‘သင့်ကို အနိုင်အထက်ပြုစေခိုင်းလျှင်’
‘သင့်ကို အနိုင်အထက်ပြုစေခိုင်းလျှင်’
“ဟေ့လူ! မင်းလုပ်နေတာတွေ ချက်ချင်းရပ်ပြီး ဒီအထုပ်ကို လာမ,စမ်း။” ပထမရာစုနှစ်က ရောမစစ်သားတစ်ဦးသည် အလုပ်များနေသော ဂျူးတစ်ဦးကို ထိုသို့ပြောလျှင် သူမည်သို့တုံ့ပြန်မည်ဟု သင်ထင်သနည်း။ ယေရှုသည် တောင်ပေါ်တရားတော်တွင် ဤသို့မိန့်ဆိုခဲ့သည်– “အကြင်သူသည် သင့်ကို အနိုင်ပြု၍ ခရီးတစ်တိုင်သွားစေ၏၊ ထိုသူနှင့်တကွ နှစ်တိုင်သွားဦးလော့။” (မဿဲ ၅:၄၁) ယေရှု၏ပရိသတ်သည် ထိုဆုံးမစကားကို မည်သို့နားလည်မည်နည်း။ ယနေ့ ကျွန်ုပ်တို့အတွက်ကော မည်သို့အဓိပ္ပာယ်ရှိသင့်သနည်း။
အဖြေများရရှိရန် ရှေးခေတ်က မပြုမနေအမှုထမ်းရခြင်းအကြောင်းကို ကျွန်ုပ်တို့သိရှိဖို့လိုသည်။ ယေရှုခေတ်မှ ဣသရေလလူတို့သည် ထိုထုံးစံနှင့် အကျွမ်းတဝင်ရှိခဲ့ကြသည်။
မပြုမနေအမှုထမ်းရခြင်း
ဘီ.စီ.အီး. ၁၈ ရာစုကတည်းက အရှေ့ဖျားဒေသတွင် မပြုမနေအမှုထမ်း (သို့မဟုတ် လုပ်အားပေး) ခဲ့ရကြောင်း ထင်ရှားသည်။ ရှေးခေတ်ရှုရိပြည်၊ အလာလက်မြို့မှ စီမံအုပ်ချုပ်ရေးကျောက်စာများတွင် ကိုယ်ရေးကိုယ်တာလုပ်ငန်းအတွက် အစိုးရက ချောဆွဲခဲ့သည့် လုပ်အားပေးအဖွဲ့များအကြောင်း ဖော်ပြထားသည်။ ရှုရိကမ်းခြေရှိ ဥဂရစ်မြို့မှ သီးစားလုပ်ကိုင်သည့် လယ်သမားများသည် ရှင်ဘုရင်၏လွတ်ငြိမ်းခွင့်မရလျှင် ထိုနည်းတူ ထမ်းဆောင်ပေးရ၏။
သိမ်းပိုက်ကြီးစိုးခံရသူများသည် အလုပ်ကြမ်းလုပ်ရလေ့ရှိကြ၏။ အီဂျစ်လုပ်ငန်းကြီးကြပ်သူတို့သည် ဣသရေလကျွန်တို့ကို ခဲယဉ်းစွာ အုတ်ဖုတ်ခိုင်းခဲ့ကြသည်။ နောက်ပိုင်းတွင် ဣသရေလလူတို့သည်လည်း ကတိထားရာပြည်ရှိ ခါနာန်လူတို့ကို ခဲယဉ်းစွာစေခိုင်းကြ၏၊ ဒါဝိဒ်နှင့် ရှောလမုန်တို့သည်လည်း လူတို့ကိုကျွန်ခံစေခဲ့ကြသည်။—ထွက်မြောက်ရာ ၁:၁၃၊ ၁၄; ၂ ဓမ္မရာဇဝင် ၁၂:၃၁; ၃ ဓမ္မရာဇဝင် ၉:၂၀၊ ၂၁။
