော်ပြလို၍ ဒါဝိဒ်ဤသို့ဆုတောင်းခဲ့သည်– ‘အိုယေဟောဝါ အိမ်တော်တည်ရာကိုလည်းကောင်း၊ ဘုန်းတော်ထင်ရှားသောအရပ်ဌာနကိုလည်းကောင်း အကျွန်ုပ်နှစ်သက်ပါ၏။’—ဆာလံ ၂၆:၈။
၁၈ ယေဟောဝါအကြောင်း သင်ယူရာနေရာများတွင် စုရုံးရခြင်းကို ကျွန်ုပ်တို့နှစ်သက်မြတ်နိုးကြပါသလော။ ဝိညာဉ်ရေးရာသွန်သင်ချက်များ မှန်မှန်ပေးသောအစီအစဉ်ရှိသည့် ဘုရားသခင့်နိုင်ငံတော်ခန်းမတိုင်းသည် ဒေသတစ်ခုတွင် စစ်မှန်သောဝတ်ပြုရေး၏ဗဟိုဖြစ်သည်။ ထို့ပြင် နှစ်စဉ်ကျင်းပသောစည်းဝေးကြီးများ၊ တိုက်နယ်စည်းဝေးပွဲများနှင့် အထူးအစည်းအဝေးနေ့များလည်းရှိသေး၏။ ထိုအစည်းအဝေးများတွင် ယေဟောဝါ၏ ‘သတိပေးချက်များ’ ကိုဆွေးနွေးတင်ပြသည်။ ၎င်းတို့ကို “အလွန်နှစ်သက်” တတ်ပြီဆိုလျှင် အစည်းအဝေးများကို တက်ရောက်လိုစိတ်ပြင်းပြပြီး ထိုတွင်ရှိစဉ် အာရုံစူးစိုက်နားထောင်ကြပါမည်။ (ဆာလံ ၁၁၉:၁၆၇) ကျွန်ုပ်တို့၏ကောင်းကျိုးကို လိုလားပြီး သမာဓိစောင့်သိသောလမ်းစဉ်ပေါ် ဆက်လျှောက်လှမ်းစေမည့် ယုံကြည်သူချင်းများနှင့်အတူ ပေါင်းသင်းရခြင်းသည် စိတ်ပေါ့ပါးလန်းဆန်းစရာပင်!—ဟေဗြဲ ၁၀:၂၄၊ ၂၅။
‘အကျွန်ုပ်အသက်ကို ရုပ်သိမ်းတော်မမူပါနှင့်’
၁၉။ ဒါဝိဒ်သည် အဘယ်အပြစ်များ မရှိလိုသနည်း။
၁၉ ဘုရားသခင့်အမှန်တရားလမ်းပေါ်မှ သွေဖည်သွားနိုင်ခြင်းအကြောင်းရှိသည်ကို ကောင်းစွာသိထားသဖြင့် ဒါဝိဒ်ဤသို့အသနားခံခဲ့သည်– “အပြစ်သားတို့နှင့်အတူ အကျွန်ုပ်[၏စိုးလ်] ကိုလည်းကောင်း၊ လူသတ်တို့နှင့်အတူ အကျွန်ုပ်အသက်ကိုလည်းကောင်း ရုပ်သိမ်းတော်မမူပါနှင့်။ သူတို့လက်တွင် မကောင်းသောအကြံအစည်ရှိလျက် လက်ယာလက်သည်လည်း တံစိုးနှင့်ပြည့်လျက်ရှိပါ၏။” (ဆာလံ ၂၆:၉၊ ၁၀) ဒါဝိဒ်သည် အကျင့်လျော့ရဲ၊ လာဘ်ပေးလာဘ်ယူသော မတရားသူတို့တွင် မပါဝင်လိုခဲ့ချေ။
၂၀၊ ၂၁။ အဘယ်အရာက ဘုရားသခင်ကို မချစ်သူတို့နည်းတူ ကျွန်ုပ်တို့အား ပြုကျင့်စေနိုင်သနည်း။
