ဓမ္မရာဇဝင် ပထမစောင်မှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
ဓမ္မရာဇဝင် ပထမစောင်မှ ပေါ်လွင်ချက်များ
အချိန်ကား ဘီ.စီ.အီး. ၁၁၁၇ ခုနှစ်ဖြစ်၏။ ကတိထားရာပြည်ကို ယောရှု လုံးလုံးအနိုင်ရလိုက်ချိန်မှ နှစ်ပေါင်းသုံးရာခန့် ကုန်လွန်ခဲ့ပေပြီ။ ဣသရေလအသက်ကြီးသူတို့သည် ထူးခြားသည့် တောင်းဆိုချက်တစ်ခုနှင့် ယေဟောဝါ၏ပရောဖက်ထံ ရောက်လာကြ၏။ အဆိုပါပရောဖက်က ယင်းကိစ္စကို ဆုတောင်းပြီးဆွေးနွေးရာ ယေဟောဝါက သူတို့ဆွေးနွေးထားသည့်အတိုင်း ဆောင်ရွက်ခွင့်ပေးလိုက်သည်။ ယင်းသည် တရားသူကြီးများအုပ်စိုးခဲ့သည့်ကာလ အဆုံးပိုင်းနှင့် ရှင်ဘုရင်များ စတင်အုပ်စိုးသည့်ခေတ်ကို တိကျပြတ်သားစွာဖော်ပြ၏။ ဓမ္မရာဇဝင်ပထမစောင်သည် ဣသရေလလူမျိုး၏ သမိုင်းအလှည့်အပြောင်းနှင့်ဆိုင်သည့် စိတ်လှုပ်ရှားဖွယ် ဖြစ်ရပ်များကို ဖော်ပြပေးပါသည်။
ရှမွေလ၊ နာသန်နှင့် ဂဒ်တို့ ရေးသားခဲ့သည့် ဓမ္မရာဇဝင်ပထမစောင်သည် ဘီ.စီ.အီး. ၁၁၈၀ မှ ဘီ.စီ.အီး. ၁၀၇၈ ခုနှစ်အထိ နှစ်ပေါင်း ၁၀၂ ကာလကို ငုံမိသည်။ (၁ ရာဇဝင်ချုပ် ၂၉:၂၉) ယင်းသည် ဣသရေလခေါင်းဆောင်လေးဦးတို့၏ မှတ်တမ်းဖြစ်၏။ နှစ်ဦးမှာ တရားသူကြီးများ ဖြစ်ကြပြီး အခြားနှစ်ဦးမှာ ဘုရင်များဖြစ်ကြသည်; နှစ်ဦးမှာ ယေဟောဝါအား နာခံကြပြီး အခြားနှစ်ဦးမှာ မနာခံကြချေ။ စံနမူနာရှင် အမျိုးသမီးနှစ်ဦးနှင့် ရဲရင့်သော်လည်း နူးညံ့သိမ်မွေ့သည့် စစ်သည်တစ်ဦးတို့အကြောင်းကိုလည်း ကျွန်ုပ်တို့သိရှိရမည်။ ယင်းပုံနမူနာများသည် ဆောင်ရမည့်၊ ရှောင်ရမည့် သဘောထားများ၊ လုပ်ရပ်များနှင့်ဆိုင်သည့် အဖိုးတန်သင်ခန်းစာများပေးသည်။ သို့ဖြစ်၍ ဓမ္မရာဇဝင်ပထမစောင်ပါ အကြောင်းအရာများသည် ကျွန်ုပ်တို့၏အတွေးအခေါ်နှင့် အကျင့်အကြံတို့ကို တန်ခိုးနှင့်ပြုပြင်ပေးနိုင်ပါသည်။—ဟေဗြဲ ၄:၁၂။
ဧလိ၏တရားသူကြီးရာထူးကို ရှမွေလဆက်ခံ
