တရားသူကြီးမှတ်စာမှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
တရားသူကြီးမှတ်စာမှ ပေါ်လွင်ချက်များ
မိမိ၏လူမျိုးက မိမိအား ကျောခိုင်းသွားပြီး မမှန်သောနတ်ဘုရားများကို ကိုးကွယ်စပြုသည့်အခါ ယေဟောဝါ မည်သို့တုံ့ပြန်သနည်း။ သူတို့သည် ထပ်ခါတလဲလဲ ပုန်ကန်ပြီး အခက်အခဲတွေ့မှသာ ကိုယ်တော့်ကို အကူအညီတောင်းသည့်အခါမျိုးတွင်ကော အသို့နည်း။ ထိုအချိန်မျိုးတွင်ပင် သူတို့၏လွတ်မြောက်ရာလမ်းကို ယေဟောဝါ စီစဉ်ပေးသလော။ တရားသူကြီးမှတ်စာက ဤမေးခွန်းများနှင့် အခြားအရေးကြီးမေးခွန်းများကို ဖြေဆိုပေး၏။ ဘီ.စီ.အီး. ၁၁၀၀ ပြည့်နှစ်ခန့်တွင် ပရောဖက်ရှမွေလရေးသားခဲ့သော ဤကျမ်းသည် ယောရှုသေဆုံး ချိန်မှသည် ပထမဦးဆုံး ဣသရေလရှင်ဘုရင် နန်းတက်ချိန်အထိ အနှစ် ၃၃၀ ခန့်ကြာရှည်သော အဖြစ်အပျက်များကို ခြုံငုံမိသည်။
ဘုရားသခင်၏တန်ခိုးပါသော စကားတော် သို့မဟုတ် သတင်းတရား၏ အစိတ်အပိုင်းတစ်ခုဖြစ်သော တရားသူကြီးမှတ်စာသည် ကျွန်ုပ်တို့အတွက် အလွန်တန်ဖိုးရှိ၏။ (ဟေဗြဲ ၄:၁၂) ယင်းတွင်မှတ်တမ်းတင်ထားသော စိတ်လှုပ်ရှားဖွယ် အဖြစ်အပျက်များသည် ဘုရားသခင်၏ကိုယ်ရည်ကိုယ်သွေးကို ထိုးထွင်းသိမြင်စေသည်။ ၎င်းအဖြစ်အပျက်များမှရရှိသည့် သင်ခန်းစာများသည် ကျွန်ုပ်တို့၏ယုံကြည်ခြင်းကို ခိုင်ခံ့စေပြီး ဘုရားသခင်၏ကတိထားရာ ကမ္ဘာသစ်တွင် “မှန်သောအသက်” ဖြစ်သည့် ထာဝရအသက်ကို အခိုင်အမာ ဆုပ်ကိုင်ထားစေသည်။ (၁ တိမောသေ ၆:၁၂၊ ၁၉; ၂ ပေတရု ၃:၁၃) မိမိ၏လူမျိုးတော်အကျိုးအတွက် ယေဟောဝါလုပ်ဆောင်ပေးသည့် ကယ်တင်ခြင်းလုပ်ရပ်များသည် နောင်အနာဂတ်တွင် မိမိ၏သားတော် ယေရှုခရစ်လုပ်ဆောင်ပေးမည့် သာ၍ကြီးမြတ်သော ကယ်လွှတ်မှု၏ ကြိုတင်မြင်ကွင်းတစ်ခုကို ဖြစ်စေသည်။
တရားသူကြီးများ အဘယ်ကြောင့် လိုအပ်ခဲ့သနည်း
ယောရှု၏ဦးဆောင်မှုအောက်တွင် ခါနာန်ရှင်ဘုရင်များကို အနိုင်ရရှိပြီးနောက် ဣသရေလတစ်နွယ်စီသည် သူတို့၏အမွေမြေသို့သွား၍ သိမ်းပိုက်ကြသည်။ သို့သော် ဣသရေလလူတို့သည် ထိုပြည်သားများကို မနှင်ထုတ်ခဲ့ကြချေ။ ဤသို့မနှင်ထုတ်လိုက်ခြင်းက ဣသရေလနိုင်ငံအတွက် အမှန်ပင် ကျော့ကွင်းဖြစ်သွားစေသည်။
