မိဘတို့၊ သင်တို့၏အဖိုးတန်အမွေဥစ္စာကို ကာကွယ်စောင့်ရှောက်ပါလေ
မိဘတို့၊ သင်တို့၏အဖိုးတန်အမွေဥစ္စာကို ကာကွယ်စောင့်ရှောက်ပါလေ
“ပညာသည် . . . ကွယ်ကာတတ်၏။ . . . ပညာ၏အကျိုးကျေးဇူးကား ပညာရှင်အား အသက်ရှင်စေခြင်းတည်း။”—ဒေ. ၇:၁၂၊ သမ္မာ။
၁။ မိဘတို့သည် မိမိတို့သားသမီးများကို လက်ဆောင်များအဖြစ် အဘယ်ကြောင့်ရှုမြင်သင့်သနည်း။
မိဘတို့သည် မိမိတို့နှင့်ရုပ်ရည်သွင်ပြင်၊ ပင်ကိုစရိုက်များ ဆင်တူသော သက်ရှိလူသားအသစ်လေးတစ်ဦးကို လူ့လောကထဲ ခေါ်ဆောင်လာကြသည်။ ထိုသူငယ်လေးများကို ‘ယေဟောဝါပေးသနားတော်မူသော အမွေဥစ္စာ’ ဟုသမ္မာကျမ်းစာက ခေါ်ဆိုထား၏။ (ဆာလံ ၁၂၇:၃၊ ကဘ) ယေဟောဝါသည် အသက်ပေးရှင်အစစ်အမှန်ဖြစ်သောကြောင့် အမှန်မှာ ကိုယ်တော်၏ပိုင်ဆိုင်ရာကို မိဘများအား ပေးအပ်ခြင်းဖြစ်သည်။ (ဆာလံ ၃၆:၉) မိဘတို့၊ ဘုရားသခင်ထံတော်မှ ဤအဖိုးတန်လက်ဆောင် ရရှိထားခြင်းကို သင်တို့ မည်သို့သဘောထားကြသနည်း။
၂။ ဖခင်တစ်ဦးဖြစ်ရတော့မည်ကို မာနော်သိလေသော် သူမည်သို့တုံ့ပြန်ခဲ့သနည်း။
၂ ထိုသို့သောလက်ဆောင်မျိုးကို စိတ်နှိမ့်ချစွာ၊ ကျေးဇူးတင်လေးမြတ်စွာ လက်ခံယူသင့်သည်။ လွန်ခဲ့သောအနှစ် ၃,၀၀၀ ကျော်မှ ဣသရေလအမျိုးသားမာနော်၏ဇနီးသည် ကလေးမွေးဖွားလိမ့်မည်ဟု ကောင်းကင်တမန်တစ်ပါးက သတင်းပေးချိန်၌ မာနော် ထိုနည်းအတိုင်းတုံ့ပြန်ခဲ့သည်။ ထိုသတင်းကောင်းကို မာနော်ကြားသော် သူဤသို့ဆုတောင်းခဲ့သည်– ‘အိုဘုရားသခင် အကျွန်ုပ်တို့သည် ဖွားမြင်လတ္တံ့သောသူငယ်၌ အဘယ်သို့ပြုရမည်ကို ဘုရားသခင်၏တမန်တော်သည် တစ်ဖန်လာ၍သွန်သင်စေတော်မူပါ။’ (တရားသူကြီး ၁၃:၈) မိဘတို့ မာနော်၏ပုံသက်သေမှ သင်တို့အဘယ်အရာသင်ယူနိုင်သနည်း။
ဘုရားသခင့်အကူအညီ ယခုလိုအပ်ရခြင်းအကြောင်း
၃။ သားသမီးများကိုပြုစုပျိုးထောင်ရာတွင် ဘုရားသခင့်အကူအညီကို ယနေ့ အဘယ်ကြောင့်အထူးလိုအပ်နေသနည်း။
၃ မိမိတို့သားသမီးကို ပြုစုပျိုးထောင်ရာ၌ မိဘတို့သည် တစ်ခါနှင့်မျှမတူအောင် ယေဟောဝါ၏အကူအညီကို ယခုလိုအပ်နေသည်။ အဘယ်ကြောင့်နည်း။ နတ်ဆိုးမင်းစာတန်နှင့် သူ၏တမန်များသည် ကောင်းကင်မှ မြေကြီးသို့ပစ်ချခံခဲ့ရပြီ။ သမ္မာကျမ်းစာက ဤသို့သတိပေးသည်– “မြေကြီး . . . သည် အမင်္ဂလာရှိ၏။ အကြောင်းမူကား၊ [စာတန်] သည် မိမိကာလတစ်ခဏသာရှိသည်ကိုသိ၍၊ ပြင်းစွာသောဒေါသအမျက်နှင့်တကွ သင်တို့ရှိရာသို့ဆင်းလေပြီ။” (ဗျာ. ၁၂:၇-၉၊ ၁၂) စာတန်သည် “ဟောက်သောခြင်္သေ့ကဲ့သို့ အဘယ်သူကိုမျိုရမည်နည်းဟူ၍ လှည့်လည်ရှာဖွေလျက်ရှိ၏” ဟု သမ္မာကျမ်းစာရှင်းပြသည်။ (၁ ပေတရု ၅:၈) ခြင်္သေ့တို့မည်သည် များသောအားဖြင့် တိရစ္ဆာန်ငယ်လေးဖြစ်သော အားအနွဲ့ဆုံးသတ္တဝါများကို ဖမ်းစားလေ့ရှိသည်။ သို့ဖြစ်သောကြောင့် ခရစ်ယာန်မိဘများသည် မိမိတို့ သားသမီးများကို ကာကွယ်ရန် ယေဟောဝါထံမှ လမ်းညွှန်မှုကို ပညာရှိစွာ မျှော်ကိုးကြရပေမည်။ ထိုသို့ပြုရန် အသင် မည်မျှ အားထုတ်ကြိုးပမ်းနေသနည်း။
၄။ (က) အနီးအနားဝန်းကျင်တွင် ခြင်္သေ့တစ်ကောင် လှည့်လည်နေကြောင်းသိထားလျှင် မိဘများ မည်သို့တုံ့ပြန်သင့်သနည်း။ (ခ) အကာအကွယ်ရရန် သားသမီးများတွင် အဘယ်အရာရှိဖို့လိုသနည်း။