စုသိမ်းပွဲခံချိန်ဖြစ်ရာ ရာမမြို့တွင်နေထိုင်သည့် ဟန္နသည် အလွန်ပျော်ရွှင်နေ၏။ * သူ၏ဆုတောင်းချက်ကို ယေဟောဝါ နားညောင်းပေးတော်မူခဲ့သဖြင့် သားလေးတစ်ယောက်မွေးဖွားရသည်။ မိမိကတိပြုထားသည့်အတိုင်း ဆောင်ရွက်ရန် ဟန္နသည် သား ရှမွေလအား “ယေဟောဝါ၏အိမ်တော်” ၌ အမှုထမ်းစေလေသည်။ ထိုတွင် ယင်းကလေးငယ်သည် “ယဇ်ပုရောဟိတ်ဧလိရှေ့တွင် ယေဟောဝါ၏အမှုတော်ဆောင်” ဖြစ်လာ၏။ (၁ ဓမ္မရာဇဝင် ၁:၂၄; ၂:၁၁၊ ကဘ) ရှမွေလ အသက်နုနယ်သေးချိန်၌ပင် ဧလိ၏မိသားစုအပေါ် တရားစီရင်ချက်ပြောကြားရန် သူ့ကို ယေဟောဝါမိန့်တော်မူလေသည်။ ရှမွေလ ကြီးပြင်းလာသောအခါ ဣသရေလလူအပေါင်းတို့သည် သူ့အား ယေဟောဝါ၏ပရောဖက်အဖြစ် အသိအမှတ်ပြုကြကုန်၏။
အချိန်တန်သော် ဖိလိတ္တိလူတို့သည် ဣသရေလနိုင်ငံကို စစ်တိုက်ရန် ရောက်လာကြ၏။ သူတို့သည် သေတ္တာတော်ကို သိမ်းယူလိုက်ပြီး ဧလိ၏သားနှစ်ဦးကို သတ်ပစ်လိုက်ကြသည်။ “ဣသရေလအမျိုးကို အနှစ်လေးဆယ်အုပ်စိုး” ခဲ့သူ သက်ကျားအို ဧလိသည် ထိုသတင်းကိုကြားသောအခါ သေဆုံးသွား၏။ (၁ ဓမ္မရာဇဝင် ၄:၁၈) သေတ္တာတော်ကို သိမ်းပိုက်ထားခြင်းက ဖိလိတ္တိလူတို့အတွက် ဆိုးကျိုးဖြစ်စေခဲ့ရာ ၎င်းသေတ္တာတော်ကို ဣသရေလလူတို့ထံ ပြန်ပို့ပေးလေသည်။ ယခု ဣသရေလနိုင်ငံကို ရှမွေလအုပ်စိုးနေပြီဖြစ်ရာ နိုင်ငံမှာအေးချမ်းနေလေသည်။
ကျမ်းစာမေးခွန်းများ အဖြေ–
၂:၁၀—ဣသရေလနိုင်ငံတွင် ရှင်ဘုရင်မရှိလျက်နှင့် ယေဟောဝါသည် “ရှင်ဘုရင်ကို ခွန်အားနှင့်ပြည့်စုံစေ” ရန် ဟန္န အဘယ်ကြောင့်ဆုတောင်းခဲ့ရသနည်း။ ဣသရေလလူမျိုးတွင် ရှင်ဘုရင်ရှိလိမ့်မည်ကို မောရှေပညတ်တွင် ကြိုဟောထား၏။ (တရားဟောရာ ၁၇:၁၄-၁၈) ယာကုပ်သေဆုံးခါနီးတွင် ဤသို့ပရောဖက်ပြုခဲ့၏– ‘ရာဇလှံတံ [ရာဇအာဏာရှိသည့် အမှတ်လက္ခဏာ] သည် ယုဒထံမှ မရွေ့ရ။’ (ကမ္ဘာဦး ၄၉:၁၀) ထို့အပြင်၊ ဣသရေလလူမျိုးတို့၏ ဘေးမ စာရာနှင့်စပ်လျဉ်း၍ ယေဟောဝါ ဤသို့မိန့်တော်မူခဲ့သည်– “သူ၏အမျိုးအနွယ်၌လည်း အပြည်ပြည်သောရှင်ဘုရင် ဖြစ်ရကြလိမ့်မည်။” (ကမ္ဘာဦး ၁၇:၁၆) ထို့ကြောင့် ဟန္နသည် မင်းလောင်းတစ်ပါးအတွက် ဆုတောင်းနေခြင်းဖြစ်သည်။
၃:၃—ရှမွေလသည် အသန့်ရှင်းဆုံးဌာနထဲတွင် အမှန်တကယ် အိပ်ခဲ့သလော။ မအိပ်ပျော်ခဲ့ပါ။ ရှမွေလသည် ယဇ်ပုရောဟိတ်မဟုတ်သည့် ကောဟတ်အမျိုးအနွယ်မှ လေဝိသားတစ်ဦးဖြစ်သည်။ (၁ ရာဇဝင်ချုပ် ၆:၃၃-၃၈) သို့ဖြစ်၍ သူသည် ‘အထဲသို့ဝင်၍ သန့်ရှင်းသောအရာများကို ကြည့်’ ခွင့်မရှိပေ။ (တောလည်ရာ ၄:၁၇-၂၀၊ သမ္မာ) တဲတော်ရင်ပြင်ထဲတွင်သာ ရှမွေလ ဝင်ထွက်သွားလာခွင့်ရှိသည်။ ထိုနေရာတွင် သူအိပ်စက်ခဲ့ရပေမည်။ ဧလိသည်လည်း ရင်ပြင်အတွင်း တစ်နေရာရာတွင် အိပ်စက်ခဲ့ပုံရှိမည်။ “ဘုရားသခင်၏သေတ္တာတော်ရှိရာ” နေရာဟူသောအသုံးအနှုန်းက တဲတော်ဧရိယာကို ရည်ညွှန်းကြောင်း ထင်ရှား၏။
