မည်သူတို့ ရှင်ပြန်ထမြောက်လာကြမည်နည်း

ဖွင့်ပါ

မည်သူတို့ ရှင်ပြန်ထမြောက်လာကြမည်နည်း

“ဤအမှုအရာကို အံ့သြခြင်းမရှိကြနှင့်။ သင်္ချိုင်းများမှာရှိသောသူအပေါင်းတို့သည် သားတော်၏စကားသံကိုကြား၍ ထွက်ရမည့်အချိန်ကာလရောက်လတ္တံ့။”—ယောဟန် ၅:၂၈၊ ၂၉။

၁။ မောရှေသည် မီးလောင်နေသောဆူးချုံကြားမှ အဘယ်ထူးဆန်းဖွယ်ကြေညာချက်ကို ကြားခဲ့သနည်း၊ နောက်ပိုင်းတွင် အဘယ်သူသည် အဆိုပါစကားများကို ပြန်ပြောင်းမိန့်ဆိုခဲ့သနည်း။

အနှစ် ၃,၅၀၀ ကျော်က အလွန်ထူးဆန်းဖွယ်ရာအဖြစ်အပျက်တစ်ခု ဖြစ်ပျက်ခဲ့၏။ မောရှေသည် ဘိုးဘေးယေသရော၏ သိုးများကို ထိန်းကျောင်းနေ၏။ ဟောရပ်တောင်အနီးတွင် ယေဟောဝါ၏ကောင်းကင်တမန်သည် ဆူးချုံထဲကထွက်သော မီးလျှံ၌ မောရှေ၏ရှေ့တွင် ထင်ရှားပြခဲ့သည်။ “မောရှေသည် ကြည့်သောအခါ မီးလောင်၍ ချုံမကျွမ်းဘဲရှိသည်ကိုမြင်” ၏ဟု ထွက်မြောက်ရာကျမ်းပါမှတ်တမ်းက ဖော်ပြသည်။ ထိုအခါ မောရှေကို ဆူးချုံကြားကခေါ်သံ ထွက်ပေါ်လာ၏။ အသံတော်ကား ‘ငါသည် သင့်အဘ၏ဘုရားသခင်၊ အာဗြဟံ၏ဘုရားသခင်၊ ဣဇာက်၏ဘုရားသခင်၊ ယာကုပ်၏ဘုရားသခင်ဖြစ်သည်’ ဟုမိန့်တော်မူ၏။ (ထွက်မြောက်ရာ ၃:၁-၆) နောက်ပိုင်း စီ.အီး. ပထမရာစုတွင် ဘုရားသခင်၏သားတော် ယေရှုကိုယ်တိုင် အဆိုပါစကားများကို ပြန်ပြောင်းမိန့်ဆိုခဲ့သည်။

၂၊ ၃။ (က) အာဗြဟံ၊ ဣဇာက်နှင့် ယာကုပ်တို့သည် အဘယ်မျှော်လင့်ချက်ကို စောင့်မျှော်နေကြသနည်း။ (ခ) အဘယ်မေးခွန်းများ ပေါ်ပေါက်လာသနည်း။

^၂ယေရှုသည် ရှင်ပြန်ထမြောက်ခြင်းကိုမယုံသော ဇဒ္ဒုကဲအချို့နှင့် ဆွေးနွေးနေသည်။ ယေရှု ဤသို့မိန့်ဆိုခဲ့၏– ‘မောရှေသည် ထာဝရဘုရားသခင်ကို အာဗြဟံ၏ဘုရားသခင်၊ ဣဇာက်၏ဘုရားသခင်၊ ယာကုပ်၏ဘုရားသခင်ဟု ချုံခန်း၌ခေါ်ဝေါ်သောအခါ သေလွန်သောသူတို့သည် ထမြောက်ကြောင်းကို ဖော်ပြခဲ့ပြီ။ ဘုရားသခင်သည် သေနေသောသူတို့၏ဘုရားသခင်မဟုတ်။ အသက်ရှင်သောသူတို့၏ ဘုရားသခင်ဖြစ်တော်မူ၏။ ထိုသူအပေါင်းတို့သည် ဘုရားသခင်၌ အသက်ရှင်ကြသည်။’ (လုကာ ၂၀:၂၇၊ ၃၇၊ ၃၈) ထိုသို့ယေရှုမိန့်ဆိုခြင်းဖြင့် ဘုရားသခင်၏မျက်မှောက်တွင် ကွယ်လွန်ခဲ့သည်မှာ ကြာနေပြီဖြစ်သော အာဗြဟံ၊ ဣဇာက်နှင့် ယာကုပ်တို့သည် ဘုရားသခင်၏မှတ်ဉာဏ်တွင် အသက်ရှင်နေကြဆဲရှိကြောင်း ထောက်ခံခဲ့သည်။ သူတို့သည် ယောဘနည်းတူ သေခြင်း၌အိပ်ပျော်ခြင်းဖြစ်သည့် “မထမ်းမနေရထမ်းရသည့် ဝန်ထုပ်” ၏ဆုံးခန်းကို စောင့်မျှော်နေကြ၏။ (ယောဘ ၁၄:၁၄၊ ကဘ) ဘုရားသခင်၏ကမ္ဘာသစ်တွင် သူတို့ ထမြောက်လာကြလိမ့်မည်။

