အရက်သောက်သုံးခြင်းနှင့်ပတ်သက်၍ မျှတသောအမြင်ထားရှိခြင်း
အရက်သောက်သုံးခြင်းနှင့်ပတ်သက်၍ မျှတသောအမြင်ထားရှိခြင်း
“စပျစ်ရည်သည် သရော်တတ်၏။ သေရည်သေရက်သည် ခိုက်ရန်ဖြစ်စေတတ်၏။ ၎င်းအားဖြင့် ယိမ်းယိုင်လျက်ရှိသောသူသည် ပညာမရှိ။”—သု. ၂၀:၁၊ သမ္မာ။
၁။ ယေဟောဝါထံတော်မှ ကောင်းမြတ်သောဆုကျေးဇူးအချို့အတွက် ကျေးဇူးတင်ကြောင်း ဆာလံဆရာ မည်သို့ဖော်ပြခဲ့သနည်း။
“ကောင်းမြတ်စုံလင်သောဆုကျေးဇူးရှိသမျှတို့သည် အလင်းတို့၏အဘထံတော်က သက်ရောက်သည်” ဟု တပည့်ဖြစ်သူယာကုပ်ရေးသားခဲ့သည်။ (ယာကုပ် ၁:၁၇) ကောင်းမြတ်သောဆုကျေးဇူးအမျိုးမျိုးအတွက် ဘုရားသခင်အား ကျေးဇူးတင်စိတ်ဖြင့် ဆာလံဆရာဤသို့သီဆိုခဲ့သည်– “တိရစ္ဆာန်ဖို့မြက်ပင်ကိုလည်းကောင်း၊ လူသုံးဖို့စပါးပင်ကိုလည်းကောင်း ပေါက်စေတော်မူသဖြင့် မြေကြီးထဲကမုန့်ကိုထုတ်ဖော်တော်မူ၏။ စပျစ်ရည်သည်လည်း လူတို့ကိုရွှင်လန်းစေ၏။ ဆီအားဖြင့်လည်း သူတို့မျက်နှာကိုပြောင်စေတော်မူ၏။ မုန့်သည်လည်း သူတို့နှလုံးကိုထောက်မ၏။” (ဆာလံ ၁၀၄:၁၄၊ ၁၅) ကောက်ပင်၊ မုန့်နှင့် ဆီတို့နည်းတူ စပျစ်ရည်[ဝိုင်]နှင့် အခြားအရက်ယမကာများသည် ဘုရားသခင်ထံတော်မှ ကောင်းမြတ်သောဆုကျေးဇူးများဖြစ်သည်။ ၎င်းတို့ကို မည်သို့အသုံးပြုသင့်သနည်း။
၂။ အရက်သုံးစွဲခြင်းနှင့်ပတ်သက်သော အဘယ်မေးခွန်းများကို သုံးသပ်ကြမည်နည်း။
၂ နှစ်သက်ဖွယ်ဆုကျေးဇူးတစ်ခုကို တော်မှန်စွာ အသုံးပြုမှသာ ကောင်းမြတ်ပေသည်။ ဥပမာ၊ ပျားရည်သည် “ကောင်း” သော်လည်း “ပျားရည်ကိုစားကြူးလျှင် မကောင်း” ချေ။ (သု. ၂၄:၁၃; ၂၅:၂၇) ‘ဝိုင်အနည်းငယ်’ သောက်သုံးခြင်းသည် သင့်လျော်မည်ဖြစ်သော်လည်း အရက်ကို အလွဲသုံးခြင်းသည် ကြီးလေးသောပြဿနာတစ်ခုဖြစ်၏။ (၁ တိမောသေ ၅:၂၃) “စပျစ်ရည်သည် သရော်တတ်၏။ သေရည်သေရက်သည် ခိုက်ရန်ဖြစ်စေတတ်၏။ ၎င်းအားဖြင့် ယိမ်းယိုင် [“လမ်းလွဲ၊” ကဘ] လျက်ရှိသောသူသည် ပညာမရှိ” ဟု သမ္မာကျမ်းစာက သတိပေးသည်။ (သု. ၂၀:၁၊ သမ္မာ) သို့သော် အရက်ကြောင့် လမ်းလွဲနေခြင်းဟူသည် အဘယ်နည်း။ * အရက်ပမာဏမည်မျှသည် အလွန်အကျွံဖြစ်သနည်း။ ဤကိစ္စနှင့်ပတ်သက်၍ မျှတသောအမြင်ကား အဘယ်နည်း။
အရက်ကြောင့် ‘လမ်းလွဲနေခြင်း’ —မည်သည့်နည်းဖြင့်နည်း
၃၊ ၄။ (က) မူးယစ်သည့်အထိ အရက်သောက်ခြင်းကို သမ္မာကျမ်းစာ ပြစ်တင်ရှုတ်ချထားကြောင်း အဘယ်အရာက ဖော်ပြသနည်း။ (ခ) မူးယစ်ခြင်းလက္ခဏာအချို့ကား အဘယ်နည်း။