၂၀ ယနေ့ လောကတွင် အကျင့်ယိုယွင်းမှုများ ပျံ့နှံ့နေသည်။ “မတရားသောမေထုန်၌မှီဝဲခြင်း၊ ညစ်ညူးစွာကျင့်ခြင်း၊ ကိလေသာလွန်ကျူးခြင်း” အစရှိသည့် အကျင့်လျော့ရဲမှုကို ရုပ်မြင်သံကြား၊ မဂ္ဂဇင်းများနှင့် ရုပ်ရှင်များတွင် တွေ့ကြရသည်။ (ဂလာတိ ၅:၁၉) အချို့ဆိုလျှင် အပြာစာပေ၊ ရုပ်ရှင်များကို မကြည့်မနေနိုင်တော့ဘဲ အကျင့်ယိုယွင်းသွားကြလေသည်။ အထူးသဖြင့် လူငယ်များသည် ထိုသြဇာကို မလွန်ဆန်နိုင်ကြချေ။ ချိန်းတွေ့သည့်ဓလေ့ရှိသော နိုင်ငံအချို့တွင် ဆယ်ကျော်သက်များသည် ထိုသို့ပြုရန် ဖိအားပေးခံရကြသည်။ လူငယ်များစွာသည် အိမ်ထောင်ပြုနိုင်သည့်အရွယ် မရောက်ကြသေးဘဲ အချစ်နယ်ထဲရောက်ခဲ့ကြရသည်။ သူတို့ကိုယ်တွင်း တိုးပွားလာနေသော သွေးသားဆန္ဒများကို အာသာပြေစေဖို့ မကြာမီပင် မတရားမေထုန်ကျူးလွန်သည့်အထိ အကျင့်ယိုယွင်းသွားကြလေသည်။
၂၁ အရွယ်ရောက်သူ လူကြီးများလည်း မကောင်းသောသြဇာ လွှမ်းမိုးခံရနိုင်သည်။ မရိုးသားသော စီးပွားရေးလုပ်ငန်းများ၊ ကိုယ်ကျိုးအဓိကထားသည့် ဆုံးဖြတ်ချက်များချခြင်းတို့က သမာဓိမရှိကြောင်း ဖော်ပြသည်။ လောကလမ်းစဉ်အတိုင်း လျှောက်လှမ်းသွားခြင်းသည် ယေဟောဝါထံတော်မှ ဝေးကွာသွားစေရုံသာရှိမည်။ “[မကောင်းမှု]ကိုမုန်း၍ [ကောင်းမှု]ကိုချစ်” ကြကာ သမာဓိစောင့်သိသောလမ်းစဉ်ပေါ် ဆက်လက်လျှောက်လှမ်းကြပါစို့။—အာမုတ် ၅: ၁၅။
‘အကျွန်ုပ်ကို ကယ်နုတ်၍ ကျေးဇူးပြုတော်မူပါ’
၂၂-၂၄။ (က) ဆာလံအခန်းကြီး ၂၆ ၏နိဂုံးစကားမှ အဘယ်အားပေးမှုရရှိသနည်း။ (ခ) နောက်ဆောင်းပါးတွင် အဘယ်ကျော့ကွင်းအကြောင်း ဆွေးနွေးမည်နည်း။
၂၂ ဘုရားသခင်ထံ ရင်ဖွင့်ပြောဆိုခြင်းကို ဒါဝိဒ်ဤသို့နိဂုံးချုပ်ခဲ့သည်– ‘အကျွန်ုပ်မူကား သမာဓိရှိစွာ လျှောက်လှမ်းပါမည်။ အကျွန်ုပ်ကို ကယ်နုတ်၍ ကျေးဇူးပြုတော်မူပါ။ အကျွန်ုပ်သည်ညီညွတ်သော အရပ်၌နေရာကျ၍၊ စုဝေးသည့်ပရိသတ်အလယ်မှာ ယေဟောဝါကို ကောင်းချီးပေးပါမည်။’ (ဆာလံ ၂၆:၁၁၊ ၁၂၊ ကဘ) ဒါဝိဒ်သည် သမာဓိစောင့်သိရန် စိတ်ပိုင်းဖြတ်ထားရုံမက သူ့ကို ရွေးနုတ်ပေးပါရန်လည်း အသနားခံသည်။ အမှန်တကယ်အားရှိစရာပင်! ကျွန်ုပ်တို့သည် အပြစ်သားများ ဖြစ်နေကြသော်လည်း သမာဓိစောင့်သိသောလမ်းစဉ်ပေါ် လျှောက်လှမ်းနေရန် စိတ်ပိုင်းဖြတ်ထားကြမည်ဆိုလျှင် ယေဟောဝါကူညီပေးပါလိမ့်မည်။
