ခရစ်ယာန်တို့—ခရစ်ယာန်ဖြစ်ရခြင်းကို ဂုဏ်ယူဝင့်ကြွားကြလော့!
ခရစ်ယာန်တို့—ခရစ်ယာန်ဖြစ်ရခြင်းကို ဂုဏ်ယူဝင့်ကြွားကြလော့!
‘ဝါကြွားသောသူမည်သည်ကား၊ ထာဝရဘုရားသခင်၌သာ ဝါကြွားစေ။’—၁ ကောရိန္သု ၁:၃၁။
၁။ ဘာသာတရားအပေါ် လူတို့၏သဘောထားတွင် အဘယ်စိတ်ဓာတ် တွေ့နေရသနည်း။
“စိတ်မပါမှုဝါဒ။” ခရစ်ယာန်သာသနာရေးရာ အစီရင်ခံသူတစ်ဦးက ယုံကြည်ခြင်းအပေါ် လူတို့၏စိတ်ထားကို ဖော်ပြရန် မကြာသေးမီက အထက်ပါစကားလုံးကို အသုံးပြုလိုက်သည်။ သူက ဤသို့ရှင်းပြ၏– “မျက်မှောက်ခေတ် ဘာသာတရားတွင် အထင်ရှားဆုံး ဖြစ်ပေါ်တိုးတက်မှုသည် ဘာသာရေးမဟုတ်၊ ‘စိတ်မပါမှုဝါဒ’ ဟုအဆီလျော်ဆုံးခေါ်နိုင်သည့် စိတ်ဓာတ်ဖြစ်သည်။” စိတ်မပါမှုဝါဒဟူသည် “မိမိခံယူထားသည့် ဘာသာတရားကို အနည်းငယ်သာ စိတ်ပါခြင်း” ဟုအသေးစိတ် အနက်ဖွင့်ဆိုခဲ့သည်။ လူများစွာသည် “ဘုရားသခင်ကို ယုံကြည်ကြသည်; . . . သို့သော် ဘုရားသခင်ကိုကား လျစ်လျူရှုကြ၏” ဟုလည်းဆိုသည်။
၂။ (က) လူတို့သည် ဝိညာဉ်ရေးကို စိတ်မပါခြင်းကား အဘယ်ကြောင့် အံ့ဩစရာမဟုတ်သနည်း။ (ခ) လျစ်လျူရှုခြင်းသည် ခရစ်ယာန်စစ်များအတွက် အဘယ်အန္တရာယ်ရှိသနည်း။
၂ ဤကဲ့သို့စိတ်မပါမှုကို ကျမ်းစာလေ့လာသူများ မအံ့သြကြချေ။ (လုကာ ၁၈:၈) ဘာသာတရားနှင့်ပတ်သက်လာလျှင် လူအများစု ဤသို့စိတ်မဝင်စားကြခြင်းသည် ဖြစ်ရိုးဖြစ်စဉ်ပင်။ မမှန်သောဘာသာတရားသည် လူတို့ကို လမ်းလွဲစေပြီး စိတ်ဓာတ်ကျစေခဲ့သည်မှာ ကြာမြင့်ပေပြီ။ (ဗျာ. ၁၇:၁၅၊ ၁၆) သို့သော် စစ်မှန်သောခရစ်ယာန်များအတွက်မူ ထိုသို့စိတ်မပါ့တပါ၊ စိတ်ထက်သန်မှုမရှိခြင်းတို့က အန္တရာယ်ရှိသည်။ ကျွန်ုပ်တို့သည် မိမိ၏ယုံကြည်ခြင်းကို အလေးမထား၊ ဘုရားသခင်၏အမှုတော်ဆောင်ခြင်းနှင့် ကျမ်းစာအမှန်တရားတို့အပေါ် စိတ်ထက်သန်မှု ပျောက်ဆုံးသွားရန် မဖြစ်စေနိုင်ချေ။ ယေရှုသည် ပထမရာစုက လောဒိကိမြို့ရှိ ခရစ်ယာန်များအား ‘သင်တို့သည် အအေးမဟုတ်၊ အပူမဟုတ်သည်ကို ငါသိ၏။ အေးခြင်းဖြစ်စေ၊ ပူခြင်းဖြစ်စေ တစ်ခုခုကို ငါအလိုရှိ၏။ သင်တို့သည် နွေးရုံသာရှိကြ၏’ ဟုသတိပေးနှိုးဆော်ချိန်တွင် ဤသို့သောမပူမအေးဖြစ်နေခြင်းကို သတိပေးခဲ့သည်။—ဗျာ. ၃:၁၅-၁၈။
မိမိတို့ မည်သူမည်ဝါဖြစ်ကြောင်း သိမြင်ခြင်း
၃။ ခရစ်ယာန်များသည် မိမိတို့ မည်သူမည်ဝါဖြစ်ခြင်းနှင့်ပတ်သက်၍ အဘယ်အချက်များကို ဂုဏ်ယူဝင့်ကြွားနိုင်ကြသနည်း။