၃ ရှေးခေတ်ဣသရေလနိုင်ငံတွင် စားကြူး၊ သောက်ကြူး၍ နောင်တမရသောသားကို ကျောက်ခဲနှင့်ပေါက်သတ်ရသည်။ (တရားဟောရာ ၂၁:၁၈-၂၁) ခရစ်ယာန်များကို တမန်တော်ပေါလု ဤသို့ဆုံးမခဲ့သည်– “ညီအစ်ကိုဟုခေါ်ဝေါ်သောသူသည် မတရားသောမေထုန်၌မှီဝဲခြင်း၊ လောဘလွန်ကျူးခြင်း၊ ရုပ်[ပုံ]ကိုကိုးကွယ်ခြင်း၊ ဆဲရေးကဲ့ရဲ့ခြင်း၊ သေရည်သေရက်နှင့်ယစ်မူးခြင်း၊ အနိုင်အထက်လုယူခြင်းမှစ၍၊ ထိုသို့သောအမှုကိုပြုသောသူနှင့် မပေါင်းဖော်ရသည်သာမက၊ ထိုသူနှင့်အတူ စားသောက်ခြင်းအမှုကိုမျှမပြုရ။” မူးယစ်သည့်အထိ အရက်သောက်ခြင်းကို သမ္မာကျမ်းစာ ပြစ်တင်ရှုတ်ချထားကြောင်း ထင်ရှား၏။—၁ ကောရိန္သု ၅:၁၁; ၆:၉၊ ၁၀။
၄ မူးယစ်ခြင်း၏လက္ခဏာများကို သမ္မာကျမ်းစာက ဤသို့ဖော်ပြသည်– “ဖလား၌နီလျက်၊ အရောင်တောက်လျက်ရှိသော စပျစ်ရည်ကိုမကြည့်မရှုနှင့်။ အစ၌အချိုအမြိန်ဝင်သော်လည်း အဆုံး၌ မြွေကဲ့သို့ကိုက်တတ်၏။ မြွေဆိုးကဲ့သို့နာစေတတ်၏။ သင်သည် ထူးဆန်းသောအရာများကိုမြင်ရ၍ ထူးထွေသောစကားကို ပြောဆိုလိမ့်မည်။” (သု. ၂၃:၃၁-၃၃၊ သမ္မာ) အလွန်အကျွံသောက်ခြင်းသည် အဆိပ်ပြင်းသောမြွေကဲ့သို့ ကိုက်တတ်ပြီး ဖျားနာမှု၊ စိတ်ရှုပ်ထွေးမှုနှင့် သတိလက်လွတ်ပင် ဖြစ်စေတတ်သည်။ သောက်ကြူးသူသည် “ထူးဆန်းသောအရာများ” ကိုမြင်ရသဖြင့် အာရုံချောက်ချား၊ အထင်အမြင်မှားတတ်၏။ ထို့ပြင် မျိုသိပ်ထားလေ့ရှိသော မလျော်ကန်သည့်အတွေးများနှင့် ဆန္ဒများကို အရှက်အကြောက်မရှိ ထုတ်ဖော်ပြောဆိုလာပေမည်။
၅။ အရက်သောက်ကြူးခြင်းသည် အဘယ်အန္တရာယ်ရှိသနည်း။
၅ မူးယစ်နေပြီဟု သူတစ်ပါးမထင်စေရန် ဂရုစိုက်သောက်တတ်သူတစ်ဦးဖြစ်လျှင်ကော။ လူအချို့သည် အတော်များများသောက်ပြီးနောက်၌ပင် အရက်မူးသည့်လက္ခဏာမပြချေ။ သို့သော် ထိုသို့သောက်သုံးခြင်းသည် အန္တရာယ်မရှိဟုယူဆခြင်းက မိမိကိုယ်ကို လှည့်စားနေခြင်းဖြစ်သည်။ (ယေရမိ ၁၇:၉) ထိုသူသည် တဖြည်းဖြည်း၊ မသိမသာ အရက်စွဲလာပြီး ‘စပျစ်ရည်၏ကျွန်’ ဖြစ်လာနိုင်သည်။ (တိတု ၂:၃) အရက်စွဲသူဖြစ်လာပုံအဆင့်ဆင့်နှင့်ပတ်သက်၍ စာရေးဆရာမ ကယ်ရိုလိုင်း နက်ပ်က ဤသို့ဆိုသည်– “အရက်စွဲသူဖြစ်လာပုံသည် တရွေ့ရွေ့၊ တဖြည်းဖြည်း၊ မသိသာမထင်ရှားသောဖြစ်စဉ်ဖြစ်၏။” အရက်အလွန်အကျွံသောက်ခြင်းသည် အမှန်ပင်မသိသာသော ကျော့ကွင်းတစ်ခုဖြစ်သည်!
