ဘုရားသခင့်အသိပညာဖြင့် မိသားစုများ ခိုင်မြဲ
‘ကူညီမစမှုကို ယေဟောဝါထံတော်မှ ငါရ၏’
ဘုရားသခင့်အသိပညာဖြင့် မိသားစုများ ခိုင်မြဲ
“ဘာလင်တံတိုင်းကြီး။” အာဂျင်တီးနားရှိ ဇနီးမောင်နှံတစ်စုံသည် သူတို့၏အိမ်ကို နှစ်ပိုင်းခွဲထားရန် တည်ဆောက်ထားသည့်နံရံကို ထိုသို့ပင် သူတို့ခေါ်ခဲ့၏! သူတို့တွင် ပြန်မသင့်မြတ်နိုင်သည့် သဘောထားကွဲလွဲမှုများရှိနေ၍ တစ်ဦးကိုတစ်ဦး ကြည့်မရဖြစ်နေကြသည်။
ဝမ်းနည်းစရာမှာ၊ အဆိုပါဇနီးမောင်နှံတို့သာ ထိုသို့ဖြစ်နေသည်မဟုတ်ပါ။ မိသားစုများစွာတွင် စကားများခြင်း၊ ဖောက်ပြန်ခြင်း၊ အကြီးအကျယ်ရန်လိုခြင်းတို့ဖြစ်နေကြသည်။ မိသားစုအစီအစဉ်ကို ဘုရားသခင်ကိုယ်တော်တိုင် အစပြုတီထွင်ခဲ့သောကြောင့် ယင်းသို့ဖြစ်နေခြင်းသည် ဝမ်းနည်းစရာပင်။ (ကမ္ဘာဦး ၁:၂၇၊ ၂၈; ၂:၂၃၊ ၂၄) အမှန်မှာ ဘုရားသခင်၏ဆုကျေးဇူးဖြစ်သည့် မိသားစုသည် အချင်းချင်းအလွန်ချစ်မြတ်နိုးကြောင်း ဖော်ပြရန် အကောင်းဆုံးနေရာဖြစ်သည်။ (ရုသ ၁:၉) မိသားစုတစ်စုလုံးသည် ဘုရားသခင်ပေးထားသော မိမိတို့၏တာဝန်များကို ကျေပွန်ခြင်းဖြင့် ယေဟောဝါအား ဂုဏ်တင်နိုင်ပြီး အချင်းချင်းအတွက်လည်း ကောင်းချီးဖြစ်စေနိုင်သည်။ *
မိသားစုအစီအစဉ်ကို ဘုရားသခင်အစပြုခဲ့ရာ မိသားစုများ မည်သို့ဖြစ်သင့်ကြောင်းသိရှိဖို့ ကိုယ်တော်ရှုမြင်သည့်အတိုင်း ရှုမြင်ရန်လိုသည်။ အထူးသဖြင့် အခက်အခဲများ ပေါ်လာသည့်အခါ မိသားစုဘဝ အောင်မြင်စေရန် လက်တွေ့ကျအကြံပြုချက်များကို သမ္မာကျမ်းစာက ဖော်ပြထားသည်။ လင်ယောက်ျားများနှင့်ပတ်သက်၍ ကျမ်းစာက “ယောက်ျားတို့သည် မိမိကိုယ်ကိုချစ်သကဲ့သို့ မိမိခင်ပွန်းတို့ကို ချစ်ရကြမည်” ဟုဆို၏။ ဤတောင်းဆိုချက်အတိုင်း လင်ယောက်ျားပြုမူသည့်အခါ သူ၏ဇနီးသည် “ကိုယ်ခင်ပွန်းကို အလွန်ရိုသေ” မည်ဖြစ်သည်။—ဧဖက် ၅:၂၅-၂၉၊ ၃၃၊ ကဘ။