^၃သို့သော် လူ့သမိုင်းတစ်လျှောက်တွင် ကွယ်လွန်ခဲ့ကြသည့် သန်းနှင့်ချီသော အခြားသူတို့နှင့်ပတ်သက်၍ကော အသို့နည်း။ သူတို့သည်လည်း ရှင်ပြန်ထမြောက်လာကြလိမ့်မည်လော။ ထိုမေးခွန်း၏ ကျေနပ်လောက်ဖွယ်အဖြေမရမီ လူသေသည့်အခါ အဘယ်နေရာသို့သွားကြောင်း သမ္မာကျမ်းစာမှ အဖြေကို ရှာကြည့်ကြစို့။

သေလွန်သူများ အဘယ်နေရာတွင် ရှိကြသနည်း

၄။ (က) လူတို့ သေလွန်သည့်အခါ အဘယ်နေရာသို့ ရောက်သွားကြသနည်း။ (ခ) ရှီးအိုးလ်ဟူသည် အဘယ်နည်း။

^၄သေလွန်သူများသည် “အဘယ်အရာကိုမျှမသိ” ဟုသမ္မာကျမ်းစာက ဆို၏။ သေလွန်သည့်အခါ မီးငရဲ၌ ညှဉ်းဆဲခံရခြင်း၊ လင်ဘို၌ ဝေဒနာခံစားရင်း စောင့်စားနေရခြင်းမရှိဘဲ မြေမှုန့်သို့သာ ပြန်သွားရမည်ဖြစ်သည်။ သို့ဖြစ်၍ သမ္မာကျမ်းစာက အသက်ရှင်နေသူများကို ဤသို့အကြံပြု၏– “ဆောင်ရွက်စရာအမှုရှိသမျှကို ကြိုးစားအားထုတ်၍ ဆောင်ရွက်လော့။ အကြောင်းမူကား သင်ယခုသွား၍ ရောက်ရလတ္တံ့သောအရပ်တည်းဟူသော မရဏာနိုင်ငံ [“ရှီးအိုးလ်၊” ကဘ] ၌လုပ်ဆောင်ခြင်းမရှိ။ ကြံစည်ခြင်းမရှိ။ သိပ္ပံအတတ်မရှိ။ ပညာမရှိပါတကား။” (ဒေ. ၉:၅၊ ၁၀; ကမ္ဘာဦး ၃:၁၉) “ရှီးအိုးလ်” ဟူသော ဝေါဟာရကို လူအများ မသိကြချေ။ ယင်းသည် ရင်းမြစ်မသေချာသော ဟေဗြဲစကားလုံးဖြစ်၏။ သေလွန်သူများသည် အသက်ရှင်နေကြဆဲရှိ၏ဟု ဘာသာတရားများစွာက သွန်သင်ပေးကြသော်လည်း မှုတ်သွင်းခံသမ္မာကျမ်းစာအရ ရှီးအိုးလ်၌ရှိနေသူများသည် သိစိတ်မရှိဘဲ သေလျက်ရှိကြသည်။ ရှီးအိုးလ်ဟူသည် လူသားတို့၏သာမန်သင်္ချိုင်းဖြစ်သည်။

၅၊ ၆။ ယာကုပ်သေဆုံးသည့်အခါ အဘယ်နေရာသို့ရောက်သွားပြီး ထိုတွင် မည်သူတို့နှင့် စုစည်းခဲ့သနည်း။

^၅“ရှီးအိုးလ်” ဟူသောစကားလုံးကို သမ္မာကျမ်းစာတွင် ကမ္ဘာဦး ၃၇:၃၅ ၌ ပထမဦးဆုံးတွေ့ရှိရသည်။ ဘိုးဘေးယာကုပ်သည် မိမိချစ်ရသောသား ယောသပ် မရှိတော့ဟုအထင်ဖြင့် နှစ်သိမ့်စကားကို နားမထောင်နိုင်ဘဲ “ငါ့သားရှိရာ မရဏာနိုင်ငံ [“ရှီးအိုးလ်၊” ကဘ] သို့စိတ်မသာညည်းတွားလျက် ဆင်းသက်တော့မည်” ဟုဆိုလေ၏။ မိမိ၏သားသေပြီဟုယူမှတ်ကာ ယာကုပ်သည်လည်း သေပြီး ရှီးအိုးလ်သို့ သွားလိုခဲ့၏။ နောက်ပိုင်းတွင် ယာကုပ်၏သားကြီးကိုးဦးသည် အစာရေစာရရှိရန် သားထွေးဗင်ယာမိန်ကို အီဂျစ်ပြည်သို့ ခေါ်သွားချင်ကြသည်။ သို့သော် ယာကုပ်သည် သဘောမတူနိုင်ဘဲ ဤသို့ဆို၏– “သင်တို့နှင့်အတူ ငါ့သားမသွားရ။ သူ၏အစ်ကိုသေပြီ။ သူသည် တစ်ယောက်တည်းကျန်ရစ်၏။ သင်တို့သွားရာလမ်းခရီးတွင် သူ၌ဘေးရောက်လျှင် သင်တို့သည် ငါ့ဆံပင်ဖြူကို ဝမ်းနည်းခြင်းနှင့်တကွ မရဏာနိုင်ငံ [“ရှီးအိုးလ်၊” ကဘ] သို့သက်ရောက်စေကြလိမ့်မည်။” (ကမ္ဘာဦး ၄၂:၃၆၊ ၃၈) ဤရည်ညွှန်းချက်နှစ်ခုစလုံးသည် တမလွန်ဘဝတစ်မျိုးမျိုးကိုမဟုတ်ဘဲ သေဆုံးခြင်းနှင့် ရှီးအိုးလ်ကို ဆက်စပ်၏။

^၆ယောသပ်သည် အီဂျစ်ပြည်တွင် ရိက္ခာဝန်ဖြစ်လာသည်ဟု ကမ္ဘာဦးကျမ်းမှတ်တမ်းက ဖော်ပြ၏။ သို့ဖြစ်၍ ယာကုပ်သည် ယောသပ်နှင့် ဝမ်းပန်းတသာပြန်တွေ့ဆုံနိုင်ရန် ထိုပြည်သို့ရောက်သွားလေသည်။ ထို့နောက် အသက် ၁၄၇ နှစ်အရွယ်၌ ယာကုပ်ကွယ်လွန်သည်အထိ ထိုပြည်တွင် နေထိုင်ခဲ့၏။ ယာကုပ်သေခါနီး တောင်းဆိုချက်အရ သူ၏သားများသည် ရုပ်ကလာပ်ကိုယူ၍ ခါနာန်ပြည်ရှိ မပ္ပေလမြေတွင်း၌ သင်္ဂြိုဟ်ခဲ့ကြသည်။ (ကမ္ဘာဦး ၄၇:၂၈; ၄၉:၂၉-၃၁; ၅၀:၁၂၊ ၁၃) သို့ဖြင့် ယာကုပ်သည် ဖခင်ဣဇာက်၊ အဘိုးအာဗြဟံတို့နှင့်အတူ ထိုတွင် သင်္ဂြိုဟ်ခံရလေ၏။

‘ဘိုးဘေးများစည်းဝေးရာသို့ရောက်’

၇၊ ၈။ (က) အာဗြဟံသေသည့်အခါ အဘယ်နေရာသို့ ရောက်သွားသနည်း၊ ရှင်းပြပါ။ (ခ) အခြားသူများလည်း သေသည့်အခါ ရှီးအိုးလ်သို့ရောက်သွားကြကြောင်း အဘယ်အရာက ဖော်ပြသနည်း။

^၇အစောပိုင်းတွင် ယေဟောဝါသည် အာဗြဟံနှင့်ဖွဲ့ခဲ့သော ပဋိညာဉ်ကိုအတည်ပြုပြီး သူ၏မျိုးနွယ်သည် များပြားလာလိမ့်မည်ဟု ကတိပြုသည့်အခါ အာဗြဟံ အဘယ်သို့ဖြစ်လာမည်ကို ဖော်ပြခဲ့သည်။ ယေဟောဝါက “သင်သည် ဘိုးဘေးတို့ထံသို့ ငြိမ်ဝပ်စွာသွားရလိမ့်မည်။ အသက်ကြီးရင့်လျက် သင်္ဂြိုဟ်ခြင်းကိုခံရလိမ့်မည်” ဟုမိန့်ဆိုခဲ့သည်။ (ကမ္ဘာဦး ၁၅:၁၅) ထိုအတိုင်းပင် ဖြစ်ပျက်လာသည်။ ကမ္ဘာဦး ၂၅:၇၊ ၈ ကဤသို့ဖော်ပြသည်– “ထိုနောက် အာဗြဟံသည် အသက်ကြီးရင့်၍ အိုမင်းခြင်း၊ နေ့ရက်ကာလပြည့်စုံခြင်းနှင့်တကွ . . . အသက်ချုပ်၍ . . . မိမိလူမျိုး စည်းဝေးရာသို့ ရောက်လေ၏။” ဤသူများကား မည်သူတို့နည်း။ ကမ္ဘာဦး ၁၁:၁၀-၂၆ ပါ အာဗြဟံ၏ဘိုးဘေးများစာရင်းတွင် နောဧ၏သား ရှေမအထိ ဖော်ပြထားသည်။ သို့ဖြစ်၍ အာဗြဟံသေဆုံးချိန်၌ ရှီးအိုးလ်တွင် အိပ်ပျော်နေပြီးဖြစ်သော အဆိုပါသူများနှင့် တစ်စုတစ်ဝေးဖြစ်သွား၏။

^၈“မိမိလူမျိုး စည်းဝေးရာသို့ရောက်” သည်ဟူသော အသုံးအနှုန်းကို ဟေဗြဲကျမ်းစာစောင်များတွင် အကြိမ်ကြိမ်တွေ့ရှိရ၏။ သို့ဖြစ်၍ အာဗြဟံ၏သား ဣရှမေလနှင့် မောရှေ၏အစ်ကို အာရုန်တို့သည်လည်း သေသည့်အခါ ရှီးအိုးလ်သို့သွားပြီး ထိုတွင် ရှင်ပြန်ထမြောက်ခြင်းကို စောင့်မျှော်နေကြသည်ဟုဆိုလျှင် ဆီလျော်ပေ၏။ (ကမ္ဘာဦး ၂၅:၁၇; တောလည်ရာ ၂၀:၂၃-၂၉) ထိုနည်းတူ မောရှေ၏သင်္ချိုင်းကို မည်သူမျှမသိကြငြား သူလည်း ရှီးအိုးလ်သို့ရောက်သွား၏။ (တောလည်ရာ ၂၇:၁၃; တရားဟောရာ ၃၄:၅၊ ၆) ဣသရေလခေါင်းဆောင်အဖြစ် မောရှေ၏အရိုက်အရာကိုဆက်ခံသူ ယောရှုနှင့် ၎င်းလူမျိုးဆက်တစ်ခုလုံးလည်း သေသည့်အခါ ရှီးအိုးလ်သို့ ရောက်သွားကြသည်။—တရားသူကြီး ၂:၈-၁၀။