၇:၇-၉၊ ၁၇—ယဇ်ကောင်များကို ယေဟောဝါရွေးချယ်ထားသည့်နေရာ၌သာ ပုံမှန်ပူဇော်ရမည်ဖြစ်လျက်နှင့် ရှမွေလသည် မိဇပါမြို့တွင် မီးရှို့ရာယဇ်ကို ပူဇော်ခဲ့ခြင်း၊ ရာမမြို့တွင် ယဇ်ပလ္လင်ကို တည်ဆောက်ခဲ့ခြင်းတို့က အဘယ်ကြောင့်နည်း။ (တရားဟောရာ ၁၂:၄-၇၊ ၁၃၊ ၁၄; ယောရှု ၂၂:၁၉) မြင့်မြတ်သည့်သေတ္တာတော်ကို ရှိလောမြို့ရှိ တဲတော်မှ ပြောင်းရွှေ့ခဲ့ပြီးနောက်ပိုင်း ယေဟောဝါတည်ရှိမှုကို ထိုတွင် မတွေ့ရတော့ပေ။ ထို့ကြောင့် ဘုရားသခင်၏ကိုယ်စားလှယ်အနေနှင့် ရှမွေလသည် မိဇပါမြို့တွင် မီးရှို့ရာယဇ်ကိုပူဇော်ခဲ့ရခြင်း၊ ရာမမြို့၌လည်း ယဇ်ပလ္လင်တည်ဆောက်ခဲ့ရခြင်းဖြစ်သည်။ ယင်းလုပ်ရပ်များကို ယေဟောဝါနှစ်သက်လက်ခံကြောင်း ထင်ရှား၏။
ကျွန်ုပ်တို့အတွက် သင်ခန်းစာ–
၁:၁၁၊ ၁၂၊ ၂၁-၂၃; ၂:၁၉။ အမြဲဆုတောင်းတတ်သည့် ဟန္န၏သဘောထား၊ သူ၏နှိမ့်ချမှု၊ ယေဟောဝါ၏သနားကြင်နာမှုကို သူလေးမြတ်ခြင်းနှင့် မိခင်မေတ္တာကို သူအမြဲပြခဲ့ခြင်းတို့သည် ဘုရားသခင်အားကြောက်ရွံ့သူ အမျိုးသမီးတိုင်းအတွက် စံနမူနာဖြစ်သည်။
၁:၈။ အခြားသူများကို အားပေးစကားပြောဆိုရာတွင် ဧလကာနသည် အလွန်ကောင်းသော ပုံသက်သေပြခဲ့သည်! (ယောဘ ၁၆:၅) သူသည် စိတ်ဓာတ်ကျနေသည့် ဟန္နအား “အဘယ်ကြောင့် စိတ်ညှိုးငယ်သနည်း” ဟူ၍ အပြစ်တင်ဝေဖန်ခြင်းမရှိဘဲ ဦးဆုံးမေးမြန်းခဲ့သည်။ ယင်းကြောင့် ဟန္နသည် သူ၏ခံစားချက်များကို ဖွင့်ဟပြောဆိုလိုက်ခြင်းဖြစ်သည်။ ထို့နောက် ဧလကာနသည် သူ့အား “သားတစ်ကျိပ်ထက် သင်၌ငါသာ၍ကောင်းသည်မဟုတ်လော” ဟုပြောဆို၍ သူ့ကို မိမိမြတ်နိုးကြောင်း စိတ်ချစေခဲ့၏။
၂:၂၆; ၃:၅-၈၊ ၁၅၊ ၁၉။ ဘုရားသခင်အပ်နှင်းထားသည့်လုပ်ငန်းကို ဝီရိယရှိရှိ ဆောင်ရွက်ခြင်း၊ အခွင့်ကောင်းယူပြီး ဝိညာဉ်ရေးလေ့ကျင့်မှုခံယူခြင်း၊ ယဉ်ကျေး၍ ရိုသေသမှုပြုတတ်ခြင်းဖြင့် ကျွန်ုပ်တို့သည် ဘုရားသခင်ရှေ့၊ လူတို့ရှေ့ “မျက်နှာရ” သူများဖြစ်လာနိုင်ကြ၏။