မိဘနှင့် သားသမီးစပ်ကြား ဆက်ဆံရေးနှင့်ပတ်သက်၍ တမန်တော်ပေါလုက ဤသို့ရေးသားခဲ့သည်– “အဘတို့၊ ကိုယ်သားသမီးကို စိတ်ဆိုးစေခြင်းငှာ မပြုကြနှင့်။ သခင်ဘုရား၏အလိုတော်နှင့်ညီသော ဆုံးမသွန်သင်ခြင်းကိုပြုလျက် ကျွေးမွေးကြလော့။” (ဧဖက် ၆:၄) ယင်းက မိဘစကားကို သားသမီးများနာခံဖို့ သာ၍လွယ်ကူစေသည့် နွေးထွေးလှိုက်လှဲသော မိသားစုဝန်းကျင်ကို ဖြစ်ပေါ်စေ၏။—ဧဖက် ၆:၁။
အထက်ဖော်ပြပါအချက်များသည် မိသားစုဘဝနှင့်ပတ်သက်သည့် ကျမ်းစာအကြံပြုချက်ကောင်းကို ပေါ်လွင်စေသည်။ ဘုရားသခင်၏မူများကို ကျင့်သုံးခြင်းအားဖြင့် လူအများသည် အိမ်တွင်း၌ ပျော်ရွှင်မှုကို ခံစားကြရ၏။ ဥပမာ၊ အစပိုင်းတွင် ဖော်ပြခဲ့သော အာဂျင်တီးနားမှ ဇနီးမောင်နှံကိုကြည့်ပါ။ သူတို့သည် ယေဟောဝါသက်သေများနှင့် သုံးလ ကျမ်းစာလေ့လာပြီးနောက် အိမ်ထောင်ရေးနှင့်ပတ်သက်သည့် ပညာရှိအကြံပြုချက်ကို နှစ်ဦးစလုံး စတင်ကျင့်သုံးလာကြသည်။ အချင်းချင်းဆက်ဆံရေးတိုးတက်စေရန်၊ တစ်ဦး၏လိုအပ်ရာကို တစ်ဦးနားလည်ပေးရန်၊ ခွင့်လွှတ်တတ်လာရန် သူတို့ကြိုးစားကြ၏။ (သု. ၁၅:၂၂; ၁ ပေတရု ၃:၇; ၄:၈) အခြေအနေများက ထိန်းချုပ်နိုင်ပုံမရှိသည့်အခါ ဒေါသကို ချုပ်တည်းပြီး ဘုရားသခင်ထံ အကူအညီတောင်းခံဖို့ သိရှိလာကြသည်။ (ကောလောသဲ ၃:၁၉) မကြာမီ၊ “ဘာလင်တံတိုင်းကြီး” ပြိုကျသွားလေတော့သည်!
မိသားစုကို ဘုရားသခင် ခိုင်မြဲစေနိုင်
ဘုရားသခင်၏စံနှုန်းများကို သိရှိပြီး ကျင့်သုံးခြင်းသည် မိသားစုအား ဖိစီးမှုများကို ခံရပ်စေနိုင်၏။ ထိုသို့ပြုရန် အရေးကြီး၏၊ အကြောင်းမှာ ကျွန်ုပ်တို့ခေတ်တွင် မိသားစုအစီအစဉ်ကို ပြင်းပြင်းထန်ထန်တိုက်ခိုက်လိမ့်မည်ဟု ပရောဖက်ပြုထား၍ဖြစ်သည်။ လက်ရှိကိုယ်ကျင့်တရားနှင့် လူ့ဘောင်အဖွဲ့အစည်း၏ ပျက်စီးယိုယွင်းမှုကို ပေါလုကြိုဟောခဲ့သည်။ ‘ဘုရားသခင်ဝတ်၌မွေ့လျော်ယောင်ဆောင်’ သူတို့တွင်ပင် တည်ကြည်မှုမရှိခြင်း၊ ‘ပကတိကြင်နာစုံမက်မှု’ ကင်းခြင်းနှင့် မိဘစကားနားမထောင်ခြင်းတို့ဖြစ်သည့် ‘နောက်ဆုံးကာလ’ ၏လက္ခဏာကို တွေ့ ရှိရလိမ့်မည်ဟု သူပြောခဲ့သည်။—၂ တိမောသေ ၃: ၁-၅။