ဣသရေလလူတို့သည်ရှင်ဘုရင်တစ်ပါးကိုပေးပါဟု တောင်းဆိုကြသောအခါ ရှမွေလက ရှင်ဘုရင်၏လုပ်ပိုင်ခွင့်များကို ပြောပြသည်။ ရှင်ဘုရင်သည် နိုင်ငံသားများကို ရထားစီးသူရဲ၊ မြင်းစီးသူရဲအရာ၌ခန့်ထား၍ လယ်ထွန်ခြင်း၊ စပါးရိတ်ခြင်း၊ စစ်တိုက်တန်ဆာပြုလုပ်ခြင်း အစရှိသည့်အမှုတို့ကို စေခိုင်းပေလိမ့်မည်။ (၁ ဓမ္မရာဇဝင် ၈:၄-၁၇၊ သမ္မာ) သို့သော် ယေဟောဝါ၏ဝတ်ပြုရာအိမ်တော် တည်ဆောက်ချိန်အတွင်း တိုင်းတစ်ပါးသားများကို အလုပ်ကြမ်းလုပ်စေခဲ့ပြီး “ဣသရေလအမျိုးသားတို့ကိုကား ရှောလမုန်သည် ကျွန်မခံစေ။ စစ်သူရဲ၊ အမှုတော်စောင့်၊ မှူးမတ်၊ စစ်ကဲ၊ ရထားတော်အုပ်၊ မြင်းတော်အုပ်အရာ၌ ခန့်ထားတော်မူ၏။”—၃ ဓမ္မရာဇဝင် ၉:၂၂။
ဆောက်လုပ်ရေးစီမံကိန်းများတွင် အလုပ်လုပ်ကြရသော ဣသရေလလူတို့၏အကြောင်းကို ၃ ဓမ္မရာဇဝင် ၅:၁၃၊ ၁၄ ကဤသို့ဆိုသည်– “ရှောလမုန်မင်းကြီးသည်လည်း ဣသရေလလူအပေါင်းတို့တွင် လူသုံးသောင်းတို့ကို ခွဲခန့်၍ အလှည့်အလှည့်တစ်လလျှင် တစ်သောင်းစီ လေဗနုန်တောင်သို့စေလွှတ်သဖြင့် ထိုလူတို့သည် လေဗနုန်တောင်ပေါ်မှာ တစ်လ၊ ကိုယ်နေရာအရပ်၌ နှစ်လနေရကြ၏။” ကျမ်းပညာရှင်တစ်ဦးက ဤသို့ဆိုသည်– “ဣသရေလနှင့်ယုဒရှင်ဘုရင်များသည် သူတို့၏ဆောက်လုပ်ရေးလုပ်ငန်းများအပြင် ဘုရင်ပိုင်လယ်မြေများတွင် အခမဲ့လုပ်သားများရရှိရန် ဤလုပ်အားပေးအစီအစဉ်ကို အသုံးပြုခဲ့ကြသည်မှာ သေချာ၏။”
ရှောလမုန်လက်ထက်တွင် ထမ်းဆောင်ရသည့်ဝန် ကြီးမားခက်ခဲခဲ့သည်။ ရောဗောင်မင်းကြီးသည် အလွန်လေးသော ထိုဝန်ကို ၃ ဓမ္မရာဇဝင် ၁၂:၁၂-၁၈) သို့သော် ထိုလုပ်အားပေးအစီအစဉ်ကိုကား မဖျက်သိမ်းခဲ့ချေ။ ရောဗောင်၏မြေးဖြစ်သူ အာသမင်းကြီးသည် ဂေဘမြို့နှင့် မိဇပါမြို့တို့ကို တည်ထောင်ရန် ယုဒလူတို့ကို ဆင့်ခေါ်ခဲ့ရာ “တစ်ယောက်မျှမလွတ်” ခဲ့ကြချေ။—၃ ဓမ္မရာဇဝင် ၁၅:၂၂။