၄ အနီးအနားဝန်းကျင်တစ်ဝိုက်တွင် ခြင်္သေ့တစ်ကောင် လွတ်နေကြောင်း သင်သိထားပါက သားသမီးများကိုကာကွယ်ခြင်းသည် သင့်အတွက် အဓိကအရေးကိစ္စဖြစ်မည်မှာ သေချာသည်။ စာတန်သည် သားရဲတစ်ကောင်ဖြစ်သည်။ ဘုရားသခင့်လူမျိုးတော်အား အကျင့်ယိုယွင်းစေလို၏၊ သို့ဖြင့် ဘုရားသခင့်မျက်နှာသာတော် မရထိုက်သူများဖြစ်သွားစေလိုသည်။ (ယောဘ ၂:၁-၇; ၁ ယောဟန် ၅:၁၉) ကလေးသူငယ်များသည် ဖမ်းရလွယ်ကူသောသားကောင်များဖြစ်ကြသည်။ စာတန်၏ထောင်ချောက်များကို လွှဲရှောင်ဖို့ သားသမီးတို့သည် ယေဟောဝါကိုသိပြီး ကိုယ်တော်အား နာခံရကြမည်။ ကျမ်းစာအသိပညာ မရှိ၍မဖြစ်ပါ။ ယေရှုဤသို့မိန့်တော်မူခဲ့သည်– “ထာဝရအသက်ဟူမူကား၊ တစ်ဆူတည်းသောဘုရားသခင်မှန်ဖြစ်သော ကိုယ်တော်နှင့် စေလွှတ်တော်မူသော ယေရှုခရစ်နှင့်ဆိုင်သောအသိပညာကို သူတို့ဆည်းပူးယူခြင်းတည်း။” (ယောဟန် ၁၇:၃၊ ကဘ) ထို့ပြင် လူငယ်တို့သည် သင်ယူခဲ့ရာကို နားလည်ပြီး လက်တွေ့အသုံးချနိုင်စွမ်းတည်းဟူသော ဉာဏ်ပညာရှိဖို့လည်းလိုသည်။ “ပညာသည် . . . ပညာရှင်အား အသက်ရှင်စေ” သောကြောင့် အသင်မိဘများအနေနှင့် အမှန်တရားကို သားသမီးများ၏စိတ်နှလုံးထဲ တဖြည်းဖြည်းစိမ့်ဝင်စေဖို့လိုသည်။ (ဒေ. ၇:၁၂၊ သမ္မာ) ယင်းကို သင်မည်သို့ပြုမည်နည်း။
၅။ (က) ဉာဏ်ပညာကို မည်သို့ဝေမျှပေးနိုင်သနည်း။ (ခ) ဉာဏ်ပညာ၏တန်ဖိုးကို နယပုံပြင်ကျမ်းက မည်သို့ရေးသားဖော်ပြသနည်း။
၅ သင်၏သားသမီးများကို ဘုရားသခင့်နှုတ်မြွက်စကားတော်မှ ဖတ်ပြနိုင်သည်မက ဖတ်ပြသင့်သည်။ သို့သော် ယေဟောဝါကိုချစ်မြတ်နိုးပြီး နာခံမှုပြနိုင်ကြရန် သူတို့ကိုကူညီပေးရာတွင် ကျမ်းစာဖတ်ပြရုံမျှမက ယင်းကို သူတို့ နားလည်သဘောပေါက်ဖို့ လိုသည်။ ဥပမာပေးရလျှင် ဘယ်ညာမကြည့်ဘဲ လမ်းမကူးဖို့ ကလေးကိုမှာကြားမည်။ သို့တိုင် ကလေးအချို့ စကားနားမထောင်ကြပါ။ အဘယ်ကြောင့်နည်း။ ကားတိုက်ခံရခြင်းအကျိုးဆက်များကို ထပ်ခါတလဲ ကောင်းကောင်းမရှင်းပြထားသောကြောင့်၊ သို့မဟုတ် ကားတိုက်မှုဖြစ်စေနိုင်သည့် “မိုက်ရူးရဲပြုမူမှု” ကိုရှောင်ရန် အန္တရာယ်ကို ကောင်းစွာနားလည်စေသည့်နည်းဖြင့် မရှင်းပြထားသောကြောင့် ဖြစ်မည်။ ဉာဏ်ပညာပေးရန် အချိန်နှင့် စိတ်ရှည်မှုလိုသည်။ သို့သော် ဉာဏ်ပညာသည် အလွန်အဖိုးထိုက်ပေသည်! “ပညာလမ်းတို့သည် သာယာသောလမ်း၊ ပညာလမ်းခရီးရှိသမျှတို့သည် ငြိမ်ဝပ်လျက်ရှိကြ၏။ ပညာကိုကိုင်ဆွဲသောသူသည် အသက်ပင်ကိုရပြီ။ လက်မလွှတ်သောသူသည် မင်္ဂလာရှိ၏” ဟုသမ္မာကျမ်းစာကဆို၏။—သု. ၃:၁၃-၁၈; ၂၂:၁၅။
ဉာဏ်ပညာဝေမျှပေးသော သွန်သင်မှု
၆။ (က) သားသမီးများ ပညာမဲ့စွာပြုမူလေ့ရှိခြင်းသည် အဘယ်ကြောင့်နည်း။ (ခ) အဘယ်တိုက်ပွဲ ဆင်နွှဲနေသနည်း။
၆ များသောအားဖြင့် လူငယ်များ မတော်တရော်ပြုလေ့ရှိကြခြင်းမှာ သူတို့ကို မှန်ကန်ရာသွန်သင်မထား၍မဟုတ်ဘဲ သွန်သင်ချက်သည် သူတို့၏အတွင်းလူဖြစ်သော နှလုံးထဲ မရောက်သည့်အတွက်ဖြစ်သည်။ လူငယ်တို့၏နှလုံးကိုလွှမ်းမိုးရန် စာတန်တိုက်ပွဲဝင်နေပါသည်။ သူ၏အကြံအစည်မှာ လူငယ်များ သူ့လောက၏သြဇာ လွှမ်းမိုးမှုအောက် ရောက်စေရန်ဖြစ်သည်။ ထို့ပြင် သူတို့၏မွေးရာပါ အပြစ်ပြုလိုစိတ်ကို ကြိုးစားအခွင့်ကောင်းယူရန်ဖြစ်သည်။ (ကမ္ဘာဦး ၈:၂၁; ဆာလံ ၅၁:၅) ရင်သွေးများ၏နှလုံးကို လွှမ်းမိုးရန် စာတန် အမှန်တကယ်စစ်ဆင်နေကြောင်း မိဘများအသိအမှတ်ပြုရမည်။
၇။ ကလေးတစ်ဦးကို အမှား၊ အမှန်ပြောပြရုံဖြင့် အဘယ်ကြောင့် မလုံလောက်သနည်း။