၆။ သောက်ကြူးခြင်းနှင့် စားကြူးခြင်းကို အဘယ်ကြောင့်ရှောင်သင့်သနည်း။
၆ ယေရှု၏ဤသတိပေးချက်ကိုလည်း သုံးသပ်ကြည့်ပါ– “သင်တို့သည် ကိုယ်ကိုသတိပြုကြလော့။ သို့မဟုတ် အစားအသောက်လွန်ကြူးခြင်း၊ လော[က]စိုးရိမ်ခြင်းအားဖြင့် စိတ်နှလုံးပင်ပန်းလျက်နေစဉ်တွင် ထိုနေ့ရက်သည် ကျော့ကွင်းကဲ့သို့ သင်တို့နှင့်ရုတ်ခနဲတွေ့ကြုံလိမ့်မည်။ အကြောင်းမူကား ထိုနေ့ရက်သည် မြေတစ်ပြင်လုံး၌နေသောလူအပေါင်းတို့အပေါ်သို့ ကျရောက်လိမ့်မည်။” (လုကာ ၂၁:၃၄၊ ၃၅၊ သမ္မာ) ကာယရေးသာမက ဝိညာဉ်ရေးအရပါ လေးလံထိုင်းမှိုင်း၊ ပျင်းရိမှုမဖြစ်စေမီ မူးသည့်အဆင့်ရောက်သည်အထိ သောက်ရန်မဟုတ်ပါ။ ထိုအခြေအနေမျိုး၌ရှိနေစဉ် ယေဟောဝါ၏နေ့ ရောက်လာသော် မည်သို့ဖြစ်မည်နည်း။
အရက်အလွဲသုံးခြင်း ဖြစ်ပေါ်စေနိုင်ရာများ
၇။ အရက်အလွဲသုံးခြင်းသည် ၂ ကောရိန္သု ၇:၁ ပါညွှန်ကြားချက်နှင့် အဘယ်ကြောင့်မကိုက်ညီသနည်း။
၇ အရက်ကို ချင့်ချိန်မှုမရှိသုံးစွဲခြင်းသည် ကာယရေးနှင့် ဝိညာဉ်ရေးအန္တရာယ်များစွာ ရှိစေသည်။ အရက်ကြောင့်ဖြစ်တတ်သောရောဂါများမှာ အသည်းရွတ်နာ၊ အသည်းရောင်ရမ်းနာနှင့် အရက်ရူးနာကဲ့သို့သော နဗ်ကြောမူမမှန်ခြင်းတို့ဖြစ်သည်။ ထို့ပြင် အရက်ကို ကြာရှည်အလွဲသုံးခြင်းကြောင့် ကင်ဆာ၊ ဆီးချို၊ နှလုံးနှင့် အစာအိမ်ဆိုင်ရာ ရောဂါအချို့ရနိုင်သည်။ အရက်ကို အလွဲသုံးခြင်းသည် သမ္မာကျမ်းစာမှ ဤညွှန်ကြားချက်နှင့်လည်း လုံးလုံးမကိုက်ညီပါ– “ကိုယ်ခန္ဓာ၏အညစ်အကြေး၊ စိတ်ဝိညာဉ်၏အညစ်အကြေးရှိသမျှတို့နှင့် ကိုယ်ကိုကိုယ်ကင်းစင်စေလျက်၊ ဘုရားသခင်ကိုကြောက်ရွံ့၍ သန့်ရှင်းခြင်း . . . နှင့်ပြည့်စုံကြကုန်အံ့။”—၂ ကောရိန္သု ၇:၁။
၈။ သု. ၂၃:၂၀၊ ၂၁ အရ အရက်အလွဲသုံးခြင်းကြောင့် အဘယ်အကျိုးဆက်ရနိုင်သနည်း။
၈ အရက်အလွဲသုံးခြင်းသည် ငွေဖြုန်းတီးရာရောက်ပြီး အလုပ်လက်မဲ့ပင် ဖြစ်စေနိုင်သည်။ ရှေးခေတ်မှ ဣသရေလရှင်ဘုရင် ရှောလမုန်က “စပျစ်ရည်သောက်ကြူးသောသူ၊ အမဲသားစားကြူးသောသူတို့ကို အပေါင်းအဖော်မလုပ်နှင့်” ဟုသတိပေးခဲ့သည်။ အဘယ်ကြောင့်နည်း။ “သောက်ကြူးသောသူနှင့် စားကြူးသောသူသည် ဆင်းရဲခြင်းသို့ရောက်လိမ့်မည်။ အိပ်ကြူးသောသဘောသည် လူကိုအဝတ်စုတ်နှင့်ခြုံတတ်၏” ဟုသူရှင်းပြခဲ့သည်။—သု. ၂၃:၂၀၊ ၂၁။
၉။ လူတစ်ဦး ယာဉ်မောင်းတော့မည်ဆိုလျှင် အရက်ယမကာကိုရှောင်ခြင်းသည် အဘယ်ကြောင့်ပညာရှိရာရောက်သနည်း။
၉ နောက်အန္တရာယ်တစ်ခုကို အရက်စွဲခြင်းရောဂါစွယ်စုံကျမ်းက ဤသို့ဖော်ပြသည်– “လေ့လာမှုများအရ အရက်သည် တုံ့ပြန်ချိန်၊ လှုပ်ရှားမှုကိုထိန်းချုပ်နိုင်ခြင်း၊ အာရုံစိုက်ခြင်း၊ အမြင်အာရုံကောင်းခြင်းနှင့် ချင့်ချိန်ဆုံးဖြတ်နိုင်ခြင်းတို့ပါဝင်သော ယာဉ်မောင်းစွမ်းရည်များကို ဆုတ်ယုတ်စေကြောင်း သိရှိရသည်။” အရက်မူးမူးနှင့် မောင်းခြင်း၏အကျိုးဆက်များမှာ ဆိုးဝါးလှ၏။ အမေရိကန်ပြည်ထောင်စုတစ်ခုတည်းတွင်ပင် အရက်ကြောင့်ဖြစ်ပွားသော ယာဉ်တိုက်မှုများသည် နှစ်စဉ် သောင်းနှင့်ချီ၍ သေဆုံးကြရပြီး သိန်းနှင့်ချီ၍ ဒဏ်ရာရကြသည်။ ဤအန္တရာယ်ကို အထူးသဖြင့် ကြုံကြရသူတို့မှာ ယာဉ်မောင်းခြင်းနှင့် အရက်သောက်ခြင်းတွင် အတွေ့အကြုံနည်းသော လူငယ်များဖြစ်သည်။ အရက် အတော်များများသောက်ထားပြီးနောက် ကားမောင်းသူသည် ယေဟောဝါဘုရားသခင်ထံမှရရှိသော အသက်ဆုကျေးဇူးကို လေးစားပါသည်ဟု ဆိုနိုင်မည်လော။ (ဆာလံ ၃၆:၉) အသက်၏မြင့်မြတ်မှုကိုထောက်ထားပြီး ကားမောင်းမည့်သူသည် အရက်ယမကာများ လုံးဝမသောက်လျှင် အကောင်းဆုံးဖြစ်သည်။
၁၀။ အရက်ယမကာသည် ကျွန်ုပ်တို့၏စိတ်ကို မည်သို့ထိခိုက်စေနိုင်သနည်း၊ ယင်းသည် အဘယ်ကြောင့်အန္တရာယ်ရှိသနည်း။
၁၀ အလွန်အကျွံသောက်ခြင်းသည် ကာယရေးသာမက ဝိညာဉ်ရေးကိုပါ ထိခိုက်သည်။ “စပျစ်ရည်[ဝိုင်]နှင့် အသစ်သောစပျစ်ရည်သည် ဉာဏ်ကိုကင်းမဲ့စေ၏” ဟုသမ္မာကျမ်းစာကဆိုသည်။ (ဟောရှေ ၄:၁၁၊ သမ္မာ) အရက်ယမကာသည် စိတ်ပိုင်းကို ထိခိုက်တတ်၏။ အမေရိကန်ပြည်ထောင်စု ယစ်မျိုးအလွဲသုံးခြင်းဆိုင်ရာ အမျိုးသားအဖွဲ့မှ ထုတ်ဝေသော စာစောင်က ဤသို့ရှင်းပြသည်– “လူတစ်ဦး အရက်သောက်သည့်အခါ ယင်းသည် အစာခြေစနစ်မှတစ်ဆင့် သွေးကြော၊ ထို့နောက် ဦးနှောက်ထဲသို့ အလျင်အမြန်ရောက်ရှိသွားသည်။ ထိုအခါ စဉ်းစားတွေးတောခြင်းနှင့် စိတ်လှုပ်ရှားမှုကိုထိန်းချုပ်သည့် ဦးနှောက်အစိတ်အပိုင်းများကို နှေးကွေးစေသည်။ သို့ဖြင့် ထိုသူသည် အရှက်အကြောက်နည်းလာပြီး ပို၍လွတ်လပ်သည်ဟု စိတ်ထင်တတ်သည်။” ထိုအခြေအနေမျိုးတွင် ကျွန်ုပ်တို့သည် ‘လမ်းလွဲ’ သွားဖို့၊ မတော်မသင့်ပြုမူပြောဆိုမိဖို့နှင့် သွေးဆောင်မှုအမျိုးမျိုးထဲ ကျရောက်သွားဖို့ အကြောင်းပိုများသည်။—သု. ၂၀:၁။
၁၁၊ ၁၂။ အရက်အလွန်အကျွံသောက်သုံးခြင်းကြောင့် အဘယ်ဝိညာဉ်ရေးအန္တရာယ်များရှိနိုင်သနည်း။
၁၁ ထို့ပြင် သမ္မာကျမ်းစာက ဤသို့မိန့်မှာထားသည်– “သင်တို့သည် စားသော်လည်းကောင်း၊ သောက်သော်လည်းကောင်း၊ မည်သည့်အမှုကိုပြုသော်လည်းကောင်း၊ ဘုရားသခင်၏ဘုန်းတော်ကိုထောက်၍ ခပ်သိမ်းသောအမှုကိစ္စကိုပြုကြလော့။” (၁ ကောရိန္သု ၁၀:၃၁) အရက်အလွန်အကျွံသောက်ခြင်းသည် ဘုရားသခင့်ဘုန်းတော်ကို ထင်ရှားစေပါသလော။ ခရစ်ယာန်တစ်ဦးသည် အလွန်အကျွံသောက်သူတစ်ဦးအဖြစ် နာမည်ရလိုမည်မဟုတ်ပါ။ ထိုသို့နာမည်ရခြင်းသည် ယေဟောဝါ၏နာမတော်ကို ထင်ရှားစေမည့်အစား ရှုတ်ချစရာဖြစ်စေပါမည်။
