ယေရှု၏ ကမ္ဘာချီသြဇာညောင်းမှု
ယေရှု၏ ကမ္ဘာချီသြဇာညောင်းမှု
“သီးသန့်ဖြစ်စေ၊ လူအများရှေ့ဖြစ်စေ ယေရှုမိန့်မြွက်ခဲ့ရာများဟု ခရစ်ဝင်ကျမ်းများ မှတ်တမ်းတင်ထားသမျှကို နှစ်နာရီအတွင်း ကိုယ်တော်ပြောဆိုနိုင်ခဲ့သည်။ သို့တိုင် ဤအနည်းငယ်မျှသောအကြောင်းသည် အလွန်စိတ်လှုပ်ရှားစရာ၊ အလွန်လှုံ့ဆော်မှုဖြစ်စေရာ၊ ထိုးထွင်းသိမြင်စေရာဖြစ်ခဲ့သဖြင့် မည်သူကမျှ ကမ္ဘာကို ဤမျှလောက် ဩဇာမညောင်းခဲ့ဖူးပါ” ဟု ကျမ်းစာဘာသာပြန်သူ အက်ဂါဂွတ်စပိက ပြောခဲ့သည်။
စီ.အီး. ၃၃ ခုနှစ်တွင် ယေရှုခရစ်၏မြေကြီးအမှုဆောင်လုပ်ငန်း ပြီးဆုံးသည့်အခါ ကိုယ်တော့်တပည့်များ၏အရေအတွက်မှာ အမျိုးသား၊ အမျိုးသမီး အနည်းဆုံး ၁၂၀ ခန့်ရှိသည်။ (တမန်တော် ၁:၁၅) ယနေ့ လူသန်းနှစ်ထောင်ကျော်သည် ခရစ်ယာန်အမည်ခံကြသည်။ ထိုထက်မက လူသန်းပေါင်းများစွာလည်း ယေရှုခရစ်အား ပရောဖက်တစ်ပါးအဖြစ် လက်ခံထားကြသည်။ ကိုယ်တော်၏သွန်သင်ချက်များသည် လူသားထုအပေါ် အမှန်ပင် အလွန်သြဇာညောင်းခဲ့သည်။
ယေရှု၏ကမ္ဘာချီသြဇာညောင်းမှုကို ခရစ်ယာန်မဟုတ်သူ ခေါင်းဆောင်များပင် အသိအမှတ်ပြုကြသည်။ ဥပမာ၊ ဂျူးကျမ်းပညာရှင် ဟိုင်မန်အီနီလိုက “ယေရှုသည် အကျော်ကြားဆုံးပုဂ္ဂိုလ်၊ အများဆုံးသင်ယူလေ့လာခံရသောပုဂ္ဂိုလ်၊ လူ့ဘာသာရေးသမိုင်းတွင် ဩဇာအညောင်းဆုံးပုဂ္ဂိုလ်ဖြစ်လာသည်” ဟုရေးသားခဲ့သည်။ အီနီလို ဤသို့ဖော်ပြသေး၏– “လူသားများအပေါ် ယေရှု၏သြဇာညောင်းမှုကို မည်သူမှန်းဆနိုင်မည်နည်း။ ကိုယ်တော်လှုံ့ဆော်ခဲ့သော မေတ္တာ၊ ပေးကမ်းခဲ့သော နှစ်သိမ့်မှု၊ ဖြစ်ပေါ်စေသော ကောင်းမြတ်ခြင်း၊ နှိုးဆွပေးခဲ့သော မျှော်လင့်ချက်နှင့် ပျော်ရွှင်မှုတို့သည် လူ့သမိုင်းတွင် တုနှိုင်းမမီနိုင်သောအရာများဖြစ်သည်။ လူသားမျိုးနွယ်ပြုလုပ်ခဲ့သော ကြီးမြတ်မှုနှင့် ကောင်းမြတ်မှုတို့တွင် လူသားတစ်ရပ်လုံး၏ ကြိုက်နှစ်သက်ရာဖြစ်ခြင်း၊ ဩဇာညောင်းမှုဖြစ်ခြင်းတို့၌ ယေရှုကို မည်သူကမျှ မမီချေ။ ကိုယ်တော်သည် သမိုင်းတွင် စိတ်ဝင်စားစရာအကောင်းဆုံးပုဂ္ဂိုလ်ဖြစ်လာသည်။” ဟိန္ဒူခေါင်းဆောင် မိုဟမ်းဒတ်စ် ကေ. ဂန္ဒီက ဤသို့ပြောသည်– “လူသားထုအတွက် ယေရှုလောက် ပြုလုပ်ဆောင်ရွက်ပေးနိုင်သူ မည်သူ့ကိုမျှ အကျွန်ုပ်မသိပါ။ အမှန်မှာ ခရစ်ယာန်ဘာသာသည် အလွန်ကောင်း၏။” သို့သော် သူဆက်ပြောသည်မှာ– “ပြဿနာက အသင်တို့ခရစ်ယာန်များဖြစ်၏။ သင်တို့ကိုယ်တိုင်၏ သွန်သင်ချက်များနှင့်အညီ သင်တို့မနေထိုင်ကြ” ဟူ၍ဖြစ်၏။
အမည်ခံခရစ်ယာန်များသည် ယေရှု၏သွန်သင်ချက်များနှင့်အညီ မနေထိုင်ကြသည်မှာ နှစ်ချီကြာခဲ့ပြီ။ “ချာ့ခ်ျအတွင်းအကျင့်လျော့ရဲမှု ဖြည်းဖြည်းနှင့် မှန်မှန်တိုးများလာလျက်ရှိသည်ကို အေ.ဒီ. ၁၄၀ ကတည်းက ခရစ်ယာန်ခေါင်းဆောင်များ အာရုံစိုက်ခဲ့ကြပြီ” ဟု ခရစ်ယာန်ဘာသာသမိုင်းပညာရှင် စီစဲလ်ဂျွန်ကာဒူက ပြောခဲ့သည်။ “အစောပိုင်းရှိ ကျင့်ဝတ်စည်းကမ်းတင်းကျပ်မှု လျော့ရဲသွားခြင်းက လောကလမ်းစဉ်နှင့်ကိုက်ညီမှုဖြစ်စဉ် ပေါ်လာစေသည်” ဟု သူပြောဆိုခဲ့၏။
ရောမဧကရာဇ်ကွန်စတင်တိုင်းသည် ခရစ်ယာန်ဘာသာဝင်ဖြစ်လာချိန် စတုတ္ထရာစုတွင် ဤဖြစ်စဉ် အရှိန်ရလာခဲ့သည်။ ကွန်စတင်တိုင်းနှင့် မဟာမိတ်ဖွဲ့ခြင်းဖြင့် ချာ့ခ်ျကျူးလွန်ခဲ့သော အရှက်ရစရာများစွာကို သမိုင်းပညာရှင်များ သတိပြုမိပြီး ယူကျုံးမရဖြစ်နေကြ၏။ ထိုအချိန်ကတည်းက ရာစုနှစ်များတစ်လျှောက် အမည်ခံခရစ်ယာန်များသည် ခရစ်တော်၏နာမကို ရှုတ်ချဖွယ်ဖြစ်စေသောအမူအကျင့်များစွာ ပြုမူခဲ့ကြပြီ။
သို့ဖြစ်၍ သုံးသပ်ရမည့်မေးခွန်းများမှာ ယေရှု အမှန်သွန်သင်ခဲ့ရာကား အဘယ်နည်း။ ကိုယ်တော်၏သွန်သင်ချက်များသည် ကျွန်ုပ်တို့အပေါ် အဘယ်အကျိုးသက်ရောက်သင့်သနည်းဟူ၍ဖြစ်၏။
[စာမျက်နှာ ၃ ပါ ရုပ်ပုံ]
“လူသားထုအတွက် ယေရှုလောက် ပြုလုပ်ဆောင်ရွက်ပေးနိုင်သူ မည်သူ့ကိုမျှ အကျွန်ုပ်မသိ။”—မိုဟမ်းဒတ်စ် ကေ. ဂန္ဒီ
[စာမျက်နှာ ၃ ပါ ရုပ်ပုံ]
“မည်သူကမျှ ကမ္ဘာကို ဤမျှလောက် ဩဇာမညောင်းခဲ့ဖူးပါ။”—အက်ဂါ ဂွတ်စပိ
[Credit Line]
Culver Pictures