၇ မိဘတို့သည် အဘယ်အရာမှားကြောင်း၊ မှန်ကြောင်း ကလေးတစ်ဦးကို ပြောပြလေ့ရှိ၏၊ ဤနည်းဖြင့် ကျင့်ဝတ်မူတစ်ခုကို သူတို့သင်ပေးပြီဟု ယူမှတ်ကြ၏။ လိမ်ခြင်း၊ ခိုးခြင်း၊ အိမ်ထောင်ဖက်မဟုတ်သူနှင့် လိင်ဆက်ဆံခြင်းတို့သည် မှား၏ဟု ကလေးကို သူတို့ပြောပြပေမည်။ သို့သော် မိဘများ ပြောပြထား၍သာမဟုတ်၊ ထိုထက်ပြင်းပြသော စေ့ဆော်မှုတစ်ခုကြောင့် ကလေး နာခံဖို့လိုသည်။ ယင်းတို့သည် ယေဟောဝါ၏ပညတ်များဖြစ်သည်။ ပညာရှိလမ်းစဉ်မှာ ဘုရားသခင့်ပညတ်တော်များကို နာခံခြင်းဖြစ်ကြောင်း ကလေးသိထားသင့်သည်။—သု. ၆:၁၆-၁၉; ဟေဗြဲ ၁၃:၄။
၈။ အဘယ်သွန်သင်မှုမျိုးက ကလေးကို ပညာရှိစွာပြုမူစေနိုင်သနည်း။
၈ စကြဝဠာကြီး၏ရှုပ်ထွေးမှု၊ မျိုးပေါင်းစုံသောသက်ရှိများ၊ ရာသီဥတုအပြောင်းအလဲ အစရှိသည်တို့က အတိုင်းအဆမဲ့ ဉာဏ်ပညာရှိသော ဖန်ဆင်းရှင်တစ်ပါးရှိကြောင်း ကလေးငယ်ကို သိနားလည်စေနိုင်သည်။ (ရောမ ၁:၂၀; ဟေဗြဲ ၃:၄) ထို့ပြင် ဘုရားသခင်သည် သူ့ကို ချစ်မြတ်နိုးကြောင်း၊ သူထာဝရအသက်ရစေဖို့ သားတော်အား စွန့်လွှတ်ခြင်းအစီအစဉ်ကို ပြုလုပ်ပေးခဲ့ကြောင်းနှင့် ဘုရားသခင့်စကားနားထောင်ခြင်းဖြင့် ကိုယ်တော်အား ပျော်ရွှင်စေနိုင်ကြောင်း သွန်သင်ပေးသင့်သည်။ သို့ပြုလျှင် ကလေးသည် စာတန်တားဆီးသည့်ကြားမှပင် ယေဟောဝါကိုဝတ်ပြုကိုးကွယ်ရန် ဆုံးဖြတ်ချက်ချလာပေမည်။—သု. ၂၂:၆; ၂၇:၁၁; ယောဟန် ၃:၁၆။
၉။ (က) အသက်ကယ်သောသွန်သင်ခြင်းပေးရန် အဘယ်အရာလိုသနည်း။ (ခ) ဖခင်များကို အဘယ်အရာပြုလုပ်ရန် ညွှန်ကြားထားသနည်း၊ ထိုတွင် အဘယ်အရာပါဝင်သနည်း။
၉ ကလေးတစ်ဦးကို အကာအကွယ်ပေးပြီး မှန်ရာကိုပြုလုပ်စေသော သွန်သင်မှုမျိုးပေးရန် အချိန်၊ အာရုံစိုက်မှုနှင့် ကြိုတင်စီစဉ်မှုတို့ ရှိဖို့လိုသည်။ ဘုရားသခင့်လမ်းညွှန်မှုကို မိဘများ လက်ခံဖို့လိုသည်။ သမ္မာကျမ်းစာက ဤသို့ဆို၏– “အဘတို့ . . . ယေဟောဝါ၏ ပဲ့ပြင်ဆုံးမခြင်းနှင့် စိတ်သဘောတော်နှင့်အညီ [သင်၏သားသမီး] တို့ကို ဆက်၍ပြုစုပျိုးထောင်ပေးကြလော့။” (ဧဖက် ၆:၄၊ ကဘ) ယင်းက အဘယ်အရာကိုဆိုလိုသနည်း။ “စိတ်သဘောတော်နှင့်အညီ” ဟုပြန်ဆိုသည့် မူရင်းဂရိစကားလုံးသည် “စိတ်သွင်းပေးခြင်း” ဟုအဓိပ္ပာယ်သက်ရောက်သည်။ တစ်နည်းအားဖြင့်ဆိုလျှင် ဖခင်များသည် ယေဟောဝါ၏စိတ်တော်ကို သားသမီးများစိတ်ထဲ သွင်းပေးကြရမည်ဖြစ်၏။ သို့ပြုခြင်းက လူငယ်များအတွက် တကယ့်အကာအကွယ်ဖြစ်ပါလိမ့်မည်! သားသမီးများ၏စိတ်ထဲတွင် ဘုရားသခင့်အကြံ၊ ကိုယ်တော့်စဉ်းစားတွေးခေါ်ပုံတို့ကို စွဲနေအောင်သွင်းပေးထားလျှင် အမှားပြုခြင်းမှ အကာအကွယ်ရကြလိမ့်မည်။
မေတ္တာစေ့ဆော်ပေးသောဆန္ဒ
၁၀။ သင့်ကလေးကို ထိရောက်စွာသွန်သင်ပေးရန် အဘယ်အရာကို သင်သိထားဖို့ အရေးကြီးသနည်း။
၁၀ သင့်ကလေးကို ကောင်းကောင်းမွန်မွန် ပြုစုပျိုးထောင်ပေးလိုသော သင်၏ဆန္ဒပြည့်စေဖို့ သင်၏ကြိုးစားအားထုတ်မှုများသည် မေတ္တာ၏စေ့ဆော်မှုအတိုင်းဖြစ်ဖို့လိုသည်။ ယင်းနှင့်ပတ်သက်၍ ကောင်းမွန်သောပြောဆိုဆက်သွယ်မှုရှိဖို့ အရေးကြီး၏။ သင့်ကလေး၏အတွေ့အကြုံများ၊ သူ၏သဘောထားများကို သိဖို့ကြိုးစားပါ။ နားနားနေနေရှိချိန်မျိုးတွင် အလိမ္မာသုံးပြီး သင့်ကလေးအား ရင်ဖွင့်စကားပြောဆိုစေပါ။ တစ်ခါတစ်ရံ သူ့စကားကြောင့် သင်ထိတ်လန့်သွားနိုင်သည်။ သို့သော် စိတ်ထိန်းထားဖို့ အထူးသတိပြုပါ။ စာနာစိတ်ပြ၍ ဂရုစိုက်နားထောင်ပေးပါ။
၁၁။ မိဘဖြစ်သူသည် ဘုရားသခင့်စိတ်တော်ကို ကလေးစိတ်ထဲ မည်သို့သွင်းပေးနိုင်သနည်း။
၁၁ လိင်အကျင့်ယိုယွင်းခြင်းကို တားမြစ်ထားသော ဘုရားသခင့်ပညတ်များအကြောင်း သင့်ကလေးအား သမ္မာကျမ်းစာမှ အကြိမ်ကြိမ်ပင် သင်ဖတ်ပြဖူးမည်။ (၁ ကောရိန္သု ၆:၁၈; ဧဖက် ၅:၅) သို့ဖြင့် ယေဟောဝါနှစ်သက်ရာနှင့် မနှစ်သက်ရာတို့ကို သင့်ကလေးသိထားပေမည်။ သို့သော် ဘုရားသခင်၏စိတ်တော်ကို ကလေးစိတ်ထဲ ထည့်သွင်းပေးရန် ထိုထက်မကပြုလုပ်ရန်လိုသည်။ ကလေးများသည် ယေဟောဝါ၏ပညတ်တော်များ၏ အရေးပါမှုကို ဆင်ခြင်သုံးသပ်တတ်ရန် အကူအညီလိုသည်။ ကိုယ်တော်၏ပညတ်တော်များသည် ဖြောင့်မတ်မှန်ကန်၍ ကောင်းကျိုးပြုကြောင်း၊ ၎င်းတို့ကို နာခံခြင်းသည် လုပ်သင့်လုပ်ထိုက်ပြီး နှစ်ခြိုက်စရာလည်းဖြစ်ကြောင်း သူတို့လက်ခံယုံကြည်ဖို့လိုသည်။ ဘုရားသခင့်ရှုမြင်ပုံကို ကလေးများလက်ခံလာစေဖို့ သမ္မာကျမ်းစာအကူအညီဖြင့် သူတို့နှင့်အတူ ကျိုးကြောင်းဆင်ခြင်မှသာလျှင် သူတို့စိတ်ထဲ ကိုယ်တော့်စိတ်တော်ကိုသွင်းပေးထားပြီဟု ဆိုနိုင်ပါမည်။
၁၂။ လိင်ဆက်ဆံခြင်းကိစ္စကို ကလေးဖြစ်သူ အမြင်မှန်ရှိစေဖို့ မိဘတစ်ဦး မည်သို့ကူညီပေးနိုင်သနည်း။
၁၂ လိင်အကြောင်းပြောဆိုဆွေးနွေးသည့်အခါ သင်ဤသို့မေးနိုင်သည်– “အိမ်ထောင်မပြုခင် လိင်မဆက်ဆံဖို့ ယေဟောဝါရဲ့ပညတ်ကို နားထောင်တဲ့အတွက် လူတစ်ယောက်မှာ ပျော်ရွှင်မှုနည်းသွားမယ်ထင်သလား။” သူအဘယ်ကြောင့် ထိုသို့ဖြေရကြောင်း ရှင်းပြစေပါ။ ကလေးတစ်ဦးမွေးဖွားလာဖို့ အံ့ဖွယ်နည်းဖြင့် ဘုရားသခင်ပြင်ဆင်ပေးထားခြင်းကို သုံးသပ်ပြီးနောက် သင်ဤသို့မေးကြည့်နိုင်သည်– “တို့ရဲ့မေတ္တာရှင်ဘုရားသခင်ဟာ တို့ဘဝမှာ မပျော်နိုင်အောင် ဥပဒေတွေ ထုတ်လိမ့်မယ်လို့ ထင်သလား။ ဒါမှမဟုတ် ဘုရားသခင်ရဲ့ပညတ်တွေဟာ တို့တွေပျော်စေဖို့၊ တို့တွေကို ကာကွယ်ပေးဖို့ဖြစ်တယ်လို့ ထင်သလား။” (ဆာလံ ၁၁၉:၁၊ ၂; ဟေရှာယ ၄၈:၁၇) ထိုကိစ္စနှင့်ပတ်သက်၍ သင့်ကလေး၏အတွေးကိုသိရှိရန် မေးမြန်းကြည့်ပါ။ ထို့နောက် လိင်အကျင့်ယိုယွင်းခြင်းကြောင့် နှလုံးပူဆွေးရပြီး ပြဿနာများဖြစ်ခဲ့သည့် သာဓကများကို အာရုံစိုက်စေပါ။ (၂ ဓမ္မရာဇဝင် ၁၃:၁-၃၃) ဘုရားသခင့်ရှုမြင်ပုံကို ကလေးနားလည်ပြီး လက်ခံလာစေဖို့ သူနှင့် ကျိုးကြောင်းဆင်ခြင်ခြင်းအားဖြင့် ဘုရားသခင့်စိတ်တော်ကို သူ့စိတ်ထဲ အတော်အတန် ထည့်သွင်းပေးနိုင်ပြီဖြစ်မည်။ သို့သော် သင်ပြုလုပ်နိုင်ရာ ရှိပါသေးသည်။
၁၃။ အဘယ်အရာကို နားလည်ထားခြင်းက ယေဟောဝါစကား နားထောင်ရန် ကလေးကို အထူးစေ့ဆော်ပေးနိုင်သနည်း။
၁၃ ယေဟောဝါစကား နားမထောင်ခြင်း၏အကျိုးဆက်များကို သွန်သင်ပြသရုံမက ကျွန်ုပ်တို့ပြုမူနေထိုင်ပုံအားဖြင့် ယေဟောဝါအပေါ် မည်သို့အကျိုးသက်ရောက်ကြောင်းကိုလည်း သင့်ကလေးအား ပညာရှိစွာ ရှင်းပြပါမည်။ ကျွန်ုပ်တို့သည် ယေဟောဝါ၏အလိုတော် မဆောင်ရွက်သည့်အခါ ကိုယ်တော့်စိတ်တော်ကို နာစေနိုင်ကြောင်း သမ္မာကျမ်းစာမှ ဖော်ပြပါ။ (ဆာလံ ၇၈:၄၁) ထို့နောက် သင်က “ယေဟောဝါစိတ်တော် မထိခိုက်စေချင်တာ ဘာကြောင့်လဲ” ဟုမေးပြီး “တို့တစ်တွေ ယေဟောဝါကိုဝတ်ပြုကြတာဟာ ကိုယ်တော့်ကို ချစ်လို့မဟုတ်ဘဲ ကိုယ်ကျိုးအတွက်ကြောင့်လို့ ဘုရားသခင့်ရန်သူ စာတန်ကပြောတယ်” ဟုရှင်းပြပါ။ ၎င်းနောက် ယောဘသည် သမာဓိစောင့်သိခြင်းအားဖြင့် ဘုရားသခင့်စိတ်တော်ကို ရွှင်ပြုံးစေခဲ့ကြောင်း၊ သို့ဖြင့် စာတန်၏မုသာစွဲဆိုချက်ကို ချေပပေးခဲ့ကြောင်း ရှင်းပြပါ။ (ယောဘ ၁:၉-၁၁; ၂၇:၅) သင့်ကလေးသည် သူ၏အပြုအမူအားဖြင့် ယေဟောဝါကို ဝမ်းနည်းစေနိုင်သကဲ့သို့ ပျော်ရွှင်စေနိုင်ကြောင်း သိနားလည်ဖို့လိုသည်။ (သု. ၂၇:၁၁) ဤအချက်နှင့် အခြားအရေးပါသော သင်ခန်းစာများစွာကို ကြီးမြတ်သောဆရာထံမှ သင်ယူလော့ *စာအုပ်ကိုအသုံးပြုခြင်းဖြင့် သင်၏ရင်သွေးများကို သွန်သင်ပေးနိုင်ပါသည်။
