ဘုရားသခင့်နိုင်ငံတော် ကြိုတင်မြင်ကွင်းများ အမှန်တကယ်ဖြစ်ပျက်လာ
ဘုရားသခင့်နိုင်ငံတော် ကြိုတင်မြင်ကွင်းများ အမှန်တကယ်ဖြစ်ပျက်လာ
“အနာဂတ္တိစကားတော်ကို မှောင်မိုက်အရပ်၌ ထွန်းလင်းသော ဆီမီးကဲ့သို့မှတ်၍ သင်တို့သည် အမှီပြုသင့်ကြ၏။”—၂ ပေတရု ၁:၁၉။
၁။ ယနေ့ လောကတွင် အဘယ်ခြားနားချက်ကို ကျွန်ုပ်တို့တွေ့ရှိရသနည်း။
မျက်မှောက်လောက၏ အဓိကပြဿနာမှာ ကျပ်တည်းပြီးရင်း ကျပ်တည်းခြင်းဖြစ်သည်။ ဝန်းကျင်ကပ်ဘေးများမှသည် ကမ္ဘာချီအကြမ်းဖက်မှုအထိ ဖြစ်ပျက်နေသော လူ့ပြဿနာများသည် ထိန်းမနိုင်သိမ်းမရပုံပေါက်နေ၏။ ကမ္ဘာ့ဘာသာတရားများပင် မကူညီပေးနိုင်ကြချေ။ အမှန်မှာ၊ လူတို့ကို စိတ်ဝမ်းကွဲစေသည့် တစ်ယူသန်မှု၊ မုန်းတီးမှုနှင့် မျိုးချစ်စိတ်တို့ကို မီးထိုးယပ်ခပ်ပေးမှုကြောင့် အခြေအနေများကို ပို၍ဆိုးရွားစေတတ်၏။ မှန်ပါသည်၊ ကြိုဟောထားသည့်အတိုင်း “ထူထပ်သောမှောင်မိုက်သည် လူများကို” လွှမ်းခြုံထား၏။ (ဟေရှာယ ၆၀:၂) သို့သော် တစ်ချိန်တည်းတွင် သန်းနှင့်ချီသောလူတို့သည် ယုံကြည်စိတ်ချမှုဖြင့် နောင်အနာဂတ်ကို စောင့်မျှော်လျက်ရှိကြသည်။ အဘယ်ကြောင့်နည်း။ အကြောင်းမှာ သူတို့သည် “မှောင်မိုက်အရပ်၌ ထွန်းလင်းသောဆီမီးကဲ့သို့” ဘုရားသခင်၏ပရောဖက်ပြုချက်စကားကို အာရုံစိုက်ထားကြသောကြောင့်ဖြစ်သည်။ ယခု သူတို့သည် သမ္မာကျမ်းစာတွင် တွေ့ရသည့် ဘုရားသခင်၏ “စကားတော်” သို့မဟုတ် သတင်းတရား၏လမ်းညွှန်မှုအတိုင်း သူတို့လျှောက်လှမ်းနေကြသည်။—၂ ပေတရု ၁:၁၉။
၂။ “အမှုကုန်ရသည်ကာလ” နှင့်စပ်လျဉ်းသည့် ဒံယေလပရောဖက်ပြုချက်အရ ဝိညာဉ်ရေးထိုးထွင်းသိမြင်မှုကို အဘယ်သူများသာ ရရှိသနည်း။
၂ “အမှုကုန်ရသည်ကာလ” နှင့်စပ်လျဉ်း၍ ပရောဖက်ဒံယေလက ဤသို့ရေးသားခဲ့သည်– “အများသောသူတို့သည် ထိုစာကို ကြည့်ရှုသောအားဖြင့် ပညာတိုးပွားလိမ့်မည်ဟု ပြောဆို၏။ လူအများတို့သည် သန့်ရှင်းဖြူစင်ခြင်းသို့ရောက်၍ စုံစမ်းခြင်းကိုခံရကြလိမ့်မည်။ မတရားသောသူတို့သည် မတရားသဖြင့်ပြု၍ တစ်ယောက်မျှ နားမလည်ရ။ ပညာရှိသောသူတို့မူကား နားလည်ကြလိမ့်မည်။” (ဒံယေလ ၁၂:၄၊ ၁၀) ဝိညာဉ်ရေးထိုးထွင်းသိမြင်မှုသည် ဘုရားသခင့်စကားတော်ကို စိတ်ရင်းမှန်နှင့် “ကြည့်ရှု” သို့မဟုတ် လုံ့လစိုက်ထုတ်၍ လေ့လာပြီး ကိုယ်တော်၏စံနှုန်းများကို လိုက်နာကာ ကိုယ်တော်၏အလိုတော်ကို ကြိုးစားလုပ်ဆောင်သူများအတွက်သာဖြစ်သည်။—မဿဲ ၁၃:၁၁-၁၅; ၁ ယောဟန် ၅:၂၀။
၃။ ၁၈၇၀ ပြည့်လွန်နှစ်များအတွင်း အစောပိုင်းကျမ်းစာကျောင်းသားများသည် အဘယ်အရေးကြီးအမှန်တရားကို ပိုင်းခြားသိမြင်ခဲ့ကြသနည်း။
၃ ‘နောက်ဆုံးသောကာလ’ မတိုင်မီ ၁၈၇၀ ပြည့်လွန်နှစ်များအစောပိုင်းကတည်းက ယေဟောဝါသည် “ကောင်းကင်နိုင်ငံတော်၏ နက်နဲသောအရာတို့ကို” ပို၍အလင်းထွန်းလင်းပေးခဲ့လေသည်။ (၂ တိမောသေ ၃:၁-၅; မဿဲ ၁၃:၁၁) ထိုအချိန်တွင် ကျမ်းစာကျောင်းသားအုပ်စုတစ်စုသည် အများ၏ယူဆချက်နှင့်ခြားနားစွာ မျက်မြင်မရနည်းဖြင့် ခရစ်တော် ပြန်ကြွလာမည်ဟု ပိုင်းခြားသိမြင်ခဲ့ကြသည်။ ယေရှုသည် ကောင်းကင်တွင် နန်းတင်ခံရပြီးနောက် ဘုရင်အနေနှင့် ကမ္ဘာကို အာရုံစိုက်ခြင်းသဘောမျိုးဖြင့် ပြန်ကြွလာမည်။ မျက်မြင်ရ စုပေါင်းနိမိတ်က ကိုယ်တော်၏မျက်မြင်မရ စတင်ရောက်ရှိနေခြင်းကို ကိုယ်တော်၏တပည့်များအား အသိပေးနှိုးဆော်လိမ့်မည်။—မဿဲ ၂၄: ၃-၁၄။
