မိမိအလိုသို့လိုက်၍ အသက်မရှင်

ဖွင့်ပါ

မိမိအလိုသို့လိုက်၍ အသက်မရှင်

‘အသက်ရှင်သောသူတို့သည် တစ်ဖန်ကိုယ်အလိုသို့လိုက်၍မရှင်မည်အကြောင်း [ခရစ်တော်သည်] သူတို့အတွက် အသေခံတော်မူ၏။’—၂ ကောရိန္သု ၅:၁၅။

၁၊ ၂။ အဘယ်ကျမ်းစာမိန့်မှာချက်က ယေရှု၏ပထမရာစုနောက်လိုက်များအား တစ်ကိုယ်ကောင်းစိတ်ကို ချိုးနှိမ်နိုင်စေသနည်း။

ယေရှု၏မြေကြီးအသက်တာ နောက်ဆုံးညဖြစ်သည်။ နာရီအနည်းငယ်အတွင်း ကိုယ်တော်သည် ယုံကြည်သူအပေါင်းအတွက် အသက်စွန့်ရတော့မည်။ ၎င်းညတွင် တည်ကြည်သောတမန်တော်များအား အရေးကြီးအရာများစွာကို ယေရှုမိန့်မှာခဲ့သည်။ ယင်းတို့တွင် ကိုယ်တော်၏နောက်လိုက်များအတွက် ထင်ရှားသောအမှတ်အသားဖြစ်မည့် အရည်အသွေးတစ်ခုအကြောင်း မိန့်မှာချက်တစ်ခုပါ၏။ ကိုယ်တော်က ဤသို့မိန့်ဆိုခဲ့သည်– “သင်တို့သည် အချင်းချင်း တစ်ယောက်ကိုတစ်ယောက် ချစ်ကြလော့။ ငါသည် သင်တို့ကို ချစ်သည်နည်းတူ အချင်းချင်းချစ်ကြလော့ဟု ပညတ်သစ်ကို ငါပေး၏။ သင်တို့သည် အချင်းချင်းချစ်ကြလျှင် လူအပေါင်းတို့သည် ထိုမေတ္တာကိုထောက်၍ သင်တို့သည် ငါ၏တပည့်ဖြစ်သည်ကို သိရကြလိမ့်မည်။”—ယောဟန် ၁၃:၃၄၊ ၃၅။

^၂ခရစ်ယာန်စစ်များသည် အချင်းချင်း ကိုယ်ကျိုးစွန့်မေတ္တာပြပြီး ကိုယ့်အကျိုးထက် ယုံကြည်သူချင်းများ၏အကျိုးကို ဦးစားထားကြရမည်။ သူတို့သည် “ကိုယ်အဆွေတို့အဖို့အလိုငှာ ကိုယ်အသက်ကိုစွန့်” ရန်ပင် မတွန့်ဆုတ်သင့်ပါ။ (ယောဟန် ၁၅:၁၃) ကနဦးခရစ်ယာန်များသည် ထိုပညတ်သစ်ကို မည်သို့တုံ့ပြန်ခဲ့ကြသနည်း။ ဒုတိယရာစုစာရေးဆရာ တာတူလျန်၏လက်ရာ တောင်းပန်ခြင်း စာအုပ်တွင် ခရစ်ယာန်များအကြောင်း တခြားသူများပြောဆိုသောစကားကို ဤသို့ဖော်ပြသည်– ‘ကြည့်စမ်း၊ အချင်းချင်း ချစ်လိုက်ကြတာ; အချင်းချင်းအတွက် အသေခံဖို့တောင် အသင့်ပဲ။’

၃၊ ၄။ (က) တစ်ကိုယ်ကောင်းစိတ်ကို အဘယ်ကြောင့်ဆီးတားသင့်သနည်း။ (ခ) ဤဆောင်းပါးတွင် အဘယ်အကြောင်းကို သုံးသပ်ကြမည်နည်း။

^၃ကျွန်ုပ်တို့လည်း “ထမ်းရွက်စရာဝန်ချင်းတို့ကို အချင်းချင်းကူညီ၍ ထမ်းရွက်သောအားဖြင့် ခရစ်တော်၏တရားကို ကျင့်ကြ” ရမည်။ (ဂလာတိ ၆:၂) သို့သော် ခရစ်တော်၏ပညတ်ကို နာခံပြီး ‘ဘုရားသခင် ယေဟောဝါကို စိတ်နှလုံးအကြွင်းမဲ့ ဉာဏ်ရှိသမျှနှင့် ချစ်၍ ကိုယ်နှင့်စပ်ဆိုင်သောသူကို ကိုယ်နှင့်အမျှချစ်’ ရန်အကြီးမားဆုံး အတားအဆီးတစ်ခုမှာ တစ်ကိုယ်ကောင်းစိတ်ပင်ဖြစ်၏။ (မဿဲ ၂၂:၃၇-၃၉) ကျွန်ုပ်တို့သည် မစုံလင်မှုကြောင့် တစ်ကိုယ်ကောင်းဆန်တတ်ကြသည်။ နေ့စဉ်ဘဝအသက်တာ၏ဖိစီးမှု၊ ကျောင်း သို့မဟုတ် အလုပ်ခွင်တွင် ပြိုင်ဆိုင်မှုနှင့် စားဝတ်နေရေးအတွက် လုံးပန်းမှုတို့ကြောင့် မွေးရာပါ ဤဉာဉ်ဆိုးသည် လွန်ကဲလာသည်။ ဤတစ်ကိုယ်ကောင်းဆန်သောစိတ် လျော့နည်းသွားခြင်းမရှိချေ။ တမန်တော်ပေါလုက ဤသို့သတိပေးခဲ့သည်– “နောက်ဆုံးကာလတွင် . . . လူတို့သည် အလွန်အမင်းတစ်ကိုယ်ကောင်းဆန်လာကြလိမ့်မည်။”—၂ တိမောသေ ၃:၁၊ ၂၊ ဖိလစ်။

