‘အဆိုးကို သည်းခံလျက်နေလော့’
‘အဆိုးကို သည်းခံလျက်နေလော့’
“သခင်ဘုရား၏ကျွန်သည် ရန်မတွေ့ရ။ ခပ်သိမ်းသောသူတို့အား ဖြည်းညင်းစွာပြုသောသူ၊ . . . သည်းခံနိုင်သောသူဖြစ်ရမည်။” —၂ တိမောသေ ၂:၂၄။
၁။ ခရစ်ယာန်လုပ်ငန်းတွင် ပါဝင်သည့်အခါ အပြောကြမ်းသူများနှင့် အဘယ်ကြောင့် ရံဖန်ရံခါကြုံတွေ့ရသနည်း။
သင့်ကိုဖြစ်စေ၊ သင်ကိုယ်စားပြုရာကိုဖြစ်စေ အကောင်းမမြင်သူတို့နှင့် တွေ့ကြုံရင်ဆိုင်ရသောအခါ သင်မည်သို့တုံ့ပြန်တတ်သနည်း။ နောက်ဆုံးကာလအကြောင်း တမန်တော်ပေါလုဖော်ပြရာတွင် လူတို့သည် “သူ့အသရေကိုရှုတ်ချသောသူ၊ . . . ချောစားတတ်သောသူ၊ ကိုယ်ဣန္ဒြေကိုမချုပ်တည်းနိုင်သောသူ၊ ပြင်းထန်သောသူ” များဖြစ်ကြမည်ဟု ကြိုပြောခဲ့သည်။ (၂ တိမောသေ ၃:၁-၅၊ ၁၂) ထိုသို့သောသူများကို ဓမ္မအမှုတွင်ဖြစ်စေ၊ အခြားလုပ်ဆောင်မှုများတွင်ဖြစ်စေ သင်ကြုံတွေ့ရပေမည်။
၂။ ကျွန်ုပ်တို့အား ကြမ်းတမ်းစွာစကားပြောဆိုသူများနှင့် ပညာရှိရှိဆက်ဆံရန် အဘယ်ကျမ်းချက်များက ကူညီပေးနိုင်သနည်း။
၂ အပြောအဆိုရုန့်ရင်းကြမ်းတမ်းသူတိုင်း မှန်ရာကို လုံးလုံးစိတ်မဝင်စားသူများ မဟုတ်ကြပါ။ အကြီးအကျယ်ဆင်းရဲခက်ခဲခြင်း၊ စိတ်အလိုမကျခြင်းတို့ကြောင့် အနီးအနားရှိ မည်သူ့ကိုမဆို ဒေါသဖြစ်မိနိုင်သည်။ (ဒေ. ၇:၇) လူအများသည် ဆဲရေးတိုင်းထွာ၊ စကားပြောကြမ်းတမ်းလေ့ရှိသော ပတ်ဝန်းကျင်တွင် နေထိုင်လုပ်ကိုင်ရသောကြောင့် ထိုသို့ပြုမူပြောဆိုတတ်ကြသည်။ ယင်းကြောင့် ကျွန်ုပ်တို့ခရစ်ယာန်များ ထိုသို့ပြောဆိုစရာမဟုတ်သော်လည်း အခြားသူများ ထိုသို့အဘယ်ကြောင့်ပြောဆိုတတ်ကြသည်ကို နားလည်ရန် ထောက်ကူပေးသည်။ ရင့်သီးကြမ်းတမ်းသောစကားကို ကျွန်ုပ်တို့ မည်သို့တုံ့ပြန်သင့်သနည်း။ နယပုံပြင် ၁၉:၁၁ က “သတိရှိသောသူသည် မိမိအမျက်ဒေါသကိုချုပ်တည်းတတ်၏” ဟုဆိုသည်။ ရောမ ၁၂:၁၇၊ ၁၈ က ဤသို့အကြံပြုသည်– “အဘယ်သူကိုမျှ ရန်တုံ့မမူကြနှင့်။ . . . သင်တို့သည် တတ်နိုင်သမျှအတိုင်း လူအပေါင်းတို့နှင့် အသင့်အတင့်နေကြလော့။”
၃။ ကျွန်ုပ်တို့ဟောသောသတင်းနှင့် အသင့်အတင့်ရှိခြင်း မည်သို့ ပတ်သက်သနည်း။
၃ ကျွန်ုပ်တို့သည် အမှန်တကယ် အသင့်အတင့်နေတတ်သူများဖြစ်လျှင် ကျွန်ုပ်တို့၏စိတ်ထားက ဖော်ပြပါလိမ့်မည်။ ကျွန်ုပ်တို့ပြောဆိုလုပ်ကိုင်ရာများသာမက မျက်နှာနေမျက်နှာထားနှင့် အသံနေအသံထားကလည်း ဖော်ပြလိမ့်မည်။ (သု. ၁၇:၂၇) တမန်တော်များကို ဟောပြောရန်စေလွှတ်သောအခါ သူတို့ကို ယေရှုဤသို့ညွှန်ကြားခဲ့သည်– “အိမ်သို့ဝင်သောအခါ ငြိမ်သက်ခြင်းရှိပါစေသောဟု နှုတ်ဆက်ခြင်းကိုပြုကြလော့။ ထိုအိမ်သည်ထိုက်တန်လျှင် သင်တို့မြွက်သောငြိမ်သက်ခြင်းရောက်လိမ့်မည်။ မထိုက်တန်လျှင် သင်တို့ထံသို့ပြန်လာလိမ့်မည်။” (မဿဲ ၁၀:၁၂၊ ၁၃၊ သမ္မာ) ကျွန်ုပ်တို့ဟောသောသတင်းသည် သတင်းကောင်းဖြစ်၏။ သမ္မာကျမ်းစာက ယင်းကို ‘ငြိမ်သက်ခြင်းနှင့်ယှဉ်သော သတင်းကောင်း’၊ ‘ဘုရားသခင်၏ကျေးဇူးတော်နှင့်ယှဉ်သောသတင်းကောင်း’၊ ‘ဘုရားသခင့်နိုင်ငံတော်နှင့်ယှဉ်သော သတင်းကောင်း’ ဟုခေါ်ဆို၏။ (ဧဖက် ၆:၁၅; တမန်တော် ၂၀:၂၄; မဿဲ ၂၄:၁၄) ကျွန်ုပ်တို့၏ပန်းတိုင်မှာ သူတစ်ပါး၏ယုံကြည်ချက်များကို ဝေဖန်ဖို့ သို့မဟုတ် သူ၏ရှုမြင်ပုံများကိုအပြစ်မြင် ငြင်းခုံဖို့မဟုတ်ဘဲ သမ္မာကျမ်းစာမှ သတင်းကောင်းကို သူ့အားသိရှိစေဖို့ဖြစ်သည်။
၄။ လာရသည့်အကြောင်းရင်းကို ပြောပြခွင့်ပင်မရမီ “စိတ်မဝင်စားဘူး” ဟုပြောလှာသောအခါ သင်မည်သို့ပြောဆိုနိုင်သနည်း။
၄ အိမ်ရှင်ဖြစ်သူသည် ကောင်းကောင်းနားမထောင်ဘဲ “စိတ်မဝင်စားဘူး” ဟုကြွပ်ဆတ်ဆတ်ပြောပေမည်။ များသောအားဖြင့် သင်ဤသို့ပြောဆိုနိုင်ပေမည်– “သမ္မာကျမ်းစာထဲက ဒီကျမ်းချက်လေးတစ်ချက်ကိုပဲ ဖတ်ပြပါရစေ။” ထိုသို့ဖတ်ပြသည်ကို သူကန့်ကွက်ချင်မှကန့်ကွက်မည်။ သို့တည်းမဟုတ် ဤသို့ပြောဆိုရန် သင့်တော်ပေမည်– “မတရားမှုမရှိတော့ဘဲ လူတွေအားလုံး အချင်းချင်းချစ်ခင်တတ်လာကြမယ့်အချိန်တစ်ချိန်အကြောင်း ပြောပြချင်လို့ပါ။” အိမ်ရှင်က စိတ်ဝင်စားပုံမပြလျှင် “ဒါပေမဲ့ မိတ်ဆွေအတွက် ဒီအချိန်က အဆင်ပြေပုံမရှိဘူး” ဟုဆက်ပြောနိုင်သည်။ အိမ်ရှင်တုံ့ပြန်ပုံက ရန်လိုပုံရှိနေလျှင်ပင် သူသည် “မထိုက်တန်” သူဖြစ်၏ဟု ကျွန်ုပ်တို့ကောက်ချက်ချသင့်သလော။ မည်သို့ပင်တုံ့ပြန်ပါစေ “ခပ်သိမ်းသောသူတို့အား ဖြည်းညင်းစွာပြုသော . . . သည်းခံနိုင်သောသူဖြစ်” ပါဟူသော ကျမ်းစာသွန်သင်ချက်ကို ပြန်သတိရပါ။—၂ တိမောသေ ၂:၂၄။
မသိ၍ စော်ကားခဲ့
၅၊ ၆။ ရှောလုသည် ယေရှု၏နောက်လိုက်များနှင့် မည်သို့ပြုမူဆက်ဆံခဲ့သနည်း၊ သူအဘယ်ကြောင့် ထိုသို့ပြုမူခဲ့သနည်း။
၅ ပထမရာစုတွင် ရှောလုအမည်ရှိသူတစ်ဦးသည် ရိုင်းပျစွာပြောဆိုရုံမက ကြမ်းတမ်းစွာပြုမူကြောင်း လူသိများခဲ့သည်။ သူသည် ‘သခင်ဘုရား၏တပည့်တို့တစ်ဖက်၌ခြိမ်းခြောက်၍ အသေသတ်ခြင်းငှာ ပြင်းပြစွာအသက်ရှူ’ သည်ဟု သမ္မာကျမ်းစာက ဆို၏။ (တမန်တော် ၉:၁၊ ၂) သူသည် “ကဲ့ရဲ့သောသူ၊ ညှဉ်းဆဲသောသူ၊ ကြမ်းကြုတ်သော (“စော်ကားခဲ့၊” သတင်းကောင်း) သူ” ဖြစ်ဖူးကြောင်း နောက်ပိုင်းတွင် သူဝန်ခံခဲ့သည်။ (၁ တိမောသေ ၁:၁၃) သူ၏ဆွေမျိုးအချို့သည် ခရစ်ယာန်များဖြစ်နှင့်ပြီးဖြစ်နိုင်သော်လည်း ခရစ်တော်၏နောက်လိုက်များအပေါ် သူ၏သဘောထားကို ဤသို့ပြောပြခဲ့သည်– “အကျွန်ုပ်သည် . . . ပြင်းစွာသော အမျက်ဒေါသနှင့်ယစ်မူးသဖြင့် တစ်ကျွန်းတစ်နိုင်ငံတိုင်အောင် သူတို့ကိုညှဉ်းဆဲနှိပ်စက်ပါ၏။” (တမန်တော် ၂၃:၁၆; ၂၆:၁၁; ရောမ ၁၆:၇၊ ၁၁) ထိုသို့သူကျင့်ကြံပြုမူနေစဉ် တပည့်တို့သည် ရှောလုနှင့် စကားအချေအတင်ပြောဆိုဖို့ ကြိုးစားခဲ့ကြောင်း အဘယ်အထောက်အထားမျှမရှိချေ။