အားရကျေနပ်ဖွယ် ရလဒ်များ
၁၄၊ ၁၅။ (က) ဆရာစာအုပ်မှ အဘယ်အခန်းများက ကလေးတို့၏စိတ်ကို လှုံ့ဆော်ပေးခဲ့ပြီနည်း။ (ခ) ဤစာအုပ်ကိုအသုံးပြုခြင်းဖြင့် အဘယ်ရလဒ်ကောင်းများ ရခဲ့ပြီနည်း။ (စာမျက်နှာ ၁၈-၁၉ မှ လေးထောင့်ကွက်ကိုလည်းရှု။)
၁၄ ဆရာစာအုပ်ကို ခုနစ်နှစ်သား မြေးငယ်နှင့်အတူဖတ်ရှုသော ခရိုအေးရှားနိုင်ငံမှ အဘိုးအိုတစ်ဦးက မြေးဖြစ်သူ ဤသို့ပြောဆိုကြောင်း ရေးပို့ပါသည်– “မေမေက ကျွန်တော့်ကို အလုပ်တစ်ခုလုပ်ခိုင်းတယ်၊ ကျွန်တော် မလုပ်ချင်ဘူး။ ဒါနဲ့ ‘နာခံမှုက အကာအကွယ်ပေးတယ်’ ဆိုတဲ့ အခန်းကို ကျွန်တော်ပြန်သတိရတာနဲ့ မေမေ့ဆီပြန်သွားပြီး စကားနားထောင်ပါမယ်လို့ပြောလိုက်တယ်။” “ဘာကြောင့် လိမ်မပြောသင့်တဲ့အကြောင်း” ဟူသောအခန်းနှင့်ပတ်သက်၍ ယူ.အက်စ်.အေ. ဖလော်ရီဒါပြည်နယ်မှ မောင်နှံစုံတစ်စုံက ဤသို့ဆို၏– “အဲဒီသင်ခန်းစာမှာ ကလေးတွေကို ရင်ဖွင့်ပြောစေတဲ့မေးခွန်းတွေ မေးထားပြီး ဒီလိုသာမမေးရင် ဝန်ခံမှာမဟုတ်တဲ့ သူတို့ရဲ့အမှားတွေကိုလည်း ဝန်ခံစေတယ်။”
၁၅ ဆရာစာအုပ်တွင် ရုပ်ပုံပေါင်း ၂၃၀ ကျော်ပါရှိပြီး ရုပ်ပုံတစ်ပုံစီ သို့မဟုတ် ရုပ်ပုံတစ်စုချင်းစီအတွက် ပုံစာ သို့မဟုတ် ရှင်းလင်းချက်ပါရှိသည်။ ကျေးဇူးတင်စွာဖြင့် မိခင်တစ်ဦး ဤသို့ဖော်ပြသည်– “ကျွန်မရဲ့သားလေးဟာ ရုပ်ပုံတစ်ပုံကိုစိုက်ကြည့်ပြီဆိုရင် စာမျက်နှာ လှန်တာကို မကြိုက်ဘူး။ ရုပ်ပုံတွေဟာ ဆွဲဆောင်မှုရှိရုံမကဘူး သင်ခန်းစာလည်းပေးတယ်၊ အနည်းဆုံးတော့ ကလေးတွေကို မေးခွန်းတွေမေးလာစေပါတယ်။ အမှောင်ခန်းထဲမှာ ရုပ်မြင်သံကြားကြည့်နေတဲ့ ကလေးတစ်ယောက်ရဲ့ပုံနဲ့ပတ်သက်ပြီး ကျွန်မရဲ့သားက ‘မေမေ၊ အဲဒီကောင်လေး ဘာလုပ်နေတာလဲ’ လို့မေးတဲ့အခါ သူ့လေသံက တစ်ခုခုမှားနေမှန်း သူသိသလိုပဲ။” ပုံစာက “တို့လုပ်သမျှကို ဘယ်သူ မြင်နိုင်သလဲ” ဟုဆိုသည်။
ယနေ့ အရေးပါသောပညာရေး
၁၆။ ယနေ့ အဘယ်အကြောင်းကို သားသမီးများအား သွန်သင်ပေးဖို့အရေးကြီးသနည်း၊ အဘယ်ကြောင့်နည်း။
၁၆ ကလေးသူငယ်များသည် သူတို့၏လိင်အင်္ဂါများနှင့်ပတ်သက်၍ သင့်လျော်သော၊ မသင့်တော်သောအကျင့်တို့ကို သိထားဖို့လိုသည်။ သို့သော် ထိုအကြောင်းပြောဆိုဆွေးနွေးရန် မလွယ်ကူလှပေ။ သတင်းစာပင်တိုင်ဆောင်းပါးရှင်တစ်ဦးက လိင်အင်္ဂါများကိုရည်ညွှန်းသည့် စကားလုံးများအသုံးပြုခြင်းသည် ရိုင်းပျသည်ဟု ယူမှတ်သောခေတ်ကာလအတွင်း မိမိကြီးပြင်းလာကြောင်း ပြောပြခဲ့သည်။ ထို့ကြောင့် သူ၏သားသမီးများကို ယင်းအကြောင်း သွန်သင်ပေးခြင်းနှင့်ပတ်သက်၍ သူက “ကျွန်မစိတ်ကသိကအောက်ဖြစ်တတ်တာကို ချိုးနှိမ်ရမယ်” ဟုရေးသားခဲ့သည်။ အမှန်မှာ၊ စိတ်ကသိကအောက်ဖြစ်ခြင်းကြောင့် မိဘများသည် လိင်အကြောင်း ပြောဆိုဆွေးနွေးခြင်းကို ရှောင်ရှားလျှင် ကလေးတစ်ဦးအတွက် အကာအကွယ်ဖြစ်မည်မဟုတ်ပေ။ ဗလက္ကာရလုပ်သူတို့သည် ကလေး၏မသိနားမလည်မှုကို အမြတ်ထုတ်တတ်ကြသည်။ ကြီးမြတ်သောဆရာထံမှ သင်ယူလော့က ထိုအကြောင်းကို သိက္ခာရှိရှိ၊ သင့်တင့်လျောက်ပတ်စွာ ဆွေးနွေးဖော်ပြထားသည်။ သားသမီးများကို လိင်အကြောင်း ကြိုတင်အသိပေးထားခြင်းသည် သူတို့၏ပကတိရိုးသားမှုကို ပပျောက်သွားစေမည်မဟုတ်၊ အသိမပေးထားခြင်းကသာ သူတို့၏ရိုးသားဖြူစင်မှုကို ဆုံးရှုံးစေနိုင်သည်။