^၄ယေရှုသည် မြေကြီးဓမ္မအမှုဆောင်ချိန် နောက်ဆုံးအချိန်ပိုင်းတွင် ကိုယ်တော်၏တပည့်များအား တစ်ကိုယ်ကောင်းစိတ်ကို ချိုးနှိမ်နိုင်စေမည့် အချက်သုံးချက် မိန့်ဆိုခဲ့သည်။ ၎င်းကား အဘယ်နည်း၊ ကိုယ်တော်၏မိန့်မှာချက်တို့ကို လိုက်နာခြင်းဖြင့် မည်သို့အကျိုးရနိုင်မည်နည်း။

စိတ်ချရသောအဖြေ

၅။ ယေရှုသည် ဂါလိလဲမြောက်ပိုင်းတွင် ဟောပြောနေစဉ် တပည့်များအား အဘယ်အရာဖွင့်ဆိုပြခဲ့သနည်း၊ ၎င်းသည် သူတို့ကို အဘယ်ကြောင့် တုန်လှုပ်သွားစေသနည်း။

^၅ယေရှုသည် ဂါလိလဲမြောက်ပိုင်းရှိ ကဲသရိ ဖိလိပ္ပိမြို့အနီးတွင် ဟောပြောနေတော်မူ၏။ သာယာချမ်းမြေ့ပြီး ရှုချင်စဖွယ် ဤနယ်မြေသည် မိမိအလိုကိုငြင်းပယ်ခြင်းထက် မိမိအလိုကိုလိုက်ရန် ပို၍သင့်တော်ပုံရ၏။ သို့သော် ထိုတွင်ရှိနေစဉ် ယေရှုက “ယေရုရှလင်မြို့သို့ သွားရမည်။ လူအကြီးအကဲ၊ ယဇ်ပုရောဟိတ်အကြီး၊ ကျမ်းပြုဆရာတို့လက်၌ များစွာခံရမည်။ အသေသတ်ခြင်းကိုလည်းခံရမည်။ သုံးရက်မြောက်သောနေ့၌ ထမြောက်လိမ့်မည်” ဟူသောအကြောင်းများကို တပည့်များအား ဖွင့်ဆိုလေသည်။ (မဿဲ ၁၆:၂၁) အဆိုပါဖွင့်ဆိုချက်ကြောင့် ယေရှု၏တပည့်များ တုန်လှုပ်ခဲ့ကြပေမည်၊ အကြောင်းမှာ ထိုအချိန်အထိ သူတို့က မိမိတို့ခေါင်းဆောင်သည် မြေကြီးပေါ်တွင် နိုင်ငံတော်တည်ထောင်လိမ့်မည်ဟု မျှော်လင့်ခဲ့ကြ၍ဖြစ်သည်။—လုကာ ၁၉:၁၁; တမန်တော် ၁:၆။

၆။ ယေရှုသည် ပေတရုကို အဘယ်ကြောင့် ပြင်းပြင်းထန်ထန် အပြစ်တင်ဆုံးမခဲ့သနည်း။

^၆ပေတရုသည် ချက်ချင်း “ယေရှုကို မိမိနှင့်အတူခေါ်၍ ‘ကိုယ့်ကိုယ်ကိုသနားပါ သခင်၊ ကိုယ်တော် ဤသို့လုံးဝမဖြစ်ရပါ၊ မိမိကိုယ်ကို မရက်စက်ပါနှင့်’” ဟု အပြစ်တင်ပြောဆိုခဲ့သည်။ ယေရှု မည်သို့တုံ့ပြန်ခဲ့သနည်း။ “အချင်းစာတန် ငါ့နောက်သို့ဆုတ်လော့။ အသင်သည် ငါတိုက်မိ၍ လဲစရာအကြောင်းဖြစ်၏။ အသင်သည် ဘုရားသခင်အကြံအစည်များကို မစဉ်းစား၊ လူသားတို့၏ အကြံအစည်များကိုသာ စဉ်းစားတတ်၏ဟုမိန့်တော်မူသည်။” ထိုသဘောထားနှစ်ခု ကွာခြားလိုက်လေခြင်း! ယေရှုသည် မိမိကို ဘုရားသခင်စေခိုင်းထားသည့် လအနည်းငယ်တွင် ညှဉ်းဆဲရာနှက်တိုင်တင် အသတ်ခံရတော့မည့် ကိုယ်ကျိုးစွန့်လမ်းစဉ်ကို စိတ်လိုကိုယ်လျောက် လက်ခံခဲ့သည်။ ပေတရုမှာမူ သက်သောင့်သက်သာနေရန် အကြံပြုသည်။ စိတ်ရင်းစေတနာဖြင့် သူက “ကိုယ့်ကိုယ်ကိုသနားပါ” ဟုဆိုခဲ့သည်မှာ သေချာ၏။ သို့သော် ထိုအချိန်တွင် ပေတရုသည် စာတန်၏လွှမ်းမိုးမှု ခံခဲ့ရသောကြောင့် သူ့ကို ယေရှု အပြစ်တင်ဆုံးမလေသည်။ ပေတရုသည် “ဘုရားသခင်အကြံအစည်များကို မစဉ်းစား၊ လူသားတို့၏အကြံအစည်ကို စဉ်းစားနေ၏။”—မဿဲ ၁၆:၂၂၊ ၂၃၊ ကဘ။

၇။ ယေရှုသည် မဿဲ ၁၆:၂၄ တွင်ပါသည့်အတိုင်း မိမိ၏နောက်လိုက်များ လိုက်လျှောက်ရန် အဘယ်လမ်းစဉ်ကို ဖော်ပြခဲ့သနည်း။