၆ အဘယ်ကြောင့် ရှောလု ထိုသို့ပြုမူခဲ့သနည်း။ နှစ်များလွန်ပြီးနောက် သူက “ထိုသို့ငါပြုသောအခါ ယုံကြည်ခြင်းမရှိ၊ မသိဘဲပြု” ခဲ့သည်ဟု ရေးသားခဲ့သည်။ (၁ တိမောသေ ၁:၁၃) သူသည် “မိစဉ်ဖဆက်ကျင့်သောတရားကို သေချာစွာ” ဆည်းပူးခဲ့သော ဖာရိရှဲတစ်ဦးဖြစ်သည်။ (တမန်တော် ၂၂:၃) ရှောလု၏ဆရာ ဂါမလျေလသည် အတော်ပင် အမြင်ကျယ်သူဖြစ်သော်လည်း ရှောလု၏အပေါင်းအဖော်ဖြစ်သူ ယဇ်ပုရောဟိတ်မင်း ကယာဖမှာမူ တစ်ယူသန်သူဖြစ်သည်။ ကယာဖသည် ယေရှုခရစ်အသတ်ခံရဖို့ ပူးပေါင်းကြံစည်ရာတွင် ဦးဆောင်ဦးရွက်ပြုခဲ့သူဖြစ်သည်။ (မဿဲ ၂၆:၃၊ ၄၊ ၆၃-၆၆; တမန်တော် ၅:၃၄-၃၉) နောက်ပိုင်းတွင် ကယာဖသည် ယေရှု၏တမန်တော်များ အရိုက်အနှက်ခံရဖို့စီစဉ်ခဲ့ပြီး ယေရှုနာမကိုအမှီပြုလျက် မဟောပြောဖို့ တင်းကျပ်စွာအမိန့်ထုတ်ပြန်ခဲ့သည်။ သတေဖန်ကို ကျောက်ခဲနှင့်ပစ်ဖို့ ခေါ်ထုတ်သွားစဉ် အခြေအနေတင်းမာနေသော ဗဟိုတရားရုံးကို ဦးစီးခဲ့သူမှာ ကယာဖဖြစ်သည်။ (တမန်တော် ၅:၂၇၊ ၂၈၊ ၄၀; ၇:၁-၆၀) ရှောလုမူ ကျောက်ခဲနှင့်ပစ်ကြသည်ကို စောင့်ကြည့်ခဲ့ပြီး ဒမာသက်မြို့ရှိ ယေရှု၏နောက်လိုက်များကို လိုက်လံဖမ်းဆီးနှိပ်ကွပ်ပစ်ဖို့ ကယာဖ၏အမိန့်ကို လက်ခံခဲ့သည်။ (တမန်တော် ၈:၁; ၉:၁၊ ၂) ကယာဖ၏သြဇာလွှမ်းမှုအောက် သူ၏လုပ်ဆောင်မှုသည် ဘုရားသခင်ဘက်၌ စိတ်အားကြီးသည့်သာဓကဖြစ်သည်ဟု ရှောလုယူဆခဲ့သော်လည်း အမှန်အားဖြင့် စစ်မှန်သောယုံကြည်ခြင်း သူ၌မရှိခဲ့ပါ။ (တမန်တော် ၂၂:၃-၅) ယင်းကြောင့် ယေရှုသည် မေရှိယအစစ်အမှန်ဖြစ်ကြောင်း ရှောလု မသိခဲ့ချေ။ သို့သော် ရှင်ပြန်ထမြောက်ပြီးသောယေရှုသည် ဒမာသက်မြို့အသွား လမ်းပေါ်၌ ရှောလုကို အံ့ဖွယ်နည်းဖြင့် စကားပြောသောအခါ သူအမြင်မှန်ရလာခဲ့သည်။—တမန်တော် ၉:၃-၆။
၇။ ဒမာသက်မြို့အသွားလမ်းတွင် ယေရှုနှင့်တွေ့ဆုံခြင်းကြောင့် ရှောလုမည်သို့ဖြစ်သွားသနည်း။
၇ ထိုသို့ဖြစ်ပြီးမကြာမီ တပည့်ဖြစ်သူအာနနိသည် ရှောလုကို သက်သေခံဖို့ စေလွှတ်ခံခဲ့ရသည်။ အသင်သာဆိုလျှင် သွားလိုစိတ်ရှိပါမည်လော။ အာနနိသည် စိုးရိမ်မကင်းဖြစ်မိသော်လည်း ရှောလုကို ကြင်နာစွာစကားပြောဆိုခဲ့သည်။ ဒမာသက်မြို့သို့သွားစဉ် အံ့ဖွယ်နည်းဖြင့် ယေရှုနှင့်ဆုံခဲ့ခြင်းကြောင့် ရှောလု၏သဘောထား ပြောင်းသွားပြီဖြစ်သည်။ (တမန်တော် ၉:၁၀-၂၂) နောက်ပိုင်းတွင် ထက်သန်သောခရစ်ယာန်သာသနာပြု တမန်တော်ပေါလုအဖြစ် လူသိများလာလေသည်။
နူးညံ့သိမ်မွေ့သော်လည်း ရဲစွမ်းသတ္တိရှိ
၈။ တစ်ချိန်က ဆိုးသွမ်းမှုများပြုခဲ့သူတို့အပေါ် ခမည်းတော်ထားသောသဘောကို ယေရှု မည်သို့ရောင်ပြန်ဟပ်ခဲ့သနည်း။