၄:၃၊ ၄၊ ၁၀။ ပဋိညာဉ်သေတ္တာတော်တမျှ သန့်ရှင်းမြင့်မြတ်သည့် အရာဝတ္ထုတစ်ခုပင် အကာအကွယ်ပေးနိုင်သော အဆောင်လက်ဖွဲ့ မဖြစ်ခဲ့ပေ။ ကျွန်ုပ်တို့သည် ‘[အရုပ်] များမှ မိမိတို့ကိုယ်ကိုစောင့်ထိန်းကြ’ ရမည်။—၁ ယောဟန် ၅:၂၁၊ သမ္မာ။
ဣသရေလနိုင်ငံ၏ ဦးဆုံးရှင်ဘုရင်—အောင်မြင်သူလော၊ ရှုံးနိမ့်သူလော
ရှမွေလသည် သူ့ဘဝတစ်လျှောက်လုံး ယေဟောဝါအပေါ် တည်ကြည်သူဖြစ်သော်လည်း သူ၏သားများမှာမူ ဘုရားသခင့်လမ်းစဉ်အတိုင်း မလျှောက်လှမ်းခဲ့ကြချေ။ ဣသရေလအသက်ကြီးသူများက ရှင်ဘုရင်တစ်ပါး တောင်းဆိုသောအခါ ယေဟောဝါ ခွင့်ပြုသည်။ ထိုအခါ ရှမွေလသည် ယေဟောဝါ၏ညွှန်ကြားချက်ကို လိုက်နာကာ ရုပ်ရည်ချောမောသည့် ဗင်ယာမိန်အမျိုး ရှောလုကို ဘုရင်မြှောက်ရန် ဆီသွန်းလောင်းခဲ့သည်။ ရှောလုသည် အမ္မုန်လူမျိုးကို စစ်တိုက်၍နိုင်ခြင်းဖြင့် မိမိ၏ဘုရင်ရာထူးကို ပိုခိုင်ခံ့စေသည်။
ရှောလု၏ ရဲစွမ်းသတ္တိရှိသောသား ယောနသန်သည် ဖိလိတ္တိတပ်တစ်တပ်ကို အနိုင်ရ၏။ ထိုအခါ ဖိလိတ္တိလူတို့သည် ဧရာမစစ်တပ်ကြီးဖြင့် ဣသရေလလူမျိုးကို စစ်တိုက်ရန် ရောက်လာကြ၏။ ဤတွင် ရှောလုသည် ကြောက်လန့်ပြီး မီးရှို့ရာယဇ်ကို နာခံမှုကင်းမဲ့စွာ ကိုယ်တိုင်ပူဇော်လိုက်သည်။ ရဲစွမ်းသတ္တိရှိသော ယောနသန်မူ သူ၏လက်နက်ဆောင်လုလင်ကိုသာ ခေါ်သွားပြီး အခြားဖိလိတ္တိတပ်တစ်တပ်ကို တိုက်ခိုက်လေသည်။ သို့ရာတွင် ရှောလု၏ မဆင်မခြင်ပြုသည့် ကျိန်ဆိုမှုက အောင်နိုင်စွမ်းကို ပျော့ညံ့သွားစေသည်။ ရှောလုသည် ရန်သူအပေါင်းတို့ကိုစစ်တိုက်၍ စစ်ချီလေရာရာ၌ “အောင်လေ၏။” (၁ ဓမ္မရာဇဝင် ၁၄:၄၇) သို့သော် အာမလက်လူမျိုးကို အနိုင်ရပြီးနောက် ‘ရှင်းရှင်းဖျက်ဆီး’ ရမည့်အရာကို မဖျက်ဆီးခြင်းဖြင့် ယေဟောဝါ၏အမိန့်ကို သူမနာခံခဲ့ချေ။ (ဝတ်ပြုရာ ၂၇:၂၈၊ ၂၉) ယင်းကြောင့် ယေဟောဝါသည် ရှောလုအား ဘုရင်အဖြစ်မှ ပယ်လိုက်လေသည်။
ကျမ်းစာမေးခွန်းများ အဖြေ–