ယောရှုခေတ်နောက်ပိုင်း မွေးဖွားလာသော လူမျိုးဆက်သည် ‘ထာဝရဘုရားသခင်ကိုလည်းကောင်း၊ ဣသရေလအမျိုးအဖို့ပြုတော်မူသော အမှုတို့ကိုလည်းကောင်း မသိ’ တော့ချေ။ (တရားသူကြီး ၂:၁၀) ထို့ပြင် ခါနာန်လူတို့နှင့် အိမ်ထောင်ပြု၍ သူတို့၏နတ်ဘုရားများကို ဝတ်ပြုကိုးကွယ်လာကြသည်။ ထို့ကြောင့် ယေဟောဝါသည် ဣသရေလလူမျိုးကို ရန်သူလက်သို့ အပ်လိုက်လေသည်။ သို့သော် ဖိနှိပ်မှုပြင်းထန်လာသည့်အခါ ဣသရေလလူတို့သည် စစ်မှန်သောဘုရားသခင်ထံ အကူအညီတောင်းကြလေသည်။ ယေဟောဝါသည် အဆိုပါဝတ်ပြုရေး၊ လူမှုရေးနှင့် နိုင်ငံရေးအခြေအနေတွင် ရန်သူများလက်မှ မိမိ၏လူမျိုးတော်ကို ကယ်လွှတ်ရန် တရားသူကြီးမျိုးဆက်ကို ပေါ်ထွန်းစေတော်မူ၏။
ကျမ်းစာမေးခွန်းများ အဖြေ–
၁:၂၊ ၄—ခွဲဝေထားသောအမွေမြေကို သိမ်းယူရန် ယုဒကို ပထမမျိုးနွယ်အဖြစ် အဘယ်ကြောင့် ဖော်ပြရသနည်း။ ပုံမှန်အားဖြင့် ယာကုပ်၏သားဦး ရုဗင်အနွယ်သည် ဤအခွင့်ထူးကို ရရှိရမည်။ သို့သော် ယာကုပ်သေခါနီး ပရောဖက်ပြုချက်တွင် ရုဗင်သည် သူ၏သားဦးအခွင့်အရာ ဆုံးရှုံးသွားရာ ထူးမြတ်ခြင်းသို့မရောက်ရဟု ကြိုဟောခဲ့သည်။ ရက်စက်စွာပြုမူခဲ့ကြသော ရှိမောင်နှင့်လေဝိအနွယ်တို့သည် ဣသရေလနိုင်ငံတွင် ကွဲပြားပျံ့လွင့်သွားကြသည်။ (ကမ္ဘာဦး ၄၉:၃-၅၊ ၇) သို့ဖြစ်၍ နောက်မျိုးဆက်မှာ ယာကုပ်၏စတုတ္ထမြောက်သားဖြစ်သူ ယုဒပင်ဖြစ်သည်။ ယုဒနှင့်လိုက်သွားသော ရှိမောင်သည် ကြီးမားသောယုဒနယ်မြေအနှံ့တွင်ရှိသော နယ်မြေငယ်များကို ရရှိခဲ့သည်။ *—ယောရှု ၁၉:၉။
၁:၆၊ ၇—စစ်ရှုံးသွားသော ရှင်ဘုရင်များ၏ လက်မနှင့်ခြေမတို့ကို အဘယ်ကြောင့်ဖြတ်ခဲ့သနည်း။ လက်မနှင့်ခြေမ မရှိသူသည် စစ်တိုက်နိုင်စွမ်းမရှိတော့ပုံရ၏။ လက်မ,မရှိသော စစ်သားတစ်ဦးသည် ဓား သို့မဟုတ် လှံကို မည်သို့ကိုင်နိုင်မည်နည်း။ ခြေမ,မရှိလျှင် ကိုယ်ခန္ဓာ၏ဟန်ချက်ကို ကောင်းစွာထိန်းနိုင်မည်မဟုတ်ချေ။
ကျွန်ုပ်တို့အတွက် သင်ခန်းစာများ–