၁၂ ချင့်ချိန်မှုကင်းမဲ့စွာ သောက်တတ်သောခရစ်ယာန် တစ်ဦးသည် တပည့်သစ်တစ်ဦးဖြစ်ကောင်းဖြစ်မည့် ယုံကြည်သူချင်းတစ်ဦးကို ထိမိ၍လဲစေလျှင်ကော။ (ရောမ ၁၄:၂၁) ယေရှုဤသို့သတိပေးခဲ့သည်– “ငါ့ကိုယုံကြည်သော ဤသူငယ်တစ်စုံတစ်ယောက်ကို အကြင်သူသည် မှားယွင်း [“ထိမိ၍လဲ၊” ကဘ] စေ၏၊ ထိုသူသည် လည်ပင်း၌ကြိတ်ဆုံကျောက်ကိုဆွဲ၍ နက်နဲသောပင်လယ်၌ နှစ်မြှုပ်ခြင်းကိုခံရသော် အနေသာ၍ကောင်း၏။” (မဿဲ ၁၈:၆) သောက်ကြူးခြင်းကြောင့် အသင်းတော်အခွင့်အရေးများ ဆုံးရှုံးနိုင်သည်။ (၁ တိမောသေ ၃:၁-၃၊ ၈) ထို့ပြင် အရက်အလွဲသုံးခြင်းကြောင့် ဖြစ်ပေါ်လာနိုင်သော မိသားစုပဋိပက္ခကိုလည်း လျစ်လျူမရှုရပါ။
အန္တရာယ်များကို ရှောင်လော့—မည်သို့အားဖြင့်နည်း
၁၃။ အရက်အလွဲသုံးခြင်းကို ရှောင်ရာ၌ အရေးပါသောအချက်ကား အဘယ်နည်း။
၁၃ အရက်အလွဲသုံးခြင်း၏ အန္တရာယ်များကိုရှောင်ရန် သော့ချက်မှာ မူးယစ်ခြင်းကိုရှောင်ရုံသာမဟုတ်၊ အလွန်အကျွံသောက်ခြင်းကိုရှောင်ဖို့ ပန်းတိုင်ထားခြင်းဖြစ်သည်။ အရက်ပမာဏမည်မျှသည် သင့်အတွက် တော်သင့်ရုံဖြစ်မည်၊ အလွန်အကျွံဖြစ်မည်ကို မည်သူဆုံးဖြတ်ပေးနိုင်သနည်း။ ထည့်စဉ်းစားစရာအကြောင်းများစွာရှိသဖြင့် အရက်ပမာဏမည်မျှသည် များလွန်ပြီဟု စည်းမျဉ်းအတိအကျမထုတ်နိုင်ပါ။ တစ်ဦးချင်းစီအနေနှင့် ကိုယ့်အတိုင်းအတာကိုယ်သိပြီး ထိုအတိုင်းအတာအတွင်း သောက်ကြရပေမည်။ အရက်ပမာဏမည်မျှသည် သင့်အတွက် များလွန်းပြီဆိုသည်ကို အဘယ်အရာက ဆုံးဖြတ်ပေးမည်နည်း။ လမ်းညွှန်ပေးနိုင်သည့်မူ ရှိပါသလော။
၁၄။ တော်သင့်ရုံသောက်ခြင်းနှင့် သောက်ကြူးခြင်းကို စည်းသတ်ရာ၌ အဘယ်လမ်းညွှန်မူက အထောက်အကူပြုသနည်း။
၁၄ သမ္မာကျမ်းစာက ဤသို့ဆို၏– “ပညာရတနာ [“လက်တွေ့ကျသောဉာဏ်ပညာ၊” ကဘ] နှင့် . . . သတိ [“စဉ်းစားဆင်ခြင်နိုင်စွမ်း၊” ကဘ] ကို သင့်မျက်မှောက်မှမကွာစေဘဲ အစဉ်စောင့်ရှောက်လော့။ သို့ပြုလျှင် ထိုရတနာတို့သည် သင်၏ဝိညာဉ်၌အသက်၊ သင်၏လည်ပင်း၌ ဂုဏ်အသရေဖြစ်လိမ့်မည်။” (သု. ၃:၂၁၊ ၂၂) သို့ဖြစ်၍ လမ်းညွှန်ပေးသည့်မူမှာ ဤသို့ဖြစ်သည်– သင်၏ချင့်ချိန်နိုင်စွမ်းကို ထိခိုက်သော၊ သင်၏စဉ်းစားဆင်ခြင်နိုင်စွမ်းကို ထုံထိုင်းစေသော မည်သည့်ပမာဏမဆိုသည် သင့်အတွက် များလွန်းပြီဖြစ်၏။ သို့သော် သင့်ကိုယ်ပိုင်အကန့်အသတ် မည်မျှရှိသည်ကို အမှန်အတိုင်း အသိအမှတ်ပြုရပေမည်!
၁၅။ အဘယ်အချိန်တွင် အရက်လုံးဝမသောက်ဘဲနေခြင်းသည် ပညာရှိရာရောက်မည်နည်း။
၁၅ အချို့သောအခြေအနေများတွင် အရက်လုံးဝမသောက်လျှင် ကောင်းပေမည်။ သန္ဓေသားအား အန္တရာယ်ဖြစ်မည်စိုးသောကြောင့် ကိုယ်ဝန်ဆောင်အမျိုးသမီးတစ်ဦးသည် လုံးဝမသောက်ဘဲနေပေမည်။ အသောက်လွန်တတ်သည့်ပြဿနာရှိသူ သို့မဟုတ် အရက်သောက်ခြင်းကို အပြစ်တင်သောသိစိတ်ရှိသူအရှေ့တွင် အရက်မသောက်ဘဲနေခြင်းသည် ကြင်နာမှုပြရာကျမည်မဟုတ်ပေလော။ တဲတော်တွင် ယဇ်ပုရောဟိတ်တာဝန်များ ထမ်းဆောင်နေသူတို့ကို ယေဟောဝါဤသို့မိန့်မှာခဲ့သည်– “သင် . . . တို့သည် သေဘေးနှင့်ကင်းလွတ်ခြင်းငှာ . . . ပရိသတ်စည်းဝေးရာတဲတော်သို့ ဝင်သောအခါ စပျစ်ရည်အစရှိသောယစ်မျိုးကို မသောက်နှင့်။” (ဝတ်ပြုရာ ၁၀:၈-၁၁) ထို့ကြောင့် ခရစ်ယာန်အစည်းအဝေးများ မတက်ရောက်မီ၊ ဓမ္မအမှု၌မပါဝင်မီနှင့် အခြားဝိညာဉ်ရေးတာဝန်များ ဆောင်ရွက်ခါနီးအချိန်တွင် အရက်ယမကာများသောက်ခြင်းကို ရှောင်ကြဉ်ပါ။ ထို့အပြင် အရက်သောက်သုံးခြင်းကို တားမြစ်ထားသော သို့မဟုတ် တစ်စုံတစ်ရာသောအသက်အရွယ်အထက်ရှိ သူများကိုသာ သောက်သုံးခွင့်ပေးသောနိုင်ငံများတွင် တိုင်းပြည်၏ဥပဒေများကို လေးစားလိုက်နာသင့်သည်။—ရောမ ၁၃:၁။
၁၆။ သင့်ရှေ့၌ အရက်တည်ခင်းထားသည့်အခါ သောက်မည်မသောက်မည်ကို မည်သို့ဆုံးဖြတ်သင့်သနည်း။
၁၆ သင့်ရှေ့၌ အရက်တည်ခင်းထားလျှင် ‘ငါသောက်သင့်သလား’ ဟုဦးဆုံးမေးသင့်သည်။ သောက်ဖို့စိတ်ဆုံးဖြတ်ပါက သင်၏အတိုင်းအတာကို ကောင်းကောင်းမှတ်ထားပြီး ထိုပမာဏကို မကျော်ပါနှင့်။ အိမ်ရှင်၏ရက်ရောမှုကြောင့် စိတ်ယိုင်မသွားပါနှင့်။ မင်္ဂလာဧည့်ခံပွဲကဲ့သို့သော အခါသမယများတွင် အရက်ကို ကြိုက်သလောက်သောက်နိုင်သည့်အခါများကိုလည်း သတိပြုပါ။ နေရာဒေသများစွာတွင် ကလေးများသည် အရက်ကို တရားဝင်သောက်ခွင့်ရှိသည်။ အရက်သောက်သုံးခြင်းနှင့်ပတ်သက်၍ မိမိသားသမီးကို သွန်သင်ပေးရန်နှင့် သူတို့ မည်မျှသောက်ဖို့ကြီးကြပ်ပေးရန် မိဘများမှာ တာဝန်ရှိ၏။—သု. ၂၂:၆။
ပြဿနာကို သင်ကိုင်တွယ်ဖြေရှင်းနိုင်
၁၇။ အရက်အလွဲသုံးခြင်းပြဿနာ သင်၌ရှိမရှိ သိရှိရန် အဘယ်အရာက ကူညီပေးမည်နည်း။
၁၇ ဝိုင်နှင့် သေရည်သေရက်အလွဲသုံးခြင်းသည် သင့်အတွက် ပြဿနာတစ်ခုလော။ အရက်အလွဲသုံးခြင်းသည် လျှို့ဝှက်အပြစ်တစ်ခုဖြစ်နေလျှင် အနှေးနှင့်အမြန်ဆိုသလို သင့်ကို ထိခိုက်လိမ့်မည်သေချာသည်။ ထို့ကြောင့် မိမိကိုယ်ကို ရိုးရိုးသားသားဆန်းစစ်ကြည့်ပါ။ ဤကဲ့သို့သောမေးခွန်းမျိုးဖြင့် ကိုယ့်ကိုယ်ကိုဆန်းစစ်မေးမြန်းကြည့်ပါ– ‘ငါ ခါတိုင်းထက် ပိုပြီးသောက်တဲ့အကြိမ်များနေသလား။ ပိုပြီးပြင်းတဲ့အရက်ကို သောက်နေသလား။ စိုးရိမ်ပူပန်မှု၊ ဖိစီးမှု ဒါမှမဟုတ် ပြဿနာတွေကို မေ့လျော့ဖို့ သောက်တာလား။ အိမ်သားတစ်ယောက်ယောက် ဒါမှမဟုတ် သူငယ်ချင်းတစ်ယောက်က ငါသောက်ပုံနဲ့ပတ်သက်ပြီး စိုးရိမ်တယ်လို့ ပြောဖူးသလား။ အရက်သောက်လို့ ငါ့မိသားစုထဲမှာ ပြဿနာတွေတက်ခဲ့သလား။ တစ်ပတ်၊ တစ်လ ဒါမှမဟုတ် လအနည်းငယ် အရက်မသောက်ရရင် အနေခက်နေလား။ ဝိုင် ဒါမှမဟုတ် အရက်ကို ငါဘယ်လောက်သောက်တယ်ဆိုတာ သူများမသိရအောင် ဝှက်သောက်သလား။’ ၎င်းမေးခွန်းအချို့ကို ဟုတ်ကဲ့ဟုအဖြေရလျှင်ကော။ ‘မှန်၌ မိမိပကတိမျက်နှာကိုကြည့်ပြီး မိမိအဆင်းသဏ္ဌာန်ကို ချက်ချင်းမေ့လျော့တတ်’ သူနှင့် မတူပါနှင့်။ (ယာကုပ် ၁:၂၂-၂၄) ယင်းပြဿနာကို ပြုပြင်ပြောင်းလဲပေးရန် အစပြုလုပ်ဆောင်ပါ။ သင် အဘယ်အရာပြုလုပ်နိုင်သနည်း။
၁၈၊ ၁၉။ အရက်အသောက်လွန်ခြင်းကို သင်မည်သို့ရပ်တန့်နိုင်သနည်း။