၈ ယေရှုသည် လူတို့နှင့်ဆက်ဆံရာတွင် နူးညံ့သိမ်မွေ့သော်လည်း ရဲစွမ်းသတ္တိရှိသော စိတ်အားထက်သန်သည့် ဘုရားသခင့်နိုင်ငံတော်ကြေညာသူတစ်ဦးဖြစ်သည်။ (မဿဲ ၁၁:၂၉) ကိုယ်တော်သည် လူဆိုးတို့ကို မှားယွင်းသောလမ်းစဉ်မှ ပြန်လှည့်လာရန် တိုက်တွန်းခဲ့သူ ကောင်းကင်ခမည်းတော်၏ စိတ်သဘောထားကို ရောင်ပြန်ဟပ်ပြခဲ့သည်။ (ဟေရှာယ ၅၅:၆၊ ၇) ယေရှုသည် အပြစ်သားများနှင့်ဆက်ဆံရာတွင် အကောင်းဘက်ပြောင်းနိုင်ခြေရှိသူတို့ကို ဂရုပြုတော်မူပြီး ထိုသို့သောသူများကို အားပေးကူညီခဲ့သည်။ (လုကာ ၇:၃၇-၅၀; ၁၉:၂-၁၀) ယေရှုသည် အပြင်ပန်းကြည့်ပြီး သူတစ်ပါးကို အကဲဖြတ်မည့်အစား နောင်တလမ်းသို့သွေးဆောင်လို၍ ခမည်းတော်၏ကျေးဇူးပြုတော်မူခြင်း၊ သည်းခံတော်မူခြင်းနှင့် စိတ်ရှည်တော်မူခြင်းတို့ကို တုပတော်မူ၏။ (ရောမ ၂:၄) ယေဟောဝါ၏အလိုတော်မှာ လူအမျိုးမျိုးတို့သည် နောင်တယူပြီး ကယ်တင်ခြင်းရဖို့ဖြစ်သည်။—၁ တိမောသေ ၂:၃၊ ၄။
၉။ ယေရှုတွင် ဟေရှာယ ၄၂:၁-၄ ပြည့်စုံခဲ့ပုံမှ ကျွန်ုပ်တို့ အဘယ်အရာသိရှိရသနည်း။
၉ ယေရှုခရစ်အပေါ် ယေဟောဝါ၏အမြင်ကို ဖော်ပြရာတွင် ခရစ်ဝင်ကျမ်းရေးသူမဿဲသည် ဤပရောဖက်ပြုစကားများကို ကိုးကားထားသည်– “ငါရွေးချယ်သောငါ့ကျွန်ရင်း၊ ငါနှစ်သက်မြတ်နိုးသောသူကို ကြည့်ရှုလော့။ ထိုသူ၏အပေါ်၌ ငါ့ဝိညာဉ်ကိုငါတည်စေမည်။ သူသည် လူအမျိုးမျိုးတို့ကို တရားပေးလိမ့်မည်။ ငြင်းခုံခြင်း၊ ဟစ်ကြော်ခြင်းကိုမပြု၍၊ လမ်းခရီး၌ သူ၏အသံကို အဘယ်သူမျှမကြားစေရ။ နင်းနယ်လျက်ရှိသောကျူပင်ကိုမချိုး၊ မီးခိုးများသောမီးစာကိုမသတ်။ တရားသည် အောင်မြင်ခြင်းသို့ရောက်မည်အကြောင်း စီရင်လိမ့်မည်။ သူ၏နာမကိုလည်း လူအမျိုးမျိုးတို့သည် ကိုးစားကြလိမ့်မည်။” (မဿဲ ၁၂:၁၇-၂၁; ဟေရှာယ ၄၂:၁-၄) ထိုပရောဖက်ပြုစကားနှင့်အညီ ယေရှုသည် ဆူညံသောအချေအတင်ငြင်းခုံမှုများတွင် မပါဝင်ခဲ့ချေ။ စိတ်ဖိစီးခံနေရချိန်တွင်ပင် နှလုံးရိုးဖြောင့်သူတို့၏စိတ်ကို ဆွဲဆောင်နိုင်သောနည်းဖြင့် အမှန်တရားကို ပြောဆိုခဲ့သည်။—ယောဟန် ၇:၃၂၊ ၄၀၊ ၄၅၊ ၄၆။
၁၀၊ ၁၁။ (က) ယေရှုကိုဆန့်ကျင်သည့် ပြောင်ပြောင်တင်းတင်း အပြောဆိုဆုံးသူတို့တွင် ဖာရိရှဲများပါဝင်ကြသော်လည်း သူတို့ထဲမှအချို့ကို ကိုယ်တော်အဘယ်ကြောင့် သက်သေခံခဲ့သနည်း။ (ခ) ယေရှုသည် ဆန့်ကျင်သူများကို မည်သို့ဖြေဆိုလေ့ရှိသနည်း၊ သို့သော် အဘယ်အရာကို ကိုယ်တော်မပြုသနည်း။
၁၀ ယေရှုသည် ဓမ္မအမှုဆောင်ချိန်အတွင်း ဖာရိရှဲများစွာနှင့် စကားပြောခဲ့သည်။ သူတို့ထဲမှအချို့သည် ယေရှုကို စကားဖြင့်အကွက်ဆင်ဖို့ ကြိုးစားခဲ့ကြသော်လည်း သူတို့အားလုံး စိတ်ရင်းမကောင်းဟု ယေရှုကောက်ချက်မချခဲ့ပါ။ အတော်အတန် အပြစ်ရှာတတ်သူ ရှိမုန်အမည်ရှိသောဖာရိရှဲသည် ယေရှုကို အနီးကပ်လေ့လာလိုသဖြင့် ဖိတ်ခေါ်ကျွေးမွေးခဲ့ဟန်ရှိသည်။ ထိုဖိတ်ခေါ်ချက်ကို ယေရှုလက်ခံခဲ့ပြီး ထိုတွင်ရှိသူများကို သက်သေခံခဲ့သည်။ (လုကာ ၇:၃၆-၅၀) နောက်တစ်ကြိမ်တွင် နိကောဒင်အမည်ရှိ ထင်ရှားသောဖာရိရှဲတစ်ဦးသည် ညအခါမှ ယေရှုထံလာ၏။ မှောင်သွားဖို့စောင့်ပြီးမှ သူလာသည့်အတွက် သူ့ကို ယေရှုအပြစ်မတင်ခဲ့ပါ။ သို့ပြုမည့်အစား ယုံကြည်ကြောင်းတင်ပြလိုသူများ ကယ်တင်ခြင်းသို့ရောက်မည်အကြောင်း