၂:၁၀-၁၂။ ‘ထာဝရဘုရားသခင်၏ ကျေးဇူးတော်အပေါင်းကို မမေ့လျော့’ ရန်ကျမ်းစာလေ့လာမှုအစီအစဉ်ကို ပုံမှန်ပြုလုပ်ရမည်။ (ဆာလံ ၁၀၃:၂) မိဘများသည် ဘုရားသခင့်စကားတော် အမှန်တရားကို သားသမီးများ၏နှလုံးထဲ သွတ်သွင်းပေးဖို့လိုသည်။—တရားဟောရာ ၆:၆-၉။
၂:၁၄၊ ၂၁၊ ၂၂။ ယေဟောဝါသည် မိမိ၏နာခံမှုမရှိသောလူမျိုးတော်ကို ဆုံးမရန်၊ သန့်စင်ပေးရန်၊ မိမိဘက်ပြန်လှည့်လာစေလိုသည့် ရည်ရွယ်ချက်ဖြင့် ဘေးဆိုးများကို သူတို့အပေါ် ကျရောက်စေခဲ့သည်။
ယေဟောဝါသည် တရားသူကြီးများကို ပေါ်ထွန်းစေ
တရားသူကြီးများ၏ စိတ်လှုပ်ရှားဖွယ် စွန့်စားလုပ်ဆောင်မှုမှတ်တမ်းကို မေသောပေါတာမိရှင်ဘုရင်၏လက်အောက်တွင် ဣသရေလလူမျိုး ရှစ်နှစ်တာကျွန်အဖြစ်မှ လွတ်မြောက်စေခဲ့သည့် ဩသံယေလ၏လုပ်ဆောင်မှုဖြင့် စတင်သည်။ တရားသူကြီးဧဟုဒသည် ရဲရင့်ပြောင်မြောက်သော နည်းဗျူဟာကိုသုံး၍ အလွန်ဝသော မောဘရှင်ဘုရင်ဧဂလုန်ကို ကွပ်မျက်ခဲ့သည်။ ရဲစွမ်းသတ္တိရှိသော ရှံဂါတစ်ဦးတည်းဖြင့် ဖိလိတ္တိလူခြောက်ရာကို တုတ်ချွန်နှင့် ရိုက်သတ်လေ၏။ ပရောဖက်မအဖြစ် အမှုထမ်းဆောင်နေသော ဒေဗောရ၏အားပေးမှု၊ ယေဟောဝါ၏ထောက်ပံ့ပေးမှုတို့ဖြင့် ဗာရက်သည် လက်နက်အနည်းငယ်သာရှိသည့် စစ်သည်တစ်သောင်းနှင့် စစ်အင်အားကြီးမားသော သိသရကို ချေမှုန်းနိုင်ခဲ့၏။ ယေဟောဝါသည် ဂိဒေါင်ကို ပေါ်ထွန်းစေပြီး သူနှင့် သူ၏လူ ၃၀၀ တို့ကို မိဒျန်လူတို့အပေါ် အောင်ပွဲခံစေသည်။
ယေဟောဝါသည် ယေဖသအားဖြင့် ဣသရေလလူမျိုးကို အာမ္မုန်လူတို့လက်မှ ကယ်လွှတ်ပေးသည်။ ဣသရေလလူမျိုးကိုစီရင်သည့် တရားသူကြီး ၁၂ ဦးတွင် တောလ၊ ယာဣရ၊ ဣဗဇန်၊ ဧလုန်နှင့် အာဗဒုန်တို့လည်းပါသည်။ ဖိလိတ္တိလူတို့ကို တိုက်ခိုက်ခဲ့သည့် ရှံဆုန်ဖြင့် တရားသူကြီးများ၏ခေတ်ကို အဆုံးသတ်လိုက်လေ၏။
ကျမ်းစာမေးခွန်းများ အဖြေ–
၄:၈—ဗာရက်သည် ပရောဖက်မဒေဗောရကို မိမိနှင့်အတူ စစ်မြေပြင်သို့ လိုက်ပါဟု အဘယ်ကြောင့် အတင်းအကျပ်တောင်းဆိုခဲ့သနည်း။ ဗာရက်သည် သိသရ၏တပ်ကို မိမိဘာသာ မဖြိုခွင်းနိုင်ဟု ယူဆခဲ့သည်မှာ ထင်ရှား၏။ သူနှင့်အတူ ထိုပရောဖက်မ ရှိနေခြင်းသည် မိမိနှင့်မိမိ၏လူတို့တွင် ဘုရားသခင်၏လမ်းညွှန်ချက်ရှိနေကြောင်း အာမခံချက်ဖြစ်ပြီး ယုံကြည်စိတ်ချမှုရှိစေပေမည်။ သို့ဖြစ်၍ ဗာရက်သည် မိမိနှင့်အတူ ဒေဗောရလိုက်လာရန် အတင်းအကျပ်တောင်းဆိုခြင်းမှာ ပျော့ညံ့မှုမဟုတ်ဘဲ ခိုင်ခံ့သောယုံကြည်ခြင်းရှိ၍ဖြစ်သည်။