၉:၉—“ပရောဖက်ဟူ၍ ယခုခေါ်ဝေါ်သောသူကို ရှေးကာလ၌ မြင်သောသူ” ဟုသုံးနှုန်းခြင်းက အဘယ်အထူးအဓိပ္ပာယ်ရှိသနည်း။ ရှမွေလခေတ်နှင့် ဣသရေလဘုရင်များခေတ်အတွင်း ပရောဖက်များ ပိုပေါ်လွင်ထင်ရှားလာသည့်အခါ “ပရောဖက်” ဟူသော အသုံးအနှုန်းအစား “မြင်သောသူ” ဟူသည့်စကားလုံးကို အစားထိုးအသုံးပြုခဲ့ကြောင်း အဆိုပါစကားများက ဖော်ပြပုံရှိသည်။ ရှမွေလသည် ပရောဖက်မျိုးရိုးတွင် အဦးဆုံးဖြစ်သည်ဟု ယူမှတ်ကြ၏။—တမန်တော် ၃:၂၄။
၁၄:၂၄-၃၂၊ ၄၄၊ ၄၅—ယောနသန်သည် ရှောလု၏ကျိန်ဆိုချက်ကို ဖောက်ဖျက်၍ ပျားရည်စားသုံးမိသည့်အတွက် ဘုရားသခင့်မျက်နှာသာ ဆုံးရှုံးသလော။ ဤလုပ်ရပ်ကြောင့် ယောနသန်သည် ဘုရားသခင့်မျက်နှာသာ ဆုံးရှုံးသွားပုံမရပေ။ ဦးဆုံးအနေနှင့် ယောနသန်သည် ဖခင်ကျိန်ဆိုထားကြောင်းကို လုံးဝမသိရှိခဲ့ချေ။ ထို့အပြင် မှားယွင်းသောဇွဲနှင့်ဖြစ်စေ၊ မင်းအာဏာကို တလွဲရှုမြင်၍ဖြစ်စေ ပြုခဲ့သော ထိုကျိန်ဆိုချက်သည် လူတို့အတွက် အခက်အခဲဖြစ်ခဲ့၏။ ထိုသို့သောကျိန်ဆိုချက်မျိုးသည် ဘုရားသခင့်မျက်နှာသာနှင့် မည်သို့တွေ့နိုင်ပါမည်နည်း။ ယောနသန်သည် ထိုကျိန်ဆိုချက်ကိုချိုးဖောက်မိသည့်အတွက် အပြစ်ဒဏ်ခံဖို့ အသင့်ရှိသော်လည်း အသက်ဘေးနှင့်လွတ်ခဲ့သည်။
၁၅:၆—ကေနိအမျိုးသားတို့ကို ရှောလု အဘယ်ကြောင့် အထူးထောက်ထားစာနာခဲ့သနည်း။ ကေနိအမျိုးသားတို့သည် မောရှေယောက္ခမ၏ သားများဖြစ်ကြ၏။ သိနာတောင်မှ ဣသရေလလူမျိုး ထွက်ခွာချိန်တွင် သူတို့ကူညီပေးခဲ့ကြသည်။ (တောလည်ရာ ၁၀:၂၉-၃၂) ထို့အပြင် ကေနိအမျိုးသားတို့သည် ခါနာန်ပြည်တွင် ယုဒ၏သားများနှင့်အတူ အတန်ကြာ နေထိုင်ခဲ့သေး၏။ (တရားသူကြီး ၁:၁၆) နောက်ပိုင်းတွင် ကေနိအမျိုးသားတို့သည် အာမလက်လူမျိုးနှင့် အခြားလူမျိုးတို့ကြား ရောနှောနေထိုင်ခဲ့ကြသော်လည်း ဣသရေလလူတို့နှင့် ရင်းနှီးမှု ဆက်ရှိခဲ့ကြ၏။ ယင်းကြောင့် ရှောလုသည် ကေနိအမျိုးသားတို့ကို အသက်ချမ်းသာပေးခဲ့ရခြင်းဖြစ်သည်။
ကျွန်ုပ်တို့အတွက် သင်ခန်းစာ–
၉:၂၁; ၁၀:၂၂၊ ၂၇။ ရှောလု ရှင်ဘုရင်ဖြစ်ခါစတွင် သူ၏မင်းရိုက်ရာကို ‘အသုံးမကျသောသူ’ တချို့ လက်မခံကြသောအခါ သူ၌ရှိခဲ့သည့် ကျိုးနွံမှုနှင့် နှိမ့်ချမှုတို့က သူ့အား မိုက်မဲစွာမပြုမူမိစေရန် ကာကွယ်ပေးခဲ့သည်။ ထိုသို့သောစိတ်ထားသည် အဆင်အခြင်မဲ့သော လုပ်ရပ်များမှ အမှန်ပင် ကာကွယ်ပေးပါသည်!