၁၇။ သားသမီးများအား လိင်အကြောင်းသွန်သင်ပေးရန် ဆရာစာအုပ်က မိဘများကို မည်သို့အထောက်အကူပြုသနည်း။
၁၇ မြေကြီးပေါ်ဆင်းလာပြီး သားသမီးများရခဲ့ကြသည့် ဆိုးညစ်သောကောင်းကင်တမန်များအကြောင်း အခန်း ၁၀ တွင် ဆွေးနွေးသည့်အခါ “လိင်ဆက်ဆံတာနဲ့ပတ်သက်ပြီး ကလေးတို့ ဘာသိထားကြသလဲ” ဟုမေးထားသည်။ ထိုစာအုပ်က ရိုးရိုးရှင်းရှင်း၊ သိက္ခာရှိရှိ အဖြေပေးထားသည်။ ထို့နောက် လိင်နှင့်ပတ်သက်၍ မတော်မတရားပြုသူတို့ရန်မှ ကလေးများကို မည်သို့ကာကွယ်ပေးနိုင်ကြောင်း အခန်း၃၂ကရှင်းပြသည်။ ထိုသို့သွန်သင်ပေးရန် အရေးကြီးကြောင်း စာမြောက်မြားစွာက ဖော်ပြသည်။ စာတစ်စောင်က ဤသို့ဆိုသည်– “ပြီးခဲ့တဲ့အပတ်က ကျွန်မသားလေးဂျေဗင် ကလေးအထူးကုဆရာဝန်ဆီသွားတော့ လိင်အင်္ဂါတွေကို လျော်ကန်စွာအသုံးပြုဖို့အကြောင်းကို ကလေးနဲ့ကျွန်မတို့ဆွေးနွေးထားသလားလို့မေးတယ်။ ကျွန်မတို့ရဲ့ စာအုပ်အသစ်ကိုအသုံးပြုပြီး ဆွေးနွေးခဲ့တဲ့အကြောင်းသူသိတော့ အတော်လေးသဘောကျသွားတယ်။”
၁၈။ အထိမ်းအမှတ်များကို ဂါရဝပြုခြင်းအကြောင်း ဆရာစာအုပ်က မည်သို့ဆွေးနွေးတင်ပြထားသနည်း။
၁၈ နောက်အခန်းတစ်ခုမှာ ဗာဗုလုန်နိုင်ငံကိုကိုယ်စားပြုသော ရုပ်တုတစ်ခုကို ဦးညွတ်ရန်ငြင်းဆိုခဲ့သော ကျမ်းစာထဲမှ ရှာဒရက်၊ မေရှက်နှင့် အဗေဒနေဂေါအမည်ရှိ ဟေဗြဲလူငယ်သုံးဦးအကြောင်းဖြစ်သည်။ (ဒံယေလ ၃:၁-၃၀) ဆရာစာအုပ်ကဖော်ပြသည့်အတိုင်း ဝတ်ပြုခြင်းနှင့် အလေးပြုခြင်းတို့ ဆက်စပ်နေကြောင်း အချို့သတိပြုမိချင်မှ ပြုမိကြမည်။ သို့သော် ယူ.အက်စ်. ကက်သိုလစ်မဂ္ဂဇင်းက လူတွေ့မေးမြန်းရာ၌ စာရေးဆရာ အက်ဒွက် ဂတ်ဖ်နီ၏အဆိုကို သတိပြုပါ။ သူ၏သမီးဖြစ်သူ ကျောင်းစတက်သည့်နေ့တွင် “ကျောင်း၌ ဆုတောင်းချက်အသစ်” တစ်ခုသင်ယူခဲ့ရကြောင်း သူ့ကိုပြောပြသောအခါ ယင်းကို ပြန်ဆိုပြခိုင်းသည်။ “သူ့ရဲ့လက်ကို ရင်ဘတ်ပေါ်တင်ပြီး ဂုဏ်ယူဝင့်ကြွားစွာနဲ့ ‘. . . သစ္စာစောင့်သိပါသည်’ လို့စရွတ်ဆိုပြတယ်” ဟူ၍ ဂတ်ဖ်နီပြောပြသည်။ “အဲဒီအချိန်မှာ ကျွန်တော်ချက်ချင်း သဘောပေါက်သွားတယ်။ ယေဟောဝါသက်သေတွေပြောတာ မှန်လိုက်တာ။ ကလေးတွေ ငယ်ငယ်လေးကတည်းက ကျောင်းမှာ ပုံသွင်းခံနေကြရတာကိုး၊ အမျိုးသားရေးဘာသာဝါဒပုံစံတစ်ခုဖြစ်တဲ့ မတွန့်မဆုတ် ထူးထူးကဲကဲ သစ္စာစောင့်သိဖို့ ပုံသွင်းခံနေကြရတယ်” ဟုသူဆက်ပြောသည်။
ကြိုးစားအားထုတ်ရကျိုးနပ်
၁၉။ သားသမီးများကိုသွန်သင်ပေးသည့်အတွက် အဘယ်အကျိုးကျေးဇူးများ ရရှိနိုင်မည်နည်း။
၁၉ သင်၏သားသမီးများကို သွန်သင်ပေးခြင်းသည် အမှန်တကယ်ကြိုးစားရကျိုးနပ်ပါသည်။ အမေရိကန်ပြည်ထောင်စု၊ ကဲန်းဆပ်စ်ပြည်နယ်ရှိ မိခင်တစ်ဦးသည် သားဖြစ်သူထံမှ စာတစ်စောင်ရသောအခါ မျက်ရည်ကျခဲ့ရသည်။ သူဤသို့ရေးသားခဲ့သည်– “စိတ်ပိုင်းအရ ထိခိုက်ပျက်စီးခြင်းမရှိ၊ တည်တည်ငြိမ်ငြိမ်ရှိအောင် ပြုစုပျိုးထောင်ခံခွင့် ရခဲ့တာကို ကျွန်တော်ကျေးဇူးတင်လို့မဆုံးဘူး။ မေမေနဲ့ ဖေဖေတို့ဟာ တကယ်ချီးမွမ်းခံထိုက်ပါတယ်။” (သု. ၃၁:၂၈) မိဘများစွာတို့သည် ဤအဖိုးတန်အမွေဥစ္စာကို ကာကွယ်စောင့်ရှောက်ပေးနိုင်ရန် ကြီးမြတ်သောဆရာထံမှ သင်ယူလော့စာအုပ်ဖြင့် သားသမီးများကို သွန်သင်ပေးနိုင်ကြပါသည်။