၃ ခရစ်ယာန်တို့သည် ဝိညာဉ်ရေးစိတ်မပါမှုကို ချိုးနှိမ်ရန် မိမိတို့ မည်သူမည်ဝါဖြစ်ကြောင်း ကောင်းစွာသိထားပြီး သူတစ်ပါးနှင့်မတူသည့်အဖြစ်ကို ဂုဏ်ယူဝင့်ကြွားရမည်။ ယေဟောဝါ၏ကျေးကျွန်၊ ခရစ်တော်၏တပည့်များအနေနှင့် ကျွန်ုပ်တို့ မည်သူမည်ဝါဖြစ်ကြောင်း ကျမ်းစာဖော်ပြချက်များတွင် တွေ့ရှိနိုင်၏။ ကျွန်ုပ်တို့သည် “သတင်းကောင်း” ကိုတက်ကြွစွာဟောပြောသည့် “ဘုရားသခင်၏လုပ်ဖော်ဆောင်ဖက်၊” ယေဟောဝါ၏ “သက်သေ” များဖြစ်ကြသည်။ (မဿဲ ၂၄:၁၄၊ ကဘ; ၁ ကောရိန္သု ၃:၉၊ သမ္မာ; ဟေရှာယ ၄၃:၁၀) “အချင်းချင်း တစ်ယောက်ကိုတစ်ယောက်ချစ်ကြ” သူများလည်းဖြစ်ကြ၏။ (ယောဟန် ၁၃:၃၄) စစ်မှန်သောခရစ်ယာန်တို့သည် “ကောင်းကျိုး၊ မကောင်းကျိုးကို ပိုင်းခြား၍ သိနိုင်သောဉာဏ်ပေးတတ်သော၊ အကြားအမြင် အတွေ့အစမ်းများသောသူ” များဖြစ်ကြသည်။ (ဟေဗြဲ ၅:၁၄) ကျွန်ုပ်တို့သည် “ဤလောကတွင် အလင်းဆောင်သူများ” ဖြစ်ကြ၏။ (ဖိလိပ္ပိ ၂:၁၅၊ ကဘ) သို့ဖြစ်၍ ‘လူမျိုးတို့ရှေ့၌ တင့်တယ်လျောက်ပတ်စွာကျင့်နေ’ ရန် ကျွန်ုပ်တို့ကြိုးစားကြသည်။—၁ ပေတရု ၂:၁၂၊ ကဘ; ၂ ပေတရု ၃:၁၁၊ ၁၄။
၄။ ယေဟောဝါအား ကိုးကွယ်သူတစ်ဦးသည် မိမိမည်သူမည်ဝါမဖြစ်ကြောင်း မည်သို့ပိုင်းခြားသိမြင်နိုင်မည်နည်း။
၄ ယေဟောဝါအား စစ်မှန်စွာကိုးကွယ်သူများသည် မိမိတို့ မည်သူမည်ဝါ မဖြစ်ကြောင်းကိုလည်း သိရှိကြသည်။ သူတို့၏ခေါင်းဆောင် ယေရှုခရစ်သည် ဤလောကနှင့်မဆက်ဆံသကဲ့သို့ သူတို့သည်လည်း “ဤလောကနှင့်မဆက်ဆံ” ကြချေ။ (ယောဟန် ၁၇:၁၆) “ဉာဏ်အလင်းကွယ်သည်ဖြစ်၍ . . . ဘုရားသခင်၏အသက်နှင့် ကွာရှင်းလျက်ရှိကြ” သော ‘လူမျိုးများ’ နှင့်သူတို့ သီးခြားနေကြသည်။ (ဧဖက် ၄:၁၇၊ ၁၈) ထို့ကြောင့် ယေရှု၏နောက်လိုက်များသည် ‘ဘုရားမဲ့တရားမဲ့နေခြင်း၊ လောကတပ်မက်ခြင်းကို ပယ်ရှားလျက် ယခုဘဝ၌ ဣန္ဒြေစောင့်ခြင်း၊ တရားသဖြင့်ကျင့်ခြင်း၊ ဘုရားသခင်ဝတ်၌ မွေ့လျော်ခြင်းတို့ကို ပြုနေ’ ကြ၏။—တိတု ၂:၁၃။
၅။ ‘ထာဝရဘုရားသခင်၌သာ ဝါကြွား’ ပါဟူသော ဆုံးမစကားသည် အဘယ်အရာကို ဆိုလိုသနည်း။
၅ ကျွန်ုပ်တို့သည် မည်သူမည်ဝါဖြစ်ကြောင်း၊ စကြဝဠာပိုင်သအုပ်စိုးရှင်နှင့် ကျွန်ုပ်တို့ အဘယ်ဆက်ဆံရေးရှိကြောင်း ရှင်းလင်းစွာ သိထားခြင်းက ‘ထာဝရဘုရားသခင်၌သာ ဝါကြွားကြ’ ရန်လှုံ့ဆော်ပေး၏။ (၁ ကောရိန္သု ၁:၃၁) ယင်းသည် အဘယ်ဝါကြွားမှုမျိုးနည်း။ ခရစ်ယာန်စစ်များအနေနှင့် ကျွန်ုပ်တို့သည် ဘုရားသခင်အဖြစ် ယေဟောဝါအား ကိုးကွယ်ခွင့်ရခြင်းကို ဂုဏ်ယူဝင့်ကြွားကြ၏။ ဤဆုံးမစကားကို ကျွန်ုပ်တို့ လိုက်နာကြသည်– ‘ဝါကြွားသောသူမည်သည်ကား ငါသည် မြေကြီးပေါ်မှာ ချစ်သနားခြင်း၊ တရားသဖြင့်စီရင်ခြင်း၊ ဖြောင့်မတ်ခြင်းကိုပြုသော ထာဝရဘုရားသခင်ဖြစ်ကြောင်းတည်းဟူသော ငါ့သဘောကို သိနားလည်ခြင်း၌သာ ဝါကြွားစေ။’ (ယေရမိ ၉:၂၄) ဘုရားသခင်အား ကျွန်ုပ်တို့ သိကျွမ်းခွင့်ရပြီး အခြားသူများကို ကူညီပေးဖို့ ကိုယ်တော်၏အသုံးတော်ခံခွင့်ရခြင်းကို “ဝါကြွား” ကြ၏။
အခက်အခဲ
၆။ အချို့သူတို့သည် မိမိတို့ ခရစ်ယာန်များဖြစ်ရခြင်းကို ပြတ်သားစွာဖော်ပြရန် အဘယ်ကြောင့် အခက်တွေ့ကြသနည်း။