^၇ယေရှုအား ပေတရုပြောခဲ့သည့်စကားကို ယနေ့လည်း ကြားနေကြရသည်။ ‘မိမိကိုယ်ကို ညှာပါ၊’ ‘အလွယ်ကူဆုံးလမ်းစဉ်ကို လိုက်လျှောက်ပါ’ ဟူ၍ ဤလောက,က တိုက်တွန်းတတ်သည်။ ယေရှုမူ၊ လုံးဝခြားနားသောသဘောထားကို ဖော်ပြခဲ့၏။ ကိုယ်တော်က ‘ငါ၌ ဆည်းကပ်လိုသောသူဖြစ်လျှင် ကိုယ်ကိုကိုယ်ငြင်းပယ်ရမည်။ ညှဉ်းဆဲခံရာနှက်တိုင်ကိုထမ်း၍ ငါ့နောက်သို့ လိုက်နေရမည်’ ဟုတပည့်များအား မိန့်ဆိုခဲ့သည်။ (မဿဲ ၁၆:၂၄) သည်နယူးအင်တာပရက်တာဘိုင်ဘယ်လ်က ဤသို့ဖော်ပြသည်– “ဤစကားများသည် ပြင်ပလူတို့ကို တပည့်ဖြစ်စေရန် ဖိတ်ခေါ်နေခြင်းမဟုတ်ဘဲ ခရစ်တော်၏ဖိတ်ခေါ်ချက်ကို လက်ခံနှင့်ပြီးသားသူများအား တပည့်ဖြစ်ခြင်း၏အဓိပ္ပာယ်ကို ဆင်ခြင်သုံးသပ်စေခြင်းဖြစ်သည်။” ထိုကျမ်းချက်တွင် ယေရှု အကြမ်းဖျင်းဖော်ပြထားသော အချက်သုံးချက်ကို ယုံကြည်သူများ လိုက်လျှောက်ကြရမည်ဖြစ်၏။ အချက်တစ်ချက်ချင်းစီကို သီးခြားသုံးသပ်ကြည့်ကြစို့။

၈။ မိမိကိုယ်ကိုငြင်းပယ်ခြင်း အဓိပ္ပာယ်ကို ရှင်းပြပါ။

^၈ပထမဦးဆုံး၊ ကျွန်ုပ်တို့သည် မိမိကိုယ်ကိုငြင်းပယ်ရမည်။ “မိမိကိုယ်ကိုငြင်းပယ်” ရမည်ဟူသော ဂရိစကားလုံးသည် ကိုယ်ကျိုးရှာဆန္ဒ သို့မဟုတ် မိမိအဆင်ပြေရေးကို ငြင်းပယ်ရန် တလိုတလားရှိခြင်းကို ဖော်ပြသည်။ မိမိကိုယ်ကိုငြင်းပယ်ခြင်းဟူသည် ကျွန်ုပ်တို့၏ပျော်ရွှင်ဖွယ်ရာတချို့ကို တစ်ခါတစ်ရံသာ စွန့်လွှတ်ခြင်းမဟုတ်သကဲ့သို့ ထူးခြားစွာခြိုးခြံသူ သို့မဟုတ် မိမိကိုယ်ကို ဖျက်ဆီးသူဖြစ်၏ဟုလည်း မဆိုလိုချေ။ ကျွန်ုပ်တို့၏ဘဝတစ်ခုလုံးနှင့် ရှိသမျှအရာအားလုံးကို ယေဟောဝါအား စိတ်လိုကိုယ်လျောက် ပေးအပ်လိုက်ပြီဖြစ်ရာ “မိမိတို့ကို မိမိတို့မပိုင်” တော့ချေ။ (၁ ကောရိန္သု ၆:၁၉၊ ၂၀) သို့နှင့် ကျွန်ုပ်တို့၏အသက်တာတွင် မိမိကိုယ်ကို ဦးစားထားမည့်အစား ဘုရားသခင်အပေါ် အာရုံစိုက်လာကြသည်။ မိမိကိုယ်ကိုငြင်းပယ်ခြင်းဟူသည် ကျွန်ုပ်တို့၏မစုံလင်သောဆန္ဒများနှင့် ဆန့်ကျင်နေလျှင်ပင် ဘုရားသခင့်အလိုတော်ဆောင်ရန် စိတ်ပိုင်းဖြတ်ထားခြင်းကို ဆိုလိုသည်။ ကျွန်ုပ်တို့သည် ဘုရားသခင်ထံ ဆက်ကပ်ပြီး နှစ်ခြင်းခံသည့်အခါ ကိုယ်တော့်အား ကျွန်ုပ်တို့ကိုယ်ကို အကြွင်းမဲ့အပ်နှံကြောင်း ဖော်ပြကြသည်။ ထိုအခါမှစ၍ ကျွန်ုပ်တို့အသက်ရှင်နေသရွေ့ ဆက်ကပ်အပ်နှံထားသူများအဖြစ် အသက်ရှင်နေထိုင်ရန် ကြိုးစားကြသည်။

၉။ (က) ယေရှု ကမ္ဘာပေါ်ရှိစဉ်က ညှဉ်းဆဲရာနှက်တိုင်သည် အဘယ်အရာကို ပုံခိုင်းသနည်း။ (ခ) ကျွန်ုပ်တို့၏ညှဉ်းဆဲရာနှက်တိုင်ကို အဘယ်နည်းဖြင့် ထမ်းကြသနည်း။