၅:၂၀—ကြယ်များသည် ဗာရက်ကို ကောင်းကင်မှ မည်သို့စစ်ကူပေးခဲ့ကြသနည်း။ ကောင်းကင်တမန်၏ အကူအညီရခြင်းလော၊ သိသရ၏ပညာရှိများက နိမိတ်မကောင်းဟုယူဆသည့် ကြယ်များကြွေကျခြင်းလော၊ သိသရအတွက် နက္ခတ်ဗေဒဟောကိန်းမှားသွားခြင်းလောဆိုသည်ကို သမ္မာကျမ်းစာက မဆိုထားချေ။ သို့သော် ဘုရားသခင် ကြားဝင်ကူပေးခြင်း တစ်မျိုးမျိုးရှိနိုင်သည်။
၇:၁-၃; ၈:၁၀— ဂိဒေါင်၏လူ ၃၂,၀၀၀ သည် ရန်သူအင်အား ၁၃၅,၀၀၀ ကိုတိုက်ခိုက်ရန် များလွန်းသည်ဟု ယေဟောဝါ အဘယ်ကြောင့်မိန့်ဆိုရသနည်း။ ဂိဒေါင်နှင့် သူ၏လူတို့ကို အောင်ပွဲရစေသူမှာ ယေဟောဝါဖြစ်သောကြောင့်တည်း။ သူတို့၏ခွန်အားဖြင့် မိဒျန်လူတို့ကို အနိုင်ရခဲ့သည်ဟု ဘုရားသခင် မယူမှတ်စေလိုခဲ့ချေ။
၁၁:၃၀၊ ၃၁—ယေဖသသည် သစ္စာကတိပြုချိန်တွင် လူတစ်ဦးကို ယဇ်ပူဇော်ပါမည်ဟူ၍ စိတ်ထဲရှိခဲ့သလော။ ဤသို့သောအတွေးမျိုး ယေဖသ၏စိတ်ထဲ လုံးဝရှိမည်မဟုတ်ပါ၊ အကြောင်းမှာ ပညတ်တရားက ဤသို့ပြဋ္ဌာန်းထား၏– “သင်တို့တွင် မိမိသားသမီးကို မီးဖြင့်ပူဇော်သောသူ . . . တစ်စုံတစ်ယောက်မျှမရှိရ။” (တရားဟောရာ ၁၈:၁၀-၁၁) သို့သော် ယေဖသ၏စိတ်တွင် လူတစ်ဦးရှိပြီး တိရစ္ဆာန်တစ်ကောင်မဟုတ်ခဲ့ချေ။ ယဇ်ပူဇော်ရန် တိရစ္ဆာန်များကို ဣသရေလလူတို့အိမ်တွင် ထားလေ့မရှိချေ။ တိရစ္ဆာန်တစ်ကောင်ကို ပူဇော်ခြင်းသည် အထူးပူဇော်ခြင်း ဖြစ်မည်မဟုတ်။ မိမိကိုကြိုဆိုရန် အိမ်ထဲမှထွက်လာမည့်သူမှာ မိမိ၏သမီးဖြစ်နိုင်ဖွယ်ရှိသည်ဟု ယေဖသ သိထားသည်။ ထိုသူကို သန့်ရှင်းရာဌာနနှင့်ဆက်နွှယ်သည့် ယေဟောဝါ၏လုပ်ငန်းတော်အတွက် သီးသန့်ပေးဆက်ခြင်းဖြင့် “မီးရှို့ရာယဇ်” အနေနှင့် ဆက်သရန်ဖြစ်သည်။
ကျွန်ုပ်တို့အတွက် သင်ခန်းစာများ–
၃:၁၀။ ဝိညာဉ်ရေးရာများနှင့်ပတ်သက်ပြီး အောင်မြင်မှုများရရှိခြင်းသည် လူ့ဉာဏ်ပညာကြောင့်မဟုတ်ဘဲ ယေဟောဝါ၏ဝိညာဉ်တော်ကြောင့်ဖြစ်သည်။—ဆာလံ ၁၂၇:၁။
