ယေဟောဝါအားချီးမွမ်းသည့် လူငယ်များ မိမိတို့၏ဘဝကို ကြွယ်ဝစေ
‘ကူညီမစမှုကို ယေဟောဝါထံတော်မှ ငါရ၏’
ယေဟောဝါအားချီးမွမ်းသည့် လူငယ်များ မိမိတို့၏ဘဝကို ကြွယ်ဝစေ
“ဘဝမှာ အကောင်းဆုံးကိုပဲ ရချင်တယ်!” ဆယ်ကျော်သက်လူငယ်တစ်ဦးက မိမိ၏မျှော်လင့်ချက်ကို ထိုသို့ဖော်ပြ၏။ သို့သော် လူငယ်တစ်ဦးသည် ဘဝတွင် အကောင်းဆုံးအရာကို မည်သို့ရရှိနိုင်မည်နည်း။ သမ္မာကျမ်းစာက ဤသို့ ရှင်းလင်းပြတ်သားစွာဖြေဆို၏– “အသက်ပျိုစဉ်အခါပင် သင့်ကို ဖန်ဆင်းတော်မူသောအရှင်ကို အောက်မေ့လော့!”—ဒေ. ၁၂:၁။
ယေဟောဝါအား ချီးမွမ်းခြင်း၊ ကိုယ်တော်၏အမှုတော်ဆောင်ခြင်းသည် လူကြီးများအတွက်သာ မဟုတ်ပါ။ ဧလကာနနှင့်ဟန္နတို့၏သား ရှမွေလသည် တဲတော်၌ ယေဟောဝါ၏အမှုဆောင်ချိန်တွင် အလွန်ငယ်ရွယ်သေးသည်။ (၁ ဓမ္မရာဇဝင် ၁:၁၉၊ ၂၀၊ ၂၄; ၂:၁၁) ပျိုရွယ်သော ဟေဗြဲမိန်းမငယ်သည် ရှုရိဗိုလ်ချုပ်နေမန်အား နူနာရောဂါပျောက်ကင်းနိုင်ဖို့ ပရောဖက်ဧလိရှဲထံသွားရန် ပြောခဲ့ချိန်တွင် ယေဟောဝါကို အကြွင်းမဲ့ယုံကြည်ကိုးစားကြောင်း တင်ပြခဲ့သည်။ (၄ ဓမ္မရာဇဝင် ၅:၂၊ ၃) ဆာလံ ၁၄၈:၇၊ ၁၂ တွင် လူပျိုနှင့်အပျိုတို့ ယေဟောဝါအားချီးမွမ်းကြဟု မိန့်မှာထားသည်။ * ယေရှုသည် အသက် ၁၂ နှစ်အရွယ်သာရှိချိန်တွင် ခမည်းတော်၏အမှုဆောင်ရန် အလွန်စိတ်ဝင်စားခဲ့သည်။ (လုကာ ၂:၄၁-၄၉) ဗိမာန်တော်၌ ယေရှုကိုတွေ့ မြင်ခဲ့သော ကလေးတချို့က ကျမ်းစာ၏လေ့ကျင့်သွန်သင်မှုကြောင့် “ဒါဝိဒ်၏သားတော်အား ဟောရှဏ္ဏဖြစ်စေသတည်း!” ဟု ကြွေးကြော်ခဲ့ကြသည်။—မဿဲ ၂၁:၁၅၊ ၁၆။
ယနေ့ ယေဟောဝါအားချီးမွမ်းခြင်း
ယနေ့ ယေဟောဝါသက်သေ လူငယ်လူရွယ်များစွာသည် မိမိတို့၏ယုံကြည်ချက်များကို ဂုဏ်ယူကြပြီး ကျောင်းနှင့် အခြားနေရာများတွင် ယင်းတို့အကြောင်း အခြားသူများအား ရဲရင့်စွာထုတ်ဖော်ပြောဆိုကြသည်။ ပုံနမူနာနှစ်ခုကို သုံးသပ်ကြည့်ပါ။
ဗြိတိန်နိုင်ငံတွင် ၁၈ နှစ်အရွယ် စတက်ဖနီ၏အတန်းတွင် ကိုယ်ဝန်ဖျက်ချခြင်းအပြင် အခြားလူ့ကျင့်ဝတ်နှင့်ဆိုင်သော အကြောင်းအရာများကို ဆွေးနွေးနေကြသည်။ ကိုယ်ဝန်ဖျက်ချခြင်းသည် သမားရိုးကျကိစ္စဖြစ်နေရာ မည်သည့်မိန်းကလေးမဆို ထိုအမူအကျင့်ကို ငြင်းဆန်စရာအကြောင်းမရှိဟု ဆရာက အခိုင်အမာပြောလိုက်သည်။ အတန်းသားအားလုံးက ဤရှုမြင်ချက်ကို ထောက်ခံကြသည့်အခါ စတက်ဖနီသည် မိမိ၏ ကျမ်းစာအခြေပြုရှုမြင်ချက်ကို ထုတ်ဖော်ပြောဆိုဖို့လိုသည်ဟု ခံစားရသည်။ ဆရာက စတက်ဖနီ၏ရှုမြင်ပုံကို မေးမြန်းလိုက်သည့်အခါ ထိုသို့ပြုရန် အခွင့်ရသွားသည်။ စတက်ဖနီသည် အစပိုင်းတွင်ခပ်လန့်လန့်ဖြစ်နေသော်လည်း ကျမ်းစာရှုမြင်ပုံကို တင်ပြပြောဆိုရန် အခွင့်ကောင်းယူခဲ့သည်။ ထွက်မြောက်ရာ ၂၁:၂၂-၂၄ အရ မမွေးသေးသောကလေးကို မတော်တဆပျက်သွားစေခြင်းပင် အပြစ်ရှိလျှင် ကိုယ်ဝန်ဖျက်ချခြင်းသည် ဘုရားသခင်အလိုတော်နှင့် လုံးလုံးဆန့်ကျင်မည်ဖြစ်ကြောင်းသူရှင်းပြခဲ့၏။
[ခရစ်ယာန်]ဘာသာရေးခေါင်းဆောင်တစ်ဦးဖြစ်သူ ထိုဆရာသည် ဤကျမ်းပိုဒ်ကို တစ်ခါမျှမဖတ်ဖူးခဲ့ပါ။ စတက်ဖနီသည် ဤသို့ရဲရင့်စွာသက်သေခံခဲ့သဖြင့် မိမိ၏အတန်းဖော်များနှင့် အကြောင်းအရာအမျိုးမျိုးကို စိတ်ဝင်တစားဆွေးနွေးခွင့်ရခဲ့သည်။ ယခု၊ မိန်းကလေးတစ်ဦးသည် နောက်ဆုံးထုတ် ကင်းမျှော်စင်နှင့် နိုးလော့!စာစောင်များကို မှန်မှန်လက်ခံယူနေပြီး အခြားမိန်းကလေးနှစ်ဦးမှာ ဘုရားသခင့်ထံ စတက်ဖနီ ဆက်အပ်နှံနှစ်ခြင်းခံသည်ကိုတွေ့ ရှိရန် ခရိုင်စည်းဝေးကြီး တက်ရောက်ခဲ့ကြသည်။
တောင်အမေရိက၊ စူရီနမ်နိုင်ငံတွင်နေထိုင်သူ ၆ နှစ်သမီး ဗာရီတာသည် မိမိ၏ဆရာမကို ကျမ်းစာမှ နှစ်သိမ့်ပေးခွင့်ရချိန်တွင် ယေဟောဝါအား ချီးမွမ်းခဲ့သည်။ ဆရာမသည် သုံးရက်ကျောင်းပျက်ပြီးနောက် ကျောင်းပြန်တက်လာသောအခါ မိမိ အဘယ့်ကြောင့်ကျောင်းပျက်ရသည်ကို တပည့်များသိ၊ မသိ မေးမြန်းလိုက်သည်။ “ဆရာမ ဖျားနေလို့ပေါ့” ဟု တပည့်များ ပြန်ဖြေကြသည့်အခါ “မဟုတ်ဘူး၊ ဆရာမရဲ့အစ်မ ဆုံးသွားလို့ အရမ်းဝမ်းနည်းနေတယ်၊ ဒါကြောင့် မင်းတို့မဆူကြပါနဲ့” ဟု ပြောလိုက်၏။
ထိုနေ့ မွန်းလွဲပိုင်းတွင် မိခင်ဖြစ်သူ တစ်ရေးအိပ်နေစဉ် ဗာရီတာသည် မဂ္ဂဇင်းအဟောင်းများကို လှန်လှောရှာဖွေပြီး ခေါင်းစဉ်များကို ဖတ်ကြည့်နေသည်။ “နောင်ဘဝရှိပါသလော” ခေါင်းစဉ်ပါရှိသော ၂၀၀၁၊ ဇူလိုင် ၁၅ ရက်ထုတ် ကင်းမျှော်စင်ကို သူတွေ့သွားသည်။ ဝမ်းသာအားရနှင့် မိခင်ကိုနှိုးကာ “အမေ၊ အမေ ကြည့်ပါဦး! ဆရာမအတွက် သေခြင်းအကြောင်းမဂ္ဂဇင်းတစ်အုပ် ရှာတွေ့တယ်” ဟုသူပြောလိုက်သည်။ ဗာရီတာသည် စာတစ်စောင်ရေးကာ ထိုမဂ္ဂဇင်းနှင့်အတူ ဆရာမထံ ပို့လိုက်သည်။ သူဤသို့ရေးခဲ့သည်– “ဒီမဂ္ဂဇင်းက