ကျွန်ုပ်တို့၏သားသမီးများ—အဖိုးတန်အမွေဥစ္စာ

ဖွင့်ပါ

ကျွန်ုပ်တို့၏သားသမီးများ—အဖိုးတန်အမွေဥစ္စာ

‘ဖွားမြင်သောသားသမီးတို့သည် ထာဝရဘုရားသခင်ဆုချ၍ ပေးသနားတော်မူသော အမွေဥစ္စာဖြစ်ကြ၏။’—ဆာလံ ၁၂၇:၃။

၁။ ပထမဦးဆုံး လူသူငယ်လေး မည်သို့မွေးဖွားလာခဲ့သနည်း။

ပထမလူသားမောင်နှံကို ဖန်ဆင်းပုံအားဖြင့် ယေဟောဝါဘုရားသခင်ဖြစ်ပေါ်စေခဲ့သော အံ့ဖွယ်ဖြစ်ရပ်များကို သုံးသပ်ကြည့်ပါ။ ဧဝ၏သားအိမ်ထဲတွင် အင်္ဂါစုံလင်သော လူသစ်တစ်ဦးဖြစ်သော ပထမဦးဆုံးလူသူငယ်လေး ကြီးထွားဖွံ့ဖြိုးလာစေဖို့ ဖခင်အာဒံနှင့် မိခင်ဧဝတို့ နှစ်ဦးစလုံးသည် မိမိတို့ကိုယ်ခန္ဓာမှ တစ်စိတ်တစ်ပိုင်းကို ထည့်ဝင်ခဲ့ကြသည်။ (ကမ္ဘာဦး ၄:၁) သန္ဓေတည်ခြင်းနှင့် ကလေးမွေးဖွားခြင်းတို့သည် ယနေ့အထိ အံ့အားသင့်စရာဖြစ်ပြီး လူအများက ယင်းကို တကယ့်အံ့ဖွယ်အမှုဟုဆိုကြသည်။

၂။ ကိုယ်ဝန်ဆောင်အမျိုးသမီးတစ်ဦး၏ သားအိမ်အတွင်း ဖြစ်ပျက်ရာများကို အံ့ဖွယ်အမှုဟု အဘယ်ကြောင့်ဆိုမည်နည်း။

^၂မိခင်နှင့်ဖခင်တို့၏ ပေါင်းဖက်မှုကြောင့် မိခင်ကိုယ်ထဲတွင် ဖြစ်ထွန်းလာသော မူရင်းဆဲလ်သည် ရက်ပေါင်း ၂၇၀ ခန့်အတောအတွင်း သန်းထောင်ချီသည့် ဆဲလ်များနှင့်ဖွဲ့စည်းထားသော ကလေးငယ်တစ်ဦးဖြစ်လာလေသည်။ ထိုမူရင်းဆဲလ်တွင် ဆဲလ်အမျိုးပေါင်း ၂၀၀ ကျော်ဖြစ်ပွားစေဖို့ လိုအပ်သောညွှန်ကြားချက်များရှိသည်။ လူ့ဉာဏ်မမီနိုင်သော ၎င်းအံ့ဖွယ်ညွှန်ကြားချက်များအတိုင်းလိုက်၍ အံ့မခန်းဖွယ်ရှုပ်ထွေးပွေလီသော အဆိုပါဆဲလ်များသည် သက်ရှိပုဂ္ဂိုလ်သစ်တစ်ဦးဖြစ်ပေါ်လာစေရန် စည်းကမ်း၊ နည်းလမ်းတကျ ဖြစ်ပွားလေသည်!

၃။ ဆင်ခြင်တတ်သူများစွာတို့က ဘုရားသခင်ကြောင့်သာ သက်ရှိလူသားတစ်ဦး မွေးဖွားလာသည်ဟု အဘယ်ကြောင့် ဝန်ခံသနည်း။

^၃မည်သူသည် ကလေးငယ်ကို အမှန်တကယ်ဖန်ဆင်းသူဖြစ်သည်ဟု သင်ဆိုမည်နည်း။ အသက်ကို စတင်ဖန်ဆင်းသောအရှင်ဖြစ်သည်မှာ သေချာပါသည်။ ကျမ်းစာ၏ဆာလံဆရာက ‘ယေဟောဝါသည် ဘုရားသခင်ဖြစ်ကြောင်း သိကြလော့။ ကိုယ်တော်ပင်လျှင် ကျွန်ုပ်တို့ကို ဖန်ဆင်းသောအရှင်ဖြစ်၏။ ကျွန်ုပ်တို့ကိုယ်ကို ကျွန်ုပ်တို့ ဖန်ဆင်းခဲ့သည်မဟုတ်’ ဟုသီဆိုခဲ့သည်။ (ဆာလံ ၁၀၀:၃၊ ကဘ) မိဘတို့၊ သင်တို့၏အသက်ဘူးလေးကို ကိုယ့်အစွမ်းနှင့်ရလာခြင်းမဟုတ်ကြောင်း သင်တို့ကောင်းစွာသိထားကြသည်။ သက်ရှိလူသစ်တစ်ဦး အံ့ဖွယ်နည်းဖြင့်ဖြစ်ပေါ်လာခြင်းကို အတိုင်းအဆမဲ့ဉာဏ်ပညာရှင် ဘုရားသခင်တစ်ပါးတည်းသာ ဖြစ်ထွန်းစေနိုင်၏။ စဉ်းစားဆင်ခြင်တတ်သူ လူတို့သည် မိခင်၏သားအိမ်အတွင်း ကလေးငယ်တစ်ဦး ဖြစ်ထွန်းလာခြင်းသည် ကြီးမြတ်သောဖန်ဆင်းရှင်ကြောင့်သာဖြစ်၏ဟု နှစ်ပေါင်းထောင်ချီ အသိအမှတ်ပြုခဲ့ပြီ။ အသင်ကော။—ဆာလံ ၁၃၉:၁၃-၁၆။