၃:၂၁။ ဧဟုဒသည် သူ၏ဓားကို ကျွမ်းကျင်ပိုင်နိုင်စွာ၊ သတ္တိရှိရှိ အသုံးပြုခဲ့သည်။ ကျွန်ုပ်တို့သည် “ဘုရားသခင်၏နှုတ်[မြွက်]တော်တည်းဟူသော ဝိညာဉ်တော်၏ဓား” ကိုအသုံးပြုရာတွင် ကျွမ်းကျင်လာအောင် ကျင့်ယူရမည်။ ယင်းက ကျွန်ုပ်တို့၏ခရစ်ယာန်ဓမ္မအမှုတွင် သမ္မာကျမ်းစာကို သတ္တိရှိရှိအသုံးပြုရမည်ဟု ဆိုလို၏။—ဧဖက် ၆:၁၇; ၂ တိမောသေ ၂:၁၅။
၆:၁၁-၁၅; ၈:၁-၃၊ ၂၂၊ ၂၃။ ဂိဒေါင်၏ကျိုးနွံမှုက ကျွန်ုပ်တို့ကို ဤအရေးကြီးသင်ခန်းစာသုံးခုကို သင်ပေးသည်– (၁) လုပ်ငန်းတော်အထူးအခွင့်အရေးတစ်ခုကို ကျွန်ုပ်တို့အား အပ်နှင်းသည့်အခါ ယင်းနှင့်ဆက်နွှယ်နိုင်သည့် ထင်ပေါ်ကျော်ကြားမှု သို့မဟုတ် ဂုဏ်အသရေကို တွေးတောမည့်အစား တာဝန်နှင့်လိုက်ပါလာမည့်အရာများအပေါ် အလေးထားစဉ်းစားသင့်သည်။ (၂) ရန်တွေ့တတ်သူများနှင့် ဆက်ဆံသည့်အခါ ကျိုးနွံမှုပြခြင်းသည် ပညာရှိလမ်းစဉ်ဖြစ်သည်။ (၃) ကျိုးနွံမှုသည် အဆင့်အတန်းကို အရေးပေးလွန်းခြင်းမှ ကာကွယ်ပေးသည်။
၆:၁၇-၂၂၊ ၃၆-၄၀။ ကျွန်ုပ်တို့လည်း သတိရှိပြီး “ခပ်သိမ်းသောစိတ်ဝိညာဉ်တို့ကို မယုံကြ” ဖို့ဖြစ်သည်။ ယင်းအစား၊ “စိတ်ဝိညာဉ်တို့သည် ဘုရားသခင်နှင့်စပ်ဆိုင်သည်၊ မစပ်ဆိုင်သည်ကို စုံစမ်းကြ” ဖို့လိုသည်။ (၁ ယောဟန် ၄:၁) ခရစ်ယာန်အကြီးအကဲ ဖြစ်ခါစသူသည် မိမိပေးရန် ရည်ရွယ်ထားသော သွန်သင်ချက်က ဘုရားသခင့်စကားတော်အပေါ် အခိုင်အမာအခြေပြုထားကြောင်း သေချာစေရန် အတွေ့အကြုံပိုရှိသော အကြီးအကဲတစ်ဦးထံ အကြံဉာဏ်တောင်းခံခြင်းသည် ပညာရှိရာရောက်၏။
၆:၂၅-၂၇။ ဂိဒေါင်သည် သူ၏ဆန့်ကျင်သူများ မလိုအပ်ဘဲ အမျက်မထွက်စေရန် လိမ္မာပါးနပ်စွာ လုပ်ဆောင်ခဲ့သည်။ ကျွန်ုပ်တို့ သတင်းကောင်းဟောပြောသည့်အခါ ကျွန်ုပ်တို့စကားကြောင့် သူတစ်ပါးအား မလိုအပ်ဘဲ စိတ်အနှောင့်အယှက်မဖြစ်မိစေရန် သတိထားရမည်။
၇:၆။ ယေဟောဝါ၏အမှုတော် ထမ်းဆောင်ခြင်းနှင့်ပတ်သက်လာလျှင် ကျွန်ုပ်တို့သည် ဂိဒေါင်၏လူ ၃၀၀ ကဲ့သို့ နိုးနိုးကြားကြားနှင့် သတိဝီရိယရှိသင့်သည်။
၉:၈-၁၅။ ရာထူးရာခံ သို့မဟုတ် ဩဇာအာဏာအတွက် မောက်မာစွာလုပ်ဆောင်ပြီး ရည်မှန်းချက်ကြီးခြင်းသည် အလွန်မိုက်မဲသောအမှုတည်း!