ကြိုတင်မြင်ကွင်းတစ်ခု အမှန်တကယ်ဖြစ်ပျက်လာသည့်အခါ
၄။ ယေဟောဝါသည် မျက်မှောက်ခေတ်ကျေးကျွန်များ၏ယုံကြည်ခြင်းကို မည်သို့ခိုင်ခံ့စေခဲ့သနည်း။
၄ ကိုယ်ယောင်ပြောင်းခြင်းမြင်ကွင်းသည် ဘုရားသခင့်နိုင်ငံတော်ဘုန်းစံ ခရစ်တော်၏ထွန်းတောက်သော ကြိုတင်မြင်ကွင်းတစ်ခုဖြစ်သည်။ (မဿဲ ၁၇:၁-၉) လူအများသည် ကျမ်းစာနှင့်မညီသော မိမိတို့၏တောင်းဆိုချက်များကို ယေရှုမပြုလုပ်ခဲ့သောကြောင့် ကိုယ်တော်ထံမှ ခွဲထွက်သွားချိန်တွင် ထိုမြင်ကွင်းက ပေတရု၊ ယာကုပ်နှင့် ယောဟန်တို့၏ယုံကြည်ခြင်းကို ခိုင်ခံ့စေခဲ့သည်။ ထိုနည်းတူစွာ ဤဆုံးခန်းကာလတွင် ယေဟောဝါသည် ထိုအံ့ဖွယ်မြင်ကွင်း၊ ပရောဖက်ပြုချက်များနှင့်ဆက်နွှယ်သည့်အရာများစွာ ပြည့်စုံခြင်းအပေါ် ပိုမိုအလင်းထွန်းလင်းပေးခြင်းဖြင့် မျက်မှောက်ခေတ်ကျေးကျွန်များ၏ယုံကြည်ခြင်းကို ခိုင်ခံ့စေခဲ့သည်။ ယုံကြည်ခြင်းကို ခိုင်ခံ့စေသည့် အဆိုပါဝိညာဉ်ရေးအဖြစ်မှန်များမှ အချို့ကို ယခု သုံးသပ်ကြည့်ကြစို့။
၅။ အဘယ်သူသည် ကြယ်နီဖြစ်ကြောင်း သက်သေထူခဲ့သနည်း၊ ကိုယ်တော်သည် အဘယ်အချိန်နှင့် အဘယ်သို့ “ပေါ်ထွက်” လာခဲ့သနည်း။
၅ ကိုယ်ယောင်ပြောင်းခြင်းကို ရည်ညွှန်း၍ တမန်တော်ပေတရုသည် ဤသို့ရေးသားခဲ့သည်– “ထိုမှတစ်ပါး၊ သာ၍မြဲမြံသော အနာဂတ္တိစကားတော်သည် ငါတို့၌ရှိသေး၏။ စိတ်နှလုံးထဲ၌ အရုဏ်တက်၍ ကြယ်နီပေါ်ထွက်သည်ကာလတိုင်အောင် ထိုအနာဂတ္တိစကားတော်ကို မှောင်မိုက်အရပ်၌ ထွန်းလင်းသော ဆီမီးကဲ့သို့မှတ်၍ သင်တို့သည် အမှီပြုသင့်ကြ၏။” (၂ ပေတရု ၁:၁၉) ထိုဥပစာကြယ်နီ သို့မဟုတ် “မိုးသောက်ကြယ်” သည် ဘုန်းထင်ရှားသော ယေရှုခရစ်ပင်ဖြစ်သည်။ (ဗျာ. ၂၂:၁၆) ကောင်းကင်တွင် ဘုရားသခင့်နိုင်ငံတော် တည်ထောင်ချိန် ၁၉၁၄ ခုနှစ်၌ ကိုယ်တော် “ပေါ်ထွက်” လာပြီး ခေတ်သစ်တစ်ခုကို အစပြုခဲ့သည်။ (ဗျာ. ၁၁:၁၅) ကိုယ်ယောင်ပြောင်းခြင်း မြင်ကွင်းတွင် မောရှေနှင့် ဧလိယတို့သည် ယေရှု၏ဘေးတွင်ပေါ်လာပြီး ကိုယ်တော်နှင့်စကားပြောဆိုနေကြ၏။ သူတို့သည် အဘယ်သူတို့၏ ရှေ့ပြေးအရိပ်ဖြစ်ကြသနည်း။
၆၊ ၇။ ကိုယ်ယောင်ပြောင်းခြင်းတွင် မောရှေနှင့် ဧလိယတို့သည် အဘယ်သူတို့ကို ကိုယ်စားပြုသနည်း၊ ကိုယ်စားပြုသူများအကြောင်း အဘယ်အရေးကြီး အသေးစိတ်အချက်အလက်များကို သမ္မာကျမ်းစာက ဖော်ပြသနည်း။
၆ မောရှေနှင့် ဧလိယတို့သည် ခရစ်တော်၏ဘုန်းတော်ကို ဝေမျှခံစားခဲ့ရသောကြောင့် ဤတည်ကြည်သောသက်သေနှစ်ဦးတို့သည် ဘုရားသခင့်နိုင်ငံတော်တွင် ယေရှုနှင့်တွဲဖက်အုပ်ချုပ်ကြမည့်သူများကို ကိုယ်စားပြုကြမည်။ ယေရှုနှင့်တွဲဖက်အုပ်ချုပ်မည့်သူများ ရှိကြမည်ဟူသော သိနားလည်မှုသည် ပရောဖက်ဒံယေလရရှိခဲ့သည့် နန်းထိုင်မေရှိယနှင့်ပတ်သက်သော စိတ်အာရုံကြိုတင်မြင်ကွင်းနှင့် ကိုက်ညီသည်။ “အသက်ကြီးသောသူ” ယေဟောဝါဘုရားသခင်ထံမှ ‘ကမ္ဘာအဆက်ဆက်တည်သော