ရှောလု၏ဟောပြောခြင်းက ရန်လိုမှုကိုနှိုးဆွပေး
ရှောလု၏ဟောပြောခြင်းက ရန်လိုမှုကိုနှိုးဆွပေး
ဒမာသက်မြို့မှ ဂျူးများသည် နားမလည်နိုင်အောင် ဖြစ်နေကြသည်။ ရိုးရာယုံကြည်ချက်များဘက်မှ အပြင်းအထန် ခုခံကာကွယ်ခဲ့သူသည် အယူဖောက်ပြန်သူတစ်ဦး မည်သို့ဖြစ်သွားနိုင်သနည်း။ ရှောလုဆိုသူသည် ယေရုရှလင်တွင် ယေရှု၏နာမ၌ ဆုတောင်းသူများအား အနှောင့်အယှက်ပေးခဲ့သူဖြစ်သည်။ သူသည် တပည့်များကို နှိပ်စက်ညှဉ်းပန်းရန် ဒမာသက်မြို့သို့လာခဲ့ခြင်းဖြစ်သည်။ ယခုမူ ဘုရားသခင်ကိုလွန်ကျူးသည့်အတွက် ရာဇဝတ်သားအဖြစ် နှက်တိုင်တင်၊ အထင်အမြင်သေးခံရသူကိုပင် မေရှိယဖြစ်သည်ဟု သူကိုယ်တိုင် ဟောပြောနေပြန်သည်! ရှောလု ရူးသွပ်သွားပြီလော။—တမန်တော် ၉:၁၊ ၂၊ ၂၀-၂၂။
ရှင်းနိုင်စရာ ရှိကောင်းရှိမည်။ ယေရုရှလင်မြို့မှ ရှောလုနှင့်တစ်အုပ်စုတည်း ခရီးသွားများက လမ်းတွင် ဘာဖြစ်ပျက်ခဲ့ကြောင်း ပြောပြခဲ့ပေလိမ့်မည်။ ဒမာသက်မြို့အနီးသို့ ရောက်သောအခါ သူတို့ပတ်လည်တွင် ရုတ်တရက် တောက်ပသည့်အလင်းပေါ်လာပြီး သူတို့အားလုံး မြေပေါ်လဲကျသွားသည်။ အသံတစ်သံကိုလည်း သူတို့ကြားလိုက်ရသည်။ ရှောလုမှအပ မည်သူမျှ ထိခိုက်မှုမဖြစ်ခဲ့ချေ။ သူသည် လမ်းပေါ်လဲနေခဲ့သည်။ နောက်ဆုံးတွင် သူထလာသည့်အခါ မျက်စိကန်းသွားသည့်အတွက် အခြားခရီးသည်များက သူ့အား ဒမာသက်မြို့သို့ ပို့ဆောင်ပေးခဲ့သည်။—တမန်တော် ၉:၃-၈; ၂၆:၁၃၊ ၁၄။
ဆန့်ကျင်သူက ထောက်ခံသူဖြစ်လာ
ဒမာသက်မြို့သို့သွားရာလမ်းတွင် ရှောလုဘာဖြစ်ခဲ့သနည်း။ ခရီးရှည်နှင်ရခြင်း သို့မဟုတ် မွန်းတည့်နေရှိန်ကြောင့် အားနည်းသွားခြင်းလော။ ယခုခေတ်ဝေဖန်ရေးသမားများက ဖြစ်ရိုးဖြစ်စဉ်ရှင်းလင်းချက်များရှာတွေ့ရန် ဆုံးဖြတ်ကာ သွေးလေချောက်ချားခြင်း၊ ကယောင်ကတမ်းဖြစ်ခြင်း၊ ရှောလု၏သိစိတ် အကြီးအကျယ်အနှောင့်အယှက်ဖြစ်၍ စိတ်ရောဂါ ဆိုးဆိုးရွားရွားခံစားရခြင်း၊ အလွန်စိတ်ဗယောက်ဗယက်ဖြစ်ခြင်းနှင့် ဝက်ရူးပြန်ရောဂါအခံရှိခြင်းအပါအဝင် ဖြစ်နိုင်ခြေတို့ကို တင်ပြကြသည်။