၉။ (က) ဟေဗြဲစကားလုံး “ရှီးအိုးလ်” နှင့် ဂရိစကားလုံး “ဟေးဒီးစ်” တို့သည် တစ်နေရာတည်းကိုသာ ရည်ညွှန်းကြောင်း သမ္မာကျမ်းစာက မည်သို့ဖော်ပြသနည်း။ (ခ) ရှီးအိုးလ် သို့မဟုတ် ဟေးဒီးစ်၌ရှိကြသူများတွင် အဘယ်မျှော်လင့်ချက်ရှိသနည်း။

^၉ရာစုနှစ်များစွာအကြာတွင် ဒါဝိဒ်သည် ဣသရေလ ၁၂ နွယ်စလုံး၏ ရှင်ဘုရင်ဖြစ်လာလေသည်။ သူသေသည့်အခါ “ဘိုးတော်ဘေးတော်တို့နှင့်အိပ်ပျော်” ခဲ့သည်။ (၃ ဓမ္မရာဇဝင် ၂:၁၀) သူသည်လည်း ရှီးအိုးလ်သို့သွားခဲ့သလော။ စိတ်ဝင်စားစရာမှာ စီ.အီး. ၃၃ ခုနှစ်၊ ပင်တေကုတ္တေပွဲနေ့တွင် တမန်တော်ပေတရုသည် ဒါဝိဒ်၏သေခြင်းကို ရည်ညွှန်း၍ ဆာလံ ၁၆:၁၀ ကို ဤသို့ကိုးကားဖော်ပြခဲ့သည်– “ကိုယ်တော်သည် အကျွန်ုပ်၏ဝိညာဉ်ကို မရဏာနိုင်ငံ [“ရှီးအိုးလ်၊” ကဘ] ၌ပစ်ထားတော်မမူ။” ဒါဝိဒ်သည် သင်္ချိုင်းတွင် ယခုထိတိုင်ရှိနေဆဲဟု ပေတရုပြောပြီးနောက် ဤစကားများသည် ယေရှုနှင့် သက်ဆိုင်ပြီး ဒါဝိဒ်သည် ‘ခရစ်တော်၏ထမြောက်ခြင်းအကြောင်းကို ရည်မှတ်လျက် ထိုခရစ်တော်ကို မရဏာနိုင်ငံ [“ဟေးဒီးစ်၊” ကဘ] ၌ပစ်ထားတော်မမူ။ အသားသည်လည်း ပုပ်စပ်ခြင်းသို့မရောက်ဟုဟော’ ကြောင်း ဖော်ပြခဲ့သည်။ (တမန်တော် ၂:၂၉-၃၂) ဤတွင် ဟေဗြဲစကားလုံး “ရှီးအိုးလ်” နှင့်အဓိပ္ပာယ်တူသည့် ဂရိစကားလုံး “ဟေးဒီးစ်” ကိုပေတရုအသုံးပြုခဲ့သည်။ ထို့ကြောင့် ဟေးဒီးစ်၌ရှိနေသည်ဟု ထင်ရသူများသည် ရှီးအိုးလ်၌ရှိနေသည်ဟု ထင်ရသူများနှင့် အခြေအနေချင်းအတူတူပင်။ သူတို့သည် ရှင်ပြန်ထမြောက်ခြင်းကို စောင့်မျှော်လျက်ရှိကြသည်။

ရှီးအိုးလ်၌ မဖြောင့်မတ်သူများရှိသလော

၁၀၊ ၁၁။ မဖြောင့်မတ်သူအချို့ သေသည့်အခါ ရှီးအိုးလ် သို့မဟုတ် ဟေးဒီးစ်သို့ ရောက်သွားသည်ဟု ကျွန်ုပ်တို့ အဘယ်ကြောင့်ဆိုနိုင်သနည်း။

^၁၀မောရှေသည် အီဂျစ်ပြည်မှ ဣသရေလလူမျိုးကို ခေါ်ထုတ်လာပြီးနောက် တောကန္တာရတွင် ပုန်ကန်မှုကြီးတစ်ခု ဖြစ်ပွားခဲ့သည်။ ထိုအခါ ခေါင်းဆောင်များဖြစ်ကြသော ကောရ၊ ဒါသန်၊ အဘိရံတို့နှင့် သီးခြားနေကြရန် လူတို့ကို မောရှေမိန့်ဆိုခဲ့သည်။ သူတို့သည် အသေဆိုးနှင့်သေရကြလိမ့်မည်။ မောရှေက ဤသို့ရှင်းပြခဲ့သည်– ‘ခပ်သိမ်းသောလူသတ္တဝါတို့ခံရသောသေခြင်း၊ ခပ်သိမ်းသောလူသတ္တဝါတို့ခံရသော ဆုံးမခြင်းကိုသာ ဤလူတို့ခံရလျှင် ထာဝရဘုရားသခင်သည် ငါ့ကိုစေလွှတ်တော်မမူ။ သို့မဟုတ် ထာဝရဘုရားသခင်သည် အသစ်ဖန်ဆင်းတော်မူသဖြင့် မြေကြီးကွဲပွင့်လျက် ဤလူတို့ကိုလည်းကောင်း၊ သူတို့နှင့်ဆိုင်သမျှကိုလည်းကောင်း မျို၍ သူတို့သည် အသက်ရှင်လျက် သေမင်းနိုင်ငံ [“ရှီးအိုးလ်၊” ကဘ] သို့ဆင်းသွားလျှင် ထာဝရဘုရားသခင်၌ ပြစ်မှားကြောင်းကို သင်တို့သည် သိနားလည်ရကြလိမ့်မည်။’ (တောလည်ရာ ၁၆:၂၉၊ ၃၀) ထို့ကြောင့် ကောရနှင့် သူ၏ဘက်တော်သားများဖြစ်ကြသော လေဝိသားအယောက် ၂၅၀ တို့၏ကိစ္စမှာကဲ့သို့ မြေကြီးပွင့်၍ မျိုချခံရ၍လည်းကောင်း၊ မီးလောင်၍လည်းကောင်း အသက်ဆုံးရှုံးခဲ့သော အဆိုပါပုန်ကန်သူအားလုံးသည် ရှီးအိုးလ် သို့မဟုတ် ဟေးဒီးစ်၌ ဇာတ်သိမ်းခဲ့ကြရသည်။—တောလည်ရာ ၂၆:၁၀။

