အသက်ကြီးရင့်ခြင်းက “အလှသရဖူ” ဖြစ်လာချိန်ဝယ်
‘ကူညီမစမှုကို ယေဟောဝါထံတော်မှ ငါရ၏’
အသက်ကြီးရင့်ခြင်းက “အလှသရဖူ” ဖြစ်လာချိန်ဝယ်
“အကောင်းဆုံး အသက်တာပဲ” ဟု ၁၀၁ နှစ်ရှိ မြူရီရဲယ်က ပြောခဲ့သည်။ “တကယ့်ကို အခွင့်ထူးပါပဲ!” ဟု အသက် ၇၀ အရွယ် သီအိုဒိုးရော့စ်က အခြေအနေအရပ်ရပ်ကို ခြုံငုံပြောခဲ့၏။ “ကျွန်မရဲ့ဘဝကို ဒီထက်ကောင်းတဲ့နည်းနဲ့ အသုံးပြုနိုင်တာမျိုးရှိမှာမဟုတ်ဘူး” ဟု ၇၃ နှစ်အရွယ် မာရီးယာက ဆို၏။ သူတို့အားလုံးသည် ယေဟောဝါဘုရားသခင်ထံ တစ်သက်ပန် အမှုဆောင်ခဲ့သူများဖြစ်ကြ၏။
အဆိုပါ သက်ကြီးရွယ်အိုများသည် ကမ္ဘာတစ်ဝန်းတွင် ယေဟောဝါကို တက်ကြွစွာဝတ်ပြုနေသူများစွာ၏ စံနမူနာများဖြစ်ကြသည်။ အသက်ကြီးရင့်ခြင်း၊ ကျန်းမာရေးပြဿနာများနှင့် အခြားဆိုးဝါးသည့် ဘဝအခြေအနေများရှိသော်ငြားလည်း သူတို့သည် ဘုရားသခင်ကို စိုးလ်အကြွင်းမဲ့ ဆက်ဝတ်ပြုနေကြဆဲဖြစ်သည်။ အဆိုပါ တည်ကြည်သော သက်ကြီးရွယ်အိုများသည် ဘုရားသခင်ဝတ်၌မွေ့လျော်သည့် ပုံသက်သေများကြောင့် ခရစ်ယာန်အသင်းတော်တွင် လေးစားခံရကြသည်။ သူတို့၏အခြေအနေကြောင့် ကန့်သတ်ချက်များရှိနေလျှင်ပင် သက်ကြီးရွယ်အိုများ၏ အမှုဆောင်ခြင်းကို ယေဟောဝါ အလွန်တန်ဖိုးထားတော်မူသည်။ *—၂ ကောရိန္သု ၈:၁၂။
တည်ကြည်သော သက်ကြီးရွယ်အိုများ ရရှိဖို့ မျှော်လင့်နိုင်သည့် ဘဝအရည်အသွေးနှင့်ပတ်သက်ပြီး သင့်မြတ်လှသည့်တွေ့ ရှိချက်တစ်ခုကို ဆာလံကျမ်းတွင် ဖော်ပြထားသည်။ သူတို့သည် သီးပွင့်နေဆဲဖြစ်သည့် ခံ့ညားသောသက်ရှည်ပင်တစ်ပင်နှင့် တူနိုင်သည်။ တည်ကြည်သော သက်ကြီးရွယ်အိုများနှင့်ပတ်သက်ပြီး ဆာလံဆရာက ဤသို့ရေးဖွဲ့သည်– “အသက်ကြီးသောကာလတွင်ပင် အသီးကိုသီး၍ ကြွယ်ဝစိမ်းလန်းကြလိမ့်မည်။”—ဆာလံ ၉၂:၁၄။
အချို့က အသက်အရွယ်အိုမင်း၍ မိမိတို့အစွမ်းခွန်အား ယုတ်လျော့လာသည့်အခါ ပစ်ပယ်ခံရ၊ လျစ်လျူရှုခံရမည်ကို စိုးရွံ့ကြသည်။ ဘုရားသခင်ကို ဒါဝိဒ် ဤသို့အသနားခံခဲ့သည်– “အကျွန်ုပ်ကို အိုသောအခါ ပယ်တော်မမူပါနှင့်။ အားလျော့သောအခါ စွန့်ပစ်တော်မမူပါနှင့်။” (ဆာလံ ၇၁:၉) အသက်ကြီးရင့်ချိန်တွင် အဘယ်အရာက အားလျော့သွားခြင်းနှင့် ရှင်သန်ဖွံ့ဖြိုးခြင်းအဖြစ် ခြားနားသွားစေသနည်း။ ဖြောင့်မတ်ခြင်းတည်းဟူသော ဘုရားသခင်ရေးရာအရည်အသွေးက ဖြစ်သည်။ “ဖြောင့်မတ်သောသူသည် စွန်ပလွံပင်ကဲ့သို့ပွင့်လန်း” လိမ့်မည်ဟု ဆာလံဆရာက သီဆိုခဲ့၏။—ဆာလံ ၉၂: ၁၂။
မိမိတို့အသက်တာတွင် ဘုရားသခင်၏အမှုတော်ကို တည်ကြည်စွာ ထမ်းဆောင်ခဲ့သူတို့သည် အသက်ကြီးလာချိန်အထိ အသီးကောင်းများ ဆက်သီးပွင့်နေဖို့ အကြောင်းများသည်။ အမှန်မှာ မိမိတို့ကိုယ်တိုင်နှင့် အခြားသူတို့၏အသက်တာတွင် ကြဲခဲ့သောမျိုးစေ့များစွာသည် အပင်ပေါက်ပြီး အလျှံပယ် ရိတ်သိမ်းနိုင်လောက်သည့်အထိ ရင့်သန်လာတတ်သည်။ (ဂလာတိ ၆:၇-၁၀; ကောလောသဲ ၁:၁၁) မှန်ပါသည်၊ ဘုရားသခင့်လမ်းစဉ်များကို လျစ်လျူရှုသည့် ကိုယ်ကျိုးရှာမှုတွင် မိမိအသက်တာကို ဖြုန်းတီးပစ်ခဲ့သူများသည် အသက်ကြီးလာသည်နှင့်အမျှ တန်ဖိုးလျော့နည်းလာလေ့ရှိ၏။
နယပုံပြင်ကျမ်းတွင်လည်း ဖြောင့်မတ်ခြင်းကို အသက်ကြီးသူတို့၏ အဆင်တန်ဆာအဖြစ် အလေးပေးဖော်ပြခဲ့၏။ ကျွန်ုပ်တို့ ဤသို့ဖတ်ရ၏– “ဖြူသောဆံပင်သည် ဖြောင့်မတ်ခြင်းတရားလမ်း၌တည်လျှင် အလှသရဖူဖြစ်၏။” (သု. ၁၆:၃၁၊ ကဘ) မှန်ပါသည်၊ ဖြောင့်မတ်ခြင်းသည် အတွင်းအလှ၏ သရုပ်သကန်ဖြစ်၏။ ဖြောင့်မတ်သည့်လမ်းစဉ်ကို အသက်တာတစ်လျှောက်လုံး လိုက်စားခြင်းက ရိုသေလေးစားမှုရရှိစေသည်။ (ဝတ်ပြုရာ ၁၉:၃၂) ဖြူသောဆံပင်သည် ဉာဏ်ပညာနှင့် အကျင့်ကောင်းတို့ကြောင့် ဂုဏ်တင်ခံရသည်။—ယောဘ ၁၂:၁၂။