၂၀။ အဘယ်အရာကို မိဘများ အစဉ်သတိရသင့်သနည်း၊ ယင်းက သူတို့အပေါ် အဘယ်အကျိုးသက်ရောက်သင့်သနည်း။
၂၀ ကျွန်ုပ်တို့ပေးနိုင်သမျှအချိန်၊ ဂရုစိုက်မှုနှင့် ကြိုးပမ်းအားထုတ်မှုတို့ကို သားသမီးများ ရထိုက်ကြပါသည်။ သူတို့သည် အချိန်တိုလေးသာ ငယ်ရွယ်ကြ၏။ အခွင့်အရေးရတိုင်း သူတို့နှင့်အတူနေ၍ ကူညီပေးကြပါလေ။ ဘယ်သောအခါမျှ သင်တို့ နောင်တရကြမည်မဟုတ်ပါ။ သင့်ကို သူတို့ချစ်မြတ်နိုးလာကြပါလိမ့်မည်။ သားသမီးများသည် ဘုရားသခင်ပေးသောလက်ဆောင်ဖြစ်ကြောင်း အစဉ်သတိရပါ။ အလွန်အဖိုးထိုက်သော အမွေဥစ္စာများပင်! (ဆာလံ ၁၂၇:၃-၅) ထို့ကြောင့် အမွေဥစ္စာကဲ့သို့ သူတို့ကို ကြည့်ရှုစောင့်ရှောက်ပါ၊ အကြောင်းမှာ သူတို့ကိုမွေးမြူပုံနှင့်ပတ်သက်၍ ဘုရားသခင်ထံ၌ သင်စာရင်းရှင်းရလိမ့်မည်ဖြစ်၍တည်း။
[အောက်ခြေမှတ်ချက်]
^ အပိုဒ်၊ 13 ယေဟောဝါသက်သေများထုတ်ဝေသည်။ အခန်း ၄၀၊ “ဘုရားသခင် ပျော်ရွှင်အောင် ဘယ်လိုလုပ်နိုင်တဲ့အကြောင်း” ကိုရှု။
သင်မည်သို့ဖြေဆိုမည်နည်း
• မိဘတို့သည် မိမိတို့သားသမီးများကို ယနေ့ ကာကွယ်စောင့်ရှောက်ရန် အဘယ်ကြောင့် အထူးလိုအပ်နေသနည်း။
• အဘယ်သွန်သင်မှုမျိုးက ဉာဏ်ပညာပေးသနည်း။
• ယနေ့ သင်၏သားသမီးများနှင့် အဘယ်အကြောင်းကို ဆွေးနွေးရန် အရေးကြီးသနည်း။
• သားသမီးများကိုသွန်သင်ပေးရာတွင် ဆရာစာအုပ်က မိဘများကို မည်သို့ကူညီပေးခဲ့ပြီနည်း။
[လေ့လာရန်မေးခွန်းများ]
[စာမျက်နှာ ၁၈၊ ၁၉ ပါ လေးထောင့်ကွက်/ ရုပ်ပုံ]
လူတိုင်းအတွက် စာအုပ်တစ်အုပ်
မိဘများဖြစ်စေ၊ အခြားအရွယ်ရောက်သူများဖြစ်စေ ယေရှုခရစ်၏သွန်သင်ချက်များကို ကလေးသူငယ်များနှင့် ဖတ်ရှုပြီး ဆွေးနွေးနိုင်စေဖို့ ကြီးမြတ်သောဆရာထံမှ သင်ယူလော့ စာအုပ်ကို ပြင်ဆင်ထားခြင်းဖြစ်သည်။ သို့တိုင် ထိုစာအုပ်ကို မိမိတို့ဘာသာဖတ်ရှုခဲ့ကြသော လူကြီးများက သူတို့သိရှိခဲ့ရာများအတွက် အလွန်ကျေးဇူးတင်ကြောင်း ပြောပြခဲ့ကြသည်။
အမေရိကန်ပြည်ထောင်စု၊ တက္ကဆပ်ပြည်နယ်မှ အမျိုးသားတစ်ဦးက ဤသို့ဆို၏– “ကြီးမြတ်သောဆရာထံမှ သင်ယူလော့စာအုပ်ဟာ ရိုးရှင်းပြီးတော့ ထိမိတယ်၊ အသက်အရွယ်မရွေး လူတိုင်းကို၊ ၇၆ နှစ်ရှိပြီဖြစ်တဲ့ ကျွန်တော့်ကိုတောင် တိုက်တွန်းလှုံ့ဆော်ပေးပါတယ်။ ကျေးဇူးအများကြီးတင်ပါတယ်၊ ယေဟောဝါကို ငယ်ငယ်လေးကတည်းက ဝတ်ပြုခဲ့သူတစ်ဦးထံမှ။”
အင်္ဂလန်နိုင်ငံ၊ လန်ဒန်မြို့မှစာရှုသူတစ်ဦးက ဤသို့သတင်းပေးပို့သည်– “လှပတဲ့ရုပ်ပုံတွေက မိဘတွေရော ကလေးတွေရဲ့စိတ်အာရုံကိုပါ ဆွဲဆောင်မှာသေချာတယ်။ မေးခွန်းတွေနဲ့ စာအုပ်ကိုစီစဉ်ဖွဲ့စည်းထားပုံက တကယ်ပြောင်မြောက်တယ်၊ ‘ယေရှု ကာကွယ်ခံရပုံအကြောင်း’ ဆိုတဲ့ အခန်း ၃၂ မှာလို ရှင်းပြရခက်တဲ့အကြောင်းတွေကို ကိုင်တွယ်ထားပုံက တကယ်တော်တာပဲ။” သူဤသို့နိဂုံးချုပ်ခဲ့သည်– “ဒီစာအုပ်ကို ယေဟောဝါသက်သေတွေရဲ့ ကလေးတွေအတွက် အဓိကရည်စူးထုတ်ဝေတာဖြစ်ပေမဲ့ ကျွန်မအထင်တော့ ဆရာ/ဆရာမတွေနဲ့ တခြားသူတွေလည်း တစ်အုပ်လောက်လိုချင်ကြမှာ သေချာတယ်။ လာမယ့်လတွေ၊ နှစ်တွေတစ်လျှောက် အဲဒီစာအုပ်ကိုအသုံးပြုဖို့ ကျွန်မစောင့်မျှော်နေပါတယ်။”