^၁၁ရှင်ဘုရင်ဒါဝိဒ်ကို ကျိန်ခဲ့သော ရှိမိသည် ဒါဝိဒ်၏အရိုက်အရာဆက်ခံသူ ရှောလမုန်လက်ချက်ဖြင့် အပြစ်စီရင်ခံခဲ့ရသည်။ ဒါဝိဒ်က “ထိုသူကို အပြစ်မရှိသောသူကဲ့သို့မမှတ်ရဘဲ သင်သည် လိမ္မာသောသူဖြစ်၍ သူ၌အဘယ်သို့စီရင်သင့်သည်ကို သိသည်နှင့်အညီ ဆံပင်ဖြူသော ထိုသူ၏ခေါင်းကို အသေသတ်ခြင်းအားဖြင့် မရဏာနိုင်ငံ [“ရှီးအိုးလ်၊” ကဘ] သို့ဆင်းစေလော့” ဟုမိန့်မှာခဲ့သည်။ ရှောလမုန်သည် ထိုပြစ်ဒဏ်အတိုင်း ဆောင်ရွက်ရန် ဗေနာယကို စေခိုင်းခဲ့သည်။ (၃ ဓမ္မရာဇဝင် ၂:၈၊ ၉၊ ၄၄-၄၆) ဗေနာယကွပ်မျက်ခဲ့သူ နောက်တစ်ဦးမှာ ဣသရေလဗိုလ်ချုပ်ဟောင်း ယွာဘဖြစ်၏။ ဆံပင်ဖြူသော ထိုသူသည် “မရဏာနိုင်ငံ [“ရှီးအိုးလ်၊” ကဘ] သို့ငြိမ်ဝပ်စွာမဆင်း” ခဲ့ရချေ။ (၃ ဓမ္မရာဇဝင် ၂:၅၊ ၆၊ ၂၈-၃၄) ဤပုံနမူနာနှစ်ခုစလုံးက ဒါဝိဒ်၏မှုတ်သွင်းခံ ဤသီချင်းမှန်ကန်ကြောင်း ဖော်ပြ၏– “မတရားသောသူတို့နှင့် ဘုရားသခင်ကို မေ့လျော့သောအမျိုးသားအပေါင်းတို့သည် မရဏာနိုင်ငံ [“ရှီးအိုးလ်၊” ကဘ] သို့နှင်ခြင်းကို ခံရကြလိမ့်မည်။”—ဆာလံ ၉:၁၇။

၁၂။ အဟိသောဖေလကား မည်သူနည်း၊ သူသေသည့်အခါ အဘယ်နေရာသို့ ရောက်သွားသနည်း။

^၁၂အဟိသောဖေလသည် ဒါဝိဒ်၏ပုဂ္ဂိုလ်ရေးအကြံပေးသူဖြစ်သည်။ သူ၏အကြံပြုချက်ကို ယေဟောဝါထံတော်မှလာသကဲ့သို့ အရေးပေးတတ်ကြသည်။ (၂ ဓမ္မရာဇဝင် ၁၆:၂၃) ဝမ်းနည်းစရာမှာ ယုံကြည်စိတ်ချရသော ဤကျေးကျွန်သည် သစ္စာဖောက်ကာ ဒါဝိဒ်၏သား အဗရှလုံဦးဆောင်သော ပုန်ကန်မှုတွင် ပါဝင်ခဲ့၏။ အဆိုပါသစ္စာဖောက်မှုကို ဒါဝိဒ်ရည်စူး၍ ဤသို့ရေးသားခဲ့ကြောင်း ထင်ရှား၏– “ငါ့ကိုကဲ့ရဲ့သောသူသည် ငါ့ရန်သူမဟုတ်။ ဟုတ်လျှင် သည်းခံနိုင်၏။ ငါ့ကိုရန်ဘက်ပြုသောသူသည် ငါ့ကိုမုန်းသောသူ မဟုတ်။ ဟုတ်လျှင် ထိုသူကို ငါရှောင်နိုင်၏။” ဒါဝိဒ်သည် ဤသို့ဆက်ရေး၏– “သူတို့ကို သေမင်းဖမ်းဆီးပါစေ။ အသက်ရှင်လျက် မရဏာနိုင်ငံ [“ရှီးအိုးလ်၊” ကဘ] သို့ဆင်းသက်ကြပါစေ။ အကြောင်းမူကား [မကောင်းမှု]တို့သည် သူတို့နေရာတွင် သူတို့အထဲ၌ရှိကြ၏။” (ဆာလံ ၅၅:၁၂-၁၅) အဟိသောဖေလနှင့် သူ၏အပေါင်းပါများသည် သေသည့်အခါ ရှီးအိုးလ်သို့ ရောက်သွားကြ၏။