ယေဟောဝါ၏လုပ်ငန်းတော်တွင် ဖြောင့်မတ်စွာထမ်းဆောင်ခဲ့သူများ၏ အသက်တာသည် ကိုယ်တော်ရှေ့တွင် လှပသည်။ သမ္မာကျမ်းစာက ဤသို့ဆိုသည်– “သင်တို့အသက်ကြီး၍ ဆံပင်ဖြူသည်တိုင်အောင် ငါသည် ထိုသို့သောသူဖြစ်၍ . . . ငါပြုခဲ့ပြီးသည်အတိုင်း ထမ်းဦးမည်။ ဆောင်ရွက်၍ကယ်တင်မည်။” (ဟေရှာယ ၄၆:၄) ကျွန်ုပ်တို့၏မေတ္တာရှင် ကောင်းကင်ခမည်းတော်သည် မိမိအား တည်ကြည်သူများ အသက်ကြီးရင့်လာချိန်တွင် ထောက်မကူညီပေးမည်ဟု ကတိထားခဲ့ကြောင်း သိရှိရခြင်းက အလွန်စိတ်သက်သာမှုဖြစ်စေသည်!—ဆာလံ ၄၈:၁၄။
အသက်တာတွင် ယေဟောဝါအတွက် တည်ကြည်စွာအမှုဆောင်ခြင်းက ကိုယ်တော့်အမြင်တွင် လှပသူများဖြစ်နေခြင်းကြောင့် အခြားသူများ၏ ရိုသေလေးစားမှုလည်း ခံထိုက်သည်မဟုတ်ပေလော။ ဘုရားသခင့်ရှုမြင်ပုံကို ရောင်ပြန်ဟပ်ကာ ကျွန်ုပ်တို့လည်း ယုံကြည်သူချင်းသက်ကြီးရွယ်အိုများကို တန်ဖိုးထားကြသည်။ (၁ တိမောသေ ၅:၁၊ ၂) ထို့ကြောင့် သူတို့၏လိုအပ်ရာများကို ဂရုစိုက်ရာတွင် လက်တွေ့ကျသည့် ခရစ်ယာန်မေတ္တာပြသနည်းများကို ရှာကြံကြစို့။
ဇရာပိုင်း ဖြောင့်မတ်ခြင်းတရားလမ်းပေါ်တွင်
“ဖြောင့်မတ်ခြင်းတရားလမ်းသည် အသက်လမ်းဖြစ်” ကြောင်း ရှောလမုန်က ကျွန်ုပ်တို့အား စိတ်ချစေသည်။ (သု. ၁၂:၂၈၊ ကဘ) အသက်ရလာခြင်းက ဇရာပိုင်း၌ ဤလမ်းတွင်လျှောက်လှမ်းခြင်းကို အတားအဆီးမဖြစ်စေပါ။ ဥပမာ၊ မော်လ်ဒိုဗာနိုင်ငံမှ ၉၉ နှစ်အရွယ် အမျိုးသားတစ်ဦးသည် ကွန်မြူနစ်သဘောတရားများ ပြန့်ပွားရေးအတွက် မိမိ၏လူငယ့်ဘဝကို မြှုပ်နှံခဲ့၏။ သူသည် ဗီ အိုင် လီနင်ကဲ့သို့သော အထင်ကရကွန်မြူနစ်ခေါင်းဆောင်များနှင့် ကိုယ်တိုင်ကိုယ်ကျ စကားပြောဆိုရ၍လည်း ဂုဏ်ယူခဲ့သည်။ ကွန်မြူနစ်ဝါဒ ယိမ်းယိုင်ကျဆုံးသွားသည့်အခါ ဤအသက်ကြီးသူမှာ ဘဝရည်ရွယ်ချက်၊ ဦးတည်ချက်တို့ ပျောက်ဆုံးသွားခဲ့သည်။ သို့သော် ယေဟောဝါသက်သေများက ဘုရားသခင့်နိုင်ငံတော်သည် လူသားတို့၏ပြဿနာများအတွက် တစ်ခုတည်းသော ဖြေရှင်းနည်းအမှန်ဖြစ်ကြောင်း ပြညွှန်ခဲ့ရာ ကျမ်းစာအမှန်တရားကို လက်ခံလိုက်ပြီး ထက်သန်သည့် ကျမ်းစာသင်သားတစ်ဦးဖြစ်လာသည်။ သူသေဆုံးသွားခြင်းကြောင့်သာ ယေဟောဝါ၏ နှစ်ခြင်းခံပြီးသောကျေးကျွန်တစ်ဦး မဖြစ်လိုက်ရရှာပေ။