သားတော်ကိုစေလွှတ်ရာတွင် ဘုရားသခင်ပြတော်မူခဲ့သောမေတ္တာကို နိကောဒင်အား သက်သေခံခဲ့သည်။ ထို့ပြင် ဘုရားသခင့်အစီအစဉ်ကို နာခံဖို့အရေးကြီးကြောင်းကိုလည်း ယေရှု ကြင်နာစွာ ထောက်ပြခဲ့သည်။ (ယောဟန် ၃:၁-၂၁) နောက်ပိုင်းတွင် ယေရှုနှင့်ပတ်သက်သော နှစ်လို့ဖွယ်သတင်းတစ်ခုကို အခြားဖာရိရှဲများက ရှုတ်ချပြောဆိုသောအခါ နိကောဒင်သည် ယေရှုဘက်မှ ပြောဆိုခဲ့သည်။—ယောဟန် ၇:၄၆-၅၁။
၁၁ ယေရှုအား ထောင်ချောက်ဆင်ဖို့ကြိုးစားနေသူတို့၏ အရေခြုံမှုကို ကိုယ်တော်မသိဘဲမနေပါ။ အချည်းနှီးသော စကားရည်လုပွဲများဖြစ်ပေါ်စေဖို့ ကိုယ်တော်အခွင့်မပေးခဲ့ပါ။ သို့သော် သင့်လျော်သည့်အခါ မူတစ်ခုကိုဖော်ပြခြင်း၊ ပုံဥပမာသုံးခြင်း၊ ကျမ်းချက်တစ်ချက်ကို ကိုးကားခြင်းတို့ဖြင့် တိုတိုနှင့်အချက်ကျကျ၊ တန်ခိုးပါပါ ဖြေဆိုတတ်သည်။ (မဿဲ ၁၂:၃၈-၄၂; ၁၅:၁-၉; ၁၆:၁-၄) အခြားအချိန်များတွင်မူ အဖြေပေးသော်လည်း အကျိုးရှိမည်မဟုတ်ကြောင်း သိမြင်သည့်အခါ ယေရှုသည် အဖြေမပေးဘဲ နေတော်မူ၏။—မာကု ၁၅:၂-၅; လုကာ ၂၂:၆၇-၇၀။
၁၂။ ယေရှုသည် အော်ငေါက်ခံရချိန်၌ပင် လူတို့ကို မည်သို့ကူညီပေးနိုင်ခဲ့သနည်း။
၁၂ တစ်ခါတစ်ရံ ယေရှုသည် နတ်ဆိုးစွဲသူတို့၏အော်ဟစ်ခြင်းကို ခံခဲ့ရသည်။ ထိုသို့ဖြစ်သောအခါ ကိုယ်တော်သည် သည်းခံပြီး သူတို့သက်သာရာရစေဖို့ပင် ဘုရားသခင်ပေးထားသောတန်ခိုးကိုပင် အသုံးပြုခဲ့သည်။ (မာကု ၁:၂၃-၂၈; ၅:၂-၈၊ ၁၅) ဓမ္မအမှုတွင် ကျွန်ုပ်တို့ပါဝင်နေစဉ် လူအချို့က စိတ်ဆိုးပြီးအော်ဟစ်လာလျှင် အလားတူ သည်းခံဖို့လိုပြီး ထိုအခြေအနေမျိုးကို ကြင်နာစွာ၊ လိမ္မာပါးနပ်စွာ ကိုင်တွယ်ဖြေရှင်းဖို့ကြိုးစားသင့်သည်။—ကောလောသဲ ၄:၆။
မိသားစုအတွင်း
၁၃။ ယေဟောဝါသက်သေများနှင့် ကျမ်းစာစတင်လေ့လာသော မိသားစုမှသူတစ်ဦးကို လူတို့အဘယ်ကြောင့် ရံဖန်ရံခါ အတိုက်အခံပြုတတ်ကြသနည်း။
၁၃ ယေရှု၏နောက်လိုက်များ သည်းခံမှုပြဖို့ အလိုအပ်ဆုံးနေရာမှာ မိသားစုအတွင်းဖြစ်သည်။ ကျမ်းစာအမှန်တရားကို အလွန်နှစ်သက်မြတ်နိုးလာသူတစ်ဦးသည် သူ့မိသားစုကိုလည်း အလားတူလက်ခံစေလိုသည်။ သို့သော် ယေရှုမိန့်ဆိုခဲ့သည့်အတိုင်း မိသားစုမှသူအချို့သည် အတိုက်အခံပြုနိုင်၏။ (မဿဲ ၁၀:၃၂-၃၇; ယောဟန် ၁၅:၂၀၊ ၂၁) ထိုသို့ဖြစ်ဖို့ အကြောင်းအမျိုးမျိုးရှိသည်။ ဥပမာအနေနှင့် ကျမ်းစာသွန်သင်ချက်သည် ကျွန်ုပ်တို့ကို ရိုးသားသူ၊ တာဝန်သိတတ်သူ၊ ရိုသေလေးစားတတ်သူဖြစ်စေနိုင်သော်လည်း မည်သည့်အခြေအနေမျိုး၌မဆို ဖန်ဆင်းရှင်အပေါ် ကျွန်ုပ်တို့ သာ၍တာဝန်ရှိကြောင်းကိုလည်း သမ္မာကျမ်းစာက သွန်သင်ပေးသည်။ (ဒေ. ၁၂:၁၊ ၁၃; တမန်တော် ၅:၂၉) ယေဟောဝါအပေါ် ကျွန်ုပ်တို့၏သစ္စာစောင့်သိမှုကြောင့် အိမ်ထောင်စုအတွင်း သူ၏သြဇာအာဏာ တစ်နည်းတစ်ဖုံ လျော့နည်းလာသည်ဟု ယူဆသော မိသားစုမှတစ်ဦးဦးသည် မကျေမနပ်ဖြစ်လာနိုင်ပေသည်။ ထိုအခြေအနေမျိုး ရင်ဆိုင်ရသည့်အခါ ယေရှု၏သည်းခံခြင်းပုံသက်သေကိုတုပဖို့ အလွန်အရေးကြီး၏!—၁ ပေတရု ၂:၂၁-၂၃; ၃:၁၊ ၂။