၆ ကျွန်ုပ်တို့၏ ခရစ်ယာန်အဖြစ်သည် သူတစ်ပါးနှင့်မတူကြောင်း ပြတ်ပြတ်သားသား ဖော်ပြနေရန် အမြဲလွယ်ကူမည်မဟုတ်ပါ။ ခရစ်ယာန်တစ်ဦးအဖြစ် ကြီးပြင်းလာသော လူငယ်တစ်ဦးသည် အခိုက်အတန့် ဝိညာဉ်ရေးအားနည်းခဲ့ကြောင်း ဤသို့ပြန်ပြောပြသည်– “ကျွန်တော် ဘာဖြစ်လို့ ယေဟောဝါသက်သေတစ်ဦး ဖြစ်နေရတာလဲဆိုတာကို တစ်ခါတလေ နားမလည်ခဲ့ဘူး။ နို့စို့အရွယ်ကတည်းက အမှန်တရားနဲ့ရင်းနှီးခဲ့တာ။ လူအများလက်ခံထားတဲ့ ဘာသာတွေထဲက တစ်ခုပါပဲလို့ ခံစားခဲ့ရတဲ့အခါတွေ ရှိဖူးတယ်။” အခြားသူများမှာမူ ဖျော်ဖြေရေးလောက၊ မီဒီယာ၊ ခေတ်စားနေသည့် ဘုရားတရားမဲ့အမြင်မျိုးနှင့် ဘဝကိုရှုမြင်ခြင်းတို့ဖြင့် ပုံသွင်းခံ၍ မိမိတို့ မည်သူမည်ဝါဖြစ်သည်ကို ဖော်ပြခဲ့ကြပြီ။ (ဧဖက် ၂:၂၊ ၃) ခရစ်ယာန်အချို့သည် ရံဖန်ရံခါ မိမိကိုယ်ကို ယုံကြည်စိတ်ချမှုကင်းမဲ့ပြီး မိမိတို့၏စံနှုန်းများနှင့် ပန်းတိုင်များကို ပြန်သုံးသပ်ကြပေမည်။
၇။ (က) ဘုရားသခင့်ကျေးကျွန်များအတွက် အဘယ်ဆန်းစစ်မှုသည် သင့်လျော်မည်နည်း။ (ခ) မည်သို့ပြုလျှင် ဘေးသင့်နိုင်မည်နည်း။
၇ မိမိကိုယ်ကို သေချာစွာ ဆန်းစစ်ခြင်းသည် မှားသလော။ မမှားပါ။ မိမိကိုယ်ကို ဆန်းစစ်နေရန် ခရစ်ယာန်များအား တမန်တော်ပေါလု ဤသို့တိုက်တွန်းခဲ့သည်ကို သင်မှတ်မိပေမည်– “သင်တို့သည် ယုံကြည်ခြင်း၌တည်သလော၊ မတည်သလောဟု ကိုယ်ကိုကိုယ်စစ်ကြောကြလော့။ ကိုယ်ကိုကိုယ် စုံစမ်းကြလော့။” (၂ ကောရိန္သု ၁၃:၅) ဤတွင် တမန်တော်က ဝိညာဉ်ရေးအားနည်းချက်တစ်ခုခု သိသာထင်ရှားလာသည့်အခါ လိုအပ်သလိုပြုပြင်မည်ဟူသော ရည်ရွယ်ချက်ဖြင့် စစ်ဆေးရန် တိုက်တွန်းနေခြင်းဖြစ်သည်။ ယုံကြည်ခြင်း၌တည်မတည် မိမိကိုယ်ကိုစစ်ကြောသော ခရစ်ယာန်တစ်ဦးသည် မိမိ၏အပြောနှင့် လုပ်ရပ်တို့က မိမိခံယူထားသည့်ယုံကြည်ခြင်းနှင့် ကိုက်ညီမှုရှိမရှိ စိစစ်ကြည့်ရမည်။ သို့သော် ယေဟောဝါနှင့်လည်းကောင်း၊ ခရစ်ယာန်အသင်းတော်နှင့်လည်းကောင်း ကျွန်ုပ်တို့၏ဆက်ဆံရေးနှင့် ဆက်နွှယ်မှုမရှိဘဲ မိမိတို့ “မည်သူမည်ဝါ” ဖြစ်ကြောင်း အဖြေရှာ၊ တလွဲဆန်းစစ်မည်ဆိုလျှင် အချည်းနှီးဖြစ်မည့်အပြင် ဝိညာဉ်ရေးဘေးသင့်လိမ့်မည်။ * မည်သူမျှ “ယုံကြည်ခြင်းသင်္ဘောပျက်၍ ဆုံးရှုံး” လိုကြမည်မဟုတ်ပေ။—၁ တိမောသေ ၁:၁၉။
အခက်အခဲများနှင့် ကျွန်ုပ်တို့ လွတ်ကင်းမည်မဟုတ်
၈၊ ၉။ (က) မောရှေသည် မိမိကိုယ်ကို အယုံအကြည်ကင်းမဲ့ကြောင်း မည်သို့ဖော်ပြခဲ့သနည်း။ (ခ) ယေဟောဝါသည် မောရှေ၏သံသယကို မည်သို့တုံ့ပြန်ခဲ့သနည်း။ (ဂ) ယေဟောဝါ၏အားပေးချက်များက သင့်အပေါ် အဘယ်အကျိုးသက်ရောက်သနည်း။