ဘုရားသခင်၏စိတ်တော်နှင့်တွေ့ရန် ကြိုးစားခြင်းသည် မိသားစုအပေါ် ဤသို့သောဆိုးကျိုးများ ကျရောက်ခြင်းကို တားဆီးနိုင်၏။ ကြုံတွေ့နေရသော အခက်အခဲပြဿနာများကို ဝိညာဉ်ရေးဖြင့် ရင်ဆိုင်ဖြေရှင်းနိုင်ကြောင်း မိသားစုများစွာ သိရှိခဲ့ကြပြီ။ အိမ်သားများသည် ဘုရားသခင်နှင့် ဆက်ဆံရေးကောင်း ဆက်ရှိစေလိုလျှင် သူတို့သည် ကျမ်းစာမူများကို ကျင့်သုံးပြီး ‘ထာဝရဘုရားသခင်သည် အိမ်ကိုဆောက်တော်မမူလျှင် ဆောက်သောသူတို့သည် အချည်းနှီးလုပ်ဆောင်ကြ’ ကြောင်း သဘောပေါက်ဖို့လိုသည်။ (ဆာလံ ၁၂၇:၁) မိသားစုဘဝတွင် ပျော်ရွှင်စေရန် အအောင်မြင်ဆုံးနည်းမှာ ဘုရားသခင်ကို ဦးထိပ်ထားခြင်းဖြစ်သည်။—ဧဖက် ၃:၁၄၊ ၁၅။
ဟာဝိုင်ယီကျွန်းမှ ဒဲနစ္စဆိုသူ အမျိုးသားတစ်ဦးသည် ထိုသို့ပင်ကြုံတွေ့ ခဲ့ရ၏။ သူသည် ခရစ်ယာန်အမည်ခံထားသော်လည်း ဆဲရေးတိုင်းထွာ၊ ရန်ဖြစ်လေ့ရှိ၏။ စစ်မှုထမ်းပြီးနောက် ပို၍ပင်ရန်လိုတတ်လာကာ အငြိုးကြီးလာလေသည်။ သူက ဤသို့ပြောပြသည်– “ကျွန်တော် အမြဲရန်ဖြစ်နေတာ။ ဘာကိုမှ ဂရုမစိုက်ဘူး၊ သေရမှာကိုလည်း မကြောက်ဘူး။ ဆဲဆိုပြီး ရန်ပဲဖြစ်နေတယ်။ ယေဟောဝါသက်သေတစ်ယောက်ဖြစ်တဲ့ ကျွန်တော့်ဇနီးက ကျမ်းစာလေ့လာဖို့ အားပေးခဲ့တယ်။”
ဒဲနစ္စသည် ဇနီး၏ကြိုးစားအားထုတ်မှုများကို လက်မခံချေ။ သို့သော် ဇနီး၏ခရစ်ယာန်အမူအကျင့်က သူ၏အပျက်သဘောထားကို ပျော့ပျောင်းသွားစေသည်။ နောက်ဆုံးတွင် ဒဲနစ္စသည် ဇနီး၊ သားသမီးများနှင့်အတူ ခရစ်ယာန်အစည်းအဝေးတစ်ခုကို လိုက်တက်ခဲ့သည်။ ထို့နောက် ကျမ်းစာသင်အံမှုကို ဒဲနစ္စ လက်ခံလိုက်ပြီး ကောင်းစွာတိုးတက်လာလေသည်။ သူသည် ၂၈ နှစ်လုံးလုံးသောက်ခဲ့သည့် ဆေးလိပ်ကို ဖြတ်လိုက်ပြီး သူကြိုးစားနှိမ်နင်းနေသည့် အကျင့်များကို ကျင့်နေကြသော မိတ်ဆွေဟောင်းများနှင့် အဆက်ဖြတ်ခဲ့သည်။ ဒဲနစ္စသည် ယေဟောဝါအား ကျေးဇူးတင်စွာဖြင့် ဤသို့ဆို၏– “ကျွန်တော့်ရဲ့မိသားစုဘဝ တိုးတက်ကောင်းမွန်လာပြီ။ မိသားစုလိုက် အစည်းအဝေးတွေတက်ကြ၊ အမှုဆောင်ထွက်ကြတယ်။ ကျွန်တော့်ဒေါသကို ချုပ်တည်းနိုင်ပြီး မဆဲဆိုတော့တဲ့အတွက် ကျွန်တော့်ကလေးနှစ်ယောက်က ကျွန်တော့်ကို မကြောက်တော့ဘူး။ ကျွန်တော်တို့ဝိုင်းဖွဲ့ပြီး စကားပြောဆို၊ ကျမ်းစာဆွေးနွေးလာနိုင်ကြတယ်။ တကယ်လို့သာ ကျမ်းစာမလေ့လာခဲ့ရင် ဒီကနေ့ ဒီမှာ ကျွန်တော်ရှိမှာမဟုတ်ဘူး၊ အဲ့ဒီလောက်ထိ ကျွန်တော် စိတ်ဆတ်တာ။”
မိသားစုများသည် ယေဟောဝါ၏အလိုတော်ကို ကြိုးစားလုပ်ဆောင်ကြသည့်အခါ ပျော်ရွှင်နိုင်ကြသည်။ ကျမ်းစာမူများကို အိမ်သားတစ်ဦးတည်း ကျင့်သုံးလျှင်ပင် မည်သူမျှမကျင့်သုံးသည်ထက် သာ၍ကောင်းကြောင်း တွေ့ ရှိခဲ့ရပြီ။ ခရစ်ယာန်အိမ်ထောင်တစ်စုကို ပျိုးထောင်ပေးရာတွင် လိမ္မာပါးနပ်မှုနှင့် အချိန်ပေးဖို့လိုသည့် ကြိုးစားအားထုတ်မှုဖြစ်သည်။ ယေဟောဝါသည် ဤသို့သောမိသားစုများ၏ ကြိုးစားတည်ဆောက်မှုများကို အောင်မြင်စေမည်ဟု ယုံကြည်စိတ်ချနိုင်သည်။ ဆာလံဆရာ၏ဤစကားများကို သူတို့သံယောင်လိုက်နိုင်ကြမည်– ‘ကူညီမစမှုကို ယေဟောဝါထံတော်မှ ငါရ၏။’—ဆာလံ ၁၂၁:၂။
[အောက်ခြေမှတ်ချက်]
^ အပိုဒ်၊ 4 ၂၀၀၅ ယေဟောဝါသက်သေများ၏ပြက္ခဒိန်၊ မေ/ဇွန်ကိုရှု။
[စာမျက်နှာ ၉ ပါ အကျဉ်းဖော်ပြချက်]
ဘုရားသခင်ကြောင့် “ကောင်းကင်ပေါ်၊ မြေကြီးပေါ်မှာရှိသော မိသားစုတိုင်း၏အမည် . . . ဖြစ်တည်၏။”—ဧဖက် ၃:၁၅၊ ကဘ
[စာမျက်နှာ ၈ ပါ လေးထောင့်ကွက်]
မိသားစုအစီအစဉ်ကို ယေဟောဝါအလွန်တန်ဖိုးထား
“‘အချင်းတို့ များပြားစွာမွေးဖွားကြလော့။ မြေကြီးကိုပြည့်စေ၍နိုင်ကြလော့’ ဟုမိန့်တော်မူ၍ သူတို့ကို ကောင်းချီးပေးတော်မူ၏။”—ကမ္ဘာဦး ၁:၂၈။
‘ထာဝရဘုရားသခင်ကို ကြောက်ရွံ့သောသူတို့သည် ပျော်ရွှင်ကြ၏။ သင်၏မယားသည် သင့်အိမ်နားမှာ များစွာအသီးသီးသော စပျစ်နွယ်ပင်ကဲ့သို့ ဖြစ်လိမ့်မည်။’—ဆာလံ ၁၂၈:၁၊ ၃။