အာဏာစက်တော်’ ရရှိသည့် “လူသားနှင့်တူသောသူတစ်ဦး” ကို ဒံယေလ တွေ့မြင်ခဲ့၏။ သို့သော် ထိုသို့တွေ့မြင်ပြီးနောက် မကြာမီ ဒံယေလအား ဖော်ပြရာကို သတိပြုပါ။ သူသည် ဤသို့ရေးသားသည်– ‘ကောင်းကင်အောက်၌ နိုင်ငံနှင့်တကွ အာဏာစက်ဘုန်းတန်ခိုးရှိသမျှကို အမြင့်ဆုံးသောဘုရားသခင်၏ သန့်ရှင်းသောအမျိုးသားတို့သည် ရကြလိမ့်မည်။’ (ဒံယေလ ၇:၁၃၊ ၁၄၊ ၂၇) “သန့်ရှင်းသောအမျိုးသား” အချို့သည် ခရစ်တော်၏ ကြီးကျယ်ခမ်းနားသော တော်ဝင်အရိုက်အရာတွင် ပါဝင်စံစားကြမည်ဖြစ်ကြောင်း ကိုယ်ယောင်ပြောင်းခြင်းမတိုင်မီ အနှစ်ငါးရာကျော်ကတည်းက ဘုရားသခင် ဖော်ပြတော်မူခဲ့သည်။
၇ ဒံယေလ၏စိတ်အာရုံမှ သန့်ရှင်းသူများကား အဘယ်သူများနည်း။ တစ်ဦးချင်းကို ရည်ညွှန်း၍ တမန်တော်ပေါလုက ဤသို့ဆိုသည်– “ငါတို့သည် ဘုရားသခင်၏သားဖြစ်ကြသည်ဟု ဝိညာဉ်တော်သည် ငါတို့၏ဝိညာဉ်နှင့်အတူ သက်သေခံတော်မူ၏။ သားမှန်လျှင်အမွေခံ၊ ဘုရားသခင်၏အမွေခံဖြစ်ကြ၏။ ခရစ်တော်နှင့်အတူ ဘုန်းဝင်စားမည်အကြောင်း၊ ထိုသခင်နှင့်အတူ ဆင်းရဲ . . . ကိုခံရလျှင် ထိုသခင်နှင့်ဆက်ဆံသော အမွေခံလည်းဖြစ်ကြ၏။” (ရောမ ၈:၁၆၊ ၁၇) ထိုသန့်ရှင်းသူများမှာ ယေရှု၏ဝိညာဉ်တော်ဖွားတပည့်များမှတစ်ပါး အခြားသူမဖြစ်နိုင်ပေ။ ဗျာ. ကျမ်းတွင် ယေရှုဤသို့မိန့်ဆို၏– “ငါသည် အောင်မြင်၍ ငါ့ခမည်းတော်၏ပလ္လင်တော်ပေါ်မှာ ခမည်းတော်နှင့်အတူထိုင်နေသကဲ့သို့၊ အောင်မြင်သောသူသည် ငါ၏ပလ္လင်ပေါ်မှာ ငါနှင့်အတူထိုင်နေရသောအခွင့်ကို ငါပေးမည်။” အရေအတွက်အားဖြင့် ၁၄၄,၀၀၀ ရှိသော ရှင်ပြန်ထမြောက်လာကြသည့် ဤ “အောင်မြင်သောသူတို့” သည် ယေရှုနှင့်အတူ တစ်ကမ္ဘာလုံးကို အုပ်ချုပ်ကြလိမ့်မည်။—ဗျာ. ၃:၂၁; ၅:၉၊ ၁၀; ၁၄:၁၊ ၃၊ ၄; ၁ ကောရိန္သု ၁၅:၅၃။
၈။ ယေရှု၏ဝိညာဉ်တော်ဖွားတပည့်များသည် မောရှေနှင့် ဧလိယတို့နည်းတူ မည်သို့လုပ်ဆောင်ခဲ့ကြသနည်း၊ အဘယ်အကျိုးရလဒ်များ ဖြစ်ထွန်းခဲ့သနည်း။
၈ သို့သော် မောရှေနှင့် ဧလိယတို့သည် ဝိညာဉ်တော်ဖွားခရစ်ယာန်များကို အဘယ်ကြောင့်ကိုယ်စားပြုသနည်း။ အကြောင်းမှာ ဤခရစ်ယာန်များသည် သွေးသားခန္ဓာရှိစဉ်က မောရှေနှင့် ဧလိယတို့ လုပ်ဆောင်ခဲ့သည့် လုပ်ငန်းကိုပင် လုပ်ဆောင်ခဲ့ကြသည်။ ဥပမာ၊ သူတို့သည် ယေဟောဝါသက်သေများအနေနှင့် ညှဉ်းပန်းနှိပ်စက်မှုအောက်မှာပင် အမှုဆောင်ခဲ့ကြသည်။ (ဟေရှာယ ၄၃:၁၀; တမန်တော် ၈:၁-၈; ဗျာ. ၁၁:၂-၁၂) မောရှေနှင့် ဧလိယတို့နည်းတူ သူတို့သည် ဘုရားသခင်အား အကြွင်းမဲ့ဆည်းကပ်ဝတ်ပြုကိုးကွယ်ရန် စိတ်ရင်းမှန်သူများအား တိုက်တွန်းလျက် မှားသောဘာသာကို သတ္တိရှိရှိ ဖော်ထုတ်ပြကြသည်။ (ထွက်မြောက်ရာ ၃၂:၁၉၊ ၂၀; တရားဟောရာ ၄:၂၂-၂၄; ၃ ဓမ္မရာဇဝင် ၁၈:၁၈-၄၀) သူတို့လုပ်ငန်းသည် အကျိုးဖြစ်ထွန်းခဲ့သလော။ ဖြစ်ထွန်းခဲ့ပါသည်! သူတို့သည် ဝိညာဉ်တော်ဖွားများ၏အရေအတွက် ပြည့်စုံရန် စုသိမ်းပေးသည့်အပြင် သန်းနှင့်ချီ “အခြားသိုး” တို့ကို ယေရှုခရစ်အား တလိုတလားလက်အောက်ခံရန် ကူညီပေးခဲ့ကြသည်။—ယောဟန် ၁၀:၁၆; ဗျာ. ၇:၄။
ခရစ်တော် အပြီးသတ်အောင်ပွဲခံ