၈ တစ်ခါတစ်ရံ မိမိကိုယ်ကို အယုံအကြည်ကင်းမဲ့လာသော ခရစ်ယာန်များသည် ရှုံးနိမ့်ပြီဟု ခံစားသင့်သလော။ မခံစားသင့်ပါ! ဤခံစားချက်များသည် အသစ်အဆန်းမဟုတ်ကြောင်း သိရှိခြင်းမှ စိတ်သက်သာရာရနိုင်သည်။ အတိတ်ကာလမှ ဘုရားသခင်၏သစ္စာရှိသက်သေခံများသည် ၎င်းအခက်အခဲများကို ကြုံတွေ့ခဲ့ကြရ၏။ ဥပမာ၊ ထူးကဲသော ယုံကြည်ခြင်း၊ သစ္စာစောင့်သိခြင်းနှင့် ဘုရားတရားကြည်ညိုခြင်းတင်ပြခဲ့သော မောရှေကို သုံးသပ်ကြည့်ပါ။ သူသည် ကြီးလေးပုံရသည့် တာဝန်တစ်ခု ပေးအပ်ခံရသောအခါ မဝံ့မရဲဖြင့် “အကျွန်ုပ်သည် အဘယ်သို့သောသူဖြစ်” ၍နည်းဟု မေးလျှောက်ခဲ့သည်။ (ထွက်မြောက်ရာ ၃:၁၁) ‘ငါဟာ အညတရပဲ’ သို့မဟုတ် ‘အရည်အချင်းမရှိတဲ့သူပဲ’ ဟူ၍ သူ၏စိတ်ထဲတွင် ဖြေဆိုနေပုံရသည်။ မောရှေသည် သူ၏နောက်ခံကြောင့် အရည်အချင်းမပြည့်မီဟု ယူမှတ်ခဲ့ပေမည်– သူသည် ကျွန်သပေါက်မျိုးဖြစ်၏။ ဣသရေလအမျိုးသားချင်းက သူ့ကို ငြင်းပယ်ခဲ့ကြသည်။ သူသည် နှုတ်လေးသောသူဖြစ်၏။ (ထွက်မြောက်ရာ ၁:၁၃၊ ၁၄; ၂:၁၁-၁၄; ၄:၁၀) ထို့ပြင် အီဂျစ်လူတို့ရွံရှာသော သိုးထိန်းအလုပ်ကို သူလုပ်ကိုင်၏။ (ကမ္ဘာဦး ၄၆:၃၄) သို့ဖြစ်၍ ကျွန်ဘဝရောက်နေသော ဘုရားသခင်၏လူမျိုးတော်ကို လွတ်မြောက်စေသူဖြစ်လာရန် မသင့်တော်ဟု သူခံစားရသည်မှာ အံ့အားသင့်စရာမဟုတ်ပါ!
၉ ယေဟောဝါသည် မောရှေကို ဤကတိနှစ်ခုပေး၍ စိတ်ချစေခဲ့သည်– “အကယ်စင်စစ် ငါသည် သင့်ဘက်၌ရှိလိမ့်မည်။ ငါသည် သင့်ကို စေလွှတ်ခြင်းလက္ခဏာသက်သေဟူမူကား သင်သည် ထိုလူတို့ကို အဲဂုတ္တုပြည်မှ နုတ်ဆောင်ပြီးလျှင် ဤတောင်ပေါ်မှာ ဘုရားသခင်အား ဝတ်ပြုရကြလိမ့်မည်။” (ထွက်မြောက်ရာ ၃:၁၂) ဘုရားသခင်သည် မဝံ့မရဲဖြစ်နေသော မိမိ၏ကျေးကျွန်ဘက်၌ အမြဲရှိနေမည်ဟု သူ့ကို မိန့်မှာနေခြင်းဖြစ်သည်။ ထို့ပြင် မိမိ၏လူမျိုးတော်ကို ဆက်ဆက်ကယ်လွှတ်ပေးမည်ဟုလည်း ယေဟောဝါ မိန့်ဆိုနေခြင်းဖြစ်၏။ ဘုရားသခင်သည် ရာစုနှစ်များတစ်လျှောက် ထောက်ပံ့ကူညီပေးမည်ဟူသော အလားတူကတိများကို ပေးတော်မူခဲ့ပြီ။ ဥပမာ၊ ဣသရေလလူမျိုးသည် ကတိထားရာပြည်တော်ထဲ ဝင်ခါနီးအချိန်တွင် မောရှေမှတစ်ဆင့် ကိုယ်တော် ဤသို့မိန့်ဆိုခဲ့သည်– ‘အားယူ၍ရဲရင့်ခြင်းရှိကြလော့။ ထာဝရဘုရားသခင်သည် သင်တို့ဘုရားသခင်ဖြစ်၍ သင်တို့နှင့်အတူ ကိုယ်တိုင်ကြွတော်မူမည်။ သင်တို့ကို စွန့်တော်မမူ၊ ပစ်ထားတော်မမူ။’ (တရားဟောရာ ၃၁:၆) ယောရှုကိုလည်း ယေဟောဝါ ဤသို့အာမခံခဲ့၏– ‘သင့်အသက်တည်သည်ကာလပတ်လုံး သင့်ရှေ့မှာ အဘယ်သူမျှ မခံမရပ်နိုင်ရာ။ သင်နှင့်အတူ ငါရှိလိမ့်မည်။ ငါသည် သင့်ကိုမစွန့်၊ သင့်ကိုပစ်မထား။’ (ယောရှု ၁:၅) ကိုယ်တော်က “ငါသည် သင့်ကိုမစွန့်၊ သင့်ကိုအလျှင်းပစ်၍မထား” ဟုခရစ်ယာန်များကိုလည်း ကတိပေးတော်မူ၏။ (ဟေဗြဲ ၁၃:၅) ဤမျှအားပေးထားပြီဖြစ်ရာ ခရစ်ယာန်ဖြစ်ရခြင်းကို ကျွန်ုပ်တို့ ဂုဏ်ယူဝင့်ကြွားသင့်၏!