^၉ဒုတိယအချက်မှာ ကျွန်ုပ်တို့၏ညှဉ်းဆဲရာနှက်တိုင်ကိုထမ်း ရမည်ဖြစ်သည်။ ပထမရာစုတွင် ညှဉ်းဆဲရာနှက်တိုင်သည် ဆင်းရဲဝေဒနာခံရခြင်း၊ အရှက်တကွဲအကျိုးနည်းခြင်းနှင့် သေခြင်းတို့ကို ပုံခိုင်း၏။ သာမန်အားဖြင့် ရာဇဝတ်သားများကိုသာ ညှဉ်းဆဲရာနှက်တိုင်ပေါ် ကွပ်မျက်သည် သို့မဟုတ် သူတို့၏ရုပ်အလောင်းများကို နှက်တိုင်ပေါ် ချိတ်ဆွဲလေ့ရှိသည်။ သို့ဖြစ်၍ ခရစ်ယာန်တစ်ဦးသည် ဤလောကနှင့်မပတ်သက်သောကြောင့် နှိပ်စက်ခြင်း၊ အထင်သေးခံရခြင်း သို့မဟုတ် သေခြင်းကိုပင် ရင်ဆိုင်ရန် အသင့်ရှိရမည်ဟု ဤအသုံးအနှုန်းဖြင့် ယေရှုဖော်ပြခြင်းဖြစ်သည်။ (ယောဟန် ၁၅:၁၈-၂၀) ကျွန်ုပ်တို့၏ခရစ်ယာန်စံနှုန်းများသည် ကျွန်ုပ်တို့ကို ဤလောကနှင့်သီးခြားဖြစ်စေရာ ကျွန်ုပ်တို့သည် “ကဲ့ရဲ့” ခံရကြပေမည်။ (၁ ပေတရု ၄:၄) ကျောင်း၌၊ အလုပ်ခွင်၌၊ သို့မဟုတ် မိသားစုအတွင်း၌ပင် ထိုသို့ဖြစ်နိုင်သည်။ (လုကာ ၉:၂၃) မည်သို့ပင်ဖြစ်ပါစေ၊ ကျွန်ုပ်တို့သည် မိမိအလိုအတိုင်း အသက်မရှင်ကြတော့သဖြင့် ဤလောက၏အထင်သေးခြင်းကို ခံလိုကြ၏။ ယေရှုက ဤသို့မိန့်ဆိုခဲ့သည်– “ငါ့ကြောင့် သင်တို့ကို ကဲ့ရဲ့ညှဉ်းဆဲ၍ မမှန်ဘဲလျက် အပြစ်တကာတင်ကြသောအခါ သင်တို့သည် မင်္ဂလာရှိကြ၏။ ဝမ်းမြောက်ရွှင်မြူးခြင်းရှိကြလော့။ အကြောင်းမူကား၊ ကောင်းကင်ဘုံ၌ သင်တို့၏အကျိုးသည် ကြီးလှပေ၏။” (မဿဲ ၅:၁၁၊ ၁၂) အမှန်ဆိုသော် ဘုရားသခင်၏မျက်နှာသာရရှိခြင်းသည် အရေးတကာ့အရေးကြီးဆုံးဖြစ်၏။

၁၀။ ယေရှု၏နောက်သို့ လိုက်နေခြင်းတွင် အဘယ်အရာပါဝင်သနည်း။

^၁၀တတိယအနေနှင့်၊ ကျွန်ုပ်တို့သည် ယေရှုခရစ်နောက် လိုက်နေကြရမည်ဟု ကိုယ်တော်မိန့်ဆိုခဲ့သည်။ ဒဗလျူ. အီး. ဗိုင်း၏ ဓမ္မသစ်ကျမ်းစကားလုံးများဆိုင်ရာ ရှင်းလင်းဖော်ပြချက်အဘိဓာန်အရ နောက်လိုက်ခြင်းဟူသည် “တစ်လမ်းတည်းသွားနေ” သည့် အဖော်တစ်ဦးဖြစ်ခြင်းဖြစ်သည်။ ယောဟန်ပထမစောင် ၂:၆ ကဤသို့ဆို၏– “ထိုသခင် [ဘုရားသခင်] ၌ငါတည်၏ဟုဆိုသောသူသည် ထိုသခင် [ယေရှု] ကျင့်တော်မူသည်နည်းတူ ကျင့်ရမည်။” ယေရှု မည်သို့လျှောက်လှမ်းခဲ့သနည်း။ ကောင်းကင်ခမည်းတော်နှင့် တပည့်များကိုချစ်သည့် ယေရှု၏မေတ္တာတော်သည် တစ်ကိုယ်ကောင်းစိတ်ရှိခွင့် မပြုချေ။ “ခရစ်တော်သည် ကိုယ်အလိုသို့မလိုက်” ဟူ၍ ပေါလုရေးသားခဲ့သည်။ (ရောမ ၁၅:၃) ယေရှုသည် မောပန်းဆာလောင်သည့်အချိန်၌ပင် မိမိလိုအပ်ရာတို့ထက် သူတစ်ပါး၏လိုအပ်ရာများကို ဦးစားပေးခဲ့သည်။ (မာကု ၆:၃၁-၃၄) ထို့ပြင် ဘုရားသခင့်နိုင်ငံတော်ဟောပြောခြင်းနှင့် သွန်သင်ခြင်းလုပ်ငန်းတွင်လည်း အားတက်သရော ကြိုးစားပါဝင်ခဲ့သည်။ ‘လူမျိုးတကာတို့ကို တပည့်ဖြစ်စေလျက် ယေရှုပေးသမျှသော ပညတ်တော်တို့ကို စောင့်ရှောက်စေခြင်းငှာ ဆုံးမကြ’ ပါဟူသော ကျွန်ုပ်တို့၏တာဝန်ကို ထက်သန်စွာ ထမ်းဆောင်သည့်အခါ ကိုယ်တော့်ကို တုပသင့်သည်မဟုတ်လော။ (မဿဲ ၂၈:၁၉၊ ၂၀) ယင်းတို့အားလုံးတွင် ခရစ်တော်သည် စံနမူနာထားခဲ့ရာ ကျွန်ုပ်တို့သည် ‘ကိုယ်တော်၏ခြေရာကို အနီးကပ်လိုက်လျှောက်’ ကြရမည်။—၁ ပေတရု ၂:၂၁။

၁၁။ မိမိကိုယ်ကိုငြင်းပယ်ပြီး ကိုယ်ညှဉ်းဆဲရာနှက်တိုင်ကိုထမ်းကာ ယေရှုခရစ်နောက်သို့ လိုက်နေရန် အဘယ်ကြောင့် အရေးကြီးသနည်း။