၄။ အဘယ်လူ့အားနည်းချက်သည် ယေဟောဝါကြောင့်ဟု ဘယ်သောအခါမျှ မဆိုနိုင်သနည်း။

^၄သို့သော် ယေဟောဝါသည် အမျိုးသားနှင့်အမျိုးသမီးများ မျိုးဆက်ပွားစေနိုင်သော ဇီဝဖြစ်စဉ်တစ်ခုကို အစပြုပေးရုံမျှပြုသည့် စာနာစိတ်ကင်းမဲ့သော ဖန်ဆင်းရှင်တစ်ပါးလော။ လူအချို့သည် စာနာစိတ်ကင်းမဲ့သူများဖြစ်ကြသော်လည်း ယေဟောဝါမူ တစ်ခါမျှ ထိုသို့မဟုတ်ပါ။ (ဆာလံ ၇၈:၃၈-၄၀) ဆာလံ ၁၂၇:၃ တွင် သမ္မာကျမ်းစာက ဤသို့ဆို၏– ‘ဖွားမြင်သောသားသမီးတို့သည် ထာဝရဘုရားသခင်ဆုချ၍ ပေးသနားတော်မူသော အမွေဥစ္စာဖြစ်ကြ၏။’ အမွေဥစ္စာဟူသည် အဘယ်အရာဖြစ်၍ ယင်းက အဘယ်အရာကို ထင်ရှားစေကြောင်း ယခုသုံးသပ်ကြည့်ကြစို့။

အမွေဥစ္စာနှင့် ဆုလာဘ်

၅။ သားသမီးများသည် အဘယ်ကြောင့် အမွေဥစ္စာဖြစ်ကြသနည်း။

^၅အမွေဥစ္စာသည် လက်ဆောင်တစ်ခုနှင့်တူ၏။ မိဘတို့သည် မိမိတို့ရင်သွေးများအတွက် အမွေဥစ္စာထားရစ်ပေးဖို့ နှစ်ရှည်လများ ကြိုးပမ်းလုပ်ဆောင်လေ့ရှိကြသည်။ ထိုအမွေဥစ္စာသည် ငွေကြေး၊ ပစ္စည်းဥစ္စာ သို့မဟုတ် အဖိုးတန်ရတနာပစ္စည်းတစ်မျိုးတစ်မည် ဖြစ်နိုင်သည်။ မည်သို့ပင်ဖြစ်စေ ယင်းသည် မိဘမေတ္တာကို ထင်ရှားစေ၏။ ဘုရားသခင်သည် သားသမီးများကို မိဘများအတွက် အမွေဥစ္စာတစ်ခုအဖြစ် ပေးထားသည်ဟု သမ္မာကျမ်းစာကဆို၏။ သားသမီးများသည် ကိုယ်တော်ထံမှ မေတ္တာလက်ဆောင်တစ်ခုဖြစ်သည်။ အသင်သည် မိဘတစ်ဦးဖြစ်မည်ဆိုလျှင် သင့်ရင်သွေးများကို စကြဝဠာဖန်ဆင်းရှင် လွှဲအပ်ထားသော လက်ဆောင်တစ်ခုအဖြစ် သဘောထားကြောင်း သင့်လုပ်ရပ်များကဖော်ပြသည်ဟု ဆိုနိုင်မည်လော။

၆။ လူသားတို့ကို သားသမီးရနိုင်စွမ်းပေးရသည့် ဘုရားသခင့်ရည်ရွယ်ချက်ကား အဘယ်နည်း။

^၆ဤလက်ဆောင်ကို ယေဟောဝါပေးရသည့် ရည်ရွယ်ချက်မှာ အာဒံနှင့်ဧဝတို့၏ သားစဉ်မြေးဆက်များနှင့် မြေကြီးကိုပြည့်စေဖို့ဖြစ်သည်။ (ကမ္ဘာဦး ၁:၂၇၊ ၂၈; ဟေရှာယ ၄၅:၁၈) ယေဟောဝါသည် သန်းနှင့်ချီသောကောင်းကင်တမန်များကို ဖန်ဆင်းခဲ့သည့်နည်းအတိုင်း လူတိုင်းကို တစ်ဦးချင်းစီ မဖန်ဆင်းခဲ့ပါ။ (ဆာလံ ၁၀၄:၄; ဗျာ. ၄:၁၁) ထိုသို့ပြုမည့်အစား မိဘများနှင့် ဆင်တူမည့် သားသမီးများ မွေးဖွားနိုင်စွမ်းကို လူ၌ထည့်သွင်းဖန်ဆင်းရန် ဘုရားသခင်ရွေးချယ်ခဲ့သည်။ မိခင်နှင့်ဖခင်တို့သည် လူသားသစ်ကလေးတစ်ဦးကို မွေးဖွားပြီး ကြည့်ရှုပြုစုခွင့်ရရှိခြင်းသည် အမှန်တကယ် ထူးမြတ်သော အခွင့်အရေးပင်! မိဘများအနေနှင့် ဤအဖိုးတန်အမွေကို ရရှိခံစားရရန် ယေဟောဝါစီစဉ်ပေးထားသည့်အတွက် ကျေးဇူးတင်ပါသလော။