၉။ ဗျာ. ၆:၂ က ယနေ့ ယေရှု၏အဖြစ်တော်ကို မည်သို့ရုပ်လုံးဖော်ပြထားသနည်း။
၉ ယေရှုသည် မြည်းကလေးကိုစီးလာသော လူသားမျှမဟုတ်တော့ဘဲ ယခု တန်ခိုးကြီးဘုရင်တစ်ပါးဖြစ်နေပြီ။ ကျမ်းစာအရ စစ်ပွဲဝင်အထိမ်းအမှတ်ဖြစ်သော မြင်းစီးနေသူအဖြစ် ကိုယ်တော့်ကို ပုံဖော်ထား၏။ (သု. ၂၁:၃၁) ဗျာ. ၆:၂ ကဤသို့ဆိုသည်– “ငါကြည့်လျှင် မြင်းဖြူတစ်စီးရှိ၏။ မြင်းစီးသောသူသည် လေးကိုကိုင်၏။ သူ၌သရဖူကိုပေးတော်မူ၏။ အောင်မြင်လျက်လည်းကောင်း၊ အောင်မြင်ခြင်းငှာလည်းကောင်း ထွက်သွား၏။” ထို့ပြင် ယေရှုနှင့်စပ်လျဉ်းပြီး ဆာလံဆရာဒါဝိဒ်က ဤသို့ရေးသားခဲ့သည်– ‘ထာဝရဘုရားသခင်သည် အရှင်၏အာဏာတော်လှံတံကို ဇိအုန်မြို့မှ လွှတ်တော်မူမည်။ ကိုယ်တော်သည် ရန်သူတို့၏အလယ်၌ အုပ်စိုးတော်မူလိမ့်မည်။’—ဆာလံ ၁၁၀:၂။
၁၀။ (က) ယေရှု၏အောင်ပွဲခံ မြင်းစီးခြင်းသည် ဘုန်းအသရေရှိရှိ မည်သို့စတင်ခဲ့သနည်း။ (ခ) ခရစ်တော်၏ပထမဦးဆုံး အောင်ပွဲသည် လောကသားများအပေါ် မည်သို့သက်ရောက်မှုရှိခဲ့သနည်း။
၁၀ ယေရှုသည် တန်ခိုးအကြီးဆုံးရန်သူများဖြစ်ကြသော စာတန်နှင့်နတ်ဆိုးများအပေါ် ဦးဆုံး အောင်ပွဲခံခဲ့သည်။ သူတို့ကို ကောင်းကင်မှ နှင်ချပြီး ကမ္ဘာပေါ်သို့ ပစ်ချလိုက်သည်။ မိမိတို့၏အချိန် တစ်ခဏသာရှိသည်ကို သိကြသော အဆိုပါဆိုးညစ်သောဝိညာဉ်သားများသည် လူသားများအပေါ် ပြင်းစွာ ဒေါသအမျက်ထွက်ကာ အမင်္ဂလာကြီးကျရောက်စေခဲ့သည်။ ဗျာ. ကျမ်းတွင် ဤအမင်္ဂလာကို နောက်မြင်းစီးသူရဲသုံးဦး ထွက်လာခြင်းနှင့် ပုံဖော်ပြသည်။ (ဗျာ. ၆:၃-၈; ၁၂:၇-၁၂) ‘ကိုယ်တော်သည်ကြွလာ၍ ဤကပ်ကမ္ဘာကုန်သောပုပ္ပနိမိတ်’ နှင့်ပတ်သက်သည့် ယေရှု၏ပရောဖက်ပြုချက်တွင် ကြိုဟောထားသည့်အတိုင်း သူတို့၏စီးနင်းမှုနောက်မှ စစ်မှု၊ အစာခေါင်းပါးမှုနှင့် သေစေသည့် ကပ်ရောဂါကျရောက်မှုတို့ ထက်ကြပ်မကွာလိုက်ပါလာ၏။ (မဿဲ ၂၄:၃၊ ၇; လုကာ ၂၁:၇-၁၁) စာတန်၏မျက်မြင်ရအဖွဲ့အစည်းကို အစအနမကျန် ဖျက်ဆီးခြင်းဖြင့် ခရစ်တော်၏ ‘အပြီးသတ်အောင်ပွဲ’ မတိုင်မီအထိ ပကတိသားဖွားခြင်းဝေဒနာကဲ့သို့ပင် အဆိုပါ “ဆင်းရဲခြင်း” ဝေဒနာများသည် ပြင်းထန်နေဦးမည်မှာ သေချာသည်။ *—မဿဲ ၂၄:၈။
၁၁။ ခရစ်ယာန်အသင်းတော်သမိုင်းသည် ခရစ်တော်၏ဘုရင့်အာဏာတော်ကို မည်သို့ဖော်ပြသနည်း။
၁၁ ဘုရားသခင့်နိုင်ငံတော်သတင်းတရား ကမ္ဘာချီဟောပြောခြင်းတာဝန် ပြီးမြောက်စေနိုင်ရန် ခရစ်ယာန်အသင်းတော်ကို ကာကွယ်စောင့်ရှောက်ခြင်းဖြင့်လည်း ခရစ်တော်၏ဘုရင့်အာဏာတော် ထင်ရှားပြသည်။ မှားယွင်းသော ကမ္ဘာ့ဘာသာရေးအင်ပါယာဖြစ်သည့် မဟာဗာဗုလုန်နှင့် ရန်လိုသောသားရဲ၏ ရက်စက်ကြမ်းတမ်းသော ဆန့်ကျင်မှုကြားမှ ဟောပြောခြင်းလုပ်ငန်းကို ဆက်လုပ်ဆောင်နေရုံမက ကမ္ဘာ့သမိုင်းတွင် တစ်ခါမျှမကြုံစဖူးသည့်အတိုင်းအတာနှင့် အောင်မြင်မှုရရှိခဲ့သည်။ (ဗျာ. ၁၇:၅၊ ၆) ခရစ်တော်ဘုရင်ဖြစ်ခြင်း၏ အင်အားကြီးသော သက်သေအထောက်အထားပင်!—ဆာလံ ၁၁၀:၃။
၁၂။ လူအများစုသည် ခရစ်တော်၏မျက်မြင်မရရောက်ရှိနေခြင်းကို အဘယ်ကြောင့် ပိုင်းခြားသိမြင်မှုမရှိကြသနည်း။