^၁၁မိမိကိုယ်ကိုငြင်းပယ်ပြီး ကျွန်ုပ်တို့၏ညှဉ်းဆဲရာနှက်တိုင်ကိုထမ်းကာ ကျွန်ုပ်တို့၏စံနမူနာရှင်နောက် လိုက်နေရန် အရေးကြီး၏။ ထိုသို့ပြုလုပ်ခြင်းအားဖြင့် ကိုယ်ကျိုးစွန့်မေတ္တာပြဖို့ အဟန့်အတားဖြစ်စေသည့် တစ်ကိုယ်ကောင်းစိတ်ကို ချေဖျက်ကြသည်။ ထို့ပြင် ယေရှုက ဤသို့မိန့်ဆို၏– “အကြင်သူသည် မိမိအသက်ကို ကယ်ဆယ်ခြင်းငှာ အလိုရှိ၏။ ထိုသူသည် အသက်ရှုံးလိမ့်မည်။ အကြင်သူသည် ငါ့ကြောင့် အသက်ရှုံး၏၊ ထိုသူသည် အသက်ကိုတွေ့လိမ့်မည်။ လူသည် ဤစကြဝဠာကို အကြွင်းမဲ့အစိုးရ၍ မိမိအသက်ဝိညာဉ်ရှုံးလျှင် အဘယ်ကျေးဇူးရှိသနည်း။ မိမိအသက်ဝိညာဉ်ကို အဘယ်ဥစ္စာနှင့် ရွေးနိုင်သနည်း။”—မဿဲ ၁၆:၂၅၊ ၂၆။

သခင်နှစ်ဦးအစေကို မခံနိုင်

၁၂၊ ၁၃။ (က) ယေရှု၏အကြံပြုချက်ကို တောင်းခံခဲ့သော လူငယ်အရာရှိသည် အဘယ်အရာကို စွဲလမ်းခဲ့သနည်း။ (ခ) ယေရှုသည် ထိုလူငယ်ကို မည်သို့ဆုံးမခဲ့သနည်း၊ အဘယ်ကြောင့်နည်း။

^၁၂ယေရှုသည် မိမိကိုယ်ကိုငြင်းပယ်ရမည်ဟူသော တပည့်များ၏လိုအပ်ချက်ကို အလေးအနက်ဖော်ပြပြီး လအနည်းငယ်အကြာတွင် သူကြွယ်လူငယ်အရာရှိတစ်ဦးသည် ကိုယ်တော်ထံ ချဉ်းကပ်၍ “ကောင်းမြတ်သောဆရာ၊ ထာဝရအသက်ကိုရအံ့သောငှာ အကျွန်ုပ်သည် အဘယ်ကောင်းမှုကို ပြုရပါမည်နည်း” ဟုမေးလျှောက်လေသည်။ ယေရှုက ထိုသူအား “ပညတ်တော်တို့ကို စောင့်ရှောက်လော့” ဟုမိန့်ဆိုပြီး ပညတ်အချို့ကို ရည်ညွှန်းပြခဲ့သည်။ ဤလူငယ်က “ထိုပညတ်ရှိသမျှတို့ကို အကျွန်ုပ်သည် . . . စောင့်ရှောက်ပါပြီ” ဟုလျှောက်လေသည်။ ထိုသူသည် ရိုးသားဖြောင့်မတ်ပြီး ပညတ်များကို အတတ်နိုင်ဆုံး လိုက်လျှောက်ခဲ့ပုံရ၏။ ထို့ကြောင့် သူက “အဘယ်အကျင့်လိုသေးသနည်း” ဟုလျှောက်ပြန်သည်။ ထိုအခါ ယေရှုက “သင်သည် စုံလင်ခြင်း [“ပြည့်ဝခြင်း၊” ခေတ်သစ်အမေရိကန်စံတင်သမ္မာကျမ်းစာ] သို့ရောက်လိုလျှင် သွားလော့။ ကိုယ်ဥစ္စာများကို ဆင်းရဲသောသူတို့အား ပေးလော့။ ထိုသို့ပြုလျှင် ကောင်းကင်ဘုံ၌ ဘဏ္ဍာကိုရလိမ့်မည်။ သို့ပြီးမှ ငါ့နောက်သို့လိုက်လော့” ဟုမိန့်ဆို၍ ထိုလူငယ်အား ဖိတ်ခေါ်လေ၏။—မဿဲ ၁၉:၁၆-၂၁။

^၁၃ဤလူငယ်သည် ယေဟောဝါ၏အမှုတော်ကို စိုးလ်အကြွင်းမဲ့ထမ်းဆောင်ရန် သူ၏အသက်တာတွင် အာရုံထွေပြားနေစေသည့် ဥစ္စာပစ္စည်းကို စွန့်လွှတ်ဖို့လိုကြောင်း ယေရှုသိမြင်တော်မူ၏။ ခရစ်တော်၏တပည့်စစ်တစ်ဦးသည် သခင်နှစ်ဦး၏အစေကို မခံနိုင်ချေ။ သူသည် ‘ဘုရားသခင်၏အစေကိုလည်းကောင်း၊ လောကစည်းစိမ်၏အစေကိုလည်းကောင်း မခံနိုင်’ ချေ။ (မဿဲ ၆:၂၄) ဝိညာဉ်ရေးရာများကို အာရုံစိုက်စေသည့် ‘ရိုးရှင်းသောမျက်လုံး’ ရှိဖို့လိုသည်။ (မဿဲ ၆:၂၂) မိမိဥစ္စာပစ္စည်းကို စွန့်၍ ဆင်းရဲသားများကို ပေးကမ်းခြင်းသည် ကိုယ်ကျိုးစွန့်လုပ်ရပ်တစ်ခုဖြစ်သည်။ အဆိုပါဥစ္စာပစ္စည်းများကိုစွန့်လျှင် အဖိုးမဖြတ်နိုင်သော ကောင်းကင်ဘဏ္ဍာ စုဆောင်းခွင့်ရမည်ဟု ဤလူငယ်အရာရှိကို ယေရှုကမ်းလှမ်းခဲ့သည်၊ ထိုဘဏ္ဍာမှာ ထာဝရအသက်နှင့်တကွ နောက်ဆုံးတွင် ကောင်းကင်၌ ခရစ်တော်နှင့်အတူ တွဲအုပ်ချုပ်ရမည့် မျှော်လင့်ချက်ဖြစ်သည်။ ထိုလူငယ်သည် မိမိကိုယ်ကိုငြင်းပယ်လိုစိတ်မရှိခဲ့ချေ။ “ထိုလုလင်သည် များစွာသောဥစ္စာကိုရတတ်သောသူဖြစ်၍ . . . စိတ်မသာသည်နှင့်သွားလေ၏။” (မဿဲ ၁၉:၂၂) သို့သော် ယေရှု၏တခြားနောက်လိုက်များမှာမူ၊ ယင်းနှင့်ခြားနားစွာ တုံ့ပြန်ခဲ့ကြသည်။