ဟန်ဂေရီနိုင်ငံမှ ၈၁ နှစ်အရွယ် အမျိုးသမီးသည် ကိုယ်ကျင့်တရားဆိုင်ရာ ဘုရားသခင့်တောင်းဆိုချက်များကို သိရှိသည့်အခါ မိမိ နှစ်ပေါင်းများစွာပေါင်းသင်းနေသော အမျိုးသားနှင့် လက်ထပ်ရန်လိုကြောင်း သဘောပေါက်သွားသည်။ အမျိုးသမီးသည် သတ္တိမွေးကာ ကျမ်းစာအခြေခံသော သဘောတရားကို မိမိအဖော်ဖြစ်သူအား ရှင်းပြခဲ့၏။ ထိုသူက လက်ထပ်ဖို့သဘောတူသည့်အတွက် အလွန်အံ့အားသင့်၊ ဝမ်းမြောက်ခဲ့ရသည်။ တရားဝင်လက်ထပ်ပြီးနောက် အမျိုးသမီးသည် ဝိညာဉ်ရေးတွင် လျင်မြန်စွာတိုးတက်လာသည်။ ကျမ်းစာစလေ့လာပြီးနောက် ရှစ်လအတွင်း နှစ်ခြင်းမခံရသေးသည့် ကြေညာသူဖြစ်လာပြီး မကြာမီတွင် နှစ်ခြင်းခံခဲ့၏။ ဖြောင့်မတ်ခြင်းသည် အသက်ကြီးသူတစ်ဦး၏ စစ်မှန်သည့် အလှသရဖူဖြစ်နိုင်သည်။
တည်ကြည်သော သက်ကြီးရွယ်အိုခရစ်ယာန်များကို ဘုရားသခင်စိတ်ဝင်စားကြောင်း စိတ်ချနိုင်ကြသည်။ ယေဟောဝါသည် မိမိအပေါ်တည်ကြည်သူများအား စွန့်ပစ်မည်မဟုတ်ပေ။ ယင်းအစား သူတို့ အသက်အရွယ်အိုမင်းလာချိန်တွင်ပင် လမ်းပြပေးမည်၊ ကူညီထောက်မပေးမည်ဟု ကိုယ်တော်ကတိပေးခဲ့၏။ သူတို့သည် ဆာလံဆရာ၏စကားများကို ထောက်ခံကြပေလိမ့်မည်– ‘ကူညီမစမှုကို ယေဟောဝါထံတော်မှ ငါရ၏။’—ဆာလံ ၁၂၁:၂၊ ကဘ။
[အောက်ခြေမှတ်ချက်]
^ အပိုဒ်၊ 4 ၂၀၀၅ ယေဟောဝါသက်သေများ၏ပြက္ခဒိန်၊ ဇန်နဝါရီ/ဖေဖော်ဝါရီ ကိုရှု။
[စာမျက်နှာ ၉ ပါ အကျဉ်းဖော်ပြချက်]
“ဖြူသောဆံပင်သည် ဖြောင့်မတ်ခြင်းတရားလမ်း၌တည်လျှင် အလှသရဖူဖြစ်၏။”—သု. ၁၆:၃၁၊ ကဘ။
[စာမျက်နှာ ၈ ပါ လေးထောင့်ကွက်]
ယေဟောဝါသည် မိမိ၏ သက်ကြီးရွယ်အိုကျေးကျွန်များကို ဂရုစိုက်
“ဆံပင်ဖြူသောသူရှေ့မှာ ထရမည်။ အသက်ကြီးသောသူ၏မျက်နှာကို ရိုသေရမည်။”—ဝတ်ပြုရာ ၁၉:၃၂။
“သင်တို့အသက်ကြီး၍ ဆံပင်ဖြူသည်တိုင်အောင် ငါသည် ထိုသို့သောသူဖြစ်၍ . . . ငါပြုခဲ့ပြီးသည်အတိုင်း ထမ်းဦးမည်။”—ဟေရှာယ ၄၆:၄။