ယေရှု၏ပုံသက်သေမှ သင်ယူလေ

၇။ မိဘအချို့ပြုလုပ်ပုံနှင့်မတူဘဲ ယေရှုသည် “လူသားတို့” ကိုစိတ်ဝင်စား၍ စာနာစိတ်ရှိကြောင်း မည်သို့တင်ပြခဲ့သနည်း။

^၇မိဘအားလုံး မိမိတို့၏ရင်သွေးများကို ဆုလာဘ်တစ်ခုအဖြစ် မယူမှတ်ကြသည်မှာ ဝမ်းနည်းစရာဖြစ်သည်။ မိမိတို့၏ရင်နှစ်သည်းချာများကို စာနာစိတ်မပြသူ များစွာရှိ၏။ ထိုသို့သောမိဘများသည် ယေဟောဝါနှင့် ကိုယ်တော့်သားတော်၏ စိတ်သဘောထား မရှိကြချေ။ (ဆာလံ ၂၇:၁၀; ဟေရှာယ ၄၉:၁၅) ထိုမိဘများနှင့်မတူ ကလေးငယ်များအား ယေရှုစိတ်ဝင်စားပုံကို သုံးသပ်ကြည့်ပါ။ လူသားတစ်ဦးအဖြစ် မြေကြီးပေါ်သို့ ယေရှုကြွမလာမီ တန်ခိုးကြီးသောဝိညာဉ်သားတစ်ဦးအဖြစ် ကောင်းကင်တွင်ရှိနေစဉ်ပင် ကိုယ်တော်သည် “လူသားတို့နှင့်ပေါင်းဖော်၍ ပျော်ပါးလျက်နေ” သည်ဟု သမ္မာကျမ်းစာကဆို၏။ (သု. ၈:၃၁) လူသားတို့အပေါ် ကိုယ်တော်၏မေတ္တာ အလွန်ကြီးမားရကား ကျွန်ုပ်တို့ ထာဝရအသက်ရစေဖို့ မိမိအသက်ကို ရွေးနုတ်ဖိုးအဖြစ် တလိုတလားပေးဆက်ခဲ့သည်။—မဿဲ ၂၀:၂၈; ယောဟန် ၁၀:၁၈။

၈။ မိဘများအတွက် ပုံနမူနာကောင်းတစ်ခုကို ယေရှုမည်သို့ဖော်ပြခဲ့သနည်း။

^၈မြေကြီးပေါ်ရှိစဉ် ယေရှုသည် မိဘများအတွက် အထူးကောင်းမွန်သောပုံနမူနာ ချမှတ်ခဲ့သည်။ ကိုယ်တော်ပြုခဲ့ရာများကို သုံးသပ်ကြည့်ပါ။ အလုပ်များလွန်းပြီး စိတ်ဖိစီးခံနေရချိန်တွင်ပင် ကလေးငယ်များကို အချိန်ပေးခဲ့သည်။ ဈေးထဲတွင် ကစားနေကြသော ကလေးသူငယ်များကို ဂရုစိုက်ကြည့်ပြီး သူတို့၏အမူအကျင့်များကို ကိုယ်တော်၏သွန်သင်ချက်၌ ဖော်ပြခဲ့သည်။ (မဿဲ ၁၁:၁၆၊ ၁၇) ယေရုရှလင်မြို့သို့ နောက်ဆုံးအကြိမ်သွားစဉ် မိမိသည် ဝေဒနာခံစားရပြီး အသတ်ခံရတော့မည်ကို ယေရှုသိထားသည်။ ထို့ကြောင့် ယေရှုထံသို့ ကလေးများကို ခေါ်ဆောင်လာကြသောအခါ ကိုယ်တော်အား တိုး၍စိတ်ဖိစီးမှုမဖြစ်စေလို၍ တပည့်များက သူတို့ကို မောင်းထုတ်ဖို့ကြိုးစားခဲ့ခြင်းဖြစ်မည်။ သို့သော် တပည့်များကို ယေရှုဆုံးမပြစ်တင်ခဲ့သည်။ ကလေးသူငယ်များနှင့် “ပေါင်းဖော်၍ ပျော်ပါး” ကြောင်းတင်ပြရန် “သူငယ်တို့ကို ငါ့ထံသို့လာပါလေစေ။ မဆီးတားကြနှင့်” ဟုကိုယ်တော်မိန့်ဆိုခဲ့သည်။—မာကု ၁၀:၁၃၊ ၁၄။