ထပ်၍တင်ဦးမည်ဟု ကြိမ်းဝါးသည့်အခါ ဣသရေလလူအပေါင်းတို့သည် ပုန်ကန်၍ အစေခံကျွန်တို့ကို အုပ်သောအရာရှိအား ခဲနှင့်ပစ်ပေါက်သတ်ခဲ့ကြ၏။ (ရောမအုပ်ချုပ်မှုအောက်တွင်
ပထမရာစုရှိ ဂျူးများသည် “အနိုင်ပြု” ခံရခြင်းနှင့် အကျွမ်းတဝင်ရှိကြောင်း တောင်ပေါ်တရားတော်က ဖော်ပြသည်။ ယင်းသည် ဂရိစကားလုံး အာဂါရီဗို ကိုပြန်ဆိုထားခြင်းဖြစ်ရာ မူလက ပါးရှားအမြန်ချောပို့ခြင်းနှင့် ဆက်စပ်မှုရှိခဲ့သည်။ သူတို့သည် ပြည်သူပိုင်လုပ်ငန်းကို အမြန်ပြီးစီးစေရန် လူ၊ မြင်း၊ သင်္ဘောများသာမက လိုအပ်သမျှကို ချောဆွဲခွင့်ရှိကြသည်။
ယေရှုခေတ်တွင် အလားတူစနစ်မျိုးကို လက်ခံကျင့်သုံးကြသော ရောမလူတို့သည် ဣသရေလနိုင်ငံကို ကြီးစိုးခဲ့ကြသည်။ အရှေ့တိုင်းနိုင်ငံများတွင် အခွန်များကောက်လေ့ရှိသည့်အပြင် ပြည်သူတို့ကို ပုံမှန် သို့မဟုတ် ရံဖန်ရံခါ ချောဆွဲနိုင်ကြသည်။ ဤတာဝန်များကို လူတို့နှစ်သက်ကြမည်မဟုတ်ပေ။ ထို့ပြင် နိုင်ငံ့သယ်ယူပို့ဆောင်ရေးအတွက် တိရစ္ဆာန်များ၊ ယာဉ်မောင်းများ၊ သို့မဟုတ် ကုန်တွဲယာဉ်များကို အမိန့်မရှိဘဲ ချောဆွဲခြင်းသည် မဆန်းတော့ချေ။ သမိုင်းပညာရှင် မိုက်ကယ်လ် ရောစတော့ဖ်ဇက်ဖ်၏အဆိုအရ စီမံအုပ်ချုပ်ရေးမှူးများသည် “[ထိုထုံးစံ] ကိုစနစ်တကျဖြစ်စေရန် ကြိုးစားခဲ့ကြသော်လည်း မအောင်မြင်ခဲ့ကြချေ၊ အကြောင်းမှာ ထိုဓလေ့ရှိနေသရွေ့ကာလပတ်လုံး ဆိုးကျိုးများဖြစ်ပေါ်နေဦးမည်မှာ သေချာ၏။ ဤစနစ်၏အာဏာရှင်ဆန်မှုနှင့် နိုင်ထက်စီးနင်းပြုမှုတို့ ပပျောက်သွားစေရန် စိတ်ရင်းမှန်ဖြင့် ကြိုးစားခဲ့ကြသော အုပ်ချုပ်သူများသည် အမိန့်များကို တရစပ် ထုတ်ဆင့်ခဲ့ကြသည်။ . . . သို့သော် ထိုထုံးစံဖြင့် နိုင်ထက်စီးနင်းပြုနေကြ၏။”
ဂရိကျမ်းပညာရှင်တစ်ဦးက ဤသို့ဆို၏– “ကြီးစိုးသူတို့သည် မည်သူကိုမဆို ချောဆွဲ၍ စစ်ဝန်စည်စလယ်ကို ထမ်းပို့ပေးရန်၊ မည်သည့်အလုပ်ကိုမဆို လုပ်ဆောင်ပေးရန် အနိုင်အထက်ပြုနိုင်ကြ၏။” ရောမစစ်သားများသည် ကုရေနေပြည်သား ရှိမုန်အား “အနိုင်ပြု” ၍ ယေရှု၏နှက်တိုင်ကို ထမ်းခိုင်းခဲ့ကြသည်။—မဿဲ ၂၇:၃၂။