၁၂ သို့သော် ဝမ်းနည်းစရာမှာ သန်းနှင့်ချီသောအမည်ခံခရစ်ယာန်များအပါအဝင် လူအများစုသည် ကမ္ဘာပေါ်တွင် ဖြစ်ပျက်နေသော အရေးပါသည့်ဖြစ်ရပ်များ၏နောက်ဝယ်ရှိ မျက်မြင်မရအဖြစ်မှန်များကို ပိုင်းခြားသိမြင်နိုင်ခြင်းမရှိကြချေ။ သူတို့သည် ဘုရားသခင့်နိုင်ငံတော် ကြွေးကြော်သူများကိုပင် ကဲ့ရဲ့ပြောင်လှောင်ကြသည်။ (၂ ပေတရု ၃:၃၊ ၄) အဘယ်ကြောင့်နည်း။ အကြောင်းမှာ စာတန်သည် သူတို့၏ဉာဏ်မျက်စိကို ဖုံးကွယ်ထား၍တည်း။ (၂ ကောရိန္သု ၄:၃၊ ၄) လွန်ခဲ့သောရာစုနှစ်များစွာကတည်းကပင် သူသည် အမည်ခံခရစ်ယာန်များအား ဝိညာဉ်ရေးမှောင်မိုက်ဖြင့် စတင်ဖုံးကွယ်ထားပြီး အဖိုးမဖြတ်နိုင်သော ဘုရားသခင့်နိုင်ငံတော်မျှော်လင့်ချက်ကိုပင် စွန့်စေခဲ့သည်။
ဘုရားသခင့်နိုင်ငံတော်မျှော်လင့်ချက်ကို စွန့်ခဲ့ကြ
၁၃။ ဝိညာဉ်ရေးမှောင်မိုက် ဖုံးလွှမ်းနေခြင်းကြောင့် အဘယ်အရာ ဖြစ်ပေါ်ခဲ့သနည်း။
၁၃ ဂျုံစပါးပင်များကြား ကြဲခဲ့သော တောမျိုးစေ့များပမာ အယူဖောက်ပြန်သူများသည် ခရစ်ယာန်အသင်းတော်တွင်းသို့ စိမ့်ဝင်လာကာ များစွာသောသူတို့ကို လမ်းလွဲစေကြမည်ဟု ယေရှု ကြိုဟောခဲ့သည်။ (မဿဲ ၁၃:၂၄-၃၀၊ ၃၆-၄၃; တမန်တော် ၂၀:၂၉-၃၁; ယုဒ ၄) အတန်ကြာသော် အဆိုပါအမည်ခံခရစ်ယာန်များသည် အယူမှားပွဲတော်များ၊ ဓလေ့ထုံးစံများနှင့် သွန်သင်ချက်များကို ခံယူကာ “ခရစ်ယာန်မှုပြု” ခဲ့ကြသည်။ ဥပမာ၊ ခရစ္စမတ်ပွဲသည် အယူမှားနတ်ဘုရား မိသရာနှင့် စက်တန်တို့ကို ဝတ်ပြုကိုးကွယ်ခြင်းပါဝင်သည့် ဘာသာရေးဓလေ့ထုံးစံများမှ အစပြုခဲ့သည်။ သို့သော် အမည်ခံခရစ်ယာန်များသည် အဘယ်တွန်းအားကြောင့် ခရစ်ယာန်နှင့်မဆိုင်သော ဤပွဲများကို လက်ခံလာကြခြင်းဖြစ်သနည်း။ ဗြိတဲန်နီကာစွယ်စုံကျမ်းသစ် (၁၉၇၄) ကဤသို့ဆို၏– “ခရစ်တော် ပြန်ကြွရောက်လာမည့် မျှော်လင့်ချက် မှေးမှိန်သွားခြင်းနှင့်ဆက်နွှယ်၍ ယေရှုခရစ် မွေးဖွားရာ ခရစ္စမတ်ပွဲတော်ကို ကျင်းပခဲ့ကြခြင်းဖြစ်သည်။”
၁၄။ ဩရီဂျင်နှင့် ဩဂတ်စ္စတင်းတို့၏သွန်သင်ချက်များသည် ဘုရားသခင့်နိုင်ငံတော် အမှန်တရားကို မည်သို့တလွဲဖော်ပြခဲ့ကြသနည်း။
၁၄ ဘုရားသခင့် “နိုင်ငံတော်” ဟူသော စကားလုံး၏အဓိပ္ပာယ် သွေဖည်သွားသည်ကိုလည်း သုံးသပ်ကြည့်ပါ။ ဘုရားသခင့်နိုင်ငံတော်နှင့်ပတ်သက်၍ ၂၀ ရာစုအနက်ဖွင့်ဆိုချက် စာအုပ်က ဤသို့ဆိုသည်– “ဩရီဂျင် [တတိယရာစုဓမ္မပညာရှင်] သည် ဘုရားသခင့် ‘နိုင်ငံတော်’ ဟူသော ခရစ်ယာန်အသုံးအနှုန်းကို စိတ်နှလုံးထဲရှိ ဘုရားသခင့်အုပ်ချုပ်မှုဟူ၍ အဓိပ္ပာယ်ပြောင်းပေးလိုက်သည်။” ဩရီဂျင်၏သွန်သင်ချက်သည် အဘယ်အရာအပေါ် အခြေပြုခဲ့သနည်း။ သမ္မာကျမ်းစာမဟုတ်ဘဲ “ယေရှုနှင့် အစောပိုင်းချာ့ခ်ျ၏ ယူဆချက်နှင့် လုံးဝမတူသည့် အတွေးအခေါ်ပညာနှင့် လောကအမြင်တို့အပေါ် အခြေပြုထားသည်။” ဟစ်ပိုမြို့မှ ဩဂတ်စ္စတင်း (စီ.အီး. ၃၅၄-၄၃၀) သည် သူ၏ ဒေ ကီးဗစ်တာတဲ့ဒဲ့ အီး (ဘုရားသခင့်မြို့တော်) စာအုပ်တွင် ချာ့ခ်ျသည်ပင် ဘုရားသခင့်နိုင်ငံတော်ဖြစ်၏ဟု ဆိုထားသည်။ ကျမ်းစာနှင့်မညီသော ဤသို့သောယူဆချက်သည် ခရစ်ယာန်ဘောင်ချာ့ခ်ျများ၏ ဓမ္မပညာရေးဆိုင်ရာနယ်ပယ်တွင် နိုင်ငံရေးအာဏာကို ခံယူစေခဲ့သည်။ သူတို့သည် ရာစုနှစ်များစွာအထိ ထိုအာဏာကို ကျင့်သုံးခဲ့ကြပြီး တစ်ခါတစ်ရံ ရက်ရက်စက်စက် အနိုင်ကျင့်တတ်ကြသည်။ —ဗျာ. ၁၇:၅၊ ၁၈။