၉။ ကျွန်ုပ်တို့၏အပြောထက် အလုပ်က အဘယ်ကြောင့် ပို၍အရေးပါသနည်း။

^၉ယေရှု၏ပုံနမူနာမှ ကျွန်ုပ်တို့သင်ယူနိုင်ပါသည်။ ကလေးသူငယ်များ ကျွန်ုပ်တို့ထံလာသောအခါ ကျွန်ုပ်တို့ မည်မျှတိုင်အလုပ်များနေပါစေ မည်သို့တုံ့ပြန်တတ်သနည်း။ ယေရှုကဲ့သို့ တုံ့ပြန်ပါသလော။ အထူးသဖြင့် မိဘတို့ထံမှ သားသမီးများ လိုအပ်သောအရာမှာ ကလေးများအား ယေရှုပေးရန်အသင့်ရှိခဲ့သော အချိန်နှင့် အာရုံစိုက်မှုဖြစ်သည်။ “သား/သမီးကိုချစ်တယ်” ဟူသောစကားမျိုး အရေးပါသည်မှာ မှန်ပါသည်။ သို့သော် အပြောထက် အလုပ်တာသွားသည်။ သင့်မေတ္တာသည် အပြောမျှသာမက အလုပ်ဖြင့် ပို၍ထင်ရှားပါသည်။ သင့်ကလေးများကိုပေးသည့် အချိန်၊ ဂရုစိုက်မှုနှင့် ပြုစုစောင့်ရှောက်မှုတို့အားဖြင့် သူတို့ကိုချစ်ကြောင်း ပေါ်လွင်စေသည်။ သို့သော် ထိုသို့ပြုသည့်တိုင် သင်ဖြစ်စေချင်သည့်အတိုင်း ချက်ချင်း ဖြစ်လာချင်မှဖြစ်လာမည်။ စိတ်ရှည်ဖို့လိုသည်။ တပည့်များနှင့် ယေရှုဆက်ဆံခဲ့ပုံကို ကျွန်ုပ်တို့အတုယူမည်ဆိုလျှင် စိတ်ရှည်တတ်လာမည်။

ယေရှု၏စိတ်ရှည်မှုနှင့် ချစ်ခင်စုံမက်မှု

၁၀။ တပည့်များကို နှိမ့်ချခြင်းအကြောင်း ယေရှုမည်သို့သွန်သင်ပေးခဲ့သနည်း၊ အစပိုင်းတွင် အောင်မြင်ခဲ့သလော။

^၁၀မိမိ၏တပည့်များသည် ထင်ပေါ်ကျော်ကြားဖို့ အချင်းချင်းယှဉ်ပြိုင်နေကြကြောင်း ယေရှုသတိပြုမိခဲ့သည်။ တစ်နေ့တွင် တပည့်များနှင့်အတူ ကပေရနောင်မြို့သို့ရောက်လာသောအခါ ကိုယ်တော်က– “‘သင်တို့သည် လမ်း၌ အဘယ်အမှုကို အချင်းချင်းငြင်းခုံကြသနည်း’ ဟုမေးတော်မူသည်ကို၊ သူတို့သည် တိတ်ဆိတ်စွာနေကြ၏။ အကြောင်းမူကား၊ အဘယ်သူသည်သာ၍ကြီးမြတ်အံ့နည်းဟု လမ်း၌အချင်းချင်းငြင်းခုံကြ၏။” ယေရှုသည် သူတို့ကို ခက်ထန်စွာ ပြစ်တင်ရှုတ်ချမည့်အစား နှိမ့်ချခြင်းအကြောင်း သွန်သင်ပေးဖို့ စိတ်ရှည်စွာဖြင့် ရုပ်ပြသင်ခန်းစာတစ်ခုပေးခဲ့သည်။ (မာကု ၉:၃၃-၃၇) ကိုယ်တော်မျှော်လင့်သည့်အတိုင်း ဖြစ်လာသလော။ ချက်ချင်းမဖြစ်လာပါ။ ခြောက်လကြာပြီးနောက် ယာကုပ်နှင့် ယောဟန်တို့သည် ဘုရားသခင့်နိုင်ငံတော်တွင် ထင်ပေါ်သော ရာထူးများရရန် ယေရှုထံမှတောင်းဆိုပေးဖို့ သူတို့၏မိခင်ကို တိုက်တွန်းခဲ့ကြသည်။ တစ်ဖန် ယေရှုသည် သူတို့၏အတွေးအခေါ်ကို စိတ်ရှည်စွာ ပြန်တည့်မတ်ပေးလေသည်။—မဿဲ ၂၀:၂၀-၂၈။

၁၁။ (က) ယေရှု၏တမန်တော်များသည် ယေရှုနှင့်အတူ အထက်ခန်းမသို့ရောက်ပြီးနောက် ထုံးစံအရ အဘယ်အရာပြုလုပ်ဖို့ ပျက်ကွက်ခဲ့ကြသနည်း။ (ခ) ယေရှု အဘယ်အရာပြုလုပ်ခဲ့သနည်း၊ ထိုအချိန်တွင် သူ၏ကြိုးပမ်းမှုများ အောင်မြင်ခဲ့သလော။

^၁၁မကြာမီ စီ.အီး. ၃၃၊ ပသခါပွဲနေ့ရောက်လာရာ ယေရှုသည် တမန်တော်များနှင့်အတူ ထိုပွဲကိုသီးသန့်ကျင်းပခဲ့သည်။ အထက်ခန်းမသို့ရောက်သော် အိမ်ထောင်စုတွင် အစေခံ သို့မဟုတ် အမျိုးသမီးတစ်ဦး၏အလုပ်ဟု ယူမှတ်လေ့ရှိသော ထုံးစံအရပြုရသည့် ခြေဆေးပေးခြင်းအလုပ်ကို တမန်တော် ၁၂ ပါးအနက် တစ်ဦးကမျှ အစပြုမလုပ်ခဲ့ချေ။ (၁ ဓမ္မရာဇဝင် ၂၅:၄၁; ၁ တိမောသေ ၅:၁၀) မိမိ၏တပည့်များသည် ရာထူးအဆင့်အတန်း မက်မောနေကြဆဲဖြစ်ကြောင်း သိလိုက်ရ၍ ယေရှုအလွန်ဝမ်းနည်းခဲ့ပေမည်! ထို့ကြောင့် ယေရှုသည် တစ်ဦးချင်းစီ၏ခြေကို ဆေးပေးပြီးနောက် သူတစ်ပါးအစေကိုခံကြရန် ပုံသက်သေပြ၍ အလေးအနက်တောင်းပန်ခဲ့သည်။ (ယောဟန် ၁၃:၄-၁၇) ထိုပုံသက်သေကို သူတို့လိုက်ခဲ့ကြသလော။ ထိုညနေနှောင်းပိုင်းတွင်ပင် ‘တပည့်တို့သည် မိမိတို့တွင် အဘယ်သူသည် သာ၍ကြီးမြတ်သနည်းဟု အချင်းချင်းငြင်းခုံခြင်းရှိသည်’ ဟု သမ္မာကျမ်းစာကဆို၏။—လုကာ ၂၂:၂၄။