၂၃ ကျွန်ုပ်တို့၏ ဘဝကဏ္ဍအသီးသီးတွင် ဘုရားသခင်၏ပိုင်သအုပ်စိုးမှုကို လေးမြတ်တန်ဖိုးထားကြောင်း ကျွန်ုပ်တို့အသက်ရှင်နေထိုင်ပုံက ဖော်ပြပါလေစေ။ ကျွန်ုပ်တို့တစ်ဦးစီအနေနှင့် ယေဟောဝါအား မိမိတို့၏အတွင်းအကျဆုံး တွေးတောမှုများနှင့် သဘောထားများကို စစ်ဆေးပေးပါဟု တောင်းလျှောက်နိုင်သည်။ ကိုယ်တော်၏နှုတ်မြွက်စကားတော်ကို လုံ့လရှိရှိလေ့လာခြင်းအားဖြင့် ကိုယ်တော်၏အမှန်တရားကို အမြဲဆင်ခြင်သုံးသပ်နိုင်ကြသည်။ သို့ဖြစ်၍ မကောင်းသောအပေါင်းအသင်းကို ရှောင်ကြဉ်ပြီး ပရိသတ်အလယ်မှာ ယေဟောဝါအား ကောင်းချီးပေးကြစို့။ ဤလောကကြောင့် ဘုရားသခင်နှင့် ကျွန်ုပ်တို့၏အဖိုးတန်ဆက်ဆံရေးကို ဘယ်သောအခါမျှ မပျက်စီးစေဘဲ ဘုရားသခင့်နိုင်ငံတော်သတင်း ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် စိတ်ထက်သန်စွာ ပါဝင်ကြပါစို့။ သမာဓိရှိသောလမ်းစဉ်ပေါ် ကျွန်ုပ်တို့အတတ်နိုင်ဆုံး လျှောက်လှမ်းနေကြစဉ် ကျွန်ုပ်တို့ကို ယေဟောဝါကျေးဇူးပြုမည်ဟု စိတ်ချနိုင်ပါသည်။
၂၄ သမာဓိရှိခြင်းတွင် ဘဝကဏ္ဍအားလုံးပါဝင်သည်ဖြစ်ရာ အသက်ဆုံးရှုံးစေတတ်သည့် အရက်အလွဲသုံးခြင်း ကျော့ကွင်းကို သတိပြုဖို့လိုသည်။ ယင်းကို နောက်ဆောင်းပါးတွင် ဆွေးနွေးပါမည်။
သင်မှတ်မိသလော
• အသိဉာဏ်ရှိသော သတ္တဝါများကို သူတို့၏သမာဓိ စောင့်သိမှုအပေါ်မူတည်ပြီး အဘယ်ကြောင့် အကဲဖြတ် နိုင်သနည်း။
• သမာဓိရှိခြင်းဟူသည် အဘယ်နည်း၊ သမာဓိရှိရှိ လျှောက်လှမ်းခြင်းတွင် အဘယ်အရာ ပါဝင်သနည်း။
• သမာဓိစောင့်သိသောလမ်းစဉ်၌ လျှောက်လှမ်းနေဖို့ အဘယ်အရာက ကျွန်ုပ်တို့ကို ထောက်ကူပေးမည်နည်း။
• သမာဓိစောင့်သိနေဖို့ အဘယ်အန္တရာယ်များကို ကျွန်ုပ်တို့ သတိပြုပြီး ရှောင်ကြဉ်ရမည်နည်း။
[လေ့လာရန်မေးခွန်းများ]
[စာမျက်နှာ ၁၄ ပါ ရုပ်ပုံ]
သင်၏အတွင်းအကျဆုံး တွေးတောမှုများကို ဆန်းစစ် ပေးပါရန် ယေဟောဝါအား မှန်မှန်ဆုတောင်းသလော
[စာမျက်နှာ ၁၄ ပါ ရုပ်ပုံ]
ယေဟောဝါ၏ ချစ်ခင်ကြင်နာမှု လုပ်ရပ်များကို သင် မျက်မှောက်ပြုသလော
[စာမျက်နှာ ၁၅ ပါ ရုပ်ပုံ]
စမ်းသပ်ခံရသည့်အခါ သမာဓိစောင့်သိခြင်းက ယေဟောဝါ၏နှလုံးကို ရွှင်ပြုံးစေ
[စာမျက်နှာ ၁၇ ပါ ရုပ်ပုံ]
သမာဓိစောင့်သိသောလမ်းစဉ်၌ လျှောက်လှမ်းစေသော ယေဟောဝါ၏ပြင်ဆင်ပေးချက်များကို သင်ကောင်းစွာအသုံးပြုသလော