၁၅။ ဂလာတိ ၆:၇ သည် ခရစ်ယာန်ဘောင်ချာ့ခ်ျများနှင့်ပတ်သက်ပြီး မည်သို့ပြည့်စုံခဲ့ပြီနည်း။
၁၅ သို့သော် ယနေ့ ချာ့ခ်ျများသည် သူတို့ မျိုးစေ့ကြဲခဲ့သည့်အတိုင်း ရိတ်သိမ်းနေရပြီ။ (ဂလာတိ ၆:၇) လူအများသည် သူတို့၏အာဏာသာမက အသင်းသားများကိုပါ ဆုံးရှုံးမည့်ပုံရသည်။ ဤသို့သောအဖြစ်မျိုးသည် ဥရောပတွင် သိသာထင်ရှားလှ၏။ ယနေ့ ခရစ်ယာန်ဘာသာတရား ဂျာနယ်၏အဆိုအရ “ယခုအခါ ဥရောပဝတ်ကျောင်းကြီးများမှာ ဝတ်ပြုရာအိမ်တော်မဟုတ်တော့ဘဲ ပြတိုက်များဖြစ်သွားပြီး ကမ္ဘာလှည့်ဧည့်သည်များမှအပ လာရောက်သူမရှိတော့ချေ။” ကမ္ဘာ့အခြားဒေသများတွင်လည်း ထိုနည်းအတိုင်း တွေ့မြင်နိုင်သည်။ ယင်းက အယူမှားဘာသာတရားနှင့်ပတ်သက်ပြီး အဘယ်အရာဖော်ပြသနည်း။ ယင်းသည် ထောက်ပံ့မှုမရှိသောကြောင့် ကွယ်ပျောက်တော့မည်လော။ ထို့ပြင် စစ်မှန်သောဝတ်ပြုရေးအပေါ် မည်သို့အကျိုးသက်ရောက်မည်နည်း။
ဘုရားသခင်၏နေ့ကြီးအတွက် ပြင်ဆင်လော့
၁၆။ မဟာဗာဗုလုန်အပေါ် တိုးများလာသော ရန်လိုမုန်းတီးမှုသည် အဘယ်ကြောင့် အဓိပ္ပာယ်ရှိသနည်း။
၁၆ ယခင် မီးတောင်မြုံမှ အခိုးအငွေ့နှင့်ပြာထွက်လာခြင်းသည် မကြာမီ ပေါက်ကွဲတော့မည့် လက္ခဏာဖြစ်သကဲ့သို့ ကမ္ဘာ့ဒေသများစွာတွင် ဘာသာတရားအပေါ် ဆန့်ကျင်မှုများ တိုးများလာခြင်းသည် အယူမှားဘာသာတရား အဆုံးတိုင်ချိန် နီးပြီဟူသော အမှတ်အသားဖြစ်၏။ မကြာမီ ကမ္ဘာ့နိုင်ငံရေးအင်အားစုများ ပေါင်းစည်းပြီး ဝိညာဉ်ရေးပြည့်တန်ဆာ မဟာဗာဗုလုန်ကို ဖော်ထုတ်၊ ဖျက်ဆီးစေရန် ယေဟောဝါ စေ့ဆော်ပေးတော်မူမည်။ (ဗျာ. ၁၇:၁၅-၁၇; ၁၈:၂၁) ခရစ်ယာန်စစ်များသည် ထိုအဖြစ်အပျက်နှင့် လိုက်ပါလာတော့မည့် ‘ကြီးစွာသောဆင်းရဲခြင်း’ ၏တခြားအသွင်အပြင်များကို ကြောက်သင့်သလော။ (မဿဲ ၂၄:၂၁) လုံးဝမကြောက်သင့်ချေ! ဘုရားသခင်သည် ဆိုးညစ်သူများကို အရေးယူဆောင်ရွက်သည့်အခါ သူတို့သည် အမှန်ပင် ပျော်ရွှင်စရာများ ရှိကြလိမ့်မည်။ (ဗျာ. ၁၈:၂၀; ၁၉:၁၊ ၂) ပထမရာစုရှိ ယေရုရှလင်မြို့နှင့် ထိုတွင်နေထိုင်ကြသော ခရစ်ယာန်များ၏ပုံနမူနာကို သုံးသပ်ကြည့်ပါ။
၁၇။ ယေဟောဝါ၏တည်ကြည်သောကျေးကျွန်များသည် ဤအစီအစဉ်စနစ်၏ဆုံးခန်းချိန်ကို အဘယ်ကြောင့် စိတ်ချလက်ချ ရင်ဆိုင်နိုင်ကြသနည်း။
၁၇ စီ.အီး. ၆၆ ခုနှစ်တွင် ယေရုရှလင်မြို့ကို ရောမတပ်များ ဝိုင်းရံပိတ်ဆို့သည့်အခါ ဝိညာဉ်ရေး နိုးကြားနေသော ခရစ်ယာန်များသည် ထိတ်လန့်တုန်လှုပ်ခြင်းမရှိခဲ့ကြချေ။ သူတို့သည် သမ္မာကျမ်းစာကို ကောင်းစွာဖတ်ရှုလေ့လာထားကြရာ “ထိုမြို့သည် ပျက်စီးခြင်းသို့ရောက်လုသည်” ကိုသူတို့သိထားကြသည်။ (လုကာ ၂၁:၂၀) မိမိတို့ ဘေးမသီရန်မခ ထွက်ပြေးနိုင်ရန် ဘုရားသခင် လမ်းဖွင့်ပေးမည်ကိုလည်း သိထားကြ၏။ ထိုသို့ဖြစ်ပျက်သည့်အခါ ခရစ်ယာန်များ ထွက်ပြေးခဲ့ကြသည်။ (ဒံယေလ ၉:၂၆; မဿဲ ၂၄:၁၅-၁၉; လုကာ ၂၁:၂၁) ထိုနည်းတူ ယနေ့ ဘုရားသခင်ကို သိကျွမ်းပြီး သားတော်၏စကားကို နားထောင်သူများသည် ဤအစီအစဉ်စနစ်၏ဆုံးခန်းချိန်ကို စိတ်ချလက်ချ ရင်ဆိုင်နိုင်ကြမည်။ (၂ သက်သာလောနိတ် ၁:၆-၉) အမှန်ဆိုလျှင် ကြီးစွာသောဆင်းရဲခြင်း ကျရောက်သောအခါ မိမိတို့ကို “ရွေးနုတ်သောအချိန်ကာလ ရောက်လုနီးသည်ကိုထောက်သဖြင့် မျှော်ကြည့်၍ ခေါင်းကိုကြွ” လျက်ရွှင်လန်းနေကြမည်။—လုကာ ၂၁:၂၈။