၁၂။ သားသမီးများကို မိဘတို့ ကြိုးစားလေ့ကျင့်ပေးရာတွင် ယေရှုကို မည်သို့အတုယူနိုင်သနည်း။

^၁၂သင်၏ဆုံးမမှုကို သားသမီးများ မခံယူသည့်အခါ ယေရှုမည်သို့ခံစားခဲ့ရမည်ကို အသင်မိဘများ သဘောပေါက်ပါသလော။ တမန်တော်တို့သည် သူတို့၏အမှားများကို ချက်ချင်းမပြုပြင်သည့်အတွက် သူတို့ကို ယေရှုလက်မလျှော့ခဲ့ကြောင်း သတိရပါ။ နောက်ဆုံးတွင် ကိုယ်တော်စိတ်ရှည်သည့်အတွက် အကျိုးဖြစ်ထွန်းခဲ့သည်။ (၁ ယောဟန် ၃:၁၄၊ ၁၈) မိဘတို့ သားသမီးများကို လေ့ကျင့်သွန်သင်ပေးရာတွင် ဘယ်တော့မျှ လက်မလျှော့ဘဲ ယေရှု၏ချစ်ခြင်းမေတ္တာနှင့် စိတ်ရှည်မှုကို အတုယူသင့်သည်။

၁၃။ မိဘတစ်ဦးသည် ကလေးငယ်၏စူးစမ်းမေးမြန်းခြင်းကို အဘယ်ကြောင့် လေသံမာမာဖြင့် မောင်းမထုတ်သင့်သနည်း။

^၁၃မိဘတို့သည် မိမိတို့ကိုချစ်မြတ်နိုးပြီး စိတ်ဝင်စားသည်ဟု ရင်သွေးငယ်များ သိရှိခံစားရဖို့လိုသည်။ ယေရှုသည် တပည့်များစဉ်းစားတွေးတောရာကို သိလိုသဖြင့် သူတို့မေးမြန်းသည့်အခါ နားထောင်ပေးသည်။ အချို့ကိစ္စရပ်များကို သူတို့မည်သို့ယူဆကြောင်း ကိုယ်တော်မေးမြန်းတတ်သည်။ (မဿဲ ၁၇:၂၅-၂၇) ထိရောက်စွာသွန်သင်ပေးရန် ဂရုစိုက်နားထောင်ဖို့၊ အမှန်တကယ်စိတ်ဝင်စားဖို့ လိုသည်။ စူးစမ်းမေးမြန်းတတ်သောကလေးတစ်ဦးကို လေသံမာမာဖြင့် “သွားစမ်း! ငါအလုပ်များနေတာ မမြင်ဘူးလား” ဟု မောင်းထုတ်လိုစိတ်ကို မိဘများထိန်းချုပ်ထားသင့်သည်။ မိဘတစ်ဦး အမှန်တကယ်အလုပ်များနေလျှင် ထိုအကြောင်းကို နောက်မှပြောပြမည်ဟု ကလေးအား ပြောသင့်သည်။ ထို့နောက် ထိုအကြောင်းအရာကို မဖြစ်မနေဆွေးနွေးသင့်သည်။ ဤနည်းဖြင့် မိဘဖြစ်သူသည် မိမိကိုအမှန်တကယ်စိတ်ဝင်စားကြောင်း ကလေးငယ်သိရှိပြီး မိဘအား ရင်ဖွင့်ပြောဆိုရန် အမြဲအသင့်ရှိပါလိမ့်မည်။

၁၄။ မိမိတို့ရင်သွေးများအား ချစ်ခင်ယုယမှုပြခြင်းနှင့်ပတ်သက်၍ ယေရှုထံမှ မိဘများ အဘယ်အရာ သင်ယူနိုင်သနည်း။

^၁၄မိဘများသည် သားသမီးများကို ပွေ့ဖက်ကာ ချစ်ခင်ယုယကြောင်းပြခြင်းသည် သင့်လျော်ပါသလော။ ဤတွင်လည်း ယေရှုထံမှ မိဘများသင်ယူနိုင်ပါသည်။ သမ္မာကျမ်းစာက ကိုယ်တော်သည် “သူငယ်တို့ကိုချီပိုက်၍ သူတို့အပေါ်မှာလက်တော်ကိုတင်လျက် ကောင်းချီးပေး” သည်ဟုဆို၏။ (မာကု ၁၀:၁၆) ကလေးငယ်များ မည်သို့တုံ့ပြန်မည်ဟု သင်ထင်သနည်း။ အမှန်ပင် နွေးထွေးမှုခံစားရပြီး ယေရှုကိုပိုချစ်ခင်ကြပေမည်! အသင်မိဘများနှင့် ရင်သွေးငယ်များအကြား ချစ်ခင်စုံမက်မှုနှင့် မေတ္တာစစ်ရှိပါက သင်၏လေ့ကျင့်သွန်သင်မှုကို သူတို့ တလိုတလားလက်ခံကြပါလိမ့်မည်။