၁၂:၂၀၊ ၂၁၊ သမ္မာ။ “အချည်းနှီးဖြစ်သောအရာများ” အစရှိသည့် လူကိုကိုးစားခြင်း၊ နိုင်ငံ့တိုက်ခိုက်အင်အားကို အားထားခြင်း၊ ရုပ်ပုံကိုးကွယ်ခြင်းတို့ကြောင့် ယေဟောဝါအားဝတ်ပြုခြင်းမှ သွေဖည်မသွားပါနှင့်။
၁၂:၂၄ [သမ္မာ]။ ယေဟောဝါအား ကြောက်ရွံ့ရိုသေသောစိတ် ဆက်ရှိနေစေရန်၊ ကိုယ်တော်ကို စိတ်နှလုံးအကြွင်းမဲ့ဝတ်ပြုနေရန် သော့ချက်မှာ ကိုယ်တော်၏လူမျိုးအတွက် ရှေးအချိန်နှင့် ယခုခေတ်တွင် “အဘယ်မျှလောက်ကြီးသော အမှုအရာပြုတော်မူသည်ကို ထောက်ရှု” ခြင်းဖြစ်သည်။
၁၃:၁၀-၁၄; ၁၅:၂၂-၂၅၊ ၃၀။ နာခံမှုမရှိသည့် လုပ်ရပ်များပြုခြင်း၊ မာနထောင်လွှားသောသဘောထား ပြခြင်းတို့ဖြင့် ရောင့်တက်မှုကို သတိပြုရှောင်ရှားပါလေ။—သု. ၁၁:၂။
မင်းရိုက်ရာခံယူရန် သိုးကျောင်းသားလေးကို ရွေးချယ်ခဲ့
ရှမွေလသည် ယုဒအနွယ်မှဖြစ်သူ ဒါဝိဒ်ကို မင်းလောင်းအဖြစ် ဆီသွန်းလောင်းခဲ့လေသည်။ ထိုသို့ပြုပြီး မကြာမီ ဒါဝိဒ်သည် ဖိလိတ္တိ လူ့ဘီလူးကြီး ဂေါလျတ်ကို လောက်စာလုံးလေးတစ်လုံးဖြင့် ပစ်သတ်လိုက်၏။ ထို့နောက် ဒါဝိဒ်နှင့် ယောနသန်တို့သည် အလွန်ရင်းနှီးချစ်ခင်လာကြ၏။ ရှောလုသည် ဒါဝိဒ်အား မိမိ၏စစ်သည်တို့ကို အုပ်ချုပ်စေသည်။ ဒါဝိဒ်သည် အောင်ပွဲများစွာခံခဲ့သည့်အတွက် ဣသရေလအမျိုးသမီးများက “ရှောလုအထောင်ထောင်၊ ဒါဝိဒ်အသောင်းသောင်း သတ်လေစွတကား” ဟုသီချင်းဆိုကြ၏။ (၁ ဓမ္မရာဇဝင် ၁၈:၇) ထိုအခါ ရှောလုသည် အလွန်အမင်းမနာလိုဖြစ်ပြီး ဒါဝိဒ်ကို သတ်ဖို့ ရှာကြံတော့သည်။ သုံးကြိမ်တိုင် ရှောလု၏ရန်မူခြင်းကိုခံရပြီးနောက် ဒါဝိဒ်သည် ထွက်ပြေးတိမ်းရှောင်နေရရာ ဝရမ်းပြေးဘဝရောက်သွားလေသည်။
ဒါဝိဒ် ဝရမ်းပြေးဘဝရောက်နေစဉ်အတွင်း ရှောလုကို နှစ်ကြိမ်တိုင်တိုင် အသက်ချမ်းသာပေးခဲ့၏။ နောက်ဆုံး လှပသော အဘိဂဲလနှင့် ဒါဝိဒ်တွေ့ဆုံကာ သူနှင့်ထိမ်းမြားလိုက်လေသည်။ ဖိလိတ္တိလူမျိုးသည် ဣသရေလလူမျိုးကို စစ်တိုက်ရန် ရောက်လာသောအခါ ယေဟောဝါအား ရှောလုစုံစမ်းမေးမြန်းလေသည်။ သို့သော် ယေဟောဝါသည် ရှောလုကို စွန့်ပစ်ထားလေပြီ။ ရှမွေလလည်း သေဆုံးသွားပြီဖြစ်သည်။ အလွန်ဗျာများနေသော ရှောလုသည် နတ်ဝင်သည်တစ်ဦးထံ စုံစမ်းမေးမြန်းလိုက်ရာ ဖိလိတ္တိလူတို့နှင့်စစ်တိုက်စဉ် သူအသတ်ခံရလိမ့်မည်ဟုသာ ကြားသိရ၏။ စစ်ဆင်နွှဲစဉ် ရှောလုသည် ဒဏ်ရာပြင်းထန်စွာရရှိကာ သူ၏သားများပါ အသတ်ခံရ၏။ ရှောလုသည် ရှုံးနိမ့်သူတစ်ဦးအဖြစ် သေဆုံးသွားခြင်းဖြင့် မှတ်တမ်းကို နိဂုံးချုပ်ထားသည်။ ဒါဝိဒ်ခမျာ ပုန်းရှောင်နေရဆဲပင်။