၁၈ တမန်တော်ပေါလုက ခရစ်ယာန်များကို ဤသို့တိုက်တွန်းခဲ့သည်– “လွန်ကျူးစေတတ်သော စပျစ်ရည်နှင့်ယစ်မူးခြင်းကိုရှောင်၍ ဝိညာဉ်တော်နှင့်ပြည့်စုံလျက်ရှိကြလော့။” (ဧဖက် ၅:၁၈) အရက်ပမာဏမည်မျှသည် သင့်အတွက် များလွန်းပြီကို ဆုံးဖြတ်ကာ တော်သင့်ရုံပမာဏကို သတ်မှတ်ထားပါ။ ထိုပမာဏကို မလွန်ရန် သန္နိဋ္ဌာန်ချပါ; စိတ်ချုပ်တည်းပါ။ (ဂလာတိ ၅:၂၂၊ ၂၃) အလွန်အကျွံသောက်ရန် သင့်ကိုဖိအားပေးသည့် အပေါင်းအသင်းများရှိပါသလော။ သတိထားပါ။ “ပညာရှိတို့နှင့်ပေါင်းဖော်သောသူသည် ပညာရှိတတ်၏။ လူမိုက်တို့နှင့်ပေါင်းဖော်သောသူမူကား ပျက်စီးတတ်၏” ဟုသမ္မာကျမ်းစာကဆိုသည်။—သု. ၁၃:၂၀။
၁၉ အသင်သည် ပြဿနာကိုရှောင်ရန် အရက်သုံးစွဲနေသူဖြစ်လျှင် ထိုပြဿနာကို တိုက်ရိုက်ရိုးသားစွာရင်ဆိုင်ဖြေရှင်းလိုက်ပါ။ ဘုရားသခင့်နှုတ်မြွက်စကားတော်မှ ဆုံးမစကားကို လက်တွေ့ကျင့်သုံးခြင်းအားဖြင့် ပြဿနာများကို ဖြေရှင်းနိုင်ပါသည်။ (ဆာလံ ၁၁၉:၁၀၅) ယုံကြည်အားကိုးရသော ခရစ်ယာန်အကြီးအကဲတစ်ဦးထံ အကူအညီတောင်းဆိုရန် ဝန်မလေးပါနှင့်။ သင်၏ဝိညာဉ်ရေးကို တည်ဆောက်ရန် ယေဟောဝါ၏ပြင်ဆင်ပေးချက်များကို ကောင်းစွာအသုံးချပါ။ ဘုရားသခင်နှင့် သင်၏ဆက်ဆံရေးကို ခိုင်မြဲစေပါ။ ကိုယ်တော့်ထံ မှန်မှန်ဆုတောင်းပါ—အထူးသဖြင့် သင့်အားနည်းချက်များအကြောင်း ဆုတောင်းပါ။ ‘သင်၏ကျောက်ကပ်နှင့်နှလုံးကို သန့်စင်’ ပေးဖို့ ဘုရားသခင်အား အသနားခံပါ။ (ဆာလံ ၂၆:၂) ရှေ့ဆောင်းပါးတွင် ဆွေးနွေးခဲ့သည့်အတိုင်း သမာဓိစောင့်သိသောလမ်းစဉ်၌ အတတ်နိုင်ဆုံး လျှောက်လှမ်းပါ။
၂၀။ သောက်ကြူးနေသည့်ပြဿနာကို ရင်ဆိုင်ဖြေရှင်းရန် သင်အဘယ်အရာများ လုပ်ဆောင်နိုင်မည်နည်း။
၂၀ သင်ကြိုးစားနေသည့်ကြား သောက်ကြူးသည့်ပြဿနာ ဆက်ရှိနေလျှင်ကော။ သို့ဖြစ်လျှင် ယေရှု၏ဤအကြံပေးချက်ကို သင်လိုက်နာရပေမည်– “သင့်လက်သည် သင့်ကိုတိုက်လဲစေလျှင် ဖြတ်ပစ်လော့။ ဂေဟင်္နာအရပ်သို့ လက်နှစ်ဖက်စုံနှင့်ဝင်ခြင်းထက် ချို့တဲ့ကာ အသက်ရှင်ခြင်းသို့ဝင်ခြင်းသည် သာ၍ကောင်း၏။” (မာကု ၉:၄၃၊ ကဘ) အဖြေမှာ– လုံးဝမသောက်ပါတော့နှင့်။ အိုင်ရင်းဟု ကျွန်ုပ်တို့အမည်ပေးမည့် အမျိုးသမီးတစ်ဦး ထိုသို့ပြုရန် စိတ်ပိုင်းဖြတ်ခဲ့သည်။ သူဤသို့ပြောပြသည်– “အရက်ဖြတ်ထားတာ နှစ်နှစ်ခွဲနီးပါးကြာတဲ့အခါ ကျွန်မနိုင်မနိုင် စမ်းကြည့်ဖို့ တစ်ခွက်လောက်ဆိုရင် ဘာမှမဖြစ်လောက်ပါဘူးလို့ ကျွန်မထင်ခဲ့တယ်။ ဒါပေမဲ့ အဲဒီလို စိတ်ထဲပေါ်လာတာနဲ့ တစ်ပြိုင်နက် ယေဟောဝါကို ချက်ချင်းပဲ ဆုတောင်းတင်ပြလိုက်တယ်။ စနစ်သစ်မရောက်မချင်း အရက်ထပ်မသောက်ဖို့ ကျွန်မစိတ်ပိုင်းဖြတ်ထားတယ်၊ အဲဒီအချိန်ရောက်တဲ့အခါတောင် ကျွန်မ,မသောက်တော့ဘဲလည်းဖြစ်နိုင်တယ်။” သေရည်သေရက်ကို လုံးဝရှောင်ကြဉ်ခြင်းသည် ဘုရားသခင့်ဖြောင့်မတ်သောကမ္ဘာသစ်တွင် အသက်ရှင်ရေးအတွက် ပေးဆပ်ရန် များလွန်းသော အဖိုးအခ မဟုတ်ပါ။—၂ ပေတရု ၃:၁၃။