အချိန်မည်မျှပေးရမည်ဟူသော အရေးကိစ္စ

၁၅၊ ၁၆။ ခေတ်စားခဲ့သော ကလေးပြုစုပျိုးထောင်ရေး အယူအဆတစ်ခုကား အဘယ်နည်း၊ အဘယ်အရာကြောင့် ထိုအယူအဆ ပေါ်ထွက်လာခဲ့ဟန်တူသနည်း။

^၁၅မိဘတို့သည် မိမိတို့သားသမီးများကို အချိန်များများပေးပြီး မေတ္တာပါပါအာရုံစိုက်ဖို့ တကယ်လိုမလို မေးခွန်းထုတ်သူအချို့ရှိ၏။ အကျိုးရှိရှိပေါင်းသင်းချိန်ဟုခေါ်သော ကလေးပြုစုပျိုးထောင်ရေး အယူအဆတစ်ခုကို ကျင်လည်စွာ အားပေးအားမြှောက်ပြုခဲ့ကြပြီ။ ထိုအယူအဆကိုထောက်ခံသူများက သားသမီးများနှင့် မိဘများအတူရှိနေချိန်သည် အဓိပ္ပာယ်ရှိမည်၊ ကောင်းစွာကြိုတင်စီစဉ်ထားမည်ဆိုလျှင် သူတို့ကို မိဘများ အချိန်များများပေးစရာမလိုဟုဆို၏။ အကျိုးရှိရှိပေါင်းသင်းချိန်ဟူသော ထိုအယူအဆသည် ကောင်းသလော၊ ကလေးများ၏အကျိုးအတွက် ဖြစ်ပေါ်လာသော အယူအဆလော။

^၁၆ကလေးများစွာနှင့် စကားစမြည်ပြောဆိုခဲ့သော စာရေးဆရာတစ်ဦးက “မိဘများထံမှ သူတို့အလိုချင်ဆုံးအရာမှာ အချိန်များများ” နှင့် “လုံးလုံးလျားလျားအာရုံစိုက်မှု” တို့ဖြစ်သည်ဟုဆို၏။ ထူးခြားသည်မှာ ကောလိပ်ကျောင်းပါမောက္ခတစ်ဦးက “ထိုအသုံးအနှုန်း [အကျိုးရှိရှိပေါင်းသင်းချိန်] သည် မိဘများ၏အားနည်းချက်ကြောင့် ပေါ်ထွက်လာခြင်းဖြစ်သည်။ မိမိတို့ရင်သွေးများကို အချိန်အနည်းငယ်သာပေးရန် လူတို့အကြောင်းပြနေကြခြင်းဖြစ်သည်” ဟုကောက်ချက်ချခဲ့သည်။ မိဘများသည် သားသမီးများနှင့် မည်မျှကြာကြာ အချိန်ဖြုန်းသင့်သနည်း။

၁၇။ မိဘများထံမှ ရင်သွေးငယ်များ အဘယ်အရာလိုအပ်ကြသနည်း။

^၁၇သမ္မာကျမ်းစာ၌ မဖော်ပြထားပါ။ သို့သော် အိမ်တွင်ရှိသည့်အခါဖြစ်စေ၊ ခရီးသွားသည့်အခါဖြစ်စေ၊ အိပ်လျက်၊ ထလျက်ရှိသည့်အခါဖြစ်စေ မိမိတို့သားသမီးများနှင့် စကားပြောဆိုဖို့ ဣသရေလမိဘများကို တိုက်တွန်းထားသည်။ (တရားဟောရာ ၆:၇) မိဘများသည် သားသမီးများနှင့် အပြန်အလှန်ဆက်သွယ်မှုရှိကာ နေ့စဉ်မပြတ် သွန်သင်ပေးနေဖို့လိုကြောင်း ထင်ရှားပါသည်။

၁၈။ ယေရှုသည် တပည့်များကို လေ့ကျင့်သင်ကြားပေးရန် မည်သို့အခွင့်ကောင်းယူခဲ့သနည်း၊ ၎င်းမှ မိဘများ အဘယ်အရာသင်ယူနိုင်သနည်း။

^၁၈ယေရှုသည် တပည့်များနှင့်အတူ စားသောက်သောအခါ၊ ခရီးသွားသောအခါ၊ အပန်းဖြေသောအခါ၌ပင် သူတို့ကိုလေ့ကျင့်ပေးသဖြင့် အကျိုးဖြစ်ထွန်းခဲ့သည်။ ကိုယ်တော်သည် အခွင့်အရေးရတိုင်း သူတို့ကိုသွန်သင်ပေးခဲ့၏။ (မာကု ၆:၃၁၊ ၃၂; လုကာ ၈:၁; ၂၂:၁၄) ထိုနည်းထပ်တူ၊ ခရစ်ယာန်မိဘတို့သည် အခွင့်အရေးရတိုင်း မိမိတို့ရင်သွေးများနှင့် ကောင်းမွန်သော ပြောဆိုဆက်သွယ်မှုရှိရန်၊ ယင်းကို ဆက်ထိန်းသိမ်းရန်နှင့် ယေဟောဝါ၏နည်းလမ်းတော်များအတိုင်း သူတို့ကို ပဲ့ပြင်သင်ကြားပေးရန် နိုးနိုးကြားကြားရှိသင့်ပါသည်။