လူတို့မကြိုက်ကြသော ဤထုံးစံကို ရဗ္ဗိကျမ်းဂန်များကလည်း ကိုးကားဖော်ပြသည်။ ဥပမာ၊ မုရတုအခက်တို့ကို နန်းတော်သို့ သယ်ဆောင်သွားရန် ရဗ္ဗိဆရာတစ်ဦး ချောဆွဲခံခဲ့ရ၏။ အလုပ်ရှင်များထံမှ အလုပ်ကြမ်းသမားများကို ချောဆွဲပြီး တခြားတာဝန်များကို
ခိုင်းစေတတ်ကြသည်၊ သို့သော် သူတို့၏လုပ်ခကို ထိုအလုပ်ရှင်များအား ပေးစေ၏။ ဝန်တင်တိရစ္ဆာန်များ သို့မဟုတ် နွားများကိုလည်း ချောဆွဲနိုင်သည်။ ၎င်းတို့ကို ပြန်ရရှိသည့်တိုင် အသုံးမပြုနိုင်တော့သည့် အခြေအနေတွင်ရှိနေကြပေမည်။ ချောဆွဲခြင်းသည် အာဏာဖြင့်သိမ်းယူခြင်းနှင့် အနက်တူရသည့်အကြောင်းရင်းကို သင်,နားလည်နိုင်ပေမည်။ သို့ဖြစ်၍ ဂျူးစကားပုံတစ်ခုက “အာဂါရီအာသည် အသေကောင်ဘဝနှင့်တူ၏” ဟုဆိုသည်။ သမိုင်းပညာရှင်တစ်ဦးက ဤသို့ဆိုသည်– “အာဂါရီအာအတွက် ဝန်ဆွဲတိရစ္ဆာန်များမဟုတ်ဘဲ လယ်ထွန်သည့်နွားများကို ချောဆွဲခြင်းက ရွာတစ်ရွာလုံးကို ပျက်စီးသွားစေနိုင်သည်။”အထူးသဖြင့် မောက်မောက်မာမာ မညှာမတာချောဆွဲလေ့ရှိရာ ထိုသို့ပြုလုပ်ပေးရခြင်းကို လူတို့ မည်မျှရွံမုန်းလိုက်မည်ဖြစ်ခြင်း။ မိမိတို့ကို ကြီးစိုးသည့် တစ်ပါးအမျိုးသားအာဏာရှင်များကို ဂျူးများ အလွန်မုန်းတီးနေကြသည်ဖြစ်ရာ ဤသို့အနိုင်အထက်ပြုခံရ၍ အရှက်တကွဲဖြစ်ရခြင်းကို အလွန်နာကြည်းခဲ့ကြသည်။ နိုင်ငံသားတစ်ဦးသည် ဝန်စည်စလယ်တစ်ခုကို အဘယ်နေရာအထိ သယ်ဆောင်ပေးရကြောင်း အတိအကျဖော်ပြသော ဥပဒေမရှိပါ။ လူတို့သည် ဥပဒေက တောင်းဆိုထားသည်ထက် ပို၍လုပ်ဆောင်ပေးလိုမည်မဟုတ်ကြောင်း သေချာသည်။
သို့တိုင် ယေရှုသည် ဤထုံးစံကို ရည်ညွှန်း၍ ဤသို့မိန့်ဆိုခဲ့သည်– “အကြင်သူသည် သင့်ကို အနိုင်ပြု၍ ခရီးတစ်တိုင်သွားစေ၏၊ ထိုသူနှင့်တကွ နှစ်တိုင်သွားဦးလော့။” (မဿဲ ၅:၄၁) ထိုစကားကို ကြားသည့်အခါ အချို့က ကိုယ်တော့်အား ဆင်ခြင်တုံတရားမရှိဟု ယူမှတ်ကြပေမည်။ အဘယ်အရာကို ကိုယ်တော်ဆိုလိုပါသနည်း။