၁၀၊ ၁၁။ လေဝိသားအာသပ်သည် ယေဟောဝါ၏အမှုတော် ထမ်းဆောင်ခွင့်ရခြင်း တန်ဖိုးအပေါ် စိတ်ထားမှန်ကို မည်သို့ပြန်ပျိုးထောင်နိုင်ခဲ့သနည်း။
၁၀ မောရှေနောက်ပိုင်း အနှစ်ငါးရာခန့်တွင် အာသပ်အမည်ရှိ တည်ကြည်သောလေဝိသားတစ်ဦးသည် ဖြောင့်မတ်သောလမ်းစဉ် လိုက်လျှောက်ခြင်း၏တန်ဖိုးကို သူသံသယဝင်ကြောင်း ပွင့်လင်းစွာ ရေးသားခဲ့သည်။ အာသပ်သည် စမ်းသပ်မှုများနှင့် သွေးဆောင်မှုများကြား ဘုရားသခင်၏အမှုတော် ထမ်းဆောင်ရန် ကြိုးစားအားထုတ်စဉ် ဘုရားသခင်အား မထီမဲ့မြင်ပြုသူအချို့ တန်ခိုးအာဏာပိုရှိပြီး ကြီးပွားချမ်းသာလာကြသည်ကို တွေ့ရှိခဲ့၏။ အာသပ် မည်သို့ခံစားခဲ့ရသနည်း။ သူဤသို့ဝန်ခံ၏– “ငါမူကား ခြေချော်လုလျက်၊ ခြေရာလွဲလုလျက်ရှိမိပြီ။ အကြောင်းမူကား မတရားသောသူတို့၏ စည်းစိမ်ကို မြင်သောအခါ မိုက်သောသူတို့ကိုပင် ငါငြူစူမိပြီ။” သူသည် ယေဟောဝါအား ကိုးကွယ်သူဖြစ်ရခြင်းတန်ဖိုးကို သံသယဝင်လာလေသည်။ ‘အကယ်စင်စစ် ငါ့နှလုံးကို ငါသန့်ရှင်းစေသော်လည်း အကျိုးမရှိ။ အပြစ်ကင်းခြင်းနှင့် ငါ့လက်ကို ဆေးကြောသော်လည်း အကျိုးမရှိ။ နေ့တိုင်း နှောင့်ယှက်ခြင်းကိုငါခံရ၏’ ဟူ၍ပင် အာသပ် ယူဆခဲ့သည်။—ဆာလံ ၇၃:၂၊ ၃၊ ၁၃၊ ၁၄။
၁၁ အာသပ်သည် ထိုသို့ဇဝေဇဝါဖြစ်ခြင်းကို မည်သို့ဖြေရှင်းခဲ့သနည်း။ ယင်းသို့မဖြစ်ဟု သူငြင်းဆိုခဲ့သလော။ မငြင်းပယ်ခဲ့ပါ။ ဆာလံကျမ်း အခန်းကြီး ၇၃ တွင် ကျွန်ုပ်တို့ တွေ့မြင်ရသည့်အတိုင်း ဘုရားသခင်ထံ ဆုတောင်း၍ ဝန်ခံခဲ့သည်။ အာသပ်အတွက် အလှည့်အပြောင်းမှာ ဝတ်ပြုရာအိမ်တော်သန့်ရှင်းရာဌာနသို့ လည်ပတ်သွားခဲ့ခြင်းဖြစ်၏။ ဘုရားသခင်အား ဝတ်ပြုခြင်းသည် အကောင်းဆုံးလမ်းစဉ်ဖြစ်၏ဟု ထိုတွင် သူရောက်ရှိနေစဉ် သဘောပေါက်လာလေသည်။ သူသည် တစ်ဖန်ပြန်၍ ဝိညာဉ်ရေးကို လေးမြတ်လာသည်နှင့် ယေဟောဝါသည် မကောင်းမှုကို မုန်းပြီး အချိန်တန်လျှင် မတရားသောသူတို့ကို အပြစ်ပေးမည်ဖြစ်ကြောင်း သဘောပေါက်ခဲ့သည်။ (ဆာလံ ၇၃:၁၇-၁၉) သို့နှင့် ယေဟောဝါ၏ကျေးကျွန်ဖြစ်ရခြင်းသည် အခွင့်ထူးဖြစ်၏ဟု အာသပ် အမြင်မှန်ရလာကာ ခံယူချက် ပိုပြင်းပြလာသည်။ သူသည် ဘုရားသခင်အား ဤသို့လျှောက်ခဲ့သည်– “အကျွန်ုပ်သည် ကိုယ်တော်ထံမှာ အစဉ်ရှိ၍ အကျွန်ုပ်၏လက်ယာလက်ကို ဆွဲကိုင်တော်မူ၏။ အကျွန်ုပ်ကို ဉာဏ်ပေး၍ ပဲ့ပြင်တော်မူမည်။ နောက်တစ်ဖန် ဘုန်းအသရေ၌ သိမ်းယူတော်မူမည်။” (ဆာလံ ၇၃:၂၃၊ ၂၄) အာသပ်သည် သူ၏ဘုရားသခင်၌ ဂုဏ်ယူဝင့်ကြွားပြန်လေသည်။—ဆာလံ ၃၄:၂။
မိမိတို့ မည်သူမည်ဝါဖြစ်ကြောင်း ခံယူချက်ပြင်းပြ
၁၂၊ ၁၃။ ဘုရားသခင်နှင့် ဆက်ဆံမှုရှိခြင်းကို ဂုဏ်ယူဝင့်ကြွားခဲ့ကြသော ကျမ်းစာပါဇာတ်ကောင်များ၏ ပုံနမူနာများကို ဖော်ပြပါ။