၁၈။ ယေဟောဝါ၏ကျေးကျွန်များအပေါ် မီးကုန်ယမ်းကုန် ဂေါဂတိုက်ခိုက်သည့်အခါ အဘယ်ရလဒ် ထွက်ပေါ်လာမည်နည်း။
၁၈ မဟာဗာဗုလုန် ပျက်စီးပြီးနောက် မာဂေါဂပြည်သား ဂေါဂဖြစ်သူ စာတန်သည် ငြိမ်းချမ်းနေသော ယေဟောဝါသက်သေများကို မီးကုန်ယမ်းကုန် တိုက်ခိုက်ပါတော့မည်။ “ပြည်ကိုမိုးအုံ့သကဲ့သို့” ချီတက်လာကြသော ဂေါဂ၏အဖွဲ့သားများသည် အလွယ်တကူ အောင်ပွဲခံလိမ့်မည်ဟု မျှော်လင့်ကြ၏။ သူတို့ တကယ့်တုန်လှုပ်စရာကို ရင်ဆိုင်ရပါမည်တကား! (ယေဇကျေလ ၃၈:၁၄-၁၆၊ ၁၈-၂၃) တမန်တော်ယောဟန်က ဤသို့ရေးသား၏– “ကောင်းကင်ဘုံဖွင့်လှစ်လျက်ရှိသည်ကို ငါမြင်လျှင် မြင်းဖြူရှိ၏။ မြင်းစီးသောသူသည် သစ္စာဟူသောအမည်၊ သမ္မာဟူသောအမည်ရှိသတည်း။ . . . လူမျိုးတို့ကို ဒဏ်ခတ်စရာဖို့ ထက်သောသန်လျက်သည် ခံတွင်းတော်ထဲကထွက်၏။” အောင်ပွဲခံလျက်ရှိသော ဤ “ဘုရင်တို့၏ဘုရင်” သည် ယေဟောဝါအား တည်ကြည်စွာ ဝတ်ပြုကိုးကွယ်သူများကို ကယ်မပြီး သူတို့၏ရန်သူရှိသမျှကို ချေမှုန်းပစ်တော့မည်။ (ဗျာ. ၁၉:၁၁-၂၁) ကိုယ်ယောင်ပြောင်းခြင်းမြင်ကွင်း ပြည့်စုံချက်၏ အထွတ်အထိပ်ပေတည်း!
၁၉။ ခရစ်တော်၏အပြီးသတ်အောင်ပွဲသည် တည်ကြည်သောတပည့်များအပေါ် မည်သို့အကျိုးသက်ရောက်မည်နည်း၊ သူတို့သည် ယခုမှစ၍ အဘယ်အရာကို ကြိုးစားလုပ်ဆောင်သင့်သနည်း။
၁၉ ယေရှုသည် ‘ယုံကြည်သောသူအပေါင်းတို့အားဖြင့် အံ့သြချီးမွမ်းခြင်းကို ကြွလာတော်မူသောနေ့ရက်၌ ခံရ’ လိမ့်မည်။ (၂ သက်သာလောနိတ် ၁:၁၀) အောင်ပွဲခံလျက်ရှိသော ဘုရားသခင်၏သားတော်ကို ခန့်ညားကြောက်ရွံ့သူများတွင် အသင် ပါဝင်လိုသလော။ သို့ဖြစ်လျှင် သင်၏ယုံကြည်ခြင်းကို အမြဲခိုင်ခံ့စေပြီး ‘ပြင်ဆင်လျက်နေလော့။ အကြောင်းမူကား၊ သင်မထင်မမှတ်သောအချိန်နာရီ၌ လူသားသည် ကြွလာလိမ့်မည်။’—မဿဲ ၂၄:၄၃၊ ၄၄။
သတိရှိနေကြလော့
၂၀။ (က) ‘သစ္စာနှင့်သတိပညာရှိကျေးကျွန်’ မှဘုရားသခင်၏ပြင်ဆင်ပေးချက်ကို ကျေးဇူးတင်လေးမြတ်ကြောင်း မည်သို့ပြနိုင်သနည်း။ (ခ) ကျွန်ုပ်တို့ကိုယ်ကို အဘယ်မေးခွန်းများ မေးသင့်သနည်း။
၂၀ ‘သစ္စာနှင့်သတိပညာရှိကျေးကျွန်’ သည် ဘုရားသခင်၏လူမျိုးတော်ကို ဝိညာဉ်ရေးဘက် နိုးကြား၍ သတိရှိနေကြရန် တိုက်တွန်းနှိုးဆော်လျက်ရှိ၏။ (မဿဲ ၂၄:၄၅၊ ၄၆; ၁ သက်သာလောနိတ် ၅:၆) သင်သည် ဤအချိန်တန်သတိပေးချက်များအတွက် ကျေးဇူးတင်လေးမြတ်ပါသလော။ ယင်းတို့ကိုသုံးကာ သင့်အသက်တာ၏ဦးစားထားရာများကို ချမှတ်သလော။ သင့်ကိုယ်သင် ဤသို့မေးနိုင်၏– ‘ကောင်းကင်တွင် စိုးစံလျက်ရှိသော ဘုရားသခင်၏သားတော်ကို မြင်တွေ့နိုင်လောက်သည့်အထိ ဝိညာဉ်ရေးစိတ်အာရုံ ရှင်းလင်းကြည်လင်နေသလော။ သားတော်သည် မဟာဗာဗုလုန်နှင့် ကျန်ရှိနေသည့်စာတန်၏စနစ်ကို ဘုရားသခင်ဆိုင်ရာတရားစီရင်ရန် အသင့်ဖြစ်နေသည်ကို သင်သိမြင်သလော။