၁၄။ မိမိနောက်သို့လိုက်ရန် ယေရှု၏ဖိတ်ခေါ်ချက်ကို တံငါသည်လေးဦးသည် မည်သို့တုံ့ပြန်ခဲ့ကြသနည်း။

^၁၄လွန်ခဲ့သောနှစ်နှစ်ခန့်က တံငါသည်လေးဦးဖြစ်သော ပေတရု၊ အန္ဒြေ၊ ယာကုပ်နှင့် ယောဟန်တို့ကို ထိုနည်းတူ ယေရှုဖိတ်ခေါ်ခဲ့၏။ ထိုအချိန်တွင် သူတို့ထဲမှနှစ်ဦးသည် ငါးဖမ်းလျက်ရှိပြီး နောက်နှစ်ဦးမှာ ပိုက်ကွန်ပြင်လျက်ရှိကြသည်။ ယေရှုက သူတို့အား “ငါ့နောက်သို့လိုက်ကြလော့။ သင်တို့သည် လူကိုမျှားသော တံငါဖြစ်စေခြင်းငှာ ငါပြုမည်” ဟုမိန့်တော်မူ၏။ လေးဦးစလုံးသည် သူတို့၏တံငါလုပ်ငန်းကို လုံးဝစွန့်ပြီး သူတို့ အသက်ရှင်နေသရွေ့ ယေရှုနောက်သို့လိုက်ကြလေသည်။—မဿဲ ၄:၁၈-၂၂။

၁၅။ မျက်မှောက်ခေတ် ယေဟောဝါသက်သေတစ်ဦးသည် ယေရှုနောက်လိုက်ရန် မည်သို့ကိုယ်ကျိုးစွန့်ခဲ့သနည်း။

^၁၅ယနေ့ ခရစ်ယာန်များစွာသည် သူကြွယ်လူငယ်အရာရှိ၏ပုံသက်သေအစား တံငါသည်လေးဦး၏ပုံသက်သေကို တုပကြသည်။ သူတို့သည် ယေဟောဝါ၏အမှုတော်ကို ထမ်းဆောင်ရန် ဤလောက၏စီးပွားချမ်းသာနှင့် အခွင့်အရေးတို့ကို စွန့်ခဲ့ကြ၏။ ဒယ်ဘရာက ဤသို့ဆိုသည်– “ကျွန်မအသက် ၂၂ နှစ်မှာ အရေးကြီးတဲ့ဆုံးဖြတ်ချက်ချခဲ့ရတယ်။ ကျွန်မ ကျမ်းစာလေ့လာနေတာ ခြောက်လလောက်ရှိနေပြီ၊ ကျွန်မအသက်တာကို ယေဟောဝါထံ ဆက်ကပ်အပ်နှံချင်တယ်၊ ဒါပေမဲ့ ကျွန်မမိသားစုက အကြီးအကျယ် အတိုက်အခံလုပ်ကြတယ်။ သူတို့က သန်းကြွယ်သူဌေးတွေဆိုတော့ ကျွန်မက သက်သေခံတစ်ယောက်ဖြစ်လာရင် သူတို့အသိုင်းအဝိုင်းမှာ နာမည်ပျက်မယ်လို့ ထင်နေကြတယ်။ စည်းစိမ်ယစ်တဲ့ဘဝ၊ ဒါမှမဟုတ် အမှန်တရားကိုရွေးမလားလို့ ကျွန်မကို ၂၄ နာရီအချိန်ပေးပြီး ဆုံးဖြတ်ခိုင်းတယ်။ တကယ်လို့ ကျွန်မက သက်သေခံတွေနဲ့ အဆက်အသွယ်မဖြတ်ဘူးဆိုရင် မိသားစုက ကျွန်မကို အမွေဖြတ်မယ်တဲ့။ ဆုံးဖြတ်ချက်အမှန်ချဖို့ ယေဟောဝါ ကူညီပေးခဲ့ပြီး ဆုံးဖြတ်ချက်အတိုင်း လုပ်ဆောင်နိုင်ဖို့ ခွန်အားလည်းပေးတယ်။ အခုဆိုရင် အချိန်ပြည့်လုပ်ငန်းတော်မှာ ကျွန်မ ၄၂ နှစ်ပါဝင်ခဲ့ပြီ၊ အဲ့ဒီအတွက် စိတ်မကောင်းစရာ ဘာမှမရှိဘူး။ တစ်ကိုယ်ကောင်းဆန်ပြီး အပျော်အပါးဦးစားထားတဲ့ ဘဝပုံစံကို ကျွန်မစွန့်လိုက်တဲ့အတွက် ကျွန်မရဲ့အိမ်သားတွေခံစားနေကြရတဲ့ ဘဝအနှစ်သာရမရှိ၊ စိတ်မချမ်းမြေ့မှုကနေ လွတ်မြောက်ခဲ့တယ်။ ကျွန်မခင်ပွန်းနဲ့အတူ လူတစ်ရာကျော်ကို အမှန်တရားသိလာအောင် ကူညီပေးခဲ့တယ်။ ကျွန်မအတွက် ဒီဝိညာဉ်ရေးသားသမီးတွေက ဥစ္စာပစ္စည်းတွေထက် ပိုပြီးတန်ဖိုးရှိတယ်။” တခြားယေဟောဝါသက်သေ သန်းပေါင်းများစွာသည်လည်း သူ၏သဘောထားမျိုးရှိကြသည်။ အသင်ကော။