ကျမ်းစာမေးခွန်းများ အဖြေ–
၁၆:၁၄—အဘယ်ဝိညာဉ်ဆိုးက ရှောလုအား ခြိမ်းခြောက်ခဲ့သနည်း။ ရှောလု စိတ်မငြိမ်မသက်ဖြစ်ရခြင်းသည် သူ့ကိုအပြစ်ပြုရန် တိုက်တွန်းသည့် သူ၏အတွင်းရှိ ဆိုးသောဝိညာဉ် သို့မဟုတ် သူ၏စိတ်နှလုံးအကြံအစည်ဆိုးဖြစ်သည်။ ယေဟောဝါသည် မိမိ၏သန့်ရှင်းသောဝိညာဉ်တော်ကို ရုပ်သိမ်းလိုက်သောအခါ ယင်း၏ကာကွယ်စောင့်ရှောက်မှုကို ရှောလုမခံရတော့သဖြင့် မိမိ၏ဆိုးသောဝိညာဉ်၏ လွှမ်းမိုးမှုကို ခံရလေသည်။ ယေဟောဝါသည် မိမိ၏သန့်ရှင်းသောဝိညာဉ်တော်အစား ထိုဝိညာဉ်ကိုကိန်းအောင်းခွင့်ပြုလိုက်ရာ ဤဆိုးသောဝိညာဉ်ကို ‘ယေဟောဝါထံတော်မှ ဆိုးသောဝိညာဉ်’ ဟု ခေါ်နိုင်သည်။
၁၇:၅၅-၅၈—၁ ဓမ္မရာဇဝင် ၁၆:၁၇-၂၃ ကိုထောက်ရှု၍ ဒါဝိဒ်အား မည်သူ၏သားဖြစ်သနည်းဟု ရှောလုအဘယ်ကြောင့် မေးမြန်းခဲ့ရသနည်း။ ရှောလုသည် ဒါဝိဒ်ဖခင်၏အမည်ကို မေးရုံမေးခြင်းမဟုတ်ချေ။ သူသိကောင်းသိလိုနေမည်မှာ လူ့ဘီလူးကြီးကို သတ်ပစ်နိုင်သည့် အံ့သြရလောက်အောင် စွမ်းဆောင်မှုကိုပြုခဲ့သူ လူငယ်လေး၏ဖခင်သည် အဘယ်လူစားမျိုးနည်းဟူ၍ဖြစ်၏။
ကျွန်ုပ်တို့အတွက် သင်ခန်းစာ–
၁၆:၆၊ ၇။ အခြားသူတို့၏ အပြင်ပန်းအသွင်အပြင်ကို အထင်ကြီးမည့်အစား သို့မဟုတ် သူတို့ကို အဆောတလျင် အကဲဖြတ်ဝေဖန်မည့်အစား သူတို့ကို ယေဟောဝါရှုမြင်သကဲ့သို့ ရှုမြင်တတ်ဖို့ ကြိုးစားရမည်။
၁၇:၄၇-၅၀။ ‘ယေဟောဝါသည် စစ်မှုကိုပိုင်’ သောကြောင့် ကျွန်ုပ်တို့သည် ဂေါလျတ်ကဲ့သို့သော ရန်သူကြီးများ၏ ဆန့်ကျင်မှု သို့မဟုတ် နှိပ်စက်ညှဉ်းပန်းမှုတို့ကို ရဲရင့်စွာ ရင်ဆိုင်နိုင်ကြပါသည်။
၁၈:၁၊ ၃; ၂၀:၄၁၊ ၄၂။ ယေဟောဝါအား ချစ်မြတ်နိုးသူတို့တွင် မိတ်ဆွေစစ်မိတ်ဆွေမှန်များ တွေ့ရှိနိုင်သည်။
၂၁:၁၂၊ ၁၃။ ကျွန်ုပ်တို့၏ဘဝတွင် ခက်ခဲသောအခြေအနေများကို ရင်ဆိုင်ဖြေရှင်းရန် ကျွန်ုပ်တို့၏ဉာဏ်ရည်ဉာဏ်စွမ်းနှင့် အရည်အချင်းများကို အသုံးပြုဖို့ ယေဟောဝါ မျှော်လင့်တော်မူ၏။ ကိုယ်တော်သည် ကျွန်ုပ်တို့အား သမ္မာကျမ်းစာ ပေးအပ်ထားပြီဖြစ်ရာ ယင်းက ဉာဏ်အမြော်အမြင်၊ အသိပညာနှင့် တွေးခေါ်နိုင်စွမ်းတို့ကို ရရှိစေသည်။ (သု. ၁:၄) ထို့အပြင် ခန့်အပ်ခံ ခရစ်ယာန်အကြီးအကဲများ၏ အကူအညီကိုလည်း ကျွန်ုပ်တို့ရရှိထားကြ၏။
၂၄:၆; ၂၆:၁၁။ ယေဟောဝါ၏ဝိညာဉ်တော်ဖွားတို့အား အမှန်တကယ်ရိုသေလေးစားမှုပြသည့် စံနမူနာကောင်းကို ဒါဝိဒ် ပြသခဲ့သည်တကား!