၂၁။ တချို့သည် သူတို့၏ဝိညာဉ်ရေးစိတ်အာရုံကို အဘယ်ကြောင့် တဖြည်းဖြည်း မှေးမှိန်စေကြသနည်း၊ သူတို့လုပ်ဆောင်ရမည့် အရေးတကြီးအမှုကား အဘယ်နည်း။
၂၁ ယခု ယေဟောဝါလူမျိုးတော်နှင့် ပေါင်းသင်းခဲ့ကြသူအချို့သည် သူတို့၏ဝိညာဉ်ရေးစိတ်အာရုံကို တဖြည်းဖြည်း မှေးမှိန်သွားစေကြသည်။ ယေရှု၏အစောပိုင်းတပည့်အချို့နည်းတူ သူတို့သည် စိတ်ရှည်မှု သို့မဟုတ် ခံနိုင်ရည်မရှိခြင်းကြောင့်လော။ ဘဝ၏စိုးရိမ်ပူပန်မှုများ၊ ဥစ္စာပစ္စည်းမက်မောမှု၊ သို့မဟုတ် ညှဉ်းပန်းနှိပ်စက်မှုတို့က သူတို့ကို ထိခိုက်စေခဲ့ခြင်းလော။ (မဿဲ ၁၃:၃-၈၊ ၁၈-၂၃; လုကာ ၂၁:၃၄-၃၆) တချို့သည် ‘သစ္စာနှင့်သတိပညာရှိကျေးကျွန်’ ကဖော်ပြသော သတင်းအချက်အလက်အချို့ကို နားလည်ရခက်ကြပေမည်။ အကယ်၍ သင်သည် အထက်ပါအတိုင်း တစ်ခုခုဖြစ်နေလျှင် သမ္မာကျမ်းစာကို ဇွဲသစ်လောင်း၍ လေ့လာပြီး ယေဟောဝါနှင့် ခိုင်ခံ့ရင်းနှီးသောဆက်ဆံရေး ပြန်လည်ရရှိစေနိုင်ရန် ကိုယ်တော့်ထံ တိုးလျှိုးအသနားခံဖို့ ကျွန်ုပ်တို့ တိုက်တွန်းပါသည်။—၂ ပေတရု ၃:၁၁-၁၅။
၂၂။ ကိုယ်ယောင်ပြောင်းခြင်း မြင်ကွင်း၊ ပရောဖက်ပြုချက်များနှင့်ဆက်နွှယ်ရာများကို သုံးသပ်ခြင်းသည် သင့်အပေါ် မည်သို့အကျိုးသက်ရောက်ခဲ့သနည်း။
၂၂ ယေရှု၏တပည့်များ အားပေးမှု လိုအပ်ချိန်တွင် ကိုယ်ယောင်ပြောင်းခြင်းစိတ်အာရုံကို သူတို့အား မြင်စေခဲ့သည်။ ယနေ့ ကျွန်ုပ်တို့တွင် ထိုအံ့မခန်းဖွယ်ကြိုတင်မြင်ကွင်း၊ ပရောဖက်ပြုချက်များနှင့်ဆက်နွှယ်ရာများစွာ၏ ပြည့်စုံမှုတို့ကို ရရှိထားရာ ယင်းတို့သည် သာ၍ခွန်အားရှိစေသောအရာပင်ဖြစ်သည်။ ဤဘုန်းအသရေရှိအဖြစ်မှန်များနှင့် အနာဂတ်တွင် ၎င်းတို့၏အရေးပါမှုကို ကျွန်ုပ်တို့စောင့်မျှော်နေကြစဉ် တမန်တော်ယောဟန်၏ ဤခံစားချက်မျိုးကို ကျွန်ုပ်တို့လည်း စိတ်နှလုံးအကြွင်းမဲ့ ပြောနိုင်ကြပါစေ– “အာမင်။ သခင်ယေရှုကြွလာတော်မူပါ။”—ဗျာ. ၂၂:၂၁။
[အောက်ခြေမှတ်ချက်]
^ အပိုဒ်၊ 10 မူရင်းဂရိတွင် “ဆင်းရဲခြင်း” ဟူ၍ပြန်ဆိုထားသော စကားလုံးသည် ပကတိ “သားဖွားခြင်းဝေဒနာ” ဟုဆိုလိုသည်။ (မဿဲ ၂၄:၈၊ နိုင်ငံတော်စာကြောင်းကြားညှပ်ကျမ်း) သားဖွားခြင်းဝေဒနာကဲ့သို့ ကမ္ဘာ့ပြဿနာများသည် အကြိမ်ရေ၊ ပြင်းထန်မှုနှင့် ကြာချိန်တို့သည် ကြီးစွာသောဆင်းရဲခြင်းတွင် အထွတ်အထိပ်ရောက်ချိန်အထိ တိုးများနေမည်ဟု ယင်းက ဖော်ပြသည်။
သင်မှတ်မိသလော
• ၁၈၇၀ ပြည့်လွန်နှစ်များတွင် ကျမ်းစာကျောင်းသားအုပ်စုငယ်သည် ခရစ်တော်ပြန်ကြွလာခြင်းနှင့်ပတ်သက်၍ အဘယ်အရာကို သဘောပေါက်လာခဲ့ကြသနည်း။
• ကိုယ်ယောင်ပြောင်းခြင်း မြင်ကွင်းသည် မည်သို့ပြည့်စုံခဲ့ပြီနည်း။
• ယေရှု၏အောင်ပွဲခံမြင်းစီးခြင်းသည် လောကနှင့် ခရစ်ယာန်အသင်းတော်အပေါ် မည်သို့အကျိုးသက်ရောက်သနည်း။
• ကျွန်ုပ်တို့သည် ယေရှု အပြီးသတ်အောင်ပွဲခံချိန်၌ ကပ်ကျော်မည့်သူများတွင်ပါဝင်ရန် အဘယ်အရာပြုလုပ်ရမည်နည်း။
[လေ့လာရန်မေးခွန်းများ]
[စာမျက်နှာ ၁၆၊ ၁၇ ရုပ်ပုံ]
ကြိုတင်မြင်ကွင်းတစ်ခု အမှန်တကယ်ဖြစ်ပျက်လာ
[စာမျက်နှာ ၁၈ ရုပ်ပုံ]
ခရစ်တော် အောင်ပွဲစခံချိန်တွင် အဘယ်အရာဖြစ်ပျက်ခဲ့သည်ကို သင်သိသလော