၁၆။ ကျွန်ုပ်တို့သည် မိမိအလိုအတိုင်း အသက်မရှင်လိုကြောင်း မည်သို့ပြသနိုင်ကြသနည်း။

^၁၆မိမိအလိုအတိုင်း အသက်မရှင်လိုသောဆန္ဒက ထောင်သောင်းချီသော ယေဟောဝါသက်သေတို့ကို ရှေ့ဆောင်များအဖြစ်၊ သို့မဟုတ် ဘုရားသခင့်နိုင်ငံတော် ကြွေးကြော်သူများအဖြစ် အချိန်ပြည့်အမှုဆောင်ရန် လှုံ့ဆော်ပေးခဲ့သည်။ အခြေအနေအမျိုးမျိုးကြောင့် အချိန်ပြည့်ဓမ္မအမှုတွင် မပါဝင်နိုင်သော တခြားသူများသည် ရှေ့ဆောင်စိတ်ဓာတ်ကို မွေးမြူပြီး ဘုရားသခင့်နိုင်ငံတော် ဟောပြောခြင်းလုပ်ငန်းကို အတတ်နိုင်ဆုံး ပံ့ပိုးပေးနေကြသည်။ မိဘများသည် သားသမီးများကို ဝိညာဉ်ရေးရာတွင်လေ့ကျင့်ပေးဖို့ မိမိတို့အချိန်ကိုပေး၍ ကိုယ့်စိတ်ဝင်စားရာများကို စွန့်လွှတ်ခြင်းဖြင့် အလားတူစိတ်ဓာတ်မျိုးပြကြသည်။ ကျွန်ုပ်တို့အားလုံးသည် မိမိတို့အသက်တာတွင် ဘုရားသခင့်နိုင်ငံတော်အကျိုးစီးပွားကို ရှေးဦးထားကြောင်း တစ်နည်းနည်းဖြင့် ပြသနိုင်ကြ၏။—မဿဲ ၆:၃၃။

မည်သူ၏မေတ္တာတော်သည် ကျွန်ုပ်တို့ကို အနိုင်အထက်သွေးဆောင်သနည်း

၁၇။ ကိုယ်ကျိုးစွန့်ရန် ကျွန်ုပ်တို့ကို အဘယ်အရာက လှုံ့ဆော်ပေးသနည်း။

^၁၇ကိုယ်ကျိုးစွန့်မေတ္တာ တင်ပြခြင်းသည် လိုက်လျှောက်ရမည့် အလွယ်ကူဆုံးလမ်းစဉ်မဟုတ်ချေ။ သို့သော် ကျွန်ုပ်တို့ကို အနိုင်အထက်သွေးဆောင်ရာကို သုံးသပ်ကြည့်ပါ။ ပေါလုက ဤသို့ရေးသားခဲ့သည်– “တစ်ယောက်သောသူသည် လူအပေါင်းတို့အတွက်ကြောင့် အသေခံသည်မှန်လျှင် . . . အသက်ရှင်သောသူတို့သည် တစ်ဖန်ကိုယ်အလိုသို့လိုက်၍မရှင်၊ သူတို့အတွက်ကြောင့် အသေခံပြီးမှ ထမြောက်တော်မူသောသူ၏အလိုသို့လိုက်၍ ရှင်စေမည်အကြောင်း၊ လူအပေါင်းတို့အတွက်ကြောင့် အသေခံတော်မူသည်ဟူ၍လည်းကောင်း ငါတို့သည် သဘောထားလျက် ခရစ်တော်၏ချစ်ခြင်းမေတ္တာတော်သည် ငါတို့ကို အနိုင်အထက်သွေးဆောင်၏။” (၂ ကောရိန္သု ၅:၁၄၊ ၁၅) ခရစ်တော်၏မေတ္တာတော်သည် မိမိအလိုအတိုင်း အသက်မရှင်ရန် ကျွန်ုပ်တို့ကို အနိုင်အထက်သွေးဆောင်သည်။ တန်ခိုးပါသောလှုံ့ဆော်မှုပါတကား! ကျွန်ုပ်တို့အတွက် ခရစ်တော် အသေခံခဲ့ရာ ကျွန်ုပ်တို့သည် ကိုယ်တော့်အတွက် အသက်ရှင်ရန် တာဝန်ရှိသည်ဟု ခံစားရသည်မဟုတ်ပေလော။ အမှန်မှာ၊ ကျွန်ုပ်တို့အား ဘုရားသခင်နှင့်ခရစ်တော်တို့ပြသခဲ့သည့် အလွန်နက်ရှိုင်းသောမေတ္တာကို ကျေးဇူးတင်စိတ်က ကျွန်ုပ်တို့၏ဘဝကို ဘုရားသခင်ထံ ဆက်ကပ်အပ်နှံပြီး ခရစ်တော်၏တပည့်များဖြစ်လာစေရန် အနိုင်အထက်သွေးဆောင်ခဲ့သည်။—ယောဟန် ၃:၁၆; ၁ ယောဟန် ၄:၁၀၊ ၁၁။