၂၅:၂၃-၃၃။ အဘိဂဲလ၏ စဉ်းစားချင့်ချိန်တတ်မှုသည် စံနမူနာကောင်းပင်။
၂၈:၈-၁၉။ နာမ်ဝိညာဉ်ဆိုးများသည် လူတို့ကို ရန်မူရန် သို့မဟုတ် လှည့်ဖြားရန် ကြိုးစားကြရာတွင် လူသေများအဖြစ် ဟန်ဆောင်နိုင်၏။ နတ်ဆိုးအတတ်ပညာရှိရှိသမျှကို ကျွန်ုပ်တို့ ဝေးဝေးရှောင်ရမည်။—တရားဟောရာ ၁၈:၁၀-၁၂။
၃၀:၂၃၊ ၂၄။ တောလည်ရာ ၃၁:၂၇ အပေါ် အခြေပြုသည့် ဤဆုံးဖြတ်ချက်က အသင်းတော်တွင် အထောက်အကူပြုကဏ္ဍများ၌ ပါဝင်အမှုဆောင်နေကြသူတို့ကို ယေဟောဝါ တန်ဖိုးထားကြောင်း ဖော်ပြသည်။ ထို့ကြောင့် ကျွန်ုပ်တို့သည် အဘယ်အရာကိုပဲလုပ်ဆောင်နေပါစေ ‘လူ၏အမှုကိုသာ ဆောင်ရွက်သကဲ့သို့မဟုတ်။ ယေဟောဝါ၏အမှုတော်ကို ဆောင်ရွက်သကဲ့သို့၊ ပြုလေသမျှတို့၌ စိုးလ်အကြွင်းမဲ့နှင့် ပြုကြ’ ပါစို့။—ကောလောသဲ ၃:၂၃။
အဘယ်အရာသည် “ယဇ်ပူဇော်ခြင်းအမှုထက် သာ၍ကောင်း” သနည်း
ဧလိ၊ ရှမွေလ၊ ရှောလုနှင့် ဒါဝိဒ်တို့၏ အတွေ့အကြုံများက အဘယ်အခြေခံအမှန်တရားကို အလေးပေးဖော်ပြသနည်း။ ယင်းမှာ ဤသို့ဖြစ်၏– “နားထောင်ခြင်းသည် ယဇ်မျိုးထက်သာ၍ကောင်း၏။ လိုက်နာခြင်းသည် သိုးထီးဆီဥထက်သာ၍ကောင်း၏။ ပုန်ကန်ခြင်းသည် ပြုစားခြင်းကဲ့သို့လည်းကောင်း၊ စိတ်ခိုင်မာခြင်းသည် ရုပ် [ပုံ] ကိုးကွယ်ခြင်းအပြစ်ကဲ့သို့လည်းကောင်းဖြစ်၏။”—၁ ဓမ္မရာဇဝင် ၁၅:၂၂၊ ၂၃၊ သမ္မာ။
ကမ္ဘာချီထမ်းဆောင်နေသည့် ဘုရားသခင့်နိုင်ငံတော်သတင်း ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် ကျွန်ုပ်တို့ပါဝင်ရခြင်းက တကယ့်အခွင့်ထူးပါတကား! ကျွန်ုပ်တို့သည် “ကိုယ်နှုတ်ခမ်းတည်းဟူသော နွားသငယ်တို့ကို” ယေဟောဝါအား ပူဇော်ကြစဉ် သမ္မာကျမ်းစာနှင့် ကိုယ်တော်၏ မြေကြီးဆိုင်ရာအဖွဲ့အစည်းတို့မှတစ်ဆင့် ကိုယ်တော်ပေးထားသည့် လမ်းညွှန်ချက်ကို အတတ်နိုင်ဆုံး ကြိုးစားလိုက်နာကြရမည်။—ဟောရှေ ၁၄:၂; ဟေဗြဲ ၁၃:၁၅။
[အောက်ခြေမှတ်ချက်]
^ အပိုဒ်၊ 3 ဓမ္မရာဇဝင်ပထမစောင်တွင် ဖော်ပြထားသည့် နေရာဒေသအသီးသီး တည်နေရာများကိုသိရှိရန် ယေဟောဝါသက်သေများ ထုတ်ဝေထားသည့် “ကောင်းမွန်သောပြည်ကို ကြည့်လော့” ဘရိုရှာ၏ စာမျက်နှာ ၁၈-၁၉ တွင်ရှု။
[စာမျက်နှာ ၂၃ ပါ ရုပ်ပုံ]
ဣသရေလနိုင်ငံ၏ ပထမဦးဆုံးရှင်ဘုရင်သည် နှိမ့်ချ၍ ကျိုးနွံသော အုပ်စိုးရှင်တစ်ပါးအဖြစ်မှ မာနထောင်လွှား၍ ရောင့်တက်သည့် ပြည့်ရှင်မင်းအဖြစ်သို့ စိတ်ပြောင်းလဲသွားခဲ့
[စာမျက်နှာ ၂၄ ပါ ရုပ်ပုံ]
ဂေါလျတ်ကဲ့သို့သော ရန်သူကြီးများ၏ အတိုက်အခံကို ကျွန်ုပ်တို့ရင်ဆိုင်ကြရသည့်အခါ အဘယ်အရာကို ယုံကြည်စိတ်ချနိုင်သနည်း