အမှန်မှာ ယေရှုခရစ်သည် ထိုမျက်စိကွယ်သွားစေသည့်အလင်းရောင်ဖြင့် ရှောလုထံထင်ရှားပြခြင်းက ကိုယ်တော်သည် မေရှိယဖြစ်ကြောင်း သူ့အားစိတ်ချစေခဲ့သည်။ ဤအဖြစ်အပျက်ကို ပန်းချီပညာသည်အချို့က ရှောလု မြင်းပေါ်မှပြုတ်ကျနေပုံအဖြစ် သရုပ်ဖော်ကြသည်။ ယင်းသည် ဖြစ်နိုင်ဖွယ်ရှိသော်လည်း ကျမ်းစာက သူသည် “မြေပေါ်မှာလဲ” ကျသွားသည်ဟုသာ ဖော်ပြထားသည်။ (တမန်တော် ၂၂:၆-၁၁) ရှောလု၏ ဂုဏ်မောက်သောအနေအထားမှ လျှောကျသွားခြင်းနှင့် နှိုင်းယှဉ်လိုက်လျှင် သူကြုံခဲ့ရသော မည်သည့်ကာယပိုင်းလဲကျမှုမဆိုသည် မပြောပလောက်ပေ။ ယေရှုနောက်တော်လိုက်များ ဟောပြောသည့်အရာသည် မှန်ကန်ကြောင်း ယခု သူအသိအမှတ်ပြုရတော့သည်။ ရှောလုအတွက် တစ်ခုတည်းသောရွေးချယ်စရာမှာ သူတို့နှင့်ပူးပေါင်းခြင်းဖြစ်၏။ ရှောလုသည် ယေရှု၏သတင်းတရားကို အကြီးအကျယ် ရန်ဘက်ပြုသူအဖြစ်မှ အခိုင်မာဆုံးထောက်ခံသူတစ်ဦးဖြစ်လာလေသည်။ သူ၏မျက်စိပြန်မြင်ကာ နှစ်ခြင်းခံပြီးနောက် “ရှောလုသည်လည်း အားတိုးပွားသဖြင့် ဒမာသက်မြို့၌နေသော ယုဒလူတို့သည် ပြောသမျှသောစကားကိုချေ၍ ယေရှုသည် ခရစ်တော်ဖြစ်ကြောင်းကို ထင်ရှားစွာပြ၏။”—တမန်တော် ၉:၂၂။
လုပ်ကြံမည့်အကြံအစည် ပျက်ပြားသွား
နောင်တွင် ပေါလုဟုအမည်တွင်လာသည့် ရှောလုသည် ဘာသာပြောင်းပြီးနောက် အဘယ်အရပ်သို့ သွားခဲ့သနည်း။ ဂလာတိအသင်းတော်ကို စာရေးချိန်တွင် သူသည် “အာရပ်ပြည်သို့ချက်ချင်းသွား၍ တစ်ဖန် ဒမာသက်မြို့သို့ပြန်လေ၏” ဟုပြောခဲ့၏။ (ဂလာတိ ၁:၁၇) “အာရပ်ပြည်” ဟူသော ဝေါဟာရသည် အာရေဗျကျွန်းဆွယ်ရှိ နေရာတစ်နေရာသို့ ခရီးသွားခြင်းကိုလည်း ဆိုနိုင်သည်။ ပညာရှင်အချို့က ပေါလုသည် ဆီးရီးယားကန္တာရ သို့မဟုတ် စတုတ္ထမြောက် အရေတမင်း၏ နက်ဘာတီယန်နိုင်ငံထဲသို့ သွားခဲ့ခြင်းဖြစ်နိုင်သည်ဟု ဆိုကြသည်။ ယေရှုနှစ်ခြင်းခံပြီးနောက် တောထဲသွားခဲ့သကဲ့သို့ပင် ရှောလုလည်း နှစ်ခြင်းခံပြီးနောက် တွေးတောဆင်ခြင်ရန် တိတ်ဆိတ်သည့်နေရာသို့ သွားခဲ့ခြင်းဖြစ်နိုင်သည်။—လုကာ ၄:၁။
ရှောလုလည် ဒမာသက်မြို့သို့ပြန်လာစဉ် “ရှောလုကိုသတ်အံ့သောငှာ ယုဒလူတို့သည် အချင်းချင်းတိုင်ပင်ကြ၏။” (တမန်တော် ၉:၂၃) ဒမာသက်မြို့၌ အရေတမင်းကြီးခန့်ထားသောမြို့ဝန်သည် ရှောလုကိုဖမ်းဆီးခြင်းငှာ စောင့်နေသည်။ (၂ ကောရိန္သု ၁၁:၃၂) ရှောလုကိုလုပ်ကြံရန် ရန်သူများကြံစည်နေစဉ် ယေရှု၏တပည့်များက သူ၏လွတ်မြောက်ရေးအတွက် စီမံခဲ့ကြသည်။