ဂေဟင်္နာ၌ မည်သူတို့ရှိကြသနည်း

၁၃။ ယုဒကို “ပျက်စီးခြင်း၏သား” ဟုအဘယ်ကြောင့်ခေါ်ဆိုသနည်း။

^၁၃ဒါဝိဒ်၏အဖြစ်အပျက်နှင့် သာ၍ကြီးမြတ်သောဒါဝိဒ်ဖြစ်သူ ယေရှု၏အဖြစ်အပျက်ကို နှိုင်းယှဉ်ကြည့်ပါ။ ခရစ်တော်၏ တမန်တော် ၁၂ ပါးမှ တစ်ပါးဖြစ်သူ ယုဒရှကာရုတ်သည် အဟိသောဖေလနည်းတူ သစ္စာဖောက်ခဲ့၏။ ယုဒ၏သစ္စာဖောက်မှုသည် အဟိသောဖေလထက် ပို၍အပြစ်ကြီးလေးသည်။ ယုဒသည် ဘုရားသခင်၏တစ်ပါးတည်းသော သားတော်ကို သစ္စာဖောက်ခဲ့ခြင်းဖြစ်သည်။ ဘုရားသခင်၏သားတော်သည် မြေကြီးဓမ္မအမှုဆောင်ချိန်အဆုံး၌ သူ၏နောက်လိုက်များအကြောင်း ဤသို့ဆုတောင်းခဲ့သည်– “အကျွန်ုပ်သည် ဤလောက၌ ဤသူတို့နှင့်တကွရှိစဉ်ကာလ၊ သူတို့ကို ကိုယ်တော်၏နာမ၌တည်စေပါပြီ။ အကျွန်ုပ်အား ပေးတော်မူသောသူတို့ကို အကျွန်ုပ်စောင့်မပါပြီ။ ထိုသူတို့တွင် ပျက်စီးခြင်း၏သားတစ်ယောက်မှတစ်ပါး အဘယ်သူမျှ ပျက်စီးခြင်းသို့မရောက်ပါ။ ထိုသူသည် ပျက်စီးခြင်းသို့ရောက်သည်အကြောင်းကား ကျမ်းစာပြည့်စုံမည်အကြောင်းတည်း။” (ယောဟန် ၁၇:၁၂) ဤတွင် ယုဒကို “ပျက်စီးခြင်း၏သား” ဟုခေါ်ဆိုခြင်းဖြင့် ယုဒသေဆုံးသည့်အခါ သူ့အတွက် ပြန်အသက်ရှင်လာမည့် မျှော်လင့်ချက်မရှိကြောင်း ယေရှုဖော်ပြခဲ့သည်။ ထို့ကြောင့် ဘုရားသခင်၏မှတ်ဉာဏ်တွင် သူရှိမည်မဟုတ်ချေ။ သူသည် ရှီးအိုးလ်သို့မဟုတ်ဘဲ ဂေဟင်္နာသို့ ရောက်သွားခဲ့သည်။ ဂေဟင်္နာကား အဘယ်နည်း။

၁၄။ ဂေဟင်္နာသည် အဘယ်အရာကို ပုံဆောင်သနည်း။

^၁၄ယေရှု၏တစ်ခေတ်တည်းသား ဘာသာရေးခေါင်းဆောင်များသည် သူတို့၏တပည့်တစ်ဦးစီကို “ငရဲ [“ဂေဟင်္နာ၊” ကဘ] သား” ဖြစ်စေသောကြောင့် သူတို့ကို ကိုယ်တော်ပြစ်ဒဏ်စီရင်ခဲ့သည်။ (မဿဲ ၂၃:၁၅) ထိုခေတ်ကလူတို့သည် အမှိုက်ကျင်းအဖြစ် အသုံးပြုသော ဟိန္နုံချိုင့်ကို ကောင်းစွာသိရှိခဲ့ကြသည်၊ ထိုနေရာတွင် သင်္ဂြိုဟ်ခြင်းမခံထိုက်သော ရာဇဝတ်ကောင်များ၏ရုပ်ကလာပ်ကို ပစ်ချလေ့ရှိသည်။ ထိုမတိုင်မီက တောင်ပေါ်တရားတော်တွင် ဂေဟင်္နာအကြောင်း ယေရှုဖော်ပြခဲ့ပြီဖြစ်သည်။ (မဿဲ ၅:၂၉၊ ၃၀) ယင်း၏ပုံဆောင်အဓိပ္ပာယ်ကို ကိုယ်တော်၏ပရိသတ်များ ကောင်းစွာနားလည်ကြသည်။ ဂေဟင်္နာဟူသည် ရှင်ပြန်ထမြောက်ခြင်းမျှော်လင့်ချက်မရှိသည့် လုံးဝပျက်စီးခြင်းကို ပုံဆောင်၏။ ယေရှုခေတ်က ယုဒရှကာရုတ်အပြင် တခြားသူများ သေဆုံးသည့်အခါ ရှီးအိုးလ် သို့မဟုတ် ဟေးဒီးစ်သို့မဟုတ်ဘဲ ဂေဟင်္နာသို့ရောက်သွားကြသလော။

၁၅၊ ၁၆။ ဂေဟင်္နာသို့ရောက်သွားကြသည့် သေလွန်သူများကား အဘယ်သူတို့နည်း၊ သူတို့သည် ထိုနေရာသို့ အဘယ်ကြောင့် ရောက်သွားကြသနည်း။

^၁၅ကနဦးလူသား အာဒံနှင့်ဧဝတို့သည် စုံလင်သောအသက်ဖြင့် ဖန်ဆင်းခံခဲ့ရသည်။ သူတို့သည် တမင်တကာအပြစ်ပြုခဲ့ကြ၏။ အမှန်မှာ ထာဝရအသက် သို့မဟုတ် သေခြင်းကို သူတို့ရွေးခွင့်ရ၏။ သူတို့သည် ဘုရားသခင်ကို အာခံပြီး စာတန်ဘက် ပါသွားလေသည်။ သူတို့သေသည့်အခါ ခရစ်တော်၏ရွေးနုတ်ဖိုးပူဇော်ရာယဇ်မှ အကျိုးခံစားခွင့် ရရှိတော့မည်မဟုတ်ပါ။ သို့နှင့် ဂေဟင်္နာသို့ သူတို့ရောက်သွားကြ၏။