“ဆုကိုရမည်အကြောင်း ပြေးကြလော့”
၂၁၊ ၂၂။ အသက်ပြေးပွဲတွင် ပန်းဝင်မျဉ်းမရောက်ဖို့ အဘယ်အရာများက အတားအဆီးဖြစ်နိုင်သနည်း၊ ယင်းကို မည်သို့ရှောင်နိုင်သနည်း။
၂၁ တမန်တော်ပေါလုသည် ခရစ်ယာန်ဘဝလမ်းစဉ်ကို ပြေးပွဲ သို့မဟုတ် ပြိုင်ပွဲတစ်ခုနှင့်ပုံခိုင်းကာ ဤသို့ဆို၏– “မြေတလင်း၌ပြိုင်၍ပြေးကြသော သူအပေါင်းတို့သည် ပြိုင်၍ပြေးကြသော်လည်း၊ တစ်ယောက်တည်းသာလျှင် ဆုကိုရသည်ဟု သင်တို့မသိကြသလော။ ဆုကိုရမည်အကြောင်း ပြေးကြလော့။ ပွဲ၌ပြိုင်၍ အချင်းချင်းတိုက်သောသူမည်သည်ကား၊ အရာရာ၌ တပ်မက်ခြင်းကို ချုပ်တည်းတတ်၏။ ထိုသူတို့သည် ညှိုးနွမ်းပျက်စီးတတ်သော ပန်းဦးရစ်ကိုရခြင်းအလိုငှာပြုကြ၏။ ငါတို့မူကား မညှိုးနွမ်းမပျက်စီးနိုင်သော ပန်းဦးရစ်ကိုရခြင်းအလိုငှာ ပြုကြ၏။ ထို့ကြောင့် ငါပြေးသောအခါ အမှတ်တမဲ့ပြေးသည်မဟုတ်။ လက်ပွေ့သတ်သောအခါ အာကာသကောင်းကင်ကိုသာ ထိုး၍သတ်သည်မဟုတ်။ သူတစ်ပါးကိုဆုံးမပြီးမှ ကိုယ်တိုင်ရှုံးသောသူမဖြစ်ရမည်အကြောင်း၊ ကိုယ်ကိုထိုး၍နှိပ်စက်လေ့ရှိ၏။”—၁ ကောရိန္သု ၉:၂၄-၂၇။
၂၂ ပြေးပွဲကို အောင်မြင်စွာ ပန်းဝင်သူသာလျှင် ဆုရနိုင်သည်။ အရက်အလွဲသုံးခြင်းသည် အသက်ပြေးပွဲတွင် ပန်းဝင်မျဉ်းရောက်ဖို့ အတားအဆီးဖြစ်နိုင်ပါသည်။ ကျွန်ုပ်တို့ စိတ်ချုပ်တည်းရကြမည်။ စိတ်ချလက်ချပြေးရန် “စပျစ်ရည်နှင့်ယစ်မူး” မနေဖို့လိုသည်။ (၁ ပေတရု ၄:၃) ထိုသို့ဖြစ်မည့်အစား အရာရာ၌ စိတ်ချုပ်တည်းဖို့လို၏။ အရက်ယမကာသောက်ခြင်းနှင့်ပတ်သက်လာသော် ‘ဘုရားသခင်မဲ့တရားမဲ့နေခြင်း၊ လောကတပ်မက်ခြင်းကိုပယ်ရှားလျက်၊ ယခုဘဝ၌ ဣန္ဒြေစောင့်ခြင်း၊ တရားသဖြင့်ကျင့်ခြင်း၊ ဘုရားသခင်ဝတ်၌မွေ့လျော်ခြင်းတို့ကို ပြုနေ’ ခြင်းသည် ပညာရှိရာရောက်၏။—တိတု ၂:၁၃။
[အောက်ခြေမှတ်ချက်]
^ အပိုဒ်၊ 2 ဤဆောင်းပါးတွင်ဖော်ပြထားသော “အရက်” သည် ဘီယာ၊ ဝိုင်နှင့် အခြားအရက်ယမကာများကို ဆိုလိုပါသည်။
သင်မှတ်မိသလော
• အရက်အလွဲသုံးခြင်းဟူသည် အဘယ်နည်း။
• အရက်အလွဲသုံးခြင်းသည် အဘယ်အန္တရာယ်ရှိသနည်း။
• အရက်အလွဲသုံးခြင်း၏အန္တရာယ်များကို သင်မည်သို့ ရှောင်နိုင်သနည်း။
• အရက်အလွဲသုံးခြင်းပြဿနာကို မည်သို့ကိုင်တွယ်ဖြေရှင်း နိုင်သနည်း။
[လေ့လာရန်မေးခွန်းများ]
[စာမျက်နှာ ၁၉ ပါ ရုပ်ပုံ]
ဝိုင်သည် “လူတို့ကိုရွှင်လန်းစေ၏”
[စာမျက်နှာ ၂၀ ပါ ရုပ်ပုံ]
ကျွန်ုပ်တို့သည် ကိုယ့်အကန့်အသတ် ကိုယ်သိရမည်ဖြစ်ပြီး ထိုအကန့်အသတ်အတွင်း သောက်ရကြမည်
[စာမျက်နှာ ၂၁ ပါ ရုပ်ပုံ]
တော်သင့်ရုံအတိုင်းအတာကို ကြိုတင်ဆုံးဖြတ် ထားပါ
[စာမျက်နှာ ၂၂ ပါ ရုပ်ပုံ]
သင့်အားနည်းချက်များ အကြောင်း ယေဟောဝါထံ မှန်မှန်ဆုတောင်းပါ
[စာမျက်နှာ ၂၃ ပါ ရုပ်ပုံ]
အရက်သုံးစွဲခြင်းနှင့်ပတ်သက်၍ သားသမီးများကို သွန်သင်ပေးရန် မိဘများ၌တာဝန်ရှိ