ခရစ်ယာန်များ မည်သို့တုံ့ပြန်သင့်
ရိုးရိုးလေးဆိုရသော် အခွင့်အာဏာရှိသူတစ်ဦးသည် တရားဝင်အလုပ်တစ်မျိုးမျိုးကို အနိုင်အထက်စေခိုင်းလျှင် မခံချိမခံသာမဖြစ်ဘဲ တလိုတလား လုပ်ဆောင်ပေးသင့်သည်ဟု ပရိသတ်အား ယေရှုမိန့်ဆိုနေခြင်းဖြစ်သည်။ သို့ဖြင့် သူတို့သည် “ကဲသာဘုရင်၏ဥစ္စာကို ကဲသာဘုရင်အား ဆက်ပေးကြ” စဉ် “ဘုရားသခင်၏ဥစ္စာကိုကား၊ ဘုရားသခင်အား ဆက်ပေး” ခြင်းကိုလည်း လျစ်လျူရှုမည်မဟုတ်ချေ။—မာကု ၁၂:၁၇။ *
ထို့ပြင် တမန်တော်ပေါလုသည် ခရစ်ယာန်များအား ဤသို့တိုက်တွန်းခဲ့သည်– “အစိုးရသောမင်းအာဏာစက်၏အုပ်စိုးခြင်းကို လူတိုင်းဝန်ခံစေ။ အကြောင်းမူကား၊ ဘုရားသခင်၏အခွင့်မရှိလျှင် မင်းအာဏာစက်မရှိ။ အာဏာစက်ရှိသမျှသည် ဘုရားသခင်ခန့်ထားတော်မူရာဖြစ်သတည်း။ ထို့ကြောင့် မင်းအာဏာကိုဆန်သောသူသည် ဘုရားသခင်စီရင်တော်မူရာကို ဆန်သောသူဖြစ်၏။ . . . မကောင်းသောအကျင့်ကို ကျင့်လျှင် ကြောက်ခြင်းရှိစေလော့။ အကြောင်းမူကား၊ မင်းသည် အချည်းနှီးဓားကို ဆောင်သည်မဟုတ်။”—ရောမ ၁၃:၁-၄။
ဤနည်းဖြင့် ရှင်ဘုရင် သို့မဟုတ် အစိုးရသည် အမိန့်ချိုးဖောက်သူများကို အပြစ်ပေးပိုင်ခွင့်ရှိကြောင်း ယေရှုနှင့်ပေါလုတို့က အသိအမှတ်ပြုခဲ့ကြသည်။ အဘယ်အပြစ်မျိုးနည်း။ စီ.အီး. ပထမရာစုနှင့် ဒုတိယရာစုနှစ်မှ ဂရိအတွေးအခေါ်ပညာရှင် အပီတစ်တပ်က ဤသို့ဖြေ၏– “. . . တစ်ဦးက မထင်မမှတ်ဘဲ သင်၏မြည်းလေးကို ချောဆွဲလျှင် အသာတကြည် ပေးလိုက်ပါ။ မြည်းလေးလည်းဆုံး၊ သင်လည်း အရိုက်ခံရမည်ကိုစိုး၍ မခုခံပါနှင့်၊ မညည်းပါနှင့်။”