၁၈။ ကိုယ်ကျိုးစွန့်လမ်းစဉ်သည် အဘယ်ကြောင့် အကျိုးရှိသနည်း။

^၁၈မိမိအလိုအတိုင်း အသက်မရှင်ခြင်းသည် အကျိုးရှိသလော။ သူကြွယ်လူငယ်အရာရှိသည် ခရစ်တော်၏ဖိတ်ခေါ်ချက်ကို ငြင်းပယ်ကာ ထွက်သွားပြီးနောက် ပေတရုက ယေရှုအား “အကျွန်ုပ်တို့သည် ရှိသမျှကိုစွန့်ပစ်၍ ကိုယ်တော်နောက်သို့လိုက်ကြပါပြီ။ အဘယ်အကျိုးကိုရကြပါမည်နည်း” ဟုလျှောက်လေသည်။ (မဿဲ ၁၉:၂၇) ပေတရုနှင့် တခြားတမန်တော်များသည် မိမိကိုယ်ကို အမှန်တကယ်ငြင်းပယ်ခဲ့ကြသည်။ သူတို့သည် အဘယ်အကျိုးရရှိကြမည်နည်း။ ယေရှုက သူတို့သည် ကောင်းကင်တွင် မိမိနှင့်အတူ အုပ်စိုးခွင့်ရရှိမည့် အခွင့်ထူးအကြောင်း ပထမဦးစွာ မိန့်ဆိုခဲ့သည်။ (မဿဲ ၁၉:၂၈) တစ်ချိန်တည်းတွင် မိမိ၏နောက်လိုက်အားလုံး ခံစားရမည့် ကောင်းချီးများကို ယေရှု ဖော်ပြခဲ့သည်။ ကိုယ်တော် ဤသို့မိန့်ဆိုခဲ့သည်– ‘အကြင်သူသည် ငါ့ကြောင့်လည်းကောင်း၊ ဧဝံဂေလိတရားကြောင့်လည်းကောင်း အိမ်၊ လယ်၊ ညီအစ်ကို၊ နှမ၊ မိဘ၊ သားမယားတည်းဟူသော တစ်ပါးပါးကိုစွန့်၏။ ထိုသူသည် ယခုကာလ၌ အဆတစ်ရာသောအကျိုးကိုလည်းကောင်း၊ နောင်ဘဝ၌ ထာဝရအသက်ကိုလည်းကောင်း ရလတ္တံ့။’ (မာကု ၁၀:၂၉၊ ၃၀) ကျွန်ုပ်တို့ စွန့်လွှတ်လိုက်သည်တို့ထက် များစွာပြန်ရရှိကြ၏။ ကျွန်ုပ်တို့၏ဝိညာဉ်ရေးဖခင်များ၊ မိခင်များ၊ ညီအစ်ကိုများ၊ ညီအစ်မများနှင့် သားသမီးများတို့သည် ဘုရားသခင့်နိုင်ငံတော်အကျိုးအတွက် ကျွန်ုပ်တို့စွန့်လိုက်သော မည်သည့်အရာတို့ထက်မဆို သာ၍အဖိုးထိုက်တန်သည်မဟုတ်ပေလော။ အဘယ်သူသည် အကျိုးအများဆုံး ရရှိခဲ့သနည်း၊ ပေတရုလော၊ သူကြွယ်လူငယ်အရာရှိလော။

၁၉။ (က) စစ်မှန်သောပျော်ရွှင်မှုသည် အဘယ်အရာအပေါ် မူတည်သနည်း။ (ခ) နောက်ဆောင်းပါးတွင် အဘယ်အရာကို ဆွေးနွေးမည်နည်း။

^၁၉ပျော်ရွှင်မှုသည် တစ်ကိုယ်ကောင်းစိတ်မှမဟုတ်ဘဲ ပေးကမ်းစွန့်ကြဲပြီး အစေခံခြင်းမှ ဖြစ်ပေါ်လာကြောင်း ယေရှု၏အပြောနှင့် လုပ်ရပ်တို့က ဖော်ပြ၏။ (မဿဲ ၂၀:၂၈; တမန်တော် ၂၀:၃၅၊ ကဘ) မိမိအလိုအတိုင်း အသက်မရှင်ဘဲ ခရစ်တော်နောက် လိုက်နေသည့်အခါ ယခုဘဝတွင် ထူးကဲသောအားရကျေနပ်မှုရရှိပြီး အနာဂတ်တွင် ထာဝရအသက်ရဖို့ အလားအလာရှိ၏။ မိမိကိုယ်ကိုငြင်းပယ်သည့်အခါ ယေဟောဝါသည် ကျွန်ုပ်တို့၏အရှင်သခင်ဖြစ်လာလေသည်။ သို့နှင့် ကျွန်ုပ်တို့သည် ဘုရားသခင်၏ကျေးကျွန်များ ဖြစ်လာကြသည်။ ဤကျေးကျွန်ဘဝသည် အဘယ်ကြောင့် အကျိုးရှိသနည်း။ ကျွန်ုပ်တို့၏ဘဝတွင် ချခဲ့ရသောဆုံးဖြတ်ချက်များအပေါ် ယင်းသည် မည်သို့အကျိုးသက်ရောက်သနည်း။ ဤမေးခွန်းများကို နောက်ဆောင်းပါးတွင် ဆွေးနွေးပါလိမ့်မည်။

သင်မှတ်မိသလော

• ကျွန်ုပ်တို့၏တစ်ကိုယ်ကောင်းစိတ်ကို အဘယ်ကြောင့် တွန်းလှန်သင့်သနည်း။

• မိမိကိုယ်ကိုငြင်းပယ်ပြီး မိမိ၏ညှဉ်းဆဲရာနှက်တိုင်ကိုထမ်းကာ ယေရှုနောက်သို့ လိုက်နေခြင်းသည် အဘယ်အဓိပ္ပာယ်ရှိသနည်း။

• မိမိအလိုအတိုင်း အသက်မရှင်ရန် အဘယ်အရာက ကျွန်ုပ်တို့ကို လှုံ့ဆော်ပေးသနည်း။

• ကိုယ်ကျိုးစွန့်ဘဝဖြင့် အသက်ရှင်ခြင်းသည် အဘယ်ကြောင့် အကျိုးရှိသနည်း။

[လေ့လာရန်မေးခွန်းများ]

[စာမျက်နှာ ၁၁ ပါ ရုပ်ပုံ]

“ကိုယ့်ကိုယ်ကိုသနားပါ သခင်”

[စာမျက်နှာ ၁၃ ပါ ရုပ်ပုံ]

ယေရှုနောက်သို့လိုက်ရန် လူငယ်အရာရှိကို အဘယ်အရာက ဟန့်တားခဲ့သနည်း

[စာမျက်နှာ ၁၅ ပါ ရုပ်ပုံ]

မေတ္တာက ယေဟောဝါသက်သေများကို ထက်သန်သော ဘုရားသခင့်နိုင်ငံတော် ကြွေးကြော်သူများအဖြစ် အမှုဆောင်ရန် တွန်းအားပေး

ကင်းမျှော်စင်—လေ့လာရန် စာစောင်