အဘယ်အရာကို သွန်သင်၍ မည်သို့သွန်သင်ပေးရမည်နည်း

၁၉။ (က) သားသမီးများကို အချိန်ပေးသည့်အပြင် အဘယ်အရာလိုသေးသနည်း။ (ခ) မိဘတို့သည် ရင်သွေးငယ်များကို အဘယ်အကြောင်း အဓိကသွန်သင်ပေးဖို့လိုသနည်း။

^၁၉သားသမီးများကို အောင်မြင်စွာ ပြုစုပျိုးထောင်ပေးဖို့ သူတို့ကို အချိန်ပေးရုံ သွန်သင်ပေးရုံသက်သက်ဖြင့် မလုံလောက်ပါ။ သွန်သင်ပေးသည့်အရာကလည်း အရေးပါသည်။ အဘယ်အရာသွန်သင်ပေးသင့်ကြောင်း သမ္မာကျမ်းစာက အလေးပေးဖော်ပြထားပုံကို သတိပြုပါ။ “ယနေ့ငါမှာထားသောစကားကို နှလုံးသွင်းရမည်။ . . . ထိုစကားကို သင်၏သားသမီးတို့အား ကြိုးစား၍သွန်သင် [“စွဲမှတ်စေ၊” ကဘ] ရမည်” ဟုဆို၏။ သားသမီးများကို သွန်သင်ပေးရမည့် “ထိုစကား” များကား အဘယ်နည်း။ ထိုသို့မမှာကြားမီ ဖော်ပြထားသော ဤစကားများဖြစ်ကြောင်း ထင်ရှားသည်– “သင်၏ဘုရားသခင် ထာဝရဘုရားကို စိတ်နှလုံးအကြွင်းမဲ့၊ အစွမ်းသတ္တိရှိသမျှနှင့်ချစ်လော့။” (တရားဟောရာ ၆:၅-၇) ယင်းသည် ဘုရားသခင့်ပညတ်အားလုံးတို့တွင် အရေးအကြီးဆုံးပညတ်ဖြစ်သည်ဟု ယေရှုမိန့်တော်မူခဲ့သည်။ (မာကု ၁၂:၂၈-၃၀) ထို့ကြောင့် မိဘတို့သည် ရင်သွေးငယ်များကို ယေဟောဝါအကြောင်း အဓိကသွန်သင်ပေးရမည်၊ ကိုယ်တော်တစ်ပါးတည်းကိုသာ အဘယ်ကြောင့်စိုးလ်အကြွင်းမဲ့ချစ်မြတ်နိုး၍ ဆည်းကပ်ဝတ်ပြုထိုက်ကြောင်း ရှင်းပြပေးဖို့လိုသည်။

၂၀။ မိမိတို့သားသမီးများအား အဘယ်အရာသင်ကြားပေးရန် ရှေးခေတ်မိဘများကို ဘုရားသခင်မိန့်မှာခဲ့သနည်း။

^၂၀သို့သော် သားသမီးများကို သွန်သင်ပေးဖို့ မိဘများကိုတိုက်တွန်းထားသော “ထိုစကား” များတွင် ဘုရားသခင်အား စိတ်နှလုံးအကြွင်းမဲ့ချစ်ရန်မျှမက ပါဝင်သည်။ ရှေ့အခန်းကြီးဖြစ်သော တရားဟောရာအခန်းကြီးငါးတွင် မောရှေသည် ပညတ်တော်ဆယ်ပါးဟုခေါ်သော ကျောက်ပြားပေါ်ရေးထားသည့် ဘုရားသခင့်ပညတ်များကို ပြန်လည်ဖော်ပြကြောင်း သင်သတိပြုမိပါလိမ့်မည်။ ၎င်းပညတ်များတွင် မလိမ်ရ၊ မခိုးရ၊ လူ့အသက်မသတ်ရနှင့် သူ့သားအိမ်ရာမပြစ်မှားရဟူသည့် မိန့်မှာချက်များပါဝင်သည်။ (တရားဟောရာ ၅:၁၁-၂၂) ယင်းကြောင့် မိမိတို့သားသမီးများကို ကျင့်ဝတ်စံနှုန်းများ သွန်သင်ပေးဖို့လိုကြောင်း ထိုခေတ်ကမိဘများ စိတ်စွဲမှတ်ထားကြသည်။ ယနေ့ ခရစ်ယာန်မိဘတို့သည် မိမိတို့သားသမီးများအား လုံခြုံမှု၊ ပျော်ရွှင်မှုရှိသောအနာဂတ် ရရှိခံစားစေလိုလျှင် အလားတူသွန်သင်ပေးဖို့လိုသည်။

၂၁။ ဘုရားသခင့်စကားတော်ကို သားသမီးများစိတ်ထဲ “စွဲမှတ်စေ” ပါဟူသော ညွှန်ကြားချက်သည် အဘယ်အဓိပ္ပာယ်ရှိသနည်း။

^၂၁“ထိုစကား” သို့မဟုတ် ပညတ်တော်များကို သားသမီးများအား မည်သို့သွန်သင်ပေးရမည်နှင့်ပတ်သက်၍ မိဘများမိန့်မှာခံရပုံကို သတိပြုပါ– “သင်၏သားသမီးတို့အား ကြိုးစား၍သွန်သင် [“စွဲမှတ်စေ၊” ကဘ] ရမည်။” “စွဲမှတ်စေ” ဟူသောစကားလုံးသည် “ထပ်ခါတလဲလဲပြန်ကျော့ခြင်း သို့မဟုတ် သတိပေးဆုံးမခြင်း—တိုက်တွန်း သို့မဟုတ် စိတ်ထဲစွဲစေခြင်း—ဖြင့် သွန်သင်ပြီး စွဲမှတ်စေရန်” ဟုအဓိပ္ပာယ်ရ၏။ တစ်နည်းအားဖြင့်ဆိုလျှင် သားသမီးများ၏စိတ်ထဲတွင် ဝိညာဉ်ရေးရာများ စွဲမှတ်နေစေဖို့ အထူးရည်ရွယ်ချက်ဖြင့် ကြိုတင်ပြင်ဆင်ထားသော ကျမ်းစာသွန်သင်ပေးခြင်းအစီအစဉ်တစ်ခုရှိစေရန် မိဘများကို ဘုရားသခင်ပြောနေခြင်းဖြစ်သည်။