၁၄-၁၆။ မိသားစုမှသူတို့ကို ယခင်က အတိုက်အခံလုပ်ခဲ့သူအချို့ အဘယ်ကြောင့်ပြောင်းလဲခဲ့သနည်း။
၁၄ ယခု ယေဟောဝါအား ဝတ်ပြုနေသူများစွာတို့သည် ကျမ်းစာလေ့လာခါစက ပြောင်းလဲမှုများပြုခဲ့သောကြောင့် သူတို့၏အိမ်ထောင်ဖက် သို့မဟုတ် မိသားစုမှတစ်ဦးဦး၏အတိုက်အခံပြုမှုကို ခံခဲ့ရသူများဖြစ်သည်။ အတိုက်အခံပြုသူများသည် ယေဟောဝါသက်သေများအကြောင်း အပျက်သဘောဝေဖန်ချက်များကို ကြားထား၍ဖြစ်မည်၊ မိသားစုအပေါ် မလိုလားအပ်သောသြဇာလွှမ်းမှု ဖြစ်ပေါ်လာမည်ကို စိုးရိမ်သောကြောင့် ဖြစ်ကောင်းဖြစ်မည်။ သူတို့၏စိတ်သဘောထားကို အဘယ်အရာက ပြောင်းလဲစေခဲ့သနည်း။ ဖြစ်ရပ်များစွာတွင် ကောင်းသောပုံသက်သေ ဖြစ်လေ့ရှိသည်။ ယုံကြည်သူသည် မိသားစုတာဝန်များကို ကျေပွန်စွာထမ်းဆောင်ရင်း၊ ကြိမ်းမောင်းဆဲဆိုမှုများကို သည်းခံရင်း ခရစ်ယာန်အစည်းအဝေးများကို မှန်မှန်တက်၍ ဓမ္မအမှုတွင် ပါဝင်ခြင်းတို့ဖြင့် ကျမ်းစာသွန်သင်ချက်ကို စွဲစွဲမြဲမြဲလိုက်နာကျင့်သုံးသည့်အတွက် တစ်ခါတစ်ရံ မိသားစုအတိုက်အခံပြုမှု လျော့နည်းသွားတတ်သည်။—၁ ပေတရု ၂:၁၂။
၁၅ အတိုက်အခံပြုသူသည် စိတ်စွန်းကွက်မှုကြောင့်ဖြစ်စေ၊ မာန်မာနကြောင့်ဖြစ်စေ ကျမ်းစာရှင်းပြချက်ကို နားမထောင်ဘဲနေပေမည်။ မျိုးချစ်စိတ်ပြင်းပြခဲ့သည်ဟုဆိုသော အမေရိကန်ပြည်ထောင်စုမှ အမျိုးသားတစ်ဦး ထိုသို့ဖြစ်ခဲ့သည်။ တစ်ကြိမ်တွင် သူ၏ဇနီး စည်းဝေးကြီးတစ်ခုသွားတက်နေစဉ် ထိုသူသည် အဝတ်အစားအားလုံးယူပြီး အိမ်မှဆင်းသွားခဲ့သည်။ နောက်တစ်ကြိမ်တွင် သေနတ်တစ်လက်နှင့် အိမ်မှထွက်သွားပြီး မိမိကိုယ်ကိုသတ်သေမည်ဟု ခြိမ်းခြောက်ခဲ့သည်။ စိတ်ပေါက်ရာပြုတတ်သော သူ၏အမူအကျင့်သည် ဇနီးသည်၏ဘာသာတရားကြောင့်ဖြစ်သည်ဟု သူအပြစ်ပုံချခဲ့သည်။ သို့သော် ဇနီးဖြစ်သူသည် ကျမ်းစာသွန်သင်ချက်ကို ဆက်လက်ကျင့်သုံးဖို့ကြိုးစားခဲ့သည်။ အနှစ်နှစ်ဆယ်အကြာတွင် သူသည်လည်း ဇနီးသည်ကဲ့သို့ ယေဟောဝါသက်သေတစ်ဦးဖြစ်လာလေသည်။ အယ်လ်ဘေးနီးယားနိုင်ငံမှ အမျိုးသမီးတစ်ဦးသည် သမီးဖြစ်သူ ယေဟောဝါသက်သေများနှင့် ကျမ်းစာလေ့လာပြီး နှစ်ခြင်းခံလိုက်သည့်အတွက် ဒေါသထွက်သည်။ သမီး၏ကျမ်းစာအုပ်ကို ၁၂ ကြိမ်တိုင် ဖျက်ဆီးပစ်ခဲ့သည်။ တစ်နေ့သော် သမီးဖြစ်သူ စားပွဲပေါ်တင်ထားခဲ့သော ကျမ်းစာအုပ်အသစ်ကို သူဖွင့်လိုက်သည်။ တိုက်တိုက်ဆိုင်ဆိုင် မဿဲ ၁၀:၃၆ ကိုဖွင့်မိလျက် ထိုတွင်ဖော်ပြထားချက်သည် မိမိနှင့်သက်ဆိုင်ကြောင်း မိခင်ဖြစ်သူ သိမြင်လေသည်။ မည်သို့ဆိုစေ သမီးအတွက် စိုးရိမ်ပူပန်သည့် မိခင်ဖြစ်သူသည် အခြားသက်သေခံများနှင့်အတူ အီတလီနိုင်ငံတွင် ကျင်းပမည့်စည်းဝေးပွဲသို့ လိုက်သွားမည့်သမီးအား သင်္ဘောဆိပ်လိုက်ပို့ခဲ့သည်။ ထိုအုပ်စု၏ ချစ်ချစ်ခင်ခင်ရှိပုံ၊ တစ်ယောက်ကိုတစ်ယောက်ဖက်ယမ်းကာ ပြုံးပျော်ရွှင်နေကြပုံများကို ကြားရမြင်ရသောအခါ မိခင်၏စိတ်သဘောထား ပြောင်းလဲစပြုလာလေသည်။ မကြာမီပင် ကျမ်းစာလေ့လာဖို့ သူသဘောတူလိုက်သည်။ ယနေ့ သူသည် အစပိုင်းတွင် အတိုက်အခံပြုသူတို့ကို ကြိုးစားကူညီပေးနေပါသည်။