၁၂ မိမိတို့ ခရစ်ယာန်ဖြစ်ရခြင်း ခံယူချက်ကို ပြင်းပြလာစေနိုင်သည့် နည်းတစ်နည်းမှာ ဆင်းရဲခက်ခဲမှုကြားမှ ဘုရားသခင်နှင့်ဆက်ဆံရေးရှိခြင်းကို ဂုဏ်ယူဝင့်ကြွားခဲ့ကြသည့် တည်ကြည်စွာကိုးကွယ်ကြသူများ၏ ယုံကြည်ခြင်းကို ဆန်းစစ်၍ တုပခြင်းဖြစ်သည်။ ယာကုပ်၏သား ယောသပ်အကြောင်းကို သုံးသပ်ကြည့်ပါ။ သူသည် ဆယ်ကျော်သက်အရွယ်တွင် ကျွန်သပေါက်အဖြစ် မတရားရောင်းချခံရပြီး ဘုရားသခင်ကို ကြောက်ရွံ့ရိုသေသည့် ဖခင်ထံမှ မိုင်ရာနှင့်ချီဝေးလံကာ နွေးထွေးဖော်ရွေ၊ ကူညီထောက်မပေးတတ်သော သူ၏ဇာတိဝန်းကျင်နှင့်မတူသည့် လောကဖြစ်သောအီဂျစ်ပြည်သို့ ခေါ်ဆောင်ခံခဲ့ရသည်။ အီဂျစ်ပြည်တွင် ယောသပ်ရှိနေစဉ် ဘုရားသခင်ရေးရာအကြံဉာဏ်ပေးမည့်သူမရှိသည့်အပြင် သူ၏ကိုယ်ကျင့်တရားနှင့် ဘုရားသခင်အပေါ် ယုံကြည်ကိုးစားမှု စမ်းသပ်ခံရသည့် ခက်ခဲသောအခြေအနေများကိုလည်း ရင်ဆိုင်ခဲ့ရသည်။ သို့သော် သူသည် ဘုရားသခင့်ကျေးကျွန်ဖြစ်ရခြင်း ခံယူချက်ပြင်းပြမှုကို ကြိုးစားထိန်းထားပြီး သူသိထားသည့် အမှန်တရားကို ဆုပ်ကိုင်ထားကြောင်း ထင်ရှား၏။ သူသည် ရန်လိုသည့်ဝန်းကျင်၌ပင် ယေဟောဝါအား ဝတ်ပြုရခြင်းကို ဂုဏ်ယူဝင့်ကြွားပြီး မိမိ၏ခံစားချက်ကို ဖော်ပြရန် မရှက်မကြောက်ခဲ့ချေ။—၁၃ ရှစ်ရာစုကြာလေသော် ရှုရိပြည် ဗိုလ်ချုပ်နေမန်အိမ်တွင် ကျွန်ခံရသော ဣသရေလသုံ့ပန်း မိန်းမငယ်တစ်ဦးသည် မိမိက ယေဟောဝါအား ဝတ်ပြုသူဖြစ်သည်ကို မမေ့ခဲ့ချေ။ ထိုမိန်းမငယ်သည် အခွင့်အရေးရသည့်အခါ စစ်မှန်သောဘုရားသခင်၏ ပရောဖက်မှာ ဧလိရှဲဖြစ်သည်ဟု ပြောပြ၍ ယေဟောဝါအကြောင်း ရဲရဲဝံ့ဝံ့ သက်သေခံခဲ့သည်။ (၄ ဓမ္မရာဇဝင် ၅:၁-၁၉) ထို့နောက် နှစ်များစွာကြာသော် လူငယ်ရှင်ဘုရင်ယောရှိသည် ဖောက်ပြန်ယိုယွင်းသောဝန်းကျင်၌ပင် ရှိနေသော်လည်း ကြာရှည်တည်တံ့ခဲ့သော ဘာသာတရားကို ပြုပြင်ပြောင်းလဲပြီး ဘုရားသခင့်ဝတ်ပြုရာအိမ်တော်ကို ပြန်လည်မွမ်းမံကာ ထိုလူမျိုးကို ယေဟောဝါထံ ပြန်လှည့်လာစေခဲ့သည်။ သူ၏ယုံကြည်ခြင်းနှင့် ဝတ်ပြုရေးကို ဂုဏ်ယူဝင့်ကြွားခဲ့သည်။ (၂ ရာဇဝင်ချုပ်ကျမ်း အခန်းကြီး ၃၄၊ ၃၅) ဗာဗုလုန်နိုင်ငံတွင်ရှိ ဒံယေလနှင့် သူ၏ဟေဗြဲအဖော်သုံးဦးတို့သည် ယေဟောဝါ၏ကျေးကျွန်များဖြစ်ကြရသည်ကို တစ်ခါမျှမမေ့ခဲ့ကြချေ၊ ဖိစီးမှု၊ သွေးဆောင်မှုခံခဲ့ရစဉ်ပင် သူတို့၏သမာဓိကို စောင့်ထိန်းခဲ့ကြ၏။ သူတို့သည် ယေဟောဝါ၏ကျေးကျွန်များဖြစ်ရခြင်းကို ဂုဏ်ယူဝင့်ကြွားခဲ့ကြကြောင်း ထင်ရှား၏။—ဒံယေလ ၁:၈-၂၀။
သင်သည် အဘယ်သူဖြစ်ကြောင်း ဂုဏ်ယူဝင့်ကြွားလော့
၁၄၊ ၁၅။ ကျွန်ုပ်တို့ ခရစ်ယာန်ဖြစ်ရခြင်းကို ဝါကြွားရာ၌ အဘယ်အရာပါဝင်သနည်း။