ဟေရှာယ ၂:၄; ယောဟန် ၁၇:၁၆; ၁၈:၃၆) တခြားအချိန်အခါများတွင်မူ ခရစ်ယာန်များသည် မိမိတို့ထံမှ တောင်းဆိုရာများကို လိုက်လျောပေးနိုင်သည်ဟု ယူဆကြသည်။ ဥပမာ၊ အရပ်သားဦးစီးသည့် ရပ်ကွက်အကျိုးပြုလုပ်ငန်းများတွင် ကြည်လင်သောသိစိတ်ဖြင့် ပါဝင်လုပ်ဆောင်ပေးနိုင်သည်ဟု ခရစ်ယာန်အချို့ ယူမှတ်ကြပေမည်။ ၎င်းတို့မှာ သက်ကြီးရွယ်အိုများ သို့မဟုတ် မသန်စွမ်းသူများကို ကူညီပေးခြင်း၊ မီးသတ်သမားများအဖြစ် အသုံးတော်ခံခြင်း၊ ပင်လယ်ကမ်းခြေများကို သန့်ရှင်းခြင်း၊ ပန်းခြံများ၊ သစ်တောများ၊ စာကြည့်တိုက်များ အစရှိသည်တို့တွင် ပါဝင်လုပ်ဆောင်ခြင်းဖြစ်နိုင်၏။
သို့တိုင် ရှေးခေတ်နှင့် မျက်မှောက်ခေတ်တွင်ပင် ခရစ်ယာန်များသည် အစိုးရ၏တောင်းဆိုချက်များကို ရံဖန်ရံခါ ကြည်ဖြူစွာ မလိုက်လျောနိုင်ဟု ခံစားကြရပေမည်။ တစ်ခါတစ်ရံ အလွန်ပြင်းထန်သော အကျိုးဆက်များကို ခံခဲ့ကြရ၏။ ခရစ်ယာန်အချို့ဆိုလျှင် သေဒဏ်ပင်ခံခဲ့ကြရ၏။ တခြားသူများမှာမူ၊ ဘက်လိုက်လှုပ်ရှားမှုများဟု သူတို့ထင်မှတ်သည့်အမှုများတွင် ပါဝင်ရန် ငြင်းပယ်ခြင်းကြောင့် နှစ်နှင့်ချီ ထောင်ချခံခဲ့ကြရ၏။ (တစ်နိုင်ငံနှင့် တစ်နိုင်ငံ အခြေအနေချင်း တူကြမည်မဟုတ်။ သို့ဖြစ်၍ တောင်းဆိုချက်များကို လိုက်လျောပြုလုပ်မည်၊ မလုပ်မည်ကို ခရစ်ယာန်တစ်ဦးချင်းစီသည် မိမိ၏ကျမ်းစာနှင့်လေ့ကျင့်ထားသော သိစိတ်နှင့်အညီ လုပ်ဆောင်ရမည်။
နှစ်တိုင်သွားခြင်း
တရားဝင် တောင်းဆိုချက်များကို လုပ်ဆောင်လိုစိတ်ရှိပါဟူ၍ ယေရှုသွန်သင်ပေးခဲ့သောမူသည် အစိုးရတောင်းဆိုချက်များနှင့်သာမဟုတ်ဘဲ နေ့စဉ် လူမှုဆက်ဆံရေးတွင်လည်း အသုံးချနိုင်၏။ ဥပမာ၊ သင်၏အထက်လူကြီးက ဘုရားသခင့်ပညတ်နှင့်မဆန့်ကျင်သော်လည်း သင်မပြုလုပ်လိုသည့် အရာတစ်ခုကို ပြုလုပ်ခိုင်းပေမည်။ သင်သည် မည်သို့တုံ့ပြန်မည်နည်း။ သင်၏အချိန်၊ သင်၏အားစိုက်မှုတို့ကို တရားလွန်တောင်းဆိုနေသည်ဟု ခံစားရပြီး ဒေါသနှင့် တုံ့ပြန်မိပေမည်။ သို့နှင့် ရန်လိုသည့်စိတ်ထား ဖြစ်ပေါ်လာနိုင်၏။ တစ်ဖက်တွင်မူ၊ သင်သည် မကျေမနပ်နှင့်ပြုလုပ်ပေးလျှင် သင်၏အတွင်းငြိမ်သက်မှု