၁၆ ဖြစ်ရပ်တစ်ခုတွင် လင်ယောက်ျားတစ်ဦးသည် ဘုရားသခင့်နိုင်ငံတော်ခန်းမသို့ထဲဝင်တော့မည့် ဇနီးသည်အား ဓားကိုင်၍ သံကုန်ဟစ် ကြိမ်းမောင်းခြိမ်းခြောက်ခဲ့သည်။ ဇနီးဖြစ်သူက “ဘုရားသခင့်နိုင်ငံတော်ခန်းမထဲဝင်လာပြီး ကိုယ်တိုင်ကြည့်ပါ” ဟု ညင်ညင်သာသာ ပြောလိုက်သည်။ သူဝင်ကြည့်ခဲ့ရာ နောက်ဆုံးတွင် ခရစ်ယာန်အကြီးအကဲတစ်ဦးဖြစ်လာလေသည်။
၁၇။ ခရစ်ယာန်အိမ်ထောင်စုတွင် တစ်ခါတစ်ရံ အခြေအနေတင်းမာလာပါက အဘယ်ကျမ်းစာသွန်သင်ချက်က အထောက်အကူပြုနိုင်သနည်း။
၁၇ သင့်မိသားစုတွင် အိမ်သားအားလုံး ခရစ်ယာန်ဖြစ်သည့်တိုင် လူ့မစုံလင်မှုကြောင့် မိသားစုအခြေအနေတင်းမာလာပြီး ကြမ်းကြမ်းတမ်းတမ်းပြောဆိုချိန်များပင် ရှိနိုင်ပေသည်။ ရှေးဧဖက်မြို့ရှိ ခရစ်ယာန်များ ဤသို့ဆုံးမခံခဲ့ရခြင်းသည် မှတ်သားဖွယ်ဖြစ်၏– “ခပ်သိမ်းသောစိတ်တိုခြင်း၊ စိတ်ဆိုးခြင်း၊ အမျက်ထွက်ခြင်း၊ အော်ဟစ်ငေါက်ငေါ်ခြင်း၊ သူ့အသရေပျက်အောင်ပြောဆိုခြင်းတို့ကိုလည်းကောင်း၊ ခပ်သိမ်းသောမနာလိုခြင်းကိုလည်းကောင်း သင်တို့မှပယ်ရှားကြလော့။” (ဧဖက် ၄:၃၁) သူတို့၏ပတ်ဝန်းကျင်၊ သူတို့ကိုယ်တိုင်၏မစုံလင်မှုနှင့် တချို့ကိစ္စရပ်များတွင် ယခင်ဘဝပုံစံတို့က ဧဖက်မြို့ရှိခရစ်ယာန်များကို ဩဇာလွှမ်းနေပုံရှိသည်။ အဘယ်အရာက သူတို့ကို ပြောင်းလဲစေမည်နည်း။ “[သူတို့၏] စိတ်ကို စေ့ဆော်သည့်စွမ်းအားဖြင့် အသစ်ပြုမူခံ” ကြဖို့လိုနေသည်။ (ဧဖက် ၄:၂၃၊ ကဘ) သမ္မာကျမ်းစာကို လေ့လာပြီး သူတို့အသက်တာအပေါ် မည်သို့သြဇာလွှမ်းစေသင့်ကြောင်း တွေးတောဆင်ခြင်၍ ခရစ်ယာန်ရောင်းရင်းများနှင့် ပေါင်းဖော်ကာ ဇွဲရှိရှိ ဆုတောင်းကြစဉ် သူတို့၏ဘဝအသက်တာတွင် ဘုရားသခင့်ဝိညာဉ်တော်အသီးများ ပိုမိုသီးပွင့်ထင်ရှားလာပေမည်။ “အချင်းချင်းကျေးဇူးပြုခြင်း၊ သနားစုံမက်ခြင်း၊ ဘုရားသခင်သည် ခရစ်တော်ကြောင့် သင်တို့၏အပြစ်ကိုလွှတ်တော်မူသကဲ့သို့ အချင်းချင်းအပြစ်လွှတ်” တတ်ရန် သူတို့သင်ယူကြရပေမည်။ (ဧဖက် ၄:၃၂) အခြားသူတို့ မည်သို့ပင်ပြုမူနေကြပါစေ ကျွန်ုပ်တို့မူ သည်းခံတတ်ဖို့၊ သနားကြင်နာ၊ စာနာထောက်ထား၊ ခွင့်လွှတ်တတ်ဖို့လိုသည်။ “အဘယ်သူကိုမျှ ရန်တုံ့မမူကြ” ရပါ။ (ရောမ ၁၂:၁၇၊ ၁၈) ဘုရားသခင်ကိုတုပသည့်အနေနှင့် စစ်မှန်သောချစ်ခြင်းမေတ္တာကို တင်ပြခြင်းသည် အစဉ်သဖြင့် လုပ်သင့်လုပ်အပ်ရာဖြစ်၏။—၁ ယောဟန် ၄:၈။
ခရစ်ယာန်တိုင်းအတွက် အကြံပေးချက်
၁၈။ ရှေးဧဖက်မြို့ရှိ အကြီးအကဲတစ်ဦးအတွက် ၂ တိမောသေ ၂:၂၄ ပါအကြံပြုချက်သည် အဘယ်ကြောင့်သင့်လျော်သနည်း၊ ယင်းသည် ခရစ်ယာန်တိုင်းကို မည်သို့အကျိုးပြုနိုင်သနည်း။