ဆရာမအတွက်ပါ။ ယေဟောဝါဟာ ဘယ်တော့မှ မလိမ်ညာတတ်တဲ့အတွက် ပရဒိသုမှာ ဆရာမရဲ့အစ်မကို တကယ်ပြန်တွေ့ရမယ်။ ကောင်းကင်မှာမဟုတ်ဘဲ မြေကြီးပေါ်မှာ ပရဒိသုဖြစ်စေမယ်လို့ ကိုယ်တော် ကတိပေးထားတယ်။” ဆရာမသည် ထိုဆောင်းပါးများမှရသော ကျမ်းစာအခြေပြုနှစ်သိမ့်မှုအတွက် အလွန်ကျေးဇူးတင်ကြောင်း ပြောခဲ့သည်။
နောင်ရေးအတွက် တည်ဆောက်ခြင်း
ယေဟောဝါသည် “ပျော်ရွှင်သောဘုရားသခင်” ဖြစ်တော်မူပြီး လူငယ်များကို ပျော်ရွှင်စေလို၏။ (၁ တိမောသေ ၁:၁၁၊ ကဘ) ကိုယ်တော်၏နှုတ်မြွက်စကားတော်ကိုယ်နှိုက်က ဤသို့ဆိုသည်– “အသက်ပျိုသောအခါ ပျော်မွေ့လော့။ အသက်ပျိုစဉ်ကာလတွင် စိတ်ရွှင်လန်းခြင်းရှိလော့။” (ဒေ. ၁၁:၉) ယေဟောဝါသည် အမူအကျင့်အကောင်းအဆိုးတို့၏ တဒင်္ဂအကျိုးထက်မက ရေရှည်အကျိုးဆက်ကိုပါ တွေ့ မြင်တော်မူသည်။ ထို့ကြောင့် ကိုယ်တော့်နှုတ်မြွက်တော်က ဤသို့တိုက်တွန်းထား၏– “ငါနေ၍မပျော်နိုင်ဟု ဆိုရသောကာလသည်မနီး၊ ဆိုးသောကာလမရောက်မီ ယခုအသက်ပျိုစဉ်အခါပင် သင့်ကို ဖန်ဆင်းတော်မူသောအရှင်ကို အောက်မေ့လော့။”—ဒေ. ၁၂:၁။
ယေဟောဝါသည် လူငယ်များကို အဖိုးထိုက်လှသည့်အသက်တာမှ အပြည့်အဝအကျိုးခံစားစေလိုတော်မူသည်။ ယေဟောဝါအား အောက်မေ့သတိရကာ ချီးမွမ်းခြင်းဖြင့် အဓိပ္ပာယ်ပြည့်ဝပြီး အကျိုးဖြစ်ထွန်းသည့်အသက်တာကို လူငယ်များ ပိုင်ဆိုင်နိုင်ကြသည်။ အခက်အခဲများကြုံရချိန်တွင်ပင် သူတို့သည် ယုံကြည်စိတ်ချစွာဖြင့် ဤသို့ပြောဆိုနိုင်ကြသည်– ‘ကူညီမစမှုကို ယေဟောဝါထံတော်မှ ငါရ၏။’—ဆာလံ ၁၂၁:၂၊ ကဘ။
[အောက်ခြေမှတ်ချက်]
^ အပိုဒ်၊ 4 ယေဟောဝါသက်သေများ၏ ၂၀၀၅ ပြက္ခဒိန် မတ်/ဧပြီ ကိုရှု။
[စာမျက်နှာ ၉ ပါ အကျဉ်းဖော်ပြချက်]
‘မြေကြီး၌ရှိသော . . . လူပျိုနှင့် အပျိုများ၊ . . . ထာဝရဘုရားသခင်ကို ချီးမွမ်းကြလော့။’—ဆာလံ ၁၄၈:၇၊ ၁၂
[စာမျက်နှာ ၈ ပါ လေးထောင့်ကွက်]
လူငယ်များကို ယေဟောဝါရှင် ထောက်မကူညီ
‘အရှင်ထာဝရဘုရားသခင်၊ ကိုယ်တော်သည် အကျွန်ုပ်မျှော်လင့်ရာဖြစ်တော်မူ၏။ အကျွန်ုပ်ငယ်သောအရွယ်မှစ၍ အကျွန်ုပ်ကိုးစားရာဖြစ်တော်မူ၏။’—ဆာလံ ၇၁:၅။
‘ဘုရားသခင်သည် ကောင်းသောအရာများနှင့် သင့်အလိုကိုပြည့်စုံစေတော်မူသဖြင့် သင်၏ပျိုရွယ်စဉ်အနေသည် ရွှေလင်းတ၏အနေကဲ့သို့ အသစ်ပြုပြင်ခြင်းရှိ၏။’—ဆာလံ ၁၀၃:၅၊ သမ္မာ။