^၁၆အာဒံ၏သားဦး ကာဣနသည် သူ၏ညီအာဗေလကို သတ်ပြီးနောက် ထွက်ပြေးတိမ်းရှောင်ခဲ့၏။ တမန်တော်ယောဟန်က ကာဣနကို ‘စာတန်၏သား’ ဟုခေါ်ဆိုခဲ့သည်။ (၁ ယောဟန် ၃:၁၂) ထို့ကြောင့် သူ၏မိဘများကဲ့သို့ ကာဣနသေသည့်အခါ ဂေဟင်္နာသို့ရောက်သွားမည်ဟု ကောက်ချက်ချရန် ဆီလျော်၏။ (မဿဲ ၂၃:၃၃၊ ၃၅) ယင်းသည် ဖြောင့်မတ်သောအာဗေလ၏အခြေအနေနှင့် ကွာခြားလိုက်လေခြင်း! ပေါလုက ဤသို့ဆို၏– “အာဗေလသည် ကာဣန ပူဇော်သောယဇ်ထက် သာ၍မြတ်သောယဇ်ကို ယုံကြည်ခြင်းအားဖြင့် ဘုရားသခင်အား ပူဇော်၏။ ထိုသို့သောယဇ်ကိုပူဇော်၍ မိမိဖြောင့်မတ်သည်ဟု သက်သေခံတော်မူခြင်းကိုရလေ၏။ အဘယ်သို့နည်းဟူမူကား သူလှူသောအလှူကို ဘုရားသခင်သည် လက်ခံတော်မူ၏။ သို့ဖြစ်၍ အာဗေလသည် သေလွန်သော်လည်း ယခုပင် တရားဟောသေး၏။” (ဟေဗြဲ ၁၁:၄) မှန်ပါသည်၊ အာဗေလသည် လောလောဆယ် ရှီးအိုးလ်၌ရှိပြီး ရှင်ပြန်ထမြောက်ခြင်းကို စောင့်မျှော်နေ၏။

“ပထမ” နှင့် “သာ၍မြတ်သော” ရှင်ပြန်ထမြောက်ခြင်း

၁၇။ (က) ဤ ‘ဆုံးခန်းကာလ’ အတွင်း အဘယ်သူများသည် ရှီးအိုးလ်သို့ ရောက်သွားကြသနည်း။ (ခ) ရှီးအိုးလ်၌ရှိသူများနှင့် ဂေဟင်္နာ၌ရှိသူများ၏ မျှော်လင့်ချက်ကား အဘယ်နည်း။

^၁၇ဤအကြောင်းကို ဖတ်ရှုသူအများသည် ဤ ‘ဆုံးခန်းကာလ’ အတွင်း သေလွန်သူများ၏အခြေအနေအကြောင်း သိလိုကြပေမည်။ (ဒံယေလ ၈:၁၉) ဗျာ. အခန်းကြီး ၆ ကထိုအချိန်ကာလအတွင်း မြင်းစီးသူရဲလေးဦးအကြောင်း ဖော်ပြထားသည်။ စိတ်ဝင်စားစရာမှာ၊ နောက်ဆုံးမြင်းစီးသူရဲကို သေခြင်းဟုခေါ်ဆိုပြီး သူ၏နောက်တွင် ဟေးဒီးစ်လိုက်ပါလာ၏။ ထို့ကြောင့် ရှေ့တွင်ရှိ မြင်းစီးသူရဲများ၏လုပ်ဆောင်မှုကြောင့် အချိန်မတန်မီ ကွယ်လွန်သွားသူများစွာသည် ဟေးဒီးစ်တွင် အဆုံးသတ်သွားပြီး ထိုတွင် ဘုရားသခင့်ကမ္ဘာသစ်၌ ရှင်ပြန်ထမြောက်ခြင်းကို စောင့်မျှော်နေကြ၏။ (ဗျာ. ၆:၈၊ ကဘ) သို့ဖြစ်လျှင် ရှီးအိုးလ် (ဟေးဒီးစ်) ၌ရှိနေသူများနှင့် ဂေဟင်္နာ၌ရှိနေသူများ၏ မျှော်လင့်ချက်ကား အဘယ်နည်း။ ရိုးရှင်းစွာပြောရလျှင် ရှီးအိုးလ်၌ရှိနေသူများသည် ရှင်ပြန်ထမြောက်လာကြမည်ဖြစ်ပြီး ဂေဟင်္နာ၌ရှိနေသူများမူ ထာဝရပျက်စီးခြင်းဖြစ်သည့် လုံးဝပျောက်ကွယ်သွားခြင်းဖြစ်သည်။

