ကျောင်းတွင် ယေဟောဝါအားချီးမွမ်းခြင်း
ကျောင်းတွင် ယေဟောဝါအားချီးမွမ်းခြင်း
ကမ္ဘာတစ်ဝန်းရှိ ယေဟောဝါသက်သေလူငယ်များသည် ကျောင်းတွင် မိမိတို့၏အပြောအဆို၊ အမူအကျင့်တို့ဖြင့် ဘုရားသခင်အားချီးမွမ်းရန် နည်းလမ်းရှာတွေ့ခဲ့ကြသည်။ ၎င်းတို့၏လူငယ့်ဇွဲကို ဖော်ပြသော တွေ့ကြုံမှုတချို့ကို သတိပြုပါ။
ဂရိနိုင်ငံမှ သက်သေခံလူငယ်တစ်ဦးသည် ကမ္ဘာ့လေထုညစ်ညမ်းမှုအကြောင်း စာစီစာကုံးရေးသားရန် တာဝန်ရခဲ့သည်။ သူသည် ကင်းမျှော်စင်စာပေများအညွှန်းတွင် ရှာဖွေပြီးနောက် နိုးလော့!မဂ္ဂဇင်းပါ အကူအညီဖြစ်စေသော အကြောင်းအရာများကြောင့် စာစီစာကုံးရေးနိုင်ခဲ့ကြောင်း နိဂုံးပိုင်းတွင် ဖော်ပြခဲ့သည်။ ဆရာမက မိမိဖတ်ဖူးခဲ့သမျှတွင် အကောင်းဆုံးစာစီစာကုံးတစ်ပုဒ်ဖြစ်ကြောင်း ပြောလိုက်၏။ နောက်ပိုင်းတွင် ဆရာမက ဆွေးနွေးနှီးနှောပွဲတစ်ခု၌ ထိုအချက်အလက်များကို အသုံးပြုတင်ဆက်ခဲ့ရာ အကျိုးဖြစ်ထွန်းခဲ့သည်။ ထိုအခါ ညီအစ်မငယ်က “ဆရာ/ဆရာမများ—သူတို့မရှိလျှင် မည်သို့ဖြစ်နိုင်မည်နည်း” ဆောင်းပါးအပါအဝင် အခြားနိုးလော့!စာစောင်များကို ဆရာမအား ဝေငှရန် ဆုံးဖြတ်လိုက်သည်။ နောက်ပိုင်း၌ ဆရာမက အတန်းထဲတွင် နိုးလော့!မဂ္ဂဇင်းအကြောင်း ချီးမွမ်းပြောဆိုလိုက်ရာ အခြားကျောင်းသားများလည်း ဖတ်လို၍ တောင်းဆိုကြ၏။ သို့နှင့် ညီအစ်မငယ်သည် အခြားဆောင်းပါးများကို ၎င်းတို့ဖတ်ရှုနိုင်ရန် ကျောင်းသို့ မဂ္ဂဇင်းစာစောင်များ ယူလာခဲ့ရသည်။
အာဖရိကနိုင်ငံ၊ ဘီနင်မြို့တွင် ဆယ်ကျော်သက်ခရစ်ယာန်တစ်ဦးသည် တစ်မူထူးခြားသောဖိအားကို ခံနေရသည်။ ထုံးစံအရ သူ့ကျောင်းမှ ကျောင်းသားတချို့၏မိဘများက ၎င်းတို့၏ကလေးများ စာမေးပွဲမဖြေမီ ခက်ခဲသောဘာသာရပ်များအတွက် ဝိုင်းကျူရှင်ထားပေးဖို့ စီစဉ်ကြသည်။ သို့သော် ကျူရှင်ဆရာများက စနေနေ့နံနက်ပိုင်းကို ကျူရှင်ချိန်အဖြစ် ရွေးချယ်ခဲ့သည်။ “စနေနေ့မနက်ဟာ အသင်းတော်တစ်ခုလုံး အမှုဆောင်ထွက်ကြတဲ့အချိန်ပဲ။ အဲ့ဒီအချိန်ဟာ ကျွန်မအတွက် အပျော်ဆုံးအချိန်ဖြစ်လို့ ဘာနဲ့မှမလဲနိုင်ဘူး!” ဟုသက်သေခံငယ်လေးက ဆိုခဲ့သည်။ သက်သေခံတစ်ဦးဖြစ်သော ကြင်ဖော်မဲ့ဖခင်ကလည်း လိုက်လျောကာ မိဘများနှင့်တိုင်ပင်ပြီး ကျူရှင်ဆရာများကို အချိန်ပြောင်းပေးဖို့ တောင်းဆိုခဲ့၏။ သူတို့အားလုံး လက်မခံကြချေ။ ထိုအခါ ညီအစ်မငယ်က ကျူရှင်မတက်ဖို့ ဆုံးဖြတ်လိုက်ပြီး အသင်းတော်လိုက် ဟောပြောခြင်းလုပ်ငန်းတွင် ပါဝင်ခဲ့သည်။ အတန်းဖော်များက သူ့ကိုလှောင်ပြောင်ကြကာ သက်သေခံထွက်ခြင်းအပြင် သူ၏ဘုရားသခင်ကို စွန့်လွှတ်လိုက်ရန် တိုက်တွန်းခဲ့ကြသည်။ ညီအစ်မငယ် စာမေးပွဲကျလိမ့်မည်ဟု သူတို့တထစ်ချတွက်ထားကြ၏။ ဖြစ်ပုံမှာ ကျူရှင်ယူသော ကျောင်းသားတစ်စုလုံး စာမေးပွဲကျပြီး ကျွန်ုပ်တို့၏ညီအစ်မငယ်မူ စာမေးပွဲအောင်သွားသည်။ သူတို့ ဆက်မလှောင်ပြောင်ရဲတော့ပါ။ ယင်းအစား ယခုအခါ အတန်းဖော်များက “မင်းရဲ့ဘုရားသခင်ကို ဆက်ပြီးကိုးကွယ်သင့်တယ်” ဟုသူ့ကိုပြောနေကြ၏။
ချက်ပြည်သူ့သမ္မတနိုင်ငံတွင် ၁၂ နှစ်အရွယ် မိန်းကလေးတစ်ဦးသည် စာအုပ်တစ်အုပ်ကို နှုတ်တိုက်တင်ပြပြောဆိုရန် တာဝန်ရသည်။ သူ၏မိခင်က အသက်ရှင်ခဲ့သမျှတွင် အကြီးမြတ်ဆုံးလူသား စာအုပ်ကိုအသုံးပြုရန် အကြံပြုခဲ့၏။ သူ၏နိဒါန်းကို ဤသို့အစပြုမေးလိုက်သည်– “အသက်ရှင်ခဲ့သမျှမှာ ဘယ်သူအကြီးမြတ်ဆုံးလို့ထင်ပါသလဲ။” ထို့နောက် ယေရှု၏မြေကြီးအသက်တာနှင့် ကိုယ်တော့်သွန်သင်ချက်များအကြောင်း သူရှင်းပြပြီးသော် “ခွင့်လွှတ်ခြင်းဆိုင်ရာသင်ခန်းစာ” ခေါင်းစဉ်ကို ဆွေးနွေးတင်ဆက်ခဲ့သည်။ ဆရာမက “သမီးပြောခဲ့သမျှမှာ ဒါက အကောင်းဆုံးပဲ!” ဟုဆိုကာ စာအုပ်တစ်အုပ်ကို ကျေးဇူးတင်စွာလက်ခံယူခဲ့၏။ အတန်းသားတချို့လည်း စာအုပ်ကို ရယူလိုကြသည်။ နောက်တစ်နေ့တွင် ထိုမိန်းကလေးသည် စာအုပ် ၁၈ အုပ်ဝေငှလိုက်ရ၍ ပီတိဖြစ်ခဲ့သည်။
အဆိုပါလူငယ်များသည် ကျောင်းတွင် ယေဟောဝါအား ချီးမွမ်းခွင့်ရ၍ အလွန်ပျော်ရွှင်နေကြသည်။ ကျွန်ုပ်တို့အားလုံးလည်း ထိုလူငယ်များ၏ဇွဲကို တုပနိုင်ကြပါသည်။