၂၂။ သားသမီးများကို သွန်သင်ပဲ့ပြင်ပေးရန် ဣသရေလမိဘများ အဘယ်အရာပြုဖို့ မှာကြားခံရသနည်း၊ ယင်းက အဘယ်အရာကိုဆိုလိုသနည်း။

^၂၂ကြိုတင်ပြင်ဆင်ထားသော ထိုအစီအစဉ်ရှိရန် မိဘများက စတင်အကောင်အထည်ဖော်ဖို့လို၏။ သမ္မာကျမ်းစာက ဤသို့ဆို၏– “ထိုစကား [သို့မဟုတ် ဘုရားသခင့်ပညတ်တော်များ] ကိုလည်း သင်၏လက်၌ လက္ခဏာသက်သေဖို့ရာလည်းကောင်း၊ သင်၏မျက်စိကြားမှာ သင်းကျစ်ကဲ့သို့လည်းကောင်း ချည်ထားရမည်။ အိမ်တံခါး၊ မြို့တံခါးတို့၌လည်း ရေးထားရမည်။” (တရားဟောရာ ၆:၈၊ ၉) ဤသို့ဆိုသဖြင့် မိဘတို့သည် အိမ်တံခါး၊ မြို့တံခါးတို့၌ ဘုရားသခင့်ပညတ်တော်များကို ရေးထားဖို့၊ မိတ္တူတစ်စောင်ကို သားသမီးများ၏လက်၌ချည်ထားပြီး တစ်စောင်ကို မျက်စိကြားမှာ ဆင်ထားပေးရမည်ဟု စာသားအတိုင်း မဆိုလိုပါ။ ဆိုလိုချက်မှာ မိဘတို့သည် ဘုရားသခင့်သွန်သင်ချက်များကို သားသမီးများအား မပြတ်တမ်း သတိပေးနှိုးဆော်နေသင့်သည်ဖြစ်၏။ ဘုရားသခင့်သွန်သင်ချက်များသည် ကလေးများအရှေ့ အချိန်ပြည့်ရှိနေသည့်အလား မိမိတို့သားသမီးများကို အမြဲမပြတ်၊ မှန်မှန်သွန်သင်ပေးနေသင့်သည်။

၂၃။ နောက်တစ်ပတ် သင်တန်းချိန်တွင် အဘယ်အကြောင်း သုံးသပ်မည်နည်း။

^၂၃သားသမီးများကို မိဘများသွန်သင်ပေးဖို့လိုအပ်သော အထူးအရေးပါရာအချို့ကား အဘယ်နည်း။ မိမိတို့ကိုယ်ကို ကာကွယ်တတ်အောင် သားသမီးများအား သွန်သင်၊ လေ့ကျင့်ပေးဖို့ ယနေ့ အဘယ်ကြောင့် ဤမျှအရေးကြီးသနည်း။ မိမိတို့၏ရင်သွေးများကို ထိရောက်စွာသွန်သင်ပေးရန် မိဘများအတွက် အဘယ်အကူအညီ ယခုရှိသနည်း။ ဤမေးခွန်းများအပြင် မိဘအများနှင့်သက်ဆိုင်သော အခြားမေးခွန်းများကို နောက်ဆောင်းပါးတွင် သုံးသပ်ပါမည်။

သင်မည်သို့ဖြေဆိုမည်နည်း

• မိဘတို့သည် မိမိတို့သားသမီးများကို အဖိုးတန်သူများအဖြစ် အဘယ်ကြောင့် ယူမှတ်သင့်သနည်း။

• မိဘများနှင့် အခြားသူတို့သည် ယေရှုထံမှ အဘယ်အရာသင်ယူနိုင်သနည်း။

• သားသမီးများကို အချိန်မည်မျှပေးသင့်သနည်း။

• သားသမီးများကို အဘယ်အရာ သွန်သင်ပေးရမည်နည်း၊ မည်သို့သွန်သင်ပေးသင့်သနည်း။

[လေ့လာရန်မေးခွန်းများ

[စာမျက်နှာ ၁၀ ပါ ရုပ်ပုံ]

ယေရှုသွန်သင်ပုံမှ မိဘများ အဘယ်အရာသင်ယူနိုင်သနည်း

[စာမျက်နှာ ၁၁ ပါ ရုပ်ပုံများ]

ဣသရေလမိဘတို့သည် မိမိတို့ရင်သွေးများကို အဘယ်အချိန်တွင် မည်သို့ သွန်သင်ပေးရမည်နည်း

[စာမျက်နှာ ၁၂ ပါ ရုပ်ပုံများ]

မိဘတို့သည် သားသမီးများအား ဘုရားသခင့်သွန်သင်ချက်များကို မပြတ်တမ်း သတိပေးနှိုးဆော်သင့်

ကင်းမျှော်စင်—လေ့လာရန် စာစောင်