အမေရိကန်ပြည်ထောင်စု၊ မက်ဆာချူးဆက်ပြည်နယ်မှ အမျိုးသမီးတစ်ဦးက “ကောင်းစွာကြိုတင်စီစဉ်ထားသော ရုပ်ပုံများ” အကြောင်း မှတ်ချက်ချခဲ့သည်။ သူဤသို့ရေးသားခဲ့သည်– “ကလေးတွေအတွက်ထုတ်တဲ့ စာအုပ်ဖြစ်ပေမဲ့ ဆွေးနွေးထားတဲ့အကြောင်းအရာတွေက ယေဟောဝါနဲ့ ကျွန်မတို့ရဲ့ နှစ်ကိုယ်ကြားဆက်ဆံရေးအကြောင်း ပြန်စဉ်းစားကြည့်ဖို့ ကျွန်မတို့လို အရွယ်ရောက်သူတွေကိုလည်း အထောက်အကူပြုနိုင်တယ်ဆိုတာ ကျွန်မသတိပြုမိတယ်။”
“ကောင်းလိုက်တဲ့စာအုပ်!” ဟုအမေရိကန်ပြည်ထောင်စု၊ မိန်းပြည်နယ်မှ အမျိုးသမီးတစ်ဦး ချီးမွမ်းပြောဆိုခဲ့သည်။ “ဒီစာအုပ်ဟာ ကလေးတွေအတွက်သာမကဘူး၊ ဘုရားသခင့်သားသမီးများဖြစ်တဲ့ ကျွန်မတို့အားလုံးအတွက်ပဲ။ အဲဒီစာအုပ်ကိုဖတ်တဲ့အခါ ကျွန်မအသည်းခိုက်သွားပြီး စိတ်လှုပ်ရှားလာတယ်၊ ပြီးတော့ စိတ်အေးချမ်းသွားခဲ့တယ်၊ ဒါကြောင့် ကျွန်မစိတ်ငြိမ်သက်မှုခံစားရတယ်။ ကျွန်မရဲ့ဖခင်သဖွယ်ဖြစ်တဲ့ ယေဟောဝါနဲ့ ပိုရင်းနှီးလာတယ်။ နှစ်တွေတစ်လျှောက် ကျွန်မခံစားခဲ့ရတဲ့ စိတ်ဒဏ်ရာအားလုံးကို ကိုယ်တော်ဖယ်ရှားပစ်ခဲ့ပြီး ကိုယ်တော့်ရည်ရွယ်ချက်ကိုလည်း ပိုပြီးရှင်းရှင်းလင်းလင်းသိလာစေတယ်။” သူဤသို့နိဂုံးချုပ်သည်– “‘ဒီစာအုပ်ကို ကျေးဇူးပြုပြီးဖတ်ကြည့်ပါ’ လို့ လူတိုင်းကို ကျွန်မအားပေးပါတယ်။”
ဂျပန်နိုင်ငံ၊ ကယိုတိုမြို့မှ အမျိုးသမီးတစ်ဦးက ထိုစာအုပ်ကို သူ၏မြေးများအား ဖတ်ပြသည့်အခါ သူတို့ဤသို့မေးကြသည်ဟု သတင်းပေးပို့သည်– “‘အဲဒီကောင်လေး ဘာလုပ်နေတာလဲ။ ဒီမိန်းကလေး ဘာလို့အဆူခံနေရတာလဲ။ ဒီအမေက ဘာလုပ်နေတာလဲ။ ဒီခြင်္သေ့ကကော။’ ကျွန်မတို့စိတ်ဝင်စားတဲ့အကြောင်းအရာတွေကို ဒီစာအုပ်က သင်ပေးတဲ့အတွက် စာကြည့်တိုက်မှာ ရနိုင်တဲ့ ဘယ်စာအုပ်ထက်မဆို ဒါကိုပိုကြိုက်တယ်။”
ကနေဒါနိုင်ငံ၊ ကဲလ်ဂရီမြို့မှ ဖခင်တစ်ဦးက သူသည် ထိုစာအုပ်ကိုရရချင်း သူ၏ခြောက်နှစ်သမီးနှင့် ကိုးနှစ်သားတို့ကို စဖတ်ပြခဲ့သည်ဟုဆို၏။ သူဤသို့သတင်းပေးပို့သည်– “သူတို့ ချက်ချင်းပဲ ကောင်းကောင်းတုံ့ပြန်တယ်။ ကျွန်တော့်ကလေးတွေ အာရုံစိုက်နားထောင်ပြီး စိတ်ပါလက်ပါ အဖြေပေးကြတယ်။ လေ့လာတဲ့အကြောင်းက သူတို့နဲ့ပတ်သက်တယ်လို့ ခံစားရပြီး သူတို့အကြောင်းကို ထုတ်ပြောကြတယ်။ အရမ်းစိတ်ဝင်စားကြလို့ ကျွန်တော့်သမီးကဆို အဲဒီစာအုပ်အသစ်ကို ညတိုင်းလေ့လာချင်တယ်လို့ပြောတယ်။”
သင်အံမှုတစ်ခုအပြီးတွင် ဖခင်ဖြစ်သူ ဤသို့ပြောပြသည်– “ယေဟောဝါနဲ့ ကိုယ်တော့်ရည်ရွယ်ချက်တွေအကြောင်းကို သားနဲ့ကျွန်တော် နာရီနဲ့ချီ ပြောခဲ့ကြတယ်။ စာအုပ်ထဲမှာပါတဲ့အကြောင်းတွေနဲ့ပတ်သက်ပြီး သူ့မှာမေးခွန်းတွေအများကြီးရှိတယ်တဲ့။ အိပ်ရာဝင်ခါနီးမှာ ကျွန်တော့်ကို နှုတ်ဆက်ပြီး ‘နောက်တစ်ခါ ဒီလိုပြောပြဦးနော် ဖေဖေ။ ကျွန်တော်မေးချင်တာတွေ အများကြီးရှိတယ်၊ ပြီးတော့ ယေဟောဝါအကြောင်း ကျွန်တော်အကုန်လုံးသိချင်တယ်’ လို့ပြောတော့ ကျွန်တော်မျက်ရည်ဝဲခဲ့မိတယ်။”
[စာမျက်နှာ ၁၅ ပါ ရုပ်ပုံ]
မိဘတို့၊ မာနော်၏ပုံသက်သေမှ အဘယ်အရာသင်ယူနိုင်သနည်း
[စာမျက်နှာ ၁၆ ပါ ရုပ်ပုံ]
လူငယ်တို့၊ ဟေဗြဲလူငယ်သုံးဦး၏ပုံသက်သေမှ အဘယ်အရာသင်ယူနိုင်သနည်း
[စာမျက်နှာ ၁၇ ပါ ရုပ်ပုံ]
“ဆရာ” စာအုပ်ထဲမှ ရုပ်ပုံနှင့် ပုံစာတို့သည် ထိရောက်သော သွန်သင်ခြင်း ကိရိယာများဖြစ်
အာနနိက ပေတရုကို ဘာလိမ်ပြောနေသလဲ
တို့လုပ်သမျှကို ဘယ်သူ မြင်နိုင်သလဲ