၁၁:၃၅-၃၇။ ယေဖသ၏ပုံသက်သေကောင်းသည် သူ၏သမီးကို ယုံကြည်ခြင်းခိုင်ခံ့စေပြီး ကိုယ်ကျိုးစွန့်စိတ်ဓာတ်ဖြစ်ပေါ်စေသည်မှာ သေချာ၏။ ယနေ့ မိဘများသည် မိမိတို့၏သားသမီးများအတွက် ဤသို့သောပုံသက်သေ ပြနိုင်ကြသည်။
၁၁:၄၀။ ယေဟောဝါ၏လုပ်ငန်းတော်တွင် တလိုတလားစိတ်နှင့် လုပ်ဆောင်သူကို ချီးကျူးစကားပြောဆိုခြင်းသည် ထိုသူကို အားပေးရာရောက်၏။
၁၃:၈။ မိဘများသည် သားသမီးများကို သွန်သင်ပေးရာတွင် လမ်းညွှန်မှုအတွက် ယေဟောဝါထံ ဆုတောင်း၍ ကိုယ်တော်၏ညွှန်ကြားမှုအတိုင်း လိုက်နာသင့်သည်။—၂ တိမောသေ ၃:၁၆၊ ၁၇။
၁၄:၁၆၊ ၁၇; ၁၆:၁၆။ မျက်ရည်ခံထိုး၊ မြည်တွန်တောက်တီးကာ ဖိအားပေးခြင်းသည် ဆက်ဆံရေးကို ပျက်စီးစေနိုင်သည်။—သု. ၁၉:၁၃; ၂၁:၁၉။
ဣသရေလနိုင်ငံ၏ အခြားအပြစ်များ
တရားသူကြီးမှတ်စာ၏နောက်ဆုံးအပိုင်းတွင် ထင်ရှားသော အဖြစ်အပျက်နှစ်ခုပါရှိသည်။ ပထမအဖြစ်အပျက်သည် မိက္ခာအမည်ရှိသော လူတစ်ဦးနှင့်သက်ဆိုင်သည်၊ ထိုသူသည် အိမ်တွင် အရုပ်တစ်ခုကို ထောင်ထားကာ သူ့အတွက် ယဇ်ပုရောဟိတ်အဖြစ် လုပ်ဆောင်ပေးရန် လေဝိသားတစ်ဦးကို ခန့်အပ်ခဲ့သည်။ ဒန်အမျိုးသားများသည် လဲရှမြို့ကို ဖျက်ဆီးပြီးနောက် သူတို့ပိုင်မြို့အဖြစ် တည်ဆောက်၍ ဒန်မြို့ဟု အမည်မှည့်လိုက်၏။ သူတို့သည် မိက္ခာလုပ်ခဲ့သည့် အရုပ်နှင့် ယဇ်ပုရောဟိတ်ကိုသုံး၍ ဒန်မြို့တွင် ဝတ်ပြုမှုနောက်တစ်မျိုးကို တည်ထောင်ခဲ့သည်။ ယောရှုမကွယ်လွန်မီ လဲရှမြို့ကို သိမ်းပိုက်လိုက်ပုံရ၏။—ယောရှု ၁၉:၄၇။
ဒုတိယအဖြစ်အပျက်သည် ယောရှုကွယ်လွန်ပြီး မကြာခင် ဖြစ်ပျက်ခဲ့သည်။ ဂိဗာမြို့ရှိ ဗင်ယာမိန်အမျိုးသားအချို့ ကျူးလွန်ခဲ့သော လိင်ဆိုင်ရာပြစ်မှုကြီးကြောင့် ဗင်ယာမိန်အမျိုးတုံးလုမတတ်ဖြစ်ခဲ့ရပြီး အမျိုးသား ၆၀၀ သာအသက်ရှင်ကျန်ရစ်ခဲ့၏။ သို့သော် လက်တွေ့ကျအစီအစဉ်ဖြင့် သူတို့အတွက် မယားများ သိမ်းပိုက်စေရာ ဒါဝိဒ်အုပ်ချုပ်ချိန်တွင် ဗင်ယာမိန်စစ်သည်တော် ၆၀,၀၀၀ နီးပါးအထိ တိုးများလာ၏။—၁ ရာဇဝင်ချုပ် ၇:၆-၁၁။