၁၄ ဘုရားသခင်၏အဆိုပါကျေးကျွန်များသည် ကိုယ်တော်ရှေ့ သူတို့၏ရပ်တည်ချက်ကို လျောက်ပတ်စွာ ဂုဏ်ယူဝင့်ကြွားလိုစိတ် ပျိုးထောင်ခဲ့သောကြောင့် အောင်မြင်ခဲ့ကြ၏။ ယနေ့ ကျွန်ုပ်တို့ကော။ ကျွန်ုပ်တို့ ခရစ်ယာန်ဖြစ်ရခြင်းကို ဂုဏ်ယူဝင့်ကြွားခြင်း၌ အဘယ်အရာပါဝင်သနည်း။
၁၅ အဓိကအားဖြင့် ယင်းတွင် ယေဟောဝါ၏နာမတော် ခံယူထားသောလူမျိုးအဝင်ဖြစ်ပြီး ကိုယ်တော်၏ကောင်းချီးနှင့် မျက်နှာသာတော် ခံစားရသည့်အတွက် အလွန်ကျေးဇူးတင်လေးမြတ်ခြင်းပါဝင်၏။ ဘုရားသခင်သည် မိမိပိုင်ဆိုင်သူများကို ကောင်းစွာသိတော်မူ၏။ ဘာသာရေးအရှုပ်အထွေး အတော်အတန်ရှိသည့်ခေတ်တွင် အသက်ရှင်ခဲ့သည့် တမန်တော်ပေါလုသည် ဤသို့ရေးသားခဲ့၏– “ယေဟောဝါသည် မိမိပိုင်ဆိုင်သော လူတို့ကို သိကျွမ်းတော်မူ၏။” (၂ တိမောသေ ၂:၁၉၊ ကဘ; တောလည်ရာ ၁၆:၅) ယေဟောဝါသည် “မိမိပိုင်ဆိုင်သော” လူတို့၌ ဂုဏ်ယူဝင့်ကြွား၏။ ကိုယ်တော်က “သင်တို့ကို ထိသောသူသည် မျက်ဆန်တော်ကို ထိသောသူဖြစ်၏” ဟုအခိုင်အမာမိန့်ဆိုသည်။ (ဇာခရိ ၂:၈) ကျွန်ုပ်တို့ကို ယေဟောဝါချစ်တော်မူကြောင်း ထင်ရှား၏။ သို့ဖြစ်၍ ကိုယ်တော်နှင့် ကျွန်ုပ်တို့၏ဆက်ဆံရေးသည် ကိုယ်တော့်အား အလွန်ချစ်သည့်မေတ္တာအပေါ် အခြေပြုသင့်သည်။ ပေါလုက “ဘုရားသခင်ကိုချစ်သောသူမည်သည်ကား၊ ဘုရားသခင်သိစေတော်မူသောသူဖြစ်၏” ဟုသတိပြုစေသည်။—၁ ကောရိန္သု ၈:၃။
၁၆၊ ၁၇။ ခရစ်ယာန်လူကြီးလူငယ်မရွေး မိမိတို့၏ဝိညာဉ်ရေးအမွေအနှစ်ကို အဘယ်ကြောင့် ဂုဏ်ယူဝင့်ကြွားနိုင်ကြသနည်း။
၁၆ ယေဟောဝါသက်သေများအနေနှင့် ကြီးပြင်းလာကြသော လူငယ်များသည် မိမိတို့ ခရစ်ယာန်ဖြစ်ရခြင်းသည် ဘုရားသခင်နှင့် နှစ်ကိုယ်ကြားဆက်ဆံရေးအပေါ် အခိုင်အမာအခြေပြုမပြု ဆန်းစစ်သင့်သည်။ မိဘများ၏ ယုံကြည်ခြင်းကိုသာ သူတို့အားထားနေ၍မရပါ။ ဘုရားသခင်၏ကျေးကျွန်တစ်ဦးစီနှင့်စပ်လျဉ်း၍ ပေါလုက “သူသည် မိမိသခင်စီရင်သောအားဖြင့်သာ အပြစ်လွတ်ခြင်း၊ အပြစ်ခံခြင်းသို့ရောက်ရ၏” ဟုရေးသားခဲ့သည်။ သို့ဖြစ်၍ ပေါလုက “ငါတို့ရှိသမျှသည် ဘုရားသခင်စစ်ကြောတော်မူခြင်းကို ခံရကြမည်” ဟုထပ်ဆင့်ဆို၏။ (ရောမ ၁၄:၄၊ ၁၂) မိသားစု၏အစဉ်အလာကို စိတ်မပါ့တပါ ဆက်လုပ်ဆောင်နေခြင်းဖြင့် ယေဟောဝါနှင့် ရင်းနှီးသောဆက်ဆံရေးကို တည်တံ့စေနိုင်မည်မဟုတ်ကြောင်း ထင်ရှားသည်။
၁၇ သမိုင်းတစ်လျှောက်တွင် ယေဟောဝါသက်သေမြောက်မြားစွာရှိခဲ့သည်။ လွန်ခဲ့သည့်အနှစ် ၆,၀၀၀ ခန့်က တည်ကြည်သူအာဗေလမှသည် မျက်မှောက်ခေတ် သက်သေခံ “လူအုပ်ကြီး” အထိမက အဆုံးမဲ့အနာဂတ်တိုင်အောင် အသက်ရှင်ပျော်မွေ့ကြမည့် ယေဟောဝါအား ဝတ်ပြုသူများ တိုးများလာနေဦးမည်ဖြစ်သည်။ (ဗျာ. ၇:၉၊ ကဘ; ဟေဗြဲ ၁၁:၄) ကျွန်ုပ်တို့သည် ဤစာရင်းရှည်တွင် လက်ရှိတည်ကြည်သောဝတ်ပြုသူများဖြစ်ကြ၏။ ကျွန်ုပ်တို့၏ ဝိညာဉ်ရေးအမွေအနှစ် ကြွယ်ဝလိုက်လေခြင်း!