ပျောက်ဆုံးသွားနိုင်၏။ ဖြေရှင်းနည်းကား အဘယ်နည်း။ ယေရှုမိန့်မှာခဲ့သည့်အတိုင်း နှစ်တိုင်သွားပါ။ သင့်ထံမှ တောင်းဆိုရာထက် ပိုမိုလုပ်ဆောင်ပေးပါ။ ယင်းကို စိတ်လိုကိုယ်လျောက် လုပ်ဆောင်ပါ။ ထိုသို့သောစိတ်ထားရှိမည်ဆိုလျှင် သင့်ကို အခွင့်အရေးယူနေသည်ဟု မခံစားရဘဲ မိမိလုပ်ကိုင်ရာကို လွတ်လပ်စွာ လုပ်ကိုင်ရသည်ဟု ခံစားရမည်။
စာရေးဆရာတစ်ဦးက ဤသို့ဖော်ပြသည်– “လူအများ၏ဘဝတစ်လျှောက်လုံးတွင် အနိုင်အထက်စေခိုင်းရာများကိုသာ လုပ်ဆောင်ခဲ့ရသည်။ ဤသူတို့၏အသက်တာသည် ပင်ပန်းဆင်းရဲခက်ခဲပြီး အမြဲတမ်း မောပန်းနွမ်းလျခဲ့ရသည်။ အခြားသူများမှာမူ တာဝန်သိတတ်စွာ ပြုလုပ်ပေးရုံမက စိတ်လိုကိုယ်လျောက် ကူညီပေးတတ်ကြ၏။” တစ်နည်းအားဖြင့် အခြေအနေများစွာတွင် မသွားမနေသွားရသော တစ်မိုင် သို့မဟုတ် နှစ်မိုင်ကိုသာ ရွေးသွားခွင့်ရှိကြသည်။ ပထမလူတန်းစားသည် မိမိရပိုင်ခွင့်များကို တောင်းဆိုလိုပေမည်။ ဒုတိယမူ အကျိုးကျေးဇူးများစွာ ခံစားရပေမည်။ သင်သည် အဘယ်သို့သော လူစားမျိုးနည်း။ သင်၏လုပ်ဆောင်မှုများကို တာဝန်အရ ပြုလုပ်ရသည့်အလုပ်အဖြစ်မဟုတ်ဘဲ သင်ပြုလုပ်လိုသည့်အလုပ်ဟု ရှုမြင်နိုင်မည်ဆိုလျှင် သင်သည် သာ၍ပျော်ရွှင် အကျိုးဖြစ်ထွန်းနိုင်ပေလိမ့်မည်။
အကယ်၍ သင်သည် အခွင့်အာဏာရှိသူတစ်ဦးဖြစ်လျှင်ကော။ သင်,တောင်းဆိုရာများကို စိတ်စေတနာမပါသူတစ်ဦးကို အနိုင်အထက်ပြု၍ စေခိုင်းခြင်းသည် မေတ္တာရှိရာမကျ၊ ခရစ်ယာန်မပီသကြောင်း ထင်ရှား၏။ ယေရှုက ‘လောကမင်းတို့သည် အစိုးတရပြုတတ်ကြ၏။ အကဲအမှူးတို့သည် အာဏာထားတတ်ကြ၏’ ဟုမိန့်ဆိုခဲ့သည်။ သို့သော် ၎င်းသည် ခရစ်ယာန်လမ်းစဉ်မဟုတ်ချေ။ (မဿဲ ၂၀:၂၅၊ ၂၆) အာဏာရှင်ဆန်ဆန်စေခိုင်းခြင်းဖြင့် မိမိလိုရာ,ရမည်မှန်သော်လည်း ကြင်နာစွာ တော်ရုံသင့်ရုံစေခိုင်းသည့်အခါ လေးစားပျူငှာစွာ လိုက်လျောပြုလုပ်ပေးလျှင် နှစ်ဦးနှစ်ဖက်စလုံး အဆင်ပြေလိုက်မည်ဖြစ်ခြင်း! မှန်ပါသည်၊ တစ်တိုင်သာသွားမည့်အစား တလိုတလားနှင့် နှစ်တိုင်သွားပေးခြင်းသည် သင်၏ဘဝကို တိုးတက်ကောင်းမွန်စေနိုင်၏။