ရှောလုလွတ်မြောက်ရေးအတွက် ကူညီခဲ့သူများတွင် အာနနိနှင့် ရှောလုဘာသာပြောင်းလာပြီးနောက် တမန်တော်များနှင့် ချက်ချင်းပူးပေါင်းလာကြသော တပည့်များ ပါဝင်သည်။ * (တမန်တော် ၉:၁၇-၁၉) တမန်တော် ၉:၂၅ တွင် ‘တပည့်တို့သည် ညအခါ သူ့ကိုယူ၍ တောင်း၌ထည့်ပြီးလျှင် မြို့ရိုးပေါ်က လျှောချကြ၏’ ဟုဖော်ပြထားသောကြောင့် ဒမာသက်မြို့တွင် ရှောလု၏ဟောပြောခြင်းကြောင့် ယုံကြည်သူဖြစ်လာသော အချို့သူများလည်း ကူညီခဲ့ကြသည်။ “တပည့်တို့” ဟူသည့်အသုံးအနှုန်းက ရှောလုသင်ပေးခဲ့သူများကို ဆိုလိုပေမည်။ မည်သို့ပင်ဖြစ်စေ၊ သူ၏အမှုဆောင်လုပ်ငန်းအောင်မြင်ခြင်းက သူ့အပေါ်ထားရှိနေသည့် ရန်ငြိုးကို ထိုးဆွပေးလိုက်သည်နှင့်တူသည်။
သင်ယူရန် သင်ခန်းစာ
ရှောလု၏ ဘာသာပြောင်းဝင်လာချိန်နှင့် နှစ်ခြင်းခံခဲ့ချိန်ဝန်းကျင်ရှိ အဖြစ်အပျက်တချို့ကို ဆန်းစစ်ခြင်းဖြင့် အခြားသူများ မိမိအားဝေဖန်မည်ကို အလွန်အမင်းစိုးရိမ်နေခြင်းမျိုး၊ အပြင်းအထန်ဆန့်ကျင်မှုကြောင့် ရပ်တန့်လိုက်ခြင်းမျိုးမရှိခဲ့ကြောင်း အထင်အရှားတွေ့ရသည်။ ရှောလုအတွက် အရေးထားဆုံးကိစ္စမှာ သူရရှိထားသည့် ဟောပြောခြင်းတာဝန်ဖြစ်သည်။—တမန်တော် ၂၂:၁၄၊ ၁၅။
သတင်းကောင်းဟောပြောခြင်းသည် အရေးကြီးကြောင်း မကြာသေးမီကမှ သင် လက်ခံယုံကြည်လာခြင်းလော။ သို့ဆိုလျှင် ခရစ်ယာန်စစ်များအားလုံး ဘုရားသခင့် နိုင်ငံတော်ဟောပြောသူများဖြစ်ရမည်ကို သင်သိပေမည်။ တစ်ခါတစ်ရံ သင့်အမှုဆောင်ခြင်းလုပ်ငန်းကို ရန်လိုသည့်လုပ်ဆောင်မှုများ ပေါ်ပေါက်လာသည့်အခါ မအံ့သြသင့်ပေ။ (မဿဲ ၂၄:၉; လုကာ ၂၁:၁၂; ၁ ပေတရု ၂:၂၀) ဆန့်ကျင်မှုကိုတုံ့ပြန်ရာတွင် ရှောလုလည် ပုံသက်သေကောင်းပြခဲ့၏။ စုံစမ်းမှုများကို အလျှော့မပေးဘဲ ခံရပ်ကြသည့်ခရစ်ယာန်များသည် ဘုရားသခင့်မျက်နှာသာတော် ခံစားရပါလိမ့်မည်။ ယေရှုက မိမိတပည့်များကို ဤသို့ပြောခဲ့၏– “ငါ၏နာမကြောင့်လည်း ခပ်သိမ်းသောလူမျိုးတို့သည် သင်တို့ကို မုန်းကြလိမ့်မည်။” သို့တိုင် ကိုယ်တော် ဤသို့အာမခံထား၏– “သင်တို့သည် တည်ကြည်သောအားဖြင့် ကယ်တင်ခြင်းသို့ရောက်ကြလော့။”—လုကာ ၂၁:၁၇-၁၉။
[အောက်ခြေမှတ်ချက်]
^ အပိုဒ်၊ 10 ခရစ်ယာန်ဘာသာသည် ဒမာသက်မြို့သို့ ဂါလိလဲတွင် ယေရှုဟောပြောပြီးနောက်ဖြစ်စေ၊ စီ.အီး. ၃၃ ပင်တေကုတ္တေပွဲနေ့ နောက်ပိုင်းတွင်ဖြစ်စေ ရောက်ရှိလာခဲ့ခြင်း ဖြစ်နိုင်သည်။—မဿဲ ၄:၂၄; တမန်တော် ၂:၅။
[စာမျက်နှာ ၂၈ ပါ ရုပ်ပုံ]
ယေရှုခရစ်သည် ရှောလုထံ ထင်ရှားပြသည့်အခါ သူသည် “မြေပေါ်လဲကျ” သွားခဲ့
[စာမျက်နှာ ၂၉ ပါ ရုပ်ပုံ]
ဒမာသက်မြို့တွင် လုပ်ကြံခံရရန်ကြံစည်မှုမှ ရှောလုလွတ်မြောက်ခဲ့