၁၈ ‘အဆိုးကို သည်းခံ’ နေဖို့ အကြံပေးချက်သည် ခရစ်ယာန်တိုင်းအတွက်ဖြစ်သည်။ (၂ တိမောသေ ၂:၂၄) သို့သော် ဦးဆုံးအကြံပေးတိုက်တွန်းခံရသူမှာ တိမောသေဖြစ်သည်၊ ဧဖက်မြို့တွင် အကြီးအကဲတစ်ဦးအဖြစ် အမှုထမ်းချိန်တွင် သူ၌ သည်းခံခြင်းတရားရှိဖို့လိုခဲ့သည်။ ထိုအသင်းတော်ရှိ လူအချို့သည် မိမိတို့၏ရှုမြင်ချက်များကို ပြောင်ပြောင်တင်းတင်း ထုတ်ဖော်ပြောဆိုတတ်ကြပြီး အယူဝါဒအမှားကို သွန်သင်နေ၏။ မောရှေပညတ်၏ရည်ရွယ်ရင်းကို သူတို့ကောင်းစွာသဘောမပေါက်ကြသောကြောင့် ယုံကြည်ခြင်း၊ မေတ္တာနှင့် ကောင်းသောသိစိတ်၏အရေးပါမှုကို ပိုင်းခြားနားလည်ခြင်းမရှိခဲ့ကြချေ။ ခရစ်တော်သွန်သင်ချက်များ၏ လိုရင်းချက်နှင့် ဘုရားသခင်အားဆည်းကပ်ဝတ်ပြုခြင်း၏ အရေးပါမှုတို့ကိုမသိ၊ မာနနှင့်ယစ်မူး၍ စကားကြောင့်သာငြင်းခုံသောအားဖြင့် ရန်ပွဲဖြစ်ခဲ့ကြသည်။ ဤအခြေအနေမျိုးကို ကိုင်တွယ်ဖြေရှင်းရန် တိမောသေသည် ကျမ်းစာအမှန်တရားဘက် မားမားမတ်မတ်ရပ်တည်ရမည်ဖြစ်၏၊ တစ်ကြိမ်တည်းတွင် ညီအစ်ကိုများနှင့် ဖြည်းညင်းစွာဆက်ဆံရမည်ဖြစ်သည်။ သိုးတော်စုသည် မိမိပိုင်ဆိုင်ရာမဟုတ်၊ ခရစ်ယာန်မေတ္တာနှင့် စည်းလုံးမှုတိုးပွားလာစေမည့်နည်းဖြင့် အခြားသူများနှင့် သူဆက်ဆံရမည်ကို မျက်မှောက်ခေတ်အကြီးအကဲများကဲ့သို့ သူသိထားသည်။—ဧဖက် ၄:၁-၃; ၁ တိမောသေ ၁:၃-၁၁; ၅:၁၊ ၂; ၆:၃-၅။
၁၉။ ကျွန်ုပ်တို့အားလုံး “နူးညံ့သိမ်မွေ့ခြင်း” ကိုရှာယူဖို့ အဘယ်ကြောင့် အရေးကြီးသနည်း။
၁၉ “နူးညံ့သိမ်မွေ့ခြင်း” ကိုရှာယူရန် မိမိ၏လူမျိုးတော်ကို ဘုရားသခင်တိုက်တွန်းပါသည်။ (ဇေဖနိ ၂:၃၊ ကဘ) “နူးညံ့သိမ်မွေ့ခြင်း” အတွက် ဟေဗြဲအသုံးအနှုန်းသည် ဒေါသစိတ်၊ လက်တုံ့ပြန်လိုစိတ်မရှိဘဲ ထိခိုက်နစ်နာမှုကို သည်းခံနိုင်စေသည့် စိတ်နေသဘောထားရှိကြောင်း ဖော်ပြသည်။ ခက်ခဲသောအခြေအနေများတွင်ပင် သည်းခံတတ်ရန်နှင့် ကိုယ်တော်အား ထိုက်လျော်စွာ ကိုယ်စားပြုသူများဖြစ်နိုင်ရန် ယေဟောဝါအား စိတ်ထက်သန်စွာ အသနားခံကြပါစို့။
သင်အဘယ်အရာသိရှိခဲ့သနည်း
• ရိုင်းပျစွာပြောဆိုခံရသောအခါ အဘယ်ကျမ်းချက်များက သင့်ကိုအထောက်အကူပြုနိုင်သနည်း။
• ရှောလုသည် အဘယ်ကြောင့် စော်ကားမော်ကားပြုမူခဲ့သနည်း။
• ယေရှု၏ပုံသက်သေက လူအမျိုးမျိုးနှင့် အလိုက်အထိုက် မည်သို့ဆက်ဆံတတ်စေသနည်း။
• အိမ်တွင် အချင်းချင်းသည်းခံ စကားပြောဆိုခြင်းမှ အဘယ်အကျိုးကျေးဇူးများရနိုင်သနည်း။
[လေ့လာရန်မေးခွန်းများ]
[စာမျက်နှာ ၂၆ ပါ ရုပ်ပုံ]
ရှောလုအကြောင်း ကြားသိထားသော်လည်း အာနနိသည် သူ့ကိုကြင်နာစွာဆက်ဆံခဲ့
[စာမျက်နှာ ၂၉ ပါ ရုပ်ပုံ]
မိသားစုတာဝန်ကျေပွန်သော ခရစ်ယာန်တစ်ဦးသည် မိသားစုအတိုက်အခံပြုမှုကို လျော့နည်းစေနိုင်
[စာမျက်နှာ ၃၀ ပါ ရုပ်ပုံ]
ခရစ်ယာန်များသည် ချစ်ခြင်းမေတ္တာနှင့် စည်းလုံးမှုကို တိုးပွားစေ