၁၈။ “ပထမထမြောက်ခြင်း” က အဘယ်မျှော်လင့်ချက်ရှိစေသနည်း။

^၁၈တမန်တော်ယောဟန်က ဤသို့ရေးသားခဲ့သည်– “ပထမထမြောက်ခြင်းကို ဝင်စားသောသူသည် မင်္ဂလာရှိသောသူ၊ သန့်ရှင်းသောသူဖြစ်၏။ ထိုသို့သောသူသည် ဒုတိယသေခြင်း၏လက်နှင့် ကင်းလွတ်လျက် ဘုရားသခင်၏ယဇ်ပုရောဟိတ်၊ ခရစ်တော်၏ယဇ်ပုရောဟိတ်ဖြစ်၍ အနှစ်တစ်ထောင်ပတ်လုံး ခရစ်တော်နှင့်အတူ စိုးစံရကြလိမ့်မည်။” ခရစ်တော်နှင့်တွဲဖက်အုပ်ချုပ်မည့်သူများသည် “ပထမထမြောက်ခြင်း” ကိုဝင်စားကြသည်၊ သို့သော် ကျန်လူသားများအတွက် အဘယ်မျှော်လင့်ချက်ရှိသနည်း။—ဗျာ. ၂၀:၆။

၁၉။ အချို့သူတို့သည် “သာ၍မြတ်သောထမြောက်ခြင်း” မှမည်သို့အကျိုးရရှိကြသနည်း။

^၁၉ဘုရားသခင်၏ကျေးကျွန်များဖြစ်ကြသော ဧလိယနှင့် ဧလိရှဲတို့ခေတ်ကတည်းက ရှင်ပြန်ထမြောက်ခြင်းအံ့ဖွယ်အမှုကြောင့် လူတို့ အသက်ပြန်ရှင်လာကြသည်။ “မိန်းမတို့သည်လည်း သေခြင်းမှထမြောက်သော မိမိတို့သားကို ရပြန်ကြ၏။ အချို့သောသူတို့သည် သာ၍မြတ်သောထမြောက်ခြင်းသို့ရောက်လိုသောငှာ လွှတ်ခြင်းကိုမခံမယူဘဲ ပြင်းစွာသောညှဉ်းဆဲခြင်းကိုခံကြ၏” ဟုပေါလုထုတ်ဖော်ပြောသည်။ အဆိုပါတည်ကြည်သော သမာဓိစောင့်ထိန်းသူများသည် သေဆုံးရမည့် နှစ်အနည်းငယ်မျှသာ အသက်ရှင်ရာထမြောက်ခြင်းကိုမဟုတ်ဘဲ ထာဝရအသက်ရရန် မျှော်လင့်ကြ၏! ၎င်းသည် အမှန်ပင် “သာ၍မြတ်သောထမြောက်ခြင်း” ဖြစ်ပေလိမ့်မည်။—ဟေဗြဲ ၁၁:၃၅။

၂၀။ နောက်ဆောင်းပါးတွင် အဘယ်အကြောင်းအရာကို ဆွေးနွေးသုံးသပ်မည်နည်း။

^၂၀ဤစနစ်ဆိုးကို ယေဟောဝါအဆုံးမတိုင်မီ ကျွန်ုပ်တို့ တည်ကြည်စွာ သေဆုံးသွားလျှင် “သာ၍မြတ်သောထမြောက်ခြင်း” ရရှိမည်မှာ သေချာ၏၊ ထိုထမြောက်ခြင်းသည် ထာဝရအသက်ရရှိစေသဖြင့် သာ၍ကောင်း၏။ ယေရှုက “ဤအမှုအရာကို အံ့သြခြင်းမရှိကြနှင့်။ သင်္ချိုင်းများမှာရှိသောသူအပေါင်းတို့သည် သားတော်၏စကားသံကို ကြား၍ ထွက်ရမည့်အချိန်ကာလရောက်လတ္တံ့” ဟု ကတိပြုခဲ့သည်။ (ယောဟန် ၅:၂၈၊ ၂၉) ရှင်ပြန်ထမြောက်ရခြင်း၏ရည်ရွယ်ချက်ကို နောက်ဆောင်းပါးတွင် ထပ်၍ဆွေးနွေးသုံးသပ်ပါမည်။ ရှင်ပြန်ထမြောက်ခြင်းမျှော်လင့်ချက်သည် ကျွန်ုပ်တို့အား သမာဓိစောင့်ထိန်းသူများ ဖြစ်စေရန် မည်သို့ခွန်အားရှိစေပြီး ကိုယ်ကျိုးစွန့်စိတ်ဓာတ်ကိုပါ မည်သို့ရှိစေကြောင်း ဖော်ပြပါလိမ့်မည်။

သင်မှတ်မိသလော

• ယေဟောဝါသည် မိမိကိုယ်ကို “အသက်ရှင်သောသူတို့၏” ဘုရားသခင်ဖြစ်သည်ဟု အဘယ်ကြောင့်ဖော်ပြသနည်း။

• ရှီးအိုးလ်၌ရှိသူများ၏ အခြေအနေကား အဘယ်နည်း။

• ဂေဟင်္နာ၌ရှိသူများအတွက် မျှော်လင့်ချက်ကား အဘယ်နည်း။

• အချို့သူတို့သည် “သာ၍မြတ်သောထမြောက်ခြင်း” မှ မည်သို့အကျိုးရရှိကြမည်နည်း။

[လေ့လာရန်မေးခွန်းများ]

[စာမျက်နှာ ၁၅ ပါ ရုပ်ပုံ]

ရှီးအိုးလ်သို့ရောက်နေသူများသည် အာဗြဟံကဲ့သို့ ရှင်ပြန်ထမြောက်လာနိုင်စရာအကြောင်းရှိ

[စာမျက်နှာ ၁၆ ပါ ရုပ်ပုံများ]

အာဒံနှင့်ဧဝ၊ ကာဣနနှင့် ယုဒရှကာရုတ်တို့သည် ဂေဟင်္နာသို့ အဘယ်ကြောင့် ရောက်သွားကြသနည်း

ကင်းမျှော်စင်—လေ့လာရန် စာစောင်