[အောက်ခြေမှတ်ချက်]
^ အပိုဒ်၊ 18 “ကဲသာဘုရင်၏ဥစ္စာကို ကဲသာဘုရင်အား ဆက်ပေးကြလော့။ ဘုရားသခင်၏ဥစ္စာကိုကား၊ ဘုရားသခင်အား ဆက်ပေးကြလော့” ဟူသည် ခရစ်ယာန်များအတွက် အဘယ်အဓိပ္ပာယ်ရှိကြောင်း အပြည့်အစုံတင်ပြချက်ကို ၁၉၉၆၊ မေ ၁ ရက်ထုတ် ကင်းမျှော်စင် စာမျက်နှာ ၁၅-၂၀ ကိုရှု။
[စာမျက်နှာ ၂၅ ပါ လေးထောင့်ကွက်]
ရှေးခေတ်က တလွဲအနိုင်အထက်ပြု
ဆင်ခြေပေး၍ တလွဲအနိုင်အထက်စေခိုင်းမှုကို တားဆီးထားသည့် စည်းမျဉ်းများမှ ယင်းကို အသုံးပြုလေ့ရှိကြကြောင်း သိရှိရသည်။ ဘီ.စီ.အီး. ၁၁၈ ခုနှစ်တွင် အီဂျစ်ပြည့်ရှင် တော်လမီ ယူအာရ်ဂါတီဇ် ၂ ကမိမိ၏အရာရှိများသည် “ကိုယ်ရေးကိုယ်တာလုပ်ငန်းများအတွက် အဘယ်နိုင်ငံသားကိုမျှ အနိုင်အထက်မပြုရ၊ ကိုယ်ကျိုးအတွက် သူတို့၏ကျွဲနွားတိရစ္ဆာန်များကို ချောဆွဲခြင်း (အာဂါရီရူအင်န်) မပြုရ” ဟုအမိန့်ထုတ်ပြန်ခဲ့သည်။ ထို့ပြင် “မည်သည့်အကြောင်းပြချက်နှင့်မဆို ကိုယ်ပိုင်အသုံးပြုရန် လှေများကို မည်သူမျှ ချောဆွဲခြင်းမပြုသင့်ချေ။” စီ.အီး. ၄၉ ခုနှစ် ရက်စွဲပါ ကမ္ပည်းစာတစ်ခု၌ အီဂျစ်ပြည်၊ မဟာအိုအေစစ်ဝတ်ပြုရာအိမ်တော်တွင် ရောမဘုရင်ခံမင်း ဗာဂျီလီအာစ် ကာပီတိုက . . . ဥပဒေကိုဆန့်ကျင်ပြီး ချောဆွဲခဲ့ကြကြောင်း ဝန်ခံပြီး “အကျွန်ုပ်ထံမှ အမိန့်စာမရလျှင် တစ်စုံတစ်ရာကို . . . မည်သူမျှ ယူပိုင်ခွင့် သို့မဟုတ် ချောဆွဲပိုင်ခွင့်မရှိ” ဟုအမိန့်ပြဋ္ဌာန်းခဲ့သည်။
[စာမျက်နှာ ၂၄ ပါ ရုပ်ပုံ]
ကုရေနေပြည်သား ရှိမုန်အား အနိုင်အထက်ပြုခဲ့ကြ
[စာမျက်နှာ ၂၆ ပါ ရုပ်ပုံ]
သက်သေခံများစွာသည် မိမိတို့၏ခရစ်ယာန်ရပ်တည်ချက်ကို ထိန်းသိမ်းထားခြင်းကြောင့် ထောင်ချခံခဲ့ကြရ