၁၈။ ကျွန်ုပ်တို့၏မူများနှင့် စံနှုန်းများက ဤလောကနှင့် ကျွန်ုပ်တို့ကို မည်သို့သီးခြားဖြစ်စေသနည်း။
၁၈ ကျွန်ုပ်တို့ ခရစ်ယာန်ဖြစ်ရခြင်းကို ဖော်ပြရာတွင် ခရစ်ယာန်တို့၏မူများ၊ အရည်အသွေးများ၊ စံနှုန်းများနှင့် စရိုက်များပါဝင်သည်။ ယင်းသည် ဘဝကိုအောင်မြင်စေပြီး ဘုရားသခင်၏စိတ်တော်နှင့်တွေ့စေသည့် တစ်ခုတည်းသော “လမ်းစဉ်” ဖြစ်၏။ (တမန်တော် ၉:၂၊ သတင်းကောင်း; ဧဖက် ၄:၂၂-၂၄) ခရစ်ယာန်များသည် “ခပ်သိမ်းသောအရာကို စုံစမ်း၍၊ ကောင်းသောအရာကို အမြဲကိုင်စွဲကြ” သည်။ (၁ သက်သာလောနိတ် ၅:၂၁) ခရစ်ယာန်ဘာသာတရားနှင့် ဘုရားသခင်ထံမှဝေးကွာနေသည့် ဤလောက အလွန်ကွာခြားကြောင်း ကျွန်ုပ်တို့ ရှင်းလင်းပြတ်သားစွာ သဘောပေါက်ကြသည်။ ဝတ်ပြုရေးအစစ်နှင့်အတု ကွဲပြားခြားနားသည်ကို ယေဟောဝါ အထင်အရှားဖော်ပြထားသည်။ ပရောဖက်မာလခိအားဖြင့် ကိုယ်တော် ဤသို့မိန့်ဆိုခဲ့သည်– “သင်တို့သည် ပြောင်းလဲ၍ ဖြောင့်မတ်သောသူ၊ မဖြောင့်မတ်သောသူ၊ ဘုရားသခင်၏အမှုတော်ကိုဆောင်သောသူ၊ မဆောင်သောသူတို့ကို ပိုင်းခြား၍ သိရကြလိမ့်မည်။”—မာလခိ ၃:၁၈။
၁၉။ စစ်မှန်သောခရစ်ယာန်များသည် ဘယ်သောအခါမျှ အဘယ်သို့ဖြစ်လာကြမည်မဟုတ်သနည်း။
၁၉ ရှုပ်ထွေးပွေလီသော ဤလောကတွင် ယေဟောဝါ၌ ဝါကြွားခြင်းသည် အလွန်အရေးကြီးသည်ဖြစ်ရာ ကျွန်ုပ်တို့၏ဘုရား သခင်၌ လျောက်ပတ်စွာ ဂုဏ်ယူဝင့်ကြွားပြီး မိမိတို့ ခရစ်ယာန် ဖြစ်ရခြင်းကို ပြင်းပြစွာဖော်ပြရန် အဘယ်အရာက ကူညီပေးနိုင်သနည်း။ အထောက်အကူပြုအကြံပေးချက်များကို နောက်ဆောင်းပါးတွင် တွေ့ရလိမ့်မည်။ ၎င်းတို့ကို ဆင်ခြင်သုံးသပ်စဉ် စစ်မှန်သောခရစ်ယာန်များသည် “စိတ်မပါမှုဝါဒ” ၏သားကောင်များ ဘယ်သောအခါမျှ ဖြစ်လာကြလိမ့်မည်မဟုတ်ကြောင်း စိတ်ချပါ။
[အောက်ခြေမှတ်ချက်]
^ အပိုဒ်၊ 7 ဤတွင် ကျွန်ုပ်တို့၏ဝိညာဉ်ရေးအဖြစ်ကိုသာ ရည်ညွှန်းဖော်ပြနေခြင်းဖြစ်သည်။ အချို့သူများသည် စိတ်ရောဂါခံစားနေရသောကြောင့် ဆရာဝန်နှင့် ဆေးကုသဖို့လိုပေမည်။
သင်မှတ်မိသလော
• ခရစ်ယာန်များသည် မည်သို့ ‘ထာဝရဘုရားသခင်၌သာ ဝါကြွား’ နိုင်ကြသနည်း။
• သင်သည် မောရှေနှင့်အာသပ်တို့၏ ပုံနမူနာများမှ အဘယ်သင်ခန်းစာရရှိသနည်း။
• ကျမ်းစာပါ အဘယ်ဇာတ်ကောင်များသည် ဘုရားသခင်၏အမှုတော်ဆောင်ရခြင်း၌ ဂုဏ်ယူဝင့်ကြွားခဲ့ကြသနည်း။
• ကျွန်ုပ်တို့ ခရစ်ယာန်ဖြစ်ရခြင်းကို ဝါကြွားရာ၌ အဘယ်အရာပါဝင်သနည်း။
[လေ့လာရန်မေးခွန်းများ]
[စာမျက်နှာ ၁၄ ပါ ရုပ်ပုံ]
မောရှေသည် မိမိကိုယ်ကို အခိုက်အတန့် ယုံကြည်စိတ်ချမှုကင်းမဲ့ခဲ့
[စာမျက်နှာ ၁၅ ပါ ရုပ်ပုံ]
ယေဟောဝါ၏ရှေးခေတ်ကျေးကျွန်များစွာသည်မိမိတို့ သဲသဲကွဲကွဲ မည်သူမည်ဝါဖြစ်ခြင်းကို ဂုဏ်ယူဝင့်ကြွားခဲ့ကြ