ကျမ်းစာမေးခွန်းများ အဖြေ–
၁၇:၆; ၂၁:၂၅—“လူတိုင်း မိမိစိတ်အလိုရှိသည်အတိုင်းပြု” ဟုဆိုခြင်းက မင်းမဲ့စရိုက်အခြေအနေကို အားပေးအားမြှောက်ပြုနေခြင်းလော။ မဟုတ်ပါ၊ အကြောင်းမှာ ယေဟောဝါသည် မိမိလူမျိုးတော်ကို လမ်းညွှန်ပေးရန် အစီအစဉ်များစွာ ပြုလုပ်ပေးခဲ့သည်။ ကိုယ်တော်သည် သူတို့ကို ပညတ်တရားပေးခဲ့ပြီး ကိုယ်တော့်လမ်းစဉ်အတိုင်း သူတို့ကို သင်ကြားပေးရန် ယဇ်ပုရောဟိတ်အဖွဲ့ကို ဖွဲ့ပေးထားသည်။ ဥရိမ်နှင့် သုမိမ်အားဖြင့် ယဇ်ပုရောဟိတ်မင်းကြီးသည် အရေးကြီးကိစ္စရပ်များကို ဘုရားသခင်ထံ မေးလျှောက်နိုင်သည်။ (ထွက်မြောက်ရာ ၂၈:၃၀) မြို့အသီးသီးတွင် အားကိုးလောက်သော အကြံပြုချက်ပေးနိုင်သည့် အသက်ကြီးသူများလည်းရှိ၏။ ဣသရေလလူတစ်ဦးသည် ယင်းအစီအစဉ်များကို လက်ခံယူလျှင် သူ၏သိစိတ်အတွက် ကြံ့ခိုင်သောလမ်းညွှန်မှုကိုရရှိသည်။ ဤနည်းအတိုင်း “မိမိအလိုရှိသည်အတိုင်း” လုပ်ဆောင်ခြင်းဖြင့် ကောင်းကျိုးခံစားရနိုင်သည်။ ပညတ်တရားကို ဥပေက္ခာပြုပြီး အမူအကျင့်၊ ဝတ်ပြုရေးနှင့်ပတ်သက်၍ သူဘာသာ ဆုံးဖြတ်ချက်များချမည်ဆိုလျှင်မူ ဆိုးကျိုးခံစားရနိုင်၏။
၂၀:၁၇-၄၈—ဗင်ယာမိန်အမျိုးသားများသည် အပြစ်ပေးခံရဖို့လိုသော်လည်း ယေဟောဝါသည် ထိုအမျိုးသားများကို အခြားနှစ်နွယ်အပေါ် အဘယ်ကြောင့် အနိုင်ရခွင့်ပြုခဲ့သနည်း။ အစပိုင်းတွင် တည်ကြည်သောအနွယ်များအား အကြီးအကျယ် ဆုံးရှုံးမှုကို ခံစေခြင်းအားဖြင့် ဣသရေလနိုင်ငံမှ မကောင်းမှုကို ဖယ်ရှားပစ်မည့် သူတို့၏သန္နိဋ္ဌာန်ကို ယေဟောဝါ စမ်းသပ်ခဲ့သည်။
ကျွန်ုပ်တို့အတွက် သင်ခန်းစာများ–
၁၉:၁၄၊ ၁၅။ ဂိဗာမြို့သားများ၏ ဧည့်ဝတ်ကျေပွန်လိုစိတ်မရှိခြင်းသည် ကျင့်ဝတ်ပျက်ကွက်မှုကို ဖော်ပြ၏။ “ဧည့်သည်ဝတ်ကို ကြိုးစား၍ပြုကြလော့” ဟူ၍ ခရစ်ယာန်များကို သတိပေးဆုံးမထားသည်။—ရောမ ၁၂:၁၃။
အနာဂတ် လွတ်မြောက်မှု
များမကြာမီ ခရစ်တော်ယေရှုလက်တော်ရှိ ဘုရားသခင့်နိုင်ငံတော်သည် ဆိုးညစ်သောကမ္ဘာကို ဖျက်ဆီးပစ်ပြီး ဖြောင့်မတ်စုံလင်သောသူတို့ကို ကြီးစွာသောလွတ်မြောက်မှု ပေးတော်မူလိမ့်မည်။ (သု. ၂:၂၁၊ ၂၂; ဒံယေလ ၂:၄၄၊ ၄၅) ‘ထာဝရဘုရားသခင်၏ရန်သူအပေါင်းတို့သည် ထိုသို့ပျက်စီးခြင်းသို့ရောက်ကြပြီး ကိုယ်တော့်ကို ချစ်သောသူတို့သည် အရှိန်တန်ခိုးနှင့်ထွက်သွားသော နေမင်းကဲ့သို့ ဖြစ်ကြပါလိမ့်မည်။’ (တရားသူကြီး ၅:၃၁) တရားသူကြီးမှတ်စာမှ သိရှိခဲ့ရာများကို ကျင့်သုံးခြင်းအားဖြင့် ယေဟောဝါကို ချစ်မြတ်နိုးသူများတွင် ကျွန်ုပ်တို့ပါဝင်ကြောင်း သက်သေထူကြပါစို့လေ။
တရားသူကြီးမှတ်စာပါ မှတ်တမ်းများတွင် ဤအခြေခံအမှန်တရားကို ထပ်ခါတလဲလဲ ဖော်ပြ၏– ယေဟောဝါကို နာခံလျှင် ကောင်းချီးများစွာ ရရှိစေပြီး မနာခံလျှင် ကြောက်မက်ဖွယ်ဘေးဆိုးများ ခံစားရစေသည်။ (တရားဟောရာ ၁၁:၂၆-၂၈) ဖော်ပြထားတော်မူသော ဘုရားသခင့်အလိုတော်ကို “စိတ်နှလုံးမှနာခံမှု” ရှိခြင်းသည် တကယ့်ကို အရေးကြီးလှပေ၏!—ရောမ ၆:၁၇၊ ကဘ; ၁ ယောဟန် ၂:၁၇။
[အောက်ခြေမှတ်ချက်]
^ အပိုဒ်၊ 10 လေဝိသားများကို ဣသရေလနိုင်ငံအနှံ့တွင်ရှိသော ၄၈ မြို့မှလွဲ၍ ကတိထားရာပြည်တွင် အမွေမြေမပေးခဲ့ချေ။
[စာမျက်နှာ ၂၅ ပါ မြေပုံ]
(ကားချက်အပြည့်အစုံကို စာစောင်တွင်ကြည့်ပါ)
‘လုယူသောသူတို့လက်မှ ကယ်လွှတ်သော တရားသူကြီးတို့ကို ထာဝရဘုရားသခင် ပေါ်ထွန်းစေတော်မူ၏။’—တရားသူကြီး ၂:၁၆
တရားသူကြီးများ
၁။ ဩသံယေလ
၂။ ဧဟုဒ
၃။ ရှံဂါ
၄။ ဗာရက်
၅။ ဂိဒေါင်
၆။ တောလ
၇။ ယာဣရ
၈။ ယေဖသ
၉။ ဣဗဇန်
၁၀။ ဧလုန်
၁၁။ အာဗဒုန်
၁၂။ ရှံဆုန်
ဒန်
မနာရှေ
နဿလိ
အာရှာ
ဇာဗုလုန်
ဣသခါ
မနာရှေ
ဂဒ်
ဧဖရိမ်
ဒန်
ဗင်ယာမိန်
ရုဗင်
ယုဒ
[စာမျက်နှာ ၂၆ ပါ ရုပ်ပုံ]
ဗာရက်သည် မိမိနှင့်အတူ စစ်မြေပြင်သို့ လိုက်ပါဟု ဒေဗောရကို အတင်းအကျပ်တောင်းဆိုခြင်းမှ အဘယ်သင